2. ஸிவகத்தே²ரகா³தா²வண்ணனா

அனிச்சானி க³ஹகானீதி ஆயஸ்மதோ ஸிவகத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ப⁴க³வந்தம் பிண்டா³ய சரந்தம் பஸ்ஸித்வா பஸன்னமானஸோ பத்தம் ஆதா³ய கும்மாஸஸ்ஸ பூரேத்வா அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ராஜக³ஹே ப்³ராஹ்மணகுலே நிப்³ப³த்தி, ஸிவகோதிஸ்ஸ நாமம் அஹோஸி. ஸோ வயப்பத்தோ விஜ்ஜாஸிப்பேஸு நிப்ப²த்திம் க³தோ நேக்க²ம்மஜ்ஜா²ஸயதாய காமே பஹாய பரிப்³பா³ஜகபப்³ப³ஜ்ஜம் பப்³ப³ஜித்வா விசரந்தோ ஸத்தா²ரம் உபஸங்கமித்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மம் கரோந்தோ நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 2.56.117-121) –

‘‘ஏஸனாய சரந்தஸ்ஸ, விபஸ்ஸிஸ்ஸ மஹேஸினோ;

ரித்தகம் பத்தம் தி³ஸ்வான, கும்மாஸம் பூரயிம் அஹம்.

‘‘ஏகனவுதிதோ கப்பே, யம் பி⁴க்க²மத³தி³ம் ததா³;

து³க்³க³திம் நாபி⁴ஜானாமி, கும்மாஸஸ்ஸ இத³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அஞ்ஞம் ப்³யாகரோந்தோ –

183. ‘‘அனிச்சானி க³ஹகானி, தத்த² தத்த² புனப்புனம்;

க³ஹகாரம் க³வேஸந்தோ, து³க்கா² ஜாதி புனப்புனம்.

184. ‘‘க³ஹகாரக தி³ட்டோ²ஸி, புன கே³ஹம் ந காஹஸி;

ஸப்³பா³ தே பா²ஸுகா ப⁴க்³கா³, தூ²ணிகா ச விதா³லிதா;

விமரியாதி³கதம் சித்தம், இதே⁴வ வித⁴மிஸ்ஸதீ’’தி. – கா³தா²த்³வயம் அபா⁴ஸி;

தத்த² அனிச்சானி க³ஹகானி, தத்த² தத்த² புனப்புனந்தி தஸ்மிம் தஸ்மிம் ப⁴வே புனப்புனம் நிப்³ப³த்தமானானி க³ஹகானி அத்தபா⁴வகே³ஹானி ந நிப்³பா³னி அனவட்டி²தானி இத்தரானி பரித்தகாலானி. க³ஹகாரம் க³வேஸந்தோதி இமஸ்ஸ அத்தபா⁴வகே³ஹஸ்ஸ காரகம் தண்ஹாவட்³ட⁴கிம் பரியேஸந்தோ ஏத்தகம் காலம் அனுவிசரிந்தி அதி⁴ப்பாயோ. து³க்கா² ஜாதி புனப்புனந்தி இத³ம் க³ஹகாரகக³வேஸனஸ்ஸ காரணவசனம். யஸ்மா ஜராப்³யாதி⁴மரணமிஸ்ஸதாய ஜாதி நாமேஸா புனப்புனம் உபக³ந்தும் து³க்கா², ந ச ஸா தஸ்மிம் அதி³ட்டே² நிவத்ததி, தஸ்மா தம் க³வேஸந்தோ விசரிந்தி அத்தோ².

க³ஹகாரக தி³ட்டோ²ஸீதி இதா³னி பன யேன ஸோ ஸக்கா த³ட்டு²ம், தேன அரியமக்³க³ஞாணசக்கு²னா க³ஹகாரக தி³ட்டோ² அஸி. புன கே³ஹந்தி புன இமஸ்மிம் ஸம்ஸாரவட்டே அத்தபா⁴வஸங்கா²தம் மம கே³ஹம் ந காஹஸி ந கரிஸ்ஸஸி. ஸப்³பா³ தே பா²ஸுகா ப⁴க்³கா³தி தவ ஸப்³பா³ அனவஸேஸகிலேஸபா²ஸுகா மயா ப⁴க்³கா³. தூ²ணிகா ச விதா³லிதாதி இதா³னி தயா காதப்³ப³ஸ்ஸ அத்தபா⁴வகே³ஹஸ்ஸ அவிஜ்ஜாஸங்கா²தா கண்ணிகா ச பி⁴ன்னா. விமரியாதி³கதம் சித்தந்தி மம சித்தம் விக³தந்தம் கதம், ஆயதிம் அனுப்பத்தித⁴ம்மதம் ஆபாதி³தம். ததோ ஏவ இதே⁴வ வித⁴மிஸ்ஸதி இமஸ்மிம்யேவ ப⁴வே வித்³த⁴ம்ஸிஸ்ஸதி, சரிமகசித்தனிரோதே⁴ன நிருஜ்ஜி²ஸ்ஸதீதி அத்தோ².

ஸிவகத்தே²ரகா³தா²வண்ணனா நிட்டி²தா.