7. திஸ்ஸத்தே²ரகா³தா²வண்ணனா

ப³ஹூ ஸபத்தே லப⁴தீதி ஆயஸ்மதோ திஸ்ஸத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ பியத³ஸ்ஸிஸ்ஸ ப⁴க³வதோ காலே ப்³ராஹ்மணகுலே நிப்³ப³த்தித்வா விஞ்ஞுதம் பத்தோ ஸிப்பேஸு நிப்ப²த்திம் க³ந்த்வா காமேஸு ஆதீ³னவம் தி³ஸ்வா க⁴ராவாஸம் பஹாய தாபஸபப்³ப³ஜ்ஜம் பப்³ப³ஜித்வா அரஞ்ஞாயதனே ஸாலவனே அஸ்ஸமம் காரேத்வா வஸதி. ப⁴க³வா தஸ்ஸ அனுக்³க³ண்ஹனத்த²ம் அஸ்ஸமஸ்ஸ அவிதூ³ரே ஸாலவனே நிரோத⁴ம் ஸமாபஜ்ஜித்வா நிஸீதி³. ஸோ அஸ்ஸமதோ நிக்க²மித்வா ப²லாப²லத்தா²ய க³ச்ச²ந்தோ ப⁴க³வந்தம் தி³ஸ்வா பஸன்னமானஸோ சத்தாரோ த³ண்டே³ ட²பேத்வா ப⁴க³வதோ உபரி புப்பி²தாஹி ஸாலஸாகா²ஹி ஸாகா²மண்ட³பம் கத்வா ஸத்தாஹம் நவனவேஹி ஸாலபுப்பே²ஹி ப⁴க³வந்தம் பூஜேந்தோ அட்டா²ஸி பு³த்³தா⁴ரம்மணம் பீதிம் அவிஜஹந்தோ. ஸத்தா² ஸத்தாஹஸ்ஸ அச்சயேன நிரோத⁴தோ வுட்ட²ஹித்வா பி⁴க்கு²ஸங்க⁴ம் சிந்தேஸி. தாவதே³வ ஸதஸஹஸ்ஸமத்தா கீ²ணாஸவா ஸத்தா²ரம் பரிவாரேஸும். ப⁴க³வா தஸ்ஸ பா⁴வினிம் ஸம்பத்திம் விபா⁴வேந்தோ அனுமோத³னம் வத்வா பக்காமி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரம் ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ ராஜக³ஹே ப்³ராஹ்மணகுலே நிப்³ப³த்தித்வா திஸ்ஸோதி லத்³த⁴னாமோ வயப்பத்தோ திண்ணம் வேதா³னம் பாரகூ³ ஹுத்வா பஞ்சமத்தானி மாணவகஸதானி மந்தே வாசேந்தோ லாப⁴க்³க³யஸக்³க³ப்பத்தோ ஹுத்வா ஸத்து² ராஜக³ஹக³மனே பு³த்³தா⁴னுபா⁴வம் தி³ஸ்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனம் பட்ட²பேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 2.49.190-220) –

‘‘அஜ்ஜோ²கா³ஹேத்வா ஸாலவனம், ஸுகதோ அஸ்ஸமோ மம;

ஸாலபுப்பே²ஹி ஸஞ்ச²ன்னோ, வஸாமி விபினே ததா³.

‘‘பியத³ஸ்ஸீ ச ப⁴க³வா, ஸயம்பூ⁴ அக்³க³புக்³க³லோ;

விவேககாமோ ஸம்பு³த்³தோ⁴, ஸாலவனமுபாக³மி.

‘‘அஸ்ஸமா அபி⁴னிக்க²ம்ம, பவனம் அக³மாஸஹம்;

மூலப²லம் க³வேஸந்தோ, ஆஹிண்டா³மி வனே ததா³.

‘‘தத்த²த்³த³ஸாஸிம் ஸம்பு³த்³த⁴ம், பியத³ஸ்ஸிம் மஹாயஸம்;

ஸுனிஸின்னம் ஸமாபன்னம், விரோசந்தம் மஹாவனே.

‘‘சதுத³ண்டே³ ட²பேத்வான, பு³த்³த⁴ஸ்ஸ உபரீ அஹம்;

மண்ட³பம் ஸுகதம் கத்வா, ஸாலபுப்பே²ஹி சா²த³யிம்.

‘‘ஸத்தாஹம் தா⁴ரயித்வான, மண்ட³பம் ஸாலசா²தி³தம்;

தத்த² சித்தம் பஸாதே³த்வா, பு³த்³த⁴ஸேட்ட²மவந்த³ஹம்.

‘‘ப⁴க³வா தம்ஹி ஸமயே, வுட்ட²ஹித்வா ஸமாதி⁴தோ;

யுக³மத்தம் பேக்க²மானோ, நிஸீதி³ புரிஸுத்தமோ.

‘‘ஸாவகோ வருணோ நாம, பியத³ஸ்ஸிஸ்ஸ ஸத்து²னோ;

வஸீஸதஸஹஸ்ஸேஹி, உபக³ச்சி² வினாயகம்.

‘‘பியத³ஸ்ஸீ ச ப⁴க³வா, லோகஜேட்டோ² நராஸபோ⁴;

பி⁴க்கு²ஸங்கே⁴ நிஸீதி³த்வான, ஸிதம் பாதுகரீ ஜினோ.

‘‘அனுருத்³தோ⁴ உபட்டா²கோ, பியத³ஸ்ஸிஸ்ஸ ஸத்து²னோ;

ஏகம்ஸம் சீவரம் கத்வா, அபுச்சி²த்த² மஹாமுனிம்.

‘‘கோ நு கோ² ப⁴க³வா ஹேது, ஸிதகம்மஸ்ஸ ஸத்து²னோ;

காரணே விஜ்ஜமானம்ஹி, ஸத்தா² பாதுகரே ஸிதம்.

‘‘ஸத்தாஹம் ஸாலச்ச²த³னம், யோ மே தா⁴ரேஸி மாணவோ;

தஸ்ஸ கம்மம் ஸரித்வான, ஸிதம் பாதுகரிம் அஹம்.

‘‘அனோகாஸம் ந பஸ்ஸாமி, யத்த² புஞ்ஞம் விபச்சதி;

தே³வலோகே மனுஸ்ஸே வா, ஓகாஸோவ ந ஸம்மதி.

‘‘தே³வலோகே வஸந்தஸ்ஸ, புஞ்ஞகம்மஸமங்கி³னோ;

யாவதா பரிஸா தஸ்ஸ, ஸாலச்ச²ன்னா ப⁴விஸ்ஸதி.

‘‘தத்த² தி³ப்³பே³ஹி நச்சேஹி, கீ³தேஹி வாதி³தேஹி ச;

ரமிஸ்ஸதி ஸதா³ ஸந்தோ, புஞ்ஞகம்மஸமாஹிதோ.

‘‘யாவதா பரிஸா தஸ்ஸ, க³ந்த⁴க³ந்தீ⁴ ப⁴விஸ்ஸதி;

ஸாலஸ்ஸ புப்ப²வஸ்ஸோ ச, பவஸ்ஸிஸ்ஸதி தாவதே³.

‘‘ததோ சுதோயம் மனுஜோ, மானுஸம் ஆக³மிஸ்ஸதி;

இதா⁴பி ஸாலச்ச²த³னம், ஸப்³ப³காலம் த⁴ரிஸ்ஸதி.

‘‘இத⁴ நச்சஞ்ச கீ³தஞ்ச, ஸம்மதாளஸமாஹிதம்;

பரிவாரேஸ்ஸந்தி மம் நிச்சம், பு³த்³த⁴பூஜாயித³ம் ப²லம்.

‘‘உக்³க³ச்ச²ந்தே ச ஸூரியே, ஸாலவஸ்ஸம் பவஸ்ஸதி;

புஞ்ஞகம்மேன ஸம்யுத்தம், வஸ்ஸதே ஸப்³ப³காலிகம்.

‘‘அட்டா²ரஸே கப்பஸதே, ஓக்காககுலஸம்ப⁴வோ;

கோ³தமோ நாம கோ³த்தேன, ஸத்தா² லோகே ப⁴விஸ்ஸதி.

‘‘தஸ்ஸ த⁴ம்மேஸு தா³யாதோ³, ஓரஸோ த⁴ம்மனிம்மிதோ;

ஸப்³பா³ஸவே பரிஞ்ஞாய, நிப்³பா³யிஸ்ஸதினாஸவோ.

‘‘த⁴ம்மம் அபி⁴ஸமேந்தஸ்ஸ, ஸாலச்ச²ன்னம் ப⁴விஸ்ஸதி;

சிதகே ஜா²யமானஸ்ஸ, ச²த³னம் தத்த² ஹேஸ்ஸதி.

‘‘விபாகம் கித்தயித்வான, பியத³ஸ்ஸீ மஹாமுனி;

பரிஸாய த⁴ம்மம் தே³ஸேஸி, தப்பேந்தோ த⁴ம்மவுட்டி²யா.

‘‘திம்ஸகப்பானி தே³வேஸு, தே³வரஜ்ஜமகாரயிம்;

ஸட்டி² ச ஸத்தக்க²த்துஞ்ச, சக்கவத்தீ அஹோஸஹம்.

‘‘தே³வலோகா இதா⁴க³ந்த்வா, லபா⁴மி விபுலம் ஸுக²ம்;

இதா⁴பி ஸாலச்ச²த³னம், மண்ட³பஸ்ஸ இத³ம் ப²லம்.

‘‘அயம் பச்சி²மகோ மய்ஹம், சரிமோ வத்ததே ப⁴வோ;

இதா⁴பி ஸாலச்ச²த³னம், ஹேஸ்ஸதி ஸப்³ப³காலிகம்.

‘‘மஹாமுனிம் தோஸயித்வா, கோ³தமம் ஸக்யபுங்க³வம்;

பத்தோம்ஹி அசலம் டா²னம், ஹித்வா ஜயபராஜயம்.

‘‘அட்டா²ரஸே கப்பஸதே, யம் பு³த்³த⁴மபி⁴பூஜயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ஸோ அரஹத்தம் பன பத்வா விஸேஸதோ லாப⁴க்³க³யஸக்³க³ப்பத்தோ அஹோஸி. தத்த² கேசி புது²ஜ்ஜனபி⁴க்கூ² தே²ரஸ்ஸ லாப⁴ஸக்காரம் தி³ஸ்வா பா³லபா⁴வேன அஸஹனாகாரம் பவேதே³ஸும். தே²ரோ தம் ஞத்வா லாப⁴ஸக்காரே ஆதீ³னவம் தத்த² அத்தனோ அலக்³க³பா⁴வஞ்ச பகாஸேந்தோ –

153. ‘‘ப³ஹூ ஸபத்தே லப⁴தி, முண்டோ³ ஸங்கா⁴டிபாருதோ;

லாபீ⁴ அன்னஸ்ஸ பானஸ்ஸ, வத்த²ஸ்ஸ ஸயனஸ்ஸ ச.

154. ‘‘ஏதமாதீ³னவம் ஞத்வா, ஸக்காரேஸு மஹப்³ப⁴யம்;

அப்பலாபோ⁴ அனவஸ்ஸுதோ, ஸதோ பி⁴க்கு² பரிப்³ப³ஜே’’தி. –

கா³தா²த்³வயம் அபா⁴ஸி.

தஸ்ஸத்தோ² – ஸிக²ம்பி அஸேஸேத்வா முண்டி³தகேஸதாய முண்டோ³, சி²ந்தி³த்வா ஸங்கா⁴டிதகாஸாவதா⁴ரிதாய ஸங்கா⁴டிபாருதோ, ஏவம் வேவண்ணியம் அஜ்ஜு²பக³தோ பராயத்தவுத்திகோ பப்³ப³ஜிதோ ஸசே அன்னபானாதீ³னம் லாபீ⁴ ஹோதி, ஸோபி ப³ஹூ ஸபத்தே லப⁴தி, தஸ்ஸ உஸூயந்தா ப³ஹூ ஸம்ப⁴வந்தி. தஸ்மா ஏதம் ஏவரூபம் லாப⁴ஸக்காரேஸுமஹப்³ப⁴யம் விபுலப⁴யம் ஆதீ³னவம் தோ³ஸம் விதி³த்வா அப்பிச்ச²தம் ஸந்தோஸஞ்ச ஹத³யே ட²பேத்வா அனவஜ்ஜுப்பாத³ஸ்ஸாபி உப்பன்னஸ்ஸ லாப⁴ஸ்ஸ பரிவஜ்ஜனேன அப்பலாபோ⁴, ததோ ஏவ தத்த² தண்ஹாவஸ்ஸுதாபா⁴வேன அனவஸ்ஸுதோ, ஸம்ஸாரே ப⁴யஸ்ஸ இக்க²னதோ பி⁴ன்னகிலேஸதாய வா பி⁴க்கு² ஸந்துட்டி²ட்டா²னீயஸ்ஸ ஸதிஸம்பஜஞ்ஞஸ்ஸ வஸேன ஸதோ ஹுத்வா பரிப்³ப³ஜே சரேய்ய விஹரேய்யாதி. தம் ஸுத்வா தே பி⁴க்கூ² தாவதே³வ தே²ரம் க²மாபேஸும்.

திஸ்ஸத்தே²ரகா³தா²வண்ணனா நிட்டி²தா.