10. த³ஸமவக்³கோ³

1. பரிபுண்ணகத்தே²ரகா³தா²வண்ணனா

ந ததா² மதம் ஸதரஸந்தி ஆயஸ்மதோ பரிபுண்ணகத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ த⁴ம்மத³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஸத்த²ரி பரினிப்³பு³தே ஸத்து² சேதியே புப்பா²தீ³ஹி உளாரம் பூஜம் அகாஸி. ஸோ தேன புஞ்ஞகம்மேன தே³வேஸு நிப்³ப³த்தித்வா அபராபரம் புஞ்ஞானி கத்வா ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ கபிலவத்து²ஸ்மிம் ஸக்யராஜகுலே நிப்³ப³த்தித்வா விஞ்ஞுதம் பத்தோ பரிபுண்ணவிப⁴வதாய பரிபுண்ணகோதி பஞ்ஞாயித்த². ஸோ விப⁴வஸம்பன்னதாய ஸப்³ப³காலம் ஸதரஸம் நாம ஆஹாரம் பரிபு⁴ஞ்ஜந்தோ ஸத்து² மிஸ்ஸகாஹாரபரிபோ⁴க³ம் ஸுத்வா ‘‘தாவ ஸுகு²மாலோபி ப⁴க³வா நிப்³பா³னஸுக²ம் அபேக்கி²த்வா யதா² ததா² யாபேதி, கஸ்மா மயம் ஆஹாரகி³த்³தா⁴ ஹுத்வா ஆஹாரஸுத்³தி⁴கா ப⁴விஸ்ஸாம, நிப்³பா³னஸுக²மேவ பன அம்ஹேஹி பரியேஸிதப்³ப³’’ந்தி ஸம்ஸாரே ஜாதஸம்வேகோ³ க⁴ராவாஸம் பஹாய ஸத்து² ஸந்திகே பப்³ப³ஜித்வா ப⁴க³வதா காயக³தாஸதிகம்மட்டா²னே நியோஜிதோ தத்த² பதிட்டா²ய படிலத்³த⁴ஜா²னம் பாத³கம் கத்வா விபஸ்ஸனாய கம்மம் கரோந்தோ விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 1.15.5-9) –

‘‘நிப்³பு³தே லோகனாத²ம்ஹி, த⁴ம்மத³ஸ்ஸீனராஸபே⁴;

ஆரோபேஸிம் த⁴ஜத்த²ம்ப⁴ம், பு³த்³த⁴ஸேட்ட²ஸ்ஸ சேதியே.

‘‘நிஸ்ஸேணிம் மாபயித்வான, தூ²பஸேட்ட²ம் ஸமாருஹிம்;

ஜாதிபுப்ப²ம் க³ஹேத்வான, தூ²பம்ஹி அபி⁴ரோபயிம்.

‘‘அஹோ பு³த்³தோ⁴ அஹோ த⁴ம்மோ, அஹோ நோ ஸத்து² ஸம்பதா³;

து³க்³க³திம் நாபி⁴ஜானாமி, தூ²பபூஜாயித³ம் ப²லம்.

‘‘சதுன்னவுதிதோ கப்பே, தூ²பஸீக²ஸனாமகா;

ஸோளஸாஸிம்ஸு ராஜானோ, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா த⁴ம்மே கா³ரவப³ஹுமானேன பீதிவேக³விஸ்ஸட்ட²ம் உதா³னம் உதா³னேந்தோ ‘‘ந ததா² மதம் ஸதரஸ’’ந்தி கா³த²ம் அபா⁴ஸி.

91. தத்த² ந ததா² மதம் ஸதரஸம், ஸுத⁴ன்னம் யம் மயஜ்ஜ பரிபு⁴த்தந்தி ததா²தி தேன பகாரேன. மதந்தி அபி⁴மதம். ஸதரஸந்தி ஸதரஸபோ⁴ஜனம் ‘‘ஸதரஸபோ⁴ஜனம் நாம ஸதபாகஸப்பிஆதீ³ஹி அபி⁴ஸங்க²தம் போ⁴ஜன’’ந்தி வத³ந்தி. அத² வா அனேகத்தோ² ஸதஸத்³தோ³ ‘‘ஸதஸோ ஸஹஸ்ஸஸோ’’திஆதீ³ஸு விய. தஸ்மா யம் போ⁴ஜனம் அனேகஸூபம் அனேகப்³யஞ்ஜனம், தம் அனேகரஸதாய ‘‘ஸதரஸ’’ந்தி வுச்சதி, நானாரஸபோ⁴ஜனந்தி அத்தோ². ஸுதா⁴ ஏவ அன்னம் ஸுதா⁴போ⁴ஜனம் தே³வானம் ஆஹாரோ. யம் மயஜ்ஜ பரிபு⁴த்தந்தி யம் மயா அஜ்ஜ அனுபு⁴த்தம். ‘‘யம் மயா பரிபு⁴த்த’’ந்தி ச இத³ம் ‘‘ஸதரஸம் ஸுத⁴ன்ன’’ந்தி ஏத்தா²பி யோஜேதப்³ப³ம். இத³ம் வுத்தம் ஹோதி – யம் மயா அஜ்ஜ ஏதரஹி நிரோத⁴ஸமாபத்திஸமாபஜ்ஜனவஸேன ப²லஸமாபத்திஸமாபஜ்ஜனவஸேன ச அச்சந்தமேவ ஸந்தம் பணீதம் நிப்³பா³னஸுக²ம் பரிபு⁴ஞ்ஜியமானம், தம் யதா² மதம் அபி⁴மதம் ஸம்பா⁴விதம் ததா² ராஜகாலே மயா பரிபு⁴த்தம் ஸதரஸபோ⁴ஜனம் தே³வத்தபா⁴வே பரிபு⁴த்தம் ஸுத⁴ன்னஞ்ச ந மதம் நாபி⁴மதம். கஸ்மா? இத³ஞ்ஹி அரியனிஸேவிதம் நிராமிஸம் கிலேஸானம் அவத்து²பூ⁴தம், தம் பன புது²ஜ்ஜனஸேவிதம் ஸாமிஸம் கிலேஸானம் வத்து²பூ⁴தம், தம் இமஸ்ஸ ஸங்க²ம்பி கலம்பி கலபா⁴க³ம்பி ந உபேதீதி. இதா³னி ‘‘யம் மயஜ்ஜ பரிபு⁴த்த’’ந்தி வுத்தத⁴ம்மம் தே³ஸேந்தோ அபரிமிதத³ஸ்ஸினா கோ³தமேன, பு³த்³தே⁴ன ஸுதே³ஸிதோ த⁴ம்மோ’’தி ஆஹ. தஸ்ஸத்தோ² – அபரிமிதம் அபரிச்சி²ன்னம் உப்பாத³வயாபா⁴வதோ ஸந்தம் அஸங்க²ததா⁴தும் ஸயம்பூ⁴ஞாணேன பஸ்ஸீ, அபரிமிதஸ்ஸ அனந்தாபரிமேய்யஸ்ஸ ஞேய்யஸ்ஸ த³ஸ்ஸாவீதி தேன அபரிமிதத³ஸ்ஸினா கோ³தமகோ³த்தேன ஸம்மாஸம்பு³த்³தே⁴ன ‘‘க²யம் விராக³ம் அமதம் பணீத’’ந்தி (கு². பா. 6.4; ஸு. நி. 227) ச ‘‘மத³னிம்மத³னோ பிபாஸவினயோ’’ (அ. நி. 4.34; இதிவு. 90) ‘‘ஸப்³ப³ஸங்கா²ரஸமதோ²’’தி (அ. நி. 5.140; 10.6) ச ஆதி³னா ஸுட்டு² தே³ஸிதோ த⁴ம்மோ, நிப்³பா³னம் மயா அஜ்ஜ பரிபு⁴த்தந்தி யோஜனா.

பரிபுண்ணகத்தே²ரகா³தா²வண்ணனா நிட்டி²தா.

2. விஜயத்தே²ரகா³தா²வண்ணனா

யஸ்ஸாஸவா பரிக்கீ²ணாதி ஆயஸ்மதோ விஜயத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ பியத³ஸ்ஸிஸ்ஸ ப⁴க³வதோ காலே விப⁴வஸம்பன்னே குலே நிப்³ப³த்தித்வா விஞ்ஞுதம் பத்தோ ஸத்த²ரி பரினிப்³பு³தே தஸ்ஸ தூ²பஸ்ஸ ரதனக²சிதம் வேதி³கம் காரேத்வா தத்த² உளாரம் வேதி³காமஹம் காரேஸி. ஸோ தேன புஞ்ஞகம்மேன அனேகஸதே அத்தபா⁴வே மணிஓபா⁴ஸேன விசரி. ஏவம் தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணகுலே நிப்³ப³த்தி, விஜயோதிஸ்ஸ நாமம் அஹோஸி. ஸோ வயப்பத்தோ ப்³ராஹ்மணவிஜ்ஜாஸு நிப்ப²த்திம் க³தோ தாபஸபப்³ப³ஜ்ஜம் பப்³ப³ஜித்வா அரஞ்ஞாயதனே ஜா²னலாபீ⁴ ஹுத்வா விஹரந்தோ பு³த்³து⁴ப்பாத³ம் ஸுத்வா உப்பன்னப்பஸாதோ³ ஸத்து² ஸந்திகம் உபஸங்கமித்வா ஸத்தா²ரம் வந்தி³த்வா ஏகமந்தம் நிஸீதி³. தஸ்ஸ ஸத்தா² த⁴ம்மம் தே³ஸேஸி. ஸோ த⁴ம்மம் ஸுத்வா பப்³ப³ஜித்வா விபஸ்ஸனம் பட்ட²பேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.15.10-14) –

‘‘நிப்³பு³தே லோகனாத²ம்ஹி, பியத³ஸ்ஸீனருத்தமே;

பஸன்னசித்தோ ஸுமனோ, முத்தாவேதி³மகாஸஹம்.

‘‘மணீஹி பரிவாரேத்வா, அகாஸிம் வேதி³முத்தமம்;

வேதி³காய மஹம் கத்வா, தத்த² காலங்கதோ அஹம்.

‘‘யம் யம் யோனுபபஜ்ஜாமி, தே³வத்தம் அத² மானுஸம்;

மணீ தா⁴ரேந்தி ஆகாஸே, புஞ்ஞகம்மஸ்ஸித³ம் ப²லம்.

‘‘ஸோளஸிதோ கப்பஸதே, மணிப்பபா⁴ஸனாமகா;

ச²த்திம்ஸாஸிம்ஸு ராஜானோ, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அஞ்ஞம் ப்³யாகரோந்தோ ‘‘யஸ்ஸாஸவா பரிக்கீ²ணா’’தி கா³த²ம் அபா⁴ஸி.

92. தத்த² யஸ்ஸாஸவா பரிக்கீ²ணாதி யஸ்ஸ உத்தமபுக்³க³லஸ்ஸ காமாஸவாத³யோ சத்தாரோ ஆஸவா ஸப்³ப³ஸோ கீ²ணா அரியமக்³கே³ன கே²பிதா. ஆஹாரே ச அனிஸ்ஸிதோதி யோ ச ஆஹாரே தண்ஹாதி³ட்டி²னிஸ்ஸயேஹி அனிஸ்ஸிதோ அக³தி⁴தோ அனஜ்ஜா²பன்னோ, நித³ஸ்ஸனமத்தம், ஆஹாரஸீஸேனேத்த² சத்தாரோபி பச்சயா க³ஹிதாதி த³ட்ட²ப்³ப³ம். பச்சயபரியாயோ வா இத⁴ ஆஹார-ஸத்³தோ³ வேதி³தப்³போ³. ‘‘ஸுஞ்ஞதோ அனிமித்தோ சா’’தி ஏத்த² அப்பணிஹிதவிமோக்கோ²பி க³ஹிதோயேவ, தீணிபி சேதானி நிப்³பா³னஸ்ஸேவ நாமானி. நிப்³பா³னஞ்ஹி ராகா³தீ³னம் அபா⁴வேன ஸுஞ்ஞம், தேஹி விமுத்தஞ்சாதி ஸுஞ்ஞதவிமோக்கோ², ததா² ராகா³தி³னிமித்தாபா⁴வேன ஸங்கா²ரனிமித்தாபா⁴வேன ச அனிமித்தம், தேஹி விமுத்தஞ்சாதி அனிமித்தவிமோக்கோ², ராகா³தி³பணிதீ⁴னம் அபா⁴வேன அப்பணிஹிதம், தேஹி விமுத்தஞ்சாதி அப்பணிஹிதோ விமோக்கோ²தி வுச்சதி. ப²லஸமாபத்திவஸேன தம் ஆரம்மணம் கத்வா விஹரந்தஸ்ஸ அயம்பி திவிதோ⁴ விமோக்கோ² யஸ்ஸ கோ³சரோ, ஆகாஸேவ ஸகுந்தானம், பத³ம் தஸ்ஸ து³ரன்னயந்தி யதா² ஆகாஸே க³ச்ச²ந்தானம் ஸகுணானம் ‘‘இமஸ்மிம் டா²னே பாதே³ஹி அக்கமித்வா க³தா, இத³ம் டா²னம் உரேன பஹரித்வா க³தா, இத³ம் ஸீஸேன, இத³ம் பக்கே²ஹீ’’தி ந ஸக்கா ஞாதும், ஏவமேவ ஏவரூபஸ்ஸ பி⁴க்கு²னோ ‘‘நிரயபதா³தீ³ஸு இமினா நாம பதே³ன க³தோ’’தி ஞாபேதுஞ்ச ந ஸக்காதி.

விஜயத்தே²ரகா³தா²வண்ணனா நிட்டி²தா.

3. ஏரகத்தே²ரகா³தா²வண்ணனா

து³க்கா² காமா ஏரகாதி ஆயஸ்மதோ ஏரகத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் தி³ஸ்வா பஸன்னமானஸோ ஸத்து² கிஞ்சி தா³தப்³ப³யுத்தகம் அலப⁴ந்தோ ‘‘ஹந்தா³ஹம் காயஸாரம் புஞ்ஞம் கரிஸ்ஸாமீ’’தி ஸத்து² க³மனமக்³க³ம் ஸோதே⁴த்வா ஸமம் அகாஸி. ஸத்தா² தேன ததா²கதம் மக்³க³ம் படிபஜ்ஜி. ஸோ தத்த² ப⁴க³வந்தம் தி³ஸ்வா பஸன்னமானஸோ வந்தி³த்வா அஞ்ஜலிம் பக்³க³ய்ஹ பஸன்னசித்தோ யாவ த³ஸ்ஸனுபசாரஸமதிக்கமா பு³த்³தா⁴ரம்மணம் பீதிம் அவிஜஹந்தோ அட்டா²ஸி. ஸோ தேன புஞ்ஞகம்மேன தே³வலோகே நிப்³ப³த்தோ அபராபரம் புஞ்ஞானி கத்வா ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ஸம்பா⁴வனீயஸ்ஸ குடும்பி³யஸ்ஸ புத்தோ ஹுத்வா நிப்³ப³த்தி, ஏரகோதிஸ்ஸ நாமம் அஹோஸி அபி⁴ரூபோ த³ஸ்ஸனீயோ பாஸாதி³கோ இதிகத்தப்³ப³தாஸு பரமேன வேய்யத்தியேன ஸமன்னாக³தோ. தஸ்ஸ மாதாபிதரோ குலேன ரூபேன ஆசாரேன வயேன கோஸல்லேன ச அனுச்ச²விகம் தா³ரிகம் ஆனேத்வா விவாஹகம்மம் அகம்ஸு. ஸோ தாய ஸத்³தி⁴ம் ஸம்வாஸேன கே³ஹே வஸந்தோ பச்சி²மப⁴விகத்தா கேனசிதே³வ ஸம்வேக³வத்து²னா ஸம்ஸாரே ஸம்விக்³க³மானஸோ ஸத்து² ஸந்திகம் க³ந்த்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜி, தஸ்ஸ ஸத்தா² கம்மட்டா²னம் அதா³ஸி. ஸோ கம்மட்டா²னம் க³ஹேத்வா கதிபயதி³வஸாதிக்கமேன உக்கண்டா²பி⁴பூ⁴தோ விஹாஸி. அத² ஸத்தா² தஸ்ஸ சித்தப்பவத்திம் ஞத்வா ஓவாத³வஸேன ‘‘து³க்கா² காமா ஏரகா’’தி கா³த²ம் அபா⁴ஸி. ஸோ தம் ஸுத்வா ‘‘அயுத்தம் மயா கதம், யோஹம் ஏவரூபஸ்ஸ ஸத்து² ஸந்திகே கம்மட்டா²னம் க³ஹேத்வா தம் விஸ்ஸஜ்ஜேந்தோ மிச்சா²விதக்கப³ஹுலோ விஹாஸி’’ந்தி ஸம்வேக³ஜாதோ விபஸ்ஸனாய யுத்தப்பயுத்தோ நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.15.32-36) –

‘‘உத்தரித்வான நதி³கம், வனம் க³ச்ச²தி சக்கு²மா;

தமத்³த³ஸாஸிம் ஸம்பு³த்³த⁴ம், ஸித்³த⁴த்த²ம் வரலக்க²ணம்.

‘‘குதா³லபிடகமாதா³ய, ஸமம் கத்வான தம் பத²ம்;

ஸத்தா²ரம் அபி⁴வாதே³த்வா, ஸகம் சித்தம் பஸாத³யிம்.

‘‘சதுன்னவுதிதோ கப்பே, யம் கம்மமகரிம் ததா³;

து³க்³க³திம் நாபி⁴ஜானாமி, மக்³க³தா³னஸ்ஸித³ம் ப²லம்.

‘‘ஸத்தபஞ்ஞாஸகப்பம்ஹி, ஏகோ ஆஸிம் ஜனாதி⁴போ;

நாமேன ஸுப்பபு³த்³தோ⁴தி, நாயகோ ஸோ நரிஸ்ஸரோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹா பன ஹுத்வா அஞ்ஞம் ப்³யாகரோந்தோ –

93. ‘‘து³க்கா² காமா ஏரக, ந ஸுகா² காமா ஏரக;

யோ காமே காமயதி, து³க்க²ம் ஸோ காமயதி ஏரக;

யோ காமே ந காமயதி, து³க்க²ம் ஸோ ந காமயதி ஏரகா’’தி. –

தமேவ ப⁴க³வதா வுத்தகா³த²ம் பச்சுதா³ஹாஸி.

தத்த² து³க்கா² காமாதி இமே வத்து²காமகிலேஸகாமா து³க்க²வத்து²தாய விபரிணாமது³க்க²ஸம்ஸாரது³க்க²ஸபா⁴வதோ ச, து³க்கா² து³க்க²மா து³க்க²னிப்³ப³த்திகா. வுத்தஞ்ஹேதம் – ‘‘அப்பஸ்ஸாதா³ காமா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ’’திஆதி³ (பாசி. 417; ம. நி. 1.234). ஏரகாதி பட²மம் தாவ ப⁴க³வா தம் ஆலபதி, பச்சா² பன தே²ரோ அத்தானம் நாமேன கதே²ஸி. ந ஸுகா² காமாதி காமா நாமேதே ஜானந்தஸ்ஸ ஸுகா² ந ஹோந்தி, அஜானந்தஸ்ஸ பன ஸுக²தோ உபட்ட²ஹந்தி. யதா²ஹ – ‘‘யோ ஸுக²ம் து³க்க²தோ அத்³த³, து³க்க²மத்³த³க்கி² ஸல்லதோ’’திஆதி³ (ஸம். நி. 4.253; இதிவு. 53; தே²ரகா³. 986). யோ காமே காமயதி, து³க்க²ம் ஸோ காமயதீதி யோ ஸத்தோ கிலேஸகாமேன வத்து²காமே காமயதி, தஸ்ஸ தம் காமனம் ஸம்பதி ஸபரிளாஹதாய, ஆயதிம் அபாயது³க்க²ஹேதுதாய ச வட்டது³க்க²ஹேதுதாய ச து³க்க²ம். வத்து²காமா பன து³க்க²ஸ்ஸ வத்து²பூ⁴தா. இதி ஸோ து³க்க²ஸபா⁴வம் து³க்க²னிமித்தம் து³க்க²வத்து²ஞ்ச காமயதீதி வுத்தோ. இதரம் படிபக்க²வஸேன தமேவத்த²ம் ஞாபேதும் வுத்தம், தஸ்மா தஸ்ஸத்தோ² வுத்தவிபரியாயேன வேதி³தப்³போ³.

ஏரகத்தே²ரகா³தா²வண்ணனா நிட்டி²தா.

4. மேத்தஜித்தே²ரகா³தா²வண்ணனா

நமோ ஹி தஸ்ஸ ப⁴க³வதோதி ஆயஸ்மதோ மேத்தஜித்தே²ரஸ்ஸ கா³தா². கா உப்பத்தி? ஸோ கிர அனோமத³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஸாஸனே அபி⁴ப்பஸன்னோ ஹுத்வா போ³தி⁴ருக்க²ஸ்ஸ இட்ட²காஹி வேதி³கம் சினித்வா ஸுதா⁴பரிகம்மம் காரேஸி. ஸத்தா² தஸ்ஸ அனுமோத³னம் அகாஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ மக³த⁴ரட்டே² அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, மேத்தஜீதிஸ்ஸ நாமம் அஹோஸி. ஸோ வயப்பத்தோ காமேஸு ஆதீ³னவம் தி³ஸ்வா தாபஸபப்³ப³ஜ்ஜம் பப்³ப³ஜித்வா அரஞ்ஞே விஹரந்தோ பு³த்³து⁴ப்பாத³ம் ஸுத்வா புப்³ப³ஹேதுனா சோதி³யமானோ ஸத்து² ஸந்திகம் க³ந்த்வா பவத்தினிவத்தியோ ஆரப்³ப⁴ பஞ்ஹம் புச்சி²த்வா ஸத்தா²ரா பஞ்ஹே விஸ்ஸஜ்ஜிதே படிலத்³த⁴ஸத்³தோ⁴ பப்³ப³ஜித்வா விபஸ்ஸனம் பட்ட²பேத்வா அரஹத்தம் பாபுணி. தேன வுத்தம் அபதா³னே (அப. தே²ர 1.15.26-31) –

‘‘அனோமத³ஸ்ஸீமுனினோ, போ³தி⁴வேதி³மகாஸஹம்;

ஸுதா⁴ய பிண்ட³ம் த³த்வான, பாணிகம்மம் அகாஸஹம்.

‘‘தி³ஸ்வா தம் ஸுகதம் கம்மம், அனோமத³ஸ்ஸீ நருத்தமோ;

பி⁴க்கு²ஸங்கே⁴ டி²தோ ஸத்தா², இமா கா³தா² அபா⁴ஸத².

‘‘இமினா ஸுத⁴கம்மேன, சேதனாபணிதீ⁴ஹி ச;

ஸம்பத்திம் அனுபோ⁴த்வான, து³க்க²ஸ்ஸந்தம் கரிஸ்ஸதி.

‘‘பஸன்னமுக²வண்ணோம்ஹி, ஏகக்³கோ³ ஸுஸமாஹிதோ;

தா⁴ரேமி அந்திமம் தே³ஹம், ஸம்மாஸம்பு³த்³த⁴ஸாஸனே.

‘‘இதோ கப்பஸதே ஆஸிம், பரிபுண்ணே அனூனகே;

ராஜா ஸப்³ப³க⁴னோ நாம, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ஸத்தா²ரம் தோ²மேந்தோ –

94. ‘‘நமோ ஹி தஸ்ஸ ப⁴க³வதோ, ஸக்யபுத்தஸ்ஸ ஸிரீமதோ;

தேனாயம் அக்³க³ப்பத்தேன, அக்³க³த⁴ம்மோ ஸுதே³ஸிதோ’’தி. – கா³த²ம் அபா⁴ஸி;

தத்த² நமோதி நமக்காரோ. ஹீதி நிபாதமத்தம். தஸ்ஸாதி யோ ஸோ ப⁴க³வா ஸமத்திம்ஸபாரமியோ பூரேத்வா ஸப்³ப³கிலேஸே ப⁴ஞ்ஜித்வா அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴, ஸக்யராஜஸ்ஸ புத்தோதி ஸக்யபுத்தோ. அனஞ்ஞஸாதா⁴ரணாய புஞ்ஞஸம்பத்தியா ச ஸம்பா⁴விதோ உத்தமாய ரூபகாயஸிரியா த⁴ம்மகாயஸிரியா ச ஸமன்னாக³தத்தா ஸிரீமா, தஸ்ஸ ப⁴க³வதோ ஸக்யபுத்தஸ்ஸ ஸிரீமதோ நமோ அத்து², தம் நமாமீதி அத்தோ². தேனாதி தேன ப⁴க³வதா. அயந்தி தஸ்ஸ த⁴ம்மஸ்ஸ அத்தனோ பச்சக்க²தாய வத³தி. அக்³க³ப்பத்தேனாதி அக்³க³ம் ஸப்³ப³ஞ்ஞுதம், ஸப்³பே³ஹி வா கு³ணேஹி அக்³க³பா⁴வம் ஸேட்ட²பா⁴வம் பத்தேன. அக்³க³த⁴ம்மோதி அக்³கோ³ உத்தமோ நவவித⁴லோகுத்தரோ த⁴ம்மோ ஸுட்டு² அவிபரீதம் தே³ஸிதோ பவேதி³தோதி.

மேத்தஜித்தே²ரகா³தா²வண்ணனா நிட்டி²தா.

5. சக்கு²பாலத்தே²ரகா³தா²வண்ணனா

அந்தோ⁴ஹம் ஹதனேத்தோஸ்மீதி ஆயஸ்மதோ சக்கு²பாலத்தே²ரஸ்ஸ கா³தா². கா உப்பத்தி? ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி கரோந்தோ ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ப⁴க³வதி பரினிப்³பு³தே தூ²பமஹே கயிரமானே உமாபுப்ப²ம் க³ஹேத்வா தூ²பம் பூஜேஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் மஹாஸுவண்ணஸ்ஸ நாம குடும்பி³கஸ்ஸ புத்தோ ஹுத்வா நிப்³ப³த்தி, தஸ்ஸ பாலோதி நாமமகம்ஸு. மாதா தஸ்ஸ ஆதா⁴வித்வா பரிதா⁴வித்வா விசரணகாலே அஞ்ஞம் புத்தம் லபி⁴. தஸ்ஸ மாதாபிதரோ சூளபாலோதி நாமம் கத்வா இதரம் மஹாபாலோதி வோஹரிம்ஸு. அத² தே வயப்பத்தே க⁴ரப³ந்த⁴னேன ப³ந்தி⁴ம்ஸு. தஸ்மிம் ஸமயே ஸத்தா² ஸாவத்தி²யம் விஹரதி ஜேதவனே. தத்த² மஹாபாலோ ஜேதவனம் க³ச்ச²ந்தேஹி உபாஸகேஹி ஸத்³தி⁴ம் விஹாரம் க³ந்த்வா ஸத்து² ஸந்திகே த⁴ம்மம் ஸுத்வா படிலத்³த⁴ஸத்³தோ⁴ குடும்ப³பா⁴ரம் கனிட்ட²பா⁴திகஸ்ஸேவ பா⁴ரம் கத்வா ஸயம் பப்³ப³ஜித்வா லத்³தூ⁴பஸம்பதோ³ ஆசரியுபஜ்ஜா²யானம் ஸந்திகே பஞ்சவஸ்ஸானி வஸித்வா வுட்ட²வஸ்ஸோ பவாரேத்வா ஸத்து² ஸந்திகே கம்மட்டா²னம் க³ஹேத்வா ஸட்டி²மத்தே ஸஹாயபி⁴க்கூ² லபி⁴த்வா தேஹி ஸத்³தி⁴ம் பா⁴வனானுகூலம் வஸனட்டா²னம் பரியேஸந்தோ அஞ்ஞதரம் பச்சந்தகா³மம் நிஸ்ஸாய கா³மவாஸிகேஹி உபாஸகேஹி காரேத்வா தி³ன்னாய அரஞ்ஞாயதனே பண்ணஸாலாய வஸந்தோ ஸமணத⁴ம்மம் கரோதி. தஸ்ஸ அக்கி²ரோகோ³ உப்பன்னோ. வேஜ்ஜோ பே⁴ஸஜ்ஜம் ஸம்பாதே³த்வா அதா³ஸி. ஸோ வேஜ்ஜேன வுத்தவிதா⁴னம் ந படிபஜ்ஜி. தேனஸ்ஸ ரோகோ³ வட்³டி⁴. ஸோ ‘‘அக்கி²ரோக³வூபஸமனதோ கிலேஸரோக³வூபஸமனமேவ மய்ஹம் வர’’ந்தி அக்கி²ரோக³ம் அஜ்ஜு²பேக்கி²த்வா விபஸ்ஸனாயயேவ யுத்தப்பயுத்தோ அஹோஸி. தஸ்ஸ பா⁴வனம் உஸ்ஸுக்காபேந்தஸ்ஸ அபுப்³ப³ம் அசரிமம் அக்கீ²னி சேவ கிலேஸா ச பி⁴ஜ்ஜிம்ஸு. ஸோ ஸுக்க²விபஸ்ஸகோ அரஹா அஹோஸி. தேன வுத்தம் அபதா³னே (அப. தே²ர 1.15.21-25) –

‘‘நிப்³பு³தே லோகமஹிதே, ஆஹுதீனம் படிக்³க³ஹே;

ஸித்³த⁴த்த²ம்ஹி ப⁴க³வதி, மஹாதூ²பமஹோ அஹு.

‘‘மஹே பவத்தமானம்ஹி, ஸித்³த⁴த்த²ஸ்ஸ மஹேஸினோ;

உமாபுப்ப²ம் க³ஹேத்வான, தூ²பம்ஹி அபி⁴ரோபயிம்.

‘‘சதுன்னவுதிதோ கப்பே, யம் புப்ப²மபி⁴ரோபயிம்;

து³க்³க³திம் நாபி⁴ஜானாமி, தூ²பபூஜாயித³ம் ப²லம்.

‘‘இதோ ச நவமே கப்பே, ஸோமதே³வஸனாமகா;

பஞ்சாஸீதிஸு ராஜானோ, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அத² தே²ரே அக்கி²ரோகே³ன விஹாரே ஓஹீனே கா³மம் பிண்டா³ய க³தே பி⁴க்கூ² தி³ஸ்வா உபாஸகா ‘‘கஸ்மா தே²ரோ நாக³தோ’’தி புச்சி²த்வா தமத்த²ம் ஸுத்வா ஸோகாபி⁴பூ⁴தா பிண்ட³பாதம் உபனேத்வா, ‘‘ப⁴ந்தே, கிஞ்சி மா சிந்தயித்த², இதா³னி மயமேவ பிண்ட³பாதம் ஆனேத்வா உபட்ட²ஹிஸ்ஸாமா’’தி ததா² கரோந்தி. பி⁴க்கூ² தே²ரஸ்ஸ ஓவாதே³ ட²த்வா நசிரஸ்ஸேவ அரஹத்தம் பத்வா வுட்ட²வஸ்ஸா பவாரேத்வா, ‘‘ஸத்தா²ரம் வந்தி³தும் ஸாவத்தி²ம் க³மிஸ்ஸாம, ப⁴ந்தே’’தி ஆஹம்ஸு. தே²ரோ, ‘‘அஹம் து³ப்³ப³லோ அசக்கு²கோ, மக்³கோ³ ச ஸஉபத்³த³வோ, மயா ஸத்³தி⁴ம் க³ச்ச²ந்தானம் தும்ஹாகம் பரிஸ்ஸயோ ப⁴விஸ்ஸதி, தும்ஹே பட²மம் க³ச்ச²த², க³ந்த்வா ஸத்தா²ரம் மஹாதே²ரே ச மம வந்த³னாய வந்த³த², சூளபாலஸ்ஸ மம பவத்திம் கதே²த்வா கஞ்சி புரிஸம் பேஸேய்யாதா²’’தி ஆஹ. தே புனபி யாசித்வா க³மனம் அலப⁴ந்தா ‘‘ஸாதூ⁴’’தி படிஸ்ஸுணித்வா ஸேனாஸனம் ஸம்ஸாமேத்வா உபாஸகே ஆபுச்சி²த்வா அனுக்கமேன ஜேதவனம் க³ந்த்வா ஸத்தா²ரம் மஹாதே²ரே ச தஸ்ஸ வந்த³னாய வந்தி³த்வா து³தியதி³வஸே ஸாவத்தி²யம் பிண்டா³ய சரித்வா சூளபாலஸ்ஸ தம் பவத்திம் வத்வா தேன ‘‘அயம், ப⁴ந்தே, மய்ஹம் பா⁴கி³னேய்யோ பாலிதோ நாம, இமம் பேஸிஸ்ஸாமீ’’தி வுத்தே, ‘‘மக்³கோ³ ஸபரிஸ்ஸயோ, ந ஸக்கா ஏகேன க³ஹட்டே²ன க³ந்தும், தஸ்மா பப்³பா³ஜேதப்³போ³’’தி தம் பப்³பா³ஜேத்வா பேஸேஸும். ஸோ அனுக்கமேன தே²ரஸ்ஸ ஸந்திகம் க³ந்த்வா அத்தானம் தஸ்ஸ ஓரோசேத்வா தம் க³ஹேத்வா ஆக³ச்ச²ந்தோ அந்தராமக்³கே³ அஞ்ஞதரஸ்ஸ கா³மஸ்ஸ ஸாமந்தா அரஞ்ஞட்டா²னே ஏகிஸ்ஸா கட்ட²ஹாரியா கா³யந்தியா ஸத்³த³ம் ஸுத்வா படிப³த்³த⁴சித்தோ ஹுத்வா யட்டி²கோடிம் விஸ்ஸஜ்ஜேத்வா ‘‘திட்ட²த², ப⁴ந்தே, முஹுத்தம் யாவாஹம் ஆக³ச்சா²மீ’’தி வத்வா தஸ்ஸா ஸந்திகம் க³ந்த்வா தத்த² ஸீலவிபத்திம் பாபுணி. தே²ரோ இதா³னிமேவ இத்தி²யா கீ³தஸத்³தோ³ ஸுதோ, ஸாமணேரோ ச சிராயதி, நூன ஸீலவிபத்திம் பத்தோ ப⁴விஸ்ஸதீ’’தி சிந்தேஸி. ஸோபி ஆக³ந்த்வா ‘‘க³ச்சா²ம, ப⁴ந்தே’’தி ஆஹ. தே²ரோ ‘‘கிம் பாபோ ஜாதோஸீ’’தி புச்சி². ஸாமணேரோ துண்ஹீ ஹுத்வா புன புச்சி²தோபி ந கதே²ஸி. தே²ரோ ‘‘தாதி³ஸேன பாபேன மய்ஹம் யட்டி²க³ஹணகிச்சம் நத்தி², க³ச்ச² த்வ’’ந்தி வத்வா புன தேன ‘‘ப³ஹுபரிஸ்ஸயோ மக்³கோ³, தும்ஹே ச அந்தா⁴, கத²ம் க³மிஸ்ஸதா²’’தி வுத்தே ‘‘பா³ல இதே⁴வ மே நிபஜ்ஜித்வா மரந்தஸ்ஸாபி அபராபரம் பரிவத்தேந்தஸ்ஸாபி தாதி³ஸேன க³மனம் நாம நத்தீ²’’தி இமமத்த²ம் த³ஸ்ஸேந்தோ –

95. ‘‘அந்தோ⁴ஹம் ஹதனேத்தோஸ்மி, கந்தாரத்³தா⁴னபக்க²ந்தோ³;

ஸயமானோபி க³ச்சி²ஸ்ஸம், ந ஸஹாயேன பாபேனா’’தி. – கா³த²ம் அபா⁴ஸித்த²;

தத்த² அந்தோ⁴தி சக்கு²விகலோ. ஹதனேத்தோதி வினட்ட²சக்கு²கோ, தேன ‘‘பயோக³விபத்திவஸேனாஹம் உபஹதனேத்ததாய அந்தோ⁴, ந ஜச்சந்த⁴பா⁴வேனா’’தி யதா²வுத்தம் அந்த⁴பா⁴வம் விஸேஸேதி. அத² வா ‘‘அந்தோ⁴’’தி இத³ம் ‘‘அந்தே⁴ ஜிண்ணே மாதாபிதரோ போஸேதீ’’திஆதீ³ஸு (ம. நி. 2.288) விய மம்ஸசக்கு²வேகல்லதீ³பனம், ‘‘ஸப்³பே³பிமே பரிப்³பா³ஜகா அந்தா⁴ அசக்கு²கா’’ (உதா³. 54) ‘‘அந்தோ⁴ ஏகசக்கு² த்³விசக்கூ²’’திஆதீ³ஸு (அ. நி. 3.29) விய ந பஞ்ஞாசக்கு²வேகல்லதீ³பனந்தி த³ஸ்ஸேதும் ‘‘ஹதனேத்தோஸ்மீ’’தி வுத்தம், தேன முக்²யமேவ அந்த⁴பா⁴வம் த³ஸ்ஸேதி. கந்தாரத்³தா⁴னபக்க²ந்தோ³தி கந்தாரே விவனே தீ³க⁴மக்³க³ம் அனுபவிட்டோ², ந ஜாதிகந்தாராதி³க³ஹனம் ஸம்ஸாரத்³தா⁴னம் படிபன்னோதி அதி⁴ப்பாயோ. தாதி³ஸஞ்ஹி கந்தாரத்³தா⁴னம் அயம் தே²ரோ ஸமதிக்கமித்வா டி²தோ, ஸயமானோபீதி ஸயந்தோபி, பாதே³ஸு அவஹந்தேஸு உரேன ஜண்ணுகாஹி ச பூ⁴மியம் ஸம்ஸரந்தோ பரிவத்தேந்தோபி க³ச்சே²ய்யம். ந ஸஹாயேன பாபேனாதி தாதி³ஸேன பாபபுக்³க³லேன ஸஹாயபூ⁴தேன ஸத்³தி⁴ம் ந க³ச்சி²ஸ்ஸந்தி யோஜனா. தம் ஸுத்வா இதரோ ஸம்வேக³ஜாதோ ‘‘பா⁴ரியம் வத மயா ஸாஹஸிககம்மம் கத’’ந்தி பா³ஹா பக்³க³ய்ஹ கந்த³ந்தோ வனஸண்ட³ம் பக்க²ந்தோ³ ச அஹோஸி. அத² தே²ரஸ்ஸ ஸீலதேஜேன பண்டு³கம்ப³லஸிலாஸனம் உண்ஹாகாரம் த³ஸ்ஸேஸி. தேன ஸக்கோ தம் காரணம் ஞத்வா தே²ரஸ்ஸ ஸந்திகம் க³ந்த்வா ஸாவத்தி²கா³மிபுரிஸம் விய அத்தானம் ஞாபேத்வா யட்டி²கோடிம் க³ண்ஹந்தோ மக்³க³ம் ஸங்கி²பித்வா தத³ஹேவ ஸாயன்ஹே ஸாவத்தி²யம் தே²ரம் நேத்வா தத்த² ஜேதவனே சூளபாலிதேன காரிதாய பண்ணஸாலாய ப²லகே நிஸீதா³பேத்வா தஸ்ஸ ஸஹாயவண்ணேன தே²ரஸ்ஸ ஆக³தபா⁴வம் ஜானாபேத்வா பக்காமி; சூளபாலிதோபி தம் யாவஜீவம் ஸக்கச்சம் உபட்டா²ஸீதி.

சக்கு²பாலத்தே²ரகா³தா²வண்ணனா நிட்டி²தா.

6. க²ண்ட³ஸுமனத்தே²ரகா³தா²வண்ணனா

ஏகபுப்ப²ம் சஜித்வானாதி ஆயஸ்மதோ க²ண்ட³ஸுமனத்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஸத்த²ரி பரினிப்³பு³தே தஸ்ஸ தூ²பஸ்ஸ ஸமந்ததோ சந்த³னவேதி³காய பரிக்கி²பித்வா மஹந்தம் பூஜம் அகாஸி. ஸோ தேன புஞ்ஞகம்மேன தே³வமனுஸ்ஸேஸு உளாரம் ஸம்பத்திம் அனுப⁴வந்தோ கஸ்ஸபஸ்ஸ ப⁴க³வதோ காலே குடும்பி³ககுலே நிப்³ப³த்தோ ஸத்த²ரி பரினிப்³பு³தே கனகதூ²பம் உத்³தி³ஸ்ஸ ரஞ்ஞா புப்ப²பூஜாய கயிரமானாய புப்பா²னி அலப⁴ந்தோ ஏகம் க²ண்ட³ஸுமனபுப்ப²ம் தி³ஸ்வா மஹதா மூலேன தம் கிணித்வா க³ண்ஹந்தோ சேதியே பூஜம் கரோந்தோ உளாரம் பீதிஸோமனஸ்ஸம் உப்பாதே³ஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அஸீதி வஸ்ஸகோடியோ ஸக்³க³ஸுக²ம் அனுப⁴வித்வா இமஸ்மிம் பு³த்³து⁴ப்பாதே³ பாவாயம் மல்லராஜகுலே நிப்³ப³த்தி. தஸ்ஸ ஜாதகாலே கே³ஹே க²ண்ட³ஸக்க²ரா ஸுமனபுப்பா²னி ச உப்பன்னானி அஹேஸும். தேனஸ்ஸ க²ண்ட³ஸுமனோதி நாமமகம்ஸு. ஸோ விஞ்ஞுதம் பத்தோ ப⁴க³வதி பாவாயம் சுந்த³ஸ்ஸ அம்ப³வனே விஹரந்தே உபஸங்கமித்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மம் கரோந்தோ நசிரஸ்ஸேவ ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 1.15.15-20) –

‘‘பது³முத்தரோ நாம ஜினோ, லோகஜேட்டோ² நராஸபோ⁴;

ஜலித்வா அக்³கி³க்க²ந்தோ⁴வ, ஸம்பு³த்³தோ⁴ பரினிப்³பு³தோ.

‘‘நிப்³பு³தே ச மஹாவீரே, தூ²போ வித்தா²ரிகோ அஹு;

தூ³ரதோவ உபட்டே²ந்தி, தா⁴துகே³ஹவருத்தமே.

‘‘பஸன்னசித்தோ, ஸுமனோ, அகம் சந்த³னவேதி³கம்;

தி³ஸ்ஸதி தூ²பக²ந்தோ⁴ ச, தூ²பானுச்ச²விகோ ததா³.

‘‘ப⁴வே நிப்³ப³த்தமானம்ஹி, தே³வத்தே அத² மானுஸே;

ஓமத்தம் மே ந பஸ்ஸாமி, புப்³ப³கம்மஸ்ஸித³ம் ப²லம்.

‘‘பஞ்சத³ஸகப்பஸதே, இதோ அட்ட² ஜனா அஹும்;

ஸப்³பே³ ஸமத்தனாமா தே சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ புரிமஜாதிம் அனுஸ்ஸரந்தோ தத்த² அத்தனோ ஸுமனபுப்ப²பரிச்சாக³ஸ்ஸ ஸக்³க³ஸம்பத்தினிமித்தகம் நிப்³பா³னூபனிஸ்ஸயதஞ்ச தி³ஸ்வா உதா³னவஸேன தமத்த²ம் பகாஸேந்தோ –

96. ‘‘ஏகபுப்ப²ம் சஜித்வான, அஸீதி வஸ்ஸகோடியோ;

ஸக்³கே³ஸு பரிசாரேத்வா, ஸேஸகேனம்ஹி நிப்³பு³தோ’’தி. – கா³த²ம் அபா⁴ஸி;

தத்த² ஏகபுப்ப²ந்தி ஏகம் குஸுமம், தம் பன இத⁴ ஸுமனபுப்ப²ம் அதி⁴ப்பேதம். சஜித்வானாதி ஸத்து² தூ²பபூஜாகரணவஸேன பரிச்சஜித்வா பரிச்சாக³ஹேது. அஸீதி வஸ்ஸகோடியோதி மனுஸ்ஸக³ணனாய வஸ்ஸானம் அஸீதி கோடியோ, அச்சந்தஸம்யோகே³ சேதம் உபயோக³வசனம், இத³ஞ்ச ச²ஸு காமஸக்³கே³ஸு து³தியே அபராபருப்பத்திவஸேன வுத்தந்தி வேதி³தப்³ப³ம். தஸ்மா ஸக்³கே³ஸூதி தாவதிம்ஸஸங்கா²தே ஸக்³க³லோகே, புனப்புனம் உப்பஜ்ஜனவஸேன ஹேத்த² ப³ஹுவசனம். பரிசாரேத்வாதி ரூபாதீ³ஸு ஆரம்மணேஸு இந்த்³ரியானி பரிசாரேத்வா ஸுக²ம் அனுப⁴வித்வா, தே³வச்ச²ராஹி வா அத்தானம் பரிசாரேத்வா உபட்டா²பேத்வா. ஸேஸகேனம்ஹி நிப்³பு³தோதி புப்ப²பூஜாய வஸேன பவத்தகுஸலசேதனாஸு ப⁴வஸம்பத்தி தா³யககம்மதோ ஸேஸேன யம் தத்த² விவட்டூபனிஸ்ஸயபூ⁴தம், தம் ஸந்தா⁴ய வத³தி. ப³ஹூ ஹி தத்த² புப்³பா³பரவஸேன பவத்தா சேதனா. ஸேஸகேனாதி வா தஸ்ஸேவ கம்மஸ்ஸ விபாகாவஸேஸேன அபரிக்கீ²ணேயேவ தஸ்மிம் கம்மவிபாகே நிப்³பு³தோ அம்ஹி, கிலேஸபரினிப்³பா³னேன பரினிப்³பு³தோஸ்மி. ஏதேன யஸ்மிம் அத்தபா⁴வே ட²த்வா அத்தனா அரஹத்தம் ஸச்சி²கதம், ஸோபி சரிமத்தபா⁴வோ தஸ்ஸ கம்மவிபாகோதி த³ஸ்ஸேதி. யாதி³ஸம் ஸந்தா⁴ய அஞ்ஞத்தா²பி ‘‘தஸ்ஸேவ கம்மஸ்ஸ விபாகாவஸேஸேனா’’தி (பாரா. 228; ஸம். நி. 1.131) வுத்தம்.

க²ண்ட³ஸுமனத்தே²ரகா³தா²வண்ணனா நிட்டி²தா.

7. திஸ்ஸத்தே²ரகா³தா²வண்ணனா

ஹித்வா ஸதபலம் கம்ஸந்தி ஆயஸ்மதோ திஸ்ஸத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ விபஸ்ஸிஸ்ஸ ப⁴க³வதோ காலே யானகாரகுலே நிப்³ப³த்தித்வா விஞ்ஞுதம் பத்தோ ஏகதி³வஸம் ப⁴க³வந்தம் தி³ஸ்வா பஸன்னமானஸோ சந்த³னக²ண்டே³ன ப²லகம் கத்வா ப⁴க³வதோ உபனாமேஸி, தஞ்ச ப⁴க³வா பரிபு⁴ஞ்ஜி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ரோருவனக³ரே ராஜகுலே நிப்³ப³த்தி. ஸோ வயப்பத்தோ பிதரி காலங்கதே ரஜ்ஜே பதிட்டி²தோ பி³ம்பி³ஸாரரஞ்ஞோ அதி³ட்ட²ஸஹாயோ ஹுத்வா தஸ்ஸ மணிமுத்தாவத்தா²தீ³னி பண்ணாகாரானி பேஸேஸி. தஸ்ஸ ராஜா பி³ம்பி³ஸாரோ புஞ்ஞவந்ததம் ஸுத்வா படிபாப⁴தம் பேஸேந்தோ சித்தபடே பு³த்³த⁴சரிதம் ஸுவண்ணபட்டே ச படிச்சஸமுப்பாத³ம் லிகா²பேத்வா பேஸேஸி. ஸோ தம் தி³ஸ்வா புரிமபு³த்³தே⁴ஸு கதாதி⁴காரதாய பச்சி²மப⁴விகதாய ச சித்தபடே த³ஸ்ஸேந்தம் பு³த்³த⁴சரிதம் ஸுவண்ணபட்டகே லிகி²தம் படிச்சஸமுப்பாத³க்கமஞ்ச ஓலோகேத்வா பவத்தினிவத்தியோ ஸல்லக்கே²த்வா ஸாஸனக்கமம் ஹத³யே ட²பேத்வா ஸஞ்ஜாதஸம்வேகோ³ ‘‘தி³ட்டோ² மயா ப⁴க³வதோ வேஸோ, ஸாஸனக்கமோ ச ஏகபதே³ஸேன ஞாதோ, ப³ஹுது³க்கா² காமா ப³ஹுபாயாஸா, கிம் தா³னி மய்ஹம் க⁴ராவாஸேனா’’தி ரஜ்ஜம் பஹாய கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³ந்தோ ப⁴க³வந்தம் உத்³தி³ஸ்ஸ பப்³ப³ஜித்வா மத்திகாபத்தம் க³ஹேத்வா ராஜா புக்குஸாதி விய மஹாஜனஸ்ஸ பரிதே³வந்தஸ்ஸேவ நக³ரதோ நிக்க²மித்வா அனுக்கமேன ராஜக³ஹம் க³ந்த்வா தத்த² ஸப்பஸோண்டி³கபப்³பா⁴ரே விஹரந்தம் ப⁴க³வந்தம் உபஸங்கமித்வா வந்தி³த்வா ஏகமந்தம் நிஸீதி³. ஸத்தா² த⁴ம்மம் தே³ஸேஸி. ஸோ த⁴ம்மதே³ஸனம் ஸுத்வா விபஸ்ஸனாய கம்மட்டா²னம் க³ஹேத்வா யுத்தப்பயுத்தோ விஹரந்தோ விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 1.15.37-42) –

‘‘யானகாரோ புரே ஆஸிம், தா³ருகம்மே ஸுஸிக்கி²தோ;

சந்த³னம் ப²லகம் கத்வா, அதா³ஸிம் லோகப³ந்து⁴னோ.

‘‘பபா⁴ஸதி இத³ம் ப்³யம்ஹம், ஸுவண்ணஸ்ஸ ஸுனிம்மிதம்;

ஹத்தி²யானம் அஸ்ஸயானம், தி³ப்³ப³யானம் உபட்டி²தம்.

‘‘பாஸாதா³ ஸிவிகா சேவ, நிப்³ப³த்தந்தி யதி³ச்ச²கம்;

அக்கு²ப்³ப⁴ம் ரதனம் மய்ஹம், ப²லகஸ்ஸ இத³ம் ப²லம்.

‘‘ஏகனவுதிதோ கப்பே, ப²லகம் யமஹம் த³தி³ம்;

து³க்³க³தி நாபி⁴ஜானாமி, ப²லகஸ்ஸ இத³ம் ப²லம்.

‘‘ஸத்தபஞ்ஞாஸகப்பம்ஹி, சதுரோ நிம்மிதாவ்ஹயா;

ஸத்தரதனஸம்பன்னா, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா உதா³னவஸேன அத்தனோ படிபத்திம் கதே²ந்தோ –

97. ‘‘ஹித்வா ஸதபலம் கம்ஸம், ஸோவண்ணம் ஸதராஜிகம்;

அக்³க³ஹிம் மத்திகாபத்தம், இத³ம் து³தியாபி⁴ஸேசன’’ந்தி. – கா³த²ம் அபா⁴ஸி;

தத்த² ஹித்வாதி பரிச்சஜித்வா. ஸதபலந்தி ஸதம் பலானி யஸ்ஸ, தம் ஸதபலபரிமாணம். கம்ஸந்தி தா²லம். ஸோவண்ணந்தி ஸுவண்ணமயம். ஸதராஜிகந்தி பி⁴த்திவிசித்ததாய ச அனேகரூபராஜிசித்ததாய ச அனேகலேகா²யுத்தம். அக்³க³ஹிம் மத்திகாபத்தந்தி ஏவரூபே மஹாரஹே பா⁴ஜனே புப்³பே³ பு⁴ஞ்ஜித்வா பு³த்³தா⁴னம் ஓவாத³ம் கரோந்தோ ‘‘இதா³னாஹம் தம் ச²ட்³டே³த்வா மத்திகாமயபத்தம் அக்³க³ஹேஸிம், அஹோ, ஸாது⁴, மயா கதம் அரியவதம் அனுடி²த’’ந்தி பா⁴ஜனகித்தனாபதே³ஸேன ரஜ்ஜபரிச்சாக³ம் பப்³ப³ஜ்ஜூபக³மனஞ்ச அனுமோத³ந்தோ வத³தி. தேனாஹ ‘‘இத³ம் து³தியாபி⁴ஸேசன’’ந்தி. பட²மம் ரஜ்ஜாபி⁴ஸேசனம் உபாதா³ய இத³ம் பப்³ப³ஜ்ஜூபக³மனம் மம து³தியம் அபி⁴ஸேசனம். தஞ்ஹி ராகா³தீ³ஹி ஸம்கிலிட்ட²ம் ஸாஸங்கம் ஸபரிஸங்கம் கம்மம் அனத்த²ஸஞ்ஹிதம் து³க்க²படிப³த்³த⁴ம் நிஹீனம், இத³ம் பன தம்விபரியாயதோ உத்தமம் பணீதந்தி அதி⁴ப்பாயோ.

திஸ்ஸத்தே²ரகா³தா²வண்ணனா நிட்டி²தா.

8. அப⁴யத்தே²ரகா³தா²வண்ணனா

ரூபம் தி³ஸ்வா ஸதி முட்டா²தி ஆயஸ்மதோ அப⁴யத்தே²ரஸ்ஸ கா³தா². கா உப்பத்தி? ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ ஸுமேத⁴ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸுமேத⁴ம் ப⁴க³வந்தம் தி³ஸ்வா பஸன்னசித்தோ ஸளலபுப்பே²ஹி பூஜமகாஸி. ஸோ தேன புஞ்ஞகம்மேன தே³வேஸு நிப்³ப³த்தித்வா அபராபரம் புஞ்ஞானி கத்வா ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணகுலே நிப்³ப³த்தித்வா அப⁴யோதி லத்³த⁴னாமோ விஞ்ஞுதம் பத்தோ ஹேதுஸம்பத்தியா சோதி³யமானோ ஏகதி³வஸம் விஹாரம் க³தோ ஸத்து² த⁴ம்மதே³ஸனம் ஸுத்வா படிலத்³த⁴ஸத்³தோ⁴ பப்³ப³ஜித்வா கதபுப்³ப³கிச்சோ விபஸ்ஸனாய கம்மம் கரோந்தோ விஹரதி. அத²ஸ்ஸ ஏகதி³வஸம் கா³மம் பிண்டா³ய பவிட்ட²ஸ்ஸ அலங்கதபடியத்தம் மாதுகா³மம் தி³ஸ்வா அயோனிஸோமனஸிகாரவஸேன தஸ்ஸ ரூபம் ஆரப்³ப⁴ ச²ந்த³ராகோ³ உப்பஜ்ஜி, ஸோ விஹாரம் பவிஸித்வா ‘‘ஸதிம் விஸ்ஸஜ்ஜித்வா ஓலோகேந்தஸ்ஸ ரூபாரம்மணே மய்ஹம் கிலேஸோ உப்பன்னோ, அயுத்தம் மயா கத’’ந்தி அத்தனோ சித்தம் நிக்³க³ண்ஹந்தோ தாவதே³வ விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 1.15.43-47) –

‘‘ஸுமேதோ⁴ நாம நாமேன, ஸயம்பூ⁴ அபராஜிதோ;

விவேகமனுப்³ரூஹந்தோ, அஜ்ஜோ²க³ஹி மஹாவனம்.

‘‘ஸளலம் புப்பி²தம் தி³ஸ்வா, க³ந்தி²த்வான வடம்ஸகம்;

பு³த்³த⁴ஸ்ஸ அபி⁴ரோபேஸிம், ஸம்முகா² லோகனாயகம்.

‘‘திம்ஸகப்பஸஹஸ்ஸம்ஹி, யம் புப்ப²மபி⁴ரோபயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘ஊனவீஸே கப்பஸதே, ஸோளஸாஸும் ஸுனிம்மிதா;

ஸத்தரதனஸம்பன்னா, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ கிலேஸுப்பத்தினித³ஸ்ஸனேன ‘‘கிலேஸே அனுவத்தேந்தஸ்ஸ வட்டது³க்க²தோ நத்தே²வ ஸீஸுக்கி²பனம். அஹம் பன தே நானுவத்தி’’ந்தி த³ஸ்ஸேந்தோ –

98. ‘‘ரூபம் தி³ஸ்வா ஸதி முட்டா², பியம் நிமித்தம் மனஸிகரோதோ;

ஸாரத்தசித்தோ வேதே³தி, தஞ்ச அஜ்ஜோ²ஸ திட்ட²தி;

தஸ்ஸ வட்³ட⁴ந்தி ஆஸவா, ப⁴வமூலோபகா³மினோ’’தி. – கா³த²ம் அபா⁴ஸி;

தத்த² ரூபந்தி ரஜ்ஜனீயம் ரூபாயதனம், தம் பனேத்த² இத்தி²ரூபம் அதி⁴ப்பேதம். தி³ஸ்வாதி சக்கு²னா தி³ஸ்வா, சக்கு²த்³வாரானுஸாரேன நிமித்தானுப்³யஞ்ஜனஸல்லக்க²ணவஸேன தம் க³ஹேத்வா, தஸ்ஸ ததா²க³ஹணஹேதூதி அத்தோ². ஸதி முட்டா²தி அஸுப⁴ஸபா⁴வே காயே ‘‘அஸுப⁴’’ந்த்வேவ பவத்தனஸதி நட்டா². யதா² பன ரூபம் தி³ஸ்வா ஸதி நட்டா², தம் த³ஸ்ஸேந்தோ ஆஹ ‘‘பியம் நிமித்தம் மனஸிகரோதோ’’தி. யதா²உபட்டி²தம் ஆரம்மணம் ‘‘ஸுப⁴ம் ஸுக²’’ந்திஆதி³னா பியனிமித்தம் கத்வா அயோனிஸோமனஸிகாரேன மனஸிகரோதோ ஸதி முட்டா²தி யோஜனா. ததா² பூ⁴தோவ ஸாரத்தசித்தோ வேதே³தீதி ஸுட்டு² ரத்தசித்தோ ஹுத்வா தம் ரூபாரம்மணம் அனுப⁴வதி அபி⁴னந்த³தி, அபி⁴னந்த³ந்தோ பன தஞ்ச அஜ்ஜோ²ஸ திட்ட²தி அஜ்ஜோ²ஸாய தம் ஆரம்மணம் கி³லித்வா பரினிட்ட²பேத்வா வத்ததி சேவ, ஏவம்பூ⁴தஸ்ஸ ச தஸ்ஸ வட்³ட⁴ந்தி ஆஸவா ப⁴வமூலோபகா³மினோதி ப⁴வஸ்ஸ ஸம்ஸாரஸ்ஸ மூலபா⁴வம் காரணபா⁴வம் உபக³மனஸபா⁴வா காமாஸவாத³யோ சத்தாரோபி ஆஸவா தஸ்ஸ புக்³க³லஸ்ஸ உபரூபரி வட்³ட⁴ந்தியேவ, ந ஹாயந்தி. மய்ஹம் பன படிஸங்கா²னே ட²த்வா விபஸ்ஸனம் வட்³டே⁴த்வா ஸச்சானி படிவிஜ்ஜ²ந்தஸ்ஸ மக்³க³படிபாடியா தே சத்தாரோபி ஆஸவா அனவஸேஸதோ பஹீனா பரிக்கீ²ணாதி அதி⁴ப்பாயோ.

அப⁴யத்தே²ரகா³தா²வண்ணனா நிட்டி²தா.

9. உத்தியத்தே²ரகா³தா²வண்ணனா

ஸத்³த³ம் ஸுத்வா ஸதி முட்டா²தி ஆயஸ்மதோ உத்தியத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ ஸுமேத⁴ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் தி³ஸ்வா பஸன்னசித்தோ கோ³னகாதி³அத்த²தம் ஸஉத்தரச்ச²த³ம் பு³த்³தா⁴ரஹம் பல்லங்கம் க³ந்த⁴குடியம் பஞ்ஞாபேத்வா அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ கபிலவத்து²ஸ்மிம் ஸக்யராஜகுலே நிப்³ப³த்தி, தஸ்ஸ உத்தியோதி நாமம் அஹோஸி. ஸோ வயப்பத்தோ ஸத்து² ஞாதிஸமாக³மே பு³த்³தா⁴னுபா⁴வம் தி³ஸ்வா படிலத்³த⁴ஸத்³தோ⁴ பப்³ப³ஜித்வா ஸமணத⁴ம்மம் கரோந்தோ ஏகதி³வஸம் நாமம் பிண்டா³ய பவிட்டோ² அந்தராமக்³கே³ மாதுகா³மஸ்ஸ கீ³தஸத்³த³ம் ஸுத்வா அயோனிஸோமனஸிகாரவஸேன தத்த² ச²ந்த³ராகே³ உப்பன்னே படிஸங்கா²னப³லேன தம் விக்க²ம்பே⁴த்வா விஹாரம் பவிஸித்வா ஸஞ்ஜாதஸம்வேகோ³ தி³வாட்டா²னே நிஸீதி³த்வா தாவதே³வ விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 1.15.48-52) –

‘‘ஸுமேத⁴ஸ்ஸ ப⁴க³வதோ, லோகஜேட்ட²ஸ்ஸ தாதி³னோ;

பல்லங்கோ ஹி மயா தி³ன்னோ, ஸஉத்தரஸபச்ச²தோ³.

‘‘ஸத்தரதனஸம்பன்னோ, பல்லங்கோ ஆஸி ஸோ ததா³;

மம ஸங்கப்பமஞ்ஞாய, நிப்³ப³த்ததி ஸதா³ மம.

‘‘திம்ஸகப்பஸஹஸ்ஸம்ஹி, பல்லங்கமத³தி³ம் ததா³;

து³க்³க³திம் நாபி⁴ஜானாமி, பல்லங்கஸ்ஸ இத³ம் ப²லம்.

‘‘வீஸகப்பஸஹஸ்ஸம்ஹி, ஸுவண்ணாபா⁴ தயோ ஜனா;

ஸத்தரதனஸம்பன்னா, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ கிலேஸுப்பத்தினித³ஸ்ஸனேன ‘‘கிலேஸே அஜிகு³ச்ச²ந்தஸ்ஸ நத்தி² வட்டது³க்க²தோ ஸீஸுக்கி²பனம், அஹம் பன தே ஜிகு³ச்சி²மேவா’’தி த³ஸ்ஸேந்தோ –

99. ‘‘ஸத்³த³ம் ஸுத்வா ஸதி முட்டா², பியம் நிமித்தம் மனஸிகரோதோ;

ஸாரத்தசித்தோ வேதே³தி, தஞ்ச அஜ்ஜோ²ஸ திட்ட²தி;

தஸ்ஸ வட்³ட⁴ந்தி ஆஸவா, ஸம்ஸார உபகா³மினோ’’தி. – கா³த²ம் அபா⁴ஸி;

தத்த² ஸத்³த³ந்தி ரஜ்ஜனீயம் ஸத்³தா³ரம்மணம், ஸம்ஸாரஉபகா³மினோதி –