8. வீரத்தே²ரகா³தா²வண்ணனா

யோ து³த்³த³மியோதி ஆயஸ்மதோ வீரத்தே²ரஸ்ஸ கா³தா². கா உப்பத்தி? அயம் கிர இதோ ஏகனவுதே கப்பே விபஸ்ஸிஸ்ஸ ப⁴க³வதோ வஸனஆவாஸம் படிஜக்³கி³. ஏகதி³வஸஞ்ச ஸிந்து⁴வாரபுப்ப²ஸதி³ஸானி நிக்³கு³ண்டி²புப்பா²னி க³ஹேத்வா ப⁴க³வந்தம் பூஜேஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இதோ பஞ்சதிம்ஸே கப்பே க²த்தியகுலே நிப்³ப³த்தித்வா மஹாபதாபோ நாம ராஜா அஹோஸி சக்கவத்தீ. ஸோ த⁴ம்மேன ஸமேன ரஜ்ஜம் காரேந்தோ ஸத்தே ஸக்³க³மக்³கே³ பதிட்டா²பேஸி. புன இமஸ்மிம் கப்பே கஸ்ஸபஸ்ஸ ப⁴க³வதோ காலே மஹாவிப⁴வோ ஸேட்டி² ஹுத்வா கபணத்³தி⁴காதீ³னம் தா³னம் தே³ந்தோ ஸங்க⁴ஸ்ஸ கீ²ரப⁴த்தம் அதா³ஸி. ஏவம் தத்த² தத்த² தா³னமயம் புஞ்ஞஸம்பா⁴ரம் கரோந்தோ இதரஞ்ச நிப்³பா³னத்த²ம் ஸம்ப⁴ரந்தோ தே³வமனுஸ்ஸேஸு ஸம்ஸரித்வா இமஸ்மிம் பு³த்³து⁴ப்பாதே³ ஸாவத்தி²னக³ரே ரஞ்ஞோ பஸேனதி³ஸ்ஸ அமச்சகுலே நிப்³ப³த்தி, ‘‘வீரோ’’திஸ்ஸ நாமம் அகம்ஸு. ஸோ வயப்பத்தோ நாமானுக³தேஹி பத்தப³லஜவாதி³கு³ணேஹி ஸமன்னாக³தோ ஸங்கா³மஸூரோ ஹுத்வா மாதாபிதூஹி நிப³ந்த⁴வஸேன காரிதே தா³ரபரிக்³க³ஹே ஏகம்யேவ புத்தம் லபி⁴த்வா புப்³ப³ஹேதுனா சோதி³யமானோ காமேஸு ஸம்ஸாரே ச ஆதீ³னவம் தி³ஸ்வா ஸம்வேக³ஜாதோ பப்³ப³ஜித்வா க⁴டேந்தோ வாயமந்தோ நசிரஸ்ஸேவ ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 1.21.21-24) –

‘‘விபஸ்ஸிஸ்ஸ ப⁴க³வதோ, ஆஸிமாராமிகோ அஹம்;

நிக்³கு³ண்டி²புப்ப²ம் பக்³க³ய்ஹ, பு³த்³த⁴ஸ்ஸ அபி⁴ரோபயிம்.

‘‘ஏகனவுதிதோ கப்பே, யம் புப்ப²மபி⁴பூஜயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘பஞ்சவீஸே இதோ கப்பே, ஏகோ ஆஸிம் ஜனாதி⁴போ;

மஹாபதாபனாமேன, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ஏவம் பன அரஹத்தம் பத்வா ப²லஸமாபத்திஸுகே²ன வீதினாமேந்தம் தே²ரம் புராணது³தியிகா உப்பப்³பா³ஜேதுகாமா அந்தரந்தரா நானானயேஹி பலோபே⁴தும் பரக்கமந்தீ ஏகதி³வஸம் தி³வாவிஹாரட்டா²னம் க³ந்த்வா இத்தி²குத்தாதீ³னி த³ஸ்ஸேதும் ஆரபி⁴. அதா²யஸ்மா வீரோ ‘‘மம் பலோபே⁴துகாமா ஸினேரும் மகஸபக்க²வாதேன சாலேதுகாமா விய யாவ பா³லா வதாயம் இத்தீ²’’தி தஸ்ஸா கிரியாய நிரத்த²கபா⁴வம் தீ³பேந்தோ ‘‘யோ து³த்³த³மியோ’’தி கா³த²ம் அபா⁴ஸி.

8. தத்த² யோ து³த்³த³மியோதிஆதீ³னம் பதா³னம் அத்தோ² ஹேட்டா² வுத்தோயேவ. இத³ம் பனேத்த² யோஜனாமத்தம் யோ புப்³பே³ அத³ந்த கிலேஸதாய பச்சத்தி²கேஹி வா ஸங்க³மஸீஸே த³மேதும் ஜேதும் அஸக்குணேய்யதாயது³த்³த³மியோ, இதா³னி பன உத்தமேன த³மேன த³ந்தோ சதுப்³பி³த⁴ஸம்மப்பமதா⁴னவீரியஸம்பத்தியா வீரோ, வுத்தனயேனேவ ஸந்துஸிதோ விதிண்ணகங்கோ² விஜிதாவீ அபேதலோமஹம்ஸோ வீரோ வீரனாமகோ அனவஸேஸதோ கிலேஸபரினிப்³பா³னேன பரினிப்³பு³தோ, ததோ ஏவ டி²தஸபா⁴வோ, ந தாதி³ஸானம் ஸதேனபி ஸஹஸ்ஸேனபி சாலனீயோதி. தம் ஸுத்வா ஸா இத்தீ² – ‘‘மய்ஹம் ஸாமிகே ஏவம் படிபன்னே கோ மய்ஹம் க⁴ராவாஸேன அத்தோ²’’தி ஸம்வேக³ஜாதா பி⁴க்கு²னீஸு பப்³ப³ஜித்வா நசிரஸ்ஸேவ தேவிஜ்ஜா அஹோஸீதி.

வீரத்தே²ரகா³தா²வண்ணனா நிட்டி²தா.