3. து³ட்ட²ட்ட²கஸுத்தனித்³தே³ஸவண்ணனா

15. து³ட்ட²ட்ட²கே பட²மகா³தா²யம் தாவ தத்த² வத³ந்தீதி ப⁴க³வந்தம் பி⁴க்கு²ஸங்க⁴ஞ்ச உபவத³ந்தி. து³ட்ட²மனாபி ஏகே, அதோ²பி வே ஸச்சமனாதி ஏகச்சே து³ட்ட²சித்தா, ஏகச்சே தத²ஸஞ்ஞினோபி ஹுத்வா தித்தி²யா துட்ட²சித்தா, யே தேஸம் ஸுத்வா ஸத்³த³ஹிம்ஸு, தே ஸச்சமனாதி அதி⁴ப்பாயோ. வாத³ஞ்ச ஜாதந்தி ஏதம் அக்கோஸவாத³ம் உப்பன்னம். முனி நோ உபேதீதி அகாரகதாய ச அகுப்பனதாய ச பு³த்³த⁴முனி ந உபேதி. தஸ்மா முனீ நத்தி² கி²லோ குஹிஞ்சீதி தேன காரணேன அயம் முனி, ராகா³தி³கி²லேஹி நத்தி² கி²லோ குஹிஞ்சீதி வேதி³தப்³போ³.

து³ட்ட²மனாதி உப்பன்னேஹி தோ³ஸேஹி தூ³ஸிதசித்தா. விருத்³த⁴மனாதி தேஹி கிலேஸேஹி குஸலஸ்ஸ த்³வாரம் அத³த்வா ஆவரிதசித்தா. படிவிருத்³த⁴மனாதி உபஸக்³க³வஸேன பத³ம் வட்³டி⁴தம். ஆஹதமனாதி படிகே⁴ன ஆஹதம் சித்தம் ஏதேஸந்தி ஆஹதமனா. பச்சாஹதமனாதி உபஸக்³க³வஸேனேவ. ஆகா⁴திதமனாதி விஹிம்ஸாவஸேன ஆகா⁴திதம் மனம் ஏதேஸந்தி ஆகா⁴திதமனா. பச்சாகா⁴திதமனாதி உபஸக்³க³வஸேனேவ. அத² வா ‘‘கோத⁴வஸேன து³ட்ட²மனா, உபனாஹவஸேன பது³ட்ட²மனா, மக்க²வஸேன விருத்³த⁴மனா, பளாஸவஸேன படிவிருத்³த⁴மனா, தோ³ஸவஸேன ஆஹதபச்சாஹதமனா, ப்³யாபாத³வஸேன ஆகா⁴திதபச்சாகா⁴திதமனா. பச்சயானம் அலாபே⁴ன து³ட்ட²மனா பது³ட்ட²மனா, அயஸேன விருத்³த⁴மனா படிவிருத்³த⁴மனா, க³ரஹேன ஆஹதபச்சாஹதமனா, து³க்க²வேத³னாஸமங்கீ³பா⁴வேன ஆகா⁴திதபச்சாகா⁴திதமனா’’தி ஏவமாதி³னா நயேன ஏகே வண்ணயந்தி. உபவத³ந்தீதி க³ரஹம் உப்பாதே³ந்தி. அபூ⁴தேனாதி அஸம்விஜ்ஜமானேன.

ஸத்³த³ஹந்தாதி பஸாத³வஸேன ஸத்³த⁴ம் உப்பாதே³ந்தா. ஓகப்பேந்தாதி கு³ணவஸேன ஓதரித்வா அவகப்பயந்தா. அதி⁴முச்சந்தாதி ஸம்பஸாத³னவஸேன ஸன்னிட்டா²னம் கத்வா தேஸம் கத²ம் அதி⁴வாஸேந்தா. ஸச்சமனாதி தச்ச²மனா. ஸச்சஸஞ்ஞினோதி தச்ச²ஸஞ்ஞினோ. தத²மனாதி அவிபரீதமனா. பூ⁴தமனாதி பூ⁴தத்த²மனா. யாதா²வமனாதி நிச்சலமனா. அவிபரீதமனாதி நிச்ச²யமனா. தத்த² ‘‘ஸச்சமனா ஸச்சஸஞ்ஞினோ’’தி ஸச்சவாதி³கு³ணம், ‘‘தத²மனா தத²ஸஞ்ஞினோ’’தி ஸச்சஸத்³தா⁴கு³ணம், ‘‘பூ⁴தமனா பூ⁴தஸஞ்ஞினோ’’தி டி²தகு³ணம், ‘‘யாதா²வமனா யாதா²வஸஞ்ஞினோ’’தி பச்சயிககு³ணம், ‘‘அவிபரீதமனா அவிபரீதஸஞ்ஞினோ’’தி அவிஸம்வாத³கு³ணம் கதி²தந்தி ஞாதப்³ப³ம்.

பரதோகோ⁴ஸோதி அஞ்ஞேஸம் ஸந்திகா உப்பன்னஸத்³தோ³. அக்கோஸோதி ஜாதிஆதீ³ஸு த³ஸஸு அக்கோஸேஸு அஞ்ஞதரோ. யோ வாத³ம் உபேதீதி யோ புக்³க³லோ உபவாத³ம் உபக³ச்ச²தி. காரகோ வாதி கததோ³ஸோ வா. காரகதாயாதி தோ³ஸஸ்ஸ கதபா⁴வேன வுச்சமானோதி கதி²யமானோ. உபவதி³யமானோதி தோ³ஸம் உபவஜ்ஜமானோ. குப்பதீதி கோபம் கரோதி.

கீ²லஜாததாபி நத்தீ²தி சித்தப³ந்த⁴பா⁴வசித்தகசவரபா⁴வஸங்கா²தம் படிக⁴கி²லம் ஜாதம் அஸ்ஸாதி கி²லஜாதோ, தஸ்ஸ பா⁴வோ கி²லஜாததா, தாபி நத்தி² ந ஸந்தி. பஞ்சபி சேதோகி²லாதி காமே அவீதராகோ³, காயே அவீதராகோ³, ரூபே அவீதராகோ³, யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி, அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி ‘‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி, தே³வஞ்ஞதரோ வா’’தி (ம. நி. 1.186) ஏவரூபா பஞ்சபி சித்தஸ்ஸ ப³ந்த⁴பா⁴வகசவரபா⁴வஸங்கா²தா சேதோகி²லா நத்தி².

16. இமஞ்ச கா³த²ம் வத்வா ப⁴க³வா ஆனந்த³த்தே²ரம் புச்சி² – ‘‘ஏவம் கு²ம்ஸேத்வா வம்பே⁴த்வா வுச்சமானா பி⁴க்கூ², ஆனந்த³, கிம் வத³ந்தீ’’தி, ‘‘ந கிஞ்சி ப⁴க³வா’’தி. ‘‘ந, ஆனந்த³, ‘அஹம் ஸீலவா’தி ஸப்³ப³த்த² துண்ஹீ ப⁴விதப்³ப³ம். லோகே ஹி நாபா⁴ஸமானம் ஜானந்தி, மிஸ்ஸம் பா³லேஹி பண்டி³த’’ந்தி (ஸம். நி. 2.241) வத்வா ‘‘பி⁴க்கூ², ஆனந்த³, தே மனுஸ்ஸே ஏவம் படிசோதே³ந்தூ’’தி த⁴ம்மதே³ஸனத்தா²ய ‘‘அபூ⁴தவாதீ³ நிரயம் உபேதீ’’தி (த⁴. ப. 306; உதா³. 38; இதிவு. 48; ஸு. நி. 666) இமம் கா³த²ம் அபா⁴ஸி. தே²ரோ தம் உக்³க³ஹேத்வா பி⁴க்கூ² ஆஹ – ‘‘மனுஸ்ஸா தும்ஹேஹி இமாய கா³தா²ய படிசோதே³தப்³பா³’’தி. பி⁴க்கூ² ததா² அகம்ஸு. பண்டி³தமனுஸ்ஸா துண்ஹீ அஹேஸும். ராஜாபி ராஜபுரிஸே ஸப்³ப³த்த² பேஸேத்வா யேஸம் து⁴த்தானம் லஞ்ஜம் த³த்வா தித்தி²யா தம் மாராபேஸும், தே க³ஹேத்வா நிக்³க³ய்ஹ தம் பவத்திம் ஞத்வா தித்தி²யே பரிபா⁴ஸி. மனுஸ்ஸாபி தித்தி²யே தி³ஸ்வா லேட்³டு³னா ஹனந்தி, பம்ஸுனா ஓகிரந்தி ‘‘ப⁴க³வதோ அயஸம் உப்பாதே³ஸு’’ந்தி. ஆனந்த³த்தே²ரோ தம் தி³ஸ்வா ப⁴க³வதோ ஆரோசேஸி, ப⁴க³வா தே²ரஸ்ஸ இமம் கா³த²மபா⁴ஸி ‘‘ஸகஞ்ஹி தி³ட்டி²ம்…பே… வதே³ய்யா’’தி.

தஸ்ஸ அத்தோ² – யாயம் தி³ட்டி² தித்தி²யஜனஸ்ஸ ‘‘ஸுந்த³ரிம் மாரேத்வா ஸமணானம் ஸக்யபுத்தியானம் அவண்ணம் பகாஸேத்வா ஏதேனுபாயேன லத்³த⁴ம் ஸக்காரம் ஸாதி³யிஸ்ஸாமா’’தி ஸோ தம் தி³ட்டி²ம் கத²ம் அதிக்கமேய்ய? அத² கோ² ஸோ அயஸோ தமேவ தித்தி²யஜனம் பச்சாக³தோ தம் தி³ட்டி²ம் அச்சேதும் அஸக்கோந்தம். யோ வா ஸஸ்ஸதாதி³வாதீ³, ஸோபி ஸகம் தி³ட்டி²ம் கத²மச்சயேய்ய, தேன தி³ட்டி²ச²ந்தே³ன அனுனீதோ தாய ச தி³ட்டி²ருசியா நிவிட்டோ², அபி ச கோ² பன ஸயம் ஸமத்தானி பகுப்³ப³மானோ அத்தனாவ பரிபுண்ணானி தானி தி³ட்டி²க³தானி கரோந்தோ யதா² ஜானேய்ய, ததே²வ வதே³ய்யாதி.

அவண்ணம் பகாஸயித்வாதி அகு³ணம் பாகடம் கத்வா. ஸக்காரந்தி சதுன்னம் பச்சயானம் ஸக்கச்சகரணம். ஸம்மானந்தி சித்தேன ப³ஹுமானனம். பச்சாஹரிஸ்ஸாமாதி ஏதம் லாபா⁴தி³ம் நிப்³ப³த்தேஸ்ஸாம. ஏவம்தி³ட்டி²காதி ஏவம்லத்³தி⁴கா. யதா² தம் ‘‘லாபா⁴தி³ம் நிப்³ப³த்தேஸ்ஸாமா’’தி ஏவம் அயம் லத்³தி⁴ தேஸம் அத்தி², ததா² ‘‘அத்தி² மே வுத்தப்பகாரோ த⁴ம்மோ’’தி ஏதேஸம் க²மதி சேவ ருச்சதி ச, ஏவம்ஸபா⁴வமேவ வா தேஸம் சித்தம் ‘‘அத்தி² மே சித்த’’ந்தி. ததா³ தேஸம் தி³ட்டி² வா, தி³ட்டி²யா ஸஹ க²ந்தி வா, தி³ட்டி²க²ந்தீஹி ஸத்³தி⁴ம் ருசி வா, தி³ட்டி²க²ந்திருசீஹி ஸத்³தி⁴ம் லத்³தி⁴ வா, தி³ட்டி²க²ந்திருசிலத்³தீ⁴ஹி ஸத்³தி⁴ம் அஜ்ஜா²ஸயோ வா, தி³ட்டி²க²ந்திருசிலத்³தி⁴அஜ்ஜா²ஸயேஹி ஸத்³தி⁴ம் அதி⁴ப்பாயோ வா ஹோதீதி த³ஸ்ஸேந்தோ ‘‘ஏவம்தி³ட்டி²கா…பே… ஏவம்அதி⁴ப்பாயா’’தி ஆஹ. ஸகம் தி³ட்டி²ந்தி அத்தனோ த³ஸ்ஸனம். ஸகம் க²ந்திந்தி அத்தனோ ஸஹனம். ஸகம் ருசிந்தி அத்தனோ ருசிம். ஸகம் லத்³தி⁴ந்தி அத்தனோ லத்³தி⁴ம். ஸகம் அஜ்ஜா²ஸயந்தி அத்தனோ அஜ்ஜா²ஸயம். ஸகம் அதி⁴ப்பாயந்தி அத்தனோ பா⁴வம். அதிக்கமிதுந்தி ஸமதிக்கமிதும். அத² கோ² ஸ்வேவ அயஸோதி ஸோ ஏவ அயஸோ ஏகம்ஸேன. தே பச்சாக³தோதி தேஸம் பதிஆக³தோ. தேதி ஸாமிஅத்தே² உபயோக³வசனம்.

அத² வாதி அத்த²ந்தரத³ஸ்ஸனம். ஸஸ்ஸதோதி நிச்சோ து⁴வோ. லோகோதி அத்தபா⁴வோ. இத³மேவ ஸச்சம், மோக⁴மஞ்ஞந்தி இத³ம் ஏவ தச்ச²ம் தத²ம், அஞ்ஞம் துச்ச²ம். ஸமத்தாதி ஸம்புண்ணா. ஸமாதி³ன்னாதி ஸம்மா ஆதி³ன்னா. க³ஹிதாதி உபக³ந்த்வா க³ஹிதா.

பராமட்டா²தி ஸப்³பா³காரேன பராமஸித்வா க³ஹிதா. அபி⁴னிவிட்டா²தி விஸேஸேன லத்³த⁴ப்பதிட்டா². அஸஸ்ஸதோதி வுத்தவிபரியாயேன வேதி³தப்³போ³.

அந்தவாதி ஸஅந்தோ. அனந்தவாதி வுத்³தி⁴அனந்தவா. தம் ஜீவந்தி ஸோ ஜீவோ, லிங்க³விபல்லாஸோ கதோ. ஜீவோதி ச அத்தாயேவ. ததா²க³தோதி ஸத்தோ, ‘‘அரஹ’’ந்தி ஏகே. பரம் மரணாதி மரணதோ உத்³த⁴ம், பரலோகேதி அத்தோ². ந ஹோதி ததா²க³தோ பரம் மரணாதி மரணதோ உத்³த⁴ம் ந ஹோதி. ஹோதி ச ந ச ஹோதி ததா²க³தோ பரம் மரணாதி மரணதோ உத்³த⁴ம் ஹோதி ச ந ஹோதி ச. நேவ ஹோதி ந ந ஹோதி ததா²க³தோ பரம் மரணாதி உச்சே²த³வஸேன நேவ ஹோதி, தக்கிகவஸேன ந ந ஹோதி.

ஸகாய தி³ட்டி²யாதிஆத³யோ கரணவசனம். அல்லீனோதி ஏகீபூ⁴தோ.

ஸயம் ஸமத்தம் கரோதீதி அத்தனா ஊனபா⁴வம் மோசேத்வா ஸம்மா அத்தம் ஸமத்தம் கரோதி. பரிபுண்ணந்தி அதிரேகதோ³ஸம் மோசேத்வா ஸம்புண்ணம். அனோமந்தி ஹீனதோ³ஸம் மோசேத்வா அலாமகம். அக்³க³ந்தி ஆதி³ம். ஸேட்ட²ந்தி பதா⁴னம் நித்³தோ³ஸம். விஸேஸந்தி ஜேட்ட²கம். பாமோக்க²ந்தி அதி⁴கம். உத்தமந்தி விஸேஸம் ந ஹேட்டி²மம். பவரம் கரோதீதி அதிரேகேன உத்தமம் கரோதி. அத² வா ‘‘ஆஸயதோ³ஸமோசனேன அக்³க³ம், ஸம்கிலேஸதோ³ஸமோசனேன ஸேட்ட²ம், உபக்கிலேஸதோ³ஸமோசனேன விஸேஸம், பமத்ததோ³ஸமோசனேன பாமோக்க²ம், மஜ்ஜி²மதோ³ஸமோசனேன உத்தமம், உத்தமமஜ்ஜி²மதோ³ஸமோசனேன பவரம் கரோதீ’’தி ஏவமேகே வண்ணயந்தி. அயம் ஸத்தா² ஸப்³ப³ஞ்ஞூதி அயம் அம்ஹாகம் ஸத்தா² ஸப்³ப³ஜானனவஸேன ஸப்³ப³ஞ்ஞூ. அயம் த⁴ம்மோ ஸ்வாக்கா²தோதி அயம் அம்ஹாகம் த⁴ம்மோ ஸுட்டு² அக்கா²தோ. அயம் க³ணோ ஸுப்படிபன்னோதி அயம் அம்ஹாகம் க³ணோ ஸுட்டு² படிபன்னோ. அயம் தி³ட்டி² ப⁴த்³தி³காதி அயம் அம்ஹாகம் லத்³தி⁴ ஸுந்த³ரா. அயம் படிபதா³ ஸுபஞ்ஞத்தாதி அயம் அம்ஹாகம் புப்³ப³பா⁴கா³ அத்தந்த பாதி³படிபதா³ ஸுட்டு² பஞ்ஞத்தா. அயம் மக்³கோ³ நிய்யானிகோதி அயம் அம்ஹாகம் நிய்யாமோக்கந்திகோ மக்³கோ³ நிய்யானிகோதி ஸயம் ஸமத்தம் கரோதி.

கதே²ய்ய ‘‘ஸஸ்ஸதோ லோகோ’’தி. ப⁴ணேய்ய ‘‘இத³மேவ ஸச்சம் மோக⁴மஞ்ஞ’’ந்தி. தீ³பேய்ய ‘‘அந்தவா லோகோ’’தி. வோஹரேய்ய நானாவிதே⁴ன க³ண்ஹாபேய்ய ‘‘ஹோதி ச ந ச ஹோதீ’’தி.

17. அத² ராஜா ஸத்தாஹச்சயேன தம் குணபம் ச²ட்³டா³பேத்வா ஸாயன்ஹஸமயம் விஹாரம் க³ந்த்வா ப⁴க³வந்தம் அபி⁴வாதே³த்வா ஆஹ – ‘‘நனு, ப⁴ந்தே, ஈதி³ஸே அயஸே உப்பன்னே மய்ஹம்பி ஆரோசேதப்³ப³ம் ஸியா’’தி? ஏவம் வுத்தே ப⁴க³வா ‘‘ந, மஹாராஜ, ‘அஹம் ஸீலவா கு³ணஸம்பன்னோ’தி பரேஸம் ஆரோசேதும் அரியானம் படிரூப’’ந்தி வத்வா தஸ்ஸா அட்டு²ப்பத்தியா ‘‘யோ அத்தனோ ஸீலவதானீதி அவஸேஸகா³தா²யோ அபா⁴ஸி.

தத்த² ஸீலவதானீதி பாதிமோக்கா²தீ³னி ஸீலானி, ஆரஞ்ஞிகாதீ³னி து⁴தங்க³வதானி ச. அனானுபுட்டோ²தி அபுச்சி²தோ. பாவாதி வத³தி. அனரியத⁴ம்மம் குஸலா தமாஹு, யோ ஆதுமானம் ஸயமேவ பாவாதி யோ ஏவம் அத்தானம் ஸயமேவ வத³தி, தஸ்ஸ தம் வாத³ம் ‘‘அனரியத⁴ம்மோ ஏஸோ’’தி குஸலா ஏவம் கதே²ந்தி.

அத்தி² ஸீலஞ்சேவ வதஞ்சாதி ஸீலனட்டே²ன ஸீலஞ்சேவ அத்தி², ஸமாதா³னட்டே²ன வதஞ்ச அத்தி², வதம் ந ஸீலந்தி வுத்தத்தே²ன வதம் அத்தி², தம் ந ஸீலம். கதமந்தி கதே²துகம்யதாபுச்சா². இத⁴ பி⁴க்கு² ஸீலவாதிஆத³யோ வுத்தனயா ஏவ. ஸம்வரட்டே²னாதி ஸம்வரணட்டே²ன, வீதிக்கமத்³வாரம் பித³ஹனட்டே²ன. ஸமாதா³னட்டே²னாதி தம் தம் ஸிக்கா²பத³ம் ஸம்மா ஆதா³னட்டே²ன. ஆரஞ்ஞிகங்க³ந்தி அரஞ்ஞே நிவாஸோ ஸீலம் அஸ்ஸாதி ஆரஞ்ஞிகோ, தஸ்ஸ அங்க³ம் ஆரஞ்ஞிகங்க³ம். பிண்ட³பாதிகங்க³ந்தி பி⁴க்கா²ஸங்கா²தானம் பரஆமிஸபிண்டா³னம் பாதோ பிண்ட³பாதோ, பரேஹி தி³ன்னானம் பிண்டா³னம் பத்தே நிபதனந்தி வுத்தம் ஹோதி. தம் பிண்ட³பாதம் உஞ்ச²தி தம் தம் குலம் உபஸங்கமந்தோ க³வேஸதீதி பிண்ட³பாதிகோ, பிண்டா³ய வா பதிதும் வதமேதஸ்ஸாதி பிண்ட³பாதீ. பதிதுந்தி சரிதும். பிண்ட³பாதீ ஏவ பிண்ட³பாதிகோ, தஸ்ஸ அங்க³ம் பிண்ட³பாதிகங்க³ம். அங்க³ந்தி காரணம் வுச்சதி. தஸ்மா யேன ஸமாதா³னேன ஸோ பிண்ட³பாதிகோ ஹோதி, தஸ்ஸேதம் அதி⁴வசனந்தி வேதி³தப்³ப³ம். ஏதேனேவ நயேன ரதி²காஸுஸானஸங்காரகூடாதீ³னம் யத்த² கத்த²சி பம்ஸூனம் உபரி டி²தத்தா அப்³பு⁴க்³க³தட்டே²ன தேஸு பம்ஸுகூலமிவாதி பம்ஸுகூலம். அத² வா பம்ஸு விய குச்சி²தபா⁴வம் உலதீதி பம்ஸுகூலம், குச்சி²தபா⁴வம் க³ச்ச²தீதி வுத்தம் ஹோதி. ஏவம் லத்³த⁴னிப்³ப³சனஸ்ஸ பம்ஸுகூலஸ்ஸ தா⁴ரணம் பம்ஸுகூலம், பம்ஸுகூலம் ஸீலமஸ்ஸாதி பம்ஸுகூலிகோ, பம்ஸுகூலிகஸ்ஸ அங்க³ம் பம்ஸுகூலிகங்க³ம். ஸங்கா⁴டிஉத்தராஸங்க³அந்தரவாஸகஸங்கா²தம் திசீவரம் ஸீலமஸ்ஸாதி தேசீவரிகோ, தேசீவரிகஸ்ஸ அங்க³ம் தேசீவரிகங்க³ம். ஸபதா³னசாரிகங்க³ந்தி தா³னம் வுச்சதி அவக²ண்ட³னம், அபேதம் தா³னதோ அபதா³னம், அனவக²ண்ட³னந்தி அத்தோ². ஸஹ அபதா³னேன ஸபதா³னம், அவக²ண்ட³னவிரஹிதம், அனுக⁴ரந்தி வுத்தம் ஹோதி. ஸபதா³னம் சரிதும் இத³மஸ்ஸ ஸீலந்தி ஸபதா³னசாரீ, ஸபதா³னசாரீயேவ ஸபதா³னசாரிகோ, தஸ்ஸ அங்க³ம் ஸபதா³னசாரிகங்க³ம். க²லுபச்சா²ப⁴த்திகங்க³ந்தி க²லூதி படிஸேத⁴னத்தே² நிபாதோ. பவாரிதேன ஸதா பச்சா² லத்³த⁴ம் ப⁴த்தம் பச்சா²ப⁴த்தம் நாம, தஸ்ஸ பச்சா²ப⁴த்தஸ்ஸ போ⁴ஜனம் பச்சா²ப⁴த்தபோ⁴ஜனம், தஸ்மிம் பச்சா²ப⁴த்தபோ⁴ஜனே பச்சா²ப⁴த்தஸஞ்ஞம் கத்வா பச்சா²ப⁴த்தம் ஸீலமஸ்ஸாதி பச்சா²ப⁴த்திகோ, ந பச்சா²ப⁴த்திகோ க²லுபச்சா²ப⁴த்திகோ, ஸமாதா³னவஸேன படிக்கி²த்தாதிரித்தபோ⁴ஜனஸ்ஸேதம் நாமம், தஸ்ஸ அங்க³ம் க²லுபச்சா²ப⁴த்திகங்க³ம். நேஸஜ்ஜிகங்க³ந்தி ஸயனம் படிக்கி²பித்வா நிஸஜ்ஜாய விஹரிதும் ஸீலமஸ்ஸாதி நேஸஜ்ஜிகோ, தஸ்ஸ அங்க³ம் நேஸஜ்ஜிகங்க³ம். யதா²ஸந்த²திகங்க³ந்தி யதே³வ ஸந்த²தம் யதா²ஸந்த²தம், ‘‘இத³ம் துய்ஹம் பாபுணாதீ’’தி ஏவம் பட²மம் உத்³தி³ட்ட²ஸேனாஸனஸ்ஸேதம் அதி⁴வசனம். தஸ்மிம் யதா²ஸந்த²தே விஹரிதும் ஸீலமஸ்ஸாதி யதா²ஸந்த²திகோ, தஸ்ஸ அங்க³ம் யதா²ஸந்த²திகங்க³ம். ஸப்³பா³னேவ பனேதானி தேன தேன ஸமாதா³னேன து⁴தகிலேஸத்தா து⁴தஸ்ஸ பி⁴க்கு²னோ அங்கா³னி, கிலேஸது⁴னனதோ வா து⁴தந்தி லத்³த⁴வோஹாரம் ஞாணம் அங்க³ம் ஏதேஸந்தி து⁴தங்கா³னி. அத² வா து⁴தானி ச தானி படிபக்கா²னம் து⁴னனதோ அங்கா³னி ச படிபத்தியாதிபி து⁴தங்கா³னி. ஏவம் தாவேத்த² அத்த²தோ விஞ்ஞாதப்³போ³ வினிச்ச²யோ. ஸப்³பா³னேவ சேதானி ஸமாதா³னசேதனாலக்க²ணானி. வுத்தம்பி சேதம் –

‘‘யோ ஸமாதி³யதி, ஸோ புக்³க³லோ. யேன ஸமாதி³யதி, சித்தசேதஸிகா ஏதே த⁴ம்மா. யா ஸமாதா³னசேதனா, தம் து⁴தங்க³ம். யம் படிக்கி²பதி, தம் வத்து²’’ந்தி (விஸுத்³தி⁴. 1.23).

ஸப்³பா³னேவ ச லோலுப்பவித்³த⁴ம்ஸனரஸானி, நில்லோலுப்பபா⁴வபச்சுபட்டா²னானி, அப்பிச்ச²தாதி³அரியத⁴ம்மபத³ட்டா²னானி. ஏவமேத்த² லக்க²ணாதீ³ஹி வினிச்ச²யோ வேதி³தப்³போ³.

வீரியஸமாதா³னம்பீதி வீரியக்³க³ஹணம்பி. காமந்தி ஏகம்ஸத்தே² நிபாதோ. தசோ ச ந்ஹாரு சாதி ச²வி ச ந்ஹாருவல்லியோ ச. அட்டி² சாதி ஸப்³பா³ அட்டி²யோ ச. அவஸிஸ்ஸதூதி திட்ட²து. உபஸுஸ்ஸது மம்ஸலோஹிதந்தி ஸப்³ப³ம் மம்ஸஞ்ச லோஹிதஞ்ச ஸுக்க²து. ‘‘தசோ’’தி ஏகம் அங்க³ம், ‘‘ந்ஹாரூ’’தி ஏகம், ‘‘அட்டீ²’’தி ஏகம், ‘‘உபஸுஸ்ஸது மம்ஸலோஹித’’ந்தி ஏகம் அங்க³ம். யம் தந்தி உபரி வத்தப்³ப³பதே³ன ஸம்ப³ந்தோ⁴. புரிஸதா²மேனாதி புரிஸஸ்ஸ காயிகேன ப³லேன, ப³லேனாதி ஞாணப³லேன. வீரியேனாதி சேதஸிகஞாணவீரியதேஜேன. பரக்கமேனாதி பரம் பரம் டா²னம் அக்கமனேன உஸ்ஸாஹப்பத்தவீரியேன. பத்தப்³ப³ந்தி யம் தம் பாபுணிதப்³ப³ம். ந தம் அபாபுணித்வாதி தம் பத்தப்³ப³ம் அப்பத்வா. வீரியஸ்ஸ ஸண்டா²னம் ப⁴விஸ்ஸதீதி வுத்தப்பகாரஸ்ஸ வீரியஸ்ஸ ஸிதி²லத்தம் ஓஸீத³னம் ந ப⁴விஸ்ஸதி. ‘‘பட்டா²ன’’ந்திபி பாடோ², அயமேவத்தோ². சித்தம் பக்³க³ண்ஹாதீதி சித்தம் உஸ்ஸாஹம் க³ண்ஹாபேதி. பத³ஹதீதி பதிட்டா²பேதி.

நாஸிஸ்ஸந்தி ந கா²தி³ஸ்ஸாமி ந பு⁴ஞ்ஜிஸ்ஸாமி. ந பிவிஸ்ஸாமீதி யாகு³பானாதீ³னி ந பிவிஸ்ஸாமி. விஹாரதோ ந நிக்க²மேதி ஸேனாஸனதோ ப³ஹி ந நிக்க²மேய்யம். நபி பஸ்ஸம் நிபாதேஸ்ஸந்தி பஸ்ஸம் மஞ்சே வா பீடே² வா பூ⁴மியம் வா கடஸந்த²ரகே வா பாதனம் ட²பனம் ந கரிஸ்ஸாமி. தண்ஹாஸல்லே அனூஹதேதி தண்ஹாஸங்கா²தே கண்டே³ அனுத்³த⁴டே, அவிக³தேதி அத்தோ².

இமம் பல்லங்கந்தி ஸமந்ததோ ஆபு⁴ஜிதம் ஊருப³த்³தா⁴ஸனம். ந பி⁴ந்தி³ஸ்ஸாமீதி ந விஜஹிஸ்ஸாமி. யாவ மே ந அனுபாதா³யாதி சதூஹி உபாதா³னேஹி க³ஹணம் அக்³க³ஹேத்வா. ஆஸவேஹீதி காமாஸவாதீ³ஹி சதூஹி ஆஸவேஹி. விமுச்சிஸ்ஸதீதி ஸமுச்சே²த³விமுத்தியா ந முச்சிஸ்ஸதி. ந தாவாஹம் இமம்ஹா ஆஸனா வுட்ட²ஹிஸ்ஸாமீதி ஆதி³ம் கத்வா யாவ ருக்க²மூலா நிக்க²மிஸ்ஸாமீதி ஓகாஸவஸேன வுத்தா. இமஸ்மிஞ்ஞேவ புப்³ப³ண்ஹஸமயம் அரியத⁴ம்மம் ஆஹரிஸ்ஸாமீதி ஆதி³ம் கத்வா யாவ கி³ம்ஹேதி காலவஸேன வுத்தா. புரிமே வயோக²ந்தே⁴திஆத³யோ வயவஸேன வுத்தா. தத்த² ஆஸனா ந வுட்ட²ஹிஸ்ஸாமீதி நிஸின்னாஸனா ந உட்ட²ஹிஸ்ஸாமி. அட்³ட⁴யோகா³தி நிகுண்ட³கே³ஹா. பாஸாதா³தி தீ³க⁴பாஸாதா³. ஹம்மியாதி முண்ட³ச்ச²த³னகே³ஹா. கு³ஹாயாதி பம்ஸுகு³ஹாய. லேணாதி மரியாத³சி²ன்னச்சி²த்³தா³ பப்³ப³தலேணா. குடியாதி உல்லித்தாதி³குடியா. கூடாகா³ராதி கண்ணிகம் ஆரோபேத்வா கதகே³ஹதோ. அட்டாதி த்³வாரட்டாலகா. மாளாதி வட்டகே³ஹா. உத்³த³ண்டோ³ நாம ஏகோ பதிஸ்ஸயவிஸேஸோ. ‘‘திச²த³னகே³ஹோ’’திபி ஏகே. உபட்டா²னஸாலாதி ஸன்னிபாதஸாலா போ⁴ஜனஸாலா வா. மண்ட³பாத³யோ பாகடாயேவ. அரியத⁴ம்மந்தி அனவஜ்ஜத⁴ம்மம், அரியானம் வா பு³த்³த⁴பச்சேகபு³த்³த⁴பு³த்³த⁴ஸாவகானம் த⁴ம்மம். ஆஹரிஸ்ஸாமீதி மம சித்தஸமீபம் ஆனயிஸ்ஸாமி ஸீலேன. ஸமாஹரிஸ்ஸாமீதி விஸேஸேன ஆனயிஸ்ஸாமி ஸமாதி⁴னா. அதி⁴க³ச்சி²ஸ்ஸாமீதி படிலாப⁴வஸேன க³மிஸ்ஸாமி தத³ங்கே³ன. ப²ஸ்ஸயிஸ்ஸாமீதி பு²ஸிஸ்ஸாமி மக்³கே³ன. ஸச்சி²கரிஸ்ஸாமீதி பச்சக்க²ம் கரிஸ்ஸாமி ப²லேன. அத² வா ஸோதாபத்திமக்³கே³ன ஆஹரிஸ்ஸாமி. ஸகதா³கா³மிமக்³கே³ன ஸமாஹரிஸ்ஸாமி, அனாகா³மிமக்³கே³ன அதி⁴க³ச்சி²ஸ்ஸாமி, அரஹத்தமக்³கே³ன ப²ஸ்ஸயிஸ்ஸாமி, பச்சவேக்க²ணேன ஸச்சி²கரிஸ்ஸாமி. த்³வீஸுபி நயேஸு ப²ஸ்ஸயிஸ்ஸாமீதி நாமகாயேன நிப்³பா³னம் பு²ஸிஸ்ஸாமீதி அத்தோ².

அபுட்டோ²தி மூலபத³ம், தஸ்ஸ அபுச்சி²தோதி அத்தோ². அபுச்சி²தோதி அஜானாபிதோ. அயாசிதோதி அனாயாசிதோ. அனஜ்ஜே²ஸிதோதி அனாணாபிதோ, ‘‘ந இச்சி²தோ’’தி ஏகே. அபஸாதி³தோதி ந பஸாதா³பிதோ. பாவத³தீதி கத²யதி. அஹமஸ்மீதி அஹம் அஸ்மி ப⁴வாமி. ஜாதியா வாதி க²த்தியப்³ராஹ்மணஜாதியா வா. கோ³த்தேன வாதி கோ³தமாதி³கோ³த்தேன வா. கோலபுத்தியேன வாதி குலபுத்தபா⁴வேன வா. வண்ணபோக்க²ரதாய வாதி ஸரீரஸுந்த³ரதாய வா. த⁴னேன வாதி த⁴னஸம்பத்தியா வா. அஜ்ஜே²னேன வாதி அஜ்ஜா²யகரணேன வா. கம்மாயதனேன வாதி கம்மமேவ கம்மாயதனம், தேன கம்மாயதனேன, கஸிகோ³ரக்க²கம்மாதி³னா வா. ஸிப்பாயதனேன வாதி த⁴னுஸிப்பாதி³னா வா. விஜ்ஜாட்டா²னேன வாதி அட்டா²ரஸவிஜ்ஜாட்டா²னேன வா. ஸுதேன வாதி ப³ஹுஸ்ஸுதகு³ணேன வா. படிபா⁴னேன வாதி காரணாகாரணபடிபா⁴னஸங்கா²தஞாணேன வா. அஞ்ஞதரஞ்ஞதரேன வா வத்து²னாதி ஜாதிஆதீ³னம் ஏகேகேன வத்து²னா வா.

உச்சா குலாதி க²த்தியப்³ராஹ்மணகுலா, ஏதேன ஜாதிகோ³த்தமஹத்தம் தீ³பேதி. மஹாபோ⁴க³குலாதி க³ஹபதிமஹாஸாலகுலா, ஏதேன அட்³ட⁴மஹத்தம் தீ³பேதி. உளாரபோ⁴க³குலாதி அவஸேஸவேஸ்ஸாதி³குலா, ஏதேன பஹூதஜாதரூபரஜதாதி³ம் தீ³பேதி. சண்டா³லாபி ஹி உளாரபோ⁴கா³ ஹோந்தி. ஞாதோதி பாகடோ. யஸ்ஸஸ்ஸீதி பரிவாரஸம்பன்னோ. ஸுத்தந்திகோதி ஸுத்தந்தே நியுத்தோ. வினயத⁴ரோதி வினயபிடகத⁴ரோ. த⁴ம்மகதி²கோதி ஆபி⁴த⁴ம்மிகோ. ஆரஞ்ஞிகோதிஆத³யோ து⁴தங்க³புப்³ப³ங்க³மபடிபத்தித³ஸ்ஸனத்த²ம் வுத்தா. பட²மஸ்ஸ ஜா²னஸ்ஸ லாபீ⁴திஆத³யோ ரூபாரூபஅட்ட²ஸமாபத்தியோ த³ஸ்ஸேத்வா படிவேத⁴த³ஸ்ஸனவஸேன வுத்தா. பாவத³தீதி மூலபத³ம். கதே²தீதி ‘‘பிடகாசரியோஸ்மீ’’தி கத²யதி. ப⁴ணதீதி ‘‘து⁴தங்கி³கோம்ஹீ’’தி பாகடம் கரோதி. தீ³பயதீதி ‘‘ரூபஜ்ஜா²னம் லாபீ⁴ம்ஹீ’’தி பரிதீ³பயதி. வோஹரதீதி ‘‘அரூபஜ்ஜா²னம் லாபீ⁴ம்ஹீ’’தி வாக்யபே⁴த³ம் கரோதி.

க²ந்த⁴குஸலாதி பஞ்சஸு க²ந்தே⁴ஸு ஸலக்க²ணஸாமஞ்ஞலக்க²ணேஸு சே²கா, ஞாததீரணபஹானவஸேன குஸலாதி அத்தோ². தா⁴துஆயதனபடிச்சஸமுப்பாதா³தீ³ஸுபி ஏஸேவ நயோ. நிப்³பா³னகுஸலாதி நிப்³பா³னே சே²கா. அனரியானந்தி ந அரியானம். ஏஸோ த⁴ம்மோதி ஏஸோ ஸபா⁴வோ. பா³லானந்தி அபண்டி³தானம். அஸப்புரிஸானந்தி ந ஸோப⁴னபுரிஸானம். அத்தாதி அத்தானம்.

18. ஸந்தோதி ராகா³தி³கிலேஸூபஸமேன ஸந்தோ. ததா² அபி⁴னிப்³பு³தத்தோ. இதி’ஹந்தி ஸீலேஸு அகத்த²மானோதி ‘‘அஹமஸ்மி ஸீலஸம்பன்னோ’’திஆதி³னா நயேன இதி ஸீலேஸு அகத்த²மானோ, ஸீலனிமித்தம் அத்துபனாயிகம் வாசம் அபா⁴ஸமானோதி வுத்தம் ஹோதி. தமரியத⁴ம்மம் குஸலா வத³ந்தீதி தஸ்ஸ தம் அகத்த²னம் ‘‘அரியத⁴ம்மோ ஏஸோ’’தி பு³த்³தா⁴த³யோ க²ந்தா⁴தி³குஸலா வத³ந்தி. யஸ்ஸுஸ்ஸதா³ நத்தி² குஹிஞ்சி லோகேதி யஸ்ஸ கீ²ணாஸவஸ்ஸ ராகா³த³யோ ஸத்துஸ்ஸதா³ குஹிஞ்சி லோகே நத்தி². தஸ்ஸ தம் அகத்த²னம் ‘‘அரியத⁴ம்மோ ஏஸோ’’தி ஏவம் குஸலா வத³ந்தீதி ஸம்ப³ந்தோ⁴.

ஸந்தோதி மூலபத³ம். ராக³ஸ்ஸ ஸமிதத்தாதி ரஞ்ஜனலக்க²ணஸ்ஸ ராக³ஸ்ஸ ஸமிதபா⁴வேன. தோ³ஸாதீ³ஸுபி ஏஸேவ நயோ. விஜ்ஜா²தத்தாதி ஸப்³ப³பரிளாஹானம் ஜா²பிதத்தா. நிப்³பு³தத்தாதி ஸப்³ப³ஸந்தாபானம் நிப்³பா³பிதபா⁴வேன. விக³தத்தாதி ஸப்³பா³குஸலாபி⁴ஸங்கா²ரானம் விக³தபா⁴வேன தூ³ரபா⁴வேன. படிபஸ்ஸத்³த⁴த்தாதி ஸப்³பா³காரேன அப⁴ப்³பு³ப்பத்திகபா⁴வேன. ஸத்தன்னம் த⁴ம்மானம் பி⁴ன்னத்தா பி⁴க்கூ²தி உபரி வத்தப்³பா³னம் ஸத்தத⁴ம்மானம் பி⁴ந்தி³த்வா டி²தபா⁴வேன பி⁴க்கு². ஸக்காயதி³ட்டி²விசிகிச்சா²ஸீலப்³ப³தபராமாஸோதி இமே தயோ கிலேஸா ஸோதாபத்திமக்³கே³ன பி⁴ன்னா, ராகோ³ தோ³ஸோதி இமே த்³வே கிலேஸா ஓளாரிகா ஸகதா³கா³மிமக்³கே³ன பி⁴ன்னா, தே ஏவ அணுஸஹக³தா அனாகா³மிமக்³கே³ன பி⁴ன்னா, மோஹோ மானோதி இமே த்³வே கிலேஸா அரஹத்தமக்³கே³ன பி⁴ன்னா. அவஸேஸே கிலேஸே த³ஸ்ஸேதும் ‘‘பி⁴ன்னாஸ்ஸ ஹோந்தி பாபகா அகுஸலா த⁴ம்மா’’தி ஆஹ. ஸம்கிலேஸிகாதி கிலேஸபச்சயா. போனோப⁴விகாதி புனப்³ப⁴வதா³யிகா. ஸத³ராதி கிலேஸத³ரதா² ஏத்த² ஸந்தீதி ஸத³ரா. ‘‘ஸத்³த³ரா’’திபி பாடோ², ஸஹத³ரதா²தி அத்தோ². து³க்க²விபாகாதி ப²லகாலே து³க்க²தா³யிகா. ஆயதிம் ஜாதிஜராமரணியாதி அனாக³தே ஜாதிஜராமரணஸ்ஸ பச்சயா.

பஜ்ஜேன கதேன அத்தனாதி கா³தா²ய அயம் பிண்ட³த்தோ² – யோ அத்தனா பா⁴விதேன மக்³கே³ன பரினிப்³பா³னம் க³தோ, கிலேஸபரினிப்³பா³னம் பத்தோ, பரினிப்³பா³னக³தத்தா ஏவ ச விதிண்ணகங்கோ², விபத்திஸம்பத்திஹானிவுத்³தி⁴உச்சே²த³ஸஸ்ஸதஅபுஞ்ஞபுஞ்ஞப்பபே⁴த³ம் ப⁴வஞ்ச விப⁴வஞ்ச விப்பஹாய மக்³க³வாஸம் வுஸிதவா கீ²ணபுனப்³ப⁴வோதி ஏதேஸம் து²திவசனானம் அரஹோ ஸோ பி⁴க்கூ²தி.

இதிஹந்தி, இத³ஹந்தீதி து³விதோ⁴ பாடோ². இதீதி பத³ஸந்தி⁴ஆத³யோ ஸந்தா⁴ய ‘‘இத³ஹ’’ந்தி பாட²ம் ந ரோசேந்தி. தத்த² இதீதி யம் வுத்தம். பத³ஸந்தீ⁴தி பதா³னம் ஸந்தி⁴ பத³ஸந்தி⁴, பத³க⁴டனந்தி அத்தோ². பத³ஸம்ஸக்³கோ³தி பதா³னம் ஏகீபா⁴வோ. பத³பாரிபூரீதி பதா³னம் பரிபூரணம் த்³வின்னம் பதா³னம் ஏகீபா⁴வோ. அக்க²ரஸமவாயோதி ஏகீபூ⁴தோபி அபரிபுண்ணோபி ஹோதி, அயம் ந ஏவம். அக்க²ரானம் ஸமவாயோ ஸன்னிபாதோ ஹோதீதி த³ஸ்ஸனத்த²ம் ‘‘அக்க²ரஸமவாயோ’’தி ஆஹ. ப்³யஞ்ஜனஸிலிட்ட²தாதி ப்³யஞ்ஜனஸமுச்சயோ பத³மீதி வுத்தானம் ப்³யஞ்ஜனானம் அத்த²ப்³யஞ்ஜனானம் அத்த²ப்³யத்திகாரணானம் வா மது⁴ரபா⁴வத்தா பாட²ஸ்ஸ முது³பா⁴வோ. பதா³னுபுப்³ப³தா மேதந்தி பதா³னம் அனுபுப்³ப³பா⁴வோ பதா³னுபுப்³ப³தா, பத³படிபாடிபா⁴வோதி அத்தோ². மேதந்தி ஏதம். கதமந்தி சே? இதீதி இத³ம். மேதந்தி ஏத்த² ம-காரோ பத³ஸந்தி⁴வஸேன வுத்தோ. கத்தீ² ஹோதீதி ‘‘அஹமஸ்மி ஸீலஸம்பன்னோ’’தி அத்தானம் உக்கம்ஸேத்வா கத²னஸீலோ ஹோதி. கத்த²தீதி வுத்தனயேன கத²யதி. விகத்த²தீதி விவிதா⁴ கத²யதி. கத்த²னாதி கத²னா. ஆரதோதி தூ³ரதோ ரதோ. விரதோதி டா²னஸங்கந்திவஸேன விக³தபா⁴வேன ரதோ. படிவிரதோதி ததோ நிவத்தித்வா ஸப்³பா³காரேன வியுத்தோ ஹுத்வா ரதோ. தத்த² பிஸாசம் விய தி³ஸ்வா பலாதோ ஆரதோ. ஹத்தி²ம்ஹி மத்³த³ந்தே விய பரிதா⁴வித்வா க³தோ விரதோ. யோத⁴ஸம்பஹாரம் விய போதே²த்வா மத்³தே³த்வா க³தோ படிவிரதோ.

கீ²ணாஸவஸ்ஸாதி கீ²ணகிலேஸாஸவஸ்ஸ. கம்முஸ்ஸதோ³தி புஞ்ஞாபி⁴ஸங்கா²ரஅபுஞ்ஞாபி⁴ஸங்கா²ரஆனேஞ்ஜாபி⁴ஸங்கா²ரஸங்கா²தானம் கம்மானம் உஸ்ஸதோ³ உஸ்ஸன்னதா. யஸ்ஸிமேதி யஸ்ஸ கீ²ணாஸவஸ்ஸ இமே உஸ்ஸதா³.

19. ஏவம் கீ²ணாஸவபடிபத்திம் த³ஸ்ஸேத்வா இதா³னி தி³ட்டி²க³திகானம் தித்தி²யானம் படிபத்திஞ்ச த³ஸ்ஸேந்தோ ஆஹ ‘‘பகப்பிதா ஸங்க²தா’’தி. தத்த² பகப்பிதாதி பரிகப்பிதா. ஸங்க²தாதி பச்சயாபி⁴ஸங்க²தா. யஸ்ஸாதி யஸ்ஸ கஸ்ஸசி தி³ட்டி²க³திகஸ்ஸ. த⁴ம்மாதி தி³ட்டி²யோ. புரக்க²தாதி புரதோ கதா. ஸந்தீதி ஸம்விஜ்ஜந்தி. அவீவதா³தாதி அவோதா³தா. யத³த்தனி பஸ்ஸதி ஆனிஸம்ஸம், தம் நிஸ்ஸிதோ குப்பபடிச்சஸந்திந்தி யஸ்ஸேதே தி³ட்டி²த⁴ம்மா ‘புரக்க²தா அவோதா³தா ஸந்தி, ஸோ ஏவம்விதோ⁴ யஸ்மா அத்தனி தஸ்ஸா தி³ட்டி²யா தி³ட்ட²த⁴ம்மிகஞ்ச ஸக்காராதி³ம், ஸம்பராயிகஞ்ச க³திவிஸேஸாதி³ம் ஆனிஸம்ஸம் ஸம்பஸ்ஸதி, தஸ்மா தஞ்ச ஆனிஸம்ஸம், தஞ்ச குப்பதாய ச படிச்சஸமுப்பன்னதாய ச ஸம்முதிஸந்திதாய ச குப்பபடிச்சஸந்திஸங்கா²தம் தி³ட்டி²ம் நிஸ்ஸிதோ ச ஹோதி. ஸோ தம் நிஸ்ஸிதத்தா அத்தானம் வா உக்கம்ஸேய்ய, பரே வா வம்பே⁴ய்ய அபூ⁴தேஹிபி கு³ணதோ³ஸேஹி.

ஸங்க²தாதி மூலபத³ம். ஸங்க²தாதி பச்சயேஹி ஸமாக³ந்த்வா கதா. உபஸக்³க³வஸேன பத³ம் வட்³டி⁴தம். அபி⁴ஸங்க²தாதி பச்சயேஹி அபி⁴கதா. ஸண்ட²பிதாதி பச்சயவஸேனேவ ஸம்மா ட²பிதா. அனிச்சாதி ஹுத்வா அபா⁴வேன. படிச்சஸமுப்பன்னாதி வத்தா²ரம்மணம் படிச்ச உப்பன்னா. க²யத⁴ம்மாதி கமேன க²யஸபா⁴வா. வயத⁴ம்மாதி பவத்திவஸேன பரிஹாயனஸபா⁴வா. விராக³த⁴ம்மாதி அனிவத்தீ ஹுத்வா விக³ச்ச²னஸபா⁴வா. நிரோத⁴த⁴ம்மாதி நிருஜ்ஜ²னஸபா⁴வா, அனுப்பத்தித⁴ம்மா ஹுத்வா நிருஜ்ஜ²னஸபா⁴வாதி அத்தோ². தி³ட்டி²க³திகஸ்ஸாதி த்³வாஸட்டி²தி³ட்டி²யோ க³ஹேத்வா டி²தபுக்³க³லஸ்ஸ.

புரேக்கா²ராதி புரே கதா. தண்ஹாத⁴ஜோதி உஸ்ஸாபிதட்டே²ன தண்ஹாத⁴ஜோ, தண்ஹாபடாகா அஸ்ஸ அத்தீ²தி தண்ஹாத⁴ஜோ. புரேசாரிகட்டே²ன தண்ஹா ஏவ கேது அஸ்ஸாதி தண்ஹாகேது. தண்ஹாதி⁴பதேய்யோதி ச²ந்தா³தி⁴பதிவஸேன, தண்ஹா அதி⁴பதிதோ ஆக³தாதி வா தண்ஹாதி⁴பதேய்யோ, தண்ஹாதி⁴பதி வா ஏதஸ்ஸ அத்தீ²தி தண்ஹாதி⁴பதேய்யோ. தி³ட்டி²த⁴ஜாதீ³ஸுபி ஏஸேவ நயோ. அவோதா³தாதி அபரிஸுத்³தா⁴. ஸம்கிலிட்டா²தி ஸயம் கிலிட்டா². ஸம்கிலேஸிகாதி தபனீயா.

த்³வே ஆனிஸம்ஸே பஸ்ஸதீதி த்³வே கு³ணே த³க்க²தி. தி³ட்ட²த⁴ம்மிகஞ்ச ஆனிஸம்ஸந்தி இமஸ்மிம்யேவ அத்தபா⁴வே பச்சக்க²த⁴ம்மானிஸம்ஸஞ்ச. ஸம்பராயிகந்தி பரலோகே பத்தப்³ப³ம் ஆனிஸம்ஸஞ்ச. யம்தி³ட்டி²கோ ஸத்தா² ஹோதீதி ஸத்தா² யதா²லத்³தி⁴கோ ப⁴வதி. தம்தி³ட்டி²கா ஸாவகா ஹோந்தீதி தஸ்ஸ வசனம் ஸுணந்தா ஸாவகாபி ததா²லத்³தி⁴கா ஹோந்தி. ஸக்கரோந்தீதி ஸக்காரப்பத்தம் கரோந்தி. க³ரும் கரோந்தீதி க³ருகாரப்பத்தம் கரோந்தி. மானேந்தீதி மனஸா பியாயந்தி. பூஜேந்தீதி சதுபச்சயாபி⁴ஹாரபூஜாய பூஜேந்தி. அபசிதிம் கரோந்தீதி அபசிதிப்பத்தம் கரோந்தி. தத்த² யஸ்ஸ சத்தாரோ பச்சயே ஸக்கரித்வா ஸுஅபி⁴ஸங்க²தே பணீதே கத்வா தே³ந்தி, ஸோ ஸக்கதோ. யஸ்மிம் க³ருபா⁴வம் பட்ட²பேத்வா தே³ந்தி, ஸோ க³ருகதோ. யம் மனஸா பியாயந்தி, ஸோ மானிதோ. யஸ்ஸ ஸப்³ப³ம்பேதம் கரோந்தி, ஸோ பூஜிதோ. யஸ்ஸ அபி⁴வாத³னபச்சுபட்டா²னஅஞ்ஜலிகம்மாதி³வஸேன பரமனிபச்சகாரம் கரோந்தி, ஸோ அபசிதோ. கேசி ‘‘ஸக்கரோந்தி காயேன, க³ரும் கரோந்தி வாசாய, மானேந்தி சித்தேன, பூஜேந்தி லாபே⁴னா’’தி வண்ணயந்தி. அலம் நாக³த்தாய வாதி நாக³பா⁴வாய நாக³ராஜபா⁴வாய வா அலம் பரியத்தம். ஸுபண்ணத்தாய வாதி ஸுபண்ணராஜபா⁴வாய. யக்க²த்தாய வாதி யக்க²ஸேனாபதிபா⁴வாய. அஸுரத்தாய வாதி அஸுரபா⁴வாய. க³ந்த⁴ப்³ப³த்தாய வாதி க³ந்த⁴ப்³ப³தே³வக⁴டே நிப்³ப³த்தபா⁴வாய. மஹாராஜத்தாய வாதி சதுன்னம் மஹாராஜானம் அஞ்ஞதரபா⁴வாய. இந்த³த்தாய வாதி ஸக்கபா⁴வாய. ப்³ரஹ்மத்தாய வாதி ப்³ரஹ்மகாயிகாதீ³னம் அஞ்ஞதரபா⁴வாய. தே³வத்தாய வாதி ஸம்முதிதே³வாதீ³னம் அஞ்ஞதரபா⁴வாய. ஸுத்³தி⁴யாதி பரிஸுத்³த⁴பா⁴வாய அலம் பரியத்தம். விஸுத்³தி⁴யாதி ஸப்³ப³மலரஹிதஅச்சந்தபரிஸுத்³த⁴பா⁴வாய. பரிஸுத்³தி⁴யாதி ஸப்³பா³காரேன பரிஸுத்³த⁴பா⁴வாய.

தத்த² திரச்சா²னயோனியம் அதி⁴பச்சத்தம் ஸுத்³தி⁴யா. தே³வலோகே அதி⁴பச்சத்தம் விஸுத்³தி⁴யா. ப்³ரஹ்மலோகே அதி⁴பச்சத்தம் பரிஸுத்³தி⁴யா. சதுராஸீதிகப்பஸஹஸ்ஸானி அதிக்கமித்வா முச்சனத்த²ம் முத்தியா. அந்தராயாபா⁴வேன முச்சனத்த²ம் விமுத்தியா. ஸப்³பா³காரேன முத்தியா பரிமுத்தியா. ஸுஜ்ஜ²ந்தீதி தஸ்மிம் ஸமயே பப்³ப³ஜிதபா⁴வேன ஸுத்³தி⁴ம் பாபுணந்தி. விஸுஜ்ஜ²ந்தீதி பப்³ப³ஜ்ஜம் க³ஹேத்வா படிபத்தியா யுத்தபா⁴வேன விவிதே⁴ன ஸுஜ்ஜ²ந்தி. பரிஸுஜ்ஜ²ந்தீதி நிப்ப²த்திம் பாபேத்வா ஸப்³பா³காரேன ஸுஜ்ஜ²ந்தி. முச்சந்தி தேஸம் ஸமயந்தரத⁴ம்மேன. விமுச்சந்தி ஏதஸ்ஸ ஸத்து²னோ ஓவாதே³ன. பரிமுச்சந்தி ஏதஸ்ஸ ஸத்து²னோ அனுஸாஸனேன. ஸுஜ்ஜி²ஸ்ஸாமீதிஆத³யோ அனாக³தவஸேன வுத்தா. ஆயதிம் ப²லபாடிகங்கீ²தி அனாக³தே விபாகப²லமாகங்க²மானோ. இத³ம் தி³ட்டி²க³திகானம் இச்சா²மத்தம். தி³ட்டி²க³தஞ்ஹி இஜ்ஜ²மானம் நிரயம் வா திரச்சா²னயோனிம் வா நிப்பா²தே³தி.

அச்சந்தஸந்தீதி அதிஅந்தனிஸ்ஸரணஸந்தி. தத³ங்க³ஸந்தீதி பட²மஜ்ஜா²னாதி³கு³ணங்கே³ன நீவரணாதி³அகு³ணங்க³ம் ஸமேதீதி ஜா²னம் தத³ங்க³ஸந்தி. ஸம்முதிஸந்தீதி ஸமாஹாரவஸேன தி³ட்டி²ஸந்தி. தா விபா⁴க³தோ த³ஸ்ஸேதும் ‘‘கதமா அச்சந்தஸந்தீ’’திஆதி³மாஹ. அமதம் நிப்³பா³னந்தி ஏவமாத³யோ ஹேட்டா² வுத்தத்தா²யேவ. பட²மம் ஜா²னம் ஸமாபன்னஸ்ஸ நீவரணா ஸந்தா ஹோந்தீதி ஏவமாத³யோ அந்தோ அப்பனாயம் அதிஸயவஸேன வுத்தா. அபி ச ஸம்முதிஸந்தி இமஸ்மிம் அத்தே² அதி⁴ப்பேதா, ஸந்தீதி இதரே த்³வே ஸந்தியோ படிக்கி²பித்வா ஸம்முதிஸந்திமேவ தீ³பேதி. குப்பஸந்திந்தி விபாகஜனகவஸேன பரிவத்தனவஸேன சலஸந்திம். பகுப்பஸந்திந்தி விஸேஸேன சலஸந்திம். ஏரிதஸந்திந்தி கம்பனஸந்திம். ஸமேரிதஸந்திந்தி விஸேஸேன கம்பிதஸந்திம். சலிதஸந்திந்தி தஸ்ஸேவ வேவசனம். க⁴ட்டிதஸந்திந்தி பீளிதஸந்திம். ஸந்திம் நிஸ்ஸிதோதி தி³ட்டி²ஸங்கா²தம் ஸந்திம் நிஸ்ஸிதோ. அஸ்ஸிதோதி ஆஸிதோ விஸேஸேன நிஸ்ஸிதோ. அல்லீனோதி ஏகீபூ⁴தோ.

20. ஏவம் நிஸ்ஸிதே தாவ ‘‘தி³ட்டீ²னிவேஸா…பே… ஆதி³யதீ ச த⁴ம்ம’’ந்தி தத்த² தி³ட்டீ²னிவேஸாதி இத³ம்ஸச்சாபி⁴னிவேஸஸங்கா²தானி தி³ட்டி²னிவேஸனானி. ந ஹி ஸ்வாதிவத்தாதி ஸுகே²ன அதிவத்திதப்³பா³ ந ஹோந்தி. த⁴ம்மேஸு நிச்சே²ய்ய ஸமுக்³க³ஹீதந்தி த்³வாஸட்டி²தி³ட்டி²க³தேஸு தம் தம் ஸமுக்³க³ஹிதம் அபி⁴னிவிட்ட²த⁴ம்மம் நிச்சி²னித்வா பவத்தா தி³ட்டி²னிவேஸா ந ஹி ஸ்வாதிவத்தாதி வுத்தம் ஹோதி. தஸ்மா நரோ தேஸு நிவேஸனேஸு, நிரஸ்ஸதீ ஆதி³யதீ ச த⁴ம்மந்தி யஸ்மா ந ஹி ஸ்வாதிவத்தா, தஸ்மா நரோ தேஸுயேவ தி³ட்டி²னிவேஸனேஸு அஜஸீலகோ³ஸீலகுக்குரஸீலபஞ்சாதபமருப்பபாதஉக்குடிகப்பதா⁴னகண்டகாபஸ்ஸயாதி³பே⁴த³ம் ஸத்தா²ரம் த⁴ம்மக்கா²னம் க³ணாதி³பே⁴த³ஞ்ச தம் தம் த⁴ம்மம் நிரஸ்ஸதி ச ஆதி³யதி ச ஜஹதி ச க³ண்ஹாதி ச வனமக்கடோ விய தம் தம் ஸாக²ந்தி வுத்தம் ஹோதி.

ஏவம் நிரஸ்ஸந்தோ ச ஆதி³யந்தோ ச அனவட்டி²தசித்தத்தா அஸந்தேஹிபி கு³ணதோ³ஸேஹி அத்தனோ வா பரஸ்ஸ வா யஸாயஸம் உப்பாதே³ய்ய. து³ரதிவத்தாதி அதிக்கமிதும் து³க்கா². து³த்தராதி து³உத்தரா. து³ப்பதரா து³ஸ்ஸமதிக்கமா து³ப்³பி³னிவத்தாதி உபஸக்³கே³ன வட்³டி⁴தா.

நிச்சி²னித்வாதி ஸஸ்ஸதவஸேன நிச்ச²யம் கத்வா. வினிச்சி²னித்வாதி அத்தவஸேன நானாவிதே⁴ன வினிச்ச²யம் கத்வா. விசினித்வாதி பரியேஸித்வா. பவிசினித்வாதி அத்தனியவஸேன ஸப்³பா³காரேன பரியேஸித்வா. ‘‘நிசினித்வா விச்சினித்வா’’திபி பாடோ². ஓதி⁴க்³கா³ஹோதி அவதி⁴யித்வா கா³ஹோ. பி³லக்³கா³ஹோதி கோட்டா²ஸவஸேன கா³ஹோ ‘‘பி³லஸோ விப⁴ஜித்வா’’திஆதீ³ஸு (தீ³. நி. 2.378; ம. நி. 1.111) விய. வரக்³கா³ஹோதி உத்தமகா³ஹோ. கோட்டா²ஸக்³கா³ஹோதி அவயவவஸேன கா³ஹோ. உச்சயக்³கா³ஹோதி ராஸிவஸேன கா³ஹோ. ஸமுச்சயக்³கா³ஹோதி கோட்டா²ஸவஸேன ராஸிவஸேன ச கா³ஹோ. இத³ம் ஸச்சந்தி இத³மேவ ஸபா⁴வம். தச்ச²ந்தி தத²பா⁴வம் அவிபரீதஸபா⁴வம். தத²ந்தி விபரிணாமரஹிதம். பூ⁴தந்தி விஜ்ஜமானம். யாதா²வந்தி யதா²ஸபா⁴வம். அவிபரீதந்தி ந விபரீதம்.

நிரஸ்ஸதீதி நிஅஸ்ஸதி விக்கி²பதி. பரவிச்சி²ந்த³னாய வாதி பரேஹி விஸ்ஸஜ்ஜாபனேன. அனபி⁴ஸம்பு⁴ணந்தோ வாதி அஸம்பாபுணந்தோ வா அஸக்கோந்தோ வா விஸ்ஸஜ்ஜேதி. பரோ விச்சி²ந்தே³தீதி அஞ்ஞோ வியோக³ம் கரோதி. நத்தே²த்தா²தி நத்தி² ஏத்த². ஸீலம் அனபி⁴ஸம்பு⁴ணந்தோதி ஸீலம் அஸம்பாதே³ந்தோ. ஸீலம் நிரஸ்ஸதீதி ஸீலம் விஸ்ஸஜ்ஜேதி. இதோ பரேஸுபி ஏஸேவ நயோ.

21. யோ பனாயம் ஸப்³ப³தி³ட்டி²க³தாதி³தோ³ஸது⁴னனாய பஞ்ஞாய ஸமன்னாக³தத்தா தோ⁴னோ, தஸ்ஸ தோ⁴னஸ்ஸ ஹி…பே… அனூபயோ ஸோ. கிம் வுத்தம் ஹோதி? தோ⁴னத⁴ம்மஸமன்னாக³மா தோ⁴னஸ்ஸ து⁴தஸப்³ப³பாபஸ்ஸ அரஹதோ கத்த²சி லோகே தேஸு தேஸு ப⁴வேஸு ஸம்கப்பனா தி³ட்டி² நத்தி². ஸோ தஸ்ஸா தி³ட்டி²யா அபா⁴வா, யாய ச அத்தனா கதம் பாபகம்மம் படிச்சா²தே³ந்தா தித்தி²யா மாயாய வா மானேன வா ஏவம் அக³திம் க³ச்ச²ந்தி, தம்பி மாயஞ்ச மானஞ்ச பஹாய தோ⁴னோ ராகா³தீ³னம் தோ³ஸானம் கேன க³ச்சே²ய்ய, தி³ட்ட²த⁴ம்மே ஸம்பராயே வா நிரயாதீ³ஸு க³திவிஸேஸேஸு கேன ஸங்க²ம் க³ச்சே²ய்ய, அனூபயோ ஸோ, ஸோ ஹி தண்ஹாதி³ட்டி²உபயானம் த்³வின்னம் அபா⁴வேன அனூபயோதி.

கிம் காரணாதி கேன காரணேன. தோ⁴னா வுச்சதி பஞ்ஞாதி தோ⁴னா இதி கிம்காரணா பஞ்ஞா கதீ²யதி. தாய பஞ்ஞாய காயது³ச்சரிதந்தி தாய வுத்தப்பகாராய பஞ்ஞாய காயதோ பவத்தம் து³ட்டு² கிலேஸபூதிகத்தா வா சரிதந்தி காயது³ச்சரிதம். தூ⁴தஞ்ச தோ⁴தஞ்சாதி கம்பிதஞ்ச தோ⁴விதஞ்ச. ஸந்தோ⁴தஞ்சாதி ஸம்மா தோ⁴விதஞ்ச. நித்³தோ⁴தஞ்சாதி விஸேஸேன ஸுட்டு² நித்³தோ⁴தஞ்ச. ராகோ³ து⁴தோ சாதிஆத³யோ சதுன்னம் மக்³கா³னம் வஸேன யோஜேதப்³பா³.

ஸம்மாதி³ட்டி²யா மிச்சா²தி³ட்டி² து⁴தா சாதி மக்³க³ஸம்பயுத்தாய ஸம்மாதி³ட்டி²யா மிச்சா²தி³ட்டி² கம்பிதா சலிதா தோ⁴விதா. ஸம்மாஸங்கப்பாதீ³ஸுபி ஏஸேவ நயோ. வுத்தஞ்ஹேதம் ‘‘ஸம்மாதி³ட்டி²கஸ்ஸ, பி⁴க்க²வே, மிச்சா²தி³ட்டி² நிஜ்ஜிண்ணா ஹோதீ’’தி ஸுத்தம் (அ. நி. 10.106; தீ³. நி. 3.360) வித்தா²ரேதப்³ப³ம். ஸம்மாஞாணேனாதி மக்³க³ஸம்பயுத்தஞாணேன, பச்சவேக்க²ணஞாணேன வா. மிச்சா²ஞாணந்தி விபரீதஞாணம் அயாதா²வஞாணம், பாபகிரியாஸு உபசிந்தாவஸேன பாபம் கத்வா ‘‘ஸுகதம் மயா’’தி பச்சவேக்க²ணாகாரேன ச உப்பன்னோ மோஹோ. ஸம்மாவிமுத்தியா மிச்சா²விமுத்தீதி ஸமுச்சே²த³விமுத்தியா விபரீதா அயாதா²வவிமுத்தியேவ சேதோவிமுத்திஸஞ்ஞிதா.

அரஹா இமேஹி தோ⁴னேய்யேஹி த⁴ம்மேஹீதி ராகா³தீ³ஹி கிலேஸேஹி தூ³ரே டி²தோ அரஹா இமேஹி வுத்தப்பகாரேஹி கிலேஸதோ⁴வனேஹி த⁴ம்மேஹி உபேதோ ஹோதி. தோ⁴னோதி தோ⁴னோ புக்³க³லோ, தேனேவ ‘‘ஸோ து⁴தராகோ³’’திஆத³யோ ஆஹ.

மாயா வுச்சதி வஞ்சனிகாசரியாதி வஞ்சனகிரியம் வஞ்சனகரணம் அஸ்ஸா அத்தீ²தி வஞ்சனிகாசரியா. தஸ்ஸ படிச்சா²த³னஹேதூதி தேஸம் து³ச்சரிதானம் அப்பகாஸனகாரணா. பாபிகம் இச்ச²ம் பணித³ஹதீதி லாமகம் பத்த²னம் பதிட்டா²பேதி. ‘‘மா மம் ஜஞ்ஞா’’தி இச்ச²தீதி ‘‘மய்ஹம் கதம் பாபம் பரே மா ஜானிம்ஸூ’’தி பச்சாஸீஸதி. ஸங்கப்பேதீதி விதக்கம் உப்பாதே³தி. வாசம் பா⁴ஸதீதி ஜானம்யேவ பண்ணத்திம் வீதிக்கமந்தோ பி⁴க்கு² பா⁴ரியம் கரோதி. ‘‘அம்ஹாகம் வீதிக்கமட்டா²னம் நாம நத்தீ²’’தி உபஸந்தோ விய பா⁴ஸதி. காயேன பரக்கமதீதி ‘‘மயா கதம் இத³ம் பாபகம்மம் மா கேசி ஜானிம்ஸூ’’தி காயேன வத்தம் கரோதி. விஜ்ஜமானதோ³ஸபடிச்சா²த³னதோ சக்கு²மோஹனமாயா அஸ்ஸாதி மாயாவீ, மாயாவினோ பா⁴வோ மாயாவிதா. கத்வா பாபம் புன படிச்சா²த³னதோ அதிச்ச அஸ்ஸரதி ஏதாய ஸத்தோதி அச்சஸரா. காயவாசாகிரியாஹி அஞ்ஞதா² த³ஸ்ஸனதோ வஞ்சேதீதி வஞ்சனா. ஏதாய ஸத்தா நிகரோந்தீதி நிகதி, மிச்சா² கரோந்தீதி அத்தோ². ‘‘நாஹம் ஏவம் கரோமீ’’தி பாபானம் விக்கி²பனதோ நிகிரணா. ‘‘நாஹம் ஏவம் கரோமீ’’தி பரிவஜ்ஜனதோ பரிஹரணா. காயாதீ³ஹி ஸம்ஹரணதோ கூ³ஹனா. ஸமபா⁴கே³ன கூ³ஹனா பரிகூ³ஹனா. திணபண்ணேஹி விய கூ³த²ம் காயவசீகம்மேஹி பாபம் சா²தே³தீதி சா²த³னா. ஸப்³ப³தோ பா⁴கே³ன சா²த³னா பரிச்சா²த³னா. ந உத்தானிம் கத்வா த³ஸ்ஸேதீதி அனுத்தானிகம்மம். ந பாகடம் கத்வா த³ஸ்ஸேதீதி அனாவிகம்மம். ஸுட்டு² சா²த³னா வோச்சா²த³னா. கதபடிச்சா²த³னவஸேன புனபி பாபஸ்ஸ கரணதோ பாபகிரியா. அயம் வுச்சதீதி அயம் கதபடிச்சா²த³னலக்க²ணா மாயா நாம வுச்சதி, யாய ஸமன்னாக³தோ புக்³க³லோ ப⁴ஸ்மபடிச்ச²ன்னோ விய அங்கா³ரோ, உத³கபடிச்ச²ன்னோ விய கா²ணு, பிலோதிகபலிவேடி²தம் விய ச ஸத்த²ம் ஹோதி.

ஏகவிதே⁴ன மானோதி ஏகபரிச்சே²தே³ன ஏககோட்டா²ஸேன மானோ. யா சித்தஸ்ஸ உன்னதீதி யா சித்தஸ்ஸ அப்³பு⁴ஸ்ஸாபனா, அயம் மானோதி அத்தோ². ஏத்த² புக்³க³லம் அனாமஸித்வா நிப்³ப³த்திதமானோவ வுத்தோ.

அத்துக்கம்ஸனமானோதி அத்தானம் உபரி ட²பனமானோ. பரவம்ப⁴னமானோதி பரே லாமககரணமானோ. இமே த்³வே மானா யேபு⁴ய்யேன ததா² பவத்தாகாரவஸேன வுத்தா.

‘‘ஸேய்யோஹமஸ்மீ’’தி மானோதி ஜாதிஆதீ³னி நிஸ்ஸாய ‘‘அஹமஸ்மி ஸேய்யோ’’தி உப்பன்னோ மானோ. ஸதி³ஸமானாதீ³ஸுபி ஏஸேவ நயோ. ஏவமிமேபி தயோ மானா புக்³க³லவிஸேஸம் அனிஸ்ஸாய ததா² பவத்தாகாரவஸேன வுத்தா. தேஸு ஏகேகோ திண்ணம்பி ஸேய்யஸதி³ஸஹீனானம் உப்பஜ்ஜதி. தத்த² ‘‘ஸேய்யோஹமஸ்மீ’’தி மானோ ஸேய்யஸ்ஸேவ யாதா²வமானோ, ஸேஸானம் அயாதா²வமானோ. ‘‘ஸதி³ஸோஹமஸ்மீ’’தி மானோ ஸதி³ஸஸ்ஸேவ யாதா²வமானோ, ஸேஸானம் அயாதா²வமானோ. ‘‘ஹீனோஹமஸ்மீ’’தி மானோ ஹீனஸ்ஸேவ யாதா²வமானோ, ஸேஸானம் அயாதா²வமானோ.

சதுப்³பி³தே⁴ன மானோ லோகத⁴ம்மவஸேன வுத்தோ. பஞ்சவிதே⁴ன மானோ பஞ்சகாமகு³ணவஸேன வுத்தோ. ச²ப்³பி³தே⁴ன மானோ சக்கா²தி³ஸம்பத்திவஸேன வுத்தோ. தத்த² மானம் ஜனேதீதி மானம் உப்பாதே³தி.

ஸத்தவிதே⁴ன மானனித்³தே³ஸே மானோதி உன்னமோ. அதிமானோதி ‘‘ஜாதிஆதீ³ஹி மயா ஸதி³ஸோ நத்தீ²’’தி அதிக்கமித்வா மஞ்ஞனவஸேன உப்பன்னோ மானோ. மானாதிமானோதி ‘‘அயம் புப்³பே³ மயா ஸதி³ஸோ, இதா³னி அஹம் ஸேட்டோ², அயம் ஹீனதரோ’’தி உப்பன்னோ மானோ. அயம் பா⁴ராதிபா⁴ரோ விய புரிமம் ஸதி³ஸமானம் உபாதா³ய மானாதிமானோ நாமாதி த³ஸ்ஸேதும் ‘‘மானாதிமானோ’’தி ஆஹ. ஓமானோதி ஹீனமானோ. யோ ‘‘ஹீனோஹமஸ்மீ’’தி மானோ நாம வுத்தோ, அயம் ஓமானோ நாம. அபி சேத்த² ‘‘த்வம் ஜாதிமா, காகஜாதி விய தே ஜாதி. த்வம் கோ³த்தவா, சண்டா³லகோ³த்தம் விய தே கோ³த்தம். துய்ஹம் ஸரோ அத்தி², காகஸரோ விய தே ஸரோ’’தி ஏவம் அத்தானம் ஹேட்டா² கத்வா பவத்தனவஸேன அயம் ‘‘ஓமானோ’’தி வேதி³தப்³போ³.

அதி⁴மானோதி சத்தாரி ஸச்சானி அப்பத்வா பத்தஸஞ்ஞிஸ்ஸ, சதூஹி மக்³கே³ஹி கத்தப்³பே³ கிச்சே அகதேயேவ கதஸஞ்ஞிஸ்ஸ, சதுஸச்சத⁴ம்மே அனதி⁴க³தே அதி⁴க³தஸஞ்ஞிஸ்ஸ, அரஹத்தே அஸச்சி²கதே ஸச்சி²கதஸஞ்ஞிஸ்ஸ உப்பன்னோ அதி⁴க³தமானோ அதி⁴மானோ நாம. அயம் பன கஸ்ஸ உப்பஜ்ஜதி, கஸ்ஸ ந உப்பஜ்ஜதீதி? அரியஸாவகஸ்ஸ தாவ ந உப்பஜ்ஜதி. ஸோ ஹி மக்³க³ப²லனிப்³பா³னபஹீனகிலேஸாவஸிட்ட²கிலேஸபச்சவேக்க²ணேன ஸஞ்ஜாதஸோமனஸ்ஸோ அரியகு³ணபடிவேதே⁴ நிக்கங்கோ², தஸ்மா ஸோதாபன்னாதீ³னம் ‘‘அஹம் ஸகதா³கா³மீ’’திஆதி³வஸேன மானோ ந உப்பஜ்ஜதி, து³ஸ்ஸீலஸ்ஸ ச ந உப்பஜ்ஜதி. ஸோ ஹி அரியகு³ணாதி⁴க³மே நிராஸோவ. ஸீலவதோபி பரிச்சத்தகம்மட்டா²னஸ்ஸ நித்³தா³ராமதாதி³மனுயுத்தஸ்ஸ ந உப்பஜ்ஜதி, பரிஸுத்³த⁴ஸீலஸ்ஸ பன கம்மட்டா²னே அப்பமத்தஸ்ஸ நாமரூபம் வவத்த²பேத்வா பச்சயபரிக்³க³ஹேன விதிண்ணகங்க²ஸ்ஸ திலக்க²ணம் ஆரோபேத்வா ஸங்கா²ரே ஸம்மஸந்தஸ்ஸ ஆரத்³த⁴விபஸ்ஸகஸ்ஸ உப்பஜ்ஜதி, உப்பன்னே ச ஸுத்³த⁴ஸமத²லாபீ⁴ ஸுத்³த⁴விபஸ்ஸனாலாபீ⁴ வா அந்தரா ட²பேதி. ஸோ ஹி த³ஸபி வஸ்ஸானி வீஸம்பி வஸ்ஸானி திம்ஸம்பி வஸ்ஸானி அஸீதிபி வஸ்ஸானி கிலேஸஸமுதா³சாரம் அபஸ்ஸந்தோ ‘‘அஹம் ஸோதாபன்னோ’’தி வா ‘‘ஸகதா³கா³மீ’’தி வா ‘‘அனாகா³மீ’’தி வா மஞ்ஞதி, ஸமத²விபஸ்ஸனாலாபீ⁴ பன அரஹத்தேயேவ ட²பேதி. தஸ்ஸ ஹி ஸமாதி⁴ப³லேன கிலேஸா விக்க²ம்பி⁴தா, விபஸ்ஸனாப³லேன ஸங்கா²ரா ஸுபரிக்³க³ஹிதா, தஸ்மா ஸட்டி²பி வஸ்ஸானி அஸீதிபி வஸ்ஸானி வஸ்ஸஸதம்பி கிலேஸா ந ஸமுதா³சரந்தி, கீ²ணாஸவஸ்ஸேவ சித்தாசாரோ ஹோதி. ஸோ ஏவம் தீ³க⁴ரத்தம் கிலேஸஸமுதா³சாரம் அபஸ்ஸந்தோ அந்தரா அட்ட²த்வாவ ‘‘அரஹா அஹ’’ந்தி மஞ்ஞதி.

அஸ்மிமானோதி ரூபே அஸ்மீதிஆதி³னா நயேன பஞ்சஸு க²ந்தே⁴ஸு ‘‘அஹம் ரூபாத³யோ’’தி உப்பன்னோ மானோ. மிச்சா²மானோதி பாபகேஹி கம்மாயதனஸிப்பாயதனவிஜ்ஜாட்டா²னஸுதபடிபா⁴னஸீலப்³ப³தேஹி, பாபிகாய ச தி³ட்டி²யா உப்பன்னோ மானோ. தத்த² பாபகம் கம்மாயதனம் நாம கேவட்டமச்ச²ப³ந்த⁴னேஸாதா³னம் கம்மம். பாபகம் ஸிப்பாயதனம் நாம மச்ச²ஜாலகி²பகுமீனகரணேஸு சேவ பாஸஓட்³ட³னஸூலாரோபனாதீ³ஸு ச சே²கதா. பாபகம் விஜ்ஜாட்டா²னம் நாம யா காசி பரூபகா⁴தவிஜ்ஜா. பாபகம் ஸுதம் நாம பா⁴ரதயுத்³த⁴ஸீதாஹரணாதி³படிஸம்யுத்தம். பாபகம் படிபா⁴னம் நாம து³ப்³பா⁴ஸிதயுத்தம் கப்பனாடகவிலப்பனாதி³படிபா⁴னம். பாபகம் ஸீலம் நாம அஜஸீலம் கோ³ஸீலம். வதம்பி அஜவதகோ³வதமேவ. பாபிகா தி³ட்டி² பன த்³வாஸட்டி²யா தி³ட்டி²க³தேஸு யாகாசி தி³ட்டி². அட்ட²வித⁴மானோ உத்தானத்தோ²யேவ.

நவவிதே⁴ன மானனித்³தே³ஸே ஸேய்யஸ்ஸ ‘‘ஸேய்யோஹமஸ்மீ’’திஆத³யோ நவ மானா புக்³க³லம் நிஸ்ஸாய வுத்தா. ஏத்த² பன ஸேய்யஸ்ஸ ‘‘ஸேய்யோஹமஸ்மீ’’தி மானோ ராஜானஞ்சேவ பப்³ப³ஜிதானஞ்ச உப்பஜ்ஜதி. ராஜா ஹி ‘‘ரட்டே²ன வா த⁴னவாஹனேஹி வா கோ மயா ஸதி³ஸோ அத்தீ²’’தி ஏதம் மானம் கரோதி. பப்³ப³ஜிதோபி ‘‘ஸீலது⁴தங்கா³தீ³ஹி கோ மயா ஸதி³ஸோ அத்தீ²’’தி ஏதம் மானம் கரோதி.

ஸேய்யஸ்ஸ ‘‘ஸதி³ஸோஹமஸ்மீ’’தி மானோபி ஏதேஸம்யேவ உப்பஜ்ஜதி. ராஜா ஹி ‘‘ரட்டே²ன வா த⁴னவாஹனேஹி வா அஞ்ஞராஜூஹி ஸத்³தி⁴ம் மய்ஹம் கிம் நானாகரண’’ந்தி ஏதம் மானம் கரோதி. பப்³ப³ஜிதோபி ‘‘ஸீலது⁴தங்கா³தீ³ஹி அஞ்ஞேன பி⁴க்கு²னா மய்ஹம் கிம் நானாகரண’’ந்தி ஏதம் மானம் கரோதி.

ஸேய்யஸ்ஸ ‘‘ஹீனோஹமஸ்மீ’’தி மானோபி ஏதேஸம்யேவ உப்பஜ்ஜதி. யஸ்ஸ ஹி ரஞ்ஞோ ரட்ட²ம் வா த⁴னவாஹனாதீ³னி வா நாதிஸம்பன்னானி ஹோந்தி, ஸோ ‘‘மய்ஹம் ராஜாதி வோஹாரஸுக²மத்தகமேவ, கிம் ராஜா நாம அஹ’’ந்தி ஏதம் மானம் கரோதி. பப்³ப³ஜிதோபி அப்பலாப⁴ஸக்காரோ ‘‘அஹம் த⁴ம்மகதி²கோ, ப³ஹுஸ்ஸுதோ, மஹாதே²ரோதி கதா²மத்தமேவ, கிம் த⁴ம்மகதி²கோ நாமாஹம், கிம் ப³ஹுஸ்ஸுதோ நாமாஹம், கிம் மஹாதே²ரோ நாமாஹம், யஸ்ஸ மே லாப⁴ஸக்காரோ நத்தீ²’’தி ஏதம் மானம் கரோதி.

ஸதி³ஸஸ்ஸ ‘‘ஸேய்யோஹமஸ்மீ’’தி மானாத³யோ அமச்சாதீ³னம் உப்பஜ்ஜந்தி. அமச்சோ வா ஹி ரட்டி²யோ வா ‘‘போ⁴க³யானவாஹனாதீ³ஹி கோ மயா ஸதி³ஸோ அஞ்ஞோ ராஜபுரிஸோ அத்தீ²’’தி வா, ‘‘மய்ஹம் அஞ்ஞேஹி ஸத்³தி⁴ம் கிம் நானாகரண’’ந்தி வா, ‘‘அமச்சோதி நாமமேவ மய்ஹம், கா⁴ஸச்சா²த³னமத்தம்பி மே நத்தி², கிம் அமச்சோ நாமாஹ’’ந்தி வா ஏதே மானே கரோதி.

ஹீனஸ்ஸ ‘‘ஸேய்யோஹமஸ்மீ’’தி மானாத³யோ தா³ஸாதீ³னம் உப்பஜ்ஜந்தி. தா³ஸோ ஹி ‘‘மாதிதோ வா பிதிதோ வா கோ மயா ஸதி³ஸோ அஞ்ஞோ தா³ஸோ நாம அத்தி², அஞ்ஞே ஜீவிதும் அஸக்கோந்தா குச்சி²ஹேது தா³ஸா நாம ஜாதா, அஹம் பன பவேணீஆக³தத்தா ஸேய்யோ’’தி வா, ‘‘பவேணீஆக³தபா⁴வேன உப⁴தோஸுத்³தி⁴கதா³ஸத்தேன அஸுகதா³ஸேன நாம ஸத்³தி⁴ம் கி மய்ஹம் நானாகரண’’ந்தி வா, ‘‘குச்சி²வஸேனாஹம் தா³ஸப்³யம் உபக³தோ, மாதாபிதுகோடியா பன மே தா³ஸட்டா²னம் நத்தி², கிம் தா³ஸோ நாம அஹ’’ந்தி வா ஏதே மானே கரோதி. யதா² ச தா³ஸோ, ஏவம் புக்குஸசண்டா³லாத³யோபி ஏதே மானே கரோந்தியேவ.

ஏத்த² ச ஸேய்யஸ்ஸ ‘‘ஸேய்யோஹமஸ்மீ’’தி உப்பன்னமானோவ யாதா²வமானோ, இதரே த்³வே அயாதா²வமானா. ததா² ஸதி³ஸஸ்ஸ ‘‘ஸதி³ஸோஹமஸ்மீ’’தி, ஹீனஸ்ஸ ‘‘ஹீனோஹமஸ்மீ’’தி உப்பன்னமானோவ யாதா²வமானோ, இதரே த்³வே அயாதா²வமானா. தத்த² யாதா²வமானா அரஹத்தமக்³க³வஜ்ஜா², அயாதா²வமானா ஸோதாபத்திமக்³க³வஜ்ஜா².

ஏத்த² ச ஸேய்யஸ்ஸ ‘‘ஸேய்யோஹமஸ்மீ’’தி மானோ உத்தமஸ்ஸ உத்தமட்டே²ன ‘‘அஹம் ஸேய்யோ’’தி ஏவம் உப்பன்னமானோ, ஸேய்யஸ்ஸ ‘‘ஸதி³ஸோஹமஸ்மீ’’தி மானோ உத்தமஸ்ஸ ஸமட்டே²ன ‘‘அஹம் ஸதி³ஸோ’’தி ஏவம் உப்பன்னமானோ. ஸேய்யஸ்ஸ ‘‘ஹீனோஹமஸ்மீ’’தி மானோ உத்தமஸ்ஸ லாமகட்டே²ன ‘‘அஹம் ஹீனோ’’தி ஏவம் உப்பன்னமானோ. ஏவம் ஸேய்யமானோ ஸதி³ஸமானோ ஹீனமானோதி இமே தயோ மானா ஸேய்யஸ்ஸ உப்பஜ்ஜந்தி. ஸதி³ஸஸ்ஸாபி அஹம் ஸேய்யோ, ஸதி³ஸோ, ஹீனோதி தயோ மானா உப்பஜ்ஜந்தி. ஹீனஸ்ஸாபி அஹம் ஹீனோ, ஸதி³ஸோ, ஸேய்யோதி தயோ மானா உப்பஜ்ஜந்தி.

த³ஸவித⁴மானனித்³தே³ஸே இதே⁴கச்சோ மானம் ஜனேதீதி ஏகச்சோ புக்³க³லோ மானம் ஜனயதி. ஜாதியா வாதி க²த்தியபா⁴வாதி³ஜாதிஸம்பத்தியா வா. கோ³த்தேன வாதி கோ³தமகோ³த்தாதி³னா உக்கட்ட²கோ³த்தேன வா. கோலபுத்தியேன வாதி மஹாகுலபா⁴வேன வா. வண்ணபோக்க²ரதாய வாதி வண்ணஸம்பன்னஸரீரதாய வா. ஸரீரஞ்ஹி ‘‘போக்க²ர’’ந்தி வுச்சதி, தஸ்ஸ வண்ணஸம்பத்தியா அபி⁴ரூபபா⁴வேனாதி அத்தோ². த⁴னேன வாதி த⁴னஸம்பன்னபா⁴வேன வா, மய்ஹம் நிதா⁴னக³தஸ்ஸ த⁴னஸ்ஸ பமாணம் நத்தீ²தி அத்தோ². அஜ்ஜே²னேன வாதி அஜ்ஜா²யனவஸேன வா. கம்மாயதனேன வாதி ‘‘அவஸேஸா ஸத்தா சி²ன்னபக்க²காகஸதி³ஸா, அஹம் பன மஹித்³தி⁴கோ மஹானுபா⁴வோ’’தி வா, ‘‘அஹம் யம் யம் கம்மம் கரோமி, தம் தம் ஸமிஜ்ஜ²தீ’’தி வா ஏவமாதி³னயப்பவத்தேன கம்மாயதனேன வா. ஸிப்பாயதனேன வாதி ‘‘அவஸேஸா ஸத்தா நிஸிப்பா, அஹம் ஸிப்பவா’’தி ஏவமாதி³னயப்பவத்தேன ஸிப்பாயதனேன வா. விஜ்ஜாட்டா²னேன வாதி இத³ம் ஹேட்டா² வுத்தனயமேவ. ஸுதேன வாதி ‘‘அவஸேஸா ஸத்தா அப்பஸ்ஸுதா, அஹம் பன ப³ஹுஸ்ஸுதோ’’தி ஏவமாதி³ஸுதேன வா. படிபா⁴னேன வாதி ‘‘அவஸேஸா ஸத்தா அப்படிபா⁴னா, மய்ஹம் பன படிபா⁴னப்பமாணம் நத்தீ²’’தி ஏவமாதி³படிபா⁴னேன வா. அஞ்ஞதரஞ்ஞதரேன வா வத்து²னாதி அவுத்தேன அஞ்ஞேன வத்து²னா வா. யோ ஏவரூபோ மானோதி மானகரணவஸேன மானோ. மஞ்ஞனா மஞ்ஞிதத்தந்தி ஆகாரபா⁴வனித்³தே³ஸோ. உஸ்ஸிதட்டே²ன உன்னதி. யஸ்ஸுப்பஜ்ஜதி, தம் புக்³க³லம் உன்னாமேதி உக்கி²பித்வா ட²பேதீதி உன்னாமோ. ஸமுஸ்ஸிதட்டே²ன த⁴ஜோ. உக்கி²பனட்டே²ன சித்தம் ஸம்பக்³க³ண்ஹாதீதி ஸம்பக்³கா³ஹோ. கேது வுச்சதி ப³ஹூஸு த⁴ஜேஸு அச்சுக்³க³தத⁴ஜோ. மானோபி புனப்புனம் உப்பஜ்ஜமானோ அபராபரே உபாதா³ய அச்சுக்³க³தட்டே²ன கேது வியாதி கேது, தம் கேதும் இச்ச²தீதி கேதுகம்யம், தஸ்ஸ பா⁴வோ கேதுகம்யதா. ஸா பன சித்தஸ்ஸ, ந அத்தனோ. தேன வுத்தம் ‘‘கேதுகம்யதா சித்தஸ்ஸா’’தி. மானஸம்பயுத்தஞ்ஹி சித்தம் கேதும் இச்ச²தி, தஸ்ஸ பா⁴வோ, கேதுஸங்கா²தோ மானோதி. தோ⁴னோ மாயஞ்ச மானஞ்ச பஹாய பஜஹித்வா யோ ஸோ தோ⁴னோ அரஹா ஹேட்டா² வுத்தனயேன வினோத³னப்³யந்திகரணாதி³வஸேன கிலேஸே பஜஹித்வா டி²தோ, ஸோ தேன ராகா³தி³னா கிலேஸேன க³ச்சே²ய்ய.

நேரயிகோதி வாதி நிரயே நிப்³ப³த்தகஸத்தோதி வா. திரச்சா²னயோனிகாதீ³ஸுபி ஏஸேவ நயோ. ஸோ ஹேது நத்தீ²தி யேன ஜனகஹேதுனா க³தியாதீ³ஸு நிப்³ப³த்தேய்ய, ஸோ ஹேது நத்தி². பச்சயோதி தஸ்ஸேவ வேவசனம். காரணந்தி டா²னம். காரணஞ்ஹி ததா³யத்தவுத்திதாய அத்தனோ ப²லஸ்ஸ டா²னந்தி வுச்சதி. தஸ்மா யேன ஹேதுனா யேன பச்சயேன க³தியாதீ³ஸு நிப்³ப³த்தேய்ய, தம் காரணம் நத்தி².

22. யோ பன நேஸம் த்³வின்னம் உபயானம் பா⁴வேன உபயோ ஹோதி, ஸோ உபயோ ஹி…பே… தி³ட்டி²மிதே⁴வ ஸப்³ப³ந்தி. தத்த² உபயோதி தண்ஹாதி³ட்டி²னிஸ்ஸிதோ. த⁴ம்மேஸு உபேதி வாத³ந்தி ‘‘ரத்தோ’’தி வா ‘‘து³ட்டோ²’’தி வா ஏவம் தேஸு தேஸு த⁴ம்மேஸு உபேதி வாத³ம். அனூபயம் கேன கத²ம் வதே³ய்யாதி தண்ஹாதி³ட்டி²ப்பஹானேன பன அனூபயம் கீ²ணாஸவம் கேன ராகே³ன வா தோ³ஸேன வா கத²ம் ‘‘ரத்தோ’’தி வா ‘‘து³ட்டோ²’’தி வா வதே³ய்ய. ஏவம் அனுபவஜ்ஜோ ச ஸோ கிம் தித்தி²யா விய கதபடிச்சா²த³கோ ப⁴விஸ்ஸதீதி அதி⁴ப்பாயோ. அத்தா நிரத்தா ந ஹி தஸ்ஸ அத்தீ²தி தஸ்ஸ ஹி அத்ததி³ட்டி² வா உச்சே²த³தி³ட்டி² வா நத்தி², க³ஹணமுஞ்சனம் வாபி அத்தனிரத்தஸஞ்ஞிதம் நத்தி². கிம் காரணா நத்தீ²தி சே? அதோ⁴ஸி ஸோ தி³ட்டி²மிதே⁴வ ஸப்³ப³ந்தி. யஸ்மா ஸோ இதே⁴வ அத்தபா⁴வே ஞாணம்பு³னா ஸப்³ப³தி³ட்டி²க³தம் அதோ⁴ஸி பஜஹி வினோதே³ஸீதி அரஹத்தனிகூடேன தே³ஸனம் நிட்டா²பேஸி. தம் ஸுத்வா ராஜா அத்தமனோ ப⁴க³வந்தம் அபி⁴வாதே³த்வா பக்காமீதி.

ரத்தோதி வாதி ராகே³ன ரத்தோதி வா. து³ட்டோ²தி வாதிஆதீ³ஸுபி ஏஸேவ நயோ. தே அபி⁴ஸங்கா²ரா அப்பஹீனாதி யே புஞ்ஞாபுஞ்ஞஆனேஞ்ஜாபி⁴ஸங்கா²ரா, தே அப்பஹீனா. அபி⁴ஸங்கா²ரானம் அப்பஹீனத்தாதி தேஸம் வுத்தப்பகாரானம் கம்மாபி⁴ஸங்கா²ரானம் ந பஹீனபா⁴வேன. க³தியா வாத³ம் உபேதீதி பஞ்சன்னம் க³தீனம் அஞ்ஞதராய கத²னம் உபக³ச்ச²தி. தேனேவாஹ – ‘‘நேரயிகோதி வா…பே… வாத³ம் உபேதி உபக³ச்ச²தீ’’தி. வதே³ய்யாதி கதே²ய்ய. க³ஹிதம் நத்தீ²தி க³ஹேதப்³ப³ம் நத்தி². முஞ்சிதப்³ப³ம் நத்தீ²தி முஞ்சித்வா டி²தத்தா மோசேதப்³ப³ம் நத்தி².

யஸ்ஸத்தி² க³ஹிதந்தி யஸ்ஸ புக்³க³லஸ்ஸ ‘‘அஹம் மமா’’தி க³ஹிதம் அத்தி². தஸ்ஸத்தி² முஞ்சிதப்³ப³ந்தி தஸ்ஸ புக்³க³லஸ்ஸ மோசேதப்³ப³ம் அத்தி². உபரி பதா³னி பரிவத்தேத்வா யோஜேதப்³பா³னி. க³ஹணம் முஞ்சனா ஸமதிக்கந்தோதி க³ஹணமோசனா அரஹா அதிக்கந்தோ. பு³த்³தி⁴பரிஹானிவீதிவத்தோதி வட்³டி⁴ஞ்ச பரிஹானிஞ்ச அதிக்கமித்வா பவத்தோ. ஸோ வுட்ட²வாஸோதிஆதி³ம் கத்வா ஞாணக்³கி³னா த³ட்³டா⁴னீதி பரியோஸானம் ஹேட்டா² வுத்தனயமேவ. அதோ⁴ஸீதி கந்தேஸி. து⁴னி ஸந்து⁴னி நித்³து⁴னீதி உபஸக்³கே³ன பத³ம் வட்³டி⁴தம்.

ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய

து³ட்ட²ட்ட²கஸுத்தனித்³தே³ஸவண்ணனா நிட்டி²தா.