5. ரம்ஸிஸஞ்ஞகத்தே²ரஅபதா³னவண்ணனா

பப்³ப³தே ஹிமவந்தம்ஹீதிஆதி³கம் ஆயஸ்மதோ ரம்ஸிஸஞ்ஞகத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ தேஸு தேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய க⁴ராவாஸம் ஸண்ட²பேத்வா காமேஸு ஆதீ³னவம் தி³ஸ்வா க⁴ராவாஸம் பஹாய தாபஸபப்³ப³ஜ்ஜம் பப்³ப³ஜித்வா அஜினசம்மத⁴ரோ ஹிமவந்தம்ஹி வாஸம் கப்பேஸி. தஸ்மிம் ஸமயே விபஸ்ஸீ ப⁴க³வா ஹிமவந்தமக³மாஸி. அத² ஸோ தாபஸோ தமுபக³தம் ப⁴க³வந்தம் தி³ஸ்வா தஸ்ஸ ப⁴க³வதோ ஸரீரதோ நிக்க²ந்தச²ப்³ப³ண்ணபு³த்³த⁴ரம்ஸீஸு பஸீதி³த்வா அஞ்ஜலிம் பக்³க³ய்ஹ பஞ்சங்கே³ன நமக்காரமகாஸி. ஸோ தேனேவ புஞ்ஞேன இதோ சுதோ துஸிதாதீ³ஸு தி³ப்³ப³ஸம்பத்தியோ அனுப⁴வித்வா அபரபா⁴கே³ மனுஸ்ஸஸம்பத்தியோ ச அனுப⁴வித்வா இமஸ்மிம் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய க⁴ராவாஸம் ஸண்ட²பேத்வா தத்தா²தீ³னவம் தி³ஸ்வா கே³ஹம் பஹாய பப்³ப³ஜித்வா நசிரஸ்ஸேவ அரஹா அஹோஸி.

30. ஸோ அபரபா⁴கே³ அத்தனோ புப்³ப³கம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ பப்³ப³தே ஹிமவந்தம்ஹீதிஆதி³மாஹ. தத்த² பப்³ப³தேதி பகாரேன ப்³ரூஹதி வட்³டே⁴தீதி பப்³ப³தோ, ஹிமோ அஸ்ஸ அத்தீ²தி ஹிமவந்தோ, ஹிமவந்தோ ச ஸோ பப்³ப³தோ சாதி ஹிமவந்தபப்³ப³தோ. ஹிமவந்தபப்³ப³தேதி வத்தப்³பே³ கா³தா²வசனஸுக²த்த²ம் ‘‘பப்³ப³தே ஹிமவந்தம்ஹீ’’தி வுத்தம். தஸ்மிம் ஹிமவந்தம்ஹி பப்³ப³தே வாஸம் கப்பேஸிம் புரே அஹந்தி ஸம்ப³ந்தோ⁴. ஸேஸம் ஸப்³ப³த்த² நயானுஸாரேன உத்தானமேவாதி.

ரம்ஸிஸஞ்ஞகத்தே²ரஅபதா³னவண்ணனா ஸமத்தா.