2. பத³ஸஞ்ஞகத்தே²ரஅபதா³னவண்ணனா

அக்கந்தஞ்ச பத³ம் தி³ஸ்வாதிஆதி³கம் ஆயஸ்மதோ பத³ஸஞ்ஞகத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ உப்பன்னுப்பன்னப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே ஏகஸ்மிம் ஸத்³தா⁴ஸம்பன்னே உபாஸககே³ஹே நிப்³ப³த்தோ விஞ்ஞுதம் பத்தோ ரதனத்தயே பஸன்னோ ப⁴க³வதா தஸ்ஸ அனுகம்பாய த³ஸ்ஸிதம் பத³சேதியம் தி³ஸ்வா பஸன்னோ லோமஹட்ட²ஜாதோ வந்த³னபூஜனாதி³ப³ஹுமானமகாஸி. ஸோ தேனேவ ஸுகே²த்தே ஸுகதேன புஞ்ஞேன ததோ சுதோ ஸக்³கே³ நிப்³ப³த்தோ தத்த² தி³ப்³ப³ஸுக²மனுப⁴வித்வா அபரபா⁴கே³ மனுஸ்ஸேஸு ஜாதோ மனுஸ்ஸஸம்பத்திம் ஸப்³ப³மனுப⁴வித்வா இமஸ்மிம் பு³த்³து⁴ப்பாதே³ விப⁴வஸம்பன்னகுலே நிப்³ப³த்தோ வுத்³தி⁴மன்வாய ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி, புராகதபுஞ்ஞனாமேன பத³ஸஞ்ஞகத்தே²ரோதி பாகடோ.

5. ஸோ ஏகதி³வஸம் அத்தனோ புப்³ப³கம்மம் ஸரித்வா புப்³ப³சரிதாபதா³னம் பகாஸேந்தோ அக்கந்தஞ்ச பத³ம் தி³ஸ்வாதிஆதி³மாஹ. தத்த² அக்கந்தந்தி அக்கமிதம் த³ஸ்ஸிதம். ஸப்³ப³பு³த்³தா⁴னம் ஸப்³ப³தா³ சதுரங்கு³லோபரியேவ க³மனம், அயம் பன தஸ்ஸ ஸத்³தா⁴ஸம்பன்னதம் ஞத்வா ‘‘ஏஸோ இமம் பஸ்ஸதூ’’தி பத³சேதியம் த³ஸ்ஸேஸி, தஸ்மா ஸோ தஸ்மிம் பஸீதி³த்வா வந்த³னபூஜனாதி³ஸக்காரமகாஸீதி அத்தோ². ஸேஸம் ஸப்³ப³த்த² உத்தானத்த²மேவாதி.

பத³ஸஞ்ஞகத்தே²ரஅபதா³னவண்ணனா ஸமத்தா.