9. பது³மத்தே²ரஅபதா³னவண்ணனா

சதுஸச்சம் பகாஸேந்தோதிஆதி³கம் ஆயஸ்மதோ பது³மத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதகுஸலஸம்பா⁴ரோ பது³முத்தரமுனினா த⁴ம்மபஜ்ஜோதே ஜோதமானே ஏகஸ்மிம் குலகே³ஹே நிப்³ப³த்தோ க⁴ராவாஸம் ஸண்ட²பேத்வா போ⁴க³ஸம்பன்னோதி பாகடோ. ஸோ ஸத்த²ரி பஸீதி³த்வா மஹாஜனேன ஸத்³தி⁴ம் த⁴ம்மம் ஸுணந்தோ த⁴ஜேன ஸஹ பது³மகலாபம் க³ஹேத்வா அட்டா²ஸி, ஸத⁴ஜம் தம் பது³மகலாபம் ஆகாஸமுக்கி²பிம், தம் அச்ச²ரியம் தி³ஸ்வா அதிவிய ஸோமனஸ்ஸஜாதோ அஹோஸி. ஸோ யாவஜீவம் குஸலம் கத்வா ஜீவிதபரியோஸானே ஸக்³கே³ நிப்³ப³த்தோ த⁴ஜமிவ ச²காமாவசரே பாகடோ பூஜிதோ ச தி³ப்³ப³ஸம்பத்திமனுப⁴வித்வா மனுஸ்ஸேஸு ச சக்கவத்திஸம்பத்திமனுப⁴வித்வா இமஸ்மிம் பு³த்³து⁴ப்பாதே³ விப⁴வஸம்பன்னே ஸத்³தா⁴ஸம்பன்னே ஏகஸ்மிம் குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ பஞ்சவஸ்ஸிகோவ பப்³ப³ஜித்வா நசிரஸ்ஸேவ அரஹா ஹுத்வா கதபுஞ்ஞனாமேன பது³மத்தே²ரோதி பாகடோ.

67. அத்தனோ புப்³ப³கம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ சதுஸச்சம் பகாஸேந்தோதிஆதி³மாஹ. தத்த² ஸச்சந்தி தத²ம் அவிதத²ம் அவிபரீதம் ஸச்சம், து³க்க²ஸமுத³யனிரோத⁴மக்³க³வஸேன சத்தாரி ஸச்சானி ஸமாஹடானீதி சதுஸச்சம், தம் சதுஸச்சம் பகாஸேந்தோ லோகே பாகடம் கரோந்தோதி அத்தோ². வரத⁴ம்மப்பவத்தகோதி உத்தமத⁴ம்மப்பவத்தகோ பகாஸகோதி அத்தோ². அமதம் வுட்டி²ந்தி அமதமஹானிப்³பா³னவுட்டி²தா⁴ரம் பவஸ்ஸந்தோ பக்³க⁴ரந்தோ ஸதே³வகம் லோகம் தேமேந்தோ ஸப்³ப³கிலேஸபரிளாஹம் நிப்³பா³பேந்தோ த⁴ம்மவஸ்ஸம் வஸ்ஸதீதி அத்தோ².

68. ஸத⁴ஜம் பது³மம் க³ய்ஹாதி த⁴ஜேன ஸஹ ஏகதோ கத்வா பது³மம் பது³மகலாபம் க³ஹேத்வாதி அத்தோ². அட்³ட⁴கோஸே டி²தோ அஹந்தி உபோ⁴ உக்கி²பித்வா டி²தோ அஹந்தி அத்தோ². ஸேஸம் ஸப்³ப³த்த² உத்தானத்த²மேவாதி.

பது³மத்தே²ரஅபதா³னவண்ணனா ஸமத்தா.