6. ஸபரிவாராஸனத்தே²ரஅபதா³னவண்ணனா

பது³முத்தரபு³த்³த⁴ஸ்ஸாதிஆதி³கம் ஆயஸ்மதோ ஸபரிவாராஸனத்தே²ரஸ்ஸ அபதா³னம். ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே விப⁴வஸம்பன்னே குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஜாதோ ஸாஸனே பஸன்னோ தா³னப²லம் ஸத்³த³ஹந்தோ நானக்³க³ரஸபோ⁴ஜனேன ப⁴க³வதோ பிண்ட³பாதம் அதா³ஸி, த³த்வா ச பன போ⁴ஜனஸாலாயம் போ⁴ஜனத்தா²ய நிஸின்னாஸனம் ஜாதிஸுமனமல்லிகாதீ³ஹி அலங்கரி. ப⁴க³வா ச ப⁴த்தானுமோத³னமகாஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ அனேகவித⁴ம் ஸம்பத்திம் அனுப⁴வித்வா இமஸ்மிம் பு³த்³து⁴ப்பாதே³ விப⁴வஸம்பன்னே குலகே³ஹே நிப்³ப³த்தோ வுத்³தி⁴மன்வாய ஸத்³தோ⁴ பஸன்னோ பப்³ப³ஜித்வா ந சிரஸ்ஸேவ அரஹா அஹோஸி.

43. ஸோ ஏவம் பத்தஸந்திபதோ³ ‘‘கேன நு கோ² புஞ்ஞேன இத³ம் ஸந்திபத³ம் அனுப்பத்த’’ந்தி ஞாணேன உபதா⁴ரேந்தோ புப்³ப³கம்மம் தி³ஸ்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ பது³முத்தரபு³த்³த⁴ஸ்ஸாதிஆதி³மாஹ. தம் வுத்தத்த²மேவ. பிண்ட³பாதம் அதா³ஸஹந்தி தத்த² தத்த² லத்³தா⁴னம் பிண்டா³னம் கப³ளம் கப³ளம் கத்வா பாதப்³ப³தோ கா²தி³தப்³ப³தோ ஆஹாரோ பிண்ட³பாதோ, தம் பிண்ட³பாதம் ப⁴க³வதோ அதா³ஸிம், ப⁴க³வந்தம் போ⁴ஜேஸிந்தி அத்தோ².

44. அகித்தயி பிண்ட³பாதந்தி மயா தி³ன்னபிண்ட³பாதஸ்ஸ கு³ணம் ஆனிஸம்ஸம் பகாஸேஸீதி அத்தோ².

48. ஸம்வுதோ பாதிமோக்க²ஸ்மிந்தி பாதிமோக்க²ஸம்வரஸீலேன ஸம்வுதோ பிஹிதோ படிச்ச²ன்னோதி அத்தோ². இந்த்³ரியேஸு ச பஞ்சஸூதி சக்கு²ந்த்³ரியாதீ³ஸு பஞ்சஸு இந்த்³ரியேஸு ரூபாதீ³ஹி கோ³பிதோ இந்த்³ரியஸம்வரஸீலஞ்ச கோ³பிதோதி அத்தோ². ஸேஸம் ஸுவிஞ்ஞேய்யமேவாதி.

ஸபரிவாராஸனத்தே²ரஅபதா³னவண்ணனா ஸமத்தா.