4. ஸன்னிட்டா²பகத்தே²ரஅபதா³னவண்ணனா

அரஞ்ஞே குடிகம் கத்வாதிஆதி³கம் ஆயஸ்மதோ ஸன்னிட்டா²பகத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதம் பத்தோ க⁴ரப³ந்த⁴னேன ப³த்³தோ⁴ க⁴ராவாஸே ஆதீ³னவம் தி³ஸ்வா வத்து²காமகிலேஸகாமே பஹாய ஹிமவந்தஸ்ஸ அவிதூ³ரே பப்³ப³தந்தரே அரஞ்ஞவாஸம் கப்பேஸி. தஸ்மிம் காலே பது³முத்தரோ ப⁴க³வா விவேககாமதாய தம் டா²னம் பாபுணி. அத² ஸோ தாபஸோ ப⁴க³வந்தம் தி³ஸ்வா பஸன்னமானஸோ வந்தி³த்வா நிஸீத³னத்தா²ய திணஸந்த²ரம் பஞ்ஞாபேத்வா அதா³ஸி. தத்த² நிஸின்னம் ப⁴க³வந்தம் அனேகேஹி மது⁴ரேஹி திண்டு³காதீ³ஹி ப²லாப²லேஹி ஸந்தப்பேஸி. ஸோ தேன புஞ்ஞகம்மேன ததோ சுதோ தே³வேஸு ச மனுஸ்ஸேஸு ச அபராபரம் ஸம்ஸரந்தோ த்³வே ஸம்பத்தியோ அனுப⁴வித்வா இமஸ்மிம் பு³த்³து⁴ப்பாதே³ ஏகஸ்மிம் குலகே³ஹே நிப்³ப³த்தோ ஸத்³தா⁴ஸம்பன்னோ பப்³ப³ஜிதோ விபஸ்ஸனம் வட்³டே⁴த்வா நசிரஸ்ஸேவ அரஹா அஹோஸி. கு²ரக்³கே³ அரஹத்தப²லப்பத்தியம் விய நிருஸ்ஸாஹேனேவ ஸந்திபத³ஸங்கா²தே நிப்³பா³னே ஸுட்டு² டி²தத்தா ஸன்னிட்டா²பகத்தே²ரோதி பாகடோ.

70. அரஹா பன ஹுத்வா அத்தனோ புப்³ப³கம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ அரஞ்ஞே குடிகம் கத்வாதிஆதி³மாஹ. தத்த² அரஞ்ஞேதி ஸீஹப்³யக்³கா⁴தீ³னம் ப⁴யேன மனுஸ்ஸா ஏத்த² ந ரஜ்ஜந்தி ந ரமந்தி ந அல்லீயந்தீதி அரஞ்ஞம், தஸ்மிம் அரஞ்ஞே. குடிகந்தி திணச்ச²த³னகுடிகம் கத்வா பப்³ப³தந்தரே வஸாமி வாஸம் கப்பேஸிந்தி அத்தோ². லாபே⁴ன ச அலாபே⁴ன ச யஸேன ச அயஸேன ச ஸந்துட்டோ² விஹாஸிந்தி ஸம்ப³ந்தோ⁴.

72. ஜலஜுத்தமனாமகந்தி ஜலே ஜாதம் ஜலஜம், பது³மம், ஜலஜம் உத்தமம் ஜலஜுத்தமம், ஜலஜுத்தமேன ஸமானம் நாமம் யஸ்ஸ ஸோ ஜலஜுத்தமனாமகோ, தம் ஜலஜுத்தமனாமகம் பு³த்³த⁴ந்தி அத்தோ². ஸேஸம் பாளினயானுயோகே³ன ஸுவிஞ்ஞேய்யமேவாதி.

ஸன்னிட்டா²பகத்தே²ரஅபதா³னவண்ணனா ஸமத்தா.