7. ஏகதீ³பியத்தே²ரஅபதா³னவண்ணனா

பது³முத்தரஸ்ஸ முனினோதிஆதி³கம் ஆயஸ்மதோ ஏகதீ³பியத்தே²ரஸ்ஸ அபதா³னம். அயம்பாயஸ்மா புரிமஜினஸேட்டே²ஸு கதகுஸலஸம்பா⁴ரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே க³ஹபதிகுலே நிப்³ப³த்தோ வுத்³தி⁴ப்பத்தோ ஸத்³தோ⁴ பஸன்னோ ப⁴க³வதோ ஸலலமஹாபோ³தி⁴ம்ஹி ஏகபதீ³பம் பூஜேஸி, தா²வரம் கத்வா நிச்சமேகபதீ³பபூஜனத்தா²ய தேலவட்டம் பட்ட²பேஸி. ஸோ தேன புஞ்ஞேன தே³வமனுஸ்ஸேஸு ஸம்ஸரந்தோ ஸப்³ப³த்த² ஜலமானோ பஸன்னசக்கு²கோ உப⁴யஸுக²மனுப⁴வித்வா இமஸ்மிம் பு³த்³து⁴ப்பாதே³ ஸாவத்தி²யம் விப⁴வஸம்பன்னே ஏகஸ்மிம் குலே நிப்³ப³த்தோ விஞ்ஞுதம் பத்தோ ரதனத்தயே பஸன்னோ பப்³ப³ஜித்வா நசிரஸ்ஸேவ அரஹத்தம் பத்தோ தீ³பபூஜாய லத்³த⁴விஸேஸாதி⁴க³மத்தா ஏகதீ³பியத்தே²ரோதி பாகடோ.

30. ஸோ அபரபா⁴கே³ அத்தனோ புப்³ப³கம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ பது³முத்தரஸ்ஸ முனினோதிஆதி³மாஹ. தம் ஸப்³ப³ம் உத்தானத்த²மேவாதி.

ஏகதீ³பியத்தே²ரஅபதா³னவண்ணனா ஸமத்தா.