3. ரத்திபுப்பி²யத்தே²ரஅபதா³னவண்ணனா

மிக³லுத்³தோ³ புரே ஆஸிந்திஆதி³கம் ஆயஸ்மதோ ரத்திபுப்பி²யத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே நேஸாத³குலே உப்பன்னோ மிக³வதா⁴ய அரஞ்ஞே விசரமானோ தஸ்ஸ காருஞ்ஞேன அரஞ்ஞே சரமானம் விபஸ்ஸிம் ப⁴க³வந்தம் தி³ஸ்வா பஸன்னமானஸோ புப்பி²தம் ரத்திகம் நாம புப்ப²ம் குடஜபுப்ப²ஞ்ச ஸஹ வண்டேன ஓசினித்வா ஸோமனஸ்ஸசித்தேன பூஜேஸி. ப⁴க³வா அனுமோத³னம் கத்வா பக்காமி.

13. ஸோ தேனேவ புஞ்ஞேன தே³வமனுஸ்ஸேஸு ஸம்ஸரந்தோ உப⁴யஸம்பத்தியோ அனுப⁴வித்வா இமஸ்மிம் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதம் பத்தோ ரதனத்தயே பஸன்னோ ஸத்து² த⁴ம்மதே³ஸனம் ஸுத்வா காமேஸு ஆதீ³னவம் தி³ஸ்வா பப்³ப³ஜித்வா நசிரஸ்ஸேவ அரஹத்தம் பத்தோ அத்தனோ புப்³ப³கம்மம் ஸரித்வா ‘‘நேஸாத³பூ⁴தேன மயா கதகுஸலம் ஸுந்த³ர’’ந்தி ஸோமனஸ்ஸஜாதோ புப்³ப³சரிதாபதா³னம் பகாஸேந்தோ மிக³லுத்³தோ³ புரே ஆஸிந்திஆதி³மாஹ. தத்த² மிகா³னம் லுத்³தோ³ ஸாஹஸிகோ மாரகோதி மிக³லுத்³தோ³, மிகே³ஸு வா லுத்³தோ³ லோபீ⁴தி மிக³லுத்³தோ³, நேஸாதோ³ ஆஸிம் புரேதி அத்தோ².

14. ரத்திகம் புப்பி²தம் தி³ஸ்வாதி பது³மபுப்பா²தீ³னி அனேகானி புப்பா²னி ஸூரியரம்ஸிஸம்ப²ஸ்ஸேன தி³வா புப்ப²ந்தி ரத்தியம் மகுளிதானி ஹோந்தி. ஜாதிஸுமனமல்லிகாதீ³னி அனேகானி புப்பா²னி பன ரத்தியம் புப்ப²ந்தி நோ தி³வா. தஸ்மா ரத்தியம் புப்ப²னதோ ரத்திபுப்ப²னாமகானி அனேகானி ஸுக³ந்த⁴புப்பா²னி ச குடஜபுப்பா²னி ச க³ஹேத்வா பூஜேஸிந்தி அத்தோ². ஸேஸம் உத்தானத்த²மேவாதி.

ரத்திபுப்பி²யத்தே²ரஅபதா³னவண்ணனா ஸமத்தா.