7. மக்³க³தா³யகத்தே²ரஅபதா³னவண்ணனா

உத்தரித்வான நதி³கந்திஆதி³கம் ஆயஸ்மதோ மக்³க³தா³யகத்தே²ரஸ்ஸ அபதா³னம். அயம்பி புரிமஜினவரேஸு கதாதி⁴காரோ அனேகேஸு ப⁴வேஸு நிப்³பா³னாதி⁴க³மத்தா²ய புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே லோகஸம்மதே குலே நிப்³ப³த்தோ வுத்³தி⁴மன்வாய க⁴ராவாஸம் வஸந்தோ ஏகதி³வஸம் ப⁴க³வந்தம் ஏகம் நதி³ம் உத்தரித்வா வனந்தரம் க³ச்ச²ந்தம் தி³ஸ்வா பஸன்னமானஸோ ‘‘இதா³னி மயா ப⁴க³வதோ மக்³க³ம் ஸமம் காதும் வட்டதீ’’தி சிந்தேத்வா குதா³லஞ்ச பிடகஞ்ச ஆதா³ய ப⁴க³வதோ க³மனமக்³க³ம் ஸமம் கத்வா வாலுகம் ஓகிரித்வா ப⁴க³வதோ பாதே³ வந்தி³த்வா, ‘‘ப⁴ந்தே, இமினா மக்³கா³லங்காரகரணேன நிப்³ப³த்தனிப்³ப³த்தட்டா²னே பூஜனீயோ ப⁴வேய்யம், நிப்³பா³னஞ்ச பாபுணேய்ய’’ந்தி பத்த²னம் அகாஸி. ப⁴க³வா ‘‘யதா²தி⁴ப்பாயம் ஸமிஜ்ஜ²தூ’’தி அனுமோத³னம் வத்வா பக்காமி.

32-3. ஸோ தேன புஞ்ஞேன தே³வமனுஸ்ஸேஸு ஸம்ஸரந்தோ ஸப்³ப³த்த² பூஜிதோ அஹோஸி. இமஸ்மிம் பன பு³த்³து⁴ப்பாதே³ பாகடே ஏகஸ்மிம் குலே நிப்³ப³த்தோ ஸத்த²ரி பஸன்னோ பப்³ப³ஜித்வா விபஸ்ஸனம் வட்³டே⁴த்வா நசிரஸ்ஸேவ அரஹத்தம் பத்வா அத்தனோ புப்³ப³கம்மம் பச்சக்க²தோ ஞத்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ உத்தரித்வான நதி³கந்திஆதி³மாஹ. தத்த² நத³தி ஸத்³த³ம் கரோதி க³ச்ச²தீதி நதீ³, நதீ³யேவ நதி³கா, தம் நதி³கம் உத்தரித்வா அதிக்கமித்வாதி அத்தோ². குதா³லபிடகமாதா³யாதி கு வுச்சதி பத²வீ, தம் விதா³லனே பதா³லனே சி²ந்த³னே அலந்தி குதா³லம், பிடகம் வுச்சதி பம்ஸுவாலிகாதி³வாஹகம், தாலபண்ணவேத்தலதாதீ³ஹி கதபா⁴ஜனம், குதா³லஞ்ச பிடகஞ்ச குதா³லபிடகம், தம் ஆதா³ய க³ஹேத்வாதி அத்தோ². ஸேஸம் உத்தானத்த²மேவாதி.

மக்³க³தா³யகத்தே²ரஅபதா³னவண்ணனா ஸமத்தா.