6. சம்பகபுப்பி²யத்தே²ரஅபதா³னவண்ணனா

கணிகாரம்வ ஜோதந்தந்திஆதி³கம் ஆயஸ்மதோ சம்பகபுப்பி²யத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ வேஸ்ஸபு⁴ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ வுத்³தி⁴ப்பத்தோ ஸகஸிப்பேஸு நிப்ப²த்திம் பத்வா தத்த² ஸாரம் அபஸ்ஸந்தோ க⁴ராவாஸம் பஹாய தாபஸபப்³ப³ஜ்ஜம் பப்³ப³ஜித்வா வனந்தரே வஸந்தோ வேஸ்ஸபு⁴ம் ப⁴க³வந்தம் உத்³தி³ஸ்ஸ ஸிஸ்ஸேஹி ஆனீதேஹி சம்பகபுப்பே²ஹி பூஜேஸி. ப⁴க³வா அனுமோத³னம் அகாஸி. ஸோ தேனேவ குஸலேன தே³வமனுஸ்ஸேஸு ஸம்ஸரந்தோ உப⁴யஸம்பத்தியோ அனுப⁴வித்வா இமஸ்மிம் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதம் பாபுணித்வா புப்³ப³வாஸனாப³லேன க⁴ராவாஸே அனல்லீனோ பப்³ப³ஜித்வா நசிரஸ்ஸேவ அரஹா அஹோஸி.

41. ஸோ அபரபா⁴கே³ அத்தனோ புப்³ப³புஞ்ஞகம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ கணிகாரம்வ ஜோதந்தந்திஆதி³மாஹ. தத்த² கணிகாரந்தி ஸகலபத்தபலாஸானி பரிப⁴ஜ்ஜ பாதேத்வா புப்ப²க³ஹணஸமயே கண்ணிகாப³த்³தோ⁴ ஹுத்வா புப்ப²மகுளானம் க³ஹணதோ கண்ணிகாகாரேன பகதோதி கணிகாரோ, ‘‘கண்ணிகாரோ’’தி வத்தப்³பே³ நிருத்தினயேன ஏகஸ்ஸ புப்³ப³ ண-காரஸ்ஸ லோபம் கத்வா ‘‘கணிகார’’ந்தி வுத்தந்தி த³ட்ட²ப்³ப³ம். தம் புப்பி²தம் கணிகாரருக்க²ம் இவ ஜோதந்தம் பு³த்³த⁴ம் அத்³த³ஸந்தி அத்தோ². ஸேஸம் உத்தானத்த²மேவாதி.

சம்பகபுப்பி²யத்தே²ரஅபதா³னவண்ணனா ஸமத்தா.