2. ஸுத³ஸ்ஸனத்தே²ரஅபதா³னவண்ணனா

வித்த²தாய நதீ³தீரேதிஆதி³கம் ஆயஸ்மதோ ஸுத³ஸ்ஸனத்தே²ரஸ்ஸ அபதா³னம். அயம்பி புரிமஜினவரேஸு கதாதி⁴காரோ தத்த² தத்த² ப⁴வே கதபுஞ்ஞூபசயோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸம் ஸண்ட²பேத்வா வஸந்தோ வித்த²தாய நாம க³ங்கா³ய ஸமீபே பிலக்கு²ப²லிதம் பரியேஸந்தோ தஸ்ஸா தீரே நிஸின்னம் ஜலமானஅக்³கி³ஸிக²ம் இவ ஸிகி²ம் ஸம்மாஸம்பு³த்³த⁴ம் தி³ஸ்வா பஸன்னமானஸோ கேதகீபுப்ப²ம் வண்டேனேவ சி²ந்தி³த்வா பூஜேந்தோ ஏவமாஹ – ‘‘ப⁴ந்தே, யேன ஞாணேன த்வம் ஏவம் மஹானுபா⁴வோ ஸப்³ப³ஞ்ஞுபு³த்³தோ⁴ ஜாதோ, தம் ஞாணம் அஹம் பூஜேமீ’’தி. அத² ப⁴க³வா அனுமோத³னமகாஸி. ஸோ தேன புஞ்ஞேன தே³வமனுஸ்ஸேஸு ஜாதோ உப⁴யஸம்பத்தியோ அனுப⁴வித்வா இமஸ்மிம் பு³த்³து⁴ப்பாதே³ ஏகஸ்மிம் குலகே³ஹே நிப்³ப³த்தோ ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி.

10. ஸோ அத்தனோ கதகுஸலம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ வித்த²தாய நதீ³தீரேதிஆதி³மாஹ. தத்த² வித்த²தாயாதி வித்த²ரதி பத்த²ரதி வித்தி²ண்ணா ஹோதீதி வித்த²தா, நத³ந்தி ஸத்³த³ம் கரோந்தி இதா க³தா பவத்தாதி நதீ³, நதி³ம் தரந்தா ஏதம் பத்வா திண்ணா நாம ஹோந்தீதி தீரம், தஸ்ஸா வித்த²தாய நதி³யா தீரே தீரஸமீபேதி அத்தோ². கேதகிம் புப்பி²தம் தி³ஸ்வாதி குச்சி²தாகாரேன க³ண்ஹந்தானம் ஹத்த²ம் கண்ட³கோ சி²ந்த³தி விஜ்ஜ²தீதி கேதம், கேதஸ்ஸ ஏஸா கேதகீபுப்ப²ம், தம் தி³ஸ்வா வண்டம் சி²ந்தி³த்வாதி ஸம்ப³ந்தோ⁴.

11. ஸிகி²னோ லோகப³ந்து⁴னோதி ஸிகீ² வுச்சதி அக்³கி³, ஸிகீ²ஸதி³ஸா நீலபீதாதி³பே⁴தா³ ஜலமானா ச²ப்³ப³ண்ணக⁴னரம்ஸியோ யஸ்ஸ ஸோ ஸிகீ², லோகஸ்ஸ ஸகலலோகத்தயஸ்ஸ ப³ந்து⁴ ஞாதகோதி லோகப³ந்து⁴, தஸ்ஸ ஸிகி²னோ லோகப³ந்து⁴னோ கேதகீபுப்ப²ம் வண்டே சி²ந்தி³த்வா பூஜேஸிந்தி ஸம்ப³ந்தோ⁴. ஸேஸம் உத்தானத்த²மேவாதி.

ஸுத³ஸ்ஸனத்தே²ரஅபதா³னவண்ணனா ஸமத்தா.