10. பது³மபூஜகத்தே²ரஅபதா³னவண்ணனா

ஹிமவந்தஸ்ஸாவிதூ³ரேதிஆதி³கம் ஆயஸ்மதோ பது³மபூஜகத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதம் பத்வா ஸகஸிப்பே நிப்ப²த்திம் பத்வா தத்த² ஸாரம் அபஸ்ஸந்தோ பு³த்³து⁴ப்பத்திதோ புரேதரம் உப்பன்னத்தா ஓவாதா³னுஸாஸனம் அலபி⁴த்வா க⁴ராவாஸம் பஹாய இஸிபப்³ப³ஜ்ஜம் பப்³ப³ஜித்வா ஹிமவந்தஸ்ஸ அவிதூ³ரே கோ³தமகம் நாம பப்³ப³தம் நிஸ்ஸாய அஸ்ஸமம் காரேத்வா பஞ்சாபி⁴ஞ்ஞா அட்ட² ஸமாபத்தியோ நிப்³ப³த்தேத்வா ஜா²னஸுகே²னேவ விஹாஸி. ததா³ பது³முத்தரோ ப⁴க³வா பு³த்³தோ⁴ ஹுத்வா ஸத்தே ஸம்ஸாரதோ உத்³த⁴ரந்தோ தஸ்ஸானுகம்பாய ஹிமவந்தம் அக³மாஸி. தாபஸோ ப⁴க³வந்தம் தி³ஸ்வா பஸன்னமானஸோ ஸகஸிஸ்ஸே ஸமானேத்வா தேஹி பது³மபுப்பா²னி ஆஹராபேத்வா பூஜேஸி. ஸோ தேன புஞ்ஞேன தே³வமனுஸ்ஸேஸு ஸம்ஸரந்தோ உப⁴யஸம்பத்தியோ அனுப⁴வித்வா இமஸ்மிம் பு³த்³து⁴ப்பாதே³ ஸாவத்தி²யம் குலகே³ஹே நிப்³ப³த்தோ ஸத்³தோ⁴ பஸன்னோ பப்³ப³ஜித்வா நசிரஸ்ஸேவ அரஹா அஹோஸி.

97. ஸோ அத்தனோ புஞ்ஞகம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ ஹிமவந்தஸ்ஸாவிதூ³ரேதிஆதி³மாஹ. கோ³தமோ நாம பப்³ப³தோதி அனேகேஸம் யக்க²தே³வதானம் ஆவாஸபா⁴வேன அதி⁴ட்டா²னவஸேன கோ³தமஸ்ஸ ப⁴வனத்தா கோ³தமோதி பாகடோ அஹோஸி. பவத்ததி திட்ட²தீதி பப்³ப³தோ. நாக³ருக்கே²ஹி ஸஞ்ச²ன்னோதி ருஹதி திட்ட²தீதி ருக்கோ². அத² வா பத²விம் க²னந்தோ உத்³த⁴ம் ருஹதீதி ருக்கோ², நானா அனேகப்பகாரா சம்பககப்பூரனாக³அக³ருசந்த³னாத³யோ ருக்கா²தி நானாருக்கா², தேஹி நானாருக்கே²ஹி ஸஞ்ச²ன்னோ பரிகிண்ணோ கோ³தமோ பப்³ப³தோதி ஸம்ப³ந்தோ⁴. மஹாபூ⁴தக³ணாலயோதி ப⁴வந்தி ஜாயந்தி உப்பஜ்ஜந்தி வட்³ட⁴ந்தி சாதி பூ⁴தா, மஹந்தா ச தே பூ⁴தா சாதி மஹாபூ⁴தா, மஹாபூ⁴தானம் க³ணோ ஸமூஹோதி மஹாபூ⁴தக³ணோ, மஹாபூ⁴தக³ணஸ்ஸ ஆலயோ பதிட்டா²தி மஹாபூ⁴தக³ணாலயோ.

98. வேமஜ்ஜ²ம்ஹி ச தஸ்ஸாஸீதி தஸ்ஸ கோ³தமஸ்ஸ பப்³ப³தஸ்ஸ வேமஜ்ஜே² அப்³ப⁴ந்தரே அஸ்ஸமோ அபி⁴னிம்மிதோ நிப்பா²தி³தோ கதோதி அத்தோ². ஸேஸம் உத்தானமேவாதி.

பது³மபூஜகத்தே²ரஅபதா³னவண்ணனா ஸமத்தா.

தேரஸமவக்³க³வண்ணனா ஸமத்தா.