4. பத³பூஜகத்தே²ரஅபதா³னவண்ணனா

ஸித்³த⁴த்த²ஸ்ஸ ப⁴க³வதோதிஆதி³கம் ஆயஸ்மதோ பத³பூஜகத்தே²ரஸ்ஸ அபதா³னம். அயம்பி புரிமபு³த்³தே⁴ஸு கதாதி⁴காரோ ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸன்னோ ஸுமனபுப்பே²ன பாத³மூலே பூஜேஸி. ஸோ தேன புஞ்ஞேன தே³வமனுஸ்ஸேஸு ஸம்ஸரந்தோ ஸக்கஸம்பத்திம் அனுப⁴வித்வா இமஸ்மிம் பு³த்³து⁴ப்பாதே³ ஏகஸ்மிம் குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸீதி³த்வா பப்³ப³ஜிதோ விபஸ்ஸனம் வட்³டே⁴த்வா அரஹத்தப²லே பதிட்டா²ஸி.

19. ஸோ அபரபா⁴கே³ அத்தனோ புப்³ப³கம்மம் ஸரித்வா ஸோமனஸ்ஸஜாதோ புப்³ப³சரிதாபதா³னம் பகாஸேந்தோ ஸித்³த⁴த்த²ஸ்ஸ ப⁴க³வதோதிஆதி³மாஹ. ஜாதிபுப்ப²மதா³ஸஹந்தி ஜாதிஸுமனபுப்ப²ம் அதா³ஸிம் அஹந்தி வத்தப்³பே³ கா³தா²ப³ந்த⁴ஸுக²த்த²ம் ஸுமனஸத்³த³ஸ்ஸ லோபம் கத்வா வுத்தம். தத்த² ஜாதியா நிப்³ப³த்தோ விகஸமானோயேவ ஸுமனம் ஜனானம் ஸோமனஸ்ஸம் கரோதீதி ஸுமனம், புப்ப²னட்டே²ன விகஸனட்டே²ன புப்ப²ம், ஸுமனஞ்ச தம் புப்ப²ஞ்சாதி ஸுமனபுப்ப²ம், தானி ஸுமனபுப்பா²னி ஸித்³த⁴த்த²ஸ்ஸ ப⁴க³வதோ அஹம் பூஜேஸிந்தி அத்தோ². ஸேஸம் ஸப்³ப³த்த² உத்தானமேவாதி.

பத³பூஜகத்தே²ரஅபதா³னவண்ணனா ஸமத்தா.