த⁴ம்மத³ஸ்ஸீ பு³த்³தோ⁴

தஸ்ஸ அபரபா⁴கே³ த⁴ம்மத³ஸ்ஸீ நாம ஸத்தா² உத³பாதி³. தஸ்ஸாபி தயோ ஸாவகஸன்னிபாதா. பட²மே கோடிஸதம் பி⁴க்கூ² அஹேஸும், து³தியே நவுதிகோடியோ, ததியே அஸீதிகோடியோ. ததா³ போ³தி⁴ஸத்தோ ஸக்கோ தே³வராஜா ஹுத்வா தி³ப்³ப³க³ந்த⁴புப்பே²ஹி ச தி³ப்³ப³தூரியேஹி ச பூஜம் அகாஸி, ஸோபி நம் ஸத்தா² ‘‘அனாக³தே பு³த்³தோ⁴ ப⁴விஸ்ஸதீ’’தி ப்³யாகாஸி. தஸ்ஸ ப⁴க³வதோ ஸரணம் நாம நக³ரம் அஹோஸி, பிதா ஸரணோ நாம ராஜா, மாதா ஸுனந்தா³ நாம தே³வீ, பது³மோ ச பு²ஸ்ஸதே³வோ ச த்³வே அக்³க³ஸாவகா, ஸுனேத்தோ நாமுபட்டா²கோ, கே²மா ச ஸப்³ப³னாமா ச த்³வே அக்³க³ஸாவிகா, ரத்தங்குரருக்கோ² போ³தி⁴, ‘‘பி³ம்பி³ஜாலோ’’திபி வுச்சதி, ஸரீரம் பனஸ்ஸ அஸீதிஹத்து²ப்³பே³த⁴ம் அஹோஸி, வஸ்ஸஸதஸஹஸ்ஸம் ஆயூதி.

‘‘தத்தே²வ மண்ட³கப்பம்ஹி, த⁴ம்மத³ஸ்ஸீ மஹாயஸோ;

தமந்த⁴காரம் வித⁴மித்வா, அதிரோசதி ஸதே³வகே’’தி. (பு³. வம். 17.1);