4. மக்³க³ஸச்சனித்³தே³ஸவண்ணனா

205. மக்³க³ஸச்சநித்³தே³ஸே அயமேவாதி அஞ்ஞமக்³க³படிக்கே²பனத்த²ம் நியமனம். அரியோதி தம்தம்மக்³க³வஜ்ஜே²ஹி கிலேஸேஹி ஆரகத்தா அரியபா⁴வகரத்தா அரியப²லபடிலாப⁴கரத்தா ச அரியோ. அட்ட²ங்கா³னி அஸ்ஸாதி அட்ட²ங்கி³கோ. ஸ்வாயம் சதுரங்கி³கா விய ஸேனா, பஞ்சங்கி³கம் விய தூரியம் அங்க³மத்தமேவ ஹோதி, அங்க³வினிமுத்தோ நத்தி². நிப்³பா³னத்தி²கேஹி மக்³கீ³யதி, நிப்³பா³னம் வா மக்³க³தி, கிலேஸே வா மாரேந்தோ க³ச்ச²தீதி மக்³கோ³. ஸேய்யதி²த³ந்தி ஸோ கதமோதி சேதி அத்தோ².

இதா³னி அங்க³மத்தமேவ மக்³கோ³ ஹோதி, அங்க³வினிம்முத்தோ நத்தீ²தி த³ஸ்ஸேந்தோ ஸம்மாதி³ட்டி²…பே… ஸம்மாஸமாதீ⁴தி ஆஹ. தத்த² ஸம்மா த³ஸ்ஸனலக்க²ணா ஸம்மாதி³ட்டி². ஸம்மா அபி⁴னிரோபனலக்க²ணோ ஸம்மாஸங்கப்போ. ஸம்மா பரிக்³க³ஹலக்க²ணா ஸம்மாவாசா. ஸம்மா ஸமுட்டா²பனலக்க²ணோ ஸம்மாகம்மந்தோ. ஸம்மா வோதா³னலக்க²ணோ ஸம்மாஆஜீவோ. ஸம்மா பக்³க³ஹலக்க²ணோ ஸம்மாவாயாமோ. ஸம்மா உபட்டா²னலக்க²ணா ஸம்மாஸதி. ஸம்மா ஸமாதா⁴னலக்க²ணோ ஸம்மாஸமாதி⁴.

தேஸு ச ஏகேகஸ்ஸ தீணி தீணி கிச்சானி ஹோந்தி, ஸேய்யதி²த³ம் – ஸம்மாதி³ட்டி² தாவ அஞ்ஞேஹிபி அத்தனோ பச்சனீககிலேஸேஹி ஸத்³தி⁴ம் மிச்சா²தி³ட்டி²ம் பஜஹதி, நிரோத⁴ம் ஆரம்மணம் கரோதி, ஸம்பயுத்தத⁴ம்மே ச பஸ்ஸதி தப்படிச்சா²த³கமோஹவித⁴மனவஸேன அஸம்மோஹதோ. ஸம்மாஸங்கப்பாத³யோபி ததே²வ மிச்சா²ஸங்கப்பாதீ³னி ச பஜஹந்தி, நிரோத⁴ஞ்ச ஆரம்மணம் கரோந்தி. விஸேஸதோ பனேத்த² ஸம்மாஸங்கப்போ ஸஹஜாதத⁴ம்மே அபி⁴னிரோபேதி, ஸம்மாவாசா ஸம்மா பரிக்³க³ண்ஹாதி, ஸம்மாகம்மந்தோ ஸம்மா ஸமுட்டா²பேதி, ஸம்மாஆஜீவோ ஸம்மா வோதா³பேதி, ஸம்மாவாயாமோ ஸம்மா பக்³க³ண்ஹாதி, ஸம்மாஸதி ஸம்மா உபட்டா²தி, ஸம்மாஸமாதி⁴ ஸம்மா பத³ஹதி.

அபிசேஸா ஸம்மாதி³ட்டி² நாம புப்³ப³பா⁴கே³ நானாக்க²ணா நானாரம்மணா ஹோதி, மக்³க³காலே ஏகக்க²ணா ஏகாரம்மணா, கிச்சதோ பன து³க்கே² ஞாணந்திஆதீ³னி சத்தாரி நாமானி லப⁴தி. ஸம்மாஸங்கப்பாத³யோபி புப்³ப³பா⁴கே³ நானாக்க²ணா நானாரம்மணா ஹோந்தி, மக்³க³காலே ஏகக்க²ணா ஏகாரம்மணா. தேஸு ஸம்மாஸங்கப்போ கிச்சதோ நேக்க²ம்மஸங்கப்போதிஆதீ³னி தீணி நாமானி லப⁴தி. ஸம்மாவாசாத³யோ தயோ புப்³ப³பா⁴கே³ நானாக்க²ணா நானாரம்மணா விரதியோபி ஹோந்தி சேதனாயோபி, மக்³க³க்க²ணே பன விரதியோவ. ஸம்மாவாயாமோ ஸம்மாஸதீதி இத³ம்பி த்³வயம் கிச்சதோ ஸம்மப்பதா⁴னஸதிபட்டா²னவஸேன சத்தாரி நாமானி லப⁴தி. ஸம்மாஸமாதி⁴ பன புப்³ப³பா⁴கே³பி மக்³க³க்க²ணேபி ஸம்மாஸமாதி⁴யேவ.

இதி இமேஸு அட்ட²ஸு த⁴ம்மேஸு ப⁴க³வதா நிப்³பா³னாதி⁴க³மாய படிபன்னஸ்ஸ யோகி³னோ ப³ஹூபகாரத்தா பட²மம் ஸம்மாதி³ட்டி² தே³ஸிதா. அயஞ்ஹி ‘‘பஞ்ஞாபஜ்ஜோதோ பஞ்ஞாஸத்த²’’ந்தி (த⁴. ஸ. 16, 20, 29, 34) ச வுத்தா. தஸ்மா ஏதாய புப்³ப³பா⁴கே³ விபஸ்ஸனாஞாணஸங்கா²தாய ஸம்மாதி³ட்டி²யா அவிஜ்ஜந்த⁴காரம் வித்³த⁴ம்ஸேத்வா கிலேஸசோரே கா⁴தேந்தோ கே²மேன யோகா³வசரோ நிப்³பா³னம் பாபுணாதி. தேன வுத்தம் ‘‘நிப்³பா³னாதி⁴க³மாய படிபன்னஸ்ஸ யோகி³னோ ப³ஹூபகாரத்தா பட²மம் ஸம்மாதி³ட்டி² தே³ஸிதா’’தி.

ஸம்மாஸங்கப்போ பன தஸ்ஸா ப³ஹூபகாரோ, தஸ்மா தத³னந்தரம் வுத்தோ. யதா² ஹி ஹேரஞ்ஞிகோ ஹத்தே²ன பரிவத்தேத்வா பரிவத்தேத்வா சக்கு²னா கஹாபணம் ஓலோகேந்தோ ‘அயம் கூடோ, அயம் சே²கோ’தி ஜானாதி, ஏவம் யோகா³வசரோபி புப்³ப³பா⁴கே³ விதக்கேன விதக்கேத்வா விபஸ்ஸனாபஞ்ஞாய ஓலோகயமானோ ‘இமே த⁴ம்மா காமாவசரா, இமே த⁴ம்மா ரூபாவசராத³யோ’தி ஜானாதி. யதா² வா பன புரிஸேன கோடியம் க³ஹேத்வா பரிவத்தேத்வா பரிவத்தேத்வா தி³ன்னம் மஹாருக்க²ம் தச்ச²கோ வாஸியா தச்சே²த்வா கம்மே உபனேதி, ஏவம் விதக்கேன விதக்கேத்வா விதக்கத்வா தி³ன்னத⁴ம்மே யோகா³வசரோ பஞ்ஞாய ‘இமே த⁴ம்மா காமாவசரா, இமே த⁴ம்மா ரூபாவசரா’திஆதி³னா நயேன பரிச்சி²ந்தி³த்வா கம்மே உபனேதி. தேன வுத்தம் ‘ஸம்மாஸங்கப்போ பன தஸ்ஸா ப³ஹூபகாரோ, தஸ்மா தத³னந்தரம் வுத்தோ’’தி.

ஸ்வாயம் யதா² ஸம்மாதி³ட்டி²யா, ஏவம் ஸம்மாவாசாயபி உபகாரகோ. யதா²ஹ – ‘‘புப்³பே³ கோ², க³ஹபதி, விதக்கேத்வா விசாரேத்வா பச்சா² வாசம் பி⁴ந்த³தீ’’தி (ம. நி. 1.463). தஸ்மா தத³னந்தரம் ஸம்மாவாசா வுத்தா.

யஸ்மா பன ‘இத³ஞ்சித³ஞ்ச கரிஸ்ஸாமா’தி பட²மம் வாசாய ஸம்வித³ஹித்வா லோகே கம்மந்தே பயோஜேந்தி, தஸ்மா வாசா காயகம்மஸ்ஸ உபகாரிகாதி ஸம்மாவாசாய அனந்தரம் ஸம்மாகம்மந்தோ வுத்தோ.

சதுப்³பி³த⁴ம் பன வசீது³ச்சரிதம், திவித⁴ம் காயது³ச்சரிதம் பஹாய உப⁴யம் ஸுசரிதம் பூரேந்தஸ்ஸேவ யஸ்மா ஆஜீவட்ட²மகஸீலம் பூரதி, ந இதரஸ்ஸ, தஸ்மா தது³ப⁴யானந்தரம் ஸம்மாஆஜீவோ வுத்தோ.

ஏவம் ஸுத்³தா⁴ஜீவேன ‘பரிஸுத்³தோ⁴ மே ஆஜீவோ’தி ஏத்தாவதா பரிதோஸம் அகத்வா ஸுத்தப்பமத்தேன விஹரிதும் ந யுத்தம், அத² கோ² ஸப்³ப³இரியாபதே²ஸு இத³ம் வீரியமாரபி⁴தப்³ப³ந்தி த³ஸ்ஸேதும் தத³னந்தரம் ஸம்மாவாயாமோ வுத்தோ.

ததோ ஆரத்³த⁴வீரியேனாபி காயாதீ³ஸு சதூஸு வத்தூ²ஸு ஸதி ஸுப்பதிட்டி²தா காதப்³பா³தி த³ஸ்ஸனத்த²ம் தத³னந்தரம் ஸம்மாஸதி தே³ஸிதா.

யஸ்மா பன ஏவம் ஸுப்பதிட்டி²தா ஸதி ஸமாதி⁴ஸ்ஸ உபகாரானுபகாரானம் த⁴ம்மானம் க³தியோ ஸமன்வேஸித்வா பஹோதி ஏகத்தாரம்மணே சித்தம் ஸமாதா⁴தும், தஸ்மா ஸம்மாஸதிஅனந்தரம் ஸம்மாஸமாதி⁴ தே³ஸிதோதி வேதி³தப்³போ³.

ஸம்மாதி³ட்டி²நித்³தே³ஸே ‘‘து³க்கே² ஞாண’’ந்திஆதி³னா சதுஸச்சகம்மட்டா²னம் த³ஸ்ஸிதம். தத்த² புரிமானி த்³வே ஸச்சானி வட்டம், பச்சி²மானி விவட்டம். தேஸு பி⁴க்கு²னோ வட்டே கம்மட்டா²னாபி⁴னிவேஸோ ஹோதி, விவட்டே நத்தி² அபி⁴னிவேஸோ. புரிமானி ஹி த்³வே ஸச்சானி ‘‘பஞ்சக்க²ந்தா⁴ து³க்க²ம், தண்ஹா ஸமுத³யோ’’தி ஏவம் ஸங்கே²பேன ச ‘‘கதமே பஞ்சக்க²ந்தா⁴? ரூபக்க²ந்தோ⁴’’திஆதி³னா நயேன வித்தா²ரேன ச ஆசரியஸ்ஸ ஸந்திகே உக்³க³ண்ஹித்வா வாசாய புனப்புனம் பரிவத்தேந்தோ யோகா³வசரோ கம்மம் கரோதி; இதரேஸு பன த்³வீஸு ஸச்சேஸு ‘‘நிரோத⁴ஸச்சம் இட்ட²ம் கந்தம் மனாபம், மக்³க³ஸச்சம் இட்ட²ம் கந்தம் மனாப’’ந்தி ஏவம் ஸவனேனேவ கம்மம் கரோதி. ஸோ ஏவம் கம்மம் கரோந்தோ சத்தாரி ஸச்சானி ஏகேன படிவேதே⁴ன படிவிஜ்ஜ²தி, ஏகாபி⁴ஸமயேன அபி⁴ஸமேதி; து³க்க²ம் பரிஞ்ஞாபடிவேதே⁴ன படிவிஜ்ஜ²தி, ஸமுத³யம் பஹானபடிவேதே⁴ன, நிரோத⁴ம் ஸச்சி²கிரியபடிவேதே⁴ன, மக்³க³ம் பா⁴வனாபடிவேதே⁴ன படிவிஜ்ஜ²தி; து³க்க²ம் பரிஞ்ஞாபி⁴ஸமயேன…பே… மக்³க³ம் பா⁴வனாபி⁴ஸமயேன அபி⁴ஸமேதி.

ஏவமஸ்ஸ புப்³ப³பா⁴கே³ த்³வீஸு ஸச்சேஸு உக்³க³ஹபரிபுச்சா²ஸவனதா⁴ரணஸம்மஸனபடிவேதோ⁴ ஹோதி, த்³வீஸு ஸவனபடிவேதோ⁴யேவ; அபரபா⁴கே³ தீஸு கிச்சதோ படிவேதோ⁴ ஹோதி, நிரோதே⁴ ஆரம்மணபடிவேதோ⁴. தத்த² ஸப்³ப³ம்பி படிவேத⁴ஞாணம் லோகுத்தரம், ஸவனதா⁴ரணஸம்மஸனஞாணம் லோகியம் காமாவசரம், பச்சவேக்க²ணா பன பத்தஸச்சஸ்ஸ ஹோதி. அயஞ்ச ஆதி³கம்மிகோ. தஸ்மா ஸா இத⁴ ந வுத்தா. இமஸ்ஸ ச பி⁴க்கு²னோ புப்³பே³ பரிக்³க³ஹதோ ‘து³க்க²ம் பரிஜானாமி, ஸமுத³யம் பஜஹாமி, நிரோத⁴ம் ஸச்சி²கரோமி, மக்³க³ம் பா⁴வேமீ’தி ஆபோ⁴க³ஸமன்னாஹாரமனஸிகாரபச்சவேக்க²ணா நத்தி², பரிக்³க³ஹதோ பட்டா²ய ஹோதி; அபரபா⁴கே³ பன து³க்க²ம் பரிஞ்ஞாதமேவ ஹோதி…பே… மக்³கோ³ பா⁴விதோவ ஹோதி.

தத்த² த்³வே ஸச்சானி து³த்³த³ஸத்தா க³ம்பீ⁴ரானி, த்³வே க³ம்பீ⁴ரத்தா து³த்³த³ஸானி. து³க்க²ஸச்சஞ்ஹி உப்பத்திதோ பாகடம்; கா²ணுகண்டகப்பஹாராதீ³ஸு ‘அஹோ து³க்க²’ந்தி வத்தப்³ப³தம்பி ஆபஜ்ஜதி. ஸமுத³யம்பி கா²தி³துகாமதாபு⁴ஞ்ஜிதுகாமதாதி³வஸேன உப்பத்திதோ பாகடம். லக்க²ணபடிவேத⁴தோ பன உப⁴யம்பி க³ம்பீ⁴ரம். இதி தானி து³த்³த³ஸத்தா க³ம்பீ⁴ரானி. இதரேஸம் பன த்³வின்னம் த³ஸ்ஸனத்தா²ய பயோகோ³ ப⁴வக்³க³க³ஹணத்த²ம் ஹத்த²ப்பஸாரணம் விய, அவீசிபு²ஸனத்த²ம் பாத³ப்பஸாரணம் விய, ஸததா⁴ பி⁴ன்னவாலஸ்ஸ கோடியா கோடிம் படிபாத³னம் விய ச ஹோதி. இதி தானி க³ம்பீ⁴ரத்தா து³த்³த³ஸானி. ஏவம் து³த்³த³ஸத்தா க³ம்பீ⁴ரேஸு க³ம்பீ⁴ரத்தா ச து³த்³த³ஸேஸு சதூஸு ஸச்சேஸு உக்³க³ஹாதி³வஸேன புப்³ப³பா⁴க³ஞாணுப்பத்திம் ஸந்தா⁴ய இத³ம் ‘‘து³க்கே² ஞாண’’ந்திஆதி³ வுத்தம். படிவேத⁴க்க²ணே பன ஏகமேவ ஞாணம் ஹோதி.

ஸம்மாஸங்கப்பநித்³தே³ஸே காமதோ நிஸ்ஸடோதி நேக்க²ம்மஸங்கப்போ. ப்³யாபாத³தோ நிஸ்ஸடோதி அப்³யாபாத³ஸங்கப்போ. விஹிம்ஸாய நிஸ்ஸடோதி அவிஹிம்ஸாஸங்கப்போ. தத்த² நேக்க²ம்மவிதக்கோ காமவிதக்கஸ்ஸ பத³கா⁴தம் பத³ச்சே²த³ம் கரோந்தோ உப்பஜ்ஜதி, அப்³யாபாத³விதக்கோ ப்³யாபாத³விதக்கஸ்ஸ, அவிஹிம்ஸாவிதக்கோ விஹிம்ஸாவிதக்கஸ்ஸ. நேக்க²ம்மவிதக்கோ ச காமவிதக்கஸ்ஸ பச்சனீகோ ஹுத்வா உப்பஜ்ஜதி, அப்³யாபாத³அவிஹிம்ஸாவிதக்கா ப்³யாபாத³விஹிம்ஸாவிதக்கானம்.

தத்த² யோகா³வசரோ காமவிதக்கஸ்ஸ பத³கா⁴தனத்த²ம் காமவிதக்கம் வா ஸம்மஸதி அஞ்ஞம் வா பன கிஞ்சி ஸங்கா²ரம். அத²ஸ்ஸ விபஸ்ஸனாக்க²ணே விபஸ்ஸனாஸம்பயுத்தோ ஸங்கப்போ தத³ங்க³வஸேன காமவிதக்கஸ்ஸ பத³கா⁴தம் பத³ச்சே²த³ம் கரோந்தோ உப்பஜ்ஜதி, விபஸ்ஸனம் உஸ்ஸுக்காபேத்வா மக்³க³ம் பாபேதி. அத²ஸ்ஸ மக்³க³க்க²ணே மக்³க³ஸம்பயுத்தோ ஸங்கப்போ ஸமுச்சே²த³வஸேன காமவிதக்கஸ்ஸ பத³கா⁴தம் பத³ச்சே²த³ம் கரோந்தோ உப்பஜ்ஜதி; ப்³யாபாத³விதக்கஸ்ஸாபி பத³கா⁴தனத்த²ம் ப்³யாபாத³விதக்கம் வா அஞ்ஞம் வா ஸங்கா²ரம் ஸம்மஸதி; விஹிம்ஸாவிதக்கஸ்ஸ பத³கா⁴தனத்த²ம் விஹிம்ஸாவிதக்கம் வா அஞ்ஞம் வா ஸங்கா²ரம் ஸம்மஸதி. அத²ஸ்ஸ விபஸ்ஸனாக்க²ணேதி ஸப்³ப³ம் புரிமனயேனேவ யோஜேதப்³ப³ம்.

காமவிதக்காதீ³னம் பன திண்ணம் பாளியம் விப⁴த்தேஸு அட்ட²திம்ஸாரம்மணேஸு ஏககம்மட்டா²னம்பி அபச்சனீகம் நாம நத்தி². ஏகந்ததோ பன காமவிதக்கஸ்ஸ தாவ அஸுபே⁴ஸு பட²மஜ்ஜா²னமேவ பச்சனீகம், ப்³யாபாத³விதக்கஸ்ஸ மேத்தாய திகசதுக்கஜ்ஜா²னானி, விஹிம்ஸாவிதக்கஸ்ஸ கருணாய திகசதுக்கஜ்ஜா²னானி. தஸ்மா அஸுபே⁴ பரிகம்மம் கத்வா ஜா²னம் ஸமாபன்னஸ்ஸ ஸமாபத்திக்க²ணே ஜா²னஸம்பயுத்தோ ஸங்கப்போ விக்க²ம்ப⁴னவஸேன காமவிதக்கஸ்ஸ பச்சனீகோ ஹுத்வா உப்பஜ்ஜதி. ஜா²னம் பாத³கம் கத்வா விபஸ்ஸனம் பட்ட²பேந்தஸ்ஸ விபஸ்ஸனாக்க²ணே விபஸ்ஸனாஸம்பயுத்தோ ஸங்கப்போ தத³ங்க³வஸேன காமவிதக்கஸ்ஸ பச்சனீகோ ஹுத்வா உப்பஜ்ஜதி. விபஸ்ஸனம் உஸ்ஸுக்காபேத்வா மக்³க³ம் பாபேந்தஸ்ஸ மக்³க³க்க²ணே மக்³க³ஸம்பயுத்தோ ஸங்கப்போ ஸமுச்சே²த³வஸேன காமவிதக்கஸ்ஸ பச்சனீகோ ஹுத்வா உப்பஜ்ஜதி. ஏவம் உப்பன்னோ நேக்க²ம்மஸங்கப்போதி வுச்சதீதி வேதி³தப்³போ³.

மேத்தாய பன பரிகம்மம் கத்வா, கருணாய பரிகம்மம் கத்வா ஜா²னம் ஸமாபஜ்ஜதீதி ஸப்³ப³ம் புரிமனயேனேவ யோஜேதப்³ப³ம். ஏவம் உப்பன்னோ அப்³யாபாத³ஸங்கப்போதி வுச்சதி, அவிஹிம்ஸாஸங்கப்போதி ச வுச்சதீதி வேதி³தப்³போ³. ஏவமேதே நேக்க²ம்மஸங்கப்பாத³யோ விபஸ்ஸனாஜா²னவஸேன உப்பத்தீனம் நானத்தா புப்³ப³பா⁴கே³ நானா; மக்³க³க்க²ணே பன இமேஸு தீஸு டா²னேஸு உப்பன்னஸ்ஸ அகுஸலஸங்கப்பஸ்ஸ பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானோ ஏகோவ குஸலஸங்கப்போ உப்பஜ்ஜதி. அயம் ஸம்மாஸங்கப்போ நாம.

ஸம்மாவாசாநித்³தே³ஸேபி யஸ்மா அஞ்ஞேனேவ சித்தேன முஸாவாதா³ விரமதி, அஞ்ஞேனஞ்ஞேன பிஸுணவாசாதீ³ஹி, தஸ்மா சதஸ்ஸோபேதா வேரமணியோ புப்³ப³பா⁴கே³ நானா; மக்³க³க்க²ணே பன மிச்சா²வாசாஸங்கா²தாய சதுப்³பி³தா⁴ய அகுஸலது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ ஸம்மாவாசாஸங்கா²தா குஸலவேரமணீ உப்பஜ்ஜதி. அயம் ஸம்மாவாசா நாம.

ஸம்மாகம்மந்தநித்³தே³ஸேபி யஸ்மா அஞ்ஞேனேவ சித்தேன பாணாதிபாதா விரமதி, அஞ்ஞேன அதி³ன்னாதா³னா, அஞ்ஞேன காமேஸுமிச்சா²சாரா, தஸ்மா திஸ்ஸோபேதா வேரமணியோ புப்³ப³பா⁴கே³ நானா; மக்³க³க்க²ணே பன மிச்சா²கம்மந்தஸங்கா²தாய திவிதா⁴ய அகுஸலது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ ஸம்மாகம்மந்தஸங்கா²தா அகுஸலவேரமணீ உப்பஜ்ஜதி. அயம் ஸம்மாகம்மந்தோ நாம.

ஸம்மாஆஜீவநித்³தே³ஸே இதா⁴தி இமஸ்மிம் ஸாஸனே. அரியஸாவகோதி அரியஸ்ஸ பு³த்³த⁴ஸ்ஸ ஸாவகோ. மிச்சா²ஆஜீவம் பஹாயாதி பாபகம் ஆஜீவம் பஜஹித்வா. ஸம்மாஆஜீவேனாதி பு³த்³த⁴பஸத்தே²ன குஸலஆஜீவேன. ஜீவிகம் கப்பேதீதி ஜீவிதப்பவத்திம் பவத்தேதி. இதா⁴பி யஸ்மா அஞ்ஞேனேவ சித்தேன காயத்³வாரவீதிக்கமா விரமதி; அஞ்ஞேன வசீத்³வாரவீதிக்கமா, தஸ்மா புப்³ப³பா⁴கே³ நானாக்க²ணேஸு உப்பஜ்ஜதி; மக்³க³க்க²ணே பன த்³வீஸு த்³வாரேஸு ஸத்தன்னம் கம்மபதா²னம் வஸேன உப்பன்னாய மிச்சா²ஆஜீவது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ ஸம்மாஆஜீவஸங்கா²தா குஸலவேரமணீ உப்பஜ்ஜதி. அயம் ஸம்மாஆஜீவோ நாம.

ஸம்மாவாயாமநித்³தே³ஸோ ஸம்மப்பதா⁴னவிப⁴ங்கே³ அனுபத³வண்ணனாவஸேன ஆவிப⁴விஸ்ஸதி. அயம் பன புப்³ப³பா⁴கே³ நானாசித்தேஸு லப⁴தி. அஞ்ஞேனேவ ஹி சித்தேன அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய வாயாமம் கரோதி, அஞ்ஞேன உப்பன்னானம் பஹானாய; அஞ்ஞேனேவ ச அனுப்பன்னானம் குஸலானம் த⁴ம்மானம் உப்பாதா³ய, அஞ்ஞேன உப்பன்னானம் டி²தியா; மக்³க³க்க²ணே பன ஏகசித்தேயேவ லப்³ப⁴தி. ஏகமேவ ஹி மக்³க³ஸம்பயுத்தம் வீரியம் சதுகிச்சஸாத⁴னட்டே²ன சத்தாரி நாமானி லப்³ப⁴தி.

ஸம்மாஸதிநித்³தே³ஸோபி ஸதிபட்டா²னவிப⁴ங்கே³ அனுபத³வண்ணனாவஸேன ஆவிப⁴விஸ்ஸதி. அயம்பி ச புப்³ப³பா⁴கே³ நானாசித்தேஸு லப்³ப⁴தி. அஞ்ஞேனேவ ஹி சித்தேன காயம் பரிக்³க³ண்ஹாதி, அஞ்ஞேனஞ்ஞேன வேத³னாதீ³னி; மக்³க³க்க²ணே பன ஏகசித்தேயேவ லப்³ப⁴தி. ஏகாயேவ ஹி மக்³க³ஸம்பயுத்தா ஸதி சதுகிச்சஸாத⁴னட்டே²ன சத்தாரி நாமானி லப⁴தி.

ஸம்மாஸமாதி⁴நித்³தே³ஸே சத்தாரி ஜா²னானி புப்³ப³பா⁴கே³பி நானா, மக்³க³க்க²ணேபி. புப்³ப³பா⁴கே³ ஸமாபத்திவஸேன நானா, மக்³க³க்க²ணே நானாமக்³க³வஸேன. ஏகஸ்ஸ ஹி பட²மமக்³கோ³ பட²மஜ்ஜா²னிகோ ஹோதி, து³தியமக்³கா³த³யோபி பட²மஜ்ஜா²னிகா, து³தியாதீ³ஸு அஞ்ஞதரஜ்ஜா²னிகா வா. ஏகஸ்ஸ பட²மமக்³கோ³ து³தியாதீ³னம் அஞ்ஞதரஜ்ஜா²னிகோ ஹோதி, து³தியாத³யோபி து³தியாதீ³னம் அஞ்ஞதரஜ்ஜா²னிகா வா பட²மஜ்ஜா²னிகா வா. ஏவம் சத்தாரோபி மக்³கா³ ஜா²னவஸேன ஸதி³ஸா வா அஸதி³ஸா வா ஏகச்சஸதி³ஸா வா ஹோந்தி.

அயம் பனஸ்ஸ விஸேஸோ பாத³கஜ்ஜா²னனியாமேன ஹோதி. பாத³கஜ்ஜா²னனியாமேன தாவ பட²மஜ்ஜா²னலாபி⁴னோ பட²மஜ்ஜா²னா வுட்டா²ய விபஸ்ஸந்தஸ்ஸ உப்பன்னமக்³கோ³ பட²மஜ்ஜா²னிகோ ஹோதி; மக்³க³ங்க³போ³ஜ்ஜ²ங்கா³னி பனேத்த² பரிபுண்ணானேவ ஹோந்தி. து³தியஜ்ஜா²னதோ உட்டா²ய விபஸ்ஸந்தஸ்ஸ உப்பன்னோ மக்³கோ³ து³தியஜ்ஜா²னிகோ ஹோதி; மக்³க³ங்கா³னி பனேத்த² ஸத்த ஹோந்தி. ததியஜ்ஜா²னதோ உட்டா²ய விபஸ்ஸந்தஸ்ஸ உப்பன்னோ மக்³கோ³ ததியஜ்ஜா²னிகோ ஹோதி; மக்³க³ங்கா³னி பனேத்த² ஸத்த, போ³ஜ்ஜ²ங்கா³னி ச² ஹோந்தி. ஏஸ நயோ சதுத்த²ஜ்ஜா²னதோ பட்டா²ய யாவ நேவஸஞ்ஞானாஸஞ்ஞாயதனா.

ஆருப்பே சதுக்கபஞ்சகஜ்ஜா²னம் உப்பஜ்ஜதி. தஞ்ச கோ² லோகுத்தரம் நோ லோகியந்தி வுத்தம். ஏத்த² கத²ந்தி? ஏத்தா²பி பட²மஜ்ஜா²னாதீ³ஸு யதோ உட்டா²ய ஸோதாபத்திமக்³க³ம் படிலபி⁴த்வா ஆருப்பஸமாபத்திம் பா⁴வேத்வா யோ ஆருப்பே உப்பன்னோ, தம்ஜா²னிகாவ தஸ்ஸ தத்த² தயோ மக்³கா³ உப்பஜ்ஜந்தி. ஏவம் பாத³கஜ்ஜா²னமேவ நியாமேதி. கேசி பன தே²ரா ‘‘விபஸ்ஸனாய ஆரம்மணபூ⁴தா க²ந்தா⁴ நியாமேந்தீ’’தி வத³ந்தி. கேசி ‘‘புக்³க³லஜ்ஜா²ஸயோ நியாமேதீ’’தி வத³ந்தி. கேசி ‘‘வுட்டா²னகா³மினீவிபஸ்ஸனா நியாமேதீ’’தி வத³ந்தி. தேஸம் வாத³வினிச்ச²யோ ஹேட்டா² சித்துப்பாத³கண்டே³ லோகுத்தரபத³பா⁴ஜனீயவண்ணனாயம் (த⁴. ஸ. அட்ட². 350) வுத்தனயேனேவ வேதி³தப்³போ³. அயம் வுச்சதி ஸம்மாஸமாதீ⁴தி யா இமேஸு சதூஸு ஜா²னேஸு ஏகக்³க³தா, அயம் புப்³ப³பா⁴கே³ லோகியோ, அபரபா⁴கே³ லோகுத்தரோ ஸம்மாஸமாதி⁴ நாம வுச்சதீதி. ஏவம் லோகியலோகுத்தரவஸேன ப⁴க³வா மக்³க³ஸச்சம் தே³ஸேஸி.

தத்த² லோகியமக்³கே³ ஸப்³பா³னேவ மக்³க³ங்கா³னி யதா²னுரூபம் ச²ஸு ஆரம்மணேஸு அஞ்ஞதராரம்மணானி ஹோந்தி. லோகுத்தரமக்³கே³ பன சதுஸச்சபடிவேதா⁴ய பவத்தஸ்ஸ அரியஸ்ஸ நிப்³பா³னாரம்மணம் அவிஜ்ஜானுஸயஸமுக்³கா⁴தகம் பஞ்ஞாசக்கு² ஸம்மாதி³ட்டி². ததா² ஸம்பன்னதி³ட்டி²ஸ்ஸ தம்ஸம்பயுத்தம் திவித⁴மிச்சா²ஸங்கப்பஸமுக்³கா⁴தகம் சேதஸோ நிப்³பா³னபதா³பி⁴னிரோபனம் ஸம்மாஸங்கப்போ. ததா² பஸ்ஸந்தஸ்ஸ விதக்கேந்தஸ்ஸ ச தம்ஸம்பயுத்தாவ சதுப்³பி³த⁴வசீது³ச்சரிதஸமுக்³கா⁴திகாய மிச்சா²வாசாய விரதி ஸம்மாவாசா. ததா² விரமந்தஸ்ஸ தம்ஸம்பயுத்தாவ மிச்சா²கம்மந்தஸமுச்சே²தி³கா திவித⁴காயது³ச்சரிதவிரதி ஸம்மாகம்மந்தோ. தேஸம்யேவ ஸம்மாவாசாகம்மந்தானம் வோதா³னபூ⁴தா தம்ஸம்பயுத்தாவ குஹனாதி³ஸமுச்சே²தி³கா மிச்சா²ஆஜீவவிரதி ஸம்மாஆஜீவோ. இமிஸ்ஸா ஸம்மாவாசாகம்மந்தாஜீவஸம்கா²தாய ஸீலபூ⁴மியம் பதிட்ட²மானஸ்ஸ தத³னுரூபோ தம்ஸம்பயுத்தோவ கோஸஜ்ஜஸமுச்சே²த³கோ அனுப்பன்னுப்பன்னானம் அகுஸலகுஸலானம் அனுப்பாத³பஹானுப்பாத³ட்டி²திஸாத⁴கோ ச வீரியாரம்போ⁴ ஸம்மாவாயாமோ. ஏவம் வாயமந்தஸ்ஸ தம்ஸம்பயுத்தோவ மிச்சா²ஸதிவினித்³து⁴னனகோ காயாதீ³ஸு காயானுபஸ்ஸனாதி³ஸாத⁴கோ ச சேதஸோ அஸம்மோஸோ ஸம்மாஸதி. இதி அனுத்தராய ஸதியா ஸுவிஹிதசித்தாரக்க²ஸ்ஸ தம்ஸம்பயுத்தாவ மிச்சா²ஸமாதி⁴ஸமுக்³கா⁴திகா சித்தேகக்³க³தா ஸம்மாஸமாதீ⁴தி. ஏஸ லோகுத்தரோ அரியோ அட்ட²ங்கி³கோ மக்³கோ³ யோ ஸஹ லோகியேன மக்³கே³ன து³க்க²னிரோத⁴கா³மினீ படிபதா³தி ஸங்க²ம் க³தோ.

ஸோ கோ² பனேஸ மக்³கோ³ ஸம்மாதி³ட்டி²ஸங்கப்பானம் விஜ்ஜாய, ஸேஸத⁴ம்மானம் சரணேன ஸங்க³ஹிதத்தா விஜ்ஜா சேவ சரணஞ்ச. ததா² தேஸம் த்³வின்னம் விபஸ்ஸனாயானேன, இதரேஸம் ஸமத²யானேன ஸங்க³ஹிதத்தா ஸமதோ² சேவ விபஸ்ஸனா ச. தேஸம் வா த்³வின்னம் பஞ்ஞாக்க²ந்தே⁴ன, தத³னந்தரானம் திண்ணம் ஸீலக்க²ந்தே⁴ன, அவஸேஸானம் ஸமாதி⁴க்க²ந்தே⁴ன அதி⁴பஞ்ஞாஅதி⁴ஸீலஅதி⁴சித்தஸிக்கா²ஹி ச ஸங்க³ஹிதத்தா க²ந்த⁴த்தயஞ்சேவ ஸிக்கா²த்தயஞ்ச ஹோதி; யேன ஸமன்னாக³தோ அரியஸாவகோ த³ஸ்ஸனஸமத்தே²ஹி சக்கூ²ஹி க³மனஸமத்தே²ஹி ச பாதே³ஹி ஸமன்னாக³தோ அத்³தி⁴கோ விய விஜ்ஜாசரணஸம்பன்னோ ஹுத்வா விபஸ்ஸனாயானேன காமஸுக²ல்லிகானுயோக³ம், ஸமத²யானேன அத்தகிலமதா²னுயோக³ந்தி அந்தத்³வயம் பரிவஜ்ஜேத்வா மஜ்ஜி²மபடிபத³ம் படிபன்னோ பஞ்ஞாக்க²ந்தே⁴ன மோஹக்க²ந்த⁴ம், ஸீலக்க²ந்தே⁴ன தோ³ஸக்க²ந்த⁴ம், ஸமாதி⁴க்க²ந்தே⁴ன ச லோப⁴க்க²ந்த⁴ம் பதா³லேந்தோ அதி⁴பஞ்ஞாஸிக்கா²ய பஞ்ஞாஸம்பத³ம், அதி⁴ஸீலஸிக்கா²ய ஸீலஸம்பத³ம், அதி⁴சித்தஸிக்கா²ய ஸமாதி⁴ஸம்பத³ந்தி திஸ்ஸோ ஸம்பத்தியோ பத்வா அமதம் நிப்³பா³னம் ஸச்சி²கரோதி, ஆதி³மஜ்ஜ²பரியோஸானகல்யாணம் ஸத்ததிம்ஸபோ³தி⁴பக்கி²யத⁴ம்மரதனவிசித்தம் ஸம்மத்தனியாமஸங்கா²தம் அரியபூ⁴மிஞ்ச ஓக்கந்தோ ஹோதீதி.

ஸுத்தந்தபா⁴ஜனீயவண்ணனா.