2. ஸமுத³யஸச்சனித்³தே³ஸவண்ணனா

203. ஸமுத³யஸச்சநித்³தே³ஸே யாயம் தண்ஹாதி யா அயம் தண்ஹா. போனோப்³ப⁴விகாதி புனப்³ப⁴வகரணம் புனோப்³ப⁴வோ, புனோப்³ப⁴வோ ஸீலமஸ்ஸாதி போனோப்³ப⁴விகா. அபிச புனப்³ப⁴வம் தே³தி, புனப்³ப⁴வாய ஸம்வத்ததி, புனப்புனம் ப⁴வே நிப்³ப³த்தேதீதி போனோப்³ப⁴விகா. ஸா பனேஸா புனப்³ப⁴வஸ்ஸ தா³யிகாபி அத்தி² அதா³யிகாபி, புனப்³ப⁴வாய ஸம்வத்தனிகாபி அத்தி² அஸம்வத்தனிகாபி, தி³ன்னாய படிஸந்தி⁴யா உபதி⁴வேபக்கமத்தாபி. ஸா புனப்³ப⁴வம் த³த³மானாபி அத³த³மானாபி, புனப்³ப⁴வாய ஸம்வத்தமானாபி அஸம்வத்தமானாபி, தி³ன்னாய படிஸந்தி⁴யா உபதி⁴வேபக்கமத்தாபி போனோப்³ப⁴விகா ஏவாதி நாமம் லப⁴தி. அபி⁴னந்த³னஸங்கா²தேன நந்தி³ராகே³ன ஸஹக³தாதி நந்தி³ராக³ஸஹக³தா, நந்தி³ராகே³ன ஸத்³தி⁴ம் அத்த²தோ ஏகத்தமேவ க³தாதி வுத்தம் ஹோதி. தத்ரதத்ராபி⁴னந்தி³னீதி யத்ர யத்ர அத்தபா⁴வோ தத்ரதத்ராபி⁴னந்தி³னீ, ரூபாதீ³ஸு வா ஆரம்மணேஸு தத்ரதத்ராபி⁴னந்தி³னீ; ரூபாபி⁴னந்தி³னீ ஸத்³த³க³ந்த⁴ரஸபோ²ட்ட²ப்³ப³த⁴ம்மாபி⁴னந்தி³னீதி அத்தோ². ஸேய்யதி²த³ந்தி நிபாதோ; தஸ்ஸ ஸா கதமாதி சேதி அத்தோ². காமதண்ஹாதி காமே தண்ஹா காமதண்ஹா; பஞ்சகாமகு³ணிகராக³ஸ்ஸேதம் அதி⁴வசனம். ப⁴வே தண்ஹா ப⁴வதண்ஹா; ப⁴வபத்த²னாவஸேன உப்பன்னஸ்ஸ ஸஸ்ஸததி³ட்டி²ஸஹக³தஸ்ஸ ரூபாரூபப⁴வராக³ஸ்ஸ ச ஜா²னனிகந்தியா சேதம் அதி⁴வசனம். விப⁴வே தண்ஹா விப⁴வதண்ஹா; உச்சே²த³தி³ட்டி²ஸஹக³தஸ்ஸ ராக³ஸ்ஸேதம் அதி⁴வசனம்.

இதா³னி தஸ்ஸா தண்ஹாய வத்து²ம் வித்தா²ரதோ த³ஸ்ஸேதும் ஸா கோ² பனேஸாதிஆதி³மாஹ. தத்த² உப்பஜ்ஜதீதி ஜாயதி. நிவிஸதீதி புனப்புனம் பவத்திவஸேன பதிட்ட²ஹதி. யம் லோகே பியரூபம் ஸாதரூபந்தி யம் லோகஸ்மிம் பியஸபா⁴வஞ்சேவ மது⁴ரஸபா⁴வஞ்ச. சக்கு²ம் லோகேதிஆதீ³ஸு லோகஸ்மிஞ்ஹி சக்கா²தீ³ஸு மமத்தேன அபி⁴னிவிட்டா² ஸத்தா ஸம்பத்தியம் பதிட்டி²தா அத்தனோ சக்கு²ம் ஆதா³ஸாதீ³ஸு நிமித்தக்³க³ஹணானுஸாரேன விப்பஸன்னபஞ்சபஸாத³ம் ஸுவண்ணவிமானே உக்³கா⁴டிதமணிஸீஹபஞ்ஜரம் விய மஞ்ஞந்தி, ஸோதம் ரஜதபனாளிகம் விய பாமங்க³ஸுத்தகம் விய ச மஞ்ஞந்தி, துங்க³னாஸாதி லத்³த⁴வோஹாரம் கா⁴னம் வட்டேத்வா ட²பிதஹரிதாலவட்டிம் விய மஞ்ஞந்தி, ஜிவ்ஹம் ரத்தகம்ப³லபடலம் விய முது³ஸினித்³த⁴மது⁴ரரஸத³ம் மஞ்ஞந்தி, காயம் ஸாலலட்டி²ம் விய ஸுவண்ணதோரணம் விய ச மஞ்ஞந்தி, மனம் அஞ்ஞேஸம் மனேன அஸதி³ஸம் உளாரம் மஞ்ஞந்தி, ரூபம் ஸுவண்ணகணிகாரபுப்பா²தி³வண்ணம் விய, ஸத்³த³ம் மத்தகரவீககோகிலமந்த³த⁴மிதமணிவம்ஸனிக்³கோ⁴ஸம் விய, அத்தனா படிலத்³தா⁴னி சதுஸமுட்டா²னிகக³ந்தா⁴ரம்மணாதீ³னி ‘கஸ்ஸ அஞ்ஞஸ்ஸ ஏவரூபானி அத்தீ²’தி மஞ்ஞந்தி. தேஸம் ஏவம் மஞ்ஞமானானம் தானி சக்கா²தீ³னி பியரூபானி சேவ ஹோந்தி ஸாதரூபானி ச. அத² நேஸம் தத்த² அனுப்பன்னா சேவ தண்ஹா உப்பஜ்ஜதி, உப்பன்னா ச புனப்புனம் பவத்திவஸேன நிவிஸதி. தஸ்மா ப⁴க³வா – ‘‘சக்கு²ம் லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதீ’’திஆதி³மாஹ. தத்த² உப்பஜ்ஜமானாதி யதா³ உப்பஜ்ஜதி ததா³ ஏத்த² உப்பஜ்ஜதீதி அத்தோ². ஏஸ நயோ ஸப்³ப³த்தா²பீதி.

ஸமுத³யஸச்சனித்³தே³ஸவண்ணனா நிட்டி²தா.