2. ஆயதனவிப⁴ங்கோ³

1. ஸுத்தந்தபா⁴ஜனீயவண்ணனா

154. இதா³னி தத³னந்தரே ஆயதனவிப⁴ங்க³னித்³தே³ஸே ஸுத்தந்தபா⁴ஜனீயம் தாவ த³ஸ்ஸேந்தோ த்³வாத³ஸாயதனானி சக்கா²யதனம் ரூபாயதனந்திஆதி³மாஹ. தத்த² பாளிமுத்தகேன தாவ நயேன –

அத்த²லக்க²ணதாவத்வ, கமஸங்கே²பவித்தா²ரா;

ததா² த³ட்ட²ப்³ப³தோ சேவ, விஞ்ஞாதப்³போ³ வினிச்ச²யோ.

தத்த² விஸேஸதோ தாவ சக்க²தீதி சக்கு²; ரூபம் அஸ்ஸாதே³தி, விபா⁴வேதி சாதி அத்தோ². ரூபயதீதி ரூபம்; வண்ணவிகாரம் ஆபஜ்ஜமானம் ஹத³யங்க³தபா⁴வம் பகாஸேதீதி அத்தோ². ஸுணாதீதி ஸோதம். ஸப்பதீதி ஸத்³தோ³; உதா³ஹரியதீதி அத்தோ². கா⁴யதீதி கா⁴னம். க³ந்த⁴யதீதி க³ந்தோ⁴; அத்தனோ வத்து²ம் ஸூசயதீதி அத்தோ². ஜீவிதம் அவ்ஹாயதீதி ஜிவ்ஹா. ரஸந்தி தம் ஸத்தாதி ரஸோ; அஸ்ஸாதே³ந்தீதி அத்தோ². குச்சி²தானம் ஸாஸவத⁴ம்மானம் ஆயோதி காயோ. ஆயோதி உப்பத்திதே³ஸோ. பு²ஸீயதீதி போ²ட்ட²ப்³ப³ம். மனதீதி மனோ. அத்தனோ லக்க²ணம் தா⁴ரயந்தீதி த⁴ம்மா.

அவிஸேஸதோ பன ஆயதனதோ, ஆயானம் தனனதோ, ஆயதஸ்ஸ ச நயனதோ ஆயதனந்தி வேதி³தப்³ப³ம். சக்கு²ரூபாதீ³ஸு ஹி தம்தம்த்³வாராரம்மணா சித்தசேதஸிகா த⁴ம்மா ஸேன ஸேன அனுப⁴வனாதி³னா கிச்சேன ஆயதந்தி உட்ட²ஹந்தி க⁴ட்டேந்தி வாயமந்தீதி வுத்தம் ஹோதி. தே ச பன ஆயபூ⁴தே த⁴ம்மே ஏதானி தனோந்தி வித்தா²ரேந்தீதி வுத்தம் ஹோதி. இத³ஞ்ச அனமதக்³கே³ ஸம்ஸாரே பவத்தம் அதீவ ஆயதம் ஸம்ஸாரது³க்க²ம் யாவ ந நிவத்ததி தாவ நயந்தேவ, பவத்தயந்தீதி வுத்தம் ஹோதி. இதி ஸப்³பே³பி மே த⁴ம்மா ஆயதனதோ ஆயானம் தனனதோ ஆயதஸ்ஸ ச நயனதோ ‘ஆயதனம் ஆயதன’ந்தி வுச்சந்தி.

அபிச நிவாஸட்டா²னட்டே²ன, ஆகரட்டே²ன, ஸமோஸரணட்டா²னட்டே²ன, ஸஞ்ஜாதிதே³ஸட்டே²ன, காரணட்டே²ன ச ஆயதனம் வேதி³தப்³ப³ம். ததா² ஹி லோகே ‘‘இஸ்ஸராயதனம் வாஸுதே³வாயதன’’ந்திஆதீ³ஸு நிவாஸட்டா²னம் ஆயதனந்தி வுச்சதி. ‘‘ஸுவண்ணாயதனம் ரஜதாயதன’’ந்திஆதீ³ஸு ஆகரோ. ஸாஸனே பன ‘‘மனோரமே ஆயதனே ஸேவந்தி நம் விஹங்க³மா’’திஆதீ³ஸு (அ. நி. 5.38) ஸமோஸரணட்டா²னம். ‘‘த³க்கி²ணாபதோ² கு³ன்னம் ஆயதன’’ந்திஆதீ³ஸு ஸஞ்ஜாதிதே³ஸோ. ‘‘தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதிஆயதனே’’திஆதீ³ஸு (அ. நி. 5.23) காரணம்.

சக்கு²ரூபாதீ³ஸு சாபி தே தே சித்தசேதஸிகா த⁴ம்மா நிவஸந்தி ததா³யத்தவுத்திதாயாதி சக்கா²த³யோ நேஸம் நிவாஸனட்டா²னம். சக்கா²தீ³ஸு ச தே ஆகிண்ணா தம் நிஸ்ஸிதத்தா ததா³ரம்மணத்தா சாதி சக்கா²த³யோ நேஸம் ஆகரோ. சக்கா²த³யோ ச நேஸம் ஸமோஸரணட்டா²னம், தத்த² தத்த² வத்து²த்³வாராரம்மணவஸேன ஸமோஸரணதோ. சக்கா²த³யோ ச நேஸம் ஸஞ்ஜாதிதே³ஸோ; தம் நிஸ்ஸயாரம்மணபா⁴வேன தத்தே²வ உப்பத்திதோ. சக்கா²த³யோ ச நேஸம் காரணம், தேஸம் அபா⁴வே அபா⁴வதோதி. இதி நிவாஸட்டா²னட்டே²ன, ஆகரட்டே²ன, ஸமோஸரணட்டா²னட்டே²ன, ஸஞ்ஜாதிதே³ஸட்டே²ன, காரணட்டே²னாதி இமேஹி காரணேஹி ஏதே த⁴ம்மா ‘ஆயதனம் ஆயதன’ந்தி வுச்சந்தி. தஸ்மா யதா²வுத்தேனத்தே²ன சக்கு² ச தம் ஆயதனஞ்சாதி சக்கா²யதனம்…பே… த⁴ம்மா ச தே ஆயதனஞ்சாதி த⁴ம்மாயதனந்தி ஏவம் தாவேத்த² ‘அத்த²தோ’ விஞ்ஞாதப்³போ³ வினிச்ச²யோ.

‘லக்க²ணதோ’தி சக்கா²தீ³னம் லக்க²ணதோபேத்த² விஞ்ஞாதப்³போ³ வினிச்ச²யோ. தானி ச பன நேஸம் லக்க²ணானி ஹேட்டா² ரூபகண்ட³னித்³தே³ஸே வுத்தனயேனேவ வேதி³தப்³பா³னி.

‘தாவத்வதோ’தி தாவபா⁴வதோ. இத³ம் வுத்தம் ஹோதி – சக்கா²த³யோபி ஹி த⁴ம்மா ஏவ. ஏவம் ஸதி த⁴ம்மாயதனமிச்சேவ அவத்வா கஸ்மா த்³வாத³ஸாயதனானி வுத்தானீதி சே? ச² விஞ்ஞாணகாயுப்பத்தித்³வாராரம்மணவவத்தா²னதோ. இத⁴ ச²ன்னம் விஞ்ஞாணகாயானம் த்³வாரபா⁴வேன ஆரம்மணபா⁴வேன ச வவத்தா²னதோ அயமேவ தேஸம் பே⁴தோ³ ஹோதீதி த்³வாத³ஸ வுத்தானி. சக்கு²விஞ்ஞாணவீதி²பரியாபன்னஸ்ஸ ஹி விஞ்ஞாணகாயஸ்ஸ சக்கா²யதனமேவ உப்பத்தித்³வாரம், ரூபாயதனமேவ சாரம்மணம். ததா² இதரானி இதரேஸம். ச²ட்ட²ஸ்ஸ பன ப⁴வங்க³மனஸங்கா²தோ மனாயதனேகதே³ஸோவ உப்பத்தித்³வாரம், அஸாதா⁴ரணஞ்ச த⁴ம்மாயதனம் ஆரம்மணந்தி. இதி ச²ன்னம் விஞ்ஞாணகாயானம் உப்பத்தித்³வாராரம்மணவவத்தா²னதோ த்³வாத³ஸ வுத்தானீதி. ஏவமேத்த² ‘தாவத்வதோ’ விஞ்ஞாதப்³போ³ வினிச்ச²யோ.

‘கமதோ’தி இதா⁴பி புப்³பே³ வுத்தேஸு உப்பத்திக்கமாதீ³ஸு தே³ஸனாக்கமோவ யுஜ்ஜதி. அஜ்ஜ²த்திகேஸு ஹி ஆயதனேஸு ஸனித³ஸ்ஸனஸப்படிக⁴விஸயத்தா சக்கா²யதனம் பாகடந்தி பட²மம் தே³ஸிதம். ததோ அனித³ஸ்ஸனஸப்படிக⁴விஸயானி ஸோதாயதனாதீ³னி. அத² வா த³ஸ்ஸனானுத்தரியஸவனானுத்தரியஹேதுபா⁴வேன ப³ஹூபகாரத்தா அஜ்ஜ²த்திகேஸு சக்கா²யதனஸோதாயதனானி பட²மம் தே³ஸிதானி. ததோ கா⁴னாயதனாதீ³னி தீணி. பஞ்சன்னம்பி கோ³சரவிஸயத்தா அந்தே மனாயதனம். சக்கா²தீ³னம் பன கோ³சரத்தா தஸ்ஸ தஸ்ஸ அனந்தரானி பா³ஹிரேஸு ரூபாயதனாதீ³னி. அபிச விஞ்ஞாணுப்பத்திகாரணவவத்தா²னதோபி அயமேவ தேஸம் கமோ வேதி³தப்³போ³. வுத்தஞ்ஹேதம் ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம்…பே… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாண’’ந்தி (ம. நி. 3.421) ஏவம் ‘கமதோ’பேத்த² விஞ்ஞாதப்³போ³ வினிச்ச²யோ.

‘ஸங்கே²பவித்தா²ரா’தி ஸங்கே²பதோ ஹி மனாயதனஸ்ஸ சேவ த⁴ம்மாயதனேகதே³ஸஸ்ஸ ச நாமேன, தத³வஸேஸானஞ்ச ஆயதனானம் ரூபேன ஸங்க³ஹிதத்தா த்³வாத³ஸாபி ஆயதனானி நாமரூபமத்தமேவ ஹோந்தி.

வித்தா²ரதோ பன அஜ்ஜ²த்திகேஸு தாவ சக்கா²யதனம் ஜாதிவஸேன சக்கு²பஸாத³மத்தமேவ, பச்சயக³தினிகாயபுக்³க³லபே⁴த³தோ பன அனந்தப்பபே⁴த³ம். ததா² ஸோதாயதனாதீ³னி சத்தாரி. மனாயதனம் தேபூ⁴மககுஸலாகுஸலவிபாககிரியவிஞ்ஞாணபே⁴தே³ன ஏகாஸீதிப்பபே⁴த³ம், வத்து²படிபதா³தி³பே⁴த³தோ பன அனந்தப்பபே⁴த³ம். ரூபக³ந்த⁴ரஸாயதனானி ஸமுட்டா²னபே⁴த³தோ சதுப்பபே⁴தா³னி, ஸத்³தா³யதனம் த்³விப்பபே⁴த³ம். ஸபா⁴க³விஸபா⁴க³பே⁴த³தோ பன ஸப்³பா³னிபி அனந்தப்பபே⁴தா³னி. போ²ட்ட²ப்³பா³யதனம் பத²வீதா⁴துதேஜோதா⁴துவாயோதா⁴துவஸேன திப்பபே⁴த³ம், ஸமுட்டா²னதோ சதுப்பபே⁴த³ம், ஸபா⁴க³விஸபா⁴க³தோ அனேகப்பபே⁴த³ம். த⁴ம்மாயதனம் தேபூ⁴மகத⁴ம்மாரம்மணவஸேன அனேகப்பபே⁴த³ந்தி. ஏவம் ஸங்கே²பவித்தா²ரா விஞ்ஞாதப்³போ³ வினிச்ச²யோ.

‘த³ட்ட²ப்³ப³தோ’தி ஏத்த² பன ஸப்³பா³னேவேதானி ஆயதனானி அனாக³மனதோ அனிக்³க³மனதோ ச த³ட்ட²ப்³பா³னி. ந ஹி தானி புப்³பே³ உத³யா குதோசி ஆக³ச்ச²ந்தி, நாபி உத்³த⁴ம் வயா குஹிஞ்சி க³ச்ச²ந்தி; அத² கோ² புப்³பே³ உத³யா அப்படிலத்³த⁴ஸபா⁴வானி, உத்³த⁴ம் வயா பரிபி⁴ன்னஸபா⁴வானி, புப்³ப³ந்தாபரந்தவேமஜ்ஜே² பச்சயாயத்தவுத்திதாய அவஸானி பவத்தந்தி. தஸ்மா அனாக³மனதோ அனிக்³க³மனதோ ச த³ட்ட²ப்³பா³னி. ததா² நிரீஹதோ அப்³யாபாரதோ ச. ந ஹி சக்கு²ரூபாதீ³னம் ஏவம் ஹோதி – ‘அஹோ வத அம்ஹாகம் ஸாமக்³கி³யா விஞ்ஞாணம் நாம உப்பஜ்ஜேய்யா’தி, ந ச தானி விஞ்ஞாணுப்பாத³னத்த²ம் த்³வாரபா⁴வேன வத்து²பா⁴வேன ஆரம்மணபா⁴வேன வா ஈஹந்தி, ந ப்³யாபாரமாபஜ்ஜந்தி; அத² கோ² த⁴ம்மதாவேஸா யம் சக்கு²ரூபாதீ³னம் ஸாமக்³கி³யம் சக்கு²விஞ்ஞாணாதீ³னி ஸம்ப⁴வந்தி. தஸ்மா நிரீஹதோ அப்³யாபாரதோ ச த³ட்ட²ப்³பா³னி. அபிச அஜ்ஜ²த்திகானி ஸுஞ்ஞகா³மோ விய த³ட்ட²ப்³பா³னி து⁴வஸுப⁴ஸுக²த்தபா⁴வவிரஹிதத்தா, பா³ஹிரானி கா³மகா⁴தகசோரா விய அஜ்ஜ²த்திகானம் அபி⁴கா⁴தகத்தா. வுத்தஞ்ஹேதம் – ‘‘சக்கு², பி⁴க்க²வே, ஹஞ்ஞதி மனாபாமனாபேஹி ரூபேஹீதி வித்தா²ரோ. அபிச அஜ்ஜ²த்திகானி ச² பாணகா விய த³ட்ட²ப்³பா³னி, பா³ஹிரானி தேஸம் கோ³சரா வியாதி. ஏவம்பேத்த² ‘த³ட்ட²ப்³ப³தோ’ விஞ்ஞாதப்³போ³ வினிச்ச²யோதி.

இதா³னி தேஸம் விபஸ்ஸிதப்³பா³காரம் த³ஸ்ஸேதும் சக்கு²ம் அனிச்சந்திஆதி³ ஆரத்³த⁴ம். தத்த² சக்கு² தாவ ஹுத்வா அபா⁴வட்டே²ன அனிச்சந்தி வேதி³தப்³ப³ம். அபரேஹிபி சதூஹி காரணேஹி அனிச்சம் – உப்பாத³வயவந்ததோ, விபரிணாமதோ, தாவகாலிகதோ, நிச்சபடிக்கே²பதோதி.

ததே³வ படிபீளனட்டே²ன து³க்க²ம். யஸ்மா வா ஏதம் உப்பன்னம் டி²திம் பாபுணாதி, டி²தியம் ஜராய கிலமதி, ஜரம் பத்வா அவஸ்ஸம் பி⁴ஜ்ஜதி; தஸ்மா அபி⁴ண்ஹஸம்படிபீளனதோ, து³க்க²மதோ, து³க்க²வத்து²தோ, ஸுக²படிக்கே²பதோதி இமேஹி சதூஹி காரணேஹி து³க்க²ம்.

அவஸவத்தனட்டே²ன பன அனத்தா. யஸ்மா வா ஏதம் உப்பன்னம் டி²திம் மா பாபுணாது, டா²னப்பத்தம் மா ஜிரது, ஜரப்பதம் மா பி⁴ஜ்ஜதூதி இமேஸு தீஸு டா²னேஸு கஸ்ஸசி வஸவத்திபா⁴வோ நத்தி², ஸுஞ்ஞம் தேன வஸவத்தனாகாரேன; தஸ்மா ஸுஞ்ஞதோ, அஸ்ஸாமிகதோ, அகாமகாரியதோ, அத்தபடிக்கே²பதோதி இமேஹி சதூஹி காரணேஹி அனத்தா.

விப⁴வக³திகதோ, புப்³பா³பரவஸேன ப⁴வஸங்கந்திக³மனதோ, பகதிபா⁴வவிஜஹனதோ ச விபரிணாமத⁴ம்மம். இத³ம் அனிச்சவேவசனமேவ. ரூபா அனிச்சாதிஆதீ³ஸுபி ஏஸேவ நயோ. அபிசேத்த² ட²பேத்வா சக்கு²ம் தேபூ⁴மகத⁴ம்மா அனிச்சா, நோ சக்கு². சக்கு² பன சக்கு² சேவ அனிச்சஞ்ச. ததா² ஸேஸத⁴ம்மா து³க்கா², நோ சக்கு². சக்கு² பன சக்கு² சேவ து³க்க²ஞ்ச. ஸேஸத⁴ம்மா அனத்தா, நோ சக்கு². சக்கு² பன சக்கு² சேவ அனத்தா சாதி. ரூபாதீ³ஸுபி ஏஸேவ நயோ.

இமஸ்மிம் பன ஸுத்தந்தபா⁴ஜனீயே ததா²க³தேன கிம் த³ஸ்ஸிதந்தி? த்³வாத³ஸன்னம் ஆயதனானம் அனத்தலக்க²ணம். ஸம்மாஸம்பு³த்³தோ⁴ ஹி அனத்தலக்க²ணம் த³ஸ்ஸேந்தோ அனிச்சேன வா த³ஸ்ஸேதி, து³க்கே²ன வா, அனிச்சது³க்கே²ஹி வா. தத்த² ‘‘சக்கு², அத்தாதி யோ வதே³ய்ய, தம் ந உபபஜ்ஜதி. சக்கு²ஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – சக்கு² அத்தாதி யோ வதே³ய்ய இதி சக்கு² அனத்தா’’தி (ம. நி. 3.422). இமஸ்மிம் ஸுத்தே அனிச்சேன அனத்தலக்க²ணம் த³ஸ்ஸேஸி. ‘‘ரூபம், பி⁴க்க²வே, அனத்தா. ரூபஞ்ச ஹித³ம், பி⁴க்க²வே, அத்தா அப⁴விஸ்ஸ, ந யித³ம் ரூபம் ஆபா³தா⁴ய ஸம்வத்தேய்ய; லப்³பே⁴த² ச ரூபே – ஏவம் மே ரூபம் ஹோது, ஏவம் மே ரூபம் மா அஹோஸீதி. யஸ்மா ச கோ², பி⁴க்க²வே, ரூபம் அனத்தா தஸ்மா ரூபம் ஆபா³தா⁴ய ஸம்வத்ததி; ந ச லப்³ப⁴தி ரூபே – ஏவம் மே ரூபம் ஹோது, ஏவம் மே ரூபம் மா அஹோஸீ’’தி (ஸம். நி. 3.59; மஹாவ. 20) இமஸ்மிம் ஸுத்தே து³க்கே²ன அனத்தலக்க²ணம் த³ஸ்ஸேஸி. ‘‘ரூபம், பி⁴க்க²வே, அனிச்சம், யத³னிச்சம் தம் து³க்க²ம், யம் து³க்க²ம் தத³னத்தா, யத³னத்தா தம் நேதம் மம, நேஸோஹமஸ்மி, ந மேஸோ அத்தா’’திஆதீ³ஸு (ஸம். நி. 3.15) அனிச்சது³க்கே²ஹி அனத்தலக்க²ணம் த³ஸ்ஸேஸி. கஸ்மா? அனிச்சது³க்கா²னம் பாகடத்தா.

ஹத்த²தோ ஹி தட்டகே வா ஸரகே வா கிஸ்மிஞ்சிதே³வ வா பதித்வா பி⁴ன்னே ‘அஹோ அனிச்ச’ந்தி வத³ந்தி. ஏவம் அனிச்சம் பாகடம் நாம. அத்தபா⁴வஸ்மிம் பன க³ண்ட³பிளகாதீ³ஸு வா உட்டி²தாஸு கா²ணுகண்டகாதீ³ஹி வா வித்³தா⁴ஸு ‘அஹோ து³க்க²’ந்தி வத³ந்தி. ஏவம் து³க்க²ம் பாகடம் நாம. அனத்தலக்க²ணம் அபாகடம் அந்த⁴காரம் அவிபூ⁴தம் து³ப்படிவிஜ்ஜ²ம் து³த்³தீ³பனம் து³ப்பஞ்ஞாபனம். அனிச்சது³க்க²லக்க²ணானி உப்பாதா³ வா ததா²க³தானம் அனுப்பாதா³ வா பஞ்ஞாயந்தி. அனத்தலக்க²ணம் வினா பு³த்³து⁴ப்பாதா³ ந பஞ்ஞாயதி, பு³த்³து⁴ப்பாதே³யேவ பஞ்ஞாயதி. மஹித்³தி⁴கா ஹி மஹானுபா⁴வா தாபஸபரிப்³பா³ஜகா ஸரப⁴ங்க³ஸத்தா²ராத³யோபி ‘அனிச்சம் து³க்க²’ந்தி வத்தும் ஸக்கோந்தி, ‘அனத்தா’தி வத்தும் ந ஸக்கோந்தி. ஸசே ஹி தே ஸம்பத்தபரிஸாய அனத்தாதி வத்தும் ஸக்குணேய்யும், ஸம்பத்தபரிஸாய மக்³க³ப²லபடிவேதோ⁴ ப⁴வேய்ய. அனத்தலக்க²ணபஞ்ஞாபனஞ்ஹி அஞ்ஞஸ்ஸ கஸ்ஸசி அவிஸயோ, ஸப்³ப³ஞ்ஞுபு³த்³தா⁴னமேவ விஸயோ. ஏவமேதம் அனத்தலக்க²ணம் அபாகடம். தஸ்மா ஸத்தா² அனத்தலக்க²ணம் த³ஸ்ஸேந்தோ அனிச்சேன வா த³ஸ்ஸேஸி, து³க்கே²ன வா, அனிச்சது³க்கே²ஹி வா. இத⁴ பன தம் அனிச்சது³க்கே²ஹி த³ஸ்ஸேஸீதி வேதி³தப்³ப³ம்.

இமானி பன லக்க²ணானி கிஸ்ஸ அமனஸிகாரா அப்படிவேதா⁴, கேன படிச்ச²ன்னத்தா, ந உபட்ட²ஹந்தி? அனிச்சலக்க²ணம் தாவ உத³யப்³ப³யானம் அமனஸிகாரா அப்படிவேதா⁴, ஸந்ததியா படிச்ச²ன்னத்தா, ந உபட்டா²தி. து³க்க²லக்க²ணம் அபி⁴ண்ஹஸம்படிபீளனஸ்ஸ அமனஸிகாரா அப்படிவேதா⁴, இரியாபதே²ஹி படிச்ச²ன்னத்தா, ந உபட்டா²தி. அனத்தலக்க²ணம் நானாதா⁴துவினிப்³போ⁴க³ஸ்ஸ அமனஸிகாரா அப்படிவேதா⁴, க⁴னேன படிச்ச²ன்னத்தா, ந உபட்டா²தி. உத³யப்³ப³யம் பன பரிக்³க³ஹேத்வா ஸந்ததியா விகோபிதாய அனிச்சலக்க²ணம் யாதா²வஸரஸதோ உபட்டா²தி. அபி⁴ண்ஹஸம்படிபீளனம் மனஸிகத்வா இரியாபதே² உக்³கா⁴டிதே து³க்க²லக்க²ணம் யாதா²வஸரஸதோ உபட்டா²தி. நானாதா⁴துயோ வினிப்³பு⁴ஜித்வா க⁴னவினிப்³போ⁴கே³ கதே அனத்தலக்க²ணம் யாதா²வஸரஸதோ உபட்டா²தி.

ஏத்த² ச அனிச்சம் அனிச்சலக்க²ணம், து³க்க²ம் து³க்க²லக்க²ணம், அனத்தா அனத்தலக்க²ணந்தி அயம் விபா⁴கோ³ வேதி³தப்³போ³. தத்த² அனிச்சந்தி க²ந்த⁴பஞ்சகம். கஸ்மா? உப்பாத³வயஞ்ஞத²த்தபா⁴வா, ஹுத்வா அபா⁴வதோ வா; உப்பாத³வயஞ்ஞத²த்தம் அனிச்சலக்க²ணம், ஹுத்வா அபா⁴வஸங்கா²தோ ஆகாரவிகாரோ வா. ‘‘யத³னிச்சம் தம் து³க்க²’’ந்தி வசனதோ பன ததே³வ க²ந்த⁴பஞ்சகம் து³க்க²ம். கஸ்மா? அபி⁴ண்ஹஸம்படிபீளனதோ; அபி⁴ண்ஹஸம்படிபீளனாகாரோ து³க்க²லக்க²ணம். ‘‘யம் து³க்க²ம் தம் அனத்தா’’தி பன வசனதோ ததே³வ க²ந்த⁴பஞ்சகம் அனத்தா. கஸ்மா? அவஸவத்தனதோ; அவஸவத்தனாகாரோ அனத்தலக்க²ணம். இதி அஞ்ஞதே³வ அனிச்சம் து³க்க²ம் அனத்தா, அஞ்ஞானி அனிச்சது³க்கா²னத்தலக்க²ணானி. பஞ்சக்க²ந்தா⁴, த்³வாத³ஸாயதனானி, அட்டா²ரஸ தா⁴துயோதி இத³ஞ்ஹி ஸப்³ப³ம்பி அனிச்சம் து³க்க²ம் அனத்தா நாம. வுத்தப்பகாராகாரவிகாரா அனிச்சது³க்கா²னத்தலக்க²ணானீதி.

ஸங்கே²பதோ பனேத்த² த³ஸாயதனானி காமாவசரானி, த்³வே தேபூ⁴மகானி. ஸப்³பே³ஸுபி ஸம்மஸனசாரோ கதி²தோதி வேதி³தப்³போ³.

ஸுத்தந்தபா⁴ஜனீயவண்ணனா.

2. அபி⁴த⁴ம்மபா⁴ஜனீயவண்ணனா

155. அபி⁴த⁴ம்மபா⁴ஜனீயே யதா² ஹேட்டா² விபஸ்ஸகானம் உபகாரத்தா²ய ‘‘சக்கா²யதனம் ரூபாயதன’’ந்தி யுக³லதோ ஆயதனானி வுத்தானி, ததா² அவத்வா அஜ்ஜ²த்திகபா³ஹிரானம் ஸப்³பா³காரதோ ஸபா⁴வத³ஸ்ஸனத்த²ம் ‘‘சக்கா²யதனம் ஸோதாயதன’’ந்தி ஏவம் அஜ்ஜ²த்திகபா³ஹிரவவத்தா²னனயேன வுத்தானி.

156. தேஸம் நித்³தே³ஸவாரே தத்த² கதமம் சக்கா²யதனந்திஆதீ³னி ஹேட்டா² வுத்தனயேனேவ வேதி³தப்³பா³னி.

167. யம் பனேதம் த⁴ம்மாயதனனித்³தே³ஸே ‘‘தத்த² கதமா அஸங்க²தா தா⁴து? ராக³க்க²யோ தோ³ஸக்க²யோ மோஹக்க²யோ’’தி வுத்தம், தத்ராயமத்தோ² – அஸங்க²தா தா⁴தூதி அஸங்க²தஸபா⁴வம் நிப்³பா³னம். யஸ்மா பனேதம் ஆக³ம்ம ராகா³த³யோ கீ²யந்தி, தஸ்மா ராக³க்க²யோ தோ³ஸக்க²யோ மோஹக்க²யோதி வுத்தம். அயமேத்த² ஆசரியானம் ஸமானத்த²கதா².

விதண்ட³வாதீ³ பனாஹ – ‘பாடியேக்கம் நிப்³பா³னம் நாம நத்தி², கிலேஸக்க²யோவ நிப்³பா³ன’ந்தி. ‘ஸுத்தம் ஆஹரா’தி ச வுத்தே ‘‘நிப்³பா³னம் நிப்³பா³னந்தி கோ², ஆவுஸோ ஸாரிபுத்த, வுச்சதி; கதமம் நு கோ², ஆவுஸோ, நிப்³பா³னந்தி? யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி நிப்³பா³ன’’ந்தி ஏதம் ஜம்பு³கா²த³கஸுத்தம் ஆஹரித்வா ‘இமினா ஸுத்தேன வேதி³தப்³ப³ம் பாடியேக்கம் நிப்³பா³னம் நாம நத்தி², கிலேஸக்க²யோவ நிப்³பா³ன’ந்தி ஆஹ. ஸோ வத்தப்³போ³ – ‘கிம் பன யதா² சேதம் ஸுத்தம் ததா² அத்தோ²’தி? அத்³தா⁴ வக்க²தி – ‘ஆம, நத்தி² ஸுத்ததோ முஞ்சித்வா அத்தோ²’தி. ததோ வத்தப்³போ³ – ‘இத³ம் தாவ தே ஸுத்தம் ஆப⁴தம்; அனந்தரஸுத்தம் ஆஹரா’தி. அனந்தரஸுத்தம் நாம – ‘‘அரஹத்தம் அரஹத்தந்தி, ஆவுஸோ ஸாரிபுத்த, வுச்சதி; கதமம் நு கோ², ஆவுஸோ, அரஹத்தந்தி? யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி அரஹத்த’’ந்தி (ஸம். நி. 4.315) இத³ம் தஸ்ஸேவானந்தரம் ஆப⁴தஸுத்தம்.

இமஸ்மிம் பன நம் ஆப⁴தே ஆஹம்ஸு – ‘நிப்³பா³னம் நாம த⁴ம்மாயதனபரியாபன்னோ த⁴ம்மோ, அரஹத்தம் சத்தாரோ க²ந்தா⁴. நிப்³பா³னம் ஸச்சி²கத்வா விஹரந்தோ த⁴ம்மஸேனாபதி நிப்³பா³னம் புச்சி²தோபி அரஹத்தம் புச்சி²தோபி கிலேஸக்க²யமேவ ஆஹ. கிம் பன நிப்³பா³னஞ்ச அரஹத்தஞ்ச ஏகம் உதா³ஹு நான’ந்தி? ‘ஏகம் வா ஹோது நானம் வா. கோ ஏத்த² தயா அதிப³ஹும் சுண்ணீகரணம் கரோந்தேன அத்தோ²’? ‘ந த்வம் ஏகம் நானம் ஜானாஸீதி. நனு ஞாதே ஸாது⁴ ஹோதீ’தி ஏவம் புனப்புனம் புச்சி²தோ வஞ்சேதும் அஸக்கோந்தோ ஆஹ – ‘ராகா³தீ³னம் கீ²ணந்தே உப்பன்னத்தா அரஹத்தம் ராக³க்க²யோ தோ³ஸக்க²யோ மோஹக்க²யோ’தி வுச்சதீதி. ததோ நம் ஆஹம்ஸு – ‘மஹாகம்மம் தே கதம். லஞ்ஜம் த³த்வாபி தம் வதா³பேந்தோ ஏததே³வ வதா³பேய்ய. யதே²வ ச தே ஏதம் விப⁴ஜித்வா கதி²தம், ஏவம் இத³ம்பி ஸல்லக்கே²ஹி – நிப்³பா³னஞ்ஹி ஆக³ம்ம ராகா³த³யோ கீ²ணாதி நிப்³பா³னம் ராக³க்க²யோ தோ³ஸக்க²யோ மோஹக்க²யோதி வுத்தம். தீணிபி ஹி ஏதானி நிப்³பா³னஸ்ஸேவ அதி⁴வசனானீ’தி.

ஸசே ஏவம் வுத்தே ஸஞ்ஞத்திம் க³ச்ச²தி இச்சேதம் குஸலம்; நோ சே, ப³ஹுனிப்³பா³னதாய காரேதப்³போ³. கத²ம்? ஏவம் தாவ புச்சி²தப்³போ³ – ‘ராக³க்க²யோ நாம ராக³ஸ்ஸேவ க²யோ உதா³ஹு தோ³ஸமோஹானம்பி? தோ³ஸக்க²யோ நாம தோ³ஸஸ்ஸேவ க²யோ உதா³ஹு ராக³மோஹானம்பி? மோஹக்க²யோ நாம மோஹஸ்ஸேவ க²யோ உதா³ஹு ராக³தோ³ஸானம்பீ’தி? அத்³தா⁴ வக்க²தி – ‘ராக³க்க²யோ நாம ராக³ஸ்ஸேவ க²யோ, தோ³ஸக்க²யோ நாம தோ³ஸஸ்ஸேவ க²யோ, மோஹக்க²யோ நாம மோஹஸ்ஸேவ க²யோ’தி.

ததோ வத்தப்³போ³ – ‘தவ வாதே³ ராக³க்க²யோ ஏகம் நிப்³பா³னம் ஹோதி, தோ³ஸக்க²யோ ஏகம், மோஹக்க²யோ ஏகம்; திண்ணம் அகுஸலமூலானம் க²யே தீணி நிப்³பா³னானி ஹோந்தி, சதுன்னம் உபாதா³னானம் க²யே சத்தாரி, பஞ்சன்னம் நீவரணானம் க²யே பஞ்ச, ச²ன்னம் தண்ஹாகாயானம் க²யே ச², ஸத்தன்னம் அனுஸயானம் க²யே ஸத்த, அட்ட²ன்னம் மிச்ச²த்தானம் க²யே அட்ட², நவன்னம் தண்ஹாமூலகத⁴ம்மானம் க²யே நவ, த³ஸன்னம் ஸம்யோஜனானம் க²யே த³ஸ, தி³யட்³ட⁴கிலேஸஸஹஸ்ஸஸ்ஸ க²யே பாடியேக்கம் பாடியேக்கம் நிப்³பா³னந்தி ப³ஹூனி நிப்³பா³னானி ஹோந்தி. நத்தி² பன தே நிப்³பா³னானம் பமாணந்தி. ஏவம் பன அக்³க³ஹேத்வா நிப்³பா³னம் ஆக³ம்ம ராகா³த³யோ கீ²ணாதி ஏகமேவ நிப்³பா³னம் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.

ஸசே பன ஏவம் வுத்தேபி ந ஸல்லக்கே²தி, ஓளாரிகதாய காரேதப்³போ³. கத²ம்? ‘அந்த⁴பா³லா ஹி அச்ச²தீ³பிமிக³மக்கடாத³யோபி கிலேஸபரியுட்டி²தா வத்து²ம் படிஸேவந்தி. அத² நேஸம் படிஸேவனபரியந்தே கிலேஸோ வூபஸம்மதி. தவ வாதே³ அச்ச²தீ³பிமிக³மக்கடாத³யோ நிப்³பா³னப்பத்தா நாம ஹோந்தி. ஓளாரிகம் வத தே நிப்³பா³னம் தூ²லம், கண்ணேஹி பிளந்தி⁴தும் ந ஸக்காதி. ஏவம் பன அக்³க³ஹேத்வா நிப்³பா³னம் ஆக³ம்ம ராகா³த³யோ கீ²ணாதி ஏகமேவ நிப்³பா³னம் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.

ஸசே பன ஏவம் வுத்தேபி ந ஸல்லக்கே²தி, கோ³த்ரபு⁴னாபி காரேதப்³போ³. கத²ம்? ஏவம் தாவ புச்சி²தப்³போ³ – ‘த்வம் கோ³த்ரபு⁴ நாம அத்தீ²தி வதே³ஸீ’தி? ‘ஆம வதா³மீ’தி. ‘கோ³த்ரபு⁴க்க²ணே கிலேஸா கீ²ணா, கீ²யந்தி, கீ²யிஸ்ஸந்தீ’தி? ந கீ²ணா, ந கீ²யந்தி; அபிச கோ² கீ²யிஸ்ஸந்தீதி. ‘கோ³த்ரபு⁴ பன கிம் ஆரம்மணம் கரோதீ’தி? ‘நிப்³பா³னம்’. ‘தவ கோ³த்ரபு⁴க்க²ணே கிலேஸா ந கீ²ணா, ந கீ²யந்தி; அத² கோ² கீ²யிஸ்ஸந்தி. த்வம் அகீ²ணேஸுயேவ கிலேஸேஸு கிலேஸக்க²யம் நிப்³பா³னம் பஞ்ஞபேஸி, அப்பஹீனேஸு அனுஸயேஸு அனுஸயப்பஹானம் நிப்³பா³னம் பஞ்ஞபேஸி. தம் தே ந ஸமேதி. ஏவம் பன அக்³க³ஹேத்வா நிப்³பா³னம் ஆக³ம்ம ராகா³த³யோ கீ²ணாதி ஏகமேவ நிப்³பா³னம் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.

ஸசே பன ஏவம் வுத்தேபி ந ஸல்லக்கே²தி, மக்³கே³ன காரேதப்³போ³. கத²ம்? ஏவம் தாவ புச்சி²தப்³போ³ – ‘த்வம் மக்³க³ம் நாம வதே³ஸீ’தி? ‘ஆம வதே³மீ’தி. ‘மக்³க³க்க²ணே கிலேஸா கீ²ணா, கீ²யந்தி, கி²யிஸ்ஸந்தீ’தி? ஜானமானோ வக்க²தி – ‘கீ²ணாதி வா கீ²யிஸ்ஸந்தீதி வா வத்தும் ந வட்டதி, கீ²யந்தீதி வத்தும் வட்டதீ’தி. ‘யதி³ ஏவம், மக்³க³ஸ்ஸ கிலேஸக்க²யம் நிப்³பா³னம் கதமம்? மக்³கே³ன கீ²யனககிலேஸா கதமே? மக்³கோ³ கதமம் கிலேஸக்க²யம் நிப்³பா³னம் ஆரம்மணம் கத்வா கதமே கிலேஸே கே²பேதி? தஸ்மா மா ஏவம் க³ண்ஹ. நிப்³பா³னம் பன ஆக³ம்ம ராகா³த³யோ கீ²ணாதி ஏகமேவ நிப்³பா³னம் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீ’தி.

ஏவம் வுத்தே ஏவமாஹ – ‘த்வம் ஆக³ம்ம ஆக³ம்மாதி வதே³ஸீ’தி? ‘ஆம வதே³மீ’தி. ‘ஆக³ம்ம நாமாதி இத³ம் தே குதோ லத்³த⁴’ந்தி? ‘ஸுத்ததோ லத்³த⁴’ந்தி. ‘ஆஹர ஸுத்த’ந்தி. ‘‘ஏவம் அவிஜ்ஜா ச தண்ஹா ச தம் ஆக³ம்ம, தம்ஹி கீ²ணா, தம்ஹி ப⁴க்³கா³, ந ச கிஞ்சி கதா³சீ’’தி. ஏவம் வுத்தே பரவாதீ³ துண்ஹீபா⁴வம் ஆபன்னோதி.

இதா⁴பி த³ஸாயதனானி காமாவசரானி, த்³வே பன சதுபூ⁴மகானி லோகியலோகுத்தரமிஸ்ஸகானீதி வேதி³தப்³பா³னி.

அபி⁴த⁴ம்மபா⁴ஜனீயவண்ணனா.

3. பஞ்ஹாபுச்ச²கவண்ணனா

168. இதா⁴பி பஞ்ஹாபுச்ச²கே யம் லப்³ப⁴தி யஞ்ச ந லப்³ப⁴தி, தம் ஸப்³ப³ம் புச்சி²த்வா லப்³ப⁴மானவஸேனேவ விஸ்ஸஜ்ஜனம் வுத்தம்; ந கேவலஞ்ச இத⁴, ஸப்³பே³ஸுபி பஞ்ஹாபுச்ச²கேஸு ஏஸேவ நயோ. இத⁴ பன த³ஸன்னம் ஆயதனானம் ரூபபா⁴வேன அப்³யாகததா வேதி³தப்³பா³. த்³வின்னம் ஆயதனானம் க²ந்த⁴விப⁴ங்கே³ சதுன்னம் க²ந்தா⁴னம் விய குஸலாதி³பா⁴வோ வேதி³தப்³போ³. கேவலஞ்ஹி சத்தாரோ க²ந்தா⁴ ஸப்பச்சயாவ ஸங்க²தாவ த⁴ம்மாயதனம் பன ‘‘ஸியா அப்பச்சயம், ஸியா அஸங்க²த’’ந்தி ஆக³தம். ஆரம்மணத்திகேஸு ச அனாரம்மணம் ஸுகு²மரூபஸங்கா²தம் த⁴ம்மாயதனம் ந-வத்தப்³ப³கோட்டா²ஸம் ப⁴ஜதி. தஞ்ச கோ² அனாரம்மணத்தா ந பரித்தாதி³பா⁴வேன நவத்தப்³ப³த⁴ம்மாரம்மணத்தாதி அயமேத்த² விஸேஸோ. ஸேஸம் தாதி³ஸமேவ. இதா⁴பி ஹி சத்தாரோ க²ந்தா⁴ விய த்³வாயதனா பஞ்சபண்ணாஸ காமாவசரத⁴ம்மே ஆரப்³ப⁴ ரஜ்ஜந்தஸ்ஸ து³ஸ்ஸந்தஸ்ஸ முய்ஹந்தஸ்ஸ ஸம்வரந்தஸ்ஸ ஸம்மஸந்தஸ்ஸ பச்சவேக்க²ந்தஸ்ஸ ச பரித்தாரம்மணாதி ஸப்³ப³ம் க²ந்தே⁴ஸு வுத்தஸதி³ஸமேவாதி.

ஸம்மோஹவினோத³னியா விப⁴ங்க³ட்ட²கதா²ய

ஆயதனவிப⁴ங்க³வண்ணனா நிட்டி²தா.