18. த⁴ம்மஹத³யவிப⁴ங்கோ³

1. ஸப்³ப³ஸங்கா³ஹிகவாரவண்ணனா

978. இதா³னி தத³னந்தரே த⁴ம்மஹத³யவிப⁴ங்கே³ பாளிபரிச்சே²தோ³ தாவ ஏவம் வேதி³தப்³போ³ – ஏத்த² ஹி ஆதி³தோவ க²ந்தா⁴தீ³னம் த்³வாத³ஸன்னம் கோட்டா²ஸானம் வஸேன ஸப்³ப³ஸங்கா³ஹிகவாரோ நாம வுத்தோ. து³தியோ தேஸம்யேவ த⁴ம்மானம் காமதா⁴துஆதீ³ஸு உப்பத்தானுப்பத்தித³ஸ்ஸனவாரோ நாம. ததியோ தத்தே²வ பரியாபன்னாபரியாபன்னத³ஸ்ஸனவாரோ நாம. சதுத்தோ² தீஸு பூ⁴மீஸு உப்பத்திக்க²ணே விஜ்ஜமானாவிஜ்ஜமானத⁴ம்மத³ஸ்ஸனவாரோ நாம. பஞ்சமோ தேஸம் த⁴ம்மானம் பூ⁴மந்தரவஸேன த³ஸ்ஸனவாரோ நாம. ச²ட்டோ² க³தீஸு உப்பாத³ககம்மஆயுப்பமாணத³ஸ்ஸனவாரோ நாம. ஸத்தமோ அபி⁴ஞ்ஞேய்யாதி³வாரோ நாம. அட்ட²மோ ஸாரம்மணானாரம்மணவாரோ நாம. நவமோ தேஸம் க²ந்தா⁴தி³த⁴ம்மானம் தி³ட்ட²ஸுதாதி³வஸேன ஸங்க³ஹேத்வா த³ஸ்ஸனவாரோ நாம. த³ஸமோ குஸலத்திகாதி³வஸேன ஸங்க³ஹேத்வா த³ஸ்ஸனவாரோ நாம.

979. ஏவம் த³ஸஹி வாரேஹி பரிச்சி²ன்னாய பாளியா பட²மே தாவ ஸப்³ப³ஸங்கா³ஹிகவாரே ‘‘அவீசிதோ யாவ ப⁴வக்³க³ம் ஏத்த²ந்தரே கதி க²ந்தா⁴’’தி புச்சி²தே ‘‘ஏகோதி வா…பே… சத்தாரோதி வா சா²தி வா அவத்வா பஞ்சாதி வத்தும் ஸமத்தோ² அஞ்ஞோ நத்தீ²’’தி அத்தனோ ஞாணப³லம் தீ³பேந்தோ பஞ்சக்க²ந்தா⁴தி புச்சா²னுரூபம் விஸ்ஸஜ்ஜனம் ஆஹ. யதா²புச்ச²ம் விஸ்ஸஜ்ஜனஞ்ஹி ஸப்³ப³ஞ்ஞுப்³யாகரணம் நாமாதி வுச்சதி. த்³வாத³ஸாயதனானீதிஆதீ³ஸுபி ஏஸேவ நயோ. ரூபக்க²ந்தா⁴தீ³னம் பபே⁴தோ³ க²ந்த⁴விப⁴ங்கா³தீ³ஸு வுத்தனயேனேவ வேதி³தப்³போ³.

2. உப்பத்தானுப்பத்திவாரவண்ணனா

991. து³தியவாரே யே த⁴ம்மா காமப⁴வே காமதா⁴துஸம்பூ⁴தானஞ்ச ஸத்தானம் உப்பஜ்ஜந்தி – காமதா⁴துயம் பரியாபன்னா வா அபரியாபன்னா வா – தே ஸப்³பே³ ஸங்க³ஹேத்வா காமதா⁴துயா பஞ்சக்க²ந்தா⁴திஆதி³ வுத்தம். ரூபதா⁴துஆதீ³ஸுபி ஏஸேவ நயோ. யஸ்மா பன ரூபதா⁴துபரியாபன்னானம் ஸத்தானம் கா⁴னாயதனாதீ³னம் அபா⁴வேன க³ந்தா⁴யதனாதீ³னி ஆயதனாதி³கிச்சம் ந கரோந்தி, தஸ்மா ரூபதா⁴துயா ச² ஆயதனானி, நவ தா⁴துயோதிஆதி³ வுத்தம். யஸ்மா ச ஓகாஸவஸேன வா ஸத்துப்பத்திவஸேன வா அபரியாபன்னதா⁴து நாம நத்தி², தஸ்மா அபரியாபன்னதா⁴துயாதி அவத்வா யம் யம் அபரியாபன்னம் தம் ததே³வ த³ஸ்ஸேதும் அபரியாபன்னே கதி க²ந்தா⁴திஆதி³ வுத்தம்.

3. பரியாபன்னாபரியாபன்னவாரவண்ணனா

999. ததியவாரே காமதா⁴துபரியாபன்னாதி காமதா⁴துப⁴ஜனட்டே²ன பரியாபன்னா; தம்னிஸ்ஸிதா தத³ந்தோக³தா⁴ காமதா⁴துத்வேவ ஸங்க²ம் க³தாதி அத்தோ². ஸேஸபதே³ஸுபி ஏஸேவ நயோ. பரியாபன்னாதி ப⁴வவஸேன ஓகாஸவஸேன ச பரிச்சி²ன்னா. அபரியாபன்னாதி ததா² அபரிச்சி²ன்னா.

4. த⁴ம்மத³ஸ்ஸனவாரவண்ணனா

1007. சதுத்த²வாரே ஏகாத³ஸாயதனானீதி ஸத்³தா³யதனவஜ்ஜானி. தஞ்ஹி ஏகந்தேன படிஸந்தி⁴யம் நுப்பஜ்ஜதி. இமினா நயேன ஸப்³ப³த்த² அத்தோ² வேதி³தப்³போ³. ஸத்தகே ‘‘தே³வானம் அஸுரான’’ந்தி க³திவஸேன அவத்வா அவிஸேஸேன க³ப்³ப⁴ஸேய்யகானந்தி வுத்தம். தஸ்மா யத்த² யத்த² க³ப்³ப⁴ஸேய்யகா ஸம்ப⁴வந்தி தத்த² தத்த² தேஸம் ஸத்தாயதனானி வேதி³தப்³பா³னி. ததா² தா⁴துயோ. ஸேஸமேத்த² உத்தானத்த²மேவ. பஞ்சமவாரே யம் வத்தப்³ப³ம் தம் த⁴ம்மஸங்க³ஹட்ட²கதா²யம் வுத்தமேவ.

6. உப்பாத³ககம்மஆயுப்பமாணவாரவண்ணனா

(1.) உப்பாத³ககம்மம்

1021. ச²ட்ட²வாரே பஞ்சஹி காமகு³ணேஹி நானப்பகாரேஹி வா இத்³தி⁴விஸேஸேஹி தி³ப்³ப³ந்தீதி தே³வா. ஸம்முதிதே³வாதி ‘தே³வோ, தே³வீ’தி ஏவம் லோகஸம்முதியா தே³வா. உபபத்திதே³வாதி தே³வலோகே உப்பன்னத்தா உபபத்தியா தே³வா. விஸுத்³தி⁴தே³வாதி ஸப்³பே³ஸம் தே³வானம் பூஜாரஹா ஸப்³ப³கிலேஸவிஸுத்³தி⁴யா தே³வா. ராஜானோதி முத்³தா⁴பி⁴ஸித்தக²த்தியா. தே³வியோதி தேஸம் மஹேஸியோ. குமாராதி அபி⁴ஸித்தராஜூனம் அபி⁴ஸித்ததே³வியா குச்சி²ஸ்மிம் உப்பன்னகுமாரா.

உபோஸத²கம்மம் கத்வாதி சாதுத்³த³ஸாதீ³ஸு அட்ட²ங்க³ஸமன்னாக³தம் உபோஸத²ம் உபவஸித்வா. இதா³னி யஸ்மா பரித்ததா³னாதி³புஞ்ஞகம்மம் மனுஸ்ஸஸோப⁴க்³யதாய பச்சயோ, மத்தஸோ கதம் மனுஸ்ஸஸோப⁴க்³யதாய அதி⁴மத்தம், அதி⁴மத்தபா⁴வேபி நானப்பகாரபே⁴த³தோ நானப்பகாரஸ்ஸ க²த்தியமஹாஸாலாதி³பா⁴வஸ்ஸ பச்சயோ, தஸ்மா தஸ்ஸ வஸேன உபபத்திபே⁴த³ம் த³ஸ்ஸேந்தோ அப்பேகச்சே க³ஹபதிமஹாஸாலானந்திஆதி³மாஹ. தத்த² மஹாஸாரோ ஏதேஸந்தி மஹாஸாரா; ர-காரஸ்ஸ பன ல-காரம் கத்வா மஹாஸாலாதி வுத்தம். க³ஹபதியோவ மஹாஸாலா, க³ஹபதீஸு வா மஹாஸாலாதி க³ஹபதிமஹாஸாலா. ஸேஸேஸுபி ஏஸேவ நயோ. தத்த² யஸ்ஸ கே³ஹே பச்சி²மந்தேன சத்தாலீஸகோடித⁴னம் நிதா⁴னக³தம் ஹோதி, கஹாபணானஞ்ச பஞ்ச அம்ப³ணானி தி³வஸவளஞ்ஜோ நிக்க²மதி – அயம் க³ஹபதிமஹாஸாலோ நாம. யஸ்ஸ பன கே³ஹே பச்சி²மந்தேன அஸீதிகோடித⁴னம் நிதா⁴னக³தம் ஹோதி, கஹாபணானஞ்ச த³ஸஅம்ப³ணானி தி³வஸவளஞ்ஜோ நிக்க²மதி – அயம் ப்³ராஹ்மணமஹாஸாலோ நாம. யஸ்ஸ பன கே³ஹே பச்சி²மந்தேன கோடிஸதத⁴னம் நிதா⁴னக³தம் ஹோதி, கஹாபணானஞ்ச வீஸதி அம்ப³ணானி தி³வஸவளஞ்ஜோ நிக்க²மதி – அயம் க²த்தியமஹாஸாலோ நாம.

ஸஹப்³யதந்தி ஸஹபா⁴வம்; ஸபா⁴கா³ ஹுத்வா நிப்³ப³த்தந்தீதி அத்தோ². சாதுமஹாராஜிகானந்திஆதீ³ஸு சாதுமஹாராஜிகா நாம ஸினேருபப்³ப³தஸ்ஸ வேமஜ்ஜே² ஹோந்தி. தேஸு பப்³ப³தட்ட²காபி அத்தி², ஆகாஸட்டா²பி; தேஸம் பரம்பரா சக்கவாளபப்³ப³தம் பத்தா. கி²ட்³டா³பதோ³ஸிகா, மனோபதோ³ஸிகா, ஸீதவலாஹகா, உண்ஹவலாஹகா, சந்தி³மா தே³வபுத்தோ, ஸூரியோ தே³வபுத்தோதி ஏதே ஸப்³பே³பி சாதுமஹாராஜிகதே³வலோகட்ட²கா ஏவ.

தேத்திம்ஸ ஜனா தத்த² உபபன்னாதி தாவதிம்ஸா. அபிச தாவதிம்ஸாதி தேஸம் தே³வானம் நாமமேவாதி வுத்தம். தேபி அத்தி² பப்³ப³தட்ட²கா, அத்தி² ஆகாஸட்ட²கா. தேஸம் பரம்பரா சக்கவாளபப்³ப³தம் பத்தா. ததா² யாமாதீ³னம். ஏகதே³வலோகேபி ஹி தே³வானம் பரம்பரா சக்கவாளபப்³ப³தம் அப்பத்தா நாம நத்தி². தத்த² தி³ப்³ப³ம் ஸுக²ம் யாதா பயாதா ஸம்பத்தாதி யாமா. துட்டா² பஹட்டா²தி துஸிதா. பகதிபடியத்தாரம்மணதோ அதிரேகேன ரமிதுகாமகாலே யதா²ருசிதே போ⁴கே³ நிம்மினித்வா ரமந்தீதி நிம்மானரதீ. சித்தாசாரம் ஞத்வா பரேஹி நிம்மிதேஸு போ⁴கே³ஸு வஸம் வத்தேந்தீதி பரனிம்மிதவஸவத்தீ.

(2.) ஆயுப்பமாணம்

1022. அப்பம் வா பி⁴ய்யோதி து³தியம் வஸ்ஸஸதம் அப்பத்வா வீஸாய வா திம்ஸாய வா சத்தாலீஸாய வா பஞ்ஞாஸாய வா ஸட்டி²யா வா வஸ்ஸேஹி அதி⁴கம்பி வஸ்ஸஸதந்தி அத்தோ². ஸப்³ப³ம்பி ஹேதம் து³தியம் வஸ்ஸஸதம் அப்பத்தத்தா அப்பந்தி வுத்தம்.

1024. ப்³ரஹ்மபாரிஸஜ்ஜாதீ³ஸு மஹாப்³ரஹ்மானம் பாரிஸஜ்ஜா பரிசாரிகாதி ப்³ரஹ்மபாரிஸஜ்ஜா. தேஸம் புரோஹிதபா⁴வே டி²தாதி ப்³ரஹ்மபுரோஹிதா. வண்ணவந்ததாய சேவ தீ³கா⁴யுகதாய ச மஹந்தோ ப்³ரஹ்மாதி மஹாப்³ரஹ்மா, தேஸம் மஹாப்³ரஹ்மானம். இமே தயோபி ஜனா பட²மஜ்ஜா²னபூ⁴மியம் ஏகதலே வஸந்தி; ஆயுஅந்தரம் பன நேஸம் நானா.

1025. பரித்தா ஆபா⁴ ஏதேஸந்தி பரித்தாபா⁴. அப்பமாணா ஆபா⁴ ஏதேஸந்தி அப்பமாணாபா⁴. த³ண்ட³தீ³பிகாய அச்சி விய ஏதேஸம் ஸரீரதோ ஆபா⁴ சி²ஜ்ஜித்வா சி²ஜ்ஜித்வா பதந்தீ விய ஸரதி விஸரதீதி ஆப⁴ஸ்ஸரா. இமேபி தயோ ஜனா து³தியஜ்ஜா²னபூ⁴மியம் ஏகதலே வஸந்தி; ஆயுஅந்தரம் பன நேஸம் நானா.

1026. பரித்தா ஸுபா⁴ ஏதேஸந்தி பரித்தஸுபா⁴. அப்பமாணா ஸுபா⁴ ஏதேஸந்தி அப்பமாணஸுபா⁴. ஸுபே⁴ன ஓகிண்ணா விகிண்ணா, ஸுபே⁴ன ஸரீரப்பபா⁴வண்ணேன ஏகக்³க⁴னா, ஸுவண்ணமஞ்ஜுஸாய ட²பிதஸம்பஜ்ஜலிதகஞ்சனபிண்ட³ஸஸ்ஸிரீகாதி ஸுப⁴கிண்ஹா. இமேபி தயோ ஜனா ததியஜ்ஜா²னபூ⁴மியம் ஏகதலே வஸந்தி; ஆயுஅந்தரம் பன நேஸம் நானா.

1027. ஆரம்மணனானத்ததாதி ஆரம்மணஸ்ஸ நானத்தபா⁴வோ. மனஸிகாரனானத்ததாதீ³ஸுபி ஏஸேவ நயோ. ஏத்த² ஏகஸ்ஸ பத²வீகஸிணம் ஆரம்மணம் ஹோதி…பே… ஏகஸ்ஸ ஓதா³தகஸிணந்தி இத³ம் ஆரம்மணனானத்தம். ஏகோ பத²வீகஸிணம் மனஸி கரோதி…பே… ஏகோ ஓதா³தகஸிணந்தி இத³ம் மனஸிகாரனானத்தம். ஏகஸ்ஸ பத²வீகஸிணே ச²ந்தோ³ ஹோதி…பே… ஏகஸ்ஸ ஓதா³தகஸிணேதி இத³ம் ச²ந்த³னானத்தம். ஏகோ பத²வீகஸிணே பத்த²னம் கரோதி…பே… ஏகோ ஓதா³தகஸிணேதி இத³ம் பணிதி⁴னானத்தம். ஏகோ பத²வீகஸிணவஸேன அதி⁴முச்சதி…பே… ஏகோ ஓதா³தகஸிணவஸேனாதி இத³ம் அதி⁴மோக்க²னானத்தம். ஏகோ பத²வீகஸிணவஸேன சித்தம் அபி⁴னீஹரதி…பே… ஏகோ ஓதா³தகஸிணவஸேனாதி இத³ம் அபி⁴னீஹாரனானத்தம். ஏகஸ்ஸ பத²வீகஸிணபரிச்சி²ந்த³னகபஞ்ஞா ஹோதி…பே… ஏகஸ்ஸ ஓதா³தகஸிணபரிச்சி²ந்த³னகபஞ்ஞாதி இத³ம் பஞ்ஞானானத்தம். தத்த² ஆரம்மணமனஸிகாரா புப்³ப³பா⁴கே³ன கதி²தா. ச²ந்த³பணிதி⁴அதி⁴மோக்கா²பி⁴னீஹாரா அப்பனாயபி வத்தந்தி உபசாரேபி. பஞ்ஞா பன லோகியலோகுத்தரமிஸ்ஸகா கதி²தா.

அஸஞ்ஞஸத்தானந்தி ஸஞ்ஞாவிரஹிதானம் ஸத்தானம். ஏகச்சே ஹி தித்தா²யதனே பப்³ப³ஜித்வா ‘சித்தம் நிஸ்ஸாய ரஜ்ஜனது³ஸ்ஸனமுய்ஹனானி நாம ஹோந்தீ’தி சித்தே தோ³ஸம் தி³ஸ்வா ‘அசித்தகபா⁴வோ நாம ஸோப⁴னோ, தி³ட்ட²த⁴ம்மனிப்³பா³னமேத’ந்தி ஸஞ்ஞாவிராக³ம் ஜனேத்வா தத்ரூபக³ம் பஞ்சமம் ஸமாபத்திம் பா⁴வேத்வா தத்த² நிப்³ப³த்தந்தி. தேஸம் உபபத்திக்க²ணே ஏகோ ரூபக்க²ந்தோ⁴யேவ நிப்³ப³த்ததி. ட²த்வா நிப்³ப³த்தோ டி²தகோ ஏவ ஹோதி, நிஸீதி³த்வா நிப்³ப³த்தோ நிஸின்னகோவ நிபஜ்ஜித்வா நிப்³ப³த்தோ நிபன்னோவ. சித்தகம்மரூபகஸதி³ஸா ஹுத்வா பஞ்ச கப்பஸதானி திட்ட²ந்தி. தேஸம் பரியோஸானே ஸோ ரூபகாயோ அந்தரதா⁴யதி, காமாவசரஸஞ்ஞா உப்பஜ்ஜதி; தேன இத⁴ ஸஞ்ஞுப்பாதே³ன தே தே³வா தம்ஹா காயா சுதாதி பஞ்ஞாயந்தி.

விபுலா ப²லா ஏதேஸந்தி வேஹப்ப²லா. அத்தனோ ஸம்பத்தியா ந ஹாயந்தி ந விஹாயந்தீதி அவிஹா. ந கஞ்சி ஸத்தம் தப்பந்தீதி அதப்பா. ஸுந்த³ரா த³ஸ்ஸனா அபி⁴ரூபா பாஸாதி³காதி ஸுத³ஸ்ஸா. ஸுட்ட² பஸ்ஸந்தி, ஸுந்த³ரமேதேஸம் வா த³ஸ்ஸனந்தி ஸுத³ஸ்ஸீ. ஸப்³பே³ஹி ஏவ கு³ணேஹி ச ப⁴வஸம்பத்தியா ச ஜேட்டா², நத்தே²த்த² கனிட்டா²தி அகனிட்டா².

1028. ஆகாஸானஞ்சாயதனம் உபக³தாதி ஆகாஸானஞ்சாயதனூபகா³. இதரேஸுபி ஏஸேவ நயோ. இதி ச² காமாவசரா, நவ ப்³ரஹ்மலோகா, பஞ்ச ஸுத்³தா⁴வாஸா, சத்தாரோ அரூபா அஸஞ்ஞஸத்தவேஹப்ப²லேஹி ஸத்³தி⁴ம் ச²ப்³பீ³ஸதி தே³வலோகா; மனுஸ்ஸலோகேன ஸத்³தி⁴ம் ஸத்தவீஸதி.

தத்த² ஸம்மாஸம்பு³த்³தே⁴ன மனுஸ்ஸானம் தே³வானஞ்ச ஆயும் பரிச்சி²ந்த³மானேன சதூஸு அபாயேஸு பு⁴ம்மதே³வேஸு ச ஆயு பரிச்சி²ன்னம் தம் கஸ்மாதி? நிரயே தாவ கம்மமேவ பமாணம். யாவ கம்மம் ந கீ²யதி, ந தாவ சவந்தி. ததா² ஸேஸஅபாயேஸு. பு⁴ம்மதே³வானம்பி கம்மமேவ பமாணம். தத்த² நிப்³ப³த்தா ஹி கேசி ஸத்தாஹமத்தம் திட்ட²ந்தி, கேசி அத்³த⁴மாஸம், கேசி மாஸம், கப்பம் திட்ட²மானாபி அத்தி²யேவ.

தத்த² மனுஸ்ஸேஸு கி³ஹிபா⁴வே டி²தாயேவ ஸோதாபன்னாபி ஹோந்தி, ஸகதா³கா³மிப²லம்பி அனாகா³மிப²லம்பி அரஹத்தப²லம்பி பாபுணந்தி. தேஸு ஸோதாபன்னாத³யோ யாவஜீவம் திட்ட²ந்தி. கீ²ணாஸவா பன பரினிப்³பா³யந்தி வா பப்³ப³ஜந்தி வா. கஸ்மா? அரஹத்தம் நாம ஸேட்ட²கு³ணோ, கி³ஹிலிங்க³ம் ஹீனம், தம் ஹீனதாய உத்தமம் கு³ணம் தா⁴ரேதும் ந ஸக்கோதி. தஸ்மா தே பரினிப்³பா³துகாமா வா பப்³ப³ஜிதுகாமா வா ஹோந்தி.

பு⁴ம்மதே³வா பன அரஹத்தம் பத்வாபி யாவஜீவம் திட்ட²ந்தி. ச²ஸு காமாவசரதே³வேஸு ஸோதாபன்னஸகதா³கா³மினோ யாவஜீவம் திட்ட²ந்தி; அனாகா³மினா ரூபப⁴வம் க³ந்தும் வட்டதி, கீ²ணாஸவேன பரினிப்³பா³தும். கஸ்மா? நிலீயனோகாஸஸ்ஸ அபா⁴வா. ரூபாவசராரூபாவசரேஸு ஸப்³பே³பி யாவஜீவம் திட்ட²ந்தி. தத்த² ரூபாவசரே நிப்³ப³த்தா ஸோதாபன்னஸகதா³கா³மினோ ந புன இதா⁴க³ச்ச²ந்தி, தத்தே²வ பரினிப்³பா³யந்தி. ஏதே ஹி ஜா²னஅனாகா³மினோ நாம.

அட்ட²ஸமாபத்திலாபீ⁴னம் பன கிம் நியமேதி? பகு³ணஜ்ஜா²னம். யதே³வஸ்ஸ பகு³ணம் ஹோதி, தேன உப்பஜ்ஜதி. ஸப்³பே³ஸு பன பகு³ணேஸு கிம் நியமேதி? பத்த²னா. யத்த² உபபத்திம் பத்தே²தி தத்தே²வ உபபஜ்ஜதி. பத்த²னாய அஸதி கிம் நியமேதி? மரணஸமயே ஸமாபன்னா ஸமாபத்தி. மரணஸமயே ஸமாபன்னா நத்தி², கிம் நியமேதி? நேவஸஞ்ஞானாஸஞ்ஞாயதனஸமாபத்தி. ஏகம்ஸேன ஹி ஸோ நேவஸஞ்ஞானாஸஞ்ஞாயதனே உபபஜ்ஜதி. நவஸு ப்³ரஹ்மலோகேஸு நிப்³ப³த்தஅரியஸாவகானம் தத்ரூபபத்திபி ஹோதி உபரூபபத்திபி ந ஹேட்டூ²பபத்தி. புது²ஜ்ஜனானம் பன தத்ரூபபத்திபி ஹோதி உபரூபபத்திபி ஹேட்டூ²பபத்திபி. பஞ்சஸு ஸுத்³தா⁴வாஸேஸு சதூஸு ச அரூபேஸு அரியஸாவகானம் தத்ரூபபத்திபி ஹோதி உபரூபபத்திபி. பட²மஜ்ஜா²னபூ⁴மியம் நிப்³ப³த்தோ அனாகா³மீ நவ ப்³ரஹ்மலோகே ஸோதே⁴த்வா மத்த²கே டி²தோ பரினிப்³பா³தி. வேஹப்ப²லா, அகனிட்டா², நேவஸஞ்ஞானாஸஞ்ஞாயதனந்தி இமே தயோ தே³வலோகா ஸேட்ட²ப⁴வா நாம. இமேஸு தீஸு டா²னேஸு நிப்³ப³த்தஅனாகா³மினோ நேவ உத்³த⁴ம் க³ச்ச²ந்தி, ந அதோ⁴, தத்த² தத்தே²வ பரினிப்³பா³யந்தீதி. இத³மேத்த² பகிண்ணகம்.

7. அபி⁴ஞ்ஞேய்யாதி³வாரவண்ணனா

1030. ஸத்தமவாரே ஸலக்க²ணபரிக்³கா³ஹிகாய அபி⁴ஞ்ஞாய வஸேன அபி⁴ஞ்ஞேய்யதா வேதி³தப்³பா³. ஞாததீரணபஹானபரிஞ்ஞானம் வஸேன பரிஞ்ஞேய்யதா. ஸா ச ரூபக்க²ந்தோ⁴ அபி⁴ஞ்ஞேய்யோ பரிஞ்ஞேய்யோ ந பஹாதப்³போ³திஆதீ³ஸு ஞாததீரணபரிஞ்ஞாவஸேனேவ வேதி³தப்³பா³. ஸமுத³யஸச்சம் அபி⁴ஞ்ஞேய்யம் பரிஞ்ஞேய்யம் பஹாதப்³ப³ந்திஆதீ³ஸு பஹானபரிஞ்ஞாவஸேன.

அட்ட²மவாரே ரூபாதி³ஆரம்மணானம் சக்கு²விஞ்ஞாணாதீ³னம் வஸேன ஸாரம்மணானாரம்மணதா வேதி³தப்³பா³. நவமவாரோ உத்தானத்தோ²யேவ. த³ஸமவாரேபி யம் வத்தப்³ப³ம் ஸியா தம் ஸப்³ப³ம் தத்த² தத்த² பஞ்ஹாபுச்ச²கவாரே வுத்தமேவாதி.

ஸம்மோஹவினோத³னியா விப⁴ங்க³ட்ட²கதா²ய

த⁴ம்மஹத³யவிப⁴ங்க³வண்ணனா நிட்டி²தா.

நிக³மனகதா²

ஏத்தாவதா ச –

அபி⁴த⁴ம்மம் தே³ஸேந்தோ, த⁴ம்மக³ரு த⁴ம்மகா³ரவயுத்தானம்;

தே³வானம் தே³வபுரே, தே³வக³ணஸஹஸ்ஸபரிவாரோ.

து³தியம் அது³தியபுரிஸோ, யம் ஆஹ விப⁴ங்க³பகரணம் நாதோ²;

அட்டா²ரஸஹி விப⁴ங்கே³ஹி, மண்டி³தமண்ட³பேய்யகு³ணோ.

அத்த²ப்பகாஸனத்த²ம், தஸ்ஸாஹம் யாசிதோ டி²தகு³ணேன;

யதினா அத³ந்த⁴க³தினா, ஸுபு³த்³தி⁴னா பு³த்³த⁴கோ⁴ஸேன.

யம் ஆரபி⁴ம் ரசயிதும், அட்ட²கத²ம் ஸுனிபுணேஸு அத்தே²ஸு;

ஸம்மோஹவினோத³னதோ, ஸம்மோஹவினோத³னிம் நாம.

போராணட்ட²கதா²னம், ஸாரம் ஆதா³ய ஸா அயம் நிட்ட²ம்;

பத்தா அனந்தராயேன, பாளியா பா⁴ணவாரேஹி.

சத்தாலீஸாய யதா², ஏகேன ச ஏவமேவ ஸப்³பே³பி;

நிட்ட²ம் வஜந்து விமலா, மனோரதா² ஸப்³ப³ஸத்தானம்.

ஸத்³த⁴ம்மஸ்ஸ டி²தத்த²ம், யஞ்ச இமம் ரசயதா மயா புஞ்ஞம்;

பத்தம் தேன ஸமத்தம், பாபுணது ஸதே³வகோ லோகோ.

ஸுசிரம் திட்ட²து த⁴ம்மோ, த⁴ம்மாபி⁴ரதோ ஸதா³ ப⁴வது லோகோ;

நிச்சம் கே²மஸுபி⁴க்கா²தி³-ஸம்பதா³ ஜனபதா³ ஹோந்தூதி.

பரமவிஸுத்³த⁴ஸத்³தா⁴பு³த்³தி⁴வீரியபடிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹணஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்திப்பபே⁴தே³ ஸாட்ட²கதே² ஸத்து²ஸாஸனே அப்படிஹதஞாணப்பபா⁴வேன மஹாவேய்யாகரணேன கரணஸம்பத்திஜனிதஸுக²வினிக்³க³தமது⁴ரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா பபி⁴ன்னபடிஸம்பி⁴தா³பரிவாரே ச²ளபி⁴ஞ்ஞாபடிஸம்பி⁴தா³தி³ப்பபே⁴த³கு³ணபடிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் ஸம்மோஹவினோத³னீ நாம விப⁴ங்க³ட்ட²கதா².

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் பஞ்ஞாவிஸுத்³தி⁴யா.

யாவ பு³த்³தோ⁴தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

ஸம்மோஹவினோத³னீ நாம விப⁴ங்க³-அட்ட²கதா² நிட்டி²தா.