1. ஸுத்தந்தபா⁴ஜனீயவண்ணனா

642. இதா³னி தத³னந்தரே அப்பமஞ்ஞாவிப⁴ங்கே³ சதஸ்ஸோதி க³ணனபரிச்சே²தோ³. அப்பமஞ்ஞாயோதி ப²ரணஅப்பமாணவஸேன அப்பமஞ்ஞாயோ. ஏதா ஹி ஆரம்மணவஸேன அப்பமாணே வா ஸத்தே ப²ரந்தி, ஏகஸத்தம்பி வா அனவஸேஸப²ரணவஸேன ப²ரந்தீதி ப²ரணஅப்பமாணவஸேன அப்பமஞ்ஞாயோதி வுச்சந்தி. இத⁴ பி⁴க்கூ²தி இமஸ்மிம் ஸாஸனே பி⁴க்கு². மேத்தாஸஹக³தேனாதி மேத்தாய ஸமன்னாக³தேன. சேதஸாதி சித்தேன. ஏகம் தி³ஸந்தி ஏகிஸ்ஸா தி³ஸாய. பட²மபரிக்³க³ஹிதம் ஸத்தம் உபாதா³ய ஏகதி³ஸாபரியாபன்னஸத்தப²ரணவஸேன வுத்தம். ப²ரித்வாதி பு²ஸித்வா ஆரம்மணம் கத்வா. விஹரதீதி ப்³ரஹ்மவிஹாராதி⁴ட்டி²தம் இரியாபத²விஹாரம் பவத்தேதி. ததா² து³தியந்தி யதா² புரத்தி²மாதீ³ஸு தி³ஸாஸு யம் கிஞ்சி ஏகம் தி³ஸம் ப²ரித்வா விஹரதி, ததே²வ தத³னந்தரம் து³தியம் ததியம் சதுத்த²ஞ்சாதி அத்தோ².

இதி உத்³த⁴ந்தி தேனேவ ச நயேன உபரிமம் தி³ஸந்தி வுத்தம் ஹோதி. அதோ⁴ திரியந்தி அதோ⁴தி³ஸம்பி திரியம்தி³ஸம்பி ஏவமேவ. ஏத்த² ச அதோ⁴தி ஹேட்டா², திரியந்தி அனுதி³ஸா. ஏவம் ஸப்³ப³தி³ஸாஸு அஸ்ஸமண்ட³லே அஸ்ஸமிவ மேத்தாஸஹக³தம் சித்தம் ஸாரேதிபி பச்சாஸாரேதிபீதி ஏத்தாவதா ஏகமேகம் தி³ஸம் பரிக்³க³ஹேத்வா ஓதி⁴ஸோ மேத்தாப²ரணம் த³ஸ்ஸிதம். ஸப்³ப³தீ⁴திஆதி³ பன அனோதி⁴ஸோ த³ஸ்ஸனத்த²ம் வுத்தம். தத்த² ஸப்³ப³தீ⁴தி ஸப்³ப³த்த². ஸப்³ப³த்ததாயாதி ஸப்³பே³ஸு ஹீனமஜ்ஜி²முக்கட்ட²மித்தஸபத்தமஜ்ஜ²த்தாதி³ப்பபே⁴தே³ஸு அத்ததாய ‘அயம் பரஸத்தோ’தி விபா⁴க³ம் அகத்வா அத்தஸமதாயாதி வுத்தம் ஹோதி; அத² வா ஸப்³ப³த்ததாயாதி ஸப்³பே³ன சித்தபா⁴வேன ஈஸகம்பி ப³ஹி அவிக்கி²பமானோதி வுத்தம் ஹோதி. ஸப்³பா³வந்தந்தி ஸப்³ப³ஸத்தவந்தம், ஸப்³ப³ஸத்தயுத்தந்தி அத்தோ². லோகந்தி ஸத்தலோகம்.

விபுலேனாதிஏவமாதி³பரியாயத³ஸ்ஸனதோ பனேத்த² புன ‘‘மேத்தாஸஹக³தேனா’’தி வுத்தம். யஸ்மா வா ஏத்த² ஓதி⁴ஸோ ப²ரணே விய புன ‘ததா²’ஸத்³தோ³ ‘இதி’ஸத்³தோ³ வா ந வுத்தோ, தஸ்மா புன ‘‘மேத்தாஸஹக³தேன சேதஸா’’தி வுத்தம்; நிக³மனவஸேன வா ஏதம் வுத்தம். விபுலேனாதி ஏத்த² ச ப²ரணவஸேன விபுலதா த³ட்ட²ப்³பா³. பூ⁴மிவஸேன பன தம் மஹக்³க³தம், பகு³ணவஸேன அப்பமாணம், ஸத்தாரம்மணவஸேன ச அப்பமாணம், ப்³யாபாத³பச்சத்தி²கப்பஹானேன அவேரம், தோ³மனஸ்ஸப்பஹானதோ அப்³யாபஜ்ஜ²ம், நித்³து³க்க²ந்தி வுத்தம் ஹோதி. அயம் தாவ ‘‘மேத்தாஸஹக³தேன சேதஸா’’திஆதி³னா நயேன ட²பிதாய மாதிகாய அத்தோ².

643. இதா³னி யதே³தம் ‘‘கத²ஞ்ச, பி⁴க்க²வே, மேத்தாஸஹக³தேன சேதஸா’’திஆதி³னா நயேன வுத்தம் பத³பா⁴ஜனீயம், தத்த² யஸ்மா இத³ம் கம்மட்டா²னம் தோ³ஸசரிதஸ்ஸ ஸப்பாயம், தஸ்மா யதா²ரூபே புக்³க³லே அயம் மேத்தா அப்பனம் பாபுணாதி, தம் மேத்தாய வத்து²பூ⁴தம் புக்³க³லம் தாவ த³ஸ்ஸேதும் ஸேய்யதா²பி நாம ஏகம் புக்³க³லந்திஆதி³ வுத்தம். தத்த² ஸேய்யதா²பி நாமாதி ஓபம்மத்தே² நிபாதோ, யதா² ஏகம் புக்³க³லந்தி அத்தோ². பியந்தி பேமனீயம். மனாபந்தி ஹத³யவுட்³டி⁴கரம். தத்த² புப்³பே³வ ஸன்னிவாஸேன பச்சுப்பன்னஹிதேன வா பியோ நாம ஹோதி, ஸீலாதி³கு³ணஸமாயோகே³ன மனாபோ நாம; தா³னஸமானத்ததாஹி வா பியதா, பியவசனஅத்த²சரியதாஹி மனாபதா வேதி³தப்³பா³. யஸ்மா சேத்த² பியதாய இமஸ்ஸ ப்³யாபாத³ஸ்ஸ பஹானம் ஹோதி, ததோ மேத்தா ஸுக²ம் ப²ரதி, மனாபதாய உதா³ஸீனதா ந ஸண்டா²தி, ஹிரோத்தப்பஞ்ச பச்சுபட்டா²தி, ததோ ஹிரோத்தப்பானுபாலிதா மேத்தா ந பரிஹாயதி, தஸ்மா தம் உபமம் கத்வா இத³ம் வுத்தம் – பியம் மனாபந்தி. மேத்தாயேய்யாதி மேத்தாய ப²ரேய்ய; தஸ்மிம் புக்³க³லே மேத்தம் கரேய்ய பவத்தேய்யாதி அத்தோ². ஏவமேவ ஸப்³பே³ ஸத்தேதி யதா² பியம் புக்³க³லம் மேத்தாயேய்ய, ஏவம் தஸ்மிம் புக்³க³லே அப்பனாப்பத்தாய வஸீபா⁴வம் உபக³தாய மேத்தாய மஜ்ஜ²த்தவேரிஸங்கா²தேபி ஸப்³பே³ ஸத்தே அனுக்கமேன ப²ரதீதி அத்தோ². மேத்தி மேத்தாயனாதிஆதீ³னி வுத்தத்தா²னேவ.

644. விதி³ஸம் வாதி பத³ம் திரியம் வாதி ஏதஸ்ஸ அத்த²விபா⁴வனத்த²ம் வுத்தம்.

645. ப²ரித்வாதி ஆரம்மணகரணவஸேன பு²ஸித்வா. அதி⁴முஞ்சித்வாதி அதி⁴கபா⁴வேன முஞ்சித்வா, யதா² முத்தம் ஸுமுத்தம் ஹோதி ஸுப்பஸாரிதம் ஸுவித்த²தம் ததா² முஞ்சித்வாதி அத்தோ².

648. ஸப்³ப³தி⁴ஆதி³னித்³தே³ஸே யஸ்மா தீணிபி ஏதானி பதா³னி ஸப்³ப³ஸங்கா³ஹிகானி, தஸ்மா நேஸம் ஏகதோவ அத்த²ம் த³ஸ்ஸேதும் ஸப்³பே³ன ஸப்³ப³ந்திஆதி³ வுத்தம். தஸ்ஸத்தோ² ஹேட்டா² வுத்தோயேவ.

650. விபுலாதி³னித்³தே³ஸே யஸ்மா யம் அப்பனாப்பத்தம் ஹுத்வா அனந்தஸத்தப²ரணவஸேன விபுலம், தம் நியமதோ பூ⁴மிவஸேன மஹக்³க³தம் ஹோதி. யஞ்ச மஹக்³க³தம் தம் அப்பமாணகோ³சரவஸேன அப்பமாணம். யம் அப்பமாணம் தம் பச்சத்தி²கவிகா⁴தவஸேன அவேரம். யஞ்ச அவேரம் தம் விஹதப்³யாபஜ்ஜதாய அப்³யாபஜ்ஜம். தஸ்மா ‘‘யம் விபுலம் தம் மஹக்³க³த’’ந்திஆதி³ வுத்தம். அவேரோ அப்³யாபஜ்ஜோதி சேத்த² லிங்க³விபரியாயேன வுத்தம். மனேன வா ஸத்³தி⁴ம் யோஜனா காதப்³பா³ – யம் அப்பமாணம் சித்தம், ஸோ அவேரோ மனோ; யோ அவேரோ ஸோ அப்³யாபஜ்ஜோதி. அபிசேத்த² ஹேட்டி²மம் ஹேட்டி²மம் பத³ம் உபரிமஸ்ஸ உபரிமஸ்ஸ, உபரிமம் வா உபரிமம் ஹேட்டி²மஸ்ஸ ஹேட்டி²மஸ்ஸ அத்தோ²திபி வேதி³தப்³போ³.

653. ஸேய்யதா²பி நாம ஏகம் புக்³க³லம் து³க்³க³தம் து³ருபேதந்தி இத³ம்பி கருணாய வத்து²பூ⁴தம் புக்³க³லம் த³ஸ்ஸேதும் வுத்தம். ஏவரூபஸ்மிஞ்ஹி புக்³க³லே ப³லவகாருஞ்ஞம் உப்பஜ்ஜதி. தத்த² து³க்³க³தந்தி து³க்கே²ன ஸமங்கீ³பா⁴வம் க³தம். து³ருபேதந்தி காயது³ச்சரிதாதீ³ஹி உபேதம். க³திகுலபோ⁴கா³தி³வஸேன வா தமபா⁴வே டி²தோ புக்³க³லோ து³க்³க³தோ, காயது³ச்சரிதாதீ³ஹி உபேதத்தா தமபராயணபா⁴வே டி²தோ து³ருபேதோதி ஏவமேத்த² அத்தோ² வேதி³தப்³போ³.

663. ஏகம் புக்³க³லம் பியம் மனாபந்தி இத³ம்பி முதி³தாய வத்து²பூ⁴தம் புக்³க³லம் த³ஸ்ஸேதும் வுத்தம். தத்த² க³திகுலபோ⁴கா³தி³வஸேன ஜோதிபா⁴வே டி²தோ பியோ, காயஸுசரிதாதீ³ஹி உபேதத்தா ஜோதிபராயணபா⁴வே டி²தோ மனாபோதி வேதி³தப்³போ³.

673. நேவ மனாபம் ந அமனாபந்தி இத³ம்பி உபேக்கா²ய வத்து²பூ⁴தம் புக்³க³லம் த³ஸ்ஸேதும் வுத்தம். தத்த² மித்தபா⁴வம் அஸம்பத்ததாய நேவ மனாபோ, அமித்தபா⁴வம் அஸம்பத்ததாய ந அமனாபோதி வேதி³தப்³போ³. ஸேஸமேத்த² யம் வத்தப்³ப³ம் ஸியா, தம் ஸப்³ப³ம் ஹேட்டா² சித்துப்பாத³கண்டே³ வுத்தமேவ. பா⁴வனாவிதா⁴னம்பி ஏதேஸம் கம்மட்டா²னானம் விஸுத்³தி⁴மக்³கே³ வித்தா²ரதோ கதி²தமேவாதி.

ஸுத்தந்தபா⁴ஜனீயவண்ணனா.