3. பஞ்ஹாபுச்ச²கவண்ணனா

638. பஞ்ஹாபுச்ச²கே பாளிஅனுஸாரேனேவ ஜா²னானம் குஸலாதி³பா⁴வோ வேதி³தப்³போ³. ஆரம்மணத்திகேஸு பன திண்ணம் ஜா²னானம் நிமித்தாரம்மணத்தா பரித்தாரம்மணாதி³பா⁴வேன நவத்தப்³ப³தா வேதி³தப்³பா³. லோகுத்தரா பனேத்த² மக்³க³காலே ப²லகாலே வா ஸியா அப்பமாணாரம்மணா. சதுத்த²ம் ஜா²னம் ஸியா பரித்தாரம்மணந்தி ஏத்த² குஸலதோ தேரஸ சதுத்த²ஜ்ஜா²னானி ஸப்³ப³த்த²பாத³கசதுத்த²ம், இத்³தி⁴வித⁴சதுத்த²ம், தி³ப்³ப³ஸோதஞாணசதுத்த²ம், சேதோபரியஞாணசதுத்த²ம், புப்³பே³னிவாஸஞாணசதுத்த²ம், தி³ப்³ப³சக்கு²ஞாணசதுத்த²ம், யதா²கம்மூபக³ஞாணசதுத்த²ம், அனாக³தம்ஸஞாணசதுத்த²ம், ஆகாஸானஞ்சாயதனாதி³சதுத்த²ம், லோகுத்தரசதுத்த²ந்தி.

தத்த² ஸப்³ப³த்த²பாத³கசதுத்த²ம் நவத்தப்³பா³ரம்மணமேவ ஹோதி.

இத்³தி⁴வித⁴சதுத்த²ம் சித்தவஸேன காயம் பரிணாமேந்தஸ்ஸ அதி³ஸ்ஸமானேன காயேன பாடிஹாரியகரணே காயாரம்மணத்தா பரித்தாரம்மணம், காயவஸேன சித்தம் பரிணாமேந்தஸ்ஸ தி³ஸ்ஸமானேன காயேன பாடிஹாரியம் கத்வா ப்³ரஹ்மலோகம் க³ச்ச²ந்தஸ்ஸ ஸமாபத்திசித்தாரம்மணத்தா மஹக்³க³தாரம்மணம்.

தி³ப்³ப³ஸோதஞாணசதுத்த²ம் ஸத்³தா³ரம்மணத்தா பரித்தாரம்மணம்.

சேதோபரியஞாணசதுத்த²ம் காமாவசரசித்தஜானனகாலே பரித்தாரம்மணம், ரூபாவசராரூபாவசரசித்தஜானனகாலே மஹக்³க³தாரம்மணம், லோகுத்தரசித்தஜானனகாலே அப்பமாணாரம்மணம். சேதோபரியஞாணலாபீ⁴ பன புது²ஜ்ஜனோ புது²ஜ்ஜனானம்யேவ சித்தம் ஜானாதி, ந அரியானம். ஸோதாபன்னோ ஸோதாபன்னஸ்ஸ சேவ புது²ஜ்ஜனஸ்ஸ ச; ஸகதா³கா³மீ ஸகதா³கா³மினோ சேவ ஹேட்டி²மானஞ்ச த்³வின்னம்; அனாகா³மீ அனாகா³மினோ சேவ ஹேட்டி²மானஞ்ச திண்ணம்; கீ²ணாஸவோ ஸப்³பே³ஸம்பி ஜானாதி.

புப்³பே³னிவாஸஞாணசதுத்த²ம் காமாவசரக்க²ந்தா⁴னுஸ்ஸரணகாலே பரித்தாரம்மணம், ரூபாவசராரூபாவசரக்க²ந்தா⁴னுஸ்ஸரணகாலே மஹக்³க³தாரம்மணம், ‘‘அதீதே பு³த்³த⁴பச்சேகபு³த்³த⁴கீ²ணாஸவா மக்³க³ம் பா⁴வயிம்ஸு, ப²லம் ஸச்சி²கரிம்ஸூ’’தி அனுஸ்ஸரணகாலே அப்பமாணாரம்மணம், நாமகோ³த்தானுஸ்ஸரணகாலே நவத்தப்³பா³ரம்மணம்.

தி³ப்³ப³சக்கு²ஞாணசதுத்த²ம் வண்ணாரம்மணத்தா பரித்தாரம்மணம்.

யதா²கம்மூபக³ஞாணசதுத்த²ம் காமாவசரகம்மானுஸ்ஸரணகாலே பரித்தாரம்மணம், ரூபாவசராரூபாவசரகம்மானுஸ்ஸரணகாலே மஹக்³க³தாரம்மணம்.

அனாக³தம்ஸஞாணசதுத்த²ம் அனாக³தே காமதா⁴துயா நிப்³ப³த்திஜானனகாலே பரித்தாரம்மணம், ரூபாரூபப⁴வேஸு நிப்³ப³த்திஜானனகாலே மஹக்³க³தாரம்மணம், ‘‘அனாக³தே பு³த்³த⁴பச்சேகபு³த்³த⁴கீ²ணாஸவா மக்³க³ம் பா⁴வேஸ்ஸந்தி, ப²லம் ஸச்சி²கரிஸ்ஸந்தீ’’தி ஜானனகாலே அப்பமாணாரம்மணம், ‘‘அனாக³தே ஸங்கோ² நாம ராஜா ப⁴விஸ்ஸதீ’’திஆதி³னா (தீ³. நி. 3.108) நயேன நாமகோ³த்தானுஸ்ஸரணகாலே நவத்தப்³பா³ரம்மணம்.

ஆகாஸானஞ்சாயதனஆகிஞ்சஞ்ஞாயதனசதுத்த²ம் நவத்தப்³பா³ரம்மணம். விஞ்ஞாணஞ்சாயதனனேவஸஞ்ஞானாஸஞ்ஞாயதனசதுத்த²ம் மஹக்³க³தாரம்மணம்.

லோகுத்தரசதுத்த²ம் அப்பமாணாரம்மணம்.

கிரியதோபி தேஸம் த்³வாத³ஸன்னம் ஜா²னானம் இத³மேவ ஆரம்மணவிதா⁴னம். தீணி ஜா²னானி நமக்³கா³ரம்மணாதி பச்சவேக்க²ணஞாணம் வா சேதோபரியாதி³ஞாணம் வா மக்³க³ம் ஆரம்மணம் கரேய்ய, தீணி ஜா²னானி ததா² அப்பவத்திதோ நமக்³கா³ரம்மணா, ஸஹஜாதஹேதுவஸேன பன ஸியா மக்³க³ஹேதுகா; வீரியஜேட்டி²காய வா வீமம்ஸாஜேட்டி²காய வா மக்³க³பா⁴வனாய மக்³கா³தி⁴பதினோ; ச²ந்த³சித்தஜேட்ட²ககாலே ப²லகாலே ச நவத்தப்³பா³.

சதுத்த²ம் ஜா²னந்தி இதா⁴பி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கஇத்³தி⁴வித⁴தி³ப்³ப³ஸோததி³ப்³ப³சக்கு²யதா²கம்மூபக³ஞாணசதுத்த²ஞ்சேவ சதுப்³பி³த⁴ஞ்ச ஆருப்பசதுத்த²ம் மக்³கா³ரம்மணாதி³பா⁴வேன ந வத்தப்³ப³ம். சேதோபரியபுப்³பே³னிவாஸஅனாக³தம்ஸஞாணசதுத்த²ம் பன மக்³கா³ரம்மணம் ஹோதி. ந வத்தப்³ப³ம் மக்³க³ஹேதுகம் மக்³கா³தி⁴பதீதி வா; லோகுத்தரசதுத்த²ம் மக்³கா³ரம்மணம் ந ஹோதி; மக்³க³காலே பன ஸஹஜாதஹேதுவஸேன மக்³க³ஹேதுகம்; வீரியவீமம்ஸாஜேட்டி²காய மக்³க³பா⁴வனாய மக்³கா³தி⁴பதி; ச²ந்த³சித்தஜேட்டி²காய சேவ மக்³க³பா⁴வனாய ப²லகாலே ச ந வத்தப்³ப³ம். கிரியதோபி த்³வாத³ஸஸு ஜா²னேஸு அயமேவ நயோ.

தீணி ஜா²னானி ந வத்தப்³பா³தி அதீதாதீ³ஸு ஏகத⁴ம்மம்பி ஆரப்³ப⁴ அப்பவத்திதோ நவத்தப்³பா³தி வேதி³தப்³பா³.

சதுத்த²ம் ஜா²னந்தி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கசதுத்த²ம் நவத்தப்³பா³ரம்மணமேவ. இத்³தி⁴வித⁴சதுத்த²ம் காயவஸேன சித்தபரிணாமனே ஸமாபத்திசித்தாரம்மணத்தா அதீதாரம்மணம்; ‘‘அனாக³தே இமானி புப்பா²னி மா மிலாயிம்ஸு, தீ³பா மா நிப்³பா³யிம்ஸு, ஏகோ அக்³கி³க்க²ந்தோ⁴ ஸமுட்டா²து, பப்³ப³தோ ஸமுட்டா²தூ’’தி அதி⁴ட்டா²னகாலே அனாக³தாரம்மணம்; சித்தவஸேன காயபரிணாமனகாலே காயாரம்மணத்தா பச்சுப்பன்னாரம்மணம். தி³ப்³ப³ஸோதஞாணசதுத்த²ம் ஸத்³தா³ரம்மணத்தா பச்சுப்பனாரம்மணம். சேதோபரியஞாணசதுத்த²ம் அதீதே ஸத்ததி³வஸப்³ப⁴ந்தரே உப்பஜ்ஜித்வா நிருத்³த⁴சித்தஜானனகாலே அதீதாரம்மணம்; அனாக³தே ஸத்ததி³வஸப்³ப⁴ந்தரே உப்பஜ்ஜனகசித்தஜானனகாலே அனாக³தாரம்மணம். ‘‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ சித்தஸ்ஸ அனந்தரா அமும் நாம விதக்கம் விதக்கேஸ்ஸதீதி. ஸோ ப³ஹுஞ்சேபி ஆதி³ஸதி, ததே²வ தம் ஹோதி நோ அஞ்ஞதா²’’தி இமினா ஹி ஸுத்தேன (அ. நி. 3.61) சேதோபரியஞாணஸ்ஸேவ பவத்தி பகாஸிதா. அத்³தா⁴னபச்சுப்பன்னஸந்ததிபச்சுப்பன்னவஸேனேவ பச்சுப்பன்னம் ஆரப்³ப⁴ பவத்திகாலே பச்சுப்பன்னாரம்மணம். வித்தா²ரகதா² பனேத்த² ஹேட்டா²அட்ட²கதா²கண்ட³வண்ணனாயம் வுத்தனயேனேவ வேதி³தப்³பா³.

புப்³பே³னிவாஸஞாணசதுத்த²ம் அதீதக்க²ந்தா⁴னுஸ்ஸரணகாலே அதீதாரம்மணம், நாமகோ³த்தானுஸ்ஸரணகாலே நவத்தப்³பா³ரம்மணம். தி³ப்³ப³சக்கு²ஞாணசதுத்த²ம் வண்ணாரம்மணத்தா பச்சுப்பன்னாரம்மணம். யதா²கம்மூபக³ஞாணசதுத்த²ம் அதீதகம்மமேவ ஆரம்மணம் கரோதீதி அதீதாரம்மணம். அனாக³தம்ஸஞாணசதுத்த²ம் அனாக³தக்க²ந்தா⁴னுஸ்ஸரணகாலே அனாக³தாரம்மணம், நாமகோ³த்தானுஸ்ஸரணகாலே நவத்தப்³பா³ரம்மணம். ஆகாஸானஞ்சாயதனஆகிஞ்சஞ்ஞாயதனசதுத்த²ம் நவத்தப்³பா³ரம்மணமேவ. விஞ்ஞாணஞ்சாயதனனேவஸஞ்ஞானாஸஞ்ஞாயதனசதுத்த²ம் அதீதாரம்மணமேவ. லோகுத்தரசதுத்த²ம் நவத்தப்³பா³ரம்மணமேவ. கிரியதோபி த்³வாத³ஸஸு சதுத்த²ஜ்ஜா²னேஸு ஏஸேவ நயோ.

தீணி ஜா²னானி ப³ஹித்³தா⁴ரம்மணாதி அஜ்ஜ²த்ததோ ப³ஹித்³தா⁴பூ⁴தம் நிமித்தம் ஆரப்³ப⁴ பவத்திதோ ப³ஹித்³தா⁴ரம்மணா.

சதுத்த²ம் ஜா²னந்தி இதா⁴பி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கசதுத்த²ம் ப³ஹித்³தா⁴ரம்மணமேவ.

இத்³தி⁴வித⁴சதுத்த²ம் காயவஸேன சித்தபரிணாமனேபி சித்தவஸேன காயபரிணாமனேபி அத்தனோவ காயசித்தாரம்மணத்தா அஜ்ஜ²த்தாரம்மணம்; ‘‘ப³ஹித்³தா⁴ ஹத்தி²ம்பி த³ஸ்ஸேதீ’’திஆதி³னா நயேன பவத்தகாலே ப³ஹித்³தா⁴ரம்மணம்.

தி³ப்³ப³ஸோதஞாணசதுத்த²ம் அத்தனோ குச்சி²க³தஸத்³தா³ரம்மணகாலே அஜ்ஜ²த்தாரம்மணம், பரஸ்ஸ ஸத்³தா³ரம்மணகாலே ப³ஹித்³தா⁴ரம்மணம், உப⁴யவஸேனாபி அஜ்ஜ²த்தப³ஹித்³தா⁴ரம்மணம்.

சேதோபரியஞாணசதுத்த²ம் ப³ஹித்³தா⁴ரம்மணமேவ.

புப்³பே³னிவாஸஞாணசதுத்த²ம் அத்தனோ க²ந்தா⁴னுஸ்ஸரணகாலே அஜ்ஜ²த்தாரம்மணம், பரஸ்ஸ க²ந்தா⁴னஞ்சேவ நாமகோ³த்தஸ்ஸ ச அனுஸ்ஸரணகாலே ப³ஹித்³தா⁴ரம்மணம்.

தி³ப்³ப³சக்கு²ஞாணசதுத்த²ம் அத்தனோ ரூபாரம்மணகாலே அஜ்ஜ²த்தாரம்மணம், பரஸ்ஸ ரூபாரம்மணகாலே ப³ஹித்³தா⁴ரம்மணம், உப⁴யவஸேனாபி அஜ்ஜ²த்தப³ஹித்³தா⁴ரம்மணம்.

யதா²கம்மூபக³ஞாணசதுத்த²ம் அத்தனோ கம்மஜானனகாலே அஜ்ஜ²த்தாரம்மணம், பரஸ்ஸ கம்மஜானனகாலே ப³ஹித்³தா⁴ரம்மணம், உப⁴யவஸேனாபி அஜ்ஜ²த்தப³ஹித்³தா⁴ரம்மணம்.

அனாக³தம்ஸஞாணசதுத்த²ம் அத்தனோ அனாக³தே நிப்³ப³த்திஜானனகாலே அஜ்ஜ²த்தாரம்மணம், பரஸ்ஸ க²ந்தா⁴னுஸ்ஸரணகாலே சேவ நாமகோ³த்தானுஸ்ஸரணகாலே ச ப³ஹித்³தா⁴ரம்மணம், உப⁴யவஸேனாபி அஜ்ஜ²த்தப³ஹித்³தா⁴ரம்மணம்.

ஆகாஸானஞ்சாயதனசதுத்த²ம் ப³ஹித்³தா⁴ரம்மணம். ஆகிஞ்சஞ்ஞாயதனசதுத்த²ம் நவத்தப்³பா³ரம்மணம். விஞ்ஞாணஞ்சாயதனனேவஸஞ்ஞானாஸஞ்ஞாயதனசதுத்த²ம் அஜ்ஜ²த்தாரம்மணம்.

லோகுத்தரசதுத்த²ம் ப³ஹித்³தா⁴ரம்மணமேவ. கிரியதோபி த்³வாத³ஸஸு ஜா²னேஸு அயமேவ நயோதி.

இமஸ்மிம் பன ஜா²னவிப⁴ங்கே³ ஸம்மாஸம்பு³த்³தே⁴ன ஸுத்தந்தபா⁴ஜனீயேபி லோகியலோகுத்தரமிஸ்ஸகானேவ ஜா²னானி கதி²தானி; அபி⁴த⁴ம்மபா⁴ஜனீயேபி பஞ்ஹாபுச்ச²கேபி. தயோபி ஹி ஏதே நயா தேபூ⁴மகத⁴ம்மமிஸ்ஸகத்தா ஏகபரிச்சே²தா³ ஏவ. ஏவமயம் ஜா²னவிப⁴ங்கோ³பி தேபரிவட்டம் நீஹரித்வாவ பா⁴ஜேத்வா த³ஸ்ஸிதோதி.

ஸம்மோஹவினோத³னியா விப⁴ங்க³ட்ட²கதா²ய

ஜா²னவிப⁴ங்க³வண்ணனா நிட்டி²தா.