4. அட்ட²கதா²கண்டோ³

திகஅத்து²த்³தா⁴ரவண்ணனா

1384. இதா³னி நிக்கே²பகண்டா³னந்தரம் ட²பிதஸ்ஸ அட்ட²கதா²கண்ட³ஸ்ஸ வண்ணனாக்கமோ அனுப்பத்தோ. கஸ்மா பனேதம் அட்ட²கதா²கண்ட³ம் நாம ஜாதந்தி? தேபிடகஸ்ஸ பு³த்³த⁴வசனஸ்ஸ அத்த²ம் உத்³த⁴ரித்வா ட²பிதத்தா. தீஸுபி ஹி பிடகேஸு த⁴ம்மந்தரம் ஆக³தம் அட்ட²கதா²கண்டே³னேவ பரிச்சி²ந்தி³த்வா வினிச்சி²தம் ஸுவினிச்சி²தம் நாம ஹோதி. ஸகலே அபி⁴த⁴ம்மபிடகே நயமக்³க³ம் மஹாபகரணே பஞ்ஹுத்³தா⁴ரம் க³ணனசாரம் அஸல்லக்கே²ந்தேனாபி அட்ட²கதா²கண்ட³தோயேவ ஸமானேதும் வட்டதி.

குதோ பப⁴வம் பன ஏதந்தி? ஸாரிபுத்தத்தே²ரப்பப⁴வம். ஸாரிபுத்தத்தே²ரோ ஹி ஏகஸ்ஸ அத்தனோ ஸத்³தி⁴விஹாரிகஸ்ஸ நிக்கே²பகண்டே³ அத்து²த்³தா⁴ரம் ஸல்லக்கே²தும் அஸக்கோந்தஸ்ஸ அட்ட²கதா²கண்ட³ம் கதே²த்வா அதா³ஸி. இத³ம் பன மஹாஅட்ட²கதா²யம் படிக்கி²பித்வா இத³ம் வுத்தம் – அபி⁴த⁴ம்மோ நாம ந ஸாவகவிஸயோ, ந ஸாவககோ³சரோ; பு³த்³த⁴விஸயோ ஏஸ, பு³த்³த⁴கோ³சரோ. த⁴ம்மஸேனாபதி பன ஸத்³தி⁴விஹாரிகேன புச்சி²தோ தம் ஆதா³ய ஸத்து² ஸந்திகம் க³ந்த்வா ஸம்மாஸம்பு³த்³த⁴ஸ்ஸ கதே²ஸி. ஸம்மாஸம்பு³த்³தோ⁴ தஸ்ஸ பி⁴க்கு²னோ அட்ட²கதா²கண்ட³ம் கதே²த்வா அதா³ஸி. கத²ம்? ப⁴க³வா ஹி ‘கதமே த⁴ம்மா குஸலா’தி புச்சி². ‘குஸலா த⁴ம்மா நாம கதமே’தி ஸல்லக்கே²ஸீதி அத்தோ². அத²ஸ்ஸ துண்ஹீபூ⁴தஸ்ஸ ‘நனு யம் மயா கதமே த⁴ம்மா குஸலா? யஸ்மிம் ஸமயே காமாவசரம் குஸலம் சித்தம் உப்பன்னம் ஹோதீதிஆதி³னா நயேன பூ⁴மிபே⁴த³தோ குஸலம் த³ஸ்ஸிதம், ஸப்³ப³ம்பி தம் சதூஸு பூ⁴மீஸு குஸலம், இமே த⁴ம்மா குஸலா’தி இமினா நயேன கண்ணிகம் கண்ணிகம் க⁴டம் க⁴டம் கோ³ச்ச²கம் கோ³ச்ச²கம் கத்வா அத்து²த்³தா⁴ரவஸேன குஸலாதி³த⁴ம்மே த³ஸ்ஸேந்தோ கதே²த்வா அதா³ஸி.

தத்த² சதூஸூதி காமாவசரரூபாவசராரூபாவசரஅபரியாபன்னாஸு. குஸலந்தி ப²ஸ்ஸாதி³பே⁴த³ம் குஸலம். இமே த⁴ம்மா குஸலாதி இமே ஸப்³பே³பி தாஸு தாஸு பூ⁴மீஸு வுத்தா ப²ஸ்ஸாத³யோ த⁴ம்மா குஸலா நாம.

1385. அகுஸலானம் பன பூ⁴மிவஸேன பே⁴தா³பா⁴வதோ த்³வாத³ஸ அகுஸலசித்துப்பாதா³தி ஆஹ. தத்த² உப்பஜ்ஜதீதி உப்பாதோ³. சித்தமேவ உப்பாதோ³ சித்துப்பாதோ³. தே³ஸனாஸீஸமேவ சேதம். யதா² பன ‘ராஜா ஆக³தோ’தி வுத்தே அமச்சாதீ³னம்பி ஆக³மனம் வுத்தமேவ ஹோதி, ஏவம் ‘சித்துப்பாதா³’தி வுத்தே தேஹி ஸம்பயுத்தத⁴ம்மாபி வுத்தாவ ஹோந்தீதி. ஸப்³ப³த்த² சித்துப்பாத³க்³க³ஹணேன ஸஸம்பயுத்தத⁴ம்மம் சித்தம் க³ஹிதந்தி வேதி³தப்³ப³ம். இதோ பரம் சதூஸு பூ⁴மீஸு விபாகோதிஆதீ³னம் ஸப்³பே³ஸம்பி திகது³கபா⁴ஜனீயபதா³னம் அத்தோ², வேத³னாத்திகாதீ³ஸு ச ஸுகா²தீ³னம் நவத்தப்³ப³தா ஹேட்டா² வுத்தனயேனேவ பாளியத்த²ம் வீமம்ஸித்வா வேதி³தப்³பா³. விஸேஸமத்தமேவ பன வக்கா²ம.

1420. தத்த² பரித்தாரம்மணத்திகே தாவ ஸப்³போ³ காமாவசரஸ்ஸ விபாகோதி ஏத்த² த்³விபஞ்சவிஞ்ஞாணானி சக்கு²பஸாதா³த³யோ நிஸ்ஸாய நியமேனேவ இட்டா²னிட்டா²தி³பே⁴தே³ ரூபஸத்³த³க³ந்த⁴ரஸபோ²ட்ட²ப்³ப³த⁴ம்மே ஆரப்³ப⁴ பவத்தந்தீதி பரித்தாரம்மணானி. குஸலாகுஸலவிபாகா பன த்³வே மனோதா⁴துயோ ஹத³யவத்து²ம் நிஸ்ஸாய சக்கு²விஞ்ஞாணாதீ³னம் அனந்தரா நியமதோ ரூபாதீ³னேவ ஆரப்³ப⁴ பவத்தந்தீதி பரித்தாரம்மணா. குஸலவிபாகாஹேதுகமனோவிஞ்ஞாணதா⁴து ஸோமனஸ்ஸஸஹக³தா பஞ்சத்³வாரே ஸந்தீரணவஸேன ச²ஸு த்³வாரேஸு ததா³ரம்மணவஸேனாதி நியமதோ ரூபாதீ³னி ச² பரித்தாரம்மணானேவ ஆரப்³ப⁴ பவத்ததீதி பரித்தாரம்மணா. குஸலாகுஸலவிபாகாஹேதுகமனோவிஞ்ஞாணதா⁴துத்³வயம் பஞ்சத்³வாரே ஸந்தீரணவஸேன ச²ஸு த்³வாரேஸு ததா³ரம்மணவஸேன நியமதோ ரூபாதீ³னி ச² பரித்தாரம்மணானேவ ஆரப்³ப⁴ பவத்ததி. படிஸந்தி⁴வஸேன பவத்தமானம்பி பரித்தம் கம்மம் கம்மனிமித்தம் க³தினிமித்தம் வா ஆரம்மணம் கரோதி, பவத்தியம் ப⁴வங்க³வஸேன, பரியோஸானே சுதிவஸேன பவத்தமானம்பி ததே³வ ஆரம்மணம் கரோதீதி பரித்தாரம்மணம். அட்ட² பன ஸஹேதுகவிபாகசித்துப்பாதா³ ஏத்த² வுத்தனயேனேவ ததா³ரம்மணவஸேன படிஸந்தி⁴ப⁴வங்க³சுதிவஸேன ச பரித்தத⁴ம்மேயேவ ஆரப்³ப⁴ பவத்தந்தி. கிரியமனோதா⁴து பஞ்சத்³வாரே ரூபாதீ³னி ஆரப்³ப⁴ பவத்ததி. ஸோமனஸ்ஸஸஹக³தாஹேதுககிரியமனோவிஞ்ஞாணதா⁴து ச²ஸு த்³வாரேஸு பச்சுப்பன்னே மனோத்³வாரே அதீதானாக³தேபி பரித்தே ரூபாதி³த⁴ம்மேயேவ ஆரப்³ப⁴ கீ²ணாஸவானம் பஹட்டா²காரம் குருமானா பவத்ததீதி பரித்தாரம்மணா. ஏவமிமே பஞ்சவீஸதி சித்துப்பாதா³ ஏகந்தேனேவ பரித்தாரம்மணாதி வேதி³தப்³பா³.

1421. விஞ்ஞாணஞ்சாயதனனேவஸஞ்ஞானாஸஞ்ஞாயதனத⁴ம்மா அத்தனோ அத்தனோ ஹேட்டி²மம் ஸமாபத்திம் ஆரப்³ப⁴ பவத்தனதோ மஹக்³க³தாரம்மணா. ஏவ மக்³க³ப²லத⁴ம்மா நிப்³பா³னாரம்மணத்தா அப்பமாணாரம்மணா.

குஸலதோ சத்தாரோ கிரியதோ சத்தாரோதி அட்ட² ஞாணவிப்பயுத்தசித்துப்பாதா³ ஸேக்க²புது²ஜ்ஜனகீ²ணாஸவானம் அஸக்கச்சதா³னபச்சவேக்க²ணத⁴ம்மஸவனாதீ³ஸு காமாவசரத⁴ம்மே ஆரப்³ப⁴ பவத்திகாலே பரித்தாரம்மணா. அதிபகு³ணானம் பட²மஜ்ஜா²னாதீ³னம் பச்சவேக்க²ணகாலே மஹக்³க³தாரம்மணா. கஸிணனிமித்தாதி³பஞ்ஞத்திபச்சவேக்க²ணகாலே நவத்தப்³பா³ரம்மணா. அகுஸலதோ சத்தாரோ தி³ட்டி²க³தஸம்பயுத்தசித்துப்பாதா³ பஞ்சபண்ணாஸாய காமாவசரத⁴ம்மானம் ‘ஸத்தோ ஸத்தோ’தி பராமஸனஅஸ்ஸாத³னாபி⁴னந்த³னகாலே பரித்தாரம்மணா. தேனேவாகாரேன ஸத்தவீஸதி மஹக்³க³தத⁴ம்மே ஆரப்³ப⁴ பவத்திகாலே மஹக்³க³தாரம்மணா. பண்ணத்தித⁴ம்மே ஆரப்³ப⁴ பவத்தனகாலே ஸியா நவத்தப்³பா³ரம்மணா. தி³ட்டி²விப்பயுத்தானம் தேயேவ த⁴ம்மே ஆரப்³ப⁴ கேவலம் அஸ்ஸாத³னாபி⁴னந்த³னவஸேன, பவத்தியம் படிக⁴ஸம்பயுத்தானம் தோ³மனஸ்ஸவஸேன, விசிகிச்சா²ஸம்பயுத்தசித்துப்பாத³ஸ்ஸ அனிட்ட²ங்க³தவஸேன, உத்³த⁴ச்சஸஹக³தஸ்ஸ விக்கே²பவஸேன அவூபஸமவஸேன ச பவத்தியம் பரித்தமஹக்³க³தனவத்தப்³பா³ரம்மணதா வேதி³தப்³பா³. ஏதேஸு பன ஏகத⁴ம்மோபி அப்பமாணே ஆரப்³ப⁴ பவத்திதும் ந ஸக்கோதி, தஸ்மா ந அப்பமாணாரம்மணா.

குஸலதோ சத்தாரோ கிரியதோ சத்தாரோதி அட்ட² ஞாணஸம்பயுத்தசித்துப்பாதா³ ஸேக்க²புது²ஜ்ஜனகீ²ணாஸவானம் ஸக்கச்சதா³னபச்சவேக்க²ணத⁴ம்மஸவனாதீ³ஸு யதா²வுத்தப்பகாரே த⁴ம்மே ஆரப்³ப⁴ பவத்திகாலே பரித்தமஹக்³க³தனவத்தப்³பா³ரம்மணா ஹோந்தி. கோ³த்ரபு⁴காலே லோகுத்தரத⁴ம்மே பச்சவேக்க²ணகாலே ச நேஸம் அப்பமாணாரம்மணதா வேதி³தப்³பா³.

யம் பனேதம் ரூபாவசரசதுத்த²ஜ்ஜா²னம் தம் ஸப்³ப³த்த²பாத³கசதுத்த²ம் ஆகாஸகஸிணசதுத்த²ம் ஆலோககஸிணசதுத்த²ம் ப்³ரஹ்மவிஹாரசதுத்த²ம் ஆனாபானசதுத்த²ம் இத்³தி⁴வித⁴சதுத்த²ம் தி³ப்³ப³ஸோதசதுத்த²ம் சேதோபரியஞாணசதுத்த²ம் யதா²கம்முபக³ஞாணசதுத்த²ம் தி³ப்³ப³சக்கு²ஞாணசதுத்த²ம் புப்³பே³னிவாஸஞாணசதுத்த²ம் அனாக³தம்ஸஞாணசதுத்த²ந்தி குஸலதோபி கிரியதோபி த்³வாத³ஸவித⁴ம் ஹோதி.

தத்த² ‘ஸப்³ப³த்த²பாத³கசதுத்த²ம்’ நாம அட்ட²ஸு கஸிணேஸு சதுத்த²ஜ்ஜா²னம். தஞ்ஹி விபஸ்ஸனாயபி பாத³கம் ஹோதி, அபி⁴ஞ்ஞானம்பி, நிரோத⁴ஸ்ஸாபி, வட்டஸ்ஸாபி பாத³கம் ஹோதியேவாதி ஸப்³ப³த்த²பாத³கந்தி வுத்தம். ‘ஆகாஸகஸிணஆலோககஸிணசதுத்தா²னி’ பன விபஸ்ஸனாயபி அபி⁴ஞ்ஞானம்பி வட்டஸ்ஸாபி பாத³கானி ஹோந்தி, நிரோத⁴பாத³கானேவ ந ஹோந்தி. ‘ப்³ரஹ்மவிஹாரஆனாபானசதுத்தா²னி’ விபஸ்ஸனாய சேவ வட்டஸ்ஸ ச பாத³கானி ஹோந்தி, அபி⁴ஞ்ஞானம் பன நிரோத⁴ஸ்ஸ ச பாத³கானி ந ஹோந்தி. தத்த² த³ஸவித⁴ம்பி கஸிணஜ்ஜா²னம் கஸிணபண்ணத்திம் ஆரப்³ப⁴ பவத்தத்தா, ப்³ரஹ்மவிஹாரசதுத்த²ம் ஸத்தபண்ணத்திம் ஆரப்³ப⁴ பவத்தத்தா, ஆனாபானசதுத்த²ம் நிமித்தம் ஆரப்³ப⁴ பவத்தத்தா பரித்தாதி³வஸேன நவத்தப்³ப³த⁴ம்மாரம்மணதோ நவத்தப்³பா³ரம்மணம் நாம ஹோதி.

‘இத்³தி⁴வித⁴சதுத்த²ம்’ பரித்தமஹக்³க³தாரம்மணம் ஹோதி. கத²ம்? தஞ்ஹி யதா³ காயம் சித்தஸன்னிஸ்ஸிதம் கத்வா அதி³ஸ்ஸமானேன காயேன க³ந்துகாமோ சித்தவஸேன காயம் பரிணாமேதி, மஹக்³க³தசித்தே ஸமோத³ஹதி, ஸமாரோபேதி, ததா³ உபயோக³லத்³த⁴ம் ஆரம்மணம் ஹோதீதி கத்வா ரூபகாயாரம்மணதோ பரித்தாரம்மணம் ஹோதி. யதா³ சித்தம் காயஸன்னிஸ்ஸிதம் கத்வா தி³ஸ்ஸமானேன காயேன க³ந்துகாமோ காயவஸேன சித்தம் பரிணாமேதி, பாத³கஜ்ஜா²னசித்தம் ரூபகாயே ஸமோத³ஹதி, ஸமாரோபேதி, ததா³ உபயோக³லத்³த⁴ம் ஆரம்மணம் ஹோதீதி கத்வா மஹக்³க³தசித்தாரம்மணதோ மஹக்³க³தாரம்மணம் ஹோதி.

‘தி³ப்³ப³ஸோதசதுத்த²ம்’ ஸத்³த³ம் ஆரப்³ப⁴ பவத்தத்தா ஏகந்தபரித்தாரம்மணமேவ. ‘சேதோபரியஞாணசதுத்த²ம்’ பரித்தமஹக்³க³தஅப்பமாணாரம்மணம் ஹோதி. கத²ம்? தஞ்ஹி பரேஸம் காமாவசரசித்தஜானனகாலே பரித்தாரம்மணம் ஹோதி, ரூபாவசராரூபாவசரசித்தஜானனகாலே மஹக்³க³தாரம்மணம், மக்³க³ப²லஜானனகாலே அப்பமாணாரம்மணம் ஹோதி. ஏத்த² ச புது²ஜ்ஜனோ ஸோதாபன்னஸ்ஸ சித்தம் ந ஜானாதி, ஸோதாபன்னோ வா ஸகதா³கா³மிஸ்ஸாதி ஏவம் யாவ அரஹதோ நேதப்³ப³ம். அரஹா பன ஸப்³பே³ஸம் சித்தம் ஜானாதி. அஞ்ஞோபி ச உபரிமோ ஹேட்டி²மஸ்ஸாதி அயம் விஸேஸோ வேதி³தப்³போ³. ‘யதா²கம்முபக³ஞாணசதுத்த²ம்’ காமாவசரகம்மஜானனகாலே பரித்தாரம்மணம் ஹோதி, ரூபாவசராரூபாவசரகம்மஜானனகாலே மஹக்³க³தாரம்மணம்.

‘தி³ப்³ப³சக்கு²ஞாணசதுத்த²ம்’ ரூபாரம்மணத்தா ஏகந்தபரித்தாரம்மணமேவ. ‘புப்³பே³னிவாஸஞாணசதுத்த²ம்’ பரித்தமஹக்³க³தஅப்பமாணனவத்தப்³பா³ரம்மணம் ஹோதி. கத²ம்? தஞ்ஹி காமாவசரக்க²ந்தா⁴னுஸ்ஸரணகாலே பரித்தாரம்மணம் ஹோதி. ரூபாவசராரூபாவசரக்க²ந்தா⁴னுஸ்ஸரணகாலே மஹக்³க³தாரம்மணம். அதீதே அத்தனா வா பரேஹி வா பா⁴விதமக்³க³ம் ஸச்சி²கதப²லஞ்ச அனுஸ்ஸரணகாலே அப்பமாணாரம்மணம். அதீதே பு³த்³தா⁴ மக்³க³ம் பா⁴வயிம்ஸு, ப²லம் ஸச்சா²கம்ஸு, நிப்³பா³னதா⁴துயா பரினிப்³பா³யிம்ஸூதி சி²ன்னவடுமகானுஸ்ஸரணவஸேன மக்³க³ப²லனிப்³பா³னபச்சவேக்க²ணதோபி அப்பமாணாரம்மணம். அதீதே ‘விபஸ்ஸீ நாம ப⁴க³வா’ அஹோஸி. தஸ்ஸ ‘ப³ந்து⁴மதீ நாம நக³ரம் அஹோஸி, ப³ந்து⁴மா நாம ராஜா பிதா, ப³ந்து⁴மதீ நாம மாதா’திஆதி³னா நயேன நாமகோ³த்தபத²வீனிமித்தாதி³அனுஸ்ஸரணகாலே நவத்தப்³பா³ரம்மணம் ஹோதி.

‘அனாக³தம்ஸஞாணசதுத்தே²’பி ஏஸேவ நயோ. தம்பி அயம் அனாக³தே ‘காமாவசரே நிப்³ப³த்திஸ்ஸதீ’தி ஜானனகாலே பரித்தாரம்மணம் ஹோதி. ‘ரூபாவசரே வா அரூபாவசரே வா நிப்³ப³த்திஸ்ஸதீ’தி ஜானனகாலே மஹக்³க³தாரம்மணம். ‘மக்³க³ம் பா⁴வேஸ்ஸதி ப²லம் ஸச்சி²கரிஸ்ஸதி’ ‘நிப்³பா³னதா⁴துயா பரினிப்³பா³யிஸ்ஸதீ’தி ஜானனகாலே அப்பமாணாரம்மணம். அனாக³தே ‘‘மேத்தேய்யோ நாம ப⁴க³வா உப்பஜ்ஜிஸ்ஸதி, ஸுப்³ரஹ்மா நாமஸ்ஸ ப்³ராஹ்மணோ பிதா ப⁴விஸ்ஸதி, ப்³ரஹ்மவதீ நாம ப்³ராஹ்மணீ மாதா ப⁴விஸ்ஸதீ’’திஆதி³னா நயேன நாமகோ³த்தஜானனகாலே நவத்தப்³பா³ரம்மணம் ஹோதி.

அரூபாவசரசதுத்த²ம் பன ஆஸவானம் க²யசதுத்த²ஞ்ச பாளியம் ஆக³தட்டா²னேயேவ கதே²ஸ்ஸாமி. கிரியாஹேதுகமனோவிஞ்ஞாணதா⁴து உபேக்கா²ஸஹக³தா ஸப்³பே³ஸம்பி ஏதேஸம் குஸலாகுஸலகிரியசித்தானம் புரேசாரிகா. தஸ்ஸா தேஸு வுத்தனயேனேவ ஆரம்மணபே⁴தோ³ வேதி³தப்³போ³. பஞ்சத்³வாரே பன வோட்ட²ப்³ப³னவஸேன பவத்தியம் ஏகந்தபரித்தாரம்மணாவ ஹோதி. ரூபாவசரதிகசதுக்கஜ்ஜா²னாதீ³னி பரித்தாதி³பா⁴வேன நவத்தப்³ப³த⁴ம்மம் ஆரப்³ப⁴ பவத்திதோ நவத்தப்³பா³ரம்மணானி. ஏத்த² ஹி ரூபாவசரானி பத²வீகஸிணாதீ³ஸு பவத்தந்தி, ஆகாஸானஞ்சாயதனம் உக்³கா⁴டிமாகாஸே, ஆகிஞ்சஞ்ஞாயதனம் விஞ்ஞாணாபக³மேதி.

1429. மக்³கா³ரம்மணத்திகே ஆதி³ம்ஹி வுத்தா அட்ட² ஞாணஸம்பயுத்தசித்துப்பாதா³ ஸேக்கா²ஸேக்கா²னம் அத்தனா படிவித்³த⁴மக்³கா³னம் பச்சவேக்க²ணகாலே மக்³கா³ரம்மணா, மக்³கே³ன பன அஸஹஜாதத்தா ந மக்³க³ஹேதுகா, அத்தனா படிவித்³த⁴மக்³க³ம் க³ரும் கத்வா பச்சவேக்க²ணகாலே ஆரம்மணாதி⁴பதிவஸேன மக்³கா³தி⁴பதினோ, அஞ்ஞத⁴ம்மாரம்மணகாலே ந வத்தப்³பா³ மக்³கா³ரம்மணாதிபி மக்³கா³தி⁴பதினோதிபி. சத்தாரோ அரியமக்³கா³ மக்³க³ஸங்கா²தஸ்ஸ மக்³க³ஸம்பயுத்தஸ்ஸ வா ஹேதுனோ அத்தி²தாய ஏகந்ததோ மக்³க³ஹேதுகாவ. வீரியம் பன வீமம்ஸம் வா ஜேட்ட²கம் கத்வா மக்³க³பா⁴வனாகாலே ஸஹஜாதாதி⁴பதினா ஸியா மக்³கா³தி⁴பதினோ, ச²ந்த³சித்தானம் அஞ்ஞதரஜேட்ட²ககாலே ஸியா ந வத்தப்³பா³ மக்³கா³தி⁴பதினோதி.

த்³வாத³ஸவிதே⁴ ரூபாவசரசதுத்த²ஜ்ஜா²னே ஸப்³ப³த்த²பாத³கசதுத்தா²தீ³னி நவ ஜா²னானி நேவ மக்³கா³ரம்மணானி ந மக்³க³ஹேதுகானி ந மக்³கா³தி⁴பதீனி. சேதோபரியஞாணபுப்³பே³னிவாஸஞாணஅனாக³தம்ஸஞாணசதுத்தா²னி பன அரியானம் மக்³க³சித்தஜானனகாலே மக்³கா³ரம்மணானி ஹோந்தி, மக்³கே³ன பன அஸஹஜாதத்தா ந மக்³க³ஹேதுகானி, மக்³க³ம் க³ரும் கத்வா அப்பவத்திதோ ந மக்³கா³தி⁴பதீனி. கஸ்மா பனேதானி ந மக்³க³ம் க³ரும் கரோந்தீதி? அத்தனோ மஹக்³க³ததாய. யதா² ஹி ராஜானம் ஸப்³போ³ லோகோ க³ரும் கரோதி, மாதாபிதரோ பன ந கரோந்தி. ந ஹி தே ராஜானம் தி³ஸ்வா ஆஸனா வுட்ட²ஹந்தி, ந அஞ்ஜலிகம்மாதீ³னி கரோந்தி, த³ஹரகாலே வோஹரிதனயேனேவ வோஹரந்தி. ஏவமேதானிபி அத்தனோ மஹக்³க³ததாய ந மக்³க³ம் க³ரும் கரோந்தி.

கிரியாஹேதுகமனோவிஞ்ஞாணதா⁴துபி அரியானம் மக்³க³பச்சவேக்க²ணகாலே பச்சவேக்க²ணபுரேசாரிகத்தா மக்³கா³ரம்மணா ஹோதி, மக்³கே³ன அஸஹஜாதத்தா பன ந மக்³க³ஹேதுகா, மக்³க³ம் க³ரும் கத்வா அப்பவத்திதோ ந மக்³கா³தி⁴பதி. கஸ்மா க³ரும் ந கரோதீதி? அத்தனோ அஹேதுகதாய ஹீனதாய ஜளதாய. யதா² ஹி ராஜானம் ஸப்³போ³ லோகோ க³ரும் கரோதி, அத்தனோ பரிஜனா பன கு²ஜ்ஜவாமனகசேடகாத³யோ அத்தனோ அஞ்ஞாணதாய பண்டி³தமனுஸ்ஸா விய நாதிக³ரும் கரோந்தி, ஏவமேவ இத³ம்பி சித்தம் அத்தனோ அஹேதுகதாய ஹீனதாய ஜளதாய மக்³க³ம் க³ரும் ந கரோதி.

ஞாணவிப்பயுத்தகுஸலாதீ³னி ஞாணாபா⁴வேன சேவ லோகியத⁴ம்மாரம்மணதாய ச மக்³கா³ரம்மணாதி³பா⁴வம் ந லப⁴ந்தி, நவத்தப்³பா³ரம்மணானேவ ஹோந்தீதி வேதி³தப்³பா³னீதி.

1432. அதீதாரம்மணத்திகே விஞ்ஞாணஞ்சாயதனனேவஸஞ்ஞானாஸஞ்ஞாயதனத⁴ம்மா ஹேட்டா² அதீதஸமாபத்திம் ஆரப்³ப⁴ பவத்திதா ஏகந்தேன அதீதாரம்மணாவ.

1433. நியோகா³ அனாக³தாரம்மணா நத்தீ²தி நியமேன பாடியேக்கம் சித்தம் அனாக³தாரம்மணம் நாம நத்தி². நனு ச அனாக³தம்ஸஞாணம் ஏகந்தேன அனாக³தாரம்மணம், சேதோபரியஞாணம்பி அனாக³தம் ஆரப்³ப⁴ பவத்ததீதி? நோ ந பவத்ததி. பாடியேக்கம் பன ஏதம் ஏகம் சித்தம் நாம நத்தி². ரூபாவசரசதுத்த²ஜ்ஜா²னேன ஸங்க³ஹிதத்தா அஞ்ஞேஹி மஹக்³க³தசித்தேஹி மிஸ்ஸகம் ஹோதி. தேன வுத்தம் ‘நியோகா³ அனாக³தாரம்மணா நத்தீ²’தி.

1434. த்³விபஞ்சவிஞ்ஞாணானி, திஸ்ஸோ மனோதா⁴துயோ ச பச்சுப்பன்னேஸு ரூபாதீ³ஸு பவத்திதோ பச்சுப்பன்னாரம்மணா நாம. த³ஸ சித்துப்பாதா³தி ஏத்த² அட்ட² தாவ ஸஹேதுகா தே³வமனுஸ்ஸானம் படிஸந்தி⁴க்³க³ஹணகாலே கம்மம் வா கம்மனிமித்தம் வா ஆரப்³ப⁴ பவத்தியம் அதீதாரம்மணா. ப⁴வங்க³சுதிகாலேஸுபி ஏஸேவ நயோ. க³தினிமித்தம் பன ஆரப்³ப⁴ படிஸந்தி⁴க்³க³ஹணகாலே ததோ பரம் ப⁴வங்க³காலே ச பச்சுப்பன்னாரம்மணா. ததா² பஞ்சத்³வாரே ததா³ரம்மணவஸேன பவத்தியம். மனோத்³வாரே பன அதீதானாக³தபச்சுப்பன்னாரம்மணானம் ஜவனானம் ஆரம்மணம் க³ஹேத்வா பவத்திதோ அதீதானாக³தபச்சுப்பன்னாரம்மணா. ‘குஸலவிபாகாஹேதுகஉபேக்கா²ஸஹக³தமனோவிஞ்ஞாணதா⁴துய’ம்பி ஏஸேவ நயோ. கேவலஞ்ஹி ஸா மனுஸ்ஸேஸு ஜச்சந்தா⁴தீ³னம் படிஸந்தி⁴ ஹோதி. பஞ்சத்³வாரே ச ஸந்தீரணவஸேனாபி பச்சுப்பன்னாரம்மணா ஹோதீதி அயமேத்த² விஸேஸோ. ‘ஸோமனஸ்ஸஸஹக³தா’ பன பஞ்சத்³வாரே ஸந்தீரணவஸேன ததா³ரம்மணவஸேன ச பச்சுப்பன்னாரம்மணா ஹோதி. மனோத்³வாரே ததா³ரம்மணவஸேன ஸஹேதுகவிபாகா விய அதீதானாக³தபச்சுப்பன்னாரம்மணாதி வேதி³தப்³பா³.

‘அகுஸலவிபாகாஹேதுகமனோவிஞ்ஞாணதா⁴து’ பன குஸலவிபாகாய உபேக்கா²ஸஹக³தாஹேதுகாய ஸமானக³திகா ஏவ. கேவலஞ்ஹி ஸா ஆபாயிகானம் படிஸந்தி⁴ப⁴வங்க³சுதிவஸேன பவத்ததீதி அயமேத்த² விஸேஸோ. ‘கிரியாஹேதுகமனோவிஞ்ஞாணதா⁴து’ ஸோமனஸ்ஸஸஹக³தா கீ²ணாஸவானம் பஞ்சத்³வாரே பஹட்டா²காரம் குருமானா பச்சுப்பன்னாரம்மணா ஹோதி. மனோத்³வாரே அதீதாதி³பே⁴தே³ த⁴ம்மே ஆரப்³ப⁴ ஹஸிதுப்பாத³வஸேன பவத்தியம் அதீதானாக³தபச்சுப்பன்னாரம்மணா ஹோதி.

காமாவசரகுஸலந்திஆதீ³ஸு குஸலதோ தாவ சத்தாரோ ஞாணஸம்பயுத்தசித்துப்பாதா³. ஸேக்க²புது²ஜ்ஜனானம் அதீதாதி³பே⁴தா³னி க²ந்த⁴தா⁴துஆயதனானி ஸம்மஸந்தானம் பச்சவேக்க²ந்தானம் அதீதானாக³தபச்சுப்பன்னாரம்மணா ஹோந்தி. பண்ணத்தினிப்³பா³னபச்சவேக்க²ணே நவத்தப்³பா³ரம்மணா. ஞாணவிப்பயுத்தேஸுபி ஏஸேவ நயோ. கேவலஞ்ஹி தேஹி மக்³க³ப²லனிப்³பா³னபச்சவேக்க²ணா நத்தி². அயமேவேத்த² விஸேஸோ.

அகுஸலதோ சத்தாரோ தி³ட்டி²ஸம்பயுத்தசித்துப்பாதா³ அதீதாதி³பே⁴தா³னம் க²ந்த⁴தா⁴துஆயதனானம் அஸ்ஸாத³னாபி⁴னந்த³னபராமாஸகாலே அதீதாதி³ஆரம்மணா ஹோந்தி. பண்ணத்திம் ஆரப்³ப⁴ அஸ்ஸாதே³ந்தஸ்ஸ அபி⁴னந்த³ந்தஸ்ஸ ‘ஸத்தோ ஸத்தோ’தி பராமஸித்வா க³ண்ஹந்தஸ்ஸ நவத்தப்³பா³ரம்மணா ஹோந்தி. தி³ட்டி²விப்பயுத்தேஸுபி ஏஸேவ நயோ. கேவலஞ்ஹி தேஹி பராமாஸக்³க³ஹணம் நத்தி². த்³வே படிக⁴ஸம்பயுத்தசித்துப்பாதா³ அதீதாதி³பே⁴தே³ த⁴ம்மே ஆரப்³ப⁴ தோ³மனஸ்ஸிதானம் அதீதாதி³ஆரம்மணா, பண்ணத்திம் ஆரப்³ப⁴ தோ³மனஸ்ஸிதானம் நவத்தப்³பா³ரம்மணா. விசிகிச்சு²த்³த⁴ச்சஸம்பயுத்தா தேஸு ஏவ த⁴ம்மேஸு அனிட்ட²ங்க³தபா⁴வேன சேவ உத்³த⁴தபா⁴வேன ச பவத்தியம் அதீதானாக³தபச்சுப்பன்னனவத்தப்³பா³ரம்மணா. கிரியதோ அட்ட² ஸஹேதுகசித்துப்பாதா³ குஸலசித்துப்பாத³க³திகா ஏவ. கிரியாஹேதுகமனோவிஞ்ஞாணதா⁴து உபேக்கா²ஸஹக³தா பஞ்சத்³வாரே வோட்ட²ப்³ப³னவஸேன பவத்தியம் பச்சுப்பன்னாரம்மணாவ. மனோத்³வாரே அதீதானாக³தபச்சுப்பன்னாரம்மணானஞ்சேவ பண்ணத்தினிப்³பா³னாரம்மணானஞ்ச ஜவனானம் புரேசாரிககாலே அதீதானாக³தபச்சுப்பன்னனவத்தப்³பா³ரம்மணா.

யதா²வுத்தப்பபே⁴தே³ ரூபாவசரஜ்ஜா²னே ஸப்³ப³த்த²பாத³கசதுத்த²ம் ஆகாஸகஸிணசதுத்த²ம் ஆலோககஸிணசதுத்த²ம் ப்³ரஹ்மவிஹாரசதுத்த²ம் ஆனாபானசதுத்த²ந்தி இமானி பஞ்ச நவத்தப்³பா³ரம்மணானேவ. ‘இத்³தி⁴வித⁴சதுத்த²ம்’ காயவஸேன சித்தம் பரிணாமேந்தஸ்ஸ அதீதபாத³கஜ்ஜா²னசித்தம் ஆரப்³ப⁴ பவத்தனதோ அதீதாரம்மணம். மஹாதா⁴துனிதா⁴னே மஹாகஸ்ஸபத்தே²ராதீ³னம் விய அனாக³தம் அதி⁴ட்ட²ஹந்தானம் அனாக³தாரம்மணம் ஹோதி. மஹாகஸ்ஸபத்தே²ரோ கிர மஹாதா⁴துனிதா⁴னம் கரோந்தோ அனாக³தே அட்டா²ரஸவஸ்ஸாதி⁴கானி த்³வே வஸ்ஸஸதானி இமே க³ந்தா⁴ மா ஸுஸ்ஸிம்ஸு, புப்பா²னி மா மிலாயிம்ஸு, தீ³பா மா நிப்³பா³யிம்ஸூதி அதி⁴ட்ட²ஹி. ஸப்³ப³ம் ததே²வ அஹோஸி. அஸ்ஸகு³த்தத்தே²ரோ வத்தனியஸேனாஸனே பி⁴க்கு²ஸங்க⁴ம் ஸுக்க²ப⁴த்தம் பு⁴ஞ்ஜமானம் தி³ஸ்வா ‘உத³கஸோண்டி³ தி³வஸே தி³வஸே, புரேப⁴த்தம் த³தி⁴ரஸா ஹோதூ’தி அதி⁴ட்ட²ஹி. புரேப⁴த்தம் க³ஹிதம் த³தி⁴ரஸம் ஹோதி பச்சா²ப⁴த்தே பாகதிகமேவ. காயம் பன சித்தஸன்னிஸ்ஸிதம் கத்வா அதி³ஸ்ஸமானேன காயேன க³மனகாலே, அஞ்ஞஸ்ஸ வா பாடிஹாரியஸ்ஸ கரணகாலே, காயம் ஆரப்³ப⁴ பவத்தத்தா பச்சுப்பன்னாரம்மணம் ஹோதி.

‘தி³ப்³ப³ஸோதசதுத்த²ம்’ விஜ்ஜமானஸத்³த³மேவ ஆரப்³ப⁴ பவத்திதோ பச்சுப்பன்னாரம்மணம் ஹோதி. சேதோபரியஞாணசதுத்த²ம் அதீதே ஸத்ததி³வஸப்³ப⁴ந்தரே அனாக³தே ஸத்ததி³வஸப்³ப⁴ந்தரே பரேஸம் சித்தம் ஜானந்தஸ்ஸ அதீதாரம்மணம் அனாக³தாரம்மணஞ்ச ஹோதி. ஸத்ததி³வஸாதிக்கமே பன தம் ஜானிதும் ந ஸக்கோதி. அதீதானாக³தம்ஸஞாணானஞ்ஹி ஏஸ விஸயோ. ந ஏதஸ்ஸ பச்சுப்பன்னஜானனகாலே பன பச்சுப்பன்னாரம்மணம் ஹோதி.

பச்சுப்பன்னஞ்ச நாமேதம் திவித⁴ம் – க²ணபச்சுப்பன்னம் ஸந்ததிபச்சுப்பன்னம் அத்³தா⁴பச்சுப்பன்னஞ்ச. தத்த² உப்பாத³ட்டி²திப⁴ங்க³ப்பத்தம் ‘க²ணபச்சுப்பன்னம்’. ஏகத்³விஸந்ததிவாரபரியாபன்னம் ‘ஸந்ததிபச்சுப்பன்னம்’. தத்த² அந்த⁴காரே நிஸீதி³த்வா ஆலோகட்டா²னம் க³தஸ்ஸ ந தாவ ஆரம்மணம் பாகடம் ஹோதி; யாவ பன தம் பாகடம் ஹோதி, ஏத்த²ந்தரே ஏகத்³விஸந்ததிவாரா வேதி³தப்³பா³. ஆலோகட்டா²னே விசரித்வா ஓவரகம் பவிட்ட²ஸ்ஸாபி ந தாவ ஸஹஸா ரூபம் பாகடம் ஹோதி; யாவ தம் பாகடம் ஹோதி, ஏத்த²ந்தரே ஏகத்³விஸந்ததிவாரா வேதி³தப்³பா³. தூ³ரே ட²த்வா பன ரஜகானம் ஹத்த²விகாரம் க⁴ண்டி³பே⁴ரீஆதி³ஆகோடனவிகாரஞ்ச தி³ஸ்வாபி ந தாவ ஸத்³த³ம் ஸுணாதி; யாவ பன தம் ஸுணாதி, ஏதஸ்மிம்பி அந்தரே ஏகத்³விஸந்ததிவாரா வேதி³தப்³பா³. ஏவம் தாவ மஜ்ஜி²மபா⁴ணகா. ஸம்யுத்தபா⁴ணகா பன ‘ரூபஸந்ததி அரூபஸந்ததீ’தி த்³வே ஸந்ததியோ வத்வா, ‘உத³கம் அக்கமித்வா க³தஸ்ஸ யாவ தீரே அக்கந்தஉத³கலேகா² ந விப்பஸீத³தி, அத்³தா⁴னதோ ஆக³தஸ்ஸ யாவ காயே உஸுமபா⁴வோ ந வூபஸம்மதி, ஆதபா ஆக³ந்த்வா க³ப்³ப⁴ம் பவிட்ட²ஸ்ஸ யாவ அந்த⁴காரபா⁴வோ ந விக³ச்ச²தி, அந்தோக³ப்³பே⁴ கம்மட்டா²னம் மனஸிகரித்வா தி³வா வாதபானம் விவரித்வா ஓலோகேந்தஸ்ஸ யாவ அக்கீ²னம் ப²ந்த³னபா⁴வோ ந வூபஸம்மதி, அயம் ரூபஸந்ததி நாம; த்³வே தயோ ஜவனவாரா அரூபஸந்ததி நாமா’தி வத்வா ‘தது³ப⁴யம்பி ஸந்ததிபச்சுப்பன்னம் நாமா’தி வத³ந்தி.

ஏகப⁴வபரிச்சி²ன்னம் பன அத்³தா⁴பச்சுப்பன்னம் நாம. யம் ஸந்தா⁴ய ப⁴த்³தே³கரத்தஸுத்தே ‘‘யோ சாவுஸோ, மனோ யே ச த⁴ம்மா உப⁴யமேதம் பச்சுப்பன்னம். தஸ்மிம் சே பச்சுப்பன்னே ச²ந்த³ராக³படிப³த்³த⁴ம் ஹோதி விஞ்ஞாணம், ச²ந்த³ராக³படிப³த்³த⁴த்தா விஞ்ஞாணஸ்ஸ தத³பி⁴னந்த³தி, தத³பி⁴னந்த³ந்தோ பச்சுப்பன்னேஸு த⁴ம்மேஸு ஸம்ஹீரதீ’’தி (ம. நி. 3.284) வுத்தம். ஸந்ததிபச்சுப்பன்னஞ்சேத்த² அட்ட²கதா²ஸு ஆக³தம். அத்³தா⁴பச்சுப்பன்னம் ஸுத்தே.

தத்த² கேசி ‘க²ணபச்சுப்பன்னம் சித்தம் சேதோபரியஞாணஸ்ஸ ஆரம்மணம் ஹோதீ’தி வத³ந்தி. கிம்காரணா? யஸ்மா இத்³தி⁴மஸ்ஸ ச பரஸ்ஸ ச ஏகக்க²ணே சித்தம் உப்பஜ்ஜதீதி. இத³ஞ்ச நேஸம் ஓபம்மம் – யதா² ஆகாஸே கி²த்தே புப்ப²முட்டி²ம்ஹி அவஸ்ஸம் ஏகம் புப்ப²ம் ஏகஸ்ஸ வண்டம் படிவிஜ்ஜ²தி வண்டேன வண்டம் படிவிஜ்ஜ²தி, ஏவம் பரஸ்ஸ சித்தம் ஜானிஸ்ஸாமீதி ராஸிவஸேன மஹாஜனஸ்ஸ சித்தே ஆவஜ்ஜிதே அவஸ்ஸம் ஏகஸ்ஸ சித்தம் ஏகேன சித்தேன உப்பாத³க்க²ணே வா டி²திக்க²ணே வா ப⁴ங்க³க்க²ணே வா படிவிஜ்ஜ²தீதி. தம் பன வஸ்ஸஸதம்பி வஸ்ஸஸஹஸ்ஸம்பி ஆவஜ்ஜந்தோ யேன சித்தேன ஆவஜ்ஜேதி, யேன ச ஜானாதி தேஸம் த்³வின்னம் ஸஹட்டா²னாபா⁴வதோ ஆவஜ்ஜனஜவனானஞ்ச அனிட்டே² டா²னே நானாரம்மணபா⁴வப்பத்திதோ³ஸதோ அயுத்தந்தி அட்ட²கதா²ஸு படிக்கி²த்தம். ஸந்ததிபச்சுப்பன்னம் பன அத்³தா⁴பச்சுப்பன்னஞ்ச ஆரம்மணம் ஹோதீதி வேதி³தப்³ப³ம்.

தத்த² யம் வத்தமானஜவனவீதி²தோ அதீதானாக³தவஸேன த்³விதிஜவனவீதி²பரிமாணகாலே பரஸ்ஸ சித்தம், தம் ஸப்³ப³ம்பி ஸந்ததிபச்சுப்பன்னம் நாம. அத்³தா⁴பச்சுப்பன்னம் பன ஜவனவாரேன தீ³பேதப்³ப³ந்தி யம் அட்ட²கதா²யம் வுத்தம் தம் ஸுவுத்தம். தத்ராயம் தீ³பனா – இத்³தி⁴மா பரஸ்ஸ சித்தம் ஜானிதுகாமோ ஆவஜ்ஜேதி. ஆவஜ்ஜனம் க²ணபச்சுப்பன்னம் ஆரம்மணம் கத்வா தேனேவ ஸஹ நிருஜ்ஜ²தி. ததோ சத்தாரி பஞ்ச ஜவனானி யேஸம் பச்சி²மம் இத்³தி⁴சித்தம், ஸேஸானி காமாவசரானி. தேஸம் ஸப்³பே³ஸம்பி ததே³வ நிருத்³த⁴ம் சித்தமாரம்மணம் ஹோதி. ந ச தானி நானாரம்மணானி ஹோந்தி. அத்³தா⁴பச்சுப்பன்னவஸேன பச்சுப்பன்னாரம்மணத்தா ஏகாரம்மணானி. ஏகாரம்மணத்தேபி ச இத்³தி⁴சித்தமேவ பரஸ்ஸ சித்தம் பஜானாதி, ந இதரானி; யதா² சக்கு²த்³வாரே சக்கு²விஞ்ஞாணமேவ ரூபம் பஸ்ஸதி, ந இதரானீதி. இதி இத³ம் ஸந்ததிபச்சுப்பன்னஸ்ஸ சேவ அத்³தா⁴பச்சுப்பன்னஸ்ஸ ச வஸேன பச்சுப்பன்னாரம்மணம் ஹோதி. யஸ்மா வா ஸந்ததிபச்சுப்பன்னம்பி அத்³தா⁴பச்சுப்பன்னேயேவ பததி, தஸ்மா அத்³தா⁴பச்சுப்பன்னவஸேனேதம் பச்சுப்பன்னாரம்மணந்தி வேதி³தப்³ப³ம்.

‘புப்³பே³னிவாஸஞாணசதுத்த²ம்’ நாமகோ³த்தானுஸ்ஸரணே நிப்³பா³னனிமித்தபச்சவேக்க²ணே ச நவத்தப்³பா³ரம்மணம், ஸேஸகாலே அதீதாரம்மணமேவ. யதா²கம்முபக³ஞாணசதுத்த²ம்பி அதீதாரம்மணமேவ. தத்த² கிஞ்சாபி புப்³பே³னிவாஸசேதோபரியஞாணானிபி அதீதாரம்மணானி ஹோந்தி, அத² கோ² தேஸம் புப்³பே³னிவாஸஞாணஸ்ஸ அதீதக்க²ந்தா⁴ க²ந்த⁴படிப³த்³த⁴ஞ்ச கிஞ்சி அனாரம்மணம் நாம நத்தி². தஞ்ஹி அதீதக்க²ந்த⁴க²ந்த⁴படிப³த்³தே⁴ஸு த⁴ம்மேஸு ஸப்³ப³ஞ்ஞுதஞ்ஞாணஸமக³திகம் ஹோதி. சேதோபரியஞாணஸ்ஸ ச ஸத்ததி³வஸப்³ப⁴ந்தராதீதம் சித்தமேவ ஆரம்மணம். தஞ்ஹி அஞ்ஞம் க²ந்த⁴ம் வா க²ந்த⁴படிப³த்³த⁴ம் வா ந ஜானாதி, மக்³க³ஸம்பயுத்தசித்தாரம்மணத்தா பன பரியாயதோ மக்³கா³ரம்மணந்தி வுத்தம். யதா²கம்முபக³ஞாணஸ்ஸ ச அதீதசேதனாமத்தமேவாரம்மணந்தி. அயம் விஸேஸோ வேதி³தப்³போ³. அயமேத்த² அட்ட²கதா²னயோ. யஸ்மா பன ‘‘குஸலா க²ந்தா⁴ இத்³தி⁴வித⁴ஞாணஸ்ஸ சேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ யதா²கம்முபக³ஞாணஸ்ஸ அனாக³தம்ஸஞாணஸ்ஸ ஆரம்மணபச்சயேன பச்சயோ’’தி (பட்டா². 1.1.404) பட்டா²னே வுத்தம், தஸ்மா சத்தாரோபி க²ந்தா⁴ சேதோபரியஞாணயதா²கம்முபக³ஞாணானம் ஆரம்மணம் ஹோந்தி. தத்ராபி யதா²கம்முபக³ஞாணஸ்ஸ குஸலாகுஸலா ஏவாதி.

‘தி³ப்³ப³சக்கு²ஞாணசதுத்த²ம்’ விஜ்ஜமானவண்ணாரம்மணத்தா பச்சுப்பன்னாரம்மணமேவ. அனாக³தம்ஸஞாணசதுத்த²ம் அனாக³தாரம்மணமேவ. தஞ்ஹி அனாக³தக்க²ந்த⁴க²ந்த⁴படிப³த்³தே⁴ஸு த⁴ம்மேஸு புப்³பே³னிவாஸஞாணம் விய ஸப்³ப³ஞ்ஞுதஞ்ஞாணஸமக³திகம் ஹோதி. தத்த² கிஞ்சாபி சேதோபரியஞாணம்பி அனாக³தாரம்மணம் ஹோதி, தம் பன ஸத்ததி³வஸப்³ப⁴ந்தரே உப்பஜ்ஜனகசித்தமேவ ஆரம்மணம் கரோதி. இத³ம் அனாக³தே கப்பஸதஸஹஸ்ஸே உப்பஜ்ஜனகசித்தம்பி க²ந்தே⁴பி க²ந்த⁴படிப³த்³த⁴ம்பி. ரூபாவசரதிகசதுக்கஜ்ஜா²னாதீ³னி அதீதானாக³தபச்சுப்பன்னேஸு ஏகத⁴ம்மம்பி ஆரப்³ப⁴ அப்பவத்திதோ ஏகந்தனவத்தப்³பா³ரம்மணானேவாதி வேதி³தப்³பா³னி.

1435. அஜ்ஜ²த்தத்திகே அனிந்த்³ரியப³த்³த⁴ரூபஞ்ச நிப்³பா³னஞ்ச ப³ஹித்³தா⁴தி இத³ம் யதா² இந்த்³ரியப³த்³த⁴ம் பரபுக்³க³லஸந்தானே ப³ஹித்³தா⁴தி வுச்சமானம்பி தஸ்ஸ அத்தனோ ஸந்தானபரியாபன்னத்தா நியகஜ்ஜ²த்தம் ஹோதி, ஏவம் ந கேனசி பரியாயேன அஜ்ஜ²த்தம் ஹோதீதி நியகஜ்ஜ²த்தபரியாயஸ்ஸ அபா⁴வேன ப³ஹித்³தா⁴தி வுத்தம், ந நியகஜ்ஜ²த்தமத்தஸ்ஸ அஸம்ப⁴வதோ. நியகஜ்ஜ²த்தமத்தஸ்ஸ பன அஸம்ப⁴வமத்தம் ஸந்தா⁴ய அஜ்ஜ²த்தாரம்மணத்திகே ப³ஹித்³தா⁴ரம்மணதா வுத்தா. அஜ்ஜ²த்தத⁴ம்மாபக³மமத்ததோவ ஆகிஞ்சஞ்ஞாயதனாரம்மணஸ்ஸ அஜ்ஜ²த்தபா⁴வம்பி ப³ஹித்³தா⁴பா⁴வம்பி அஜ்ஜ²த்தப³ஹித்³தா⁴பா⁴வம்பி அனனுஜானித்வா ஆகிஞ்சஞ்ஞாயதனம் ந வத்தப்³ப³ம் அஜ்ஜ²த்தாரம்மணந்திபீதிஆதி³ வுத்தம்.

தத்த² ந கேவலம் ததே³வ நவத்தப்³பா³ரம்மணம், தஸ்ஸ பன ஆவஜ்ஜனம்பி, உபசாரசித்தானிபி, தஸ்ஸாரம்மணஸ்ஸ பச்சவேக்க²ணசித்தானிபி, தஸ்ஸேவ அஸ்ஸாத³னாதி³வஸேன பவத்தானி அகுஸலசித்தானிபி நவத்தப்³பா³ரம்மணானேவாதி. தானி பன தஸ்மிம் வுத்தே வுத்தானேவ ஹோந்தீதி விஸும் ந வுத்தானி. கத²ம் வுத்தானேவ ஹோந்தீதி? ஏதஞ்ஹி ஆகிஞ்சஞ்ஞாயதனம், யஞ்ச தஸ்ஸ புரேசாரிகம் ஆவஜ்ஜனஉபசாராதி³வஸேன பவத்தம், தேன ஸஹ ஏகாரம்மணம் ப⁴வேய்ய. தம் ஸப்³ப³ம் அதீதாரம்மணத்திகே ‘காமாவசரகுஸலம், அகுஸலம், கிரியதோ நவ சித்துப்பாதா³, ரூபாவசரசதுத்த²ஜ்ஜா²ன’ந்தி ஏவம் வுத்தானம் ஏதேஸம் சித்துப்பாதா³னம் ‘ஸியா ந வத்தப்³பா³ அதீதாரம்மணாதிபீ’திஆதி³னா நயேன நவத்தப்³பா³ரம்மணபா⁴வஸ்ஸ அனுஞ்ஞாதத்தா, ஆகிஞ்சஞ்ஞாயதனஸ்ஸ ச ‘ஆகிஞ்சஞ்ஞாயதனம், சத்தாரோ மக்³கா³ அபரியாபன்னா, சத்தாரி ச ஸாமஞ்ஞப²லானி, இமே த⁴ம்மா ந வத்தப்³பா³ அதீதாரம்மணாதிபீ’தி ஏவம் ஏகந்தேன நவத்தப்³பா³ரம்மணத்தவசனதோ நவத்தப்³பா³ரம்மணந்தி வுத்தம். இதா³னி தம் அஜ்ஜ²த்தாரம்மணத்திகே ஏகம்பி வுச்சமானம் யஸ்மா ஹேட்டா² தேன ஸஹ ஏகாரம்மணபா⁴வம்பி ஸந்தா⁴ய காமாவசரகுஸலாதீ³னம் நவத்தப்³பா³ரம்மணதா வுத்தா, தஸ்மா இதா⁴பி தேஸம் நவத்தப்³பா³ரம்மணபா⁴வம் தீ³பேதி. கோ ஹி தேன ஸஹ ஏகாரம்மணானம் நவத்தப்³பா³ரம்மணபா⁴வே அந்தராயோதி? ஏவம் தஸ்மிம் வுத்தே ‘வுத்தானேவ ஹோந்தீ’தி வேதி³தப்³பா³னி. ஸேஸமேத்த² அஜ்ஜ²த்தாரம்மணத்திகே பாளிதோ உத்தானமேவ.

ஆரம்மணவிபா⁴கே³ பன விஞ்ஞாணஞ்சாயதனம் நேவஸஞ்ஞானாஸஞ்ஞாயதனந்தி இமேஸம் தாவ குஸலவிபாககிரியவஸேன ச²ன்னம் சித்துப்பாதா³னம் அத்தனோ ஸந்தானஸம்ப³ந்த⁴ம் ஹேட்டி²மஸமாபத்திம் ஆரப்³ப⁴ பவத்திதோ அஜ்ஜ²த்தாரம்மணதா வேதி³தப்³பா³. ஏத்த² ச கிரியஆகாஸானஞ்சாயதனம் கிரியவிஞ்ஞாணஞ்சாயதனஸ்ஸேவ ஆரம்மணம் ஹோதி, ந இதரஸ்ஸ. கஸ்மா? ஆகாஸானஞ்சாயதனகிரியஸமங்கி³னோ குஸலஸ்ஸ வா விபாகஸ்ஸ வா விஞ்ஞாணஞ்சாயதனஸ்ஸ அபா⁴வதோ. குஸலம் பன குஸலவிபாககிரியானம் திண்ணம்பி ஆரம்மணம் ஹோதி. கஸ்மா? ஆகாஸானஞ்சாயதனகுஸலம் நிப்³ப³த்தேத்வா டி²தஸ்ஸ ததோ உத்³த⁴ம் திவித⁴ஸ்ஸபி விஞ்ஞாணஞ்சாயதனஸ்ஸ உப்பத்திஸம்ப⁴வதோ. விபாகம் பன ந கஸ்ஸசி ஆரம்மணம் ஹோதி. கஸ்மா? விபாகதோ வுட்ட²ஹித்வா சித்தஸ்ஸ அபி⁴னீஹாராஸம்ப⁴வதோ. நேவஸஞ்ஞானாஸஞ்ஞாயதனஸ்ஸ ஆரம்மணகரணேபி ஏஸேவ நயோ. ரூபாவசரத்திகசதுக்கஜ்ஜா²னாதீ³னம் ஸப்³பே³ஸம்பி நியகஜ்ஜ²த்ததோ ப³ஹித்³தா⁴பா⁴வேன ப³ஹித்³தா⁴பூ⁴தானி பத²வீகஸிணாதீ³னி ஆரப்³ப⁴ பவத்திதோ ப³ஹித்³தா⁴ரம்மணதா வேதி³தப்³பா³.

ஸப்³பே³வ காமாவசரா குஸலாகுஸலாப்³யாகதா த⁴ம்மா, ரூபாவசரம் சதுத்த²ம் ஜா²னந்தி ஏத்த² குஸலதோ தாவ சத்தாரோ ஞாணஸம்பயுத்தசித்துப்பாதா³ அத்தனோ க²ந்தா⁴தீ³னி பச்சவேக்க²ந்தஸ்ஸ அஜ்ஜ²த்தாரம்மணா. பரேஸம் க²ந்தா⁴தி³பச்சவேக்க²ணே பண்ணத்தினிப்³பா³னபச்சவேக்க²ணே ச ப³ஹித்³தா⁴ரம்மணா. தது³ப⁴யவஸேன அஜ்ஜ²த்தப³ஹித்³தா⁴ரம்மணா. ஞாணவிப்பயுத்தேஸுபி ஏஸேவ நயோ. கேவலஞ்ஹி தேஸம் நிப்³பா³னபச்சவேக்க²ணம் நத்தி². அகுஸலதோ சத்தாரோ தி³ட்டி²ஸம்பயுத்தசித்துப்பாதா³ அத்தனோ க²ந்தா⁴தீ³னம் அஸ்ஸாத³னாபி⁴னந்த³னபராமாஸக³ஹணகாலே அஜ்ஜ²த்தாரம்மணா, பரஸ்ஸ க²ந்தா⁴தீ³ஸு சேவ அனிந்த்³ரியப³த்³த⁴ரூபகஸிணாதீ³ஸு ச ததே²வ பவத்திகாலே ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. தி³ட்டி²விப்பயுத்தேஸுபி ஏஸேவ நயோ. கேவலஞ்ஹி தேஸம் பராமாஸக³ஹணம் நத்தி². த்³வேபி படிக⁴ஸம்பயுத்தா அத்தனோ க²ந்தா⁴தீ³ஸு தோ³மனஸ்ஸிதஸ்ஸ அஜ்ஜ²த்தாரம்மணா, பரஸ்ஸ க²ந்தா⁴தீ³ஸு சேவ அனிந்த்³ரியப³த்³த⁴ரூபபண்ணத்தீஸு ச ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. விசிகிச்சு²த்³த⁴ச்சஸம்பயுத்தானம்பி வுத்தபகாரேஸு த⁴ம்மேஸு விசிகிச்ச²னப²ந்த³னபா⁴வவஸேன பவத்தியம் அஜ்ஜ²த்தாதி³ஆரம்மணதா வேதி³தப்³பா³.

த்³விபஞ்சவிஞ்ஞாணானி, திஸ்ஸோ ச மனோதா⁴துயோதி, இமே தேரஸ சித்துப்பாதா³ அத்தனோ ரூபாதீ³னி ஆரப்³ப⁴ பவத்தியம் அஜ்ஜ²த்தாரம்மணா, பரஸ்ஸ ரூபாதீ³ஸு பவத்தா ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. ஸோமனஸ்ஸஸஹக³தஅஹேதுகவிபாகமனோவிஞ்ஞாணதா⁴து பஞ்சத்³வாரே ஸந்தீரணததா³ரம்மணவஸேன அத்தனோ பஞ்ச ரூபாதி³த⁴ம்மே, மனோத்³வாரே ததா³ரம்மணவஸேனேவ அஞ்ஞேபி அஜ்ஜ²த்திகே காமாவசரத⁴ம்மே ஆரப்³ப⁴ பவத்தியம் அஜ்ஜ²த்தாரம்மணா, பரேஸம் த⁴ம்மேஸு பவத்தமானா ப³ஹித்³தா⁴ரம்மணா, உப⁴யவஸேன அஜ்ஜ²த்தப³ஹித்³தா⁴ரம்மணா. உபேக்கா²ஸஹக³தவிபாகாஹேதுகமனோவிஞ்ஞாணதா⁴துத்³வயேபி ஏஸேவ நயோ. கேவலம் பனேதா ஸுக³தியம் து³க்³க³தியஞ்ச படிஸந்தி⁴ப⁴வங்க³சுதிவஸேனாபி அஜ்ஜ²த்தாதி³பே⁴தே³ஸு கம்மாதீ³ஸு பவத்தந்தி.

அட்ட² மஹாவிபாகசித்தானிபி தாஸம்யேவ த்³வின்னம் ஸமானக³திகானி. கேவலம் பனேதானி ஸந்தீரணவஸேன ந பவத்தந்தி. படிஸந்தி⁴ப⁴வங்க³சுதிவஸேனேவ ஏதானி ஸுக³தியம்யேவ பவத்தந்தி. ஸோமனஸ்ஸஸஹக³தாஹேதுககிரியா பஞ்சத்³வாரே அத்தனோ ரூபாதீ³னி ஆரப்³ப⁴ பஹட்டா²காரகரணவஸேன பவத்தியம் அஜ்ஜ²த்தாரம்மணா, பரஸ்ஸ ரூபாதீ³ஸு பவத்தா ப³ஹித்³தா⁴ரம்மணா. மனோத்³வாரே ததா²க³தஸ்ஸ ஜோதிபாலமாணவமக⁴தே³வராஜகண்ஹதாபஸாதி³காலேஸு அத்தனா கதகிரியம் பச்சவேக்க²ந்தஸ்ஸ ஹஸிதுப்பாத³வஸேன பவத்தா அஜ்ஜ²த்தாரம்மணா.

மல்லிகாய தே³வியா ஸந்ததிமஹாமத்தஸ்ஸ ஸுமனமாலாகாரஸ்ஸாதி ஏவமாதீ³னம் கிரியாகரணம் ஆரப்³ப⁴ பவத்திகாலே ப³ஹித்³தா⁴ரம்மணா. உப⁴யவஸேன அஜ்ஜ²த்தப³ஹித்³தா⁴ரம்மணா. உபேக்கா²ஸஹக³தகிரியாஹேதுகமனோவிஞ்ஞாணதா⁴து பஞ்சத்³வாரே வோட்ட²ப்³ப³னவஸேன மனோத்³வாரே ச ஆவஜ்ஜனவஸேன பவத்தியம் அஜ்ஜ²த்தாதி³ஆரம்மணா. அட்ட² மஹாகிரியா குஸலசித்தக³திகா ஏவ. கேவலஞ்ஹி தா கீ²ணாஸவானம் உப்பஜ்ஜந்தி, குஸலானி ஸேக்க²புது²ஜ்ஜனானந்தி ஏத்தகமேவேத்த² நானாகரணம்.

வுத்தப்பகாரே ரூபாவசரசதுத்த²ஜ்ஜா²னே ஸப்³ப³த்த²பாத³கசதுத்தா²தீ³னி பஞ்ச ஜா²னானி இமஸ்மிம் திகே ஓகாஸம் லப⁴ந்தி. ஏதானி ஹி கஸிணபண்ணத்தினிமித்தாரம்மணத்தா ப³ஹித்³தா⁴ரம்மணானி.

‘இத்³தி⁴வித⁴சதுத்த²ம்’ காயவஸேன சித்தம், சித்தவஸேன வா காயம் பரிணாமனகாலே அத்தனோ குமாரகவண்ணாதி³னிம்மானகாலே ச ஸகாயசித்தானம் ஆரம்மணகரணதோ அஜ்ஜ²த்தாரம்மணம், ப³ஹித்³தா⁴ ஹத்தி²அஸ்ஸாதி³த³ஸ்ஸனகாலே ப³ஹித்³தா⁴ரம்மணம், காலேன அஜ்ஜ²த்தம் காலேன ப³ஹித்³தா⁴, பவத்தியம் அஜ்ஜ²த்தப³ஹித்³தா⁴ரம்மணம்.

‘தி³ப்³ப³ஸோதசதுத்த²ம்’ அத்தனோ குச்சி²ஸத்³த³ஸவனகாலே அஜ்ஜ²த்தாரம்மணம், பரேஸம் ஸத்³த³ஸவனகாலே ப³ஹித்³தா⁴ரம்மணம், உப⁴யவஸேன அஜ்ஜ²த்தப³ஹித்³தா⁴ரம்மணம். ‘சேதோபரியஞாணசதுத்த²ம்’ பரேஸம் சித்தாரம்மணதோ ப³ஹித்³தா⁴ரம்மணமேவ. அத்தனோ சித்தஜானனே பன தேன பயோஜனம் நத்தி². ‘புப்³பே³னிவாஸசதுத்த²ம்’ அத்தனோ க²ந்தா⁴னுஸ்ஸரணகாலே அஜ்ஜ²த்தாரம்மணம், பரஸ்ஸ க²ந்தே⁴, அனித்³ரியப³த்³த⁴ரூபம், திஸ்ஸோ ச பண்ணத்தியோ அனுஸ்ஸரணதோ ப³ஹித்³தா⁴ரம்மணம், உப⁴யவஸேன அஜ்ஜ²த்தப³ஹித்³தா⁴ரம்மணம்.

‘தி³ப்³ப³சக்கு²சதுத்த²ம்’ அத்தனோ குச்சி²க³தாதி³ரூபத³ஸ்ஸனகாலே அஜ்ஜ²த்தாரம்மணம், அவஸேஸரூபத³ஸ்ஸனகாலே ப³ஹித்³தா⁴ரம்மணம், உப⁴யவஸேன அஜ்ஜ²த்தப³ஹித்³தா⁴ரம்மணம். ‘அனாக³தம்ஸஞாணசதுத்த²ம்’ அத்தனோ அனாக³தக்க²ந்தா⁴னுஸ்ஸரணகாலே அஜ்ஜ²த்தாரம்மணம், பரஸ்ஸ அனாக³தக்க²ந்தா⁴னம் வா அனிந்த்³ரியப³த்³த⁴ஸ்ஸ வா ரூபஸ்ஸ அனுஸ்ஸரணகாலே ப³ஹித்³தா⁴ரம்மணம், உப⁴யவஸேன அஜ்ஜ²த்தப³ஹித்³தா⁴ரம்மணம். ஆகிஞ்சஞ்ஞாயதனஸ்ஸ நவத்தப்³பா³ரம்மணதாய காரணம் ஹேட்டா² வுத்தமேவ.

து³கஅத்து²த்³தா⁴ரவண்ணனா

1441. ஹேதுகோ³ச்ச²கனித்³தே³ஸே தயோ குஸலஹேதூதிஆதி³னா நயேன ஹேதூ த³ஸ்ஸேத்வா புன தேயேவ உப்பத்திட்டா²னதோ த³ஸ்ஸேதும் சதூஸு பூ⁴மீஸு குஸலேஸு உப்பஜ்ஜந்தீதிஆதி³ வுத்தம். இமினா உபாயேன ஸேஸகோ³ச்ச²கேஸுபி தே³ஸனானயோ வேதி³தப்³போ³.

1473. யத்த² த்³வே தயோ ஆஸவா ஏகதோ உப்பஜ்ஜந்தீதி ஏத்த² திவிதே⁴ன ஆஸவானம் ஏகதோ உப்பத்தி வேதி³தப்³பா³. தத்த² சதூஸு தி³ட்டி²விப்பயுத்தேஸு அவிஜ்ஜாஸவேன, தி³ட்டி²ஸம்பயுத்தேஸு தி³ட்டா²ஸவஅவிஜ்ஜாஸவேஹி ஸத்³தி⁴ந்தி காமாஸவோ து³விதே⁴ன ஏகதோ உப்பஜ்ஜதி. ப⁴வாஸவோ சதூஸு தி³ட்டி²விப்பயுத்தேஸு அவிஜ்ஜாஸவேன ஸத்³தி⁴ந்தி ஏகதா⁴வ ஏகதோ உப்பஜ்ஜதி. யதா² சேத்த² ஏவம் யத்த² த்³வே தீணி ஸம்யோஜனானி ஏகதோ உப்பஜ்ஜந்தீதி ஏத்தா²பி ஸம்யோஜனானம் உப்பத்தி ஏகதோ த³ஸதா⁴ ப⁴வே. தத்த² காமராகோ³ சதுதா⁴ ஏகதோ உப்பஜ்ஜதி, படிகோ⁴ திதா⁴, மானோ ஏகதா⁴. ததா² விசிகிச்சா² சேவ ப⁴வராகோ³ ச. கத²ம்? காமராகோ³ தாவ மானஸம்யோஜனஅவிஜ்ஜாஸம்யோஜனேஹி சேவ, தி³ட்டி²ஸம்யோஜனஅவிஜ்ஜாஸம்யோஜனேஹி ச, ஸீலப்³ப³தபராமாஸஅவிஜ்ஜாஸம்யோஜனேஹி ச, அவிஜ்ஜாஸம்யோஜனமத்தேனேவ ச ஸத்³தி⁴ந்தி ஏவம் சதுதா⁴ ஏகதோ உப்பஜ்ஜதி. படிகோ⁴ பன இஸ்ஸாஸம்யோஜனஅவிஜ்ஜாஸம்யோஜனேஹி சேவ, மச்ச²ரியஸம்யோஜனஅவிஜ்ஜாஸம்யோஜனேஹி ச, அவிஜ்ஜாஸம்யோஜனமத்தேனேவ ச ஸத்³தி⁴ந்தி ஏவம் திதா⁴ ஏகதோ உப்பஜ்ஜதி. மானோ ப⁴வராகா³விஜ்ஜாஸம்யோஜனேஹி ஸத்³தி⁴ம் ஏகதா⁴வ ஏகதோ உப்பஜ்ஜதி. ததா² விசிகிச்சா². ஸா ஹி அவிஜ்ஜாஸம்யோஜனேன ஸத்³தி⁴ம் ஏகதா⁴ உப்பஜ்ஜதி. ப⁴வராகே³பி ஏஸேவ நயோதி. ஏவமேத்த² த்³வே தீணி ஸம்யோஜனானி ஏகதோ உப்பஜ்ஜந்தி.

1511. யம் பனேதம் நீவரணகோ³ச்ச²கே யத்த² த்³வே தீணி நீவரணானி ஏகதோ உப்பஜ்ஜந்தீதி வுத்தம், தத்தா²பி அட்ட²தா⁴ நீவரணானம் ஏகதோ உப்பத்தி வேதி³தப்³பா³. ஏதேஸு ஹி காமச்ச²ந்தோ³ து³விதா⁴ ஏகதோ உப்பஜ்ஜதி, ப்³யாபாதோ³ சதுதா⁴, உத்³த⁴ச்சம் ஏகதா⁴. ததா² விசிகிச்சா². கத²ம்? காமச்ச²ந்தோ³ தாவ அஸங்கா²ரிகசித்தேஸு உத்³த⁴ச்சனீவரணஅவிஜ்ஜானீவரணேஹி, ஸஸங்கா²ரிகேஸு தி²னமித்³த⁴உத்³த⁴ச்சஅவிஜ்ஜானீவரணேஹி ஸத்³தி⁴ம் து³விதா⁴ ஏகதோ உப்பஜ்ஜதி. யம் பனேதம் த்³வே தீணீதி வுத்தம், தம் ஹேட்டி²மபரிச்சே²த³வஸேன வுத்தம். தஸ்மா சதுன்னம்பி ஏகதோ உப்பஜ்ஜதீதி வசனம் யுஜ்ஜதி ஏவ. ப்³யாபாதோ³ பன அஸங்கா²ரிகசித்தே உத்³த⁴ச்சஅவிஜ்ஜானீவரணேஹி, ஸஸங்கா²ரிகே தி²னமித்³த⁴உத்³த⁴ச்சஅவிஜ்ஜானீவரணேஹி, அஸங்கா²ரிகேயேவ உத்³த⁴ச்சகுக்குச்சஅவிஜ்ஜானீவரணேஹி, ஸஸங்கா²ரிகேயேவ தி²னமித்³த⁴உத்³த⁴ச்சகுக்குச்சஅவிஜ்ஜானீவரணேஹி ஸத்³தி⁴ந்தி சதுதா⁴ ஏகதோ உப்பஜ்ஜதி. உத்³த⁴ச்சம் பன அவிஜ்ஜானீவரணமத்தேன ஸத்³தி⁴ம் ஏகதா⁴வ ஏகதோ உப்பஜ்ஜதி. விசிகிச்சு²த்³த⁴ச்சஅவிஜ்ஜானீவரணேஹி ஸத்³தி⁴ம் ஏகதா⁴வ ஏகதோ உப்பஜ்ஜதி.

1577. யம்பித³ம் கிலேஸகோ³ச்ச²கே யத்த² த்³வே தயோ கிலேஸா ஏகதோ உப்பஜ்ஜந்தீதி வுத்தம், தத்த² ‘த்³வே கிலேஸா அஞ்ஞேஹி, தயோ வா கிலேஸா அஞ்ஞேஹி கிலேஸேஹி ஸத்³தி⁴ம் உப்பஜ்ஜந்தீ’தி ஏவமத்தோ² வேதி³தப்³போ³. கஸ்மா? த்³வின்னம் திண்ணம்யேவ வா ஏகதோ உப்பத்தியா அஸம்ப⁴வதோ.

தத்த² த³ஸதா⁴ கிலேஸானம் ஏகதோ உப்பத்தி ஹோதி. ஏத்த² ஹி லோபோ⁴ ச²தா⁴ ஏகதோ உப்பஜ்ஜதி. படிகோ⁴ த்³விதா⁴. ததா² மோஹோதி வேதி³தப்³போ³. கத²ம்? லோபோ⁴ தாவ அஸங்கா²ரிகே தி³ட்டி²விப்பயுத்தே மோஹஉத்³த⁴ச்சஅஹிரிகானோத்தப்பேஹி, ஸஸங்கா²ரிகே மோஹதி²னஉத்³த⁴ச்சஅஹிரிகானோத்தப்பேஹி, அஸங்கா²ரிகேயேவ மோஹமானுத்³த⁴ச்சாஹிரிகானோத்தப்பேஹி, ஸஸங்கா²ரிகேயேவ மோஹமானதி²னஉத்³த⁴ச்சஅஹிரிகானோத்தப்பேஹி, தி³ட்டி²ஸம்பயுத்தே பன அஸங்கா²ரிகே மோஹஉத்³த⁴ச்சதி³ட்டி²அஹிரிகானோத்தப்பேஹி, ஸஸங்கா²ரிகே மோஹதி³ட்டி²தி²னஉத்³த⁴ச்சஅஹிரிகானோத்தப்பேஹி ஸத்³தி⁴ந்தி ச²தா⁴ ஏகதோ உப்பஜ்ஜதி.

படிகோ⁴ பன அஸங்கா²ரிகே மோஹஉத்³த⁴ச்சஅஹிரிகானோத்தப்பேஹி, ஸஸங்கா²ரிகே மோஹதி²னஉத்³த⁴ச்சஅஹிரிகானோத்தப்பேஹி ஸத்³தி⁴ந்தி ஏவம் த்³விதா⁴ ஏகதோ உப்பஜ்ஜதி. மோஹோ பன விசிகிச்சா²ஸம்பயுத்தே விசிகிச்சு²த்³த⁴ச்சஅஹிரிகானோத்தப்பேஹி, உத்³த⁴ச்சஸம்பயுத்தே உத்³த⁴ச்சஅஹிரிகானோத்தப்பேஹி ஸத்³தி⁴ந்தி ஏவம் த்³விதா⁴ ஏகதோ உப்பஜ்ஜதி. ஸேஸம் ஸப்³ப³த்த² உத்தானத்த²மேவாதி.

அட்ட²ஸாலினியா த⁴ம்மஸங்க³ஹஅட்ட²கதா²ய

அட்ட²கதா²கண்ட³வண்ணனா நிட்டி²தா.

நிக³மனகதா²

ஏத்தாவதா ச –

சித்தம் ரூபஞ்ச நிக்கே²பம், அத்து²த்³தா⁴ரம் மனோரமம்;

யம் லோகனாதோ² பா⁴ஜேந்தோ, தே³ஸேஸி த⁴ம்மஸங்க³ணிம்.

அபி⁴த⁴ம்மஸ்ஸ ஸங்க³ய்ஹ, த⁴ம்மே அனவஸேஸதோ;

டி²தாய தஸ்ஸா ஆரத்³தா⁴, யா மயா அத்த²வண்ணனா.

அனாகுலானமத்தா²னம், ஸம்ப⁴வா அட்ட²ஸாலினீ;

இதி நாமேன ஸா ஏஸா, ஸன்னிட்டா²னமுபாக³தா.

ஏகூனசத்தாலீஸாய, பாளியா பா⁴ணவாரதோ;

சிரட்டி²தத்த²ம் த⁴ம்மஸ்ஸ, நிட்டா²பேந்தேன தம் மயா.

யம் பத்தம் குஸலம் தஸ்ஸ, ஆனுபா⁴வேன பாணினோ;

ஸப்³பே³ ஸத்³த⁴ம்மராஜஸ்ஸ, ஞத்வா த⁴ம்மம் ஸுகா²வஹம்.

பாபுணந்து விஸுத்³தா⁴ய, ஸுகா²ய படிபத்தியா;

அஸோகமனுபாயாஸம், நிப்³பா³னஸுக²முத்தமம்.

சிரம் திட்ட²து ஸத்³த⁴ம்மோ, த⁴ம்மே ஹோந்து ஸகா³ரவா;

ஸப்³பே³பி ஸத்தா காலேன, ஸம்மா தே³வோ பவஸ்ஸது.

யதா² ரக்கி²ம்ஸு போராணா, ஸுராஜானோ ததே²விமம்;

ராஜா ரக்க²து த⁴ம்மேன, அத்தனோவ பஜம் பஜந்தி.

பரமவிஸுத்³த⁴ஸத்³தா⁴பு³த்³தி⁴வீரியபடிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹணஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்திப்பபே⁴தே³ ஸாட்ட²கதே² ஸத்து²ஸாஸனே அப்படிஹதஞாணப்பபா⁴வேன மஹாவேய்யாகரணேன கரணஸம்பத்திஜனிதஸுக²வினிக்³க³தமது⁴ரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா பபி⁴ன்னபடிஸம்பி⁴தா³பரிவாரே ச²ளபி⁴ஞ்ஞாதி³ப்பபே⁴த³கு³ணபடிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் அட்ட²ஸாலினீ நாம த⁴ம்மஸங்க³ஹட்ட²கதா².

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் பஞ்ஞாவிஸுத்³தி⁴யா.

யாவ ‘பு³த்³தோ⁴’தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

அட்ட²ஸாலினீ நாம

த⁴ம்மஸங்க³ஹ-அட்ட²கதா² நிட்டி²தா.