8. தே³வாஸுரஸங்கா³மஸுத்தவண்ணனா

39. அட்ட²மே ஸமுபப்³யூள்ஹோ அஹோஸீதி பச்சுபட்டி²தோ அஹோஸி. ஸங்கா³மேய்யாமாதி ஸங்கா³மம் கரேய்யாம யுஜ்ஜே²ய்யாம. அபயிம்ஸுயேவாதி பலாயிம்ஸுயேவ. உத்தரேனாபி⁴முகா²தி உத்தராமுகா² ஹுத்வா. அபி⁴யந்தே வாதி அனுப³ந்த⁴ந்தியேவ. பீ⁴ருத்தானக³தேனாதி பீ⁴ருத்தானம் ப⁴யனிவாரணம் பதிட்டா²னம் க³தேன. அகரணீயாதி யுத்³தே⁴ன கிஞ்சி அகத்தப்³பா³. கஸ்மா பன நேஸம் ஸங்கா³மோ ஹோதீதி? அஸுரா ஹி புப்³பே³ தாவதிம்ஸவாஸினோ, தே சித்தபாடலியா புப்ப²னகாலே தி³ப்³ப³பாரிச்ச²த்தகபுப்ப²ம் அனுஸ்ஸரந்தி. ததோ உப்பன்னகோதா⁴ ‘‘க³ண்ஹத² தே³வே’’தி ஸம்முக²ஸம்முக²ட்டா²னேனேவ ஸினேரும் அபி⁴ருஹந்தி, தே³வாபி நிக்க²மந்தி. தேஸம் கோ³பாலகதா³ரகானம் அஞ்ஞமஞ்ஞம் த³ண்ட³கேஹி பஹரணஸதி³ஸம் யுத்³த⁴ம் ஹோதி. ஸக்கோ தே³வராஜா ஹேட்டா² பஞ்சஸு டா²னேஸு ஆரக்க²ம் ட²பேத்வா உபரி தே³வபுரம் பரிவாரேத்வா அத்தஸதி³ஸா வஜிரஹத்தா² படிமா ட²பாபேஸி. அஸுரா ஹேட்டா² பஞ்ச டா²னானி படிபா³ஹித்வா அபி⁴ருள்ஹா இந்த³படிமாயோ தி³ஸ்வா நிவத்தித்வா அஸுரபுரமேவ க³ச்ச²ந்தி.

த³க்கி²ணேனாபி⁴முகா²தி த³க்கி²ணாமுகா² ஹுத்வா. அபத³ம் வதி⁴த்வாதி நிப்பத³ம் நிரவஸேஸம் வதி⁴த்வா. அத³ஸ்ஸனம் க³தோதி மாரோபி வட்டபாத³கம் கத்வா ரூபாவசரசதுத்த²ஜ்ஜா²னம் ஸமாபன்னஸ்ஸ சித்தம் ஜானாதி, ததே³வ விபஸ்ஸனாபாத³கம் கத்வா ஸமாபன்னஸ்ஸ சித்தம் ஜானாதி. அரூபாவசரஸமாபத்தி பன வட்டபாதா³ வா ஹோது விபஸ்ஸனாபாதா³ வா, தம் ஸமாபன்னஸ்ஸ மாரோ சித்தம் ந ஜானாதி. தேன வுத்தம் – ‘‘அத³ஸ்ஸனம் க³தோ பாபிமதோ’’தி.