3. மேகி⁴யஸுத்தவண்ணனா

3. ததியே சாலிகாயந்தி ஏவம்னாமகே நக³ரே. தம் கிர சலமக்³க³ம் நிஸ்ஸாய கதத்தா ஓலோகேந்தானம் சலமானம் விய உபட்டா²தி, தஸ்மா சாலிகாதி ஸங்க²ம் க³தம். சாலியபப்³ப³தேதி ஸோபி பப்³ப³தோ ஸப்³ப³ஸேதத்தா காளபக்கு²போஸதே² ஓலோகேந்தானம் சலமானோ விய உபட்டா²தி, தஸ்மா சாலியபப்³ப³தோதி வுத்தோ. தத்த² மஹந்தம் விஹாரம் காரயிம்ஸு. இதி ப⁴க³வா தம் நக³ரம் நிஸ்ஸாய சாலிகாபப்³ப³தமஹாவிஹாரே விஹரதி. ஜந்துகா³மந்தி ஏவம்னாமகம் அபரம்பி தஸ்ஸேவ விஹாரஸ்ஸ கோ³சரகா³மம். ஜத்துகா³மந்திபி பட²ந்தி. பதா⁴னத்தி²கஸ்ஸாதி பதா⁴னகம்மிகஸ்ஸ. பதா⁴னாயாதி ஸமணத⁴ம்மகரணத்தா²ய. ஆக³மேஹி தாவாதி ஸத்தா² தே²ரஸ்ஸ வசனம் ஸுத்வா உபதா⁴ரேந்தோ ‘‘ந தாவஸ்ஸ ஞாணம் பரிபக்க’’ந்தி ஞத்வா படிபா³ஹந்தோ ஏவமாஹ. ஏககம்ஹி தாவாதி இத³ம் பனஸ்ஸ ‘‘ஏவமயம் க³ந்த்வாபி கம்மே அனிப்ப²ஜ்ஜமானே நிராஸங்கோ ஹுத்வா பேமவஸேன புன ஆக³ச்சி²ஸ்ஸதீ’’தி சித்தமத்³த³வஜனனத்த²ம் ஆஹ. நத்தி² கிஞ்சி உத்தரி கரணீயந்தி சதூஸு ஸச்சேஸு சதுன்னம் கிச்சானம் கதத்தா அஞ்ஞம் உத்தரி கரணீயம் நாம நத்தி². கதஸ்ஸ வா படிசயோதி அதி⁴க³தஸ்ஸ வா புன படிசயோபி நத்தி². ந ஹி பா⁴விதமக்³கோ³ புன பா⁴வீயதி, ந பஹீனகிலேஸானம் புன பஹானம் அத்தி². பதா⁴னந்தி கோ², மேகி⁴ய, வத³மானம் கிந்தி வதே³ய்யாமாதி ‘‘ஸமணத⁴ம்மம் கரோமீ’’தி தம் வத³மானம் மயம் அஞ்ஞம் கிம் நாம வதே³ய்யாம.

தி³வாவிஹாரம் நிஸீதீ³தி தி³வாவிஹாரத்தா²ய நிஸீதி³. நிஸீத³ந்தோ ச யஸ்மிம் மங்க³லஸிலாபட்டே புப்³பே³ அனுபடிபாடியா பஞ்ச ஜாதிஸதானி ராஜா ஹுத்வா உய்யானகீளிகம் கீளந்தோ திவித⁴னாடகபரிவாரோ நிஸீதி³, தஸ்மிம்யேவ நிஸீதி³. அத²ஸ்ஸ நிஸின்னகாலதோ பட்டா²ய ஸமணபா⁴வோ ஜஹிதோ விய அஹோஸி, ராஜவேஸம் க³ஹேத்வா நாடகவரபரிவுதோ ஸேதச்ச²த்தஸ்ஸ ஹேட்டா² மஹாரஹே பல்லங்கே நிஸின்னோ விய ஜாதோ. அத²ஸ்ஸ தம் ஸம்பத்திம் அஸ்ஸாத³யதோ காமவிதக்கோ உத³பாதி³. ஸோ தஸ்மிம்யேவ க²ணே மஹாயோதே⁴ஹி க³ஹிதே த்³வே சோரே ஆனேத்வா புரதோ ட²பிதே விய அத்³த³ஸ. தேஸு ஏகஸ்ஸ வத⁴ம் ஆணாபனவஸேனஸ்ஸ ப்³யாபாத³விதக்கோ உப்பஜ்ஜி, ஏகஸ்ஸ ப³ந்த⁴னம் ஆணாபனவஸேன விஹிம்ஸாவிதக்கோ. ஏவம் ஸோ லதாஜாலேன ருக்கோ² விய மது⁴மக்கி²காஹி மது⁴கா⁴தகோ விய அகுஸலவிதக்கேஹி பரிக்கி²த்தோ அஹோஸி. தம் ஸந்தா⁴ய – அத² கோ² ஆயஸ்மதோ மேகி⁴யஸ்ஸாதிஆதி³ வுத்தம். அன்வாஸத்தாதி அனுப³த்³தா⁴ ஸம்பரிவாரிதா. யேன ப⁴க³வா தேனுபஸங்கமீதி ஏவம் பாபவிதக்கேஹி ஸம்பரிகிண்ணோ கம்மட்டா²னம் ஸப்பாயம் காதும் அஸக்கோந்தோ ‘‘இத³ம் வத தி³ஸ்வா தீ³க⁴த³ஸ்ஸீ ப⁴க³வா படிஸேதே⁴ஸீ’’தி ஸல்லக்கே²த்வா ‘‘இத³ம் காரணம் த³ஸப³லஸ்ஸ ஆரோசேஸ்ஸாமீ’’தி நிஸின்னாஸனதோ வுட்டா²ய யேன ப⁴க³வா தேனுபஸங்கமி.