6. ஸிலாயூபஸுத்தவண்ணனா

26. ச²ட்டே² சந்தி³காபுத்தோதி மாது நாமவஸேன பஞ்ஞாதோ சந்தி³காபுத்தத்தே²ரோ. சேதஸா சித்தம் ஹோதீதி சித்தவாரபரியாயேன சித்தவாரபரியாயோ சிதோ வட்³டி⁴தோ ஹோதி. சேதஸா சித்தம் ஸுபரிசிதந்தி சித்தவாரபரியாயேன சித்தவாரபரியாயோ உபரூபரி ஸுசிதோ ஸுவட்³டி⁴தோ ஹோதி. நேவஸ்ஸ சித்தம் பரியாதி³யந்தீதி தானி ஆரம்மணானி தஸ்ஸ கீ²ணாஸவஸ்ஸ சித்துப்பாத³ம் க³ஹேத்வா கே²பேத்வா டா²தும் ந ஸக்கோந்தி. அமிஸ்ஸீகதந்தி தானி ஆரம்மணானி அனல்லீனத்தா தேஹி அமிஸ்ஸீகதம். ஆனேஞ்ஜப்பத்தந்தி அனிஞ்ஜனபா⁴வம் நிப்ப²ந்த³னபா⁴வம் பத்தம்.

ஸிலாயூபோதி ஸிலாத²ம்போ⁴. ஸோளஸகுக்குகோதி தீ³க⁴தோ ஸோளஸஹத்தோ². ஹேட்டா²னேமங்க³மாதி ஆவாடஸ்ஸ ஹேட்டா²க³தா. உபரி நேமஸ்ஸாதி உபரி ஆவாடஸ்ஸ. ஸுனிகா²தத்தாதி அயமுஸலேஹி கோட்டேத்வா கோட்டேத்வா ஸுட்டு² நிகா²தத்தா. ஏவமேவ கோ²தி ஏத்த² ஸிலாயூபோ விய கீ²ணாஸவோ த³ட்ட²ப்³போ³, மஹாவாதா விய ச²ஸு த்³வாரேஸு உப்பஜ்ஜனகா கிலேஸா, சதூஹி தி³ஸாஹி ஆக³ந்த்வா வாதானம் ஸிலாயூபம் சாலேதும் அஸமத்த²பா⁴வோ விய ச²ஸு த்³வாரேஸு உப்பஜ்ஜனககிலேஸானம் கீ²ணாஸவஸ்ஸ சித்தம் சாலேதும் அஸமத்த²பா⁴வோ வேதி³தப்³போ³. இமஸ்மிம்பி ஸுத்தே கீ²ணாஸவோவ கதி²தோ.