10. வேலாமஸுத்தவண்ணனா
20. த³ஸமே அபி நு தே, க³ஹபதி, குலே தா³னம் தீ³யதீதி நயித³ம் ப⁴க³வா பி⁴க்கு²ஸங்க⁴ஸ்ஸ தா³னம் ஸந்தா⁴ய புச்ச²தி. ஸேட்டி²ஸ்ஸ ஹி க⁴ரே பி⁴க்கு²ஸங்க⁴ஸ்ஸ நிச்சம் பணீததா³னம் தீ³யதி, ந தம் ஸத்தா² ந ஜானாதி. லோகியமஹாஜனஸ்ஸ பன தி³ய்யமானதா³னம் அத்தி², தம் லூக²ம் ஹோதி, ஸேட்டி²ஸ்ஸ சித்தம் ந பீணேதி. தம் புச்சா²மீதி புச்ச²தி. கணாஜகந்தி ஸகுண்ட³கப⁴த்தம், ஸகுண்ட³கேஹிபி கணிகதண்டு³லேஹேவ பக்கம். பி³ளங்க³து³தியந்தி கஞ்ஜியது³தியம். அஸக்கச்சம் தே³தீதி அஸக்கரித்வா தே³தி. அசித்தீகத்வாதி அசித்தீகாரேன த³க்கி²ணேய்ய அகா³ரவேன தே³தி. அஸஹத்தா² தே³தீதி ஸஹத்தே²ன அத³த்வா பரஹத்தே²ன தே³தி, ஆணத்திமத்தமேவ கரோதீதி அத்தோ². அபவித்³த⁴ம் தே³தீதி ந நிரந்தரம் தே³தி, ஸம்வச்ச²ரிகம் ஸோண்ட³ப³லி விய ஹோதி. அனாக³மனதி³ட்டி²கோ தே³தீதி ந கம்மஞ்ச ப²லஞ்ச ஸத்³த³ஹித்வா தே³தி.
யத்த² யத்தா²தி தீஸு குலஸம்பதா³ஸு யஸ்மிம் யஸ்மிம் குலே. ந உளாராய ப⁴த்தபோ⁴கா³யாதிஆதீ³ஸு நானக்³க³ரஸஸுக³ந்த⁴ஸாலிபோ⁴ஜனே உபனீதே சித்தம் ந நமதி, ‘‘ஹரதே²தம் ரோக³வட்³ட⁴ன’’ந்தி வத்வா யேன வா தேன வா டா³கேன ஸத்³தி⁴ம் ஸகுண்ட³கப⁴த்தம் அமதம் விய ஸம்பியாயமானோ பு⁴ஞ்ஜதி. காஸிகாதீ³ஸு வரவத்தே²ஸு உபனீதேஸு ‘‘ஹரதே²தானி நிவாஸேந்தஸ்ஸ படிச்சா²தே³தும்பி ந ஸக்கோந்தி, க³த்தேஸுபி ந ஸண்ட²ஹந்தீ’’தி வத்வா நாளிகேரஸாடகமூலதசஸதி³ஸானி பன தூ²லவத்தா²னி ‘‘இமானி நிவாஸேந்தோ நிவத்த²பா⁴வம்பி ஜானாதி, படிச்சா²தே³தப்³ப³ம்பி படிச்சா²தே³ந்தீ’’தி ஸம்பியாயமானோ நிவாஸேதி. ஹத்தி²யானஅஸ்ஸயானரத²யானஸுவண்ணஸிவிகாதீ³ஸு உபனீதேஸு ‘‘ஹரதே²தானி சலாசலானி, ந ஸக்கா ஏத்த² நிஸீதி³து’’ந்தி வத்வா ஜஜ்ஜரரத²கே உபனீதே ‘‘அயம் நிச்சலோ, ஏத்த² ஸுக²ம் நிஸீதி³து’’ந்தி தம் ஸாதி³யதி. ந உளாரேஸு பஞ்சஸு காமகு³ணேஸூதி அலங்கதபடியத்தா ரூபவதியோ இத்தி²யோ தி³ஸ்வா ‘‘யக்கி²னியோ மஞ்ஞே, ஏதா கா²தி³துகாமா, கிம் ஏதாஹீ’’தி யதா²பா²ஸுகேனேவ வீதினாமேதி. ந ஸுஸ்ஸூஸந்தீதி ஸோதும் ந இச்ச²ந்தி, ந ஸத்³த³ஹந்தீதி அத்தோ². ந ஸோதம் ஓத³ஹந்தீதி கதி²தஸ்ஸ ஸவனத்த²ம் ந ஸோதபஸாத³ம் ஓத³ஹந்தி. ஸக்கச்சந்திஆதீ³னி வுத்தவிபரியாயேன வேதி³தப்³பா³னி.
வேலாமோதி ஜாதிகோ³த்தரூபபோ⁴க³ஸத்³தா⁴பஞ்ஞாதீ³ஹி மரியாத³வேலம் அதிக்கந்தேஹி உளாரேஹி கு³ணேஹி ஸமன்னாக³தத்தா ஏவம்லத்³த⁴னாமோ. ஸோ ஏவரூபம் தா³னம் அதா³ஸி மஹாதா³னந்தி ஏத்த² அயம் அனுபுப்³பீ³கதா² – ஸோ கிர அதீதே பா³ராணஸியம் புரோஹிதகே³ஹே படிஸந்தி⁴ம் க³ண்ஹி, வேலாமகுமாரோதிஸ்ஸ நாமம் அகம்ஸு. ஸோ ஸோளஸவஸ்ஸகாலே பா³ராணஸிராஜகுமாரேன ஸத்³தி⁴ம் ஸிப்புக்³க³ஹணத்த²ம் தக்கஸிலம் அக³மாஸி. தே உபோ⁴பி தி³ஸாபாமோக்க²ஸ்ஸ ஆசரியஸ்ஸ ஸந்திகே ஸிப்பம் பட்ட²பயிம்ஸு. யதா² ச தே, ஏவம் அஞ்ஞேபி ஜம்பு³தீ³பே சதுராஸீதிஸஹஸ்ஸராஜகுமாரா. போ³தி⁴ஸத்தோ அத்தனா க³ஹிதட்டா²னே பிட்டி²ஆசரியோ ஹுத்வா சதுராஸீதி ராஜகுமாரஸஹஸ்ஸானி ஸிக்கா²பேதி, ஸயம்பி ஸோளஸவஸ்ஸேஹி க³ஹேதப்³ப³ஸிப்பம் தீஹி வஸ்ஸேஹி உக்³க³ண்ஹி. ஆசரியோ ‘‘வேலாமகுமாரஸ்ஸ ஸிப்பம் பகு³ண’’ந்தி ஞத்வா, ‘‘தாதா, வேலாமோ மயா ஞாதம் ஸப்³ப³ம் ஜானாதி, தும்ஹே ஸப்³பே³பி ஸமக்³கா³ க³ந்த்வா ஏதஸ்ஸ ஸந்திகே ஸிப்பம் உக்³க³ண்ஹதா²’’தி சதுராஸீதி குமாரஸஹஸ்ஸானி போ³தி⁴ஸத்தஸ்ஸ நிய்யாதே³ஸி.
போ³தி⁴ஸத்தோ ஆசரியம் வந்தி³த்வா சதுராஸீதி குமாரஸஹஸ்ஸபரிவாரோ நிக்க²மித்வா ஏகம் ஆஸன்னனக³ரம் பத்வா நக³ரஸாமிகம் ராஜகுமாரம் உக்³க³ண்ஹாபேத்வா தஸ்ஸ ஸிப்பே பகு³ணே ஜாதே தம் தத்தே²வ நிவத்தேஸி. ஏதேனுபாயேன சதுராஸீதி நக³ரஸஹஸ்ஸானி க³ந்த்வா சதுராஸீதியா ராஜகுமாரானம் ஸிப்பம் பகு³ணம் காரேத்வா தஸ்மிம் தஸ்மிம் நக³ரே தம் தம் நிவத்தேத்வா பா³ராணஸிராஜகுமாரம் ஆதா³ய பா³ராணஸிம் பச்சாக³ஞ்சி². மனுஸ்ஸா குமாரம் பரியோஸிதஸிப்பம் ரஜ்ஜே அபி⁴ஸிஞ்சிம்ஸு, வேலாமஸ்ஸ புரோஹிதட்டா²னம் அத³ம்ஸு. தேபி சதுராஸீதிஸஹஸ்ஸராஜகுமாரா ஸகேஸு ஸகேஸு ரஜ்ஜேஸு அபி⁴ஸேகம் பத்வா அனுஸம்வச்ச²ரம் பா³ராணஸிரஞ்ஞோ உபட்டா²னம் ஆக³ச்ச²ந்தி. தே ராஜானம் தி³ஸ்வா வேலாமஸ்ஸ ஸந்திகம் க³ந்த்வா, ‘‘ஆசரிய, அம்ஹே ரஜ்ஜேஸு பதிட்டி²தா, வதே³ய்யாத² யேனத்தோ²’’தி வத்வா க³ச்ச²ந்தி. தேஸம் க³மனாக³மனகாலே ஸகடஸந்த³மானிககா³விகோ³ணகுக்குடஸூகராத³யோ க³ண்ஹந்தானம் ஜனபதோ³ அதிவிய உபத்³து³தோ ஹோதி, மஹாஜனோ ஸன்னிபதித்வா ராஜங்க³ணே கந்த³தி.
ராஜா வேலாமம் பக்கோஸித்வா, ‘‘ஆசரிய, உபத்³து³தோ ஜனபதோ³, ராஜானோ க³மனாக³மனகாலே மஹாவிலோபம் கரோந்தி, மனுஸ்ஸா ஸந்தா⁴ரேதும் ந ஸக்கோந்தி, ஜனபத³பீளாய உபஸமம் ஏகம் உபாயம் கரோதா²’’தி. ஸாது⁴ மஹாராஜ, உபாயம் கரிஸ்ஸாமி, தும்ஹாகம் யத்தகேன ஜனபதே³ன அத்தோ², தம் பரிச்சி²ந்தி³த்வா க³ண்ஹதா²தி. ராஜா ததா² அகாஸி. வேலாமோ சதுராஸீதியா ராஜஸஹஸ்ஸானம் ஜனபதே³ விசாரேத்வா சக்கனாபி⁴யம் அரே விய ரஞ்ஞோ ஜனபத³ஸ்மிம் ஓரோபேஸி. ததோ பட்டா²ய தே ராஜானோ ஆக³ச்ச²ந்தாபி க³ச்ச²ந்தாபி அத்தனோ அத்தனோ ஜனபதே³னேவ ஸஞ்சரந்தி, அம்ஹாகம் ஜனபதோ³தி விலோபம் ந கரோந்தி. ராஜகா³ரவேன ரஞ்ஞோ ஜனபத³ம்பி ந பீளேந்தி. ஜனபதா³ ஸன்னிஸின்னா நிஸ்ஸத்³தா³ நிரவா அஹேஸும். ஸப்³பே³ ராஜானோ ஹட்ட²துட்டா² ‘‘யேன வோ, ஆசரிய, அத்தோ², தம் அம்ஹாகம் வதே³தா²’’தி பவாரயிம்ஸு.
வேலாமோ ஸீஸம்ன்ஹாதோ அத்தனோ அந்தோனிவேஸனே ஸத்தரதனபரிபூரானம் க³ப்³பா⁴னம் த்³வாரானி விவராபேத்வா யாவ ஸத்தமா குலபரிவட்டா ட²பிதம் த⁴னம் ஓலோகேத்வா ஆயவயம் உபதா⁴ரேத்வா ‘‘மயா ஸகலஜம்பு³தீ³பம் கோ²பே⁴ந்தேன தா³னம் தா³தும் வட்டதீ’’தி ரஞ்ஞோ ஆரோசேத்வா க³ங்கா³தீரே த்³வாத³ஸயோஜனிகா உத்³த⁴னபந்தியோ காரேத்வா தஸ்மிம் தஸ்மிம் டா²னே ஸப்பிமது⁴பா²ணிததேலதிலதண்டு³லாதீ³னம் ட²பனத்தா²ய மஹாகோட்டா²கா³ரானி பதிட்டா²பேத்வா ‘‘ஏகேகஸ்மிம் டா²னே ஏத்தகா ஏத்தகா ஜனா ஸம்வித³ஹத², யம்கிஞ்சி மனுஸ்ஸானம் லத்³த⁴ப்³ப³ம் நாம அத்தி², ததோ ஏகஸ்மிம்பி அஸதி மய்ஹம் ஆரோசேய்யாதா²’’தி மனுஸ்ஸே ஸம்விதா⁴ய ‘‘அஸுகதி³வஸதோ பட்டா²ய வேலாமப்³ராஹ்மணஸ்ஸ தா³னம் பு⁴ஞ்ஜந்தூ’’தி நக³ரே பே⁴ரிம் சராபேத்வா ‘‘தா³னக்³க³ம் பரினிட்டி²த’’ந்தி தா³னயுத்தேஹி ஆரோசிதே ஸஹஸ்ஸக்³க⁴னகம் வத்த²ம் நிவாஸேத்வா பஞ்சஸதக்³க⁴னகம் ஏகம்ஸம் கத்வா ஸப்³பா³லங்காரபூ⁴ஸிதோ தா³னவீமம்ஸனத்தா²ய ப²லிகவண்ணஸ்ஸ உத³கஸ்ஸ ஸுவண்ணபி⁴ங்கா³ரம் பூரேத்வா ‘‘இமஸ்மிம் லோகே ஸசே இமம் தா³னம் படிக்³க³ஹேதும் யுத்தரூபா த³க்கி²ணேய்யபுக்³க³லா அத்தி², இத³ம் உத³கம் நிக்க²மித்வா பத²விம் க³ண்ஹாது. ஸசே நத்தி², ஏவமேவ திட்ட²தூ’’தி ஸச்சகிரியம் கத்வா பி⁴ங்கா³ரம் அதோ⁴முக²ம் அகாஸி. உத³கம் த⁴மகரணேன க³ஹிதம் விய அஹோஸி. போ³தி⁴ஸத்தோ ‘‘ஸுஞ்ஞோ வத, போ⁴, ஜம்பு³தீ³போ, ஏகபுக்³க³லோபி த³க்கி²ணம் படிக்³க³ஹேதும் யுத்தரூபோ நத்தீ²’’தி விப்படிஸாரம் அகத்வா ‘‘ஸசே தா³யகஸ்ஸ வஸேனாயம் த³க்கி²ணா விஸுஜ்ஜி²ஸ்ஸதி, உத³கம் நிக்க²மித்வா பத²விம் க³ண்ஹாதூ’’தி சிந்தேஸி. ப²லிகவண்ணஸதி³ஸம் உத³கம் நிக்க²மித்வா பத²விம் க³ண்ஹி. ‘‘இதா³னி தா³னம் த³ஸ்ஸாமீ’’தி தா³னக்³க³ம் பத்வா தா³னம் ஓலோகேத்வா யாகு³வேலாய யாகு³ம், க²ஜ்ஜகவேலாய க²ஜ்ஜகம், போ⁴ஜனவேலாய போ⁴ஜனம் தா³பேஸி. ஏதேனேவ நீஹாரேன தி³வஸே தி³வஸே தா³னம் தீ³யதி.
தஸ்மிம் கோ² பன தா³னக்³கே³ ‘‘இத³ம் நாம அத்தி², இத³ம் நாம நத்தீ²’’தி வத்தப்³ப³ம் நத்தி². இதா³னி தம் தா³னம் ஏத்தகமத்தேனேவ ந நிட்ட²ம் க³மிஸ்ஸதீதி ரத்தஸுவண்ணம் நீஹராபேத்வா ஸுவண்ணபாதியோ காரேத்வா சதுராஸீதிஸுவண்ணபாதிஸஹஸ்ஸாதீ³னம் அத்தா²ய சதுராஸீதிராஜஸஹஸ்ஸானம் ஸாஸனம் பஹிணி. ராஜானோ ‘‘சிரஸ்ஸம் வத மயம் ஆசரியேன அனுக்³க³ஹிதா’’தி ஸப்³ப³ம் ஸம்பாதே³த்வா பேஸேஸும். தா³னே தி³ய்யமானேயேவ ஸத்த வஸ்ஸானி ஸத்த மாஸா அதிக்கந்தா. அத² ப்³ராஹ்மணோ ‘‘ஹிரஞ்ஞம் பா⁴ஜேத்வா தா³னம் த³ஸ்ஸாமீ’’தி மஹந்தே ஓகாஸே தா³னம் ஸஜ்ஜாபேஸி. ஸஜ்ஜாபேத்வா சதுராஸீதி ஸுவண்ணபாதிஸஹஸ்ஸானி ஆதி³ம் கத்வா கோடிதோ பட்டா²ய அதா³ஸி.
தத்த² ரூபியபூரானீதி ரஜததட்டிரஜதபா²லரஜதமாஸகேஹி பூரானி. பாதியோ பன கு²த்³தி³காதி ந ஸல்லக்கே²தப்³பா³, ஏககரீஸப்பமாணே பூ⁴மிபா⁴கே³ சதஸ்ஸோவ பாதியோ ட²பயிம்ஸு. பாதிமகுளம் நவரதனம் ஹோதி, முக²வட்டிதோ பட்டா²ய அட்ட²ரதனம், பாதிமுக²வட்டியா ச²யுத்தோ ஆஜஞ்ஞரதோ² அனுபரியாயதி, த³த³மானோ பாதியா பா³ஹிரந்தேன வக்³க³வக்³கே³ படிக்³கா³ஹகே ட²பேத்வா பட²மம் பாதியா பக்கி²த்தம் த³த்வா பச்சா² ஸந்தி⁴ஸந்தி⁴தோ வியோஜேத்வா பாதிந்தி ஏவம் சதுராஸீதி பாதிஸஹஸ்ஸானி அதா³ஸி. ரூபியபாதிஆதீ³ஸுபி ஏஸேவ நயோ. ஏத்த²பி ச ஸுவண்ணபூரானீதி ஸுவண்ணதட்டிஸுவண்ணபா²லஸுவண்ணமாஸகேஹி பூரானி. ஹிரஞ்ஞபூரானீதி ஸத்தவித⁴ரதனபூரானி. ஸோவண்ணாலங்காரானீதி ஸுவண்ணாலங்காரானி. கம்ஸூபதா⁴ரணானீதி ரஜதமயகீ²ரபடிச்ச²கானி. தாஸம் பன தே⁴னூனம் ஸிங்கா³னி ஸுவண்ணகோஸகபரியோனத்³தா⁴னி அஹேஸும், கீ³வாய ஸுமனதா³மம் பிளந்தி⁴ம்ஸு, சதூஸு பாதே³ஸு நுபூரானி, பிட்டி²யம் வரது³கூலம் பாருதம், கண்டே² ஸுவண்ணக⁴ண்டம் ப³ந்தி⁴ம்ஸு. வத்த²கோடிஸஹஸ்ஸானீதி லோகவோஹாரதோ வீஸதிவத்த²யுகா³னி ஏகா கோடி, இத⁴ பன த³ஸ ஸாடகாதி வுத்தம். கோ²மஸுகு²மானந்திஆதி³ம்ஹி கோ²மாதீ³ஸு யம் யம் ஸுகு²மம், தம் ததே³வ அதா³ஸி. யானி பனேதானி இத்தி²தா³னம் உஸப⁴தா³னம் மஜ்ஜதா³னம் ஸமஜ்ஜாதா³னந்தி அதா³னஸம்மதானி, தானிபி ஏஸ ‘‘வேலாமஸ்ஸ தா³னமுகே² இத³ம் நாம நத்தீ²’’தி வசனபத²ம் பச்சி²ந்தி³தும் பரிவாரத்தா²ய அதா³ஸி. நஜ்ஜோ மஞ்ஞே விஸ்ஸந்த³ந்தீதி நதி³யோ விய விஸ்ஸந்த³ந்தி.
இமினா ஸத்தா² வேலாமஸ்ஸ தா³னம் கதே²த்வா, ‘‘க³ஹபதி, ஏதம் மஹாதா³னம் நாஞ்ஞோ அதா³ஸி, அஹம் அதா³ஸிம். ஏவரூபம் பன தா³னம் த³த³ந்தோபி அஹம் படிக்³க³ஹேதும் யுத்தரூபம் புக்³க³லம் நாலத்த²ம், த்வம் மாதி³ஸே பு³த்³தே⁴ லோகஸ்மிம் தி³ட்ட²மானே தா³னம் த³த³மானோ கஸ்மா சிந்தேஸீ’’தி ஸேட்டி²ஸ்ஸ தே³ஸனம் வட்³டே⁴ந்தோ ஸியா கோ² பன தேதிஆதி³மாஹ. நனு ச யானி ததா³ அஹேஸும் ரூபவேத³னாஸஞ்ஞாஸங்கா²ரவிஞ்ஞாணானி, தானி நிருத்³தா⁴னி? கஸ்மா ‘‘அஹம் தேன ஸமயேன வேலாமோ ப்³ராஹ்மணோ’’தி ஆஹாதி? பவேணியா அவிச்சி²ன்னத்தா. தானி ஹி ரூபாதீ³னி நிருஜ்ஜ²மானானி இமேஸம் பச்சயே த³த்வா நிருத்³தா⁴னி அபராபரம் அவிச்சி²ன்னம் பவேணிம் க³ஹேத்வா ஏவமாஹ. ந தம் கோசி த³க்கி²ணம் ஸோதே⁴தீதி கோசி ஸமணோ வா ப்³ராஹ்மணோ வா தே³வோ வா மாரோ வா உட்டா²ய தம் த³க்கி²ணம் ஸோதே⁴தீதி வத்தப்³போ³ நாஹோஸி. தஞ்ஹி த³க்கி²ணம் ஸோதே⁴ந்தோ உத்தமகோடியா பு³த்³தோ⁴, ஹேட்டி²மகோடியா த⁴ம்மஸேனாபதிஸாரிபுத்தத்தே²ரஸதி³ஸோ ஸாவகோ ஸோதே⁴ய்ய.
தி³ட்டி²ஸம்பன்னந்தி த³ஸ்ஸனஸம்பன்னம் ஸோதாபன்னம். இத³ம் ததோ மஹப்ப²லதரந்தி இத³ம் ஸோதாபன்னஸ்ஸ தி³ன்னதா³னம் லோகியமஹாஜனஸ்ஸ ஸத்தமாஸாதி⁴கானி ஸத்த ஸம்வச்ச²ரானி ஏத்தகம் ஹிரஞ்ஞஸுவண்ணம் பரிச்சஜந்தேன தி³ன்னதா³னதோ மஹப்ப²லம்.
யோ ச ஸதம் தி³ட்டி²ஸம்பன்னானந்தி ஏத்த² ஏகஸ்ஸ ஸகதா³கா³மிஸ்ஸ வஸேன ஏகுத்தரஸதம் ஸோதாபன்னே கத்வா ஸோதாபன்னக³ணனா வேதி³தப்³பா³. இமினா உபாயேன ஸப்³ப³வாரேஸு ஹேட்டா² ஹேட்டா² ஆக³தே அனந்தரேன ஸதகு³ணம் கத்வா புக்³க³லக³ணனா வேதி³தப்³பா³.
பு³த்³த⁴ப்பமுக²ந்தி ஏத்த² ஸம்மாஸம்பு³த்³த⁴ம் ஸங்க⁴த்தே²ரம் கத்வா நிஸின்னோ ஸங்கோ⁴ பு³த்³த⁴ப்பமுகோ² ஸங்கோ⁴தி வேதி³தப்³போ³. சாதுத்³தி³ஸம் ஸங்க⁴ம் உத்³தி³ஸ்ஸாதி ஏத்த² சாதுத்³தி³ஸம் ஸங்க⁴ம் உத்³தி³ஸ்ஸ கதவிஹாரோ நாம யத்த² சேதியம் பதிட்டி²தம் ஹோதி, த⁴ம்மஸ்ஸவனம் கரீயதி, சதூஹி தி³ஸாஹி அனுதி³ஸாஹி ச பி⁴க்கூ² ஆக³ந்த்வா அப்படிபுச்சி²த்வாயேவ பாதே³ தோ⁴வித்வா குஞ்சிகாய த்³வாரம் விவரித்வா ஸேனாஸனம் படிஜக்³கி³த்வா வஸித்வா யதா²பா²ஸுகம் க³ச்ச²ந்தி. ஸோ அந்தமஸோ சதுரதனியா பண்ணஸாலாபி ஹோது, சாதுத்³தி³ஸம் ஸங்க⁴ம் உத்³தி³ஸ்ஸ கதவிஹாரோத்வேவ வுச்சதி.
ஸரணம் க³ச்சே²ய்யாதி ஏத்த² மக்³கே³னாக³தம் அனிவத்தனஸரணம் அதி⁴ப்பேதம். அபரே பனாஹு – அத்தானம் நிய்யாதே³த்வா தி³ன்னத்தா ஸரணாக³மனம் ததோ மஹப்ப²லதரந்தி வுத்தம். ஸிக்கா²பதா³னி ஸமாதி³யேய்யாதி பஞ்ச ஸீலானி க³ண்ஹேய்ய. ஸீலம்பி மக்³கே³ன ஆக³தம் அனிவத்தனஸீலமேவ கதி²தம். அபரே பனாஹு – ஸப்³ப³ஸத்தானம் அப⁴யதா³னஸ்ஸ தி³ன்னத்தா ஸீலம் ததோ மஹப்ப²லதரந்தி வுத்தம். க³ந்தோ⁴ஹனமத்தந்தி க³ந்த⁴ஊஹனமத்தம், த்³வீஹங்கு³லீஹி க³ண்ட³பிண்ட³ம் க³ஹேத்வா உபஸிங்க⁴னமத்தம். அபரே பன ‘‘க³த்³தோ³ஹனமத்த’’ந்தி பாளிம் வத்வா கா³வியா ஏகவாரம் த²னஅஞ்ச²னமத்தந்தி அத்த²ம் வத³ந்தி. மேத்தசித்தந்தி ஸப்³ப³ஸத்தானம் ஹிதானுப²ரணசித்தம். தம் பன அப்பனாவஸேனேவ க³ஹிதம். அனிச்சஸஞ்ஞந்தி மக்³க³ஸ்ஸ அனந்தரபச்சயபா⁴வேன ஸிகா²பத்தப³லவவிபஸ்ஸனம்.
உபமாதோ பன இமானி தா³னாதீ³னி புஞ்ஞானி ஏவம் வேதி³தப்³பா³னி – ஸசேபி ஹி ஜம்பு³தீ³பம் பே⁴ரிதலஸதி³ஸம் ஸமதலம் கத்வா கோடிதோ பட்டா²ய பல்லங்கே அத்த²ரித்வா அரியபுக்³க³லே நிஸீதா³பேய்ய, தத்த² ஸோதாபன்னானம் த³ஸ பந்தியோ அஸ்ஸு, ஸகதா³கா³மீனம் பஞ்ச, அனாகா³மீனம் அட்³ட⁴தேய்யா, கி²ணாஸவானம் தி³யட்³டா⁴, பச்சேகபு³த்³தா⁴னம் ஏகா பந்தி ப⁴வேய்ய, ஸம்மாஸம்பு³த்³தோ⁴ ஏககோவ. ஏத்தகஸ்ஸ ஜனஸ்ஸ தி³ன்னதா³னதோ ஸம்மாஸம்பு³த்³த⁴ஸ்ஸ தி³ன்னமேவ மஹப்ப²லம். இதரம் பன –
‘‘விஹாரதா³னம் பணிபாதோ, ஸிக்கா² மேத்தாய பா⁴வனா;
க²யதோ ஸம்மஸந்தஸ்ஸ, கலம் நாக்³க⁴தி ஸோளஸிம்’’.
தேனேவ ப⁴க³வா பரினிப்³பா³னஸமயே ‘‘த⁴ம்மானுத⁴ம்மப்படிபத்தி அனுத்தரா பூஜா’’தி ஆஹ. ஸேஸம் ஸப்³ப³த்த² உத்தானத்த²மேவாதி.
ஸீஹனாத³வக்³கோ³ து³தியோ.