2. ஸஉபாதி³ஸேஸஸுத்தவண்ணனா

12. து³தியே ஸஉபாதி³ஸேஸந்தி ஸஉபாதா³னஸேஸம். அனுபாதி³ஸேஸந்தி உபாதா³னஸேஸரஹிதம் நிக்³க³ஹணம். மத்தஸோ காரீதி பமாணகாரீ ந பரிபூரகாரீ. ந தாவாயம், ஸாரிபுத்த, த⁴ம்மபரியாயோ படிபா⁴ஸீதி அப்படிபா⁴னம் நாம ப⁴க³வதோ நத்தி², ந தாவாஹம் இமம் த⁴ம்மபரியாயம் கதே²ஸிந்தி அயம் பனேத்த² அத்தோ². மாயிமம் த⁴ம்மபரியாயம் ஸுத்வா பமாத³ம் ஆஹரிம்ஸூதி ‘‘மயம் கிர சதூஹி அபாயேஹி முத்தா’’தி உபரி அரஹத்தத்தா²ய வீரியம் அகரோந்தா மா பமாத³ம் ஆபஜ்ஜிம்ஸு. பஞ்ஹாதி⁴ப்பாயேன பா⁴ஸிதோதி தயா புச்சி²தபஞ்ஹஸ்ஸ ஸபா⁴வேன கதி²தோதி த³ஸ்ஸேதி. இமேஸம் பன நவன்னம் புக்³க³லானம் ப⁴வேஸு ச²ந்த³ராக³வினோத³னத்த²ம் ஏதமேவ அத்து²ப்பத்திம் கத்வா – ‘‘ஸேய்யதா²பி, பி⁴க்க²வே, அப்பமத்தகோபி கூ³தோ² து³க்³க³ந்தோ⁴ ஹோதி, ஏவமேவ கோ² க்²வாஹம், பி⁴க்க²வே, அப்பமத்தகம்பி ப⁴வம் ந வண்ணேமி அந்தமஸோ அச்ச²ராஸங்கா⁴தமத்தம்பீ’’தி இமம் ஸுத்தம் (அ. நி. 1.321) அபா⁴ஸி. ந கேவலஞ்ச ஏதேஸம்யேவ நவன்னம் புக்³க³லானம் க³தி நிப³த்³தா⁴, யேஸம் பன குலானம் தீணி ஸரணானி பஞ்ச ஸீலானி ஏகம் ஸலாகப⁴த்தம் ஏகம் பக்கி²யப⁴த்தம் ஏகம் வஸ்ஸாவாஸிகம் ஏகா போக்க²ரணீ ஏகோ ஆவாஸோ, ஏவரூபானி நிப³த்³த⁴புஞ்ஞானி அத்தி². தேஸம்பி க³தி நிப³த்³தா⁴, ஸோதாபன்னஸதி³ஸானேவ தானி குலானி.