1. ஸம்போ³தி⁴ஸுத்தவண்ணனா

1. நவகனிபாதஸ்ஸ பட²மே ஸம்போ³தி⁴பக்கி²கானந்தி சதுமக்³க³ஸங்கா²தஸ்ஸ ஸம்போ³தி⁴ஸ்ஸ பக்கே² ப⁴வானம், உபகாரகானந்தி அத்தோ². பாளியம் ஆக³தே நவ த⁴ம்மே ஸந்தா⁴யேவம் புச்ச²தி. கா உபனிஸாதி கோ உபனிஸ்ஸயபச்சயோ. அபி⁴ஸல்லேக²ந்தீதி அபி⁴ஸல்லேகி²கா. ஸமத²விபஸ்ஸனாசித்தஸ்ஸ விவரணே ஸப்பாயா உபகாரகாதி சேதோவிவரணஸப்பாயா. அப்பிச்ச²தம் ஆரப்³ப⁴ பவத்தா கதா² அப்பிச்ச²கதா². ஸேஸேஸுபி ஏஸேவ நயோ.

அஸுபா⁴ பா⁴வேதப்³பா³ ராக³ஸ்ஸ பஹானாயாதி அயமத்தோ² ஸாலிலாயகோபமாய விபா⁴வேதப்³போ³ – ஏகோ ஹி புரிஸோ அஸிதம் க³ஹேத்வா கோடிதோ பட்டா²ய ஸாலிக்கே²த்தே ஸாலியோ லாயதி. அத²ஸ்ஸ வதிம் பி⁴ந்தி³த்வா கா³வோ பவிஸிம்ஸு. ஸோ அஸிதம் ட²பேத்வா யட்டி²ம் ஆதா³ய தேனேவ மக்³கே³ன கா³வோ நீஹரித்வா வதிம் பாகதிகம் கத்வா புனபி அஸிதம் ஆதா³ய ஸாலியோ லாயி. ஏத்த² ஸாலிக்கே²த்தம் விய பு³த்³த⁴ஸாஸனம் த³ட்ட²ப்³ப³ம், ஸாலிலாயகோ விய யோகா³வசரோ, அஸிதம் விய பஞ்ஞா, லாயனகாலோ விய விபஸ்ஸனாய கம்மகரணகாலோ, யட்டி² விய அஸுப⁴கம்மட்டா²னம், வதி விய ஸம்வரோ, வதிம் பி⁴ந்தி³த்வா கா³வீனம் பவிஸனம் விய ஸஹஸா அப்படிஸங்கா²ய பமாத³ம் ஆரப்³ப⁴ ராக³ஸ்ஸ உப்பஜ்ஜனம், அஸிதம் ட²பேத்வா யட்டி²ம் ஆதா³ய பவிட்ட²மக்³கே³னேவ கா³வோ நீஹரித்வா வதிம் படிபாகதிகம் கத்வா புன கோடிதோ பட்டா²ய ஸாலிலாயனம் விய அஸுப⁴கம்மட்டா²னேன ராக³ம் விக்க²ம்பே⁴த்வா புன விபஸ்ஸனாய கம்மம் ஆரப⁴னகாலோ. இமமத்த²ம் ஸந்தா⁴ய வுத்தம் – ‘‘அஸுபா⁴ பா⁴வேதப்³பா³ ராக³ஸ்ஸ பஹானாயா’’தி.

தத்த² ராக³ஸ்ஸாதி பஞ்சகாமகு³ணிகராக³ஸ்ஸ. மேத்தாதி மேத்தாகம்மட்டா²னம். ப்³யாபாத³ஸ்ஸ பஹானாயாதி வுத்தனயேனேவ உப்பன்னஸ்ஸ கோபஸ்ஸ பஜஹனத்தா²ய. ஆனாபானஸ்ஸதீதி ஸோளஸவத்து²கா ஆனாபானஸ்ஸதி. விதக்குபச்சே²தா³யாதி வுத்தனயேனேவ உப்பன்னானம் விதக்கானம் உபச்சே²த³னத்தா²ய. அஸ்மிமானஸமுக்³கா⁴தாயாதி அஸ்மீதி உப்பஜ்ஜனகஸ்ஸ மானஸ்ஸ ஸமுக்³கா⁴தத்தா²ய. அனத்தஸஞ்ஞா ஸண்டா²தீதி அனிச்சலக்க²ணே தி³ட்டே² அனத்தலக்க²ணம் தி³ட்ட²மேவ ஹோதி. ஏதேஸு ஹி தீஸு லக்க²ணேஸு ஏகஸ்மிம் தி³ட்டே² இதரத்³வயம் தி³ட்ட²மேவ ஹோதி. தேன வுத்தம் – ‘‘அனிச்சஸஞ்ஞினோ, பி⁴க்க²வே, அனத்தஸஞ்ஞா ஸண்டா²தீ’’தி. தி³ட்டே²வ த⁴ம்மே நிப்³பா³னந்தி தி³ட்டே²யேவ த⁴ம்மே அபச்சயபரினிப்³பா³னஞ்ச பாபுணாதீதி இமஸ்மிம் ஸுத்தே வட்டவிவட்டம் கதி²தம்.