1. கோ³தமீஸுத்தவண்ணனா

51. ச²ட்ட²ஸ்ஸ பட²மே ஸக்கேஸு விஹரதீதி பட²மக³மனேன க³ந்த்வா விஹரதி. மஹாபஜாபதீதி புத்தபஜாய சேவ தீ⁴துபஜாய ச மஹந்தத்தா ஏவம்லத்³த⁴னாமா. யேன ப⁴க³வா தேனுபஸங்கமீதி ப⁴க³வா கபிலபுரம் க³ந்த்வா பட²மமேவ நந்த³ம் பப்³பா³ஜேஸி, ஸத்தமே தி³வஸே ராஹுலகுமாரம். சும்ப³டககலஹே (தீ³. நி. அட்ட². 2.331; ஸம். நி. அட்ட². 1.1.37) பன உப⁴யனக³ரவாஸிகேஸு யுத்³த⁴த்தா²ய நிக்க²ந்தேஸு ஸத்தா² க³ந்த்வா தே ராஜானோ ஸஞ்ஞாபேத்வா அத்தத³ண்ட³ஸுத்தம் (ஸு. நி. 941 ஆத³யோ; மஹானி. 170 ஆத³யோ) கதே²ஸி. ராஜானோ பஸீதி³த்வா அட்³ட⁴தியஸதே அட்³ட⁴தியஸதே குமாரே அத³ம்ஸு, தானி பஞ்ச குமாரஸதானி ஸத்து² ஸந்திகே பப்³ப³ஜிம்ஸு, அத² நேஸம் பஜாபதியோ ஸாஸனம் பேஸேத்வா அனபி⁴ரதிம் உப்பாத³யிம்ஸு. ஸத்தா² தேஸம் அனபி⁴ரதியா உப்பன்னபா⁴வம் ஞத்வா தே பஞ்சஸதே த³ஹரபி⁴க்கூ² குணாலத³ஹம் நேத்வா அத்தனோ குணாலகாலே நிஸின்னபுப்³பே³ பாஸாணதலே நிஸீதி³த்வா குணாலஜாதககதா²ய (ஜா. 2.21.குணாலஜாதக) தேஸம் அனபி⁴ரதிம் வினோதே³த்வா ஸப்³பே³பி தே ஸோதாபத்திப²லே பதிட்டா²பேஸி, புன மஹாவனம் ஆனேத்வா அரஹத்தப²லேதி. தேஸம் சித்தஜானனத்த²ம் புனபி பஜாபதியோ ஸாஸனம் பஹிணிம்ஸு. தே ‘‘அப⁴ப்³பா³ மயம் க⁴ராவாஸஸ்ஸா’’தி படிஸாஸனம் பஹிணிம்ஸு. தா ‘‘ந தா³னி அம்ஹாகம் க⁴ரம் க³ந்தும் யுத்தம், மஹாபஜாபதியா ஸந்திகம் க³ந்த்வா பப்³ப³ஜ்ஜம் அனுஜானாபேத்வா பப்³ப³ஜிஸ்ஸாமா’’தி பஞ்சஸதாபி மஹாபஜாபதிம் உபஸங்கமித்வா ‘‘அய்யே, அம்ஹாகம் பப்³ப³ஜ்ஜம் அனுஜானாபேதா²’’தி ஆஹம்ஸு. மஹாபஜாபதீ தா இத்தி²யோ க³ஹேத்வா யேன ப⁴க³வா தேனுபஸங்கமி. ஸேதச்ச²த்தஸ்ஸ ஹேட்டா² ரஞ்ஞோ பரினிப்³பு³தகாலே உபஸங்கமீதிபி வத³ந்தியேவ.

அலம் கோ³தமி, மா தே ருச்சீதி கஸ்மா படிக்கி²பி, நனு ஸப்³பே³ஸம்பி பு³த்³தா⁴னம் சதஸ்ஸோ பரிஸா ஹோந்தீதி? காமம் ஹோந்தி, கிலமேத்வா பன அனேகவாரம் யாசிதே அனுஞ்ஞாதம் பப்³ப³ஜ்ஜம் ‘‘து³க்கே²ன லத்³தா⁴’’தி ஸம்மா பரிபாலேஸ்ஸந்தீதி க³ரும் கத்வா அனுஞ்ஞாதுகாமோ படிக்கி²பி. பக்காமீதி புன கபிலபுரமேவ பாவிஸி. யதா²பி⁴ரந்தம் விஹரித்வாதி போ³த⁴னேய்யஸத்தானம் உபனிஸ்ஸயம் ஓலோகேந்தோ யதா²ஜ்ஜா²ஸயனே விஹரித்வா. சாரிகம் பக்காமீதி மஹாஜனஸங்க³ஹம் கரோந்தோ உத்தமாய பு³த்³த⁴ஸிரியா அனோபமேன பு³த்³த⁴விலாஸேன அதுரிதசாரிகம் பக்காமி.

ஸம்ப³ஹுலாஹி ஸாகியானீஹி ஸத்³தி⁴ந்தி அந்தோனிவேஸனம்ஹியேவ த³ஸப³லம் உத்³தி³ஸ்ஸ பப்³ப³ஜ்ஜாவேஸம் க³ஹேத்வா பஞ்சஸதா ஸாகியானியோ பப்³ப³ஜ்ஜாவேஸம்யேவ கா³ஹாபேத்வா ஸப்³பா³ஹிபி தாஹி ஸம்ப³ஹுலாஹி ஸாகியானீஹி ஸத்³தி⁴ம். சாரிகம் பக்காமீதி க³மனம் அபி⁴னீஹரி. க³மனாபி⁴னீஹரணகாலே பன தா ஸுகு²மாலா ராஜித்தி²யோ பத³ஸா க³ந்தும் ந ஸக்கி²ஸ்ஸந்தீதி ஸாகியகோலியராஜானோ ஸோவண்ணஸிவிகாயோ உபட்டா²பயிம்ஸு. தா பன ‘‘யானே ஆருய்ஹ க³ச்ச²ந்தீதி ஸத்த²ரி அகா³ரவோ கதோ ஹோதீ’’தி ஏகபண்ணாஸயோஜனிகம் பத³ஸாவ படிபஜ்ஜிம்ஸு. ராஜானோபி புரதோ ச பச்ச²தோ ச ஆரக்க²ம் ஸம்வித³ஹாபேத்வா தண்டு³லஸப்பிதேலாதீ³னம் ஸகடானி பூராபேத்வா ‘‘க³தட்டா²னே க³தட்டா²னே ஆஹாரம் படியாதே³தா²’’தி புரிஸே பேஸயிம்ஸு. ஸூனேஹி பாதே³ஹீதி தாஸஞ்ஹி ஸுகு²மாலத்தா பாதே³ஸு ஏகோ போ²டோ உட்டே²தி, ஏகோ பி⁴ஜ்ஜதி. உபோ⁴ பாதா³ கதகட்டி²ஸம்பரிகிண்ணா விய ஹுத்வா உத்³து⁴மாதா ஜாதா. தேன வுத்தம் – ‘‘ஸூனேஹி பாதே³ஹீ’’தி. ப³ஹித்³வாரகோட்ட²கேதி த்³வாரகோட்ட²கதோ ப³ஹி. கஸ்மா பனேவம் டி²தாதி? ஏவம் கிரஸ்ஸா அஹோஸி – ‘‘அஹம் ததா²க³தேன அனனுஞ்ஞாதா ஸயமேவ பப்³ப³ஜ்ஜாவேஸம் அக்³க³ஹேஸிம், ஏவம் க³ஹிதபா⁴வோ ச பன மே ஸகலஜம்பு³தீ³பே பாகடோ ஜாதோ. ஸசே ஸத்தா² பப்³ப³ஜ்ஜம் அனுஜானாதி, இச்சேதம் குஸலம். ஸசே பன நானுஜானிஸ்ஸதி, மஹதீ க³ரஹா ப⁴விஸ்ஸதீ’’தி விஹாரம் பவிஸிதும் அஸக்கோந்தீ ரோத³மானாவ அட்டா²ஸி.

கிம் நு த்வம் கோ³தமீதி கிம் நு ராஜகுலானம் விபத்தி உப்பன்னா, கேன த்வம் காரணேன ஏவம் விவண்ணபா⁴வம் பத்தா, ஸூனேஹி பாதே³ஹி…பே… டி²தாதி. அஞ்ஞேனபி பரியாயேனாதி அஞ்ஞேனபி காரணேன. ப³ஹுகாரா, ப⁴ந்தேதிஆதி³னா தஸ்ஸா கு³ணம் கதே²த்வா புன பப்³ப³ஜ்ஜம் யாசந்தோ ஏவமாஹ. ஸத்தா²பி ‘‘இத்தி²யோ நாம பரித்தபஞ்ஞா, ஏகயாசிதமத்தேன பப்³ப³ஜ்ஜாய அனுஞ்ஞாதாய ந மம ஸாஸனம் க³ரும் கத்வா க³ண்ஹிஸ்ஸந்தீ’’தி திக்க²த்தும் படிக்கி²பித்வா இதா³னி க³ரும் கத்வா கா³ஹாபேதுகாமதாய ஸசே, ஆனந்த³, மஹாபஜாபதீ கோ³தமீ அட்ட² க³ருத⁴ம்மே படிக்³க³ண்ஹாதி, ஸாவ’ஸ்ஸா ஹோது உபஸம்பதா³திஆதி³மாஹ. தத்த² ஸாவஸ்ஸாதி ஸா ஏவ அஸ்ஸா பப்³ப³ஜ்ஜாபி உபஸம்பதா³பி ஹோது.

தத³ஹூபஸம்பன்னஸ்ஸாதி தம்தி³வஸம் உபஸம்பன்னஸ்ஸ. அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் கத்தப்³ப³ந்தி ஓமானாதிமானே அகத்வா பஞ்சபதிட்டி²தேன அபி⁴வாத³னம், ஆஸனா பச்சுட்டா²ய பச்சுக்³க³மனவஸேன பச்சுட்டா²னம், த³ஸனகே² ஸமோதா⁴னேத்வா அஞ்ஜலிகம்மம், ஆஸனபஞ்ஞாபனபீ³ஜனாதி³கம் அனுச்ச²விககம்மஸங்கா²தம் ஸாமீசிகம்மஞ்ச கதப்³ப³ம். அபி⁴க்கு²கே ஆவாஸேதி யத்த² வஸந்தியா அனந்தராயேன ஓவாத³த்தா²ய உபஸங்கமனட்டா²னே ஓவாத³தா³யகோ ஆசரியோ நத்தி², அயம் அபி⁴க்கு²கோ ஆவாஸோ நாம. ஏவரூபே ஆவாஸே வஸ்ஸம் ந உபக³ந்தப்³ப³ம். அன்வட்³ட⁴மாஸந்தி அனுபோஸதி²கம். ஓவாதூ³பஸங்கமனந்தி ஓவாத³த்தா²ய உபஸங்கமனம். தி³ட்டே²னாதி சக்கு²னா தி³ட்டே²ன. ஸுதேனாதி ஸோதேன ஸுதேன. பரிஸங்காயாதி தி³ட்ட²ஸுதவஸேன பரிஸங்கிதேன. க³ருத⁴ம்மந்தி க³ருகம் ஸங்கா⁴தி³ஸேஸாபத்திம். பக்க²மானத்தந்தி அனூனானி பன்னரஸ தி³வஸானி மானத்தம். ச²ஸு த⁴ம்மேஸூதி விகாலபோ⁴ஜனச்ச²ட்டே²ஸு ஸிக்கா²பதே³ஸு. ஸிக்கி²தஸிக்கா²யாதி ஏகஸிக்க²ம்பி அக²ண்ட³ம் கத்வா பூரிதஸிக்கா²ய. அக்கோஸிதப்³போ³ பரிபா⁴ஸிதப்³போ³தி த³ஸன்னம் அக்கோஸவத்தூ²னம் அஞ்ஞதரேன அக்கோஸவத்து²னா ந அக்கோஸிதப்³போ³, ப⁴யூபத³ம்ஸனாய யாய காயசி பரிபா⁴ஸாய ந பரிபா⁴ஸிதப்³போ³.

ஓவடோ பி⁴க்கு²னீனம் பி⁴க்கூ²ஸு வசனபதோ²தி ஓவாதா³னுஸாஸனத⁴ம்மகதா²ஸங்கா²தோ வசனபதோ² பி⁴க்கு²னீனம் பி⁴க்கூ²ஸு ஓவரிதோ பிஹிதோ, ந பி⁴க்கு²னியா கோசி பி⁴க்கு² ஓவதி³தப்³போ³ அனுஸாஸிதப்³போ³ வா ‘‘ப⁴ந்தே, போராணகத்தே²ரா இத³ம் சீவரவத்தம் பூரயிம்ஸூ’’தி ஏவம் பன பவேணிவஸேன கதே²தும் வட்டதி. அனோவடோ பி⁴க்கூ²னம் பி⁴க்கு²னீஸு வசனபதோ²தி பி⁴க்கூ²னம் பன பி⁴க்கு²னீஸு வசனபதோ² அனிவாரிதோ, யதா²ருசி ஓவதி³தும் அனுஸாஸிதும் த⁴ம்மகத²ம் கதே²துந்தி அயமேத்த² ஸங்கே²போ, வித்தா²ரதோ பனேஸா க³ருத⁴ம்மகதா² ஸமந்தபாஸாதி³காய வினயஸம்வண்ணனாய (பாசி. அட்ட². 148) வுத்தனயேனேவ வேதி³தப்³பா³.

இமே பன அட்ட² க³ருத⁴ம்மே ஸத்து² ஸந்திகே உக்³க³ஹேத்வா தே²ரேன அத்தனோ ஆரோசியமானே ஸுத்வாவ மஹாபஜாபதியா தாவ மஹந்தம் தோ³மனஸ்ஸம் க²ணேன படிப்பஸ்ஸம்பி⁴, அனோதத்தத³ஹதோ ஆப⁴தேன ஸீதுத³கஸ்ஸ க⁴டஸதேன மத்த²கே பரிஸித்தா விய விக³தபரிளாஹா அத்தமனா ஹுத்வா க³ருத⁴ம்மபடிக்³க³ஹணேன உப்பன்னபீதிபாமோஜ்ஜம் ஆவிகரோந்தீ ஸேய்யதா²பி, ப⁴ந்தேதிஆதி³கம் உதா³னம் உதா³னேஸி.

கும்ப⁴த்தே²னகேஹீதி கும்பே⁴ தீ³பம் ஜாலேத்வா தேன ஆலோகேன பரக⁴ரே ப⁴ண்ட³ம் விசினித்வா தே²னகசோரேஹி. ஸேதட்டி²கா நாம ரோக³ஜாதீதி ஏகோ பாணகோ நாளமஜ்ஜ²க³தம் கண்ட³ம் விஜ்ஜ²தி, யேன வித்³தா⁴ கண்டா³ நிக்க²ந்தம்பி ஸாலிஸீஸம் கீ²ரம் க³ஹேதும் ந ஸக்கோதி. மஞ்ஜிட்டி²கா நாம ரோக³ஜாதீதி உச்சூ²னம் அந்தோரத்தபா⁴வோ.

மஹதோ தளாகஸ்ஸ படிகச்சேவ ஆளிந்தி இமினா பன ஏதமத்த²ம் த³ஸ்ஸேதி – யதா² மஹதோ தளாகஸ்ஸ பாளியா அப³த்³தா⁴யபி கிஞ்சி உத³கம் திட்ட²தேவ, பட²மமேவ ப³த்³தா⁴ய பன யம் அப³த்³த⁴பச்சயா ந திட்டே²ய்ய, தம்பி திட்டே²ய்ய, ஏவமேவ யே இமே அனுப்பன்னே வத்து²ஸ்மிம் படிகச்சேவ அனதிக்கமனத்தா²ய க³ருத⁴ம்மா பஞ்ஞத்தா, தேஸு அபஞ்ஞத்தேஸு மாதுகா³மஸ்ஸ பப்³ப³ஜிதத்தா பஞ்ச வஸ்ஸஸதானி ஸத்³த⁴ம்மோ திட்டே²ய்ய. படிகச்சேவ பஞ்ஞத்தத்தா பன அபரானிபி பஞ்ச வஸ்ஸஸதானி ட²ஸ்ஸதீதி ஏவம் பட²மம் வுத்தவஸ்ஸஸஹஸ்ஸமேவ ட²ஸ்ஸதி. வஸ்ஸஸஹஸ்ஸந்தி சேதம் படிஸம்பி⁴தா³பபே⁴த³ப்பத்தகீ²ணாஸவானம் வஸேனேவ வுத்தம், ததோ பன உத்தரிபி ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸம், அனாகா³மிவஸேன வஸ்ஸஸஹஸ்ஸம், ஸகதா³கா³மிவஸேன வஸ்ஸஸஹஸ்ஸம், ஸோதாபன்னவஸேன வஸ்ஸஸஹஸ்ஸந்தி ஏவம் பஞ்சவஸ்ஸஸஹஸ்ஸானி படிவேத⁴ஸத்³த⁴ம்மோ ட²ஸ்ஸதி. பரியத்தித⁴ம்மோபி தானியேவ. ந ஹி பரியத்தியா அஸதி படிவேதோ⁴ அத்தி², நாபி பரியத்தியா ஸதி படிவேதோ⁴ ந ஹோதி. லிங்க³ம் பன பரியத்தியா அந்தரஹிதாயபி சிரம் பவத்திஸ்ஸதீதி.