5. பஞ்சமபண்ணாஸகம்

(21) 1. கிமிலவக்³கோ³

1. கிமிலஸுத்தவண்ணனா

201. பஞ்சமஸ்ஸ பட²மே கிமிலாயந்தி ஏவம்னாமகே நக³ரே. நிசுலவனேதி முசலிந்த³வனே. ஏதத³வோசாதி அயம் கிர தே²ரோ தஸ்மிம்யேவ நக³ரே ஸேட்டி²புத்தோ ஸத்து² ஸந்திகே பப்³ப³ஜித்வா புப்³பே³னிவாஸஞாணம் படிலபி⁴. ஸோ அத்தனா நிவுத்த²ம் க²ந்த⁴ஸந்தானம் அனுஸ்ஸரந்தோ கஸ்ஸபத³ஸப³லஸ்ஸ ஸாஸனோஸக்கனகாலே பப்³ப³ஜித்வா சதூஸு பரிஸாஸு ஸாஸனே அகா³ரவம் கரோந்தீஸு நிஸ்ஸேணிம் ப³ந்தி⁴த்வா பப்³ப³தம் ஆருய்ஹ தத்த² ஸமணத⁴ம்மம் கத்வா அத்தனோ நிவுத்த²பா⁴வம் அத்³த³ஸ. ஸோ ‘‘ஸத்தா²ரம் உபஸங்கமித்வா தம் காரணம் புச்சி²ஸ்ஸாமீ’’தி ஏதம் ‘‘கோ நு கோ², ப⁴ந்தே’’திஆதி³வசனம் அவோச.

ஸத்த²ரி அகா³ரவா விஹரந்தி அப்பதிஸ்ஸாதி ஸத்த²ரி கா³ரவஞ்சேவ ஜேட்ட²கபா⁴வஞ்ச அனுபட்ட²பேத்வா விஹரந்தி. ஸேஸேஸுபி ஏஸேவ நயோ. தத்த² சேதியங்க³ணாதீ³ஸு ச²த்தம் தா⁴ரேத்வா உபாஹனா ஆருய்ஹ விசரந்தோ நானப்பகாரஞ்ச நிரத்த²ககத²ம் கதே²ந்தோ ஸத்த²ரி அகா³ரவோ விஹரதி நாம. த⁴ம்மஸ்ஸவனக்³கே³ பன நிஸீதி³த்வா நித்³தா³யந்தோ சேவ நானப்பகாரஞ்ச நிரத்த²ககத²ம் கதே²ந்தோ த⁴ம்மே அகா³ரவோ விஹரதி நாம. ஸங்க⁴மஜ்ஜே² பா³ஹாவிக்கே²பகம் நானத்தகத²ம் கதே²ந்தோ தே²ரனவமஜ்ஜி²மேஸு ச சித்தீகாரம் அகரோந்தோ ஸங்கே⁴ அகா³ரவோ விஹரதி நாம. ஸிக்க²ம் அபரிபூரேந்தோ ஸிக்கா²ய அகா³ரவோ விஹரதி நாம. அஞ்ஞமஞ்ஞம் கலஹப⁴ண்ட³னாதீ³னி கரோந்தோ அஞ்ஞமஞ்ஞம் அகா³ரவோ விஹரதி நாம. து³தியம் உத்தானத்த²மேவ.

3. அஸ்ஸாஜானீயஸுத்தவண்ணனா

203-204. ததியே அஜ்ஜவேனாதி உஜுபா⁴வேன அவங்கக³மனேன. ஜவேனாதி பத³ஜவேன. மத்³த³வேனாதி ஸரீரமுது³தாய. க²ந்தியாதி அதி⁴வாஸனக்க²ந்தியா. ஸோரச்சேனாதி ஸுசிஸீலதாய. பி⁴க்கு²வாரே அஜ்ஜவந்தி ஞாணஸ்ஸ உஜுகக³மனம். ஜவோதி ஸூரம் ஹுத்வா ஞாணஸ்ஸ க³மனபா⁴வோ. மத்³த³வந்தி ஸீலமத்³த³வம். க²ந்தீதி அதி⁴வாஸனக்க²ந்தியேவ. ஸோரச்சம் ஸுசிஸீலதாயேவ. சதுத்தே² பஞ்ச ப³லானி மிஸ்ஸகானி கதி²தானி.

5. சேதோகி²லஸுத்தவண்ணனா

205. பஞ்சமே சேதோகி²லாதி சித்தஸ்ஸ த²த்³த⁴பா⁴வா, கசவரபா⁴வா, கா²ணுகபா⁴வா. ஸத்த²ரி கங்க²தீதி ஸத்து² ஸரீரே வா கு³ணே வா கங்க²தி. ஸரீரே கங்க²மானோ ‘‘த்³வத்திம்ஸவரபுரிஸலக்க²ணபடிமண்டி³தம் நாம ஸரீரம் அத்தி² நு கோ² நத்தீ²’’தி கங்க²தி, கு³ணே கங்க²மானோ ‘‘அதீதானாக³தபச்சுப்பன்னஜானனஸமத்த²ம் ஸப்³ப³ஞ்ஞுதஞ்ஞாணம் அத்தி² நு கோ² நத்தீ²’’தி கங்க²தி. விசிகிச்ச²தீதி விசினந்தோ கிச்ச²தி, து³க்க²ம் ஆபஜ்ஜதி, வினிச்சே²தும் ந ஸக்கோதி. நாதி⁴முச்சதீதி ஏவமேதந்தி அதி⁴மோக்க²ம் ந படிலப⁴தி. ந ஸம்பஸீத³தீதி கு³ணேஸு ஓதரித்வா நிப்³பி³சிகிச்ச²பா⁴வேன பஸீதி³தும் அனாவிலோ ப⁴விதும் ந ஸக்கோதி. ஆதப்பாயாதி கிலேஸஸந்தாபகவீரியகரணத்தா²ய. அனுயோகா³யாதி புனப்புனம் யோகா³ய. ஸாதச்சாயாதி ஸததகிரியாய. பதா⁴னாயாதி பத³ஹனத்தா²ய. அயம் பட²மோ சேதோகி²லோதி அயம் ஸத்த²ரி விசிகிச்சா²ஸங்கா²தோ பட²மோ சித்தஸ்ஸ த²த்³த⁴பா⁴வோ ஏவமேதஸ்ஸ பி⁴க்கு²னோ அப்பஹீனோ ஹோதி.

த⁴ம்மேதி பரியத்தித⁴ம்மே ச படிவேத⁴த⁴ம்மே ச. பரியத்தித⁴ம்மே கங்க²மானோ ‘‘தேபிடகம் பு³த்³த⁴வசனம் சதுராஸீதித⁴ம்மக்க²ந்த⁴ஸஹஸ்ஸானீதி வத³ந்தி, அத்தி² நு கோ² ஏதம் நத்தீ²’’தி கங்க²தி. படிவேத⁴த⁴ம்மே கங்க²மானோ ‘‘விபஸ்ஸனானிஸ்ஸந்தோ³ மக்³கோ³ நாம, மக்³க³னிஸ்ஸந்த³ம் ப²லம் நாம, ஸப்³ப³ஸங்கா²ரபடினிஸ்ஸக்³கோ³ நிப்³பா³னம் நாமாதி வத³ந்தி, தம் அத்தி² நு கோ² நத்தீ²’’தி கங்க²தி. ஸங்கே⁴ கங்க²தீதி ‘‘உஜுப்படிபன்னோ’’திஆதீ³னம் பதா³னம் வஸேன ‘‘ஏவரூபம் படிபத³ம் படிபன்னோ சத்தாரோ மக்³க³ட்டா² சத்தாரோ ப²லட்டா²தி அட்ட²ன்னம் புக்³க³லானம் ஸமூஹபூ⁴தோ ஸங்கோ⁴ நாம அத்தி² நு கோ² நத்தீ²’’தி கங்க²தி. ஸிக்கா²ய கங்க²மானோ ‘‘அதி⁴ஸீலஸிக்கா² நாம அதி⁴சித்தஅதி⁴பஞ்ஞாஸிக்கா² நாமாதி வத³ந்தி, ஸா அத்தி² நு கோ² நத்தீ²’’தி கங்க²தி. அயம் பஞ்சமோதி அயம் ஸப்³ரஹ்மசாரீஸு கோபஸங்கா²தோ பஞ்சமோ சித்தஸ்ஸ த²த்³த⁴பா⁴வோ கசவரபா⁴வோ கா²ணுகபா⁴வோ.

6. வினிப³ந்த⁴ஸுத்தவண்ணனா

206. ச²ட்டே² சேதஸோவினிப³ந்தா⁴தி சித்தம் வினிப³ந்தி⁴த்வா முட்டி²யம் கத்வா விய க³ண்ஹந்தீதி சேதஸோவினிப³ந்தா⁴. காமேதி வத்து²காமேபி கிலேஸகாமேபி. காயேதி அத்தனோ காயே. ரூபேதி ப³ஹித்³தா⁴ரூபே. யாவத³த்த²ந்தி யத்தகம் இச்ச²தி, தத்தகம். உத³ராவதே³ஹகந்தி உத³ரபூரம். தஞ்ஹி உத³ரம் அவதே³ஹனதோ உத³ராவதே³ஹகந்தி வுச்சதி. ஸேய்யஸுக²ந்தி மஞ்சபீட²ஸுக²ம், உதுஸுக²ம் வா. பஸ்ஸஸுக²ந்தி யதா² ஸம்பரிவத்தகம் ஸயந்தஸ்ஸ த³க்கி²ணபஸ்ஸ வாமபஸ்ஸானம் ஸுக²ம் ஹோதி, ஏவம் உப்பன்னஸுக²ம். மித்³த⁴ஸுக²ந்தி நித்³தா³ஸுக²ம். அனுயுத்தோதி யுத்தப்பயுத்தோ விஹரதி. பணிதா⁴யாதி பத்த²யித்வா. ஸீலேனாதிஆதீ³ஸு ஸீலந்தி சதுபாரிஸுத்³தி⁴ஸீலம். வதந்தி வதஸமாதா³னம். தபோதி தபசரணம். ப்³ரஹ்மசரியந்தி மேது²னவிரதி. தே³வோ வா ப⁴விஸ்ஸாமீதி மஹேஸக்க²தே³வோ வா ப⁴விஸ்ஸாமி. தே³வஞ்ஞதரோ வாதி அப்பேஸக்க²தே³வேஸு வா அஞ்ஞதரோதி.

7-8. யாகு³ஸுத்தாதி³வண்ணனா

207-208. ஸத்தமே வாதம் அனுலோமேதீதி வாதம் அனுலோமேத்வா ஹரதி. வத்தி²ம் ஸோதே⁴தீதி த⁴மனியோ ஸுத்³தா⁴ கரோதி. ஆமாவஸேஸம் பாசேதீதி ஸசே ஆமாவஸேஸகம் ஹோதி, தம் பாசேதி. அட்ட²மே அசக்கு²ஸ்ஸந்தி ந சக்கூ²னம் ஹிதம், சக்கு²ம் விஸுத்³த⁴ம் ந கரோதி.

9. கீ³தஸ்ஸரஸுத்தவண்ணனா

209. நவமே ஆயதகேனாதி தீ³கே⁴ன, பரிபுண்ணபத³ப்³யஞ்ஜனகம் கா³தா²வத்தஞ்ச வினாஸேத்வா பவத்தேன. ஸரகுத்திம்பி நிகாமயமானஸ்ஸாதி ஏவம் கீ³தஸ்ஸரோ காதப்³போ³தி ஸரகிரியம் பத்த²யமானஸ்ஸ. ஸமாதி⁴ஸ்ஸ ப⁴ங்கோ³ ஹோதீதி ஸமத²விபஸ்ஸனாசித்தஸ்ஸ வினாஸோ ஹோதி.

10. முட்ட²ஸ்ஸதிஸுத்தவண்ணனா

210. த³ஸமே து³க்க²ம் ஸுபதீதி நானாவித⁴ம் ஸுபினம் பஸ்ஸந்தோ து³க்க²ம் ஸுபதி. து³க்க²ம் படிபு³ஜ்ஜ²தீதி படிபு³ஜ்ஜ²ந்தோபி உத்தஸித்வா ஸலோமஹம்ஸோ படிபு³ஜ்ஜ²தி. இமஸ்மிம் ஸுத்தே ஸதிஸம்பஜஞ்ஞம் மிஸ்ஸகம் கதி²தம்.

கிமிலவக்³கோ³ பட²மோ.

(22) 2. அக்கோஸகவக்³கோ³

1. அக்கோஸகஸுத்தவண்ணனா

211. து³தியஸ்ஸ பட²மே அக்கோஸகபரிபா⁴ஸகோதி த³ஸஹி அக்கோஸவத்தூ²ஹி அக்கோஸகோ, ப⁴யத³ஸ்ஸனேன பரிபா⁴ஸகோ. சி²ன்னபரிபந்தோ²தி லோகுத்தரபரிபந்த²ஸ்ஸ சி²ன்னத்தா சி²ன்னபரிபந்தோ². ரோகா³தங்கந்தி ரோகோ³யேவ கிச்ச²ஜீவிகாயாவஹனதோ ரோகா³தங்கோ நாம.

2. ப⁴ண்ட³னகாரகஸுத்தவண்ணனா

212. து³தியே அதி⁴கரணகாரகோதி சதுன்னம் அதி⁴கரணானம் அஞ்ஞதரஸ்ஸ காரகோ. அனதி⁴க³தந்தி புப்³பே³ அப்பத்தவிஸேஸம்.

3. ஸீலஸுத்தவண்ணனா

213. ததியே து³ஸ்ஸீலோதி அஸீலோ நிஸ்ஸீலோ. ஸீலவிபன்னோதி விபன்னஸீலோ பி⁴ன்னஸம்வரோ. பமாதா³தி⁴கரணந்தி பமாத³காரணா. இத³ஞ்ச ஸுத்தம் க³ஹட்டா²னம் வஸேன ஆக³தம், பப்³ப³ஜிதானம்பி பன லப்³ப⁴தேவ. க³ஹட்டோ² ஹி யேன யேன ஸிப்பட்டா²னேன ஜீவிகம் கப்பேதி, யதி³ கஸியா, யதி³ வணிஜ்ஜாய, பாணாதிபாதாதி³வஸேன பமத்தோ தம் தம் யதா²காலம் ஸம்பாதே³தும் ந ஸக்கோதி, அத²ஸ்ஸ மூலம் வினஸ்ஸதி. மாகா⁴தகாலேபி பாணாதிபாதம் அதி³ன்னாதா³னாதீ³னி ச கரோந்தோ த³ண்ட³வஸேன மஹதிம் போ⁴க³ஜானிம் நிக³ச்ச²தி. பப்³ப³ஜிதோ து³ஸ்ஸீலோ பமாத³காரணா ஸீலதோ பு³த்³த⁴வசனதோ ஜா²னதோ ஸத்தஅரியத⁴னதோ ச ஜானிம் நிக³ச்ச²தி. க³ஹட்ட²ஸ்ஸ ‘‘அஸுகோ அஸுககுலே ஜாதோ து³ஸ்ஸீலோ பாபத⁴ம்மோ பரிச்சத்தஇத⁴லோகபரலோகோ ஸலாகப⁴த்தமத்தம்பி ந தே³தீ’’தி சதுபரிஸமஜ்ஜே² பாபகோ கித்திஸத்³தோ³ அப்³பு⁴க்³க³ச்ச²தி. பப்³ப³ஜிதஸ்ஸ ‘‘அஸுகோ நாஸக்கி² ஸீலம் ரக்கி²தும் பு³த்³த⁴வசனம் க³ஹேதும், வேஜ்ஜகம்மாதீ³ஹி ஜீவதி, ச²ஹி அகா³ரவேஹி ஸமன்னாக³தோ’’தி ஏவம் அப்³பு⁴க்³க³ச்ச²தி.

அவிஸாரதோ³தி க³ஹட்டோ² தாவ ‘‘அவஸ்ஸம் ப³ஹூனம் ஸன்னிபாதட்டா²னே கோசி மம கம்மம் ஜானிஸ்ஸதி, அத² மம் நிக்³க³ண்ஹிஸ்ஸந்தி வா, ராஜகுலஸ்ஸ வா த³ஸ்ஸந்தீ’’தி ஸப⁴யோ உபஸங்கமதி. மங்குபூ⁴தோ ச பதிதக்க²ந்தோ⁴ அதோ⁴முகோ² அங்கு³ட்ட²கேன பூ⁴மிம் கஸந்தோ நிஸீத³தி, விஸாரதோ³ ஹுத்வா கதே²தும் ந ஸக்கோதி. பப்³ப³ஜிதோபி ‘‘ப³ஹூ பி⁴க்கூ² ஸன்னிபதிதா, அவஸ்ஸம் கோசி மம கம்மம் ஜானிஸ்ஸதி, அத² மே உபோஸத²ம்பி பவாரணம்பி ட²பேத்வா ஸாமஞ்ஞா சாவேத்வா நிக்கட்³டி⁴ஸ்ஸந்தீ’’தி ஸப⁴யோ உபஸங்கமதி, விஸாரதோ³ ஹுத்வா கதே²தும் ந ஸக்கோதி. ஏகச்சோ பன து³ஸ்ஸீலோபி த³ப்பிதோ விய சரதி, ஸோபி அஜ்ஜா²ஸயேன மங்கு ஹோதியேவ.

ஸம்மூள்ஹோ காலம் கரோதீதி தஸ்ஸ ஹி மரணமஞ்சே நிபன்னஸ்ஸ து³ஸ்ஸீலகம்மம் ஸமாதா³ய வத்திதட்டா²னம் ஆபாத²ம் ஆக³ச்ச²தி. ஸோ உம்மீலேத்வா இத⁴லோகம் பஸ்ஸதி, நிம்மீலேத்வா பரலோகம். தஸ்ஸ சத்தாரோ அபாயா உபட்ட²ஹந்தி, ஸத்திஸதேன ஸீஸே பஹரியமானோ விய ஹோதி. ஸோ ‘‘வாரேத² வாரேதா²’’தி விரவந்தோ மரதி. தேன வுத்தம் – ‘‘ஸம்மூள்ஹோ காலம் கரோதீ’’தி. பஞ்சமபத³ம் உத்தானமேவ. ஆனிஸம்ஸகதா² வுத்தவிபரியாயேன வேதி³தப்³பா³.

4. ப³ஹுபா⁴ணிஸுத்தவண்ணனா

214. சதுத்தே² ப³ஹுபா⁴ணிஸ்மிந்தி பஞ்ஞாய அபரிச்சி²ந்தி³த்வா ப³ஹும் ப⁴ணந்தே. மந்தபா⁴ணிஸ்மிந்தி மந்தா வுச்சதி பஞ்ஞா, தாய பரிச்சி²ந்தி³த்வா ப⁴ணந்தே.

5. பட²மஅக்க²ந்திஸுத்தவண்ணனா

215. பஞ்சமே வேரப³ஹுலோதி புக்³க³லவேரேனபி அகுஸலவேரேனபி ப³ஹுவேரோ. வஜ்ஜப³ஹுலோதி தோ³ஸப³ஹுலோ.

6. து³தியஅக்க²ந்திஸுத்தவண்ணனா

216. ச²ட்டே² லுத்³தோ³தி தா³ருணோ கக்க²ளோ. விப்படிஸாரீதி மங்குபா⁴வேன ஸமன்னாக³தோ.

7.பட²மஅபாஸாதி³கஸுத்தவண்ணனா

217. ஸத்தமே அபாஸாதி³கேதி அபாஸாதி³கேஹி காயகம்மாதீ³ஹி ஸமன்னாக³தே. பாஸாதி³கேதி பஸாதா³வஹே பரிஸுத்³த⁴ஸமாசாரே. அட்ட²மனவமானி உத்தானத்தா²னேவ.

10. மது⁴ராஸுத்தவண்ணனா

220. த³ஸமே பஞ்சிமே, பி⁴க்க²வே, ஆதீ³னவா மது⁴ராயந்தி ஏகம் ஸமயம் ப⁴க³வா பி⁴க்கு²ஸங்க⁴பரிவுதோ சாரிகம் சரமானோ மது⁴ரானக³ரம் ஸம்பாபுணித்வா அந்தோனக³ரம் பவிஸிதும் ஆரபி⁴. அதே²கா மிச்சா²தி³ட்டி²கா யக்கி²னீ அசேலா ஹுத்வா த்³வே ஹத்தே² பஸாரேத்வா ஜிவ்ஹம் நில்லாலேத்வா த³ஸப³லஸ்ஸ புரதோ அட்டா²ஸி. ஸத்தா² அந்தோனக³ரம் அப்பவிஸித்வா ததோவ நிக்க²மித்வா விஹாரம் அக³மாஸி. மஹாஜனோ கா²த³னீயபோ⁴ஜனீயஞ்சேவ ஸக்காரஸம்மானஞ்ச ஆதா³ய விஹாரம் க³ந்த்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³னம் அதா³ஸி. ஸத்தா² தஸ்ஸ நக³ரஸ்ஸ நிக்³க³ண்ஹனத்தா²ய இமம் ஸுத்தம் ஆரபி⁴. தத்த² விஸமாதி ந ஸமதலா. ப³ஹுரஜாதி வாதபஹரணகாலே உத்³த⁴தேன ரஜக்க²ந்தே⁴ன பரியோனத்³தா⁴ விய ஹோதி. ஸேஸம் ஸப்³ப³த்த² உத்தானமேவாதி.

அக்கோஸகவக்³கோ³ து³தியோ.

(23) 3. தீ³க⁴சாரிகவக்³கோ³

1. பட²மதீ³க⁴சாரிகஸுத்தவண்ணனா

221. ததியஸ்ஸ பட²மே அனவத்த²சாரிகந்தி அவவத்தி²தசாரிகம். ஸுதம் ந பரியோத³பேதீதி யம்பிஸ்ஸ ஸுதம் அத்தி², தம் பரியோத³பேதும் ந ஸக்கோதி. ஸுதேனேகச்சேன அவிஸாரதோ³ ஹோதீதி தோ²கதோ²கேன ஸுதேன விஜ்ஜமானேனாபி ஞாணேன ஸோமனஸ்ஸப்பத்தோ ந ஹோதி. ஸமவத்த²சாரேதி ஸமவத்தி²தசாரே. து³தியம் உத்தானத்த²மேவ.

3-4. அதினிவாஸஸுத்தாதி³வண்ணனா

223-224. ததியே ப³ஹுப⁴ண்டோ³தி ப³ஹுபரிக்கா²ரோ. ப³ஹுபே⁴ஸஜ்ஜோதி ஸப்பினவனீதாதீ³னம் ப³ஹுதாய ப³ஹுபே⁴ஸஜ்ஜோ. ப்³யத்தோதி ப்³யாஸத்தோ. ஸம்ஸட்டோ²தி பஞ்சவிதே⁴ன ஸம்ஸக்³கே³ன ஸம்ஸட்டோ² ஹுத்வா. அனனுலோமிகேனாதி ஸாஸனஸ்ஸ அனனுச்ச²விகேன. சதுத்தே² வண்ணமச்ச²ரீதி கு³ணமச்ச²ரீ. த⁴ம்மமச்ச²ரீதி பரியத்திமச்ச²ரீ.

5-6. குலூபகஸுத்தாதி³வண்ணனா

225-226. பஞ்சமே அனாமந்தசாரே ஆபஜ்ஜதீதி ‘‘நிமந்திதோ ஸப⁴த்தோ ஸமானோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்யா’’தி ஸிக்கா²பதே³ (பாரா. 294) வுத்தம் ஆபத்திம் ஆபஜ்ஜதி. ரஹோ நிஸஜ்ஜாயாதிஆதீ³னிபி தேஸம் தேஸம் ஸிக்கா²பதா³னம் வஸேன வேதி³தப்³பா³னி. ச²ட்டே² அதிவேலந்தி அதிக்கந்தபமாணகாலம். ஸத்தமம் உத்தானமேவ.

8. உஸ்ஸூரப⁴த்தஸுத்தவண்ணனா

228. அட்ட²மே உஸ்ஸூரப⁴த்தேதி அதிதி³வாபசனப⁴த்தே. ந காலேன படிபூஜேந்தீதி யாகு³காலே யாகு³ம், க²ஜ்ஜககாலே க²ஜ்ஜகம், போ⁴ஜனகாலே போ⁴ஜனம் அபசந்தா யுத்தப்பயுத்தகாலஸ்ஸ அதினாமிதத்தா ந காலேன படிபூஜேந்தி, அத்தனோ சித்தேனேவ தே³ந்தி நாம. ததோ தேபி தேஸு அத்தனோ கே³ஹம் ஆக³தேஸு ததே²வ கரோந்தி. குலபவேணியா ஆக³தா ப³லிபடிக்³கா³ஹிகா தே³வதாபி யுத்தப்பயுத்தகாலேன லாப⁴ம் லப⁴மானாயேவ ரக்க²ந்தி கோ³பயந்தி பீளம் அகத்வா. அகாலே லப⁴மானா பன ‘‘இமே அம்ஹேஸு அனாத³ரா’’தி ஆரக்க²ம் ந கரோந்தி.

ஸமணப்³ராஹ்மணாபி ‘‘ஏதேஸம் கே³ஹே போ⁴ஜனவேலாய போ⁴ஜனம் ந ஹோதி, டி²தமஜ்ஜ²ன்ஹிகே தே³ந்தீ’’தி மங்க³லாமங்க³லேஸு காதப்³ப³ம் ந கரோந்தி. விமுகா² கம்மம் கரோந்தீதி ‘‘பாதோ கிஞ்சி ந லபா⁴ம, கு²தா³ய படிபீளிதா கம்மம் காதும் ந ஸக்கோமா’’தி கம்மம் விஸ்ஸஜ்ஜேத்வா நிஸீத³ந்தி. அனோஜவந்தம் ஹோதீதி அகாலே பு⁴த்தம் ஓஜம் ஹரிதும் ந ஸக்கோதி. ஸுக்கபக்கோ² வுத்தவிபல்லாஸேன வேதி³தப்³போ³.

9. பட²மகண்ஹஸப்பஸுத்தவண்ணனா

229. நவமே ஸபீ⁴ரூதி ஸனித்³தோ³ மஹானித்³த³ம் நித்³தா³யதி. ஸப்படிப⁴யோதி தம் நிஸ்ஸாய ப⁴யம் உப்பஜ்ஜதி, தஸ்மா ஸப்படிப⁴யோ. மித்தது³ப்³பீ⁴தி பானபோ⁴ஜனதா³யகம்பி மித்தம் து³ப்³ப⁴தி ஹிம்ஸதி. மாதுகா³மேபி ஏஸேவ நயோ.

10. து³தியகண்ஹஸப்பஸுத்தவண்ணனா

230. த³ஸமே கோ⁴ரவிஸோதி கக்க²ளவிஸோ. து³ஜ்ஜிவ்ஹோதி த்³விதா⁴ பி⁴ன்னஜிவ்ஹோ. கோ⁴ரவிஸதாதி கோ⁴ரவிஸதாய. ஸேஸத்³வயேபி ஏஸேவ நயோ.

தீ³க⁴சாரிகவக்³கோ³ ததியோ.

(24) 4. ஆவாஸிகவக்³கோ³

1. ஆவாஸிகஸுத்தவண்ணனா

231. சதுத்த²ஸ்ஸ பட²மே ந ஆகப்பஸம்பன்னோதி ஸமணாகப்பேன ஸம்பன்னோ. அபா⁴வனீயோ ஹோதீதி வட்³ட⁴னீயோ ந ஹோதி. து³தியம் உத்தானமேவ.

3. ஸோப⁴னஸுத்தவண்ணனா

233. ததியே படிப³லோதி காயப³லேன ச ஞாணப³லேன ச ஸமன்னாக³தத்தா படிப³லோ.

4. ப³ஹூபகாரஸுத்தவண்ணனா

234. சதுத்தே² க²ண்ட³பு²ல்லந்தி பதிதட்டா²னஞ்ச பி⁴ன்னட்டா²னஞ்ச. படிஸங்க²ரோதீதி படிபாகதிகம் கரோதி. ஆரோசேதீதி இத³ம் பவாரிதகுலானம் வஸேன வுத்தம்.

5. அனுகம்பஸுத்தவண்ணனா

235. பஞ்சமே அதி⁴ஸீலேஸூதி பஞ்சஸு ஸீலேஸு. த⁴ம்மத³ஸ்ஸனே நிவேஸேதீதி சதுஸச்சத⁴ம்மத³ஸ்ஸனே பதிட்டா²பேதி. அரஹக்³க³தந்தி ஸப்³ப³ஸக்காரானம் அரஹே ரதனத்தயேவ க³தம், தீஸு வத்தூ²ஸு க³ருசித்தீகாரம் உபட்ட²பேதா²தி அத்தோ². ச²ட்ட²ம் உத்தானமேவ.

7. து³தியஅவண்ணாரஹஸுத்தவண்ணனா

237. ஸத்தமே ஆவாஸபலிகே³தீ⁴தி ஆவாஸம் ப³லவகி³த்³தி⁴வஸேன கி³லித்வா விய டி²தோ. ஸேஸம் ஸப்³ப³ம் உத்தானமேவாதி.

ஆவாஸிகவக்³கோ³ சதுத்தோ².

(25) 5. து³ச்சரிதவக்³கோ³

1. பட²மது³ச்சரிதஸுத்தவண்ணனா

241. பஞ்சமஸ்ஸ பட²மே து³ச்சரிதே ஸுசரிதேதி இத³ம் அபே⁴த³தோ வுத்தம், காயது³ச்சரிதேதிஆதி³ காயத்³வாராதீ³னம் வஸேன பே⁴த³தோ. ஸத்³த⁴ம்மாதி த³ஸகுஸலகம்மபத²த⁴ம்மதோ. அஸத்³த⁴ம்மேதி அகுஸலகம்மபத²ஸங்கா²தே அஸ்ஸத்³த⁴ம்மே.

9. ஸிவதி²கஸுத்தவண்ணனா

249. நவமே ஸிவதி²காயாதி ஸுஸானே. ஆரோத³னாதி ஆரோத³னட்டா²னம். அஸுசினாதி ஜிகு³ச்ச²னீயேன.

10. புக்³க³லப்பஸாத³ஸுத்தவண்ணனா

250. த³ஸமே புக்³க³லப்பஸாதே³தி ஏகபுக்³க³லஸ்மிம் உப்பன்னப்பஸாதே³. அந்தே நிஸீதா³பேதீதி பி⁴க்கூ²னம் ஆஸனபரியந்தே நிஸீதா³பேதி. ஸேஸம் ஸப்³ப³த்த² உத்தானத்த²மேவாதி.

து³ச்சரிதவக்³கோ³ பஞ்சமோ.

பஞ்சமபண்ணாஸகம் நிட்டி²தம்.