(16) 6. அசேலகவக்³க³வண்ணனா

157-163. இதோ பரேஸு ஆகா³ள்ஹா படிபதா³தி கா³ள்ஹா கக்க²ளா லோப⁴வஸேன தி²ரக்³க³ஹணா. நிஜ்ஜா²மாதி அத்தகிலமதா²னுயோக³வஸேன ஸுட்டு² ஜா²மா ஸந்தத்தா பரிதத்தா. மஜ்ஜி²மாதி நேவ கக்க²ளா ந ஜா²மா மஜ்ஜே² ப⁴வா. அசேலகோதி நிச்சேலோ நக்³கோ³. முத்தாசாரோதி விஸ்ஸட்டா²சாரோ, உச்சாரகம்மாதீ³ஸு லோகியகுலபுத்தாசாரேன விரஹிதோ டி²தகோவ உச்சாரம் கரோதி, பஸ்ஸாவம் கரோதி, கா²த³தி பு⁴ஞ்ஜதி. ஹத்தா²பலேக²னோதி ஹத்தே² பிண்ட³ம்ஹி நிட்டி²தே ஜிவ்ஹாய ஹத்த²ம் அபலேக²தி, உச்சாரம்பி கத்வா ஹத்த²ஸ்மிம்யேவ த³ண்ட³கஸஞ்ஞீ ஹுத்வா ஹத்தே²ன அபலேக²தி. பி⁴க்கா²ய க³ஹணத்த²ம் ‘‘ஏஹி, ப⁴த³ந்தே’’தி வுத்தோ ந ஏதீதி ந ஏஹிப⁴த³ந்திகோ. ‘‘தேன ஹி திட்ட², ப⁴ந்தே’’தி வுத்தோபி ந திட்ட²தீதி ந திட்ட²ப⁴த³ந்திகோ. தது³ப⁴யம்பி கிர ஸோ ‘‘ஏதஸ்ஸ வசனம் கதம் ப⁴விஸ்ஸதீ’’தி ந கரோதி. அபி⁴ஹடந்தி புரேதரம் க³ஹேத்வா ஆஹடபி⁴க்க²ம். உத்³தி³ஸ்ஸகதந்தி இத³ம் தும்ஹே உத்³தி³ஸ்ஸ கதந்தி ஏவமாரோசிதபி⁴க்க²ம். நிமந்தனந்தி ‘‘அஸுகம் நாம குலம் வா வீதி²ம் வா கா³மம் வா பவிஸேய்யாதா²’’தி ஏவம் நிமந்திதபி⁴க்க²ம்பி ந ஸாதி³யதி ந க³ண்ஹாதி. ந கும்பி⁴முகா²தி கும்பி⁴தோ உத்³த⁴ரித்வா தீ³யமானம் பி⁴க்க²ம்பி ந க³ண்ஹாதி. ந களோபிமுகா²தி களோபீதி உக்க²லி வா பச்சி² வா, ததோபி ந க³ண்ஹாதி. கஸ்மா? ‘‘கும்பி⁴களோபியோ மம் நிஸ்ஸாய கடச்சு²னா பஹாரம் லப⁴ந்தீ’’தி. ந ஏளகமந்தரந்தி உம்மாரம் அந்தரம் கத்வா தீ³யமானம் ந க³ண்ஹாதி. கஸ்மா? ‘‘அயம் மம் நிஸ்ஸாய அந்தரகரணம் லப⁴தீ’’தி. த³ண்ட³முஸலேஸுபி ஏஸேவ நயோ. த்³வின்னந்தி த்³வீஸு பு⁴ஞ்ஜமானேஸு ஏகஸ்மிம் உட்டா²ய தே³ந்தே ந க³ண்ஹாதி. கஸ்மா? கப³ளந்தராயோ ஹோதீதி.

ந க³ப்³பி⁴னியாதிஆதீ³ஸு பன க³ப்³பி⁴னியா குச்சி²யம் தா³ரகோ கிலமதி, பாயந்தியா தா³ரகஸ்ஸ கீ²ரந்தராயோ ஹோதி, புரிஸந்தரக³தாய ரதிஅந்தராயோ ஹோதீதி ந க³ண்ஹாதி. ந ஸங்கித்தீஸூதி ஸங்கித்தேத்வா கதப⁴த்தேஸு. து³ப்³பி⁴க்க²ஸமயே கிர அசேலகஸாவகா அசேலகானம் அத்தா²ய ததோ ததோ தண்டு³லாதீ³னி ஸமாத³பேத்வா ப⁴த்தம் பசந்தி, உக்கட்டா²சேலகோ ததோ ந படிக்³க³ண்ஹாதி. ந யத்த² ஸாதி யத்த² ஸுனகோ² ‘‘பிண்ட³ம் லபி⁴ஸ்ஸாமீ’’தி உபட்டி²தோ ஹோதி, தத்த² தஸ்ஸ அத³த்வா ஆஹடம் ந க³ண்ஹாதி. கஸ்மா? ஏதஸ்ஸ பிண்ட³ந்தராயோ ஹோதீதி. ஸண்ட³ஸண்ட³சாரினீதி ஸமூஹஸமூஹசாரினீ. ஸசே ஹி அசேலகம் தி³ஸ்வா ‘‘இமஸ்ஸ பி⁴க்க²ம் த³ஸ்ஸாமா’’தி மனுஸ்ஸா ப⁴த்தகே³ஹம் பவிஸந்தி, தேஸு ச பவிஸந்தேஸு களோபிமுகா²தீ³ஸு நிலீனா மக்கி²கா உப்பதித்வா ஸண்ட³ஸண்டா³ சரந்தி, ததோ ஆஹடம் பி⁴க்க²ம் ந க³ண்ஹாதி. கஸ்மா? ‘‘மம் நிஸ்ஸாய மக்கி²கானம் கோ³சரந்தராயோ ஜாதோ’’தி.

து²ஸோத³கந்தி ஸப்³ப³ஸஸ்ஸஸம்பா⁴ரேஹி கதஸோவீரகம். ஏத்த² ச ஸுராபானமேவ ஸாவஜ்ஜம், அயம் பன ஸப்³பே³ஸு ஸாவஜ்ஜஸஞ்ஞீ. ஏகாகா³ரிகோதி யோ ஏகஸ்மிம்யேவ கே³ஹே பி⁴க்க²ம் லபி⁴த்வா நிவத்ததி. ஏகாலோபிகோதி ஏகேனேவ ஆலோபேன யாபேதி. த்³வாகா³ரிகாதீ³ஸுபி ஏஸேவ நயோ. ஏகிஸ்ஸாபி த³த்தியாதி ஏகாய த³த்தியா. த³த்தி நாம ஏகா கு²த்³த³கபாதி ஹோதி, யத்த² அக்³க³பி⁴க்க²ம் பக்கி²பித்வா ட²பேந்தி. ஏகாஹிகந்தி ஏகதி³வஸந்தரிகம். அத்³த⁴மாஸிகந்தி அத்³த⁴மாஸந்தரிகம். பரியாயப⁴த்தபோ⁴ஜனந்தி வாரப⁴த்தபோ⁴ஜனம், ஏகாஹவாரேன த்³வீஹவாரேன ஸத்தாஹவாரேன அத்³த⁴மாஸவாரேனாதி ஏவம் தி³வஸவாரேன ஆப⁴தப⁴த்தபோ⁴ஜனம். ஸாகப⁴க்கோ²திஆதீ³னி வுத்தத்தா²னேவ.

உப்³ப⁴ட்ட²கோதி உத்³த⁴ம் டி²தகோ. உக்குடிகப்பதா⁴னமனுயுத்தோதி உக்குடிகவீரியமனுயுத்தோ, க³ச்ச²ந்தோபி உக்குடிகோவ ஹுத்வா உப்பதித்வா உப்பதித்வா க³ச்ச²தி. கண்டகாபஸ்ஸயிகோதி அயகண்டகே வா பகதிகண்டகே வா பூ⁴மியம் கோட்டேத்வா தத்த² சம்மம் அத்த²ரித்வா டா²னசங்கமாதீ³னி கரோதி. ஸேய்யந்தி ஸயந்தோபி தத்தே²வ ஸேய்யம் கப்பேதி. ஸாயம் ததியமஸ்ஸாதி ஸாயததியகம். பாதோ மஜ்ஜ²ன்ஹிகே ஸாயந்தி தி³வஸஸ்ஸ திக்க²த்தும் ‘‘பாபம் பவாஹேஸ்ஸாமீ’’தி உத³கோரோஹனானுயோக³ம் அனுயுத்தோ விஹரதி.

காயே காயானுபஸ்ஸீதிஆதீ³னி ஹேட்டா² ஏககனிபாதவண்ணனாயம் வுத்தனயேனேவ வேதி³தப்³பா³னி. அயம் வுச்சதி, பி⁴க்க²வே, மஜ்ஜி²மா படிபதா³தி, பி⁴க்க²வே, அயம் காமஸுக²ல்லிகானுயோக³ஞ்ச அத்தகிலமதா²னுயோக³ஞ்சாதி த்³வே அந்தே அனுபக³தா, ஸஸ்ஸதுச்சே²த³ந்தேஹி வா விமுத்தா மஜ்ஜி²மா படிபதா³தி வேதி³தப்³பா³.

அசேலகவக்³கோ³ ச²ட்டோ².