1. ச²ன்னஸுத்தவண்ணனா

72. ததியஸ்ஸ பட²மே ச²ன்னோதி ஏவம்னாமகோ ச²ன்னபரிப்³பா³ஜகோ. தும்ஹேபி, ஆவுஸோதி, ஆவுஸோ, யதா² மயம் ராகா³தீ³னம் பஹானம் பஞ்ஞாபேம, கிம் ஏவம் தும்ஹேபி பஞ்ஞாபேதா²தி புச்ச²தி. ததோ தே²ரோ ‘‘அயம் பரிப்³பா³ஜகோ அம்ஹே ராகா³தீ³னம் பஹானம் பஞ்ஞாபேமாதி வத³தி, நத்தி² பனேதம் பா³ஹிரஸமயே’’தி தம் படிக்கி²பந்தோ மயம் கோ², ஆவுஸோதிஆதி³மாஹ. தத்த² கோ²தி அவதா⁴ரணத்தே² நிபாதோ, மயமேவ பஞ்ஞாபேமாதி அத்தோ². ததோ பரிப்³பா³ஜகோ சிந்தேஸி ‘‘அயம் தே²ரோ பா³ஹிரஸமயம் லுஞ்சித்வா ஹரந்தோ ‘மயமேவா’தி ஆஹ. கிம் நு கோ² ஆதீ³னவம் தி³ஸ்வா ஏதே ஏதேஸம் பஹானம் பஞ்ஞாபேந்தீ’’தி. அத² தே²ரம் புச்ச²ந்தோ கிம் பன தும்ஹேதிஆதி³மாஹ. தே²ரோ தஸ்ஸ ப்³யாகரோந்தோ ரத்தோ கோ²திஆதி³மாஹ. தத்த² அத்தத்த²ந்தி தி³ட்ட²த⁴ம்மிகஸம்பராயிகம் லோகியலோகுத்தரம் அத்தனோ அத்த²ம். பரத்த²உப⁴யத்தே²ஸுபி ஏஸேவ நயோ.

அந்த⁴கரணோதிஆதீ³ஸு யஸ்ஸ ராகோ³ உப்பஜ்ஜதி, தம் யதா²பூ⁴தத³ஸ்ஸனனிவாரணேன அந்த⁴ம் கரோதீதி அந்த⁴கரணோ. பஞ்ஞாசக்கு²ம் ந கரோதீதி அசக்கு²கரணோ. ஞாணம் ந கரோதீதி அஞ்ஞாணகரணோ. கம்மஸ்ஸகதபஞ்ஞா ஜா²னபஞ்ஞா விபஸ்ஸனாபஞ்ஞாதி இமா திஸ்ஸோ பஞ்ஞா அப்பவத்திகரணேன நிரோதே⁴தீதி பஞ்ஞானிரோதி⁴கோ. அனிட்ட²ப²லதா³யகத்தா து³க்க²ஸங்கா²தஸ்ஸ விகா⁴தஸ்ஸேவ பக்கே² வத்ததீதி விகா⁴தபக்கி²கோ. கிலேஸனிப்³பா³னம் ந ஸம்வத்தேதீதி அனிப்³பா³னஸம்வத்தனிகோ. அலஞ்ச பனாவுஸோ ஆனந்த³, அப்பமாதா³யாதி, ஆவுஸோ ஆனந்த³, ஸசே ஏவரூபா படிபதா³ அத்தி², அலம் தும்ஹாகம் அப்பமாதா³ய யுத்தம் அனுச்ச²விகம், அப்பமாத³ம் கரோத², ஆவுஸோதி தே²ரஸ்ஸ வசனம் அனுமோதி³த்வா பக்காமி. இமஸ்மிம் ஸுத்தே அரியமக்³கோ³ லோகுத்தரமிஸ்ஸகோ கதி²தோ. ஸேஸமேத்த² உத்தானத்த²மேவாதி.