(7) 2. மஹாவக்³கோ³

1. தித்தா²யதனஸுத்தவண்ணனா

62. து³தியஸ்ஸ பட²மே தித்தா²யதனானீதி தித்த²பூ⁴தானி ஆயதனானி, தித்தி²யானம் வா ஆயதனானி. தத்த² தித்த²ம் ஜானிதப்³ப³ம், தித்த²கரா ஜானிதப்³பா³, தித்தி²யா ஜானிதப்³பா³, தித்தி²யஸாவகா ஜானிதப்³பா³. தித்த²ம் நாம த்³வாஸட்டி² தி³ட்டி²யோ. தித்தி²கரா நாம தாஸம் தி³ட்டீ²னம் உப்பாத³கா. தித்தி²யா நாம யேஸம் தா தி³ட்டி²யோ ருச்சந்தி க²மந்தி. தித்தி²யஸாவகா நாம தேஸம் பச்சயதா³யகா. ஆயதனந்தி ‘‘கம்போ³ஜோ அஸ்ஸானம் ஆயதனம், கு³ன்னம் த³க்கி²ணாபதோ² ஆயதன’’ந்தி ஏத்த² ஸஞ்ஜாதிட்டா²னம் ஆயதனம் நாம.

‘‘மனோரமே ஆயதனே, ஸேவந்தி நம் விஹங்க³மா;

சா²யம் சா²யத்தி²னோ யந்தி, ப²லத்த²ம் ப²லபோ⁴ஜினோ’’தி. (அ. நி. 5.38) –

ஏத்த² ஸமோஸரணட்டா²னம். ‘‘பஞ்சிமானி, பி⁴க்க²வே, விமுத்தாயதனானீ’’தி (அ. நி. 5.26) ஏத்த² காரணம். தம் இத⁴ ஸப்³ப³ம்பி லப்³ப⁴தி. ஸப்³பே³பி ஹி தி³ட்டி²க³திகா ஸஞ்ஜாயமானா இமேஸுயேவ தீஸு டா²னேஸு ஸஞ்ஜாயந்தி, ஸமோஸரணமானாபி ஏதேஸுயேவ தீஸு டா²னேஸு ஸமோஸரந்தி ஸன்னிபதந்தி, தி³ட்டி²க³திகபா⁴வே ச நேஸம் ஏதானேவ தீணி காரணானீதி தித்த²பூ⁴தானி ஸஞ்ஜாதிஆதி³னா அத்தே²ன ஆயதனானீதிபி தித்தா²யதனானி. தேனேவத்தே²ன தித்தி²யானம் ஆயதனானீதிபி தித்தா²யதனானி. ஸமனுயுஞ்ஜியமானானீதி கா நாமேதா தி³ட்டி²யோதி ஏவம் புச்சி²யமானானி. ஸமனுகா³ஹியமானானீதி கிம்காரணா ஏதா தி³ட்டி²யோ உப்பன்னாதி ஏவம் ஸம்மா அனுக்³கா³ஹியமானானி. ஸமனுபா⁴ஸியமானானீதி படினிஸ்ஸஜ்ஜேத² ஏதானி பாபகானி தி³ட்டி²க³தானீதி ஏவம் ஸம்மா அனுஸாஸியமானானி. அபிச தீணிபி ஏதானி அனுயோக³புச்சா²வேவசனானேவ. தேன வுத்தம் அட்ட²கதா²யம் – ‘‘ஸமனுயுஞ்ஜதீதி வா ஸமனுக்³கா³ஹதீதி வா ஸமனுபா⁴ஸதீதி வா ஏஸேஸே ஏகட்டே² ஸமே ஸமபா⁴கே³ தஜ்ஜாதே தஞ்ஞேவா’’தி.

பரம்பி க³ந்த்வாதி ஆசரியபரம்பரா லத்³தி⁴பரம்பரா அத்தபா⁴வபரம்பராதி ஏதேஸு யம்கிஞ்சி பரம்பரம் க³ந்த்வாபி. அகிரியாய ஸண்ட²ஹந்தீதி அகிரியமத்தே ஸம்திட்ட²ந்தி. ‘‘அம்ஹாகம் ஆசரியோ புப்³பே³கதவாதீ³, அம்ஹாகம் பாசரியோ புப்³பே³கதவாதீ³, அம்ஹாகம் ஆசரியபாசரியோ புப்³பே³கதவாதீ³. அம்ஹாகம் ஆசரியோ இஸ்ஸரனிம்மானவாதீ³, அம்ஹாகம் பாசரியோ இஸ்ஸரனிம்மானவாதீ³, அம்ஹாகம் ஆசரியபாசரியோ இஸ்ஸரனிம்மானவாதீ³. அம்ஹாகம் ஆசரியோ அஹேதுஅபச்சயவாதீ³, அம்ஹாகம் பாசரியோ அஹேதுஅபச்சயவாதீ³, அம்ஹாகம் ஆசரியபாசரியோ அஹேதுஅபச்சயவாதீ³’’தி ஏவம் க³ச்ச²ந்தானி ஹி ஏதானி ஆசரியபரம்பரம் க³ச்ச²ந்தி நாம. ‘‘அம்ஹாகம் ஆசரியோ புப்³பே³கதலத்³தி⁴கோ, அம்ஹாகம் பாசரியோ…பே… அம்ஹாகம் ஆசரியபாசரியோ அஹேதுஅபச்சயலத்³தி⁴கோ’’தி ஏவம் க³ச்ச²ந்தானி லத்³தி⁴பரம்பரம் க³ச்ச²ந்தி நாம. ‘‘அம்ஹாகம் ஆசரியஸ்ஸ அத்தபா⁴வோ புப்³பே³கதஹேது, அம்ஹாகம் பாசரியஸ்ஸ…பே… அம்ஹாகம் ஆசரியபாசரியஸ்ஸ அத்தபா⁴வோ அஹேது அபச்சயோ’’தி ஏவம் க³ச்ச²ந்தானி அத்தபா⁴வபரம்பரம் க³ச்ச²ந்தி நாம. ஏவம் பன ஸுவிதூ³ரம்பி க³ச்ச²ந்தானி அகிரியமத்தேயேவ ஸண்ட²ஹந்தி, ஏகோபி ஏதேஸம் தி³ட்டி²க³திகானம் கத்தா வா காரேதா வா ந பஞ்ஞாயதி.

புரிஸபுக்³க³லோதி ஸத்தோ. காமஞ்ச புரிஸோதிபி வுத்தே புக்³க³லோதிபி வுத்தே ஸத்தோயேவ வுத்தோ ஹோதி, அயம் பன ஸம்முதிகதா² நாம யோ யதா² ஜானாதி, தஸ்ஸ ததா² வுச்சதி. படிஸம்வேதே³தீதி அத்தனோ ஸந்தானே உப்பன்னம் ஜானாதி படிஸம்விதி³தம் கரோதி, அனுப⁴வதி வா. புப்³பே³கதஹேதூதி புப்³பே³கதகாரணா, புப்³பே³கதகம்மபச்சயேனேவ படிஸம்வேதே³தீதி அத்தோ². இமினா கம்மவேத³னஞ்ச கிரியவேத³னஞ்ச படிக்கி²பித்வா ஏகம் விபாகவேத³னமேவ ஸம்படிச்ச²ந்தி. யே வா இமே பித்தஸமுட்டா²னா ஆபா³தா⁴ ஸேம்ஹஸமுட்டா²னா வாதஸமுட்டா²னா ஸன்னிபாதிகா உதுபரிணாமஜா விஸமபரிஹாரஜா ஓபக்கமிகா ஆபா³தா⁴ கம்மவிபாகஜா ஆபா³தா⁴தி அட்ட² ரோகா³ வுத்தா, தேஸு ஸத்த படிக்கி²பித்வா ஏகம் விபாகவேத³னம்யேவ ஸம்படிச்ச²ந்தி. யேபிமே தி³ட்ட²த⁴ம்மவேத³னீயம் உபபஜ்ஜவேத³னீயம் அபரபரியாயவேத³னீயந்தி தயோ கம்மராஸயோ வுத்தா, தேஸுபி த்³வே படிபா³ஹித்வா ஏகம் அபரபரியாயகம்மம்யேவ ஸம்படிச்ச²ந்தி. யேபிமே தி³ட்ட²த⁴ம்மவேத³னீயோ விபாகோ உபபஜ்ஜவேத³னீயோ அபரபரியாயவேத³னீயோதி தயோ விபாகராஸயோ வுத்தா, தேஸுபி த்³வே படிபா³ஹித்வா ஏகம் அபரபரியாயவிபாகமேவ ஸம்படிச்ச²ந்தி. யேபிமே குஸலசேதனா அகுஸலசேதனா விபாகசேதனா கிரியசேதனாதி சத்தாரோ சேதனாராஸயோ வுத்தா, தேஸுபி தயோ படிபா³ஹித்வா ஏகம் விபாகசேதனம்யேவ ஸம்படிச்ச²ந்தி.

இஸ்ஸரனிம்மானஹேதூதி இஸ்ஸரனிம்மானகாரணா, இஸ்ஸரேன நிம்மிதத்தா படிஸம்வேதே³தீதி அத்தோ². அயம் ஹி தேஸம் அதி⁴ப்பாயோ – இமா திஸ்ஸோ வேத³னா பச்சுப்பன்னே அத்தனா கதமூலகேன வா ஆணத்திமூலகேன வா புப்³பே³கதேன வா அஹேதுஅபச்சயா வா படிஸம்வேதி³தும் நாம ந ஸக்கா, இஸ்ஸரனிம்மானகாரணாயேவ பன இமா படிஸம்வேதே³தீதி. ஏவம்வாதி³னோ பனேதே ஹேட்டா² வுத்தேஸு அட்ட²ஸு ரோகே³ஸு ஏகம்பி அஸம்படிச்சி²த்வா ஸப்³பே³ படிபா³ஹந்தி, ஹேட்டா² வுத்தேஸு ச தீஸு கம்மராஸீஸு தீஸு விபாகராஸீஸு சதூஸு சேதனாராஸீஸு ஏகம்பி அஸம்படிச்சி²த்வா ஸப்³பே³பி படிபா³ஹந்தி.

அஹேதுஅபச்சயாதி ஹேதுஞ்ச பச்சயஞ்ச வினா, அகாரணேனேவ படிஸம்வேதே³தீதி அத்தோ². அயஞ்ஹி நேஸம் அதி⁴ப்பாயோ – இமா திஸ்ஸோ வேத³னா பச்சுப்பன்னே அத்தனா கதமூலகேன வா ஆணத்திமூலகேன வா புப்³பே³கதேன வா இஸ்ஸரனிம்மானஹேதுனா வா படிஸம்வேதி³தும் நாம ந ஸக்கா, அஹேதுஅபச்சயாயேவ பன இமா படிஸம்வேதே³தீதி. ஏவம்வாதி³னோ பனேதே ஹேட்டா² வுத்தேஸு ரோகா³தீ³ஸு ஏகம்பி அஸம்படிச்சி²த்வா ஸப்³ப³ம் படிபா³ஹந்தி.

ஏவம் ஸத்தா² மாதிகம் நிக்கி²பித்வா இதா³னி தம் விப⁴ஜித்வா த³ஸ்ஸேதும் தத்ர, பி⁴க்க²வேதிஆதி³மாஹ. தத்த² ஏவம் வதா³மீதி லத்³தி⁴பதிட்டா²பனத்த²ம் ஏவம் வதா³மீதி த³ஸ்ஸேதி. லத்³தி⁴ஞ்ஹி அப்பதிட்டா²பேத்வா நிக்³க³ய்ஹமானா லத்³தி⁴தோ லத்³தி⁴ம் ஸங்கமந்தி, போ⁴ கோ³தம, ந மயம் புப்³பே³கதவாத³ம் வதா³மாதிஆதீ³னி வத³ந்தி. லத்³தி⁴யா பன பதிட்டா²பிதாய ஸங்கமிதும் அலப⁴ந்தா ஸுனிக்³க³ஹிதா ஹோந்தி, இதி நேஸம் லத்³தி⁴பதிட்டா²பனத்த²ம் ஏவம் வதா³மீதி ஆஹ. தேனஹாயஸ்மந்தோதி தேன ஹி ஆயஸ்மந்தோ. கிம் வுத்தம் ஹோதி – யதி³ ஏதம் ஸச்சம், ஏவம் ஸந்தே தேன தும்ஹாகம் வாதே³ன. பாணாதிபாதினோ ப⁴விஸ்ஸந்தி புப்³பே³கதஹேதூதி யே கேசி லோகே பாணம் அதிபாதேந்தி, ஸப்³பே³ தே புப்³பே³கதஹேது பாணாதிபாதினோ ப⁴விஸ்ஸந்தி. கிம்காரணா? ந ஹி பாணாதிபாதகம்மம் அத்தனா கதமூலகேன ந ஆணத்திமூலகேன ந இஸ்ஸரனிம்மானஹேதுனா ந அஹேதுஅபச்சயா ஸக்கா படிஸம்வேதே³தும், புப்³பே³கதஹேதுயேவ படிஸம்வேதே³தீதி அயம் வோ லத்³தி⁴. யதா² ச பாணாதிபாதினோ, ஏவம் பாணாதிபாதா விரமந்தாபி புப்³பே³கதஹேதுயேவ விரமிஸ்ஸந்தீதி. இதி ப⁴க³வா தேஸம்யேவ லத்³தி⁴ம் க³ஹேத்வா தேஸம் நிக்³க³ஹம் ஆரோபேதி. இமினா நயேன அதி³ன்னாதா³யினோதிஆதீ³ஸுபி யோஜனா வேதி³தப்³பா³.

ஸாரதோ பச்சாக³ச்ச²தந்தி ஸாரபா⁴வேன க³ண்ஹந்தானம். ச²ந்தோ³தி கத்துகம்யதாச²ந்தோ³. இத³ம் வா கரணீயம் இத³ம் வா அகரணீயந்தி ஏத்த² அயம் அதி⁴ப்பாயோ – இத³ம் வா கரணீயந்தி கத்தப்³ப³ஸ்ஸ கரணத்தா²ய, இத³ம் வா அகரணீயந்தி அகத்தப்³ப³ஸ்ஸ அகரணத்தா²ய கத்துகம்யதா வா பச்சத்தபுரிஸகாரோ வா ந ஹோதி. ச²ந்த³வாயாமேஸு வா அஸந்தேஸு ‘‘இத³ம் கத்தப்³ப³’’ந்திபி ‘‘இத³ம் ந கத்தப்³ப³’’ந்திபி ந ஹோதி. இதி கரணீயாகரணீயே கோ² பன ஸச்சதோ தே²ததோ அனுபலப்³பி⁴யமானேதி ஏவம் கத்தப்³பே³ ச அகத்தப்³பே³ ச பூ⁴ததோ தி²ரதோ அபஞ்ஞாயமானே அலப்³ப⁴மானே. யதி³ ஹி கத்தப்³ப³ம் காதும் அகத்தப்³ப³தோ ச விரமிதும் லபே⁴ய்ய, கரணீயாகரணீயம் ஸச்சதோ தே²ததோ உபலப்³பே⁴ய்ய. யஸ்மா பன உப⁴யம்பி தம் ஏஸ நுபலப்³ப⁴தி, தஸ்மா தம் ஸச்சதோ தே²ததோ ந உபலப்³ப⁴தி, ஏவம் தஸ்மிம் ச அனுபலப்³பி⁴யமானேதி அத்தோ². முட்ட²ஸ்ஸதீனந்தி நட்ட²ஸ்ஸதீனம் விஸ்ஸட்ட²ஸ்ஸதீனம். அனாரக்கா²னம் விஹரதந்தி ச²ஸு த்³வாரேஸு நிராரக்கா²னம் விஹரந்தானம். ந ஹோதி பச்சத்தம் ஸஹத⁴ம்மிகோ ஸமணவாதோ³தி ஏவம் பூ⁴தானம் தும்ஹாகம் வா அஞ்ஞேஸம் வா மயம் ஸமணாதி பச்சத்தம் ஸகாரணோ ஸமணவாதோ³ ந ஹோதி ந இஜ்ஜ²தி. ஸமணாபி ஹி புப்³பே³கதகாரணாயேவ ஹோந்தி, அஸ்ஸமணாபி புப்³பே³கதகாரணாயேவாதி. ஸஹத⁴ம்மிகோதி ஸகாரணோ. நிக்³க³ஹோ ஹோதீதி மம நிக்³க³ஹோ ஹோதி, தே பன நிக்³க³ஹிதா ஹோந்தீதி.

ஏவம் புப்³பே³கதவாதி³னோ நிக்³க³ஹேத்வா இதா³னி இஸ்ஸரனிம்மானவாதி³னோ நிக்³க³ஹேதும் தத்ர, பி⁴க்க²வேதிஆதி³மாஹ. தஸ்ஸத்தோ² புப்³பே³கதவாதே³ வுத்தனயேனேவ வேதி³தப்³போ³, ததா² அஹேதுகவாதே³பி.

ஏவம் இமேஸம் தித்தா²யதனானம் பரம்பி க³ந்த்வா அகிரியாய ஸண்ட²ஹனபா⁴வேன துச்ச²பா⁴வம் அனிய்யானிகபா⁴வம், அஸாரபா⁴வேன து²ஸகோட்டனஸதி³ஸதம் ஆபஜ்ஜனபா⁴வேன அக்³கி³ஸஞ்ஞாய த⁴மமானக²ஜ்ஜுபனகஸரிக்க²தம் தம்தி³ட்டி²கானம் புரிமஸ்ஸபி மஜ்ஜி²மஸ்ஸபி பச்சி²மஸ்ஸபி அத்த²த³ஸ்ஸனதாய அபா⁴வேன அந்த⁴வேணூபமதம் ஸத்³த³மத்தேனேவ தானி க³ஹேத்வா ஸாரதி³ட்டி²கானம் பத²வியம் பதிதஸ்ஸ பே³லுவபக்கஸ்ஸ த³த்³த³பா⁴யிதஸத்³த³ம் ஸுத்வா ‘‘பத²வீ ஸம்வட்டமானா ஆக³ச்ச²தீ’’தி ஸஞ்ஞாய பலாயந்தேன ஸஸகேன ஸரிக்க²பா⁴வஞ்ச த³ஸ்ஸேத்வா இதா³னி அத்தனா தே³ஸிதஸ்ஸ த⁴ம்மஸ்ஸ ஸாரபா⁴வஞ்சேவ நிய்யானிகபா⁴வஞ்ச த³ஸ்ஸேதும் அயம் கோ² பன, பி⁴க்க²வேதிஆதி³மாஹ. தத்த² அனிக்³க³ஹிதோதி அஞ்ஞேஹி அனிக்³க³ஹிதோ நிக்³க³ஹேதும் அஸக்குணேய்யோ. அஸம்கிலிட்டோ²தி நிக்கிலேஸோ பரிஸுத்³தோ⁴, ‘‘ஸம்கிலிட்ட²ம் நம் கரிஸ்ஸாமா’’தி பவத்தேஹிபி ததா² காதும் அஸக்குணேய்யோ. அனுபவஜ்ஜோதி உபவாத³வினிமுத்தோ. அப்படிகுட்டோ²தி ‘‘கிம் இமினா ஹரத² ந’’ந்தி ஏவம் அப்படிபா³ஹிதோ, அனுபக்குட்டோ² வா. விஞ்ஞூஹீதி பண்டி³தேஹி. அபண்டி³தானஞ்ஹி அஜானித்வா கதே²ந்தானம் வசனம் அப்பமாணம். தஸ்மா விஞ்ஞூஹீதி ஆஹ.

இதா³னி தஸ்ஸ த⁴ம்மஸ்ஸ த³ஸ்ஸனத்த²ம் ‘‘கதமோ ச, பி⁴க்க²வே’’தி பஞ்ஹம் புச்சி²த்வா ‘‘இமா ச² தா⁴துயோ’’திஆதி³னா நயேன மாதிகம் நிக்கி²பித்வா யதா²படிபாடியா விப⁴ஜித்வா த³ஸ்ஸேந்தோ புன இமா ச² தா⁴துயோதிஆதி³மாஹ. தத்த² தா⁴துயோதி ஸபா⁴வா. நிஜ்ஜீவனிஸ்ஸத்தபா⁴வப்பகாஸகோ ஹி ஸபா⁴வட்டோ² தா⁴த்வட்டோ² நாம. ப²ஸ்ஸாயதனானீதி விபாகப²ஸ்ஸானம் ஆகரட்டே²ன ஆயதனானி. மனோபவிசாராதி விதக்கவிசாரபாதே³ஹி அட்டா²ரஸஸு டா²னேஸு மனஸ்ஸ உபவிசாரா.

பத²வீதா⁴தூதி பதிட்டா²தா⁴து. ஆபோதா⁴தூதி ஆப³ந்த⁴னதா⁴து. தேஜோதா⁴தூதி பரிபாசனதா⁴து. வாயோதா⁴தூதி வித்த²ம்ப⁴னதா⁴து. ஆகாஸதா⁴தூதி அஸம்பு²ட்ட²தா⁴து. விஞ்ஞாணதா⁴தூதி விஜானனதா⁴து. ஏவமித³ம் தா⁴துகம்மட்டா²னம் ஆக³தம். தம் கோ² பனேதம் ஸங்கே²பதோ ஆக³தட்டா²னே ஸங்கே²பதோபி வித்தா²ரதோபி கதே²தும் வட்டதி. வித்தா²ரதோ ஆக³தட்டா²னே ஸங்கே²பதோ கதே²தும் ந வட்டதி, வித்தா²ரதோவ வட்டதி. இமஸ்மிம் பன தித்தா²யதனஸுத்தே இத³ம் ஸங்கே²பதோ ச²தா⁴துவஸேன கம்மட்டா²னம் ஆக³தம். தம் உப⁴யதா²பி கதே²தும் வட்டதி.

ஸங்கே²பதோ ச²தா⁴துவஸேன கம்மட்டா²னம் பரிக்³க³ண்ஹந்தோபி ஏவம் பரிக்³க³ண்ஹாதி – பத²வீதா⁴து ஆபோதா⁴து தேஜோதா⁴து வாயோதா⁴தூதி இமானி சத்தாரி மஹாபூ⁴தானி, ஆகாஸதா⁴து உபாதா³ரூபம். ஏகஸ்மிம் ச உபாதா³ரூபே தி³ட்டே² ஸேஸானி தேவீஸதி தி³ட்டா²னேவாதி ஸல்லக்கே²தப்³பா³னி. விஞ்ஞாணதா⁴தூதி சித்தம் விஞ்ஞாணக்க²ந்தோ⁴ ஹோதி, தேன ஸஹஜாதா வேத³னா வேத³னாக்க²ந்தோ⁴, ஸஞ்ஞா ஸஞ்ஞாக்க²ந்தோ⁴, ப²ஸ்ஸோ ச சேதனா ச ஸங்கா²ரக்க²ந்தோ⁴தி இமே சத்தாரோ அரூபக்க²ந்தா⁴ நாம. சத்தாரி பன மஹாபூ⁴தானி சதுன்னஞ்ச மஹாபூ⁴தானம் உபாதா³ரூபம் ரூபக்க²ந்தோ⁴ நாம. தத்த² சத்தாரோ அரூபக்க²ந்தா⁴ நாமம், ரூபக்க²ந்தோ⁴ ரூபந்தி நாமஞ்ச ரூபஞ்சாதி த்³வேயேவ த⁴ம்மா ஹோந்தி, ததோ உத்³த⁴ம் ஸத்தோ வா ஜீவோ வா நத்தீ²தி ஏவம் ஏகஸ்ஸ பி⁴க்கு²னோ ஸங்கே²பதோ ச²தா⁴துவஸேன அரஹத்தஸம்பாபகம் கம்மட்டா²னம் வேதி³தப்³ப³ம்.

வித்தா²ரதோ பரிக்³க³ண்ஹந்தோ பன சத்தாரி மஹாபூ⁴தானி பரிக்³க³ண்ஹித்வா ஆகாஸதா⁴துபரிக்³க³ஹானுஸாரேன தேவீஸதி உபாதா³ரூபானி பரிக்³க³ண்ஹாதி. அத² நேஸம் பச்சயம் உபபரிக்க²ந்தோ புன சத்தாரேவ மஹாபூ⁴தானி தி³ஸ்வா தேஸு பத²வீதா⁴து வீஸதிகோட்டா²ஸா, ஆபோதா⁴து த்³வாத³ஸ, தேஜோதா⁴து சத்தாரோ, வாயோதா⁴து ச²கோட்டா²ஸாதி கோட்டா²ஸவஸேன ஸமோதா⁴னேத்வா த்³வாசத்தாலீஸ மஹாபூ⁴தானி ச வவத்த²பேத்வா தேஸு தேவீஸதி உபாதா³ரூபானி பக்கி²பித்வா பஞ்சஸட்டி² ரூபானி வவத்த²பேதி. தானி ச வத்து²ரூபேன ஸத்³தி⁴ம் ச²ஸட்டி² ஹோந்தீதி ச²ஸட்டி² ரூபானி பஸ்ஸதி. விஞ்ஞாணதா⁴து பன லோகியசித்தவஸேன ஏகாஸீதி சித்தானி. தானி ஸப்³பா³னிபி விஞ்ஞாணக்க²ந்தோ⁴ நாம ஹோதி. தேஹி ஸஹஜாதா வேத³னாத³யோபி தத்தகாயேவாதி ஏகாஸீதி வேத³னா வேத³னாக்க²ந்தோ⁴, ஏகாஸீதி ஸஞ்ஞா ஸஞ்ஞாக்க²ந்தோ⁴, ஏகாஸீதி சேதனா ஸங்கா²ரக்க²ந்தோ⁴தி இமே சத்தாரோ அரூபக்க²ந்தா⁴ தேபூ⁴மகவஸேன க³ய்ஹமானா சதுவீஸாதி⁴கானி தீணி த⁴ம்மஸதானி ஹோந்தீதி இதி இமே ச அரூபத⁴ம்மா ச²ஸட்டி² ச ரூபத⁴ம்மாதி ஸப்³பே³பி ஸமோதா⁴னேத்வா நாமஞ்ச ரூபஞ்சாதி த்³வேவ த⁴ம்மா ஹோந்தி, ததோ உத்³த⁴ம் ஸத்தோ வா ஜீவோ வா நத்தீ²தி நாமரூபவஸேன பஞ்சக்க²ந்தே⁴ வவத்த²பேத்வா தேஸம் பச்சயம் பரியேஸந்தோ அவிஜ்ஜாபச்சயா தண்ஹாபச்சயா கம்மபச்சயா ஆஹாரபச்சயாதி ஏவம் பச்சயம் தி³ஸ்வா ‘‘அதீதேபி இமேஹி பச்சயேஹி இத³ம் வட்டம் பவத்தித்த², அனாக³தேபி ஏதேஹி பச்சயேஹி பவத்திஸ்ஸதி, ஏதரஹிபி ஏதேஹியேவ பவத்ததீ’’தி தீஸு காலேஸு கங்க²ம் விதரித்வா அனுக்கமேன படிபஜ்ஜமானோ அரஹத்தம் பாபுணாதி. ஏவம் வித்தா²ரதோபி ச²தா⁴துவஸேன அரஹத்தஸம்பாபகம் கம்மட்டா²னம் வேதி³தப்³ப³ம்.

சக்கு² ப²ஸ்ஸாயதனந்தி ஸுவண்ணாதீ³னம் ஸுவண்ணாதி³ஆகரோ விய த்³வே சக்கு²விஞ்ஞாணானி த்³வே ஸம்படிச்ச²னானி தீணி ஸந்தீரணானீதி இமேஹி ஸத்தஹி விஞ்ஞாணேஹி ஸஹஜாதானம் ஸத்தன்னம் ப²ஸ்ஸானம் ஸமுட்டா²னட்டே²ன ஆகரோதி ஆயதனம். ஸோதம் ப²ஸ்ஸாயதனந்திஆதீ³ஸுபி ஏஸேவ நயோ. மனோ ப²ஸ்ஸாயதனந்தி ஏத்த² பன த்³வாவீஸதி விபாகப²ஸ்ஸா யோஜேதப்³பா³. இதி ஹித³ம் ச²ப²ஸ்ஸாயதனானம் வஸேன கம்மட்டா²னம் ஆக³தம். தம் ஸங்கே²பதோபி வித்தா²ரதோபி கதே²தப்³ப³ம். ஸங்கே²பதோ தாவ – ஏத்த² ஹி புரிமானி பஞ்ச ஆயதனானி உபாதா³ரூபம், தேஸு தி³ட்டே²ஸு அவஸேஸம் உபாதா³ரூபம் தி³ட்ட²மேவ ஹோதி. ச²ட்ட²ம் ஆயதனம் சித்தம், தம் விஞ்ஞாணக்க²ந்தோ⁴ ஹோதி, தேன ஸஹஜாதா வேத³னாத³யோ ஸேஸா தயோ அரூபக்க²ந்தா⁴தி ஹேட்டா² வுத்தனயேனேவ ஸங்கே²பதோ ச வித்தா²ரதோ ச அரஹத்தஸம்பாபகம் கம்மட்டா²னம் வேதி³தப்³ப³ம்.

சக்கு²னா ரூபம் தி³ஸ்வாதி சக்கு²விஞ்ஞாணேன ரூபம் பஸ்ஸித்வா. ஸோமனஸ்ஸட்டா²னியந்தி ஸோமனஸ்ஸஸ்ஸ காரணபூ⁴தம். உபவிசரதீதி தத்த² மனம் சாரேந்தோ உபவிசரதி. ஸேஸபதே³ஸுபி ஏஸேவ நயோ. ஏத்த² ச இட்ட²ம் வா ஹோது அனிட்ட²ம் வா, யம் ரூபம் தி³ஸ்வா ஸோமனஸ்ஸம் உப்பஜ்ஜதி, தம் ஸோமனஸ்ஸட்டா²னியம் நாம. யம் தி³ஸ்வா தோ³மனஸ்ஸம் உப்பஜ்ஜதி, தம் தோ³மனஸ்ஸட்டா²னியம் நாம. யம் தி³ஸ்வா உபேக்கா² உப்பஜ்ஜதி, தம் உபேக்கா²ட்டா²னியம் நாமாதி வேதி³தப்³ப³ம். ஸத்³தா³தீ³ஸுபி ஏஸேவ நயோ. இதி இத³ம் ஸங்கே²பதோ கம்மட்டா²னம் ஆக³தம். தம் கோ² பனேதம் ஸங்கே²பதோ ஆக³தட்டா²னே ஸங்கே²பதோபி வித்தா²ரதோபி கதே²தும் வட்டதி. வித்தா²ரதோ ஆக³தட்டா²னே ஸங்கே²பதோ கதே²தும் ந வட்டதி. இமஸ்மிம் பன தித்தா²யதனஸுத்தே இத³ம் ஸங்கே²பதோ அட்டா²ரஸமனோபவிசாரவஸேன கம்மட்டா²னம் ஆக³தம். தம் ஸங்கே²பதோபி வித்தா²ரதோபி கதே²தும் வட்டதி.

தத்த² ஸங்கே²பதோ தாவ – சக்கு² ஸோதம் கா⁴னம் ஜிவ்ஹா காயோ, ரூபம் ஸத்³தோ³ க³ந்தோ⁴ ரஸோதி இமானி நவ உபாதா³ரூபானி, தேஸு தி³ட்டே²ஸு ஸேஸம் உபாதா³ரூபம் தி³ட்ட²மேவ ஹோதி. போ²ட்ட²ப்³ப³ம் தீணி மஹாபூ⁴தானி, தேஹி தி³ட்டே²ஹி சதுத்த²ம் தி³ட்ட²மேவ ஹோதி. மனோ விஞ்ஞாணக்க²ந்தோ⁴, தேன ஸஹஜாதா வேத³னாத³யோ தயோ அரூபக்க²ந்தா⁴தி ஹேட்டா² வுத்தனயேனேவ ஸங்கே²பதோ ச வித்தா²ரதோ ச அரஹத்தஸம்பாபகம் கம்மட்டா²னம் வேதி³தப்³ப³ம்.

அரியஸச்சானீதி அரியபா⁴வகரானி, அரியபடிவித்³தா⁴னி வா ஸச்சானி. அயமேத்த² ஸங்கே²போ, வித்தா²ரதோ பனேதம் பத³ம் விஸுத்³தி⁴மக்³கே³ (விஸுத்³தி⁴. 2.529) பகாஸிதம். ச²ன்னம், பி⁴க்க²வே, தா⁴தூனந்தி இத³ம் கிமத்த²ம் ஆரத்³த⁴ம்? ஸுகா²வபோ³த⁴னத்த²ம். யஸ்ஸ ஹி ததா²க³தோ த்³வாத³ஸபத³ம் பச்சயாவட்டம் கதே²துகாமோ ஹோதி, தஸ்ஸ க³ப்³பா⁴வக்கந்தி வட்டம் த³ஸ்ஸேதி. க³ப்³பா⁴வக்கந்தி வட்டஸ்மிம் ஹி த³ஸ்ஸிதே கதே²தும்பி ஸுக²ம் ஹோதி பரம் அவபோ³தே⁴ உதும்பீதி ஸுகா²வபோ³த⁴னத்த²ம் இத³மாரத்³த⁴ந்தி வேதி³தப்³ப³ம். தத்த² ச²ன்னம் தா⁴தூனந்தி ஹேட்டா² வுத்தானம்யேவ பத²வீதா⁴துஆதீ³னம். உபாதா³யாதி படிச்ச. ஏதேன பச்சயமத்தம் த³ஸ்ஸேதி. இத³ம் வுத்தம் ஹோதி ‘‘ச²தா⁴துபச்சயா க³ப்³ப⁴ஸ்ஸாவக்கந்தி ஹோதீ’’தி. கஸ்ஸ ச²ன்னம் தா⁴தூனம் பச்சயேன, கிம் மாது, உதா³ஹு பிதூதி? ந மாது ந பிது, படிஸந்தி⁴க்³க³ண்ஹனகஸத்தஸ்ஸேவ பன ச²ன்னம் தா⁴தூனம் பச்சயேன க³ப்³ப⁴ஸ்ஸாவக்கந்தி நாம ஹோதி. க³ப்³போ⁴ ச நாமேஸ நிரயக³ப்³போ⁴ திரச்சா²னயோனிக³ப்³போ⁴ பேத்திவிஸயக³ப்³போ⁴ மனுஸ்ஸக³ப்³போ⁴ தே³வக³ப்³போ⁴தி நானப்பகாரோ ஹோதி. இமஸ்மிம் பன டா²னே மனுஸ்ஸக³ப்³போ⁴ அதி⁴ப்பேதோ. அவக்கந்தி ஹோதீதி ஓக்கந்தி நிப்³ப³த்தி பாதுபா⁴வோ ஹோதி, கத²ம் ஹோதீதி? திண்ணம் ஸன்னிபாதேன. வுத்தஞ்ஹேதம் –

‘‘திண்ணம் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸாவக்கந்தி ஹோதி. கதமேஸம் திண்ணம்? இத⁴ மாதாபிதரோ ச ஸன்னிபதிதா ஹோந்தி, மாதா ச ந உதுனீ ஹோதி, க³ந்த⁴ப்³போ³ ச ந பச்சுபட்டி²தோ ஹோதி. நேவ தாவ க³ப்³ப⁴ஸ்ஸாவக்கந்தி ஹோதி. இத⁴ மாதாபிதரோ ச ஸன்னிபதிதா ஹோந்தி, மாதா ச உதுனீ ஹோதி, க³ந்த⁴ப்³போ³ ச ந பச்சுபட்டி²தோ ஹோதி, நேவ தாவ க³ப்³ப⁴ஸ்ஸாவக்கந்தி ஹோதி. யதோ ச கோ², பி⁴க்க²வே, மாதாபிதரோ ச ஸன்னிபதிதா ஹோந்தி, மாதா ச உதுனீ ஹோதி, க³ந்த⁴ப்³போ³ ச பச்சுபட்டி²தோ ஹோதி. ஏவம் திண்ணம் ஸன்னிபாதா க³ப்³ப⁴ஸ்ஸாவக்கந்தி ஹோதீ’’தி (ம. நி. 1.408).

ஓக்கந்தியா ஸதி நாமரூபந்தி ‘‘விஞ்ஞாணபச்சயா நாமரூப’’ந்தி வுத்தட்டா²னே வத்து²த³ஸகம் காயத³ஸகம் பா⁴வத³ஸகம் தயோ அரூபினோ க²ந்தா⁴தி தேத்திம்ஸ த⁴ம்மா க³ஹிதா, இமஸ்மிம் பன ‘‘ஓக்கந்தியா ஸதி நாமரூப’’ந்தி வுத்தட்டா²னே விஞ்ஞாணக்க²ந்த⁴ம்பி பக்கி²பித்வா க³ப்³ப⁴ஸேய்யகானம் படிஸந்தி⁴க்க²ணே சதுத்திம்ஸ த⁴ம்மா க³ஹிதாதி வேதி³தப்³பா³. நாமரூபபச்சயா ஸளாயதனந்திஆதீ³ஹி யதே²வ ஓக்கந்தியா ஸதி நாமரூபபாதுபா⁴வோ த³ஸ்ஸிதோ, ஏவம் நாமரூபே ஸதி ஸளாயதனபாதுபா⁴வோ, ஸளாயதனே ஸதி ப²ஸ்ஸபாதுபா⁴வோ, ப²ஸ்ஸே ஸதி வேத³னாபாதுபா⁴வோ த³ஸ்ஸிதோ.

வேதி³யமானஸ்ஸாதி ஏத்த² வேத³னம் அனுப⁴வந்தோபி வேதி³யமானோதி வுச்சதி ஜானந்தோபி. ‘‘வேதி³யாமஹம், ப⁴ந்தே, வேதி³யதீதி மம் ஸங்கோ⁴ தா⁴ரேதூ’’தி (சூளவ. அட்ட². 102) ஏத்த² ஹி அனுப⁴வந்தோ வேதி³யமானோ நாம, ‘‘ஸுக²ம் வேத³னம் வேதி³யமானோ ஸுக²ம் வேத³னம் வேதி³யாமீதி பஜானாதீ’’தி (ம. நி. 1.113; தீ³. நி. 2.380; விப⁴. 363) ஏத்த² ஜானந்தோ. இதா⁴பி ஜானந்தோவ அதி⁴ப்பேதோ. இத³ம் து³க்க²ந்தி பஞ்ஞபேமீதி ஏவம் ஜானந்தஸ்ஸ ஸத்தஸ்ஸ ‘‘இத³ம் து³க்க²ம் ஏத்தகம் து³க்க²ம், நத்தி² இதோ உத்³த⁴ம் து³க்க²’’ந்தி பஞ்ஞபேமி போ³தே⁴மி ஜானாபேமி. அயம் து³க்க²ஸமுத³யோதிஆதீ³ஸுபி ஏஸேவ நயோ.

தத்த² து³க்கா²தீ³ஸு அயம் ஸன்னிட்டா²னகதா² – ட²பேத்வா ஹி தண்ஹம் தேபூ⁴மகா பஞ்சக்க²ந்தா⁴ து³க்க²ம் நாம, தஸ்ஸேவ பபா⁴விகா புப்³ப³தண்ஹா து³க்க²ஸமுத³யோ நாம, தேஸம் த்³வின்னம்பி ஸச்சானம் அனுப்பத்தினிரோதோ⁴ து³க்க²னிரோதோ⁴ நாம, அரியோ அட்ட²ங்கி³கோ மக்³கோ³ து³க்க²னிரோத⁴கா³மினீ படிபதா³ நாம. இதி ப⁴க³வா ஓக்கந்தியா ஸதி நாமரூபந்தி கதே²ந்தோபி வேதி³யமானஸ்ஸ ஜானமானஸ்ஸேவ கதே²ஸி, நாமரூபபச்சயா ஸளாயதனந்தி கதே²ந்தோபி, ஸளாயதனபச்சயா ப²ஸ்ஸோதி கதே²ந்தோபி, ப²ஸ்ஸபச்சயா வேத³னாதி கதே²ந்தோபி, வேதி³யமானஸ்ஸ கோ² பனாஹம், பி⁴க்க²வே, இத³ம் து³க்க²ந்தி பஞ்ஞபேமீதி கதே²ந்தோபி, அயம் து³க்க²ஸமுத³யோதி, அயம் து³க்க²னிரோதோ⁴தி, அயம் து³க்க²னிரோத⁴கா³மினீ படிபதா³தி பஞ்ஞபேமீதி கதே²ந்தோபி வேதி³யமானஸ்ஸ ஜானமானஸ்ஸேவ கதே²ஸி.

இதா³னி தானி படிபாடியா ட²பிதானி ஸச்சானி வித்தா²ரேந்தோ கதமஞ்ச, பி⁴க்க²வேதிஆதி³மாஹ. தம் ஸப்³ப³ம் ஸப்³பா³காரேன விஸுத்³தி⁴மக்³கே³ (விஸுத்³தி⁴. 2.537) வித்தா²ரிதமேவ. தத்த² வுத்தனயேனேவ வேதி³தப்³ப³ம். அயம் பன விஸேஸோ – தத்த² ‘‘து³க்க²ஸமுத³யம் அரியஸச்சம் யாயம் தண்ஹா போனோப்³ப⁴விகா’’தி (ம. நி. 1.133; தீ³. நி. 2.400; விப⁴. 203) இமாய தந்தியா ஆக³தம், இத⁴ ‘‘அவிஜ்ஜாபச்சயா ஸங்கா²ரா’’தி பச்சயாகாரவஸேன. தத்த² ச து³க்க²னிரோத⁴ம் அரியஸச்சம் ‘‘யோ தஸ்ஸாயேவ தண்ஹாய அஸேஸவிராக³னிரோதோ⁴’’தி (ம. நி. 1.134; தீ³. நி. 2.401; விப⁴. 204) இமாய தந்தியா ஆக³தம், இத⁴ ‘‘அவிஜ்ஜாயத்வேவ அஸேஸவிராக³னிரோதா⁴’’தி பச்சயாகாரனிரோத⁴வஸேன.

தத்த² அஸேஸவிராக³னிரோதா⁴தி அஸேஸவிராகே³ன ச அஸேஸனிரோதே⁴ன ச. உப⁴யம்பேதம் அஞ்ஞமஞ்ஞவேவசனமேவ. ஸங்கா²ரனிரோதோ⁴தி ஸங்கா²ரானம் அனுப்பத்தினிரோதோ⁴ ஹோதி. ஸேஸபதே³ஸுபி ஏஸேவ நயோ. இமேஹி பன பதே³ஹி யம் ஆக³ம்ம அவிஜ்ஜாத³யோ நிருஜ்ஜ²ந்தி, அத்த²தோ தம் நிப்³பா³னம் தீ³பிதம் ஹோதி. நிப்³பா³னஞ்ஹி அவிஜ்ஜானிரோதோ⁴திபி ஸங்கா²ரனிரோதோ⁴திபி ஏவம் தேஸம் தேஸம் த⁴ம்மானம் நிரோத⁴னாமேன கதீ²யதி. கேவலஸ்ஸாதி ஸகலஸ்ஸ. து³க்க²க்க²ந்த⁴ஸ்ஸாதி வட்டது³க்க²ராஸிஸ்ஸ. நிரோதோ⁴ ஹோதீதி அப்பவத்தி ஹோதி. தத்த² யஸ்மா அவிஜ்ஜாதீ³னம் நிரோதோ⁴ நாம கீ²ணாகாரோபி வுச்சதி அரஹத்தம்பி நிப்³பா³னம்பி, தஸ்மா இத⁴ கீ²ணாகாரத³ஸ்ஸனவஸேன த்³வாத³ஸஸு டா²னேஸு அரஹத்தம், த்³வாத³ஸஸுயேவ நிப்³பா³னம் கதி²தந்தி வேதி³தப்³ப³ம். இத³ம் வுச்சதீதி ஏத்த² நிப்³பா³னமேவ ஸந்தா⁴ய இத³ந்தி வுத்தம். அட்ட²ங்கி³கோதி ந அட்ட²ஹி அங்கே³ஹி வினிமுத்தோ அஞ்ஞோ மக்³கோ³ நாம அத்தி². யதா² பன பஞ்சங்கி³கம் தூரியந்தி வுத்தே பஞ்சங்க³மத்தமேவ தூரியந்தி வுத்தம் ஹோதி, ஏவமிதா⁴பி அட்ட²ங்கி³கமத்தமேவ மக்³கோ³ ஹோதீதி வேதி³தப்³போ³. அனிக்³க³ஹிதோதி ந நிக்³க³ஹிதோ. நிக்³க³ண்ஹந்தோ ஹி ஹாபேத்வா வா த³ஸ்ஸேதி வட்³டே⁴த்வா வா தம் பரிவத்தேத்வா வா. தத்த² யஸ்மா சத்தாரி அரியஸச்சானி ‘‘ந இமானி சத்தாரி, த்³வே வா தீணி வா’’தி ஏவம் ஹாபேத்வாபி ‘‘பஞ்ச வா ச² வா’’தி ஏவம் வட்³டே⁴த்வாபி ‘‘ந இமானி சத்தாரி அரியஸச்சானி, அஞ்ஞானேவ சத்தாரி அரியஸச்சானீ’’தி த³ஸ்ஸேதும் ந ஸக்கா. தஸ்மா அயம் த⁴ம்மோ அனிக்³க³ஹிதோ நாம. ஸேஸம் ஸப்³ப³த்த² உத்தானமேவாதி.

2. ப⁴யஸுத்தவண்ணனா

63. து³தியே அமாதாபுத்திகானீதி மாதா ச புத்தோ ச மாதாபுத்தம், பரித்தாதும் ஸமத்த²பா⁴வேன நத்தி² ஏத்த² மாதாபுத்தந்தி அமாதாபுத்திகானி. யந்தி யஸ்மிம் ஸமயே. தத்த² மாதாபி புத்தம் நப்படிலப⁴தீதி தஸ்மிம் அக்³கி³ப⁴யே உப்பன்னே மாதாபி புத்தம் பஸ்ஸிதும் ந லப⁴தி, புத்தோபி மாதரம் பஸ்ஸிதும் ந லப⁴தீதி அத்தோ². ப⁴யம் ஹோதீதி சித்துத்ராஸப⁴யம் ஹோதி. அடவிஸங்கோபோதி அடவியா ஸங்கோபோ. அடவீதி சேத்த² அடவிவாஸினோ சோரா வேதி³தப்³பா³. யதா³ ஹி தே அடவிதோ ஜனபத³ம் ஓதரித்வா கா³மனிக³மராஜதா⁴னியோ பஹரித்வா விலும்பந்தி, ததா³ அடவிஸங்கோபோ நாம ஹோதி, தம் ஸந்தா⁴யேதம் வுத்தம். சக்கஸமாரூள்ஹாதி ஏத்த² இரியாபத²சக்கம்பி வட்டதி யானசக்கம்பி. ப⁴யஸ்மிம் ஹி ஸம்பத்தே யேஸம் யானகானி அத்தி², தே அத்தனோ பரிக்கா²ரப⁴ண்ட³ம் தேஸு ஆரோபேத்வா பலாயந்தி. யேஸம் நத்தி², தே காஜேன வா ஆதா³ய ஸீஸேன வா உக்கி²பித்வா பலாயந்தியேவ. தே சக்கஸமாரூள்ஹா நாம ஹோந்தி. பரியாயந்தீதி இதோ சிதோ ச க³ச்ச²ந்தி. கதா³சீதி கிஸ்மிஞ்சிதே³வ காலே. கரஹசீதி தஸ்ஸேவ வேவசனம். மாதாபி புத்தம் படிலப⁴தீதி ஆக³ச்ச²ந்தம் வா க³ச்ச²ந்தம் வா ஏகஸ்மிம் டா²னே நிலீனம் வா பஸ்ஸிதும் லப⁴தி. உத³கவாஹகோதி நதீ³பூரோ. மாதாபி புத்தம் படிலப⁴தீதி குல்லே வா உளும்பே வா மத்திகாபா⁴ஜனே வா தா³ருக்க²ண்டே³ வா லக்³க³ம் வுய்ஹமானம் பஸ்ஸிதும் படிலப⁴தி, ஸோத்தி²னா வா புன உத்தரித்வா கா³மே வா அரஞ்ஞே வா டி²தம் பஸ்ஸிதும் லப⁴தீதி.

ஏவம் பரியாயதோ அமாதாபுத்திகானி ப⁴யானி த³ஸ்ஸேத்வா இதா³னி நிப்பரியாயேன த³ஸ்ஸேந்தோ தீணிமானீதிஆதி³மாஹ. தத்த² ஜராப⁴யந்தி ஜரம் படிச்ச உப்பஜ்ஜனகப⁴யம். இதரேஸுபி ஏஸேவ நயோ. வுத்தம்பி சேதம் – ‘‘ஜரம் படிச்ச உப்பஜ்ஜதி ப⁴யம் ப⁴யானகம் ச²ம்பி⁴தத்தம் லோமஹம்ஸோ சேதஸோ உத்ராஸோ. ப்³யாதி⁴ம் படிச்ச, மரணம் படிச்ச உப்பஜ்ஜதி ப⁴யம் ப⁴யானகம் ச²ம்பி⁴தத்தம் லோமஹம்ஸோ சேதஸோ உத்ராஸோ’’தி (விப⁴. 921). ஸேஸம் ஸப்³ப³த்த² உத்தானமேவாதி.

3. வேனாக³புரஸுத்தவண்ணனா

64. ததியே கோஸலேஸூதி ஏவம்னாமகே ஜனபதே³. சாரிகம் சரமானோதி அத்³தா⁴னக³மனம் க³ச்ச²ந்தோ. சாரிகா ச நாமேஸா ப⁴க³வதோ து³விதா⁴ ஹோதி துரிதசாரிகா ச அதுரிதசாரிகா சாதி. தத்த² தூ³ரேபி போ³த⁴னேய்யபுக்³க³லம் தி³ஸ்வா தஸ்ஸ போ³த⁴னத்தா²ய ஸஹஸா க³மனம் துரிதசாரிகா நாம. ஸா மஹாகஸ்ஸபபச்சுக்³க³மனாதீ³ஸு த³ட்ட²ப்³பா³. யம் பன கா³மனிக³மபடிபாடியா தே³வஸிகம் யோஜனஅத்³த⁴யோஜனவஸேன பிண்ட³பாதசரியாதீ³ஹி லோகம் அனுக்³க³ண்ஹந்தஸ்ஸ க³மனம், அயம் அதுரிதசாரிகா நாம. இமம் ஸந்தா⁴யேதம் வுத்தம் – ‘‘சாரிகம் சரமானோ’’தி. வித்தா²ரேன பன சாரிகாகதா² ஸுமங்க³லவிலாஸினியா தீ³க⁴னிகாயட்ட²கதா²ய அம்ப³ட்ட²ஸுத்தவண்ணனாயம் (தீ³. நி. அட்ட². 1.254) வுத்தா. ப்³ராஹ்மணகா³மோதி ப்³ராஹ்மணானம் ஸமோஸரணகா³மோபி ப்³ராஹ்மணகா³மோதி வுச்சதி, ப்³ராஹ்மணானம் போ⁴க³கா³மோபி. இத⁴ ஸமோஸரணகா³மோ ப்³ராஹ்மணவஸனகா³மோதி அதி⁴ப்பேதோ. தத³வஸரீதி தத்த² அவஸரி, ஸம்பத்தோதி அத்தோ². விஹாரோ பனேத்த² அனியாமிதோ. தஸ்மா தஸ்ஸ அவிதூ³ரே பு³த்³தா⁴னம் அனுச்ச²விகோ ஏகோ வனஸண்டோ³ அத்தி², ஸத்தா² தம் வனஸண்ட³ம் க³தோதி வேதி³தப்³போ³.

அஸ்ஸோஸுந்தி ஸுணிம்ஸு உபலபி⁴ம்ஸு, ஸோதத்³வாரஸம்பத்தவசனனிக்³கோ⁴ஸானுஸாரேன ஜானிம்ஸு. கோ²தி அவதா⁴ரணத்தே², பத³பூரணமத்தே வா நிபாதோ. தத்த² அவதா⁴ரணத்தே²ன ‘‘அஸ்ஸோஸும் ஏவ, ந தேஸம் கோசி ஸவனந்தராயோ அஹோஸீ’’தி அயமத்தோ² வேதி³தப்³போ³. பத³பூரணேன ப்³யஞ்ஜனஸிலிட்ட²தாமத்தமேவ.

இதா³னி யமத்த²ம் அஸ்ஸோஸும், தம் பகாஸேதும் ஸமணோ க²லு, போ⁴, கோ³தமோதிஆதி³ வுத்தம். தத்த² ஸமிதபாபத்தா ஸமணோதி வேதி³தப்³போ³. க²லூதி அனுஸ்ஸவத்தே² நிபாதோ. போ⁴தி தேஸம் அஞ்ஞமஞ்ஞம் ஆலபனமத்தம். கோ³தமோதி ப⁴க³வதோ கோ³த்தவஸேன பரிதீ³பனம், தஸ்மா ‘‘ஸமணோ க²லு, போ⁴, கோ³தமோ’’தி ஏத்த² ஸமணோ கிர, போ⁴, கோ³தமகோ³த்தோதி ஏவமத்தோ² த³ட்ட²ப்³போ³. ஸக்யபுத்தோதி இத³ம் பன ப⁴க³வதோ உச்சாகுலபரிதீ³பனம். ஸக்யகுலா பப்³ப³ஜிதோதி ஸத்³தா⁴பப்³ப³ஜிதபா⁴வபரிதீ³பனம், கேனசி பாரிஜுஞ்ஞேன அனபி⁴பூ⁴தோ அபரிக்கீ²ணம்யேவ தம் குலம் பஹாய ஸத்³தா⁴ய பப்³ப³ஜிதோதி வுத்தம் ஹோதி. தம் கோ² பனாதி இத்த²ம்பூ⁴தாக்²யானத்தே² உபயோக³வசனம், தஸ்ஸ கோ² பன போ⁴தோ கோ³தமஸ்ஸாதி அத்தோ². கல்யாணோதி கல்யாணகு³ணஸமன்னாக³தோ, ஸேட்டோ²தி வுத்தம் ஹோதி. கித்திஸத்³தோ³தி கித்தியேவ, து²திகோ⁴ஸோ வா. அப்³பு⁴க்³க³தோதி ஸதே³வகம் லோகம் அஜ்ஜோ²த்த²ரித்வா உக்³க³தோ. கிந்தி? இதிபி ஸோ ப⁴க³வா…பே… பு³த்³தோ⁴ ப⁴க³வாதி. தத்ராயம் பத³ஸம்ப³ந்தோ⁴ – ஸோ ப⁴க³வா இதிபி அரஹம், இதிபி ஸம்மாஸம்பு³த்³தோ⁴…பே… இதிபி ப⁴க³வாதி. இமினா ச இமினா ச காரணேனாதி வுத்தம் ஹோதி.

தத்த² ‘‘ஆரகத்தா, அரீனம் அரானஞ்ச ஹதத்தா, பச்சயாதீ³னம் அரஹத்தா, பாபகரணே ரஹாபா⁴வாதி இமேஹி காரணேஹி ஸோ ப⁴க³வா அரஹந்தி வேதி³தப்³போ³’’திஆதி³னா நயேன மாதிகம் நிக்கி²பித்வா ஸப்³பா³னேவ ஏதானி பதா³னி விஸுத்³தி⁴மக்³கே³ (விஸுத்³தி⁴. 1.125-127) பு³த்³தா⁴னுஸ்ஸதினித்³தே³ஸே வித்தா²ரிதானீதி ததோ நேஸம் வித்தா²ரோ க³ஹேதப்³போ³.

ஸோ இமம் லோகந்தி ஸோ ப⁴வம் கோ³தமோ இமம் லோகம், இதா³னி வத்தப்³ப³ம் நித³ஸ்ஸேதி. ஸதே³வகந்தி ஸஹ தே³வேஹி ஸதே³வகம். ஏவம் ஸஹ மாரேன ஸமாரகம். ஸஹ ப்³ரஹ்முனா ஸப்³ரஹ்மகம். ஸஹ ஸமணப்³ராஹ்மணேஹி ஸஸ்ஸமணப்³ராஹ்மணிம். பஜாதத்தா பஜா, தம் பஜம். ஸஹ தே³வமனுஸ்ஸேஹி ஸதே³வமனுஸ்ஸம். தத்த² ஸதே³வகவசனேன பஞ்சகாமாவசரதே³வக்³க³ஹணம் வேதி³தப்³ப³ம், ஸமாரகவசனேன ச²ட்ட²காமாவசரதே³வக்³க³ஹணம், ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணம், ஸஸ்ஸமணப்³ராஹ்மணிவசனேன ஸாஸனஸ்ஸ பச்சத்தி²கபச்சாமித்தஸமணப்³ராஹ்மணக்³க³ஹணம், ஸமிதபாபபா³ஹிதபாபஸமணப்³ராஹ்மணக்³க³ஹணஞ்ச, பஜாவசனேன ஸத்தலோகக்³க³ஹணம், ஸதே³வமனுஸ்ஸவசனேன ஸம்முதிதே³வஅவஸேஸமனுஸ்ஸக்³க³ஹணம். ஏவமேத்த² தீஹி பதே³ஹி ஓகாஸலோகேன ஸத்³தி⁴ம் ஸத்தலோகோ, த்³வீஹி பஜாவஸேன ஸத்தலோகோவ க³ஹிதோதி வேதி³தப்³போ³.

அபரோ நயோ – ஸதே³வகக்³க³ஹணேன அரூபாவசரலோகோ க³ஹிதோ, ஸமாரகக்³க³ஹணேன ச²காமாவசரதே³வலோகோ, ஸப்³ரஹ்மகக்³க³ஹணேன ரூபீப்³ரஹ்மலோகோ, ஸஸ்ஸமணப்³ராஹ்மணாதி³க்³க³ஹணேன சதுபரிஸவஸேன, ஸம்முதிதே³வேஹி வா ஸஹ மனுஸ்ஸலோகோ, அவஸேஸஸப்³ப³ஸத்தலோகோ வா. போராணா பனாஹு – ஸதே³வகந்தி தே³வதாஹி ஸத்³தி⁴ம் அவஸேஸலோகம். ஸமாரகந்தி மாரேன ஸத்³தி⁴ம் அவஸேஸலோகம். ஸப்³ரஹ்மகந்தி ப்³ரஹ்மேஹி ஸத்³தி⁴ம் அவஸேஸலோகம். ஏவம் ஸப்³பே³பி திப⁴வூபகே³ ஸத்தே தீஹாகாரேஹி தீஸு பதே³ஸு பக்கி²பித்வா புன த்³வீஹி பதே³ஹி பரியாதா³தும் ஸஸ்ஸமணப்³ராஹ்மணிம் பஜம் ஸதே³வமனுஸ்ஸந்தி வுத்தம். ஏவம் பஞ்சஹி பதே³ஹி தேன தேனாகாரேன தேதா⁴துகமேவ பரியாதி³ன்னந்தி.

ஸயம் அபி⁴ஞ்ஞா ஸச்சி²கத்வா பவேதே³தீதி ஸயந்தி ஸாமம், அபரனேய்யோ ஹுத்வா. அபி⁴ஞ்ஞாதி அபி⁴ஞ்ஞாய, அதி⁴கேன ஞாணேன ஞத்வாதி அத்தோ². ஸச்சி²கத்வாதி பச்சக்க²ம் கத்வா, ஏதேன அனுமானாதி³படிக்கே²போ கதோ. பவேதே³தீதி போ³தே⁴தி ஞாபேதி பகாஸேதி.

ஸோ த⁴ம்மம் தே³ஸேதி ஆதி³கல்யாணம்…பே… பரியோஸானகல்யாணந்தி ஸோ ப⁴க³வா ஸத்தேஸு காருஞ்ஞதம் படிச்ச ஹித்வாபி அனுத்தரம் விவேகஸுக²ம் த⁴ம்மம் தே³ஸேதி. தஞ்ச கோ² அப்பம் வா ப³ஹும் வா தே³ஸேந்தோ ஆதி³கல்யாணாதி³ப்பகாரமேவ தே³ஸேதி, ஆதி³ம்ஹிபி கல்யாணம் ப⁴த்³த³கம் அனவஜ்ஜமேவ கத்வா தே³ஸேதி, மஜ்ஜே²பி, பரியோஸானேபி கல்யாணம் ப⁴த்³த³கம் அனவஜ்ஜமேவ கத்வா தே³ஸேதீதி வுத்தம் ஹோதி.

தத்த² அத்தி² தே³ஸனாய ஆதி³மஜ்ஜ²பரியோஸானம், அத்தி² ஸாஸனஸ்ஸ. தே³ஸனாய தாவ சதுப்பதி³காயபி கா³தா²ய பட²மபாதோ³ ஆதி³ நாம, ததோ த்³வே மஜ்ஜ²ம் நாம, அந்தே ஏகோ பரியோஸானம் நாம. ஏகானுஸந்தி⁴கஸ்ஸ ஸுத்தஸ்ஸ நிதா³னம் ஆதி³, இத³மவோசாதி பரியோஸானம், உபி⁴ன்னம் அந்தரா மஜ்ஜ²ம். அனேகானுஸந்தி⁴கஸ்ஸ ஸுத்தஸ்ஸ பட²மானுஸந்தி⁴ ஆதி³, அந்தே அனுஸந்தி⁴ பரியோஸானம், மஜ்ஜே² ஏகோ வா த்³வே வா ப³ஹூ வா மஜ்ஜ²மேவ.

ஸாஸனஸ்ஸ ஸீலஸமாதி⁴விபஸ்ஸனா ஆதி³ நாம. வுத்தம்பி சேதம் – ‘‘கோ சாதி³ குஸலானம் த⁴ம்மானம், ஸீலஞ்ச ஸுவிஸுத்³த⁴ம் தி³ட்டி² ச உஜுகா’’தி (ஸம். நி. 5.369). ‘‘அத்தி², பி⁴க்க²வே, மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴’’தி ஏவம் வுத்தோ பன அரியமக்³கோ³ மஜ்ஜ²ம் நாம. ப²லஞ்சேவ நிப்³பா³னஞ்ச பரியோஸானம் நாம. ‘‘தஸ்மாதிஹ த்வம், ப்³ராஹ்மண, ப்³ரஹ்மசரியம் ஏதம்பாரம் ஏதம்பரியோஸான’’ந்தி ஏத்த² ப²லம் பரியோஸனந்தி வுத்தம். ‘‘நிப்³பா³னோக³த⁴ஞ்ஹி, ஆவுஸோ விஸாக², ப்³ரஹ்மசரியம் வுஸ்ஸதி நிப்³பா³னபராயணம் நிப்³பா³னபரியோஸான’’ந்தி (ம. நி. 1.466) ஏத்த² நிப்³பா³னம் பரியோஸானந்தி வுத்தம். இத⁴ பன தே³ஸனாய ஆதி³மஜ்ஜ²பரியோஸானம் அதி⁴ப்பேதம். ப⁴க³வா ஹி த⁴ம்மம் தே³ஸேந்தோ ஆதி³ம்ஹி ஸீலம் த³ஸ்ஸேத்வா மஜ்ஜே² மக்³க³ம் பரியோஸானே நிப்³பா³னம் த³ஸ்ஸேதி. தேன வுத்தம் – ‘‘ஸோ த⁴ம்மம் தே³ஸேதி ஆதி³கல்யாணம் மஜ்ஜே²கல்யாணம் பரியோஸானகல்யாண’’ந்தி. தஸ்மா அஞ்ஞோபி த⁴ம்மகதி²கோ த⁴ம்மம் கதே²ந்தோ –

‘‘ஆதி³ம்ஹி ஸீலம் த³ஸ்ஸேய்ய, மஜ்ஜே² மக்³க³ம் விபா⁴வயே;

பரியோஸானம்ஹி நிப்³பா³னம், ஏஸா கதி²கஸண்டி²தீ’’தி.

ஸாத்த²ம் ஸப்³யஞ்ஜனந்தி யஸ்ஸ ஹி யாகு³ப⁴த்தஇத்தி²புரிஸாதி³வண்ணனானிஸ்ஸிதா தே³ஸனா ஹோதி, ந ஸோ ஸாத்த²ம் தே³ஸேதி. ப⁴க³வா பன ததா²ரூபம் தே³ஸனம் பஹாய சதுஸதிபட்டா²னாதி³னிஸ்ஸிதம் தே³ஸனம் தே³ஸேதி. தஸ்மா ‘‘ஸாத்த²ம் தே³ஸேதீ’’தி வுச்சதி. யஸ்ஸ பன தே³ஸனா ஏகப்³யஞ்ஜனாதி³யுத்தா வா ஸப்³ப³னிரோட்ட²ப்³யஞ்ஜனா வா ஸப்³ப³விஸ்ஸட்ட²ப்³யஞ்ஜனா வா ஸப்³ப³னிக்³க³ஹிதப்³யஞ்ஜனா வா, தஸ்ஸ த³மிளகிராதயவனாதி³மிலக்கா²னம் பா⁴ஸா விய ப்³யஞ்ஜனபாரிபூரியா அபா⁴வதோ அப்³யஞ்ஜனா நாம தே³ஸனா ஹோதி. ப⁴க³வா பன –

‘‘ஸிதி²லம் த⁴னிதஞ்ச தீ³க⁴ரஸ்ஸம், லஹுகம் க³ருகஞ்ச நிக்³க³ஹீதம்;

ஸம்ப³ந்த⁴ம் வவத்தி²தம் விமுத்தம், த³ஸதா⁴ ப்³யஞ்ஜனபு³த்³தி⁴யா பபே⁴தோ³’’தி. –

ஏவம் வுத்தம் த³ஸவித⁴ம் ப்³யஞ்ஜனம் அமக்கே²த்வா பரிபுண்ணப்³யஞ்ஜனமேவ கத்வா த⁴ம்மம் தே³ஸேதி. தஸ்மா ‘‘ஸப்³யஞ்ஜனம் கத்வா தே³ஸேதீ’’தி வுச்சதி. கேவலபரிபுண்ணந்தி ஏத்த² கேவலந்தி ஸகலாதி⁴வசனம். பரிபுண்ணந்தி அனூனாதி⁴கவசனம். இத³ம் வுத்தம் ஹோதி – ஸகலபரிபுண்ணமேவ தே³ஸேதி, ஏகதே³ஸனாபி அபரிபுண்ணா நத்தீ²தி. பரிஸுத்³த⁴ந்தி நிருபக்கிலேஸம். யோ ஹி ‘‘இமம் த⁴ம்மதே³ஸனம் நிஸ்ஸாய லாப⁴ம் வா ஸக்காரம் வா லபி⁴ஸ்ஸாமீ’’தி தே³ஸேதி, தஸ்ஸ அபரிஸுத்³தா⁴ தே³ஸனா நாம ஹோதி. ப⁴க³வா பன லோகாமிஸனிரபேக்கோ² ஹிதப²ரணேனேவ மேத்தாபா⁴வனாய முது³ஹத³யோ உல்லும்பனஸபா⁴வஸண்டி²தேன சித்தேன தே³ஸேதி. தஸ்மா பரிஸுத்³த⁴ம் தே³ஸேதீதி வுச்சதி. ப்³ரஹ்மசரியம் பகாஸேதீதி ஏத்த² ப்³ரஹ்மசரியந்தி ஸிக்க²த்தயஸங்க³ஹிதம் ஸகலம் ஸாஸனம். தஸ்மா ப்³ரஹ்மசரியம் பகாஸேதீதி ஸோ த⁴ம்மம் தே³ஸேதி ஆதி³கல்யாணம்…பே… பரிஸுத்³த⁴ம், ஏவம் தே³ஸேந்தோ ச ஸிக்க²த்தயஸங்க³ஹிதம் ஸகலஸாஸனப்³ரஹ்மசரியம் பகாஸேதீதி ஏவமேத்த² அத்தோ² த³ட்ட²ப்³போ³. ப்³ரஹ்மசரியந்தி ஸேட்ட²ட்டே²ன ப்³ரஹ்மபூ⁴தம் சரியம், ப்³ரஹ்மபூ⁴தானம் வா பு³த்³தா⁴தீ³னம் சரியந்தி வுத்தம் ஹோதி.

ஸாது⁴ கோ² பனாதி ஸுந்த³ரம் கோ² பன, அத்தா²வஹம் ஸுகா²வஹந்தி வுத்தம் ஹோதி. ததா²ரூபானம் அரஹதந்தி யதா²ரூபோ ஸோ ப⁴வம் கோ³தமோ, ஏவரூபானம் அனேகேஹிபி கப்பகோடிஸதஸஹஸ்ஸேஹி து³ல்லப⁴த³ஸ்ஸனானம் ப்³யாமப்பபா⁴பரிக்கி²த்தேஹி அஸீதிஅனுப்³யஞ்ஜனபடிமண்டி³தேஹி த்³வத்திம்ஸமஹாபுரிஸலக்க²ணவரேஹி ஸமாகிண்ணமனோரமஸரீரானம் அனப்பகத³ஸ்ஸனானம் அதிமது⁴ரத⁴ம்மனிக்³கோ⁴ஸானம் யதா²பூ⁴தகு³ணாதி⁴க³மேன லோகே அரஹந்தோதி லத்³த⁴ஸத்³தா³னம் அரஹதம். த³ஸ்ஸனம் ஹோதீதி பஸாத³ஸோம்மானி அக்கீ²னி உம்மீலேத்வா த³ஸ்ஸனமத்தம்பி ஸாது⁴ ஹோதி. ஸசே பன அட்ட²ங்க³ஸமன்னாக³தேன ப்³ரஹ்மஸ்ஸரேன த⁴ம்மம் தே³ஸேந்தஸ்ஸ ஏகபத³ம்பி ஸோதும் லபி⁴ஸ்ஸாம, ஸாது⁴தரம்யேவ ப⁴விஸ்ஸதீதி ஏவம் அஜ்ஜா²ஸயம் கத்வா. யேன ப⁴க³வா தேனுபஸங்கமிம்ஸூதி ஸப்³ப³கிச்சானி பஹாய துட்ட²மானஸா அக³மம்ஸு. அஞ்ஜலிம் பணாமேத்வாதி ஏதே உப⁴தோபக்கி²கா, தே ஏவம் சிந்தேஸும் – ‘‘ஸசே நோ மிச்சா²தி³ட்டி²கா சோதே³ஸ்ஸந்தி ‘கஸ்மா தும்ஹே ஸமணம் கோ³தமம் வந்தி³த்தா²’தி, தேஸம் ‘கிம் அஞ்ஜலிகரணமத்தேனாபி வந்தி³தம் ஹோதீ’தி வக்கா²ம. ஸசே நோ ஸம்மாதி³ட்டி²கா சோதே³ஸ்ஸந்தி ‘கஸ்மா ப⁴க³வந்தம் ந வந்தி³த்தா²’தி, ‘கிம் ஸீஸேன பூ⁴மிம் பஹரந்தேனேவ வந்தி³தம் ஹோதி. நனு அஞ்ஜலிகம்மம்பி வந்த³னா ஏவா’தி வக்கா²மா’’தி.

நாமகோ³த்தந்தி, ‘‘போ⁴ கோ³தம, அஹம் அஸுகஸ்ஸ புத்தோ த³த்தோ நாம மித்தோ நாம இதா⁴க³தோ’’தி வத³ந்தா நாமம் ஸாவேந்தி நாம. ‘‘போ⁴ கோ³தம, அஹம் வாஸேட்டோ² நாம கச்சானோ நாம இதா⁴க³தோ’’தி வத³ந்தா கோ³த்தம் ஸாவேந்தி நாம. ஏதே கிர த³லித்³தா³ ஜிண்ணகுலபுத்தா ‘‘பரிஸமஜ்ஜே² நாமகோ³த்தவஸேன பாகடா ப⁴விஸ்ஸாமா’’தி ஏவம் அகம்ஸு. யே பன துண்ஹீபூ⁴தா நிஸீதி³ம்ஸு, தே கேராடிகா சேவ அந்த⁴பா³லா ச. தத்த² கேராடிகா ‘‘ஏகம் த்³வே கதா²ஸல்லாபே கரோந்தே விஸ்ஸாஸிகோ ஹோதி, அத² விஸ்ஸாஸே ஸதி ஏகம் த்³வே பி⁴க்கா² அதா³தும் ந யுத்த’’ந்தி ததோ அத்தானம் மோசேந்தா துண்ஹீபூ⁴தா நிஸீத³ந்தி. அந்த⁴பா³லா அஞ்ஞாணதாயேவ அவக்கி²த்தமத்திகாபிண்டா³ விய யத்த² கத்த²சி துண்ஹீபூ⁴தா நிஸீத³ந்தி.

வேனாக³புரிகோதி வேனாக³புரவாஸீ. ஏதத³வோசாதி பாத³ந்ததோ பட்டா²ய யாவ கேஸக்³கா³ ததா²க³தஸ்ஸ ஸரீரம் ஓலோகேந்தோ அஸீதிஅனுப்³யஞ்ஜனஸமுஜ்ஜலேஹி த்³வத்திம்ஸமஹாபுரிஸலக்க²ணேஹி படிமண்டி³தம் ஸரீரா நிக்க²மித்வா ஸமந்ததோ அஸீதிஹத்த²ப்பதே³ஸம் அஜ்ஜோ²த்த²ரித்வா டி²தாஹி ச²ப்³ப³ண்ணாஹி க⁴னபு³த்³த⁴ரம்ஸீஹி ஸம்பரிவாரிதம் ததா²க³தஸ்ஸ ஸரீரம் தி³ஸ்வா ஸஞ்ஜாதவிம்ஹயோ வண்ணம் ப⁴ணந்தோ ஏதம் ‘‘அச்ச²ரியம், போ⁴ கோ³தமா’’திஆதி³வசனம் அவோச.

தத்த² யாவஞ்சித³ந்தி அதி⁴மத்தப்பமாணபரிச்சே²த³வசனமேதம். தஸ்ஸ விப்பஸன்னபதே³ன ஸத்³தி⁴ம் ஸம்ப³ந்தோ⁴. யாவஞ்ச விப்பஸன்னானி அதி⁴மத்தவிப்பஸன்னானீதி அத்தோ². இந்த்³ரியானீதி சக்கா²தீ³னி ச² இந்த்³ரியானி. தஸ்ஸ ஹி பஞ்சன்னம் இந்த்³ரியானம் பதிட்டி²தோகாஸஸ்ஸ விப்பஸன்னதம் தி³ஸ்வா தேஸம் விப்பஸன்னதா பாகடா அஹோஸி. யஸ்மா பன ஸா மனே விப்பஸன்னேயேவ ஹோதி, அவிப்பஸன்னசித்தானஞ்ஹி இந்த்³ரியப்பஸாதோ³ நாம நத்தி², தஸ்மாஸ்ஸ மனிந்த்³ரியப்பஸாதோ³பி பாகடோ அஹோஸி. தம் ஏஸ விப்பஸன்னதம் க³ஹேத்வா ‘‘விப்பஸன்னானி இந்த்³ரியானீ’’தி ஆஹ. பரிஸுத்³தோ⁴தி நிம்மலோ. பரியோதா³தோதி பப⁴ஸ்ஸரோ. ஸாரத³ம் ப³த³ரபண்டு³ந்தி ஸரத³காலே ஜாதம் நாதிஸுபரிபக்கம் ப³த³ரம். தஞ்ஹி பரிஸுத்³த⁴ஞ்சேவ ஹோதி பரியோதா³தஞ்ச. தாலபக்கந்தி ஸுபரிபக்கதாலப²லம். ஸம்பதி ப³ந்த⁴னா பமுத்தந்தி தம்க²ணஞ்ஞேவ ப³ந்த⁴னா பமுத்தம். தஸ்ஸ ஹி ப³ந்த⁴னமூலம் அபனேத்வா பரமுக²ம் கத்வா ப²லகே ட²பிதஸ்ஸ சதுரங்கு³லமத்தம் டா²னம் ஓலோகேந்தானம் பரிஸுத்³த⁴ம் பரியோதா³தம் ஹுத்வா கா²யதி. தம் ஸந்தா⁴யேவமாஹ. நேக்க²ம் ஜம்போ³னத³ந்தி ஸுரத்தவண்ணஸ்ஸ ஜம்போ³னத³ஸுவண்ணஸ்ஸ க⁴டிகா. த³க்க²கம்மாரபுத்தஸுபரிகம்மகதந்தி த³க்கே²ன ஸுவண்ணகாரபுத்தேன ஸுட்டு² கதபரிகம்மம். உக்காமுகே² ஸுகுஸலஸம்பஹட்ட²ந்தி ஸுவண்ணகாரஉத்³த⁴னே பசித்வா ஸுகுஸலேன ஸுவண்ணகாரேன க⁴ட்டனபரிமஜ்ஜனஹம்ஸனேன ஸுட்டு² பஹட்ட²ம் ஸுபரிமத்³தி³தந்தி அத்தோ². பண்டு³கம்ப³லே நிக்கி²த்தந்தி அக்³கி³னா பசித்வா தீ³பிதா³டா²ய க⁴ம்ஸித்வா கே³ருகபரிகம்மம் கத்வா ரத்தகம்ப³லே ட²பிதம். பா⁴ஸதேதி ஸஞ்ஜாதஓபா⁴ஸதாய பா⁴ஸதே. தபதேதி அந்த⁴காரவித்³த⁴ம்ஸனதாய தபதே. விரோசதீதி விஜ்ஜோதமானம் ஹுத்வா விரோசதி, ஸோப⁴தீதி அத்தோ².

உச்சாஸயனமஹாஸயனானீதி ஏத்த² அதிக்கந்தப்பமாணம் உச்சாஸயனம் நாம, ஆயதவித்த²தம் அகப்பியப⁴ண்ட³ம் மஹாஸயனம் நாம. இதா³னி தானி த³ஸ்ஸேந்தோ ஸேய்யதி²த³ம், ஆஸந்தீ³திஆதி³மாஹ. தத்த² ஆஸந்தீ³தி அதிக்கந்தப்பமாணம் ஆஸனம். பல்லங்கோதி பாதே³ஸு வாளரூபானி ட²பேத்வா கதோ. கோ³னகோதி தீ³க⁴லோமகோ மஹாகோஜவோ. சதுரங்கு³லாதி⁴கானி கிர தஸ்ஸ லோமானி. சித்தகோதி வானசித்தம் உண்ணாமயத்த²ரணம். படிகாதி உண்ணாமயோ ஸேதத்த²ரகோ. படலிகாதி க⁴னபுப்போ² உண்ணாமயத்த²ரகோ, யோ ஆமலகபட்டோதிபி வுச்சதி. தூலிகாதி திண்ணம் தூலானம் அஞ்ஞதரபுண்ணா தூலிகா. விகதிகாதி ஸீஹப்³யக்³கா⁴தி³ரூபவிசித்ரோ உண்ணாமயத்த²ரகோ. உத்³த³லோமீதி உப⁴தோத³ஸம் உண்ணாமயத்த²ரணம். கேசி ஏகதோ உக்³க³தபுப்ப²ந்தி வத³ந்தி. ஏகந்தலோமீதி ஏகதோத³ஸம் உண்ணாமயத்த²ரணம். கேசி உப⁴தோ உக்³க³தபுப்ப²ந்தி வத³ந்தி. கட்டிஸ்ஸந்தி ரதனபரிஸிப்³பி³தம் கோஸேய்யகட்டிஸ்ஸமயம் பச்சத்த²ரணம். கோஸேய்யந்தி ரதனபரிஸிப்³பி³தமேவ கோஸியஸுத்தமயம் பச்சத்த²ரணம். குத்தகந்தி ஸோளஸன்னம் நாடகித்தீ²னம் ட²த்வா நச்சனயோக்³க³ம் உண்ணாமயத்த²ரணம். ஹத்த²த்த²ராத³யோ ஹத்தி²பிட்டா²தீ³ஸு அத்த²ரணகஅத்த²ரகா சேவ ஹத்தி²ரூபாதீ³னி த³ஸ்ஸேத்வா கதஅத்த²ரகா ச. அஜினப்பவேணீதி அஜினசம்மேஹி மஞ்சப்பமாணேன ஸிப்³பி³த்வா கதப்பவேணீ. ஸேஸம் ஹேட்டா² வுத்தத்த²மேவ.

நிகாமலாபீ⁴தி அதிகாமலாபீ⁴ இச்சி²திச்சி²தலாபீ⁴. அகிச்ச²லாபீ⁴தி அது³க்க²லாபீ⁴. அகஸிரலாபீ⁴தி விபுலலாபீ⁴ மஹந்தலாபீ⁴, உளாருளாரானேவ லப⁴தி மஞ்ஞேதி ஸந்தா⁴ய வத³தி. அயம் கிர ப்³ராஹ்மணோ ஸயனக³ருகோ, ஸோ ப⁴க³வதோ விப்பஸன்னிந்த்³ரியாதி³தம் தி³ஸ்வா ‘‘அத்³தா⁴ ஏஸ ஏவரூபேஸு உச்சாஸயனமஹாஸயனேஸு நிஸீத³தி சேவ நிபஜ்ஜதி ச. தேனஸ்ஸ விப்பஸன்னானி இந்த்³ரியானி, பரிஸுத்³தோ⁴ ச²விவண்ணோ பரியோதா³தோ’’தி மஞ்ஞமானோ இமம் ஸேனாஸனவண்ணம் கதே²ஸி.

லத்³தா⁴ ச பன ந கப்பந்தீதி ஏத்த² கிஞ்சி கிஞ்சி கப்பதி. ஸுத்³த⁴கோஸேய்யஞ்ஹி மஞ்சேபி அத்த²ரிதும் வட்டதி, கோ³னகாத³யோ ச பூ⁴மத்த²ரணபரிபோ⁴கே³ன, ஆஸந்தி³யா பாதே³ சி²ந்தி³த்வா, பல்லங்கஸ்ஸ வாளே பி⁴ந்தி³த்வா, தூலிகம் விஜடேத்வா ‘‘பி³ம்போ³ஹனஞ்ச காது’’ந்தி (சூளவ. 297) வசனதோ இமானிபி ஏகேன விதா⁴னேன கப்பந்தி. அகப்பியம் பன உபாதா³ய ஸப்³பா³னேவ ந கப்பந்தீதி வுத்தானி.

வனந்தஞ்ஞேவ பவிஸாமீதி அரஞ்ஞம்யேவ பவிஸாமி. யதே³வாதி யானியேவ. பல்லங்கம் ஆபு⁴ஜித்வாதி ஸமந்ததோ ஊருப³த்³தா⁴ஸனம் ப³ந்தி⁴த்வா. உஜும் காயம் பணிதா⁴யாதி அட்டா²ரஸ பிட்டி²கண்டகே கோடியா கோடிம் படிபாதே³ந்தோ உஜும் காயம் ட²பேத்வா. பரிமுக²ம் ஸதிம் உபட்ட²பேத்வாதி கம்மட்டா²னாபி⁴முக²ம் ஸதிம் ட²பேத்வா, பரிக்³க³ஹிதனிய்யானம் வா கத்வாதி அத்தோ². வுத்தஞ்ஹேதம் – ‘‘பரீதி பரிக்³க³ஹட்டோ². முக²ந்தி நிய்யானட்டோ². ஸதீதி உபட்டா²னட்டோ². தேன வுச்சதி பரிமுக²ம் ஸதிம் உபட்ட²பேத்வா’’தி (படி. ம. 1.164). உபஸம்பஜ்ஜ விஹராமீதி படிலபி⁴த்வா பச்சக்க²ம் கத்வா விஹராமி. ஏவம்பூ⁴தோதி ஏவம் பட²மஜ்ஜா²னாதீ³ஸு அஞ்ஞதரஸமங்கீ³ ஹுத்வா. தி³ப்³போ³ மே ஏஸோ தஸ்மிம் ஸமயே சங்கமோ ஹோதீதி சத்தாரி ஹி ரூபஜ்ஜா²னானி ஸமாபஜ்ஜித்வா சங்கமந்தஸ்ஸ சங்கமோ தி³ப்³ப³சங்கமோ நாம ஹோதி, ஸமாபத்திதோ வுட்டா²ய சங்கமந்தஸ்ஸாபி சங்கமோ தி³ப்³ப³சங்கமோயேவ. டா²னாதீ³ஸுபி ஏஸேவ நயோ. ததா² இதரேஸு த்³வீஸு விஹாரேஸு.

ஸோ ஏவம் பஜானாமி ‘‘ராகோ³ மே பஹீனோ’’தி மஹாபோ³தி⁴பல்லங்கே அரஹத்தமக்³கே³ன பஹீனராக³மேவ த³ஸ்ஸேந்தோ ‘‘ஸோ ஏவம் பஜானாமி ராகோ³ மே பஹீனோ’’தி ஆஹ. ஸேஸபதே³ஸுபி ஏஸேவ நயோ. இமினா பன கிம் கதி²தம் ஹோதீதி? பச்சவேக்க²ணா கதி²தா, பச்சவேக்க²ணாய ப²லஸமாபத்தி கதி²தா. ப²லஸமாபத்திஞ்ஹி ஸமாபன்னஸ்ஸபி ஸமாபத்திதோ வுட்டி²தஸ்ஸாபி சங்கமாத³யோ அரியசங்கமாத³யோ ஹோந்தி. ஸேஸமேத்த² உத்தானத்த²மேவாதி.

4. ஸரப⁴ஸுத்தவண்ணனா

65. சதுத்தே² ராஜக³ஹேதி ஏவம்னாமகே நக³ரே. கி³ஜ்ஜ²கூடே பப்³ப³தேதி கி³ஜ்ஜ²ஸதி³ஸானிஸ்ஸ கூடானி, கி³ஜ்ஜா² வா தஸ்ஸ கூடேஸு வஸந்தீதி கி³ஜ்ஜ²கூடோ, தஸ்மிம் கி³ஜ்ஜ²கூடே பப்³ப³தே. ஏதேனஸ்ஸ ராஜக³ஹம் கோ³சரகா³மம் கத்வா விஹரந்தஸ்ஸ வஸனட்டா²னம் த³ஸ்ஸிதம். கி³ஜ்ஜ²கூடஸ்மிஞ்ஹி ததா²க³தம் உத்³தி³ஸ்ஸ விஹாரோ காரிதோ, கி³ஜ்ஜ²கூடவிஹாரோத்வேவஸ்ஸ நாமம். தத்தா²யம் தஸ்மிம் ஸமயே விஹரதீதி. ஸரபோ⁴ நாம பரிப்³பா³ஜகோ அசிரபக்கந்தோ ஹோதீதி ஸரபோ⁴தி ஏவம்னாமகோ பரிப்³பா³ஜகோ இமஸ்மிம் ஸாஸனே பப்³ப³ஜித்வா நசிரஸ்ஸேவ பக்கந்தோ ஹோதி, அது⁴னா விப்³ப⁴ந்தோதி அத்தோ². ஸம்மாஸம்பு³த்³தே⁴ ஹி லோகே உப்பன்னே தித்தி²யா நட்ட²லாப⁴ஸக்காரா அஹேஸும், திண்ணம் ரதனானம் மஹாலாப⁴ஸக்காரோ உப்பஜ்ஜி. யதா²ஹ –

‘‘தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். அஞ்ஞதித்தி²யா பன பரிப்³பா³ஜகா அஸக்கதா ஹோந்தி அக³ருகதா அமானிதா அபூஜிதா ந லாபி⁴னோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரான’’ந்தி (உதா³.14; ஸம்.நி.1.2.70).

தே ஏவம் பரிஹீனலாப⁴ஸக்காரா பஞ்சஸதமத்தா ஏகஸ்மிம் பரிப்³பா³ஜகாராமே ஸன்னிபதித்வா ஸம்மந்தயிம்ஸு – ‘‘போ⁴, மயம் ஸமணஸ்ஸ கோ³தமஸ்ஸ உப்பன்னகாலதோ பட்டா²ய ஹதலாப⁴ஸக்காரா ஜாதா, ஸமணஸ்ஸ கோ³தமஸ்ஸ ஸாவகானஞ்சஸ்ஸ ஏகம் அவண்ணம் உபதா⁴ரேத², அவண்ணம் பத்த²ரித்வா ஏதஸ்ஸ ஸாஸனம் க³ரஹித்வா அம்ஹாகம் லாப⁴ஸக்காரம் உப்பாதே³ஸ்ஸாமா’’தி. தே வஜ்ஜம் ஓலோகேந்தா – ‘‘தீஸு த்³வாரேஸு ஆஜீவே சாதி சதூஸுபி டா²னேஸு ஸமணஸ்ஸ கோ³தமஸ்ஸ வஜ்ஜம் பஸ்ஸிதும் ந ஸக்கா, இமானி சத்தாரி டா²னானி முஞ்சித்வா அஞ்ஞத்த² ஓலோகேதா²’’தி ஆஹம்ஸு. அத² நேஸம் அந்தரே ஏகோ ஏவமாஹ – ‘‘அஹம் அஞ்ஞம் ந பஸ்ஸாமி, இமே அன்வட்³ட⁴மாஸம் ஸன்னிபதித்வா த்³வாரவாதபானானி பிதா⁴ய ஸாமணேரானம்பி பவேஸனம் ந தே³ந்தி. ஜீவிதஸதி³ஸாபி உபட்டா²கா த³ட்டு²ம் ந லப⁴ந்தி, ஆவட்டனிமாயம் ஓஸாரேத்வா ஓஸாரேத்வா ஜனம் ஆவட்டேத்வா ஆவட்டேத்வா கா²த³ந்தி. ஸசே தம் மயம் ஆஹரிதும் ஸக்கி²ஸ்ஸாம, ஏவம் நோ லாப⁴ஸக்காரஉளாரோ ப⁴விஸ்ஸதீ’’தி. அபரோபி ஏவமேவ வத³ந்தோ உட்டா²ஸி. ஸப்³பே³ ஏகவாதா³ அஹேஸும். ததோ ஆஹம்ஸு – ‘‘யோ தம் ஆஹரிதும் ஸக்கி²ஸ்ஸதி, தம் மயம் அம்ஹாகம் ஸமயே ஜேட்ட²கம் கரிஸ்ஸாமா’’தி.

ததோ கோடிதோ பட்டா²ய ‘‘த்வம் ஸக்கி²ஸ்ஸஸி, த்வம் ஸக்கி²ஸ்ஸஸீ’’தி புச்சி²த்வா ‘‘அஹம் ந ஸக்கி²ஸ்ஸாமி, அஹம் ந ஸக்கி²ஸ்ஸாமீ’’தி ப³ஹூஹி வுத்தே ஸரப⁴ம் புச்சி²ம்ஸு – ‘‘த்வம் ஸக்கி²ஸ்ஸஸி ஆசரியா’’தி. ஸோ ஆஹ – ‘‘அக³ரு ஏதம் ஆஹரிதும், ஸசே தும்ஹே அத்தனோ கதா²ய ட²த்வா மம் ஜேட்ட²கம் கரிஸ்ஸதா²’’தி. அக³ரு ஏதமாசரிய ஆஹர, த்வம் கதோயேவாஸி அம்ஹேஹி ஜேட்ட²கோதி. ஸோ ஆஹ – ‘‘தம் ஆஹரந்தேன தே²னேத்வா வா விலும்பித்வா வா ஆஹரிதும் ந ஸக்கா, ஸமணஸ்ஸ பன கோ³தமஸ்ஸ ஸாவகஸதி³ஸேன ஹுத்வா தஸ்ஸ ஸாவகே வந்தி³த்வா வத்தபடிவத்தம் கத்வா தேஸம் பத்தே ப⁴த்தம் பு⁴ஞ்ஜித்வா ஆஹரிதும் ஸக்கா. ருச்சதி வோ ஏதஸ்ஸ ஏத்தகஸ்ஸ கிரியா’’தி. யம்கிஞ்சி கத்வா ஆஹரித்வா ச நோ தே³ஹீதி. தேன ஹி மம் தி³ஸ்வா அபஸ்ஸந்தா விய ப⁴வேய்யாதா²தி பரிப்³பா³ஜகானம் ஸஞ்ஞம் த³த்வா து³தியதி³வஸே பாதோவ உட்டா²ய கி³ஜ்ஜ²கூடமஹாவிஹாரம் க³ந்த்வா தி³ட்ட²தி³ட்டா²னம் பி⁴க்கூ²னம் பஞ்சபதிட்டி²தேன பாதே³ வந்தி³. பி⁴க்கூ² ஆஹம்ஸு – ‘‘அஞ்ஞே பரிப்³பா³ஜகா சண்டா³ ப²ருஸா, அயம் பன ஸத்³தோ⁴ ப⁴விஸ்ஸதி பஸன்னோ’’தி. ப⁴ந்தே, தும்ஹே ஞத்வா யுத்தட்டா²னஸ்மிம்யேவ பப்³ப³ஜிதா, மயம் பன அனுபதா⁴ரேத்வா அதித்தே²னேவ பக்க²ந்தா அனிய்யானிகமக்³கே³ விசராமாதி. ஸோ ஏவம் வத்வா தி³ட்டே² தி³ட்டே² பி⁴க்கூ² புனப்புனம் வந்த³தி, ந்ஹானோத³காதீ³னி படியாதே³தி, த³ந்தகட்ட²ம் கப்பியம் கரோதி, பாதே³ தோ⁴வதி மக்கே²தி, அதிரேகப⁴த்தம் லபி⁴த்வா பு⁴ஞ்ஜதி.

தம் இமினா நீஹாரேன வஸந்தம் ஏகோ மஹாதே²ரோ தி³ஸ்வா, ‘‘பரிப்³பா³ஜக, த்வம் ஸத்³தோ⁴ பஸன்னோ, கிம் ந பப்³ப³ஜஸீ’’தி. கோ மம், ப⁴ந்தே, பப்³பா³ஜேஸ்ஸதி. மயஞ்ஹி சிரகாலம் ப⁴த³ந்தானம் பச்சத்தி²கா ஹுத்வா விசரிம்ஹாதி. தே²ரோ ‘‘ஸசே த்வம் பப்³ப³ஜிதுகாமோ, அஹம் தம் பப்³பா³ஜேஸ்ஸாமீ’’தி வத்வா பப்³பா³ஜேஸி. ஸோ பப்³ப³ஜிதகாலதோ பட்டா²ய நிரந்தரம் வத்தபடிவத்தமகாஸி. அத² நம் தே²ரோ வத்தே பஸீதி³த்வா நசிரஸ்ஸேவ உபஸம்பாதே³ஸி. ஸோ உபோஸத²தி³வஸே பி⁴க்கூ²ஹி ஸத்³தி⁴ம் உபோஸத²க்³க³ம் பவிஸித்வா பி⁴க்கூ² மஹந்தேன உஸ்ஸாஹேன பாதிமோக்க²ம் பக்³க³ண்ஹந்தே தி³ஸ்வா ‘‘இமினா நீஹாரேன ஓஸாரேத்வா ஓஸாரேத்வா லோகம் கா²த³ந்தி, கதிபாஹேன ஹரிஸ்ஸாமீ’’தி சிந்தேஸி. ஸோ பரிவேணம் க³ந்த்வா உபஜ்ஜா²யம் வந்தி³த்வா, ‘‘ப⁴ந்தே, கோ நாமோ அயம் த⁴ம்மோ’’தி புச்சி². பாதிமோக்கோ² நாம, ஆவுஸோதி. உத்தமத⁴ம்மோ ஏஸ, ப⁴ந்தே, ப⁴விஸ்ஸதீதி. ஆம, ஆவுஸோ, ஸகலஸாஸனதா⁴ரணீ அயம் ஸிக்கா²தி. ப⁴ந்தே, ஸசே ஏஸ ஸிக்கா²த⁴ம்மோ உத்தமோ, இமமேவ பட²மம் க³ண்ஹாமீதி. க³ண்ஹாவுஸோதி தே²ரோ ஸம்படிச்சி². ஸோ க³ண்ஹந்தோ பரிப்³பா³ஜகே பஸ்ஸித்வா ‘‘கீதி³ஸம் ஆசரியா’’தி புச்சி²தோ, ‘‘ஆவுஸோ, மா சிந்தயித்த², கதிபாஹேன ஆஹரிஸ்ஸாமீ’’தி வத்வா நசிரஸ்ஸேவ உக்³க³ண்ஹித்வா உபஜ்ஜா²யம் ஆஹ – ‘‘ஏத்தகமேவ, ப⁴ந்தே, உதா³ஹு அஞ்ஞம்பி அத்தீ²’’தி. ஏத்தகமேவ, ஆவுஸோதி.

ஸோ புனதி³வஸே யதா²னிவத்த²பாருதோவ க³ஹிதனீஹாரேனேவ பத்தம் க³ஹேத்வா கி³ஜ்ஜ²கூடா நிக்க²ம்ம பரிப்³பா³ஜகாராமம் அக³மாஸி. பரிப்³பா³ஜகா தி³ஸ்வா ‘‘கீதி³ஸம், ஆசரிய, நாஸக்கி²த்த² மஞ்ஞே ஆவட்டனிமாயம் ஆஹரிது’’ந்தி தம் பரிவாரயிம்ஸு. மா சிந்தயித்த², ஆவுஸோ, ஆஹடா மே ஆவட்டனிமாயா, இதோ பட்டா²ய அம்ஹாகம் லாப⁴ஸக்காரோ மஹா ப⁴விஸ்ஸதி. தும்ஹே அஞ்ஞமஞ்ஞம் ஸமக்³கா³ ஹோத², மா விவாத³ம் அகத்தா²தி. ஸசே தே, ஆசரிய, ஸுக்³க³ஹிதா, அம்ஹேபி நம் வாசேஹீதி. ஸோ ஆதி³தோ பட்டா²ய பாதிமோக்க²ம் ஓஸாரேஸி. அத² தே ஸப்³பே³பி – ‘‘ஏத², போ⁴, நக³ரே விசரந்தா ஸமணஸ்ஸ கோ³தமஸ்ஸ அவண்ணம் கதே²ஸ்ஸாமா’’தி அனுக்³கா⁴டிதேஸுயேவ நக³ரத்³வாரேஸு த்³வாரஸமீபம் க³ந்த்வா விவடேன த்³வாரேன ஸப்³ப³பட²மம் பவிஸிம்ஸு. ஏவம் ஸலிங்கே³னேவ அபக்கந்தம் தம் பரிப்³பா³ஜகம் ஸந்தா⁴ய – ‘‘ஸரபோ⁴ நாம பரிப்³பா³ஜகோ அசிரபக்கந்தோ ஹோதீ’’தி வுத்தம்.

தம் தி³வஸம் பன ப⁴க³வா பச்சூஸஸமயே லோகம் ஓலோகேந்தோ இத³ம் அத்³த³ஸ – ‘‘அஜ்ஜ ஸரபோ⁴ பரிப்³பா³ஜகோ நக³ரே விசரித்வா பகாஸனீயகம்மம் கரிஸ்ஸதி, திண்ணம் ரதனானம் அவண்ணம் கதே²ந்தோ விஸம் ஸிஞ்சித்வா பரிப்³பா³ஜகாராமம் க³மிஸ்ஸதி, அஹம்பி தத்தே²வ க³மிஸ்ஸாமி, சதஸ்ஸோபி பரிஸா தத்தே²வ ஓஸரிஸ்ஸந்தி. தஸ்மிம் ஸமாக³மே சதுராஸீதி பாணஸஹஸ்ஸானி அமதபானம் பிவிஸ்ஸந்தீ’’தி. ததோ ‘‘தஸ்ஸ ஓகாஸோ ஹோது, யதா²ருசியா அவண்ணம் பத்த²ரதூ’’தி சிந்தேத்வா ஆனந்த³த்தே²ரம் ஆமந்தேஸி – ‘‘ஆனந்த³, அட்டா²ரஸஸு மஹாவிஹாரேஸு பி⁴க்கு²ஸங்க⁴ஸ்ஸ மயா ஸத்³தி⁴ம்யேவ பிண்டா³ய சரிதும் ஆரோசேஹீ’’தி. தே²ரோ ததா² அகாஸி. பி⁴க்கூ² பத்தசீவரமாதா³ய ஸத்தா²ரமேவ பரிவாரயிம்ஸு. ஸத்தா² பி⁴க்கு²ஸங்க⁴ம் ஆதா³ய த்³வாரகா³மஸமீபேயேவ பிண்டா³ய சரி. ஸரபோ⁴பி பரிப்³பா³ஜகேஹி ஸத்³தி⁴ம் நக³ரம் பவிட்டோ² தத்த² தத்த² பரிஸமஜ்ஜே² ராஜத்³வாரவீதி²சதுக்காதீ³ஸு ச க³ந்த்வா ‘‘அஞ்ஞாதோ மயா ஸமணானம் ஸக்யபுத்தியானம் த⁴ம்மோ’’திஆதீ³னி அபா⁴ஸி. தம் ஸந்தா⁴ய ஸோ ராஜக³ஹே பரிஸதி ஏவம் வாசம் பா⁴ஸதீதிஆதி³ வுத்தம். தத்த² அஞ்ஞாதோதி ஞாதோ அவபு³த்³தோ⁴, பாகடம் கத்வா உக்³க³ஹிதோதி தீ³பேதி. அஞ்ஞாயாதி ஜானித்வா. அபக்கந்தோதி ஸலிங்கே³னேவ அபக்கந்தோ. ஸசே ஹி ஸமணஸ்ஸ கோ³தமஸ்ஸ ஸாஸனே கோசி ஸாரோ அப⁴விஸ்ஸ, நாஹம் அபக்கமிஸ்ஸம். தஸ்ஸ பன ஸாஸனம் அஸாரம் நிஸ்ஸாரம், ஆவட்டனிமாயம் ஓஸாரேத்வா ஸமணா லோகம் கா²த³ந்தீதி ஏவமத்த²ம் தீ³பேந்தோ ஏவமாஹ.

அத² கோ² ஸம்ப³ஹுலா பி⁴க்கூ²தி அத² ஏவம் தஸ்மிம் பரிப்³பா³ஜகே பா⁴ஸமானே அரஞ்ஞவாஸினோ பஞ்சஸதா பி⁴க்கூ² ‘‘அஸுகட்டா²னம் நாம ஸத்தா² பிண்டா³ய சரிதும் க³தோ’’தி அஜானந்தா பி⁴க்கா²சாரவேலாயம் ராஜக³ஹம் பிண்டா³ய பவிஸிம்ஸு. தே ஸந்தா⁴யேதம் வுத்தம். அஸ்ஸோஸுந்தி ஸுணிம்ஸு. யேன ப⁴க³வா தேனுபஸங்கமிம்ஸூதி ‘‘இமம் காரணம் த³ஸப³லஸ்ஸ ஆரோசேஸ்ஸாமா’’தி உபஸங்கமிம்ஸு.

ஸிப்பினிகாதீரந்தி ஸிப்பினிகாதி ஏவம்னாமிகாய நதி³யா தீரம். அதி⁴வாஸேஸி ப⁴க³வா துண்ஹீபா⁴வேனாதி காயங்க³வாசங்கா³னி அசோபேத்வா அப்³ப⁴ந்தரே க²ந்திம் தா⁴ரேத்வா சித்தேனேவ அதி⁴வாஸேஸீதி அத்தோ². ஏவம் அதி⁴வாஸேத்வா புன சிந்தேஸி – ‘‘கிம் நு கோ² அஜ்ஜ மயா ஸரப⁴ஸ்ஸ வாத³ம் மத்³தி³தும் க³ச்ச²ந்தேன ஏககேன க³ந்தப்³ப³ம், உதா³ஹு பி⁴க்கு²ஸங்க⁴பரிவுதேனா’’தி. அத²ஸ்ஸ ஏதத³ஹோஸி – ஸசாஹம் பி⁴க்கு²ஸங்க⁴பரிவுதோ க³மிஸ்ஸாமி, மஹாஜனோ ஏவம் சிந்தேஸ்ஸதி – ‘‘ஸமணோ கோ³தமோ வாது³ப்பத்திட்டா²னம் க³ச்ச²ந்தோ பக்க²ம் உக்கி²பித்வா க³ந்த்வா பரிஸப³லேன உப்பன்னம் வாத³ம் மத்³த³தி, பரவாதீ³னம் ஸீஸம் உக்கி²பிதும் ந தே³தீ’’தி. ந கோ² பன மய்ஹம் உப்பன்னே வாதே³ பரம் க³ஹேத்வா மத்³த³னகிச்சம் அத்தி², அஹமேவ க³ந்த்வா மத்³தி³ஸ்ஸாமி. அனச்ச²ரியம் சேதம் ய்வாஹம் இதா³னி பு³த்³த⁴பூ⁴தோ அத்தனோ உப்பன்னம் வாத³ம் மத்³தே³ய்யம், சரியம் சரணகாலே அஹேதுகபடிஸந்தி⁴யம் நிப்³ப³த்தேனாபி ஹி மயா வஹிதப்³ப³ம் து⁴ரம் அஞ்ஞோ வஹிதும் ஸமத்தோ² நாம நாஹோஸி. இமஸ்ஸ பனத்த²ஸ்ஸ ஸாத⁴னத்த²ம் –

‘‘யதோ யதோ க³ரு து⁴ரம், யதோ க³ம்பீ⁴ரவத்தனீ;

ததா³ஸ்ஸு கண்ஹம் யுஞ்ஜேந்தி, ஸ்வாஸ்ஸு தம் வஹதே து⁴ர’’ந்தி. (ஜா. 1.1.29) –

இத³ம் கண்ஹஜாதகம் ஆஹரிதப்³ப³ம். அதீதே கிர ஏகோ ஸத்த²வாஹோ ஏகிஸ்ஸா மஹல்லிகாய கே³ஹே நிவாஸம் க³ண்ஹி. அத²ஸ்ஸ ஏகிஸ்ஸா தே⁴னுயா ரத்திபா⁴க³ஸமனந்தரே க³ப்³ப⁴வுட்டா²னம் அஹோஸி. ஸா ஏகம் வச்ச²கம் விஜாயி. மஹல்லிகாய வச்ச²கம் தி³ட்ட²காலதோ பட்டா²ய புத்தஸினேஹோ உத³பாதி³. புனதி³வஸே ஸத்த²வாஹபுத்தோ – ‘‘தவ கே³ஹவேதனம் க³ண்ஹாஹீ’’தி ஆஹ. மஹல்லிகா ‘‘மய்ஹம் அஞ்ஞேன கிச்சம் ந அத்தி², இமமேவ வச்ச²கம் தே³ஹீ’’தி ஆஹ. க³ண்ஹ, அம்மாதி. ஸா தம் க³ண்ஹித்வா கீ²ரம் பாயேத்வா யாகு³ப⁴த்ததிணாதீ³னி த³த³மானா போஸேஸி. ஸோ வுத்³தி⁴மன்வாய பரிபுண்ணரூபோ ப³லவீரியஸம்பன்னோ அஹோஸி ஸம்பன்னாசாரோ, காளகோ நாம நாமேன. அதே²கஸ்ஸ ஸத்த²வாஹஸ்ஸ பஞ்சஹி ஸகடஸதேஹி ஆக³ச்ச²ந்தஸ்ஸ உத³கபி⁴ன்னட்டா²னே ஸகடசக்கம் லக்³கி³. ஸோ த³ஸபி வீஸம்பி திம்ஸம்பி யோஜேத்வா நீஹராபேதும் அஸக்கோந்தோ காளகம் உபஸங்கமித்வா ஆஹ – ‘‘தாத, தவ வேதனம் த³ஸ்ஸாமி, ஸகடம் மே உக்கி²பித்வா தே³ஹீ’’தி. ஏவஞ்ச பன வத்வா தம் ஆதா³ய – ‘‘அஞ்ஞோ இமினா ஸத்³தி⁴ம் து⁴ரம் வஹிதும் ஸமத்தோ² நத்தீ²’’தி து⁴ரஸகடே யோத்தம் ப³ந்தி⁴த்வா தம் ஏககம்யேவ யோஜேஸி. ஸோ தம் ஸகடம் உக்கி²பித்வா த²லே பதிட்டா²பேத்வா ஏதேனேவ நிஹாரேன பஞ்ச ஸகடஸதானி நீஹரி. ஸோ ஸப்³ப³பச்சி²மஸகடம் நீஹரித்வா மோசியமானோ ‘‘ஸு’’ந்தி கத்வா ஸீஸம் உக்கி²பி.

ஸத்த²வாஹோ ‘‘அயம் ஏத்தகானி ஸகடானி உக்கி²பந்தோ ஏவம் ந அகாஸி, வேதனத்த²ம் மஞ்ஞே கரோதீ’’தி ஸகடக³ணனாய கஹாபணே க³ஹேத்வா பஞ்சஸதப⁴ண்டி³கம் தஸ்ஸ கீ³வாய ப³ந்தா⁴பேஸி. ஸோ அஞ்ஞேஸம் அத்தனோ ஸந்திகம் அல்லீயிதும் அதே³ந்தோ உஜுகம் கே³ஹமேவ அக³மாஸி. மஹல்லிகா தி³ஸ்வா மோசேத்வா கஹாபணபா⁴வம் ஞத்வா ‘‘கஸ்மா, புத்த, ஏவமகாஸி, மா த்வம் ‘மயா கம்மம் கத்வா ஆப⁴தேன அயம் ஜீவிஸ்ஸதீ’தி ஸஞ்ஞமகாஸீ’’தி வத்வா கோ³ணம் உண்ஹோத³கேன ந்ஹாபேத்வா தேலேன அப்³ப⁴ஞ்ஜித்வா ‘‘இதோ பட்டா²ய புன மா ஏவமகாஸீ’’தி ஓவதி³. ஏவம் ஸத்தா² ‘‘சரியம் சரணகாலே அஹேதுகபடிஸந்தி⁴யம் நிப்³ப³த்தேனாபி ஹி மயா வஹிதப்³ப³து⁴ரம் அஞ்ஞோ வஹிதும் ஸமத்தோ² நாம நாஹோஸீ’’தி சிந்தேத்வா ஏககோவ அக³மாஸி. தம் த³ஸ்ஸேதும் அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோதிஆதி³ வுத்தம்.

தத்த² படிஸல்லானாதி புது²த்தாரம்மணேஹி சித்தம் படிஸம்ஹரித்வா ஸல்லானதோ, ப²லஸமாபத்திதோதி அத்தோ². தேனுபஸங்கமீதி பரிப்³பா³ஜகேஸு ஸகலனக³ரே பகாஸனீயகம்மம் கத்வா நக³ரா நிக்க²ம்ம பரிப்³பா³ஜகாராமே ஸன்னிபதித்வா ‘‘ஸசே, ஆவுஸோ ஸரப⁴, ஸமணோ கோ³தமோ ஆக³மிஸ்ஸதி, கிம் கரிஸ்ஸஸீ’’தி. ஸமணே கோ³தமே ஏகம் கரோந்தே அஹம் த்³வே கரிஸ்ஸாமி, த்³வே கரோந்தே சத்தாரி, சத்தாரி கரோந்தே பஞ்ச, பஞ்ச கரோந்தே த³ஸ, த³ஸ கரோந்தே வீஸதி, வீஸதி கரோந்தே திம்ஸம், திம்ஸம் கரோந்தே சத்தாலீஸம், சத்தாலீஸம் கரோந்தே பஞ்ஞாஸம், பஞ்ஞாஸம் கரோந்தே ஸதம், ஸதம் கரோந்தே ஸஹஸ்ஸம் கரிஸ்ஸாமீதி ஏவம் அஞ்ஞமஞ்ஞம் ஸீஹனாத³கத²ம் ஸமுட்டா²பேத்வா நிஸின்னேஸு உபஸங்கமி.

உபஸங்கமந்தோ பன யஸ்மா பரிப்³பா³ஜகாராமஸ்ஸ நக³ரமஜ்ஜே²னேவ மக்³கோ³, தஸ்மா ஸுரத்தது³பட்டம் நிவாஸேத்வா ஸுக³தமஹாசீவரம் பாருபித்வா விஸ்ஸட்ட²ப³லோ ராஜா விய ஏககோவ நக³ரமஜ்ஜே²ன அக³மாஸி. மிச்சா²தி³ட்டி²கா தி³ஸ்வா ‘‘பரிப்³பா³ஜகா ஸமணஸ்ஸ கோ³தமஸ்ஸ பகாஸனீயகம்மம் கரோந்தா அவண்ணம் பத்த²ரிம்ஸு, ஸோ ஏதே அனுவத்தித்வா ஸஞ்ஞாபேதும் க³ச்ச²தி மஞ்ஞே’’தி அனுப³ந்தி⁴ம்ஸு. ஸம்மாதி³ட்டி²காபி ‘‘ஸம்மாஸம்பு³த்³தோ⁴ பத்தசீவரம் ஆதா³ய ஏககோவ நிக்க²ந்தோ, அஜ்ஜ ஸரபே⁴ன ஸத்³தி⁴ம் மஹாத⁴ம்மஸங்கா³மோ ப⁴விஸ்ஸதி. மயம்பி தஸ்மிம் ஸமாக³மே காயஸக்கி²னோ ப⁴விஸ்ஸாமா’’தி அனுப³ந்தி⁴ம்ஸு. ஸத்தா² பஸ்ஸந்தஸ்ஸேவ மஹாஜனஸ்ஸ பரிப்³பா³ஜகாராமம் உபஸங்கமி.

பரிப்³பா³ஜகா ருக்கா²னம் க²ந்த⁴விடபஸாக²ந்தரேஹி ஸமுக்³க³ச்ச²ந்தா ச²ப்³ப³ண்ணக⁴னபு³த்³த⁴ரஸ்மியோ தி³ஸ்வா ‘‘அஞ்ஞதா³ ஏவரூபோ ஓபா⁴ஸோ நாம நத்தி², கிம் நு கோ² ஏத’’ந்தி உல்லோகேத்வா ‘‘ஸமணோ கோ³தமோ ஆக³ச்ச²தீ’’தி ஆஹம்ஸு. தம் ஸுத்வாவ ஸரபோ⁴ ஜாணுகந்தரே ஸீஸம் ட²பேத்வா அதோ⁴முகோ² நிஸீதி³. ஏவம் தஸ்மிம் ஸமயே ப⁴க³வா தம் ஆராமம் உபஸங்கமித்வா பஞ்ஞத்தே ஆஸனே நிஸீதி³. ததா²க³தோ ஹி ஜம்பு³தீ³பதலே அக்³க³குலே ஜாதத்தா அக்³கா³ஸனாரஹோதிஸ்ஸ ஸப்³ப³த்த² ஆஸனம் பஞ்ஞத்தமேவ ஹோதி. ஏவம் பஞ்ஞத்தே மஹாரஹே பு³த்³தா⁴ஸனே நிஸீதி³.

தே பரிப்³பா³ஜகா ஸரப⁴ம் பரிப்³பா³ஜகம் ஏதத³வோசுந்தி ஸம்மாஸம்பு³த்³தே⁴ கிர ஸரபே⁴ன ஸத்³தி⁴ம் ஏத்தகம் கதே²ந்தேயேவ பி⁴க்கு²ஸங்கோ⁴ ஸத்து² பதா³னுபதி³கோ ஹுத்வா பரிப்³பா³ஜகாராமம் ஸம்பாபுணி, சதஸ்ஸோபி பரிஸா பரிப்³பா³ஜகாராமேயேவ ஓஸரிம்ஸு. ததோ தே பரிப்³பா³ஜகா ‘‘அச்ச²ரியம் ஸமணஸ்ஸ கோ³தமஸ்ஸ கம்மம், ஸகலனக³ரம் விசரித்வா அவண்ணம் பத்த²ரித்வா பகாஸனீயகம்மம் கத்வா ஆக³தானம் வேரீனம் படிஸத்தூனம் பச்சாமித்தானம் ஸந்திகம் ஆக³ந்த்வா தோ²கம்பி விக்³கா³ஹிககத²ம் ந கதே²ஸி, ஆக³தகாலதோ பட்டா²ய ஸதபாகதேலேன மக்கே²ந்தோ விய அமதபானம் பாயேந்தோ விய மது⁴ரகத²ம் கதே²தீ’’தி ஸப்³பே³பி ஸம்மாஸம்பு³த்³த⁴ம் அனுவத்தந்தா ஏதத³வோசும்.

யாசேய்யாஸீதி ஆயாசேய்யாஸி பத்தே²ய்யாஸி பிஹேய்யாஸி. துண்ஹீபூ⁴தோதி துண்ஹீபா⁴வம் உபக³தோ. மங்குபூ⁴தோதி நித்தேஜதம் ஆபன்னோ. பத்தக்க²ந்தோ⁴தி ஓனதகீ³வோ. அதோ⁴முகோ²தி ஹேட்டா²முகோ². ஸம்மாஸம்பு³த்³த⁴ஸ்ஸ தே படிஜானதோதி ‘‘அஹம் ஸம்மாஸம்பு³த்³தோ⁴, ஸப்³பே³ த⁴ம்மா மயா அபி⁴ஸம்பு³த்³தா⁴’’தி ஏவம் படிஜானதோ தவ. அனபி⁴ஸம்பு³த்³தா⁴தி இமே நாம த⁴ம்மா தயா அனபி⁴ஸம்பு³த்³தா⁴. தத்தா²தி தேஸு அனபி⁴ஸம்பு³த்³தா⁴தி ஏவம் த³ஸ்ஸிதத⁴ம்மேஸு. அஞ்ஞேன வா அஞ்ஞம் படிசரிஸ்ஸதீதி அஞ்ஞேன வா வசனேன அஞ்ஞம் வசனம் படிச்சா²தே³ஸ்ஸதி, அஞ்ஞம் புச்சி²தோ அஞ்ஞம் கதே²ஸ்ஸதீதி அதி⁴ப்பாயோ. ப³ஹித்³தா⁴ கத²ம் அபனாமேஸ்ஸதீதி ப³ஹித்³தா⁴ அஞ்ஞம் ஆக³ந்துககத²ம் ஆஹரந்தோ புரிமகத²ம் அபனாமேஸ்ஸதி. அப்பச்சயந்தி அனபி⁴ரத்³தி⁴ம் அதுட்டா²காரம் பாதுகரிஸ்ஸதீதி பாகடம் கரிஸ்ஸதி. ஏத்த² ச அப்பச்சயேன தோ³மனஸ்ஸம் வுத்தம், புரிமேஹி த்³வீஹி மந்த³ப³லவபே⁴தோ³ கோதோ⁴யேவ.

ஏவம் ப⁴க³வா பட²மவேஸாரஜ்ஜேன ஸீஹனாத³ம் நதி³த்வா புன து³தியாதீ³ஹி நத³ந்தோ யோ கோ² மம் பரிப்³பா³ஜகாதிஆதி³மாஹ. தத்த² யஸ்ஸ கோ² பன தே அத்தா²ய த⁴ம்மோ தே³ஸிதோதி யஸ்ஸ மக்³க³ஸ்ஸ வா ப²லஸ்ஸ வா அத்தா²ய தயா சதுஸச்சத⁴ம்மோ தே³ஸிதோ. ஸோ ந நிய்யாதீதி ஸோ த⁴ம்மோ ந நிய்யாதி ந நிக்³க³ச்ச²தி, ந தம் அத்த²ம் ஸாதே⁴தீதி வுத்தம் ஹோதி. தக்கரஸ்ஸாதி யோ நம் கரோதி, தஸ்ஸ படிபத்திபூரகஸ்ஸ புக்³க³லஸ்ஸாதி அத்தோ². ஸம்மா து³க்க²க்க²யாயாதி ஹேதுனா நயேன காரணேன ஸகலஸ்ஸ வட்டது³க்க²ஸ்ஸ க²யாய. அத² வா யஸ்ஸ கோ² பன தே அத்தா²ய த⁴ம்மோ தே³ஸிதோதி யஸ்ஸ தே அத்தா²ய த⁴ம்மோ தே³ஸிதோ. ஸேய்யதி²த³ம் – ராக³படிகா⁴தத்தா²ய அஸுப⁴கம்மட்டா²னம், தோ³ஸபடிகா⁴தத்தா²ய மேத்தாபா⁴வனா, மோஹபடிகா⁴தத்தா²ய பஞ்ச த⁴ம்மா, விதக்குபச்சே²தா³ய ஆனாபானஸ்ஸதி. ஸோ ந நிய்யாதி தக்கரஸ்ஸ ஸம்மா து³க்க²க்க²யாயாதி ஸோ த⁴ம்மோ யோ நம் யதா²தே³ஸிதம் கரோதி, தஸ்ஸ தக்கரஸ்ஸ ஸம்மா ஹேதுனா நயேன காரணேன வட்டது³க்க²க்க²யாய ந நிய்யாதி ந நிக்³க³ச்ச²தி, தம் அத்த²ம் ந ஸாதே⁴தீதி அயமேத்த² அத்தோ². ஸேய்யதா²பி ஸரபோ⁴ பரிப்³பா³ஜகோதி யதா² அயம் ஸரபோ⁴ பரிப்³பா³ஜகோ பஜ்ஜா²யந்தோ அப்படிபா⁴னோ நிஸின்னோ, ஏவம் நிஸீதி³ஸ்ஸதீதி.

ஏவம் தீஹி பதே³ஹி ஸீஹனாத³ம் நதி³த்வா தே³ஸனம் நிவத்தேந்தஸ்ஸேவ ததா²க³தஸ்ஸ தஸ்மிம் டா²னே ஸன்னிபதிதா சதுராஸீதிபாணஸஹஸ்ஸபரிமாணா பரிஸா அமதபானம் பிவி, ஸத்தா² பரிஸாய அமதபானஸ்ஸ பீதபா⁴வம் ஞத்வா வேஹாஸம் அப்³பு⁴க்³க³ந்த்வா பக்காமி. தமத்த²ம் த³ஸ்ஸேதும் அத² கோ² ப⁴க³வாதிஆதி³ வுத்தம். தத்த² ஸீஹனாத³ந்தி ஸேட்ட²னாத³ம் அபீ⁴தனாத³ம் அப்படினாத³ம். வேஹாஸம் பக்காமீதி அபி⁴ஞ்ஞாபாத³கம் சதுத்த²ஜ்ஜா²னம் ஸமாபஜ்ஜித்வா வுட்டா²ய அதி⁴ட்டா²ய ஸத்³தி⁴ம் பி⁴க்கு²ஸங்கே⁴ன ஆகாஸம் பக்க²ந்தி³. ஏவம் பக்க²ந்தோ³ ச பன தம்க²ணஞ்ஞேவ கி³ஜ்ஜ²கூடமஹாவிஹாரே பதிட்டா²ஸி.

வாசாய ஸன்னிதோத³கேனாதி வசனபதோதே³ன. ஸஞ்ஜம்ப⁴ரிமகம்ஸூதி ஸம்ப⁴ரிதம் நிரந்தரபு²டம் அகம்ஸு, உபரி விஜ்ஜி²ம்ஸூதி வுத்தம் ஹோதி. ப்³ரஹாரஞ்ஞேதி மஹாரஞ்ஞே. ஸீஹனாத³ம் நதி³ஸ்ஸாமீதி ஸீஹஸ்ஸ நத³தோ ஆகாரம் தி³ஸ்வா ‘‘அயம்பி திரச்சா²னக³தோ, அஹம்பி, இமஸ்ஸ சத்தாரோ பாதா³, மய்ஹம்பி, அஹம்பி ஏவமேவ ஸீஹனாத³ம் நதி³ஸ்ஸாமீ’’தி சிந்தேஸி. ஸோ ஸீஹஸ்ஸ ஸம்முகா² நதி³தும் அஸக்கோந்தோ தஸ்மிம் கோ³சராய பக்கந்தே ஏககோ நதி³தும் ஆரபி⁴. அத²ஸ்ஸ ஸிங்கா³லஸத்³தோ³யேவ நிச்ச²ரி. தேன வுத்தம் – ஸிங்கா³லகம்யேவ நத³தீதி. பே⁴ரண்ட³கந்தி தஸ்ஸேவ வேவசனம். அபிச பி⁴ன்னஸ்ஸரம் அமனாபஸத்³த³ம் நத³தீதி வுத்தம் ஹோதி. ஏவமேவ கோ² த்வந்தி இமினா ஓபம்மேன பரிப்³பா³ஜகா ததா²க³தம் ஸீஹஸதி³ஸம் கத்வா ஸரப⁴ம் ஸிங்கா³லஸதி³ஸம் அகம்ஸு. அம்பு³கஸஞ்சரீதி கு²த்³த³ககுக்குடிகா. புரிஸகரவிதம் ரவிஸ்ஸாமீதி மஹாகுக்குடம் ரவந்தம் தி³ஸ்வா ‘‘இமஸ்ஸபி த்³வே பாதா³ த்³வே பக்கா², மய்ஹம்பி ததே²வ, அஹம்பி ஏவரூபம் ரவிதம் ரவிஸ்ஸாமீ’’தி ஸா தஸ்ஸ ஸம்முகா² ரவிதும் அஸக்கோந்தீ தஸ்மிம் பக்கந்தே ரவமானா குக்குடிகாரவம்யேவ ரவி. தேன வுத்தம் – அம்பு³கஸஞ்சரிரவிதம்யேவ ரவதீதி. உஸபோ⁴தி கோ³ணோ. ஸுஞ்ஞாயாதி துச்சா²ய ஜேட்ட²கவஸபே⁴ஹி விரஹிதாய. க³ம்பீ⁴ரம் நதி³தப்³ப³ம் மஞ்ஞதீதி ஜேட்ட²கவஸப⁴ஸ்ஸ நாத³ஸதி³ஸம் க³ம்பீ⁴ரனாத³ம் நதி³தப்³ப³ம் மஞ்ஞதி. ஸேஸம் ஸப்³ப³த்த² உத்தானத்த²மேவாதி.

5. கேஸமுத்திஸுத்தவண்ணனா

66. பஞ்சமே காலாமானம் நிக³மோதி காலாமா நாம க²த்தியா, தேஸம் நிக³மோ. கேஸமுத்தியாதி கேஸமுத்தனிக³மவாஸினோ. உபஸங்கமிம்ஸூதி ஸப்பினவனீதாதி³பே⁴ஸஜ்ஜானி சேவ அட்ட²வித⁴பானகானி ச கா³ஹாபேத்வா உபஸங்கமிம்ஸு. ஸகம்யேவ வாத³ம் தீ³பேந்தீதி அத்தனோயேவ லத்³தி⁴ம் கதே²ந்தி. ஜோதேந்தீதி பகாஸேந்தி. கு²ம்ஸேந்தீதி க⁴ட்டேந்தி. வம்பே⁴ந்தீதி அவஜானந்தி. பரிப⁴வந்தீதி லாமகம் கரோந்தி. ஓமக்கி²ம் கரோந்தீதி உக்கி²த்தகம் கரோந்தி, உக்கி²பித்வா ச²ட்³டே³ந்தி. அபரேபி, ப⁴ந்தேதி ஸோ கிர அடவிமுகே² கா³மோ, தஸ்மா தத்த² அடவிம் அதிக்கந்தா ச அதிக்கமிதுகாமா ச வாஸம் கப்பேந்தி. தேஸுபி பட²மம் ஆக³தா அத்தனோ லத்³தி⁴ம் தீ³பேத்வா பக்கமிம்ஸு, பச்சா² ஆக³தா ‘‘கிம் தே ஜானந்தி, அம்ஹாகம் அந்தேவாஸிகா தே, அம்ஹாகம் ஸந்திகே கிஞ்சி கிஞ்சி ஸிப்பம் உக்³க³ண்ஹிம்ஸூ’’தி அத்தனோ லத்³தி⁴ம் தீ³பேத்வா பக்கமிம்ஸு. காலாமா ஏகலத்³தி⁴யம்பி ஸண்ட²ஹிதும் ந ஸக்கி²ம்ஸு. தே ஏதமத்த²ம் தீ³பேத்வா ப⁴க³வதோ ஏவமாரோசேத்வா தேஸம் நோ, ப⁴ந்தேதிஆதி³மாஹம்ஸு. தத்த² ஹோதேவ கங்கா²தி ஹோதியேவ கங்கா². விசிகிச்சா²தி தஸ்ஸேவ வேவசனம். அலந்தி யுத்தம்.

மா அனுஸ்ஸவேனாதி அனுஸ்ஸவகதா²யபி மா க³ண்ஹித்த². மா பரம்பராயாதி பரம்பரகதா²யபி மா க³ண்ஹித்த². மா இதிகிராயாதி ஏவம் கிர ஏதந்தி மா க³ண்ஹித்த². மா பிடகஸம்பதா³னேனாதி அம்ஹாகம் பிடகதந்தியா ஸத்³தி⁴ம் ஸமேதீதி மா க³ண்ஹித்த². மா தக்கஹேதூதி தக்கக்³கா³ஹேனபி மா க³ண்ஹித்த². மா நயஹேதூதி நயக்³கா³ஹேனபி மா க³ண்ஹித்த². மா ஆகாரபரிவிதக்கேனாதி ஸுந்த³ரமித³ம் காரணந்தி ஏவம் காரணபரிவிதக்கேனபி மா க³ண்ஹித்த². மா தி³ட்டி²னிஜ்ஜா²னக்க²ந்தியாதி அம்ஹாகம் நிஜ்ஜா²யித்வா க²மித்வா க³ஹிததி³ட்டி²யா ஸத்³தி⁴ம் ஸமேதீதிபி மா க³ண்ஹித்த². மா ப⁴ப்³ப³ரூபதாயாதி அயம் பி⁴க்கு² ப⁴ப்³ப³ரூபோ, இமஸ்ஸ கத²ம் க³ஹேதும் யுத்தந்திபி மா க³ண்ஹித்த². மா ஸமணோ நோ க³ரூதி அயம் ஸமணோ அம்ஹாகம் க³ரு, இமஸ்ஸ கத²ம் க³ஹேதும் யுத்தந்திபி மா க³ண்ஹித்த². ஸமத்தாதி பரிபுண்ணா. ஸமாதி³ன்னாதி க³ஹிதா பராமட்டா². யம்ஸ ஹோதீதி யம் காரணம் தஸ்ஸ புக்³க³லஸ்ஸ ஹோதி. அலோபா⁴த³யோ லோபா⁴தி³படிபக்க²வஸேன வேதி³தப்³பா³. விக³தாபி⁴ஜ்ஜோ²திஆதீ³ஹி மேத்தாய புப்³ப³பா⁴கோ³ கதி²தோ.

இதா³னி மேத்தாதி³கம் கம்மட்டா²னம் கதே²ந்தோ மேத்தாஸஹக³தேனாதிஆதி³மாஹ. தத்த² கம்மட்டா²னகதா²ய வா பா⁴வனானயே வா பாளிவண்ணனாய வா யம் வத்தப்³ப³ம் ஸியா, தம் ஸப்³ப³ம் விஸுத்³தி⁴மக்³கே³ (விஸுத்³தி⁴. 1.240) வுத்தமேவ. ஏவம் அவேரசித்தோதி ஏவம் அகுஸலவேரஸ்ஸ ச புக்³க³லவேரினோ ச நத்தி²தாய அவேரசித்தோ. அப்³யாப³ஜ்ஜ²சித்தோதி கோத⁴சித்தஸ்ஸ அபா⁴வேன நித்³து³க்க²சித்தோ. அஸம்கிலிட்ட²சித்தோதி கிலேஸஸ்ஸ நத்தி²தாய அஸம்கிலிட்ட²சித்தோ. விஸுத்³த⁴சித்தோதி கிலேஸமலாபா⁴வேன விஸுத்³த⁴சித்தோ ஹோதீதி அத்தோ². தஸ்ஸாதி தஸ்ஸ ஏவரூபஸ்ஸ அரியஸாவகஸ்ஸ. அஸ்ஸாஸாதி அவஸ்ஸயா பதிட்டா². ஸசே கோ² பன அத்தி² பரோ லோகோதி யதி³ இமம்ஹா லோகா பரலோகோ நாம அத்தி². அதா²ஹம் காயஸ்ஸ பே⁴தா³ பரம்மரணா…பே… உபபஜ்ஜிஸ்ஸாமீதி அத்தே²தம் காரணம், யேனாஹம் காயஸ்ஸ பே⁴தா³ பரம்மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீதி ஏவம் ஸப்³ப³த்த² நயோ வேதி³தப்³போ³. அனீக⁴ந்தி நித்³து³க்க²ம். ஸுகி²ந்தி ஸுகி²தம். உப⁴யேனேவ விஸுத்³த⁴ம் அத்தானம் ஸமனுபஸ்ஸாமீதி யஞ்ச பாபம் ந கரோமி, யஞ்ச கரோதோபி ந கரீயதி, இமினா உப⁴யேனாபி விஸுத்³த⁴ம் அத்தானம் ஸமனுபஸ்ஸாமி. ஸேஸம் ஸப்³ப³த்த² உத்தானத்த²மேவாதி.

6. ஸாள்ஹஸுத்தவண்ணனா

67. ச²ட்டே² மிகா³ரனத்தாதி மிகா³ரஸேட்டி²னோ நத்தா. ஸேகு²னியனத்தாதி ஸேகு²னியஸேட்டி²னோ நத்தா. உபஸங்கமிம்ஸூதி பு⁴த்தபாதராஸா தா³ஸகம்மகரபரிவுதா உபஸங்கமிம்ஸு. தேஸம் கிர புரேப⁴த்தே புப்³ப³ண்ஹஸமயேயேவ கே³ஹே ஏகோ பஞ்ஹோ ஸமுட்டி²தோ, தம் பன கதே²தும் ஓகாஸோ நாஹோஸி. தே ‘‘தம் பஞ்ஹம் ஸோஸ்ஸாமா’’தி தே²ரஸ்ஸ ஸந்திகம் க³ந்த்வா வந்தி³த்வா துண்ஹீ நிஸீதி³ம்ஸு. தே²ரோ ‘‘கா³மே தம் ஸமுட்டி²தம் பஞ்ஹம் ஸோதும் ஆக³தா ப⁴விஸ்ஸந்தீ’’தி தேஸம் மனம் ஞத்வா தமேவ பஞ்ஹம் ஆரப⁴ந்தோ ஏத² தும்ஹே ஸாள்ஹாதிஆதி³மாஹ. தத்த² அத்தி² லோபோ⁴தி லுப்³ப⁴னஸபா⁴வோ லோபோ⁴ நாம அத்தீ²தி புச்ச²தி. அபி⁴ஜ்ஜா²தி கோ² அஹம் ஸாள்ஹா ஏதமத்த²ம் வதா³மீதி ஏதம் லோப⁴ஸங்கா²தம் அத்த²ம் அஹம் ‘‘அபி⁴ஜ்ஜா²’’தி வதா³மி, ‘‘தண்ஹா’’தி வதா³மீதி ஸமுட்டி²தபஞ்ஹஸ்ஸ அத்த²ம் தீ³பேந்தோ ஆஹ. ஏவம் ஸப்³ப³வாரேஸு நயோ நேதப்³போ³.

ஸோ ஏவம் பஜானாதீதி ஸோ சத்தாரோ ப்³ரஹ்மவிஹாரே பா⁴வேத்வா டி²தோ அரியஸாவகோ ஸமாபத்திதோ வுட்டா²ய விபஸ்ஸனம் ஆரப⁴ந்தோ ஏவம் பஜானாதி. அத்தி² இத³ந்தி அத்தி² து³க்க²ஸச்சஸங்கா²தம் க²ந்த⁴பஞ்சகம் நாமரூபவஸேன பரிச்சி²ந்தி³த்வா பஜானந்தோ ஏஸ ‘‘ஏவம் பஜானாதி அத்தி² இத³’’ந்தி வுத்தோ. ஹீனந்தி ஸமுத³யஸச்சம். பணீதந்தி மக்³க³ஸச்சம். இமஸ்ஸ ஸஞ்ஞாக³தஸ்ஸ உத்தரி நிஸ்ஸரணந்தி இமஸ்ஸ விபஸ்ஸனாஸஞ்ஞாஸங்கா²தஸ்ஸ ஸஞ்ஞாக³தஸ்ஸ உத்தரி நிஸ்ஸரணம் நாம நிப்³பா³னம், தமத்தீ²தி இமினா நிரோத⁴ஸச்சம் த³ஸ்ஸேதி. விமுத்தஸ்மிம் விமுத்தமிதி ஞாணந்தி ஏகூனவீஸதிவித⁴ம் பச்சவேக்க²ணஞாணம் கதி²தம். அஹு புப்³பே³ லோபோ⁴தி புப்³பே³ மே லோபோ⁴ அஹோஸி. தத³ஹு அகுஸலந்தி தம் அகுஸலம் நாம அஹோஸி, ததா³ வா அகுஸலம் நாம அஹோஸி. இச்சேதம் குஸலந்தி இதி ஏதம் குஸலம், தஸ்ஸேவ அகுஸலஸ்ஸ நத்தி²பா⁴வம் குஸலம் கே²மந்தி ஸந்தா⁴ய வத³தி. நிச்சா²தோதி நித்தண்ஹோ. நிப்³பு³தோதி அப்³ப⁴ந்தரே ஸந்தாபகரானம் கிலேஸானம் அபா⁴வேன நிப்³பு³தோ. ஸீதிபூ⁴தோதி ஸீதலீபூ⁴தோ. ஸுக²ப்படிஸம்வேதீ³தி காயிகசேதஸிகஸ்ஸ ஸுக²ஸ்ஸ படிஸம்வேதி³தா. ப்³ரஹ்மபூ⁴தேனாதி ஸேட்ட²பூ⁴தேன. ஸேஸம் ஸப்³ப³த்த² உத்தானத்த²மேவாதி.

7. கதா²வத்து²ஸுத்தவண்ணனா

68. ஸத்தமே கதா²வத்தூ²னீதி கதா²காரணானி, கதா²ய பூ⁴மியோ பதிட்டா²யோதி அத்தோ². அதீதம் வா, பி⁴க்க²வே, அத்³தா⁴னந்தி அதீதமத்³தா⁴னம் நாம காலோபி வட்டதி க²ந்தா⁴பி. அனாக³தபச்சுப்பன்னேஸுபி ஏஸேவ நயோ. தத்த² அதீதே கஸ்ஸபோ நாம ஸம்மாஸம்பு³த்³தோ⁴ அஹோஸி, தஸ்ஸ கிகீ நாம காஸிகராஜா அக்³கு³பட்டா²கோ அஹோஸி, வீஸதி வஸ்ஸஸஹஸ்ஸானி ஆயு அஹோஸீதி இமினா நயேன கதே²ந்தோ அதீதம் ஆரப்³ப⁴ கத²ம் கதே²தி நாம. அனாக³தே மேத்தேய்யோ நாம பு³த்³தோ⁴ ப⁴விஸ்ஸதி, தஸ்ஸ ஸங்கோ² நாம ராஜா அக்³கு³பட்டா²கோ ப⁴விஸ்ஸதி, அஸீதி வஸ்ஸஸஹஸ்ஸானி ஆயு ப⁴விஸ்ஸதீதி இமினா நயேன கதே²ந்தோ அனாக³தம் ஆரப்³ப⁴ கத²ம் கதே²தி நாம. ஏதரஹி அஸுகோ நாம ராஜா த⁴ம்மிகோதி இமினா நயேன கதே²ந்தோ பச்சுப்பன்னம் ஆரப்³ப⁴ கத²ம் கதே²தி நாம.

கதா²ஸம்பயோகே³னாதி கதா²ஸமாக³மேன. கச்சோ²தி கதே²தும் யுத்தோ. அகச்சோ²தி கதே²தும் ந யுத்தோ. ஏகம்ஸப்³யாகரணீயம் பஞ்ஹந்திஆதீ³ஸு, ‘‘சக்கு², அனிச்ச’’ந்தி புட்டே²ன, ‘‘ஆம, அனிச்ச’’ந்தி ஏகம்ஸேனேவ ப்³யாகாதப்³ப³ம். ஏஸேவ நயோ ஸோதாதீ³ஸு. அயம் ஏகம்ஸப்³யாகரணீயோ பஞ்ஹோ. ‘‘அனிச்சம் நாம சக்கூ²’’தி புட்டே²ன பன ‘‘ந சக்கு²மேவ, ஸோதம்பி அனிச்சம், கா⁴னம்பி அனிச்ச’’ந்தி ஏவம் விப⁴ஜித்வா ப்³யாகாதப்³ப³ம். அயம் விப⁴ஜ்ஜப்³யாகரணீயோ பஞ்ஹோ. ‘‘யதா² சக்கு², ததா² ஸோதம். யதா² ஸோதம், ததா² சக்கூ²’’தி புட்டே²ன ‘‘கேனட்டே²ன புச்ச²ஸீ’’தி படிபுச்சி²த்வா ‘‘த³ஸ்ஸனட்டே²ன புச்சா²மீ’’தி வுத்தே ‘‘ந ஹீ’’தி ப்³யாகாதப்³ப³ம். ‘‘அனிச்சட்டே²ன புச்சா²மீ’’தி வுத்தே, ‘‘ஆமா’’தி ப்³யாகாதப்³ப³ம். அயம் படிபுச்சா²ப்³யாகரணீயோ பஞ்ஹோ. ‘‘தம் ஜீவம் தம் ஸரீர’’ந்திஆதீ³னி புட்டே²ன பன ‘‘அப்³யாகதமேதம் ப⁴க³வதா’’தி ட²பேதப்³போ³, ஏஸ பஞ்ஹோ ந ப்³யாகாதப்³போ³. அயம் ட²பனீயோ பஞ்ஹோ.

டா²னாடா²னே ந ஸண்டா²தீதி காரணாகாரணே ந ஸண்டா²தி. தத்ராயம் நயோ – ஸஸ்ஸதவாதீ³ யுத்தேன காரணேன பஹோதி உச்சே²த³வாதி³ம் நிக்³க³ஹேதும், உச்சே²த³வாதீ³ தேன நிக்³க³ய்ஹமானோ ‘‘கிம் பனாஹம் உச்சே²த³ம் வதா³மீ’’தி ஸஸ்ஸதவாதி³பா⁴வமேவ தீ³பேதி, அத்தனோ வாதே³ பதிட்டா²தும் ந ஸக்கோதி. ஏவம் உச்சே²த³வாதி³ம்ஹி பஹோந்தே ஸஸ்ஸதவாதீ³, புக்³க³லவாதி³ம்ஹி பஹோந்தே ஸுஞ்ஞதவாதீ³, ஸுஞ்ஞதவாதி³ம்ஹி பஹோந்தே புக்³க³லவாதீ³தி ஏவம் டா²னாடா²னே ந ஸண்டா²தி நாம.

பரிகப்பே ந ஸண்டா²தீதி இத³ம் பஞ்ஹபுச்ச²னேபி பஞ்ஹகத²னேபி லப்³ப⁴தி. கத²ம்? ஏகச்சோ ஹி ‘‘பஞ்ஹம் புச்சி²ஸ்ஸாமீ’’தி கண்ட²ம் ஸோதே⁴தி, ஸோ இதரேன ‘‘இத³ம் நாம த்வம் புச்சி²ஸ்ஸஸீ’’தி வுத்தோ ஞாதபா⁴வம் ஞத்வா ‘‘ந ஏதம், அஞ்ஞம் புச்சி²ஸ்ஸாமீ’’தி வத³தி. பஞ்ஹம் புட்டோ²பி ‘‘பஞ்ஹம் கதே²ஸ்ஸாமீ’’தி ஹனும் ஸம்ஸோதே⁴தி, ஸோ இதரேன ‘‘இத³ம் நாம கதே²ஸ்ஸஸீ’’தி வுத்தோ ஞாதபா⁴வம் ஞத்வா ‘‘ந ஏதம், அஞ்ஞம் கதே²ஸ்ஸாமீ’’தி வத³தி. ஏவம் பரிகப்பே ந ஸண்டா²தி நாம.

அஞ்ஞாதவாதே³ ந ஸண்டா²தீதி அஞ்ஞாதவாதே³ ஜானிதவாதே³ ந ஸண்டா²தி. கத²ம்? ஏகச்சோ பஞ்ஹம் புச்ச²தி, தம் இதரோ ‘‘மனாபோ தயா பஞ்ஹோ புச்சி²தோ, கஹம் தே ஏஸ உக்³க³ஹிதோ’’தி வத³தி. இதரோ புச்சி²தப்³ப³னியாமேனேவ பஞ்ஹம் புச்சி²த்வாபி தஸ்ஸ கதா²ய ‘‘அபஞ்ஹம் நு கோ² புச்சி²த’’ந்தி விமதிம் கரோதி. அபரோ பஞ்ஹம் புட்டோ² கதே²தி, தமஞ்ஞோ ‘‘ஸுட்டு² தே பஞ்ஹோ கதி²தோ, கத்த² தே உக்³க³ஹிதோ, பஞ்ஹம் கதே²ந்தேன நாம ஏவம் கதே²தப்³போ³’’தி வத³தி. இதரோ கதே²தப்³ப³னியாமேனேவ பஞ்ஹம் கதே²த்வாபி தஸ்ஸ கதா²ய ‘‘அபஞ்ஹோ நு கோ² மயா கதி²தோ’’தி விமதிம் கரோதி.

படிபதா³ய ந ஸண்டா²தீதி படிபத்தியம் ந திட்ட²தி, வத்தம் அஜானித்வா அபுச்சி²தப்³ப³ட்டா²னே புச்ச²தீதி அத்தோ². அயம் பஞ்ஹோ நாம சேதியங்க³ணே புச்சி²தேன ந கதே²தப்³போ³, ததா² பி⁴க்கா²சாரமக்³கே³ கா³மம் பிண்டா³ய சரணகாலே. ஆஸனஸாலாய நிஸின்னகாலே யாகு³ம் வா ப⁴த்தம் வா க³ஹேத்வா நிஸின்னகாலே பரிபு⁴ஞ்ஜித்வா நிஸின்னகாலே தி³வாவிஹாரட்டா²னக³மனகாலேபி. தி³வாட்டா²னே நிஸின்னகாலே பன ஓகாஸம் காரேத்வாவ புச்ச²ந்தஸ்ஸ கதே²தப்³போ³, அகாரேத்வா புச்ச²ந்தஸ்ஸ ந கதே²தப்³போ³. இத³ம் வத்தம் அஜானித்வா புச்ச²ந்தோ படிபதா³ய ந ஸண்டா²தி நாம. ஏவம் ஸந்தாயம், பி⁴க்க²வே, புக்³க³லோ அகச்சோ² ஹோதீதி, பி⁴க்க²வே, ஏதம் இமஸ்மிம் ச காரணே ஸதி அயம் புக்³க³லோ ந கதே²தும் யுத்தோ நாம ஹோதி.

டா²னாடா²னே ஸண்டா²தீதி ஸஸ்ஸதவாதீ³ யுத்தேன காரணேன பஹோதி உச்சே²த³வாதி³ம் நிக்³க³ஹேதும், உச்சே²த³வாதீ³ தேன நிக்³க³ய்ஹமானோபி ‘‘அஹம் தயா ஸதக்க²த்தும் நிக்³க³ய்ஹமானோபி உச்சே²த³வாதீ³யேவா’’தி வத³தி. இமினா நயேன ஸஸ்ஸதபுக்³க³லஸுஞ்ஞதவாதா³தீ³ஸுபி நயோ நேதப்³போ³. ஏவம் டா²னாடா²னே ஸண்டா²தி நாம. பரிகப்பே ஸண்டா²தீதி ‘‘பஞ்ஹம் புச்சி²ஸ்ஸாமீ’’தி கண்ட²ம் ஸோதே⁴ந்தோ ‘‘த்வம் இமம் நாம புச்சி²ஸ்ஸஸீ’’தி வுத்தே, ‘‘ஆம, ஏதம்யேவ புச்சி²ஸ்ஸாமீ’’தி வத³தி. பஞ்ஹம் கதே²ஸ்ஸாமீதி ஹனும் ஸம்ஸோதே⁴ந்தோபி ‘‘த்வம் இமம் நாம கதே²ஸ்ஸஸீ’’தி வுத்தே, ‘‘ஆம, ஏதம்யேவ கதே²ஸ்ஸாமீ’’தி வத³தி. ஏவம் பரிகப்பே ஸண்டா²தி நாம.

அஞ்ஞாதவாதே³ ஸண்டா²தீதி இமம் பஞ்ஹம் புச்சி²த்வா ‘‘ஸுட்டு² தே பஞ்ஹோ புச்சி²தோ, புச்ச²ந்தேன நாம ஏவம் புச்சி²தப்³ப³’’ந்தி வுத்தே ஸம்படிச்ச²தி, விமதிம் ந உப்பாதே³தி. பஞ்ஹம் கதே²த்வாபி ‘‘ஸுட்டு² தே பஞ்ஹோ கதி²தோ, கதே²ந்தேன நாம ஏவம் கதே²தப்³ப³’’ந்தி வுத்தே ஸம்படிச்ச²தி, விமதிம் ந உப்பாதே³தி. படிபதா³ய ஸண்டா²தீதி கே³ஹே நிஸீதா³பேத்வா யாகு³க²ஜ்ஜகாதீ³னி த³த்வா யாவ ப⁴த்தம் நிட்டா²தி, தஸ்மிம் அந்தரே நிஸின்னோ பஞ்ஹம் புச்ச²தி. ஸப்பிஆதீ³னி பே⁴ஸஜ்ஜானி அட்ட²விதா⁴னி பானகானி வத்த²ச்சா²த³னமாலாக³ந்தா⁴தீ³னி வா ஆதா³ய விஹாரம் க³ந்த்வா தானி த³த்வா தி³வாட்டா²னம் பவிஸித்வா ஓகாஸம் காரேத்வா பஞ்ஹம் புச்ச²தி. ஏவஞ்ஹி வத்தம் ஞத்வா புச்ச²ந்தோ படிபதா³ய ஸண்டா²தி நாம. தஸ்ஸ பஞ்ஹம் கதே²தும் வட்டதி.

அஞ்ஞேனஞ்ஞம் படிசரதீதி அஞ்ஞேன வசனேன அஞ்ஞம் படிச்சா²தே³தி, அஞ்ஞம் வா புச்சி²தோ அஞ்ஞம் கதே²தி. ப³ஹித்³தா⁴ கத²ம் அபனாமேதீதி ஆக³ந்துககத²ம் ஓதாரேந்தோ புரிமகத²ம் ப³ஹித்³தா⁴ அபனாமேதி. தத்ரித³ம் வத்து² – பி⁴க்கூ² கிர ஸன்னிபதித்வா ஏகம் த³ஹரம், ‘‘ஆவுஸோ, த்வம் இமஞ்சிமஞ்ச ஆபத்திம் ஆபன்னோ’’தி ஆஹம்ஸு. ஸோ ஆஹ – ‘‘ப⁴ந்தே, நாக³தீ³பம் க³தோம்ஹீ’’தி. ஆவுஸோ, ந மயம் தவ நாக³தீ³பக³மனேன அத்தி²கா, ஆபத்திம் பன ஆபன்னோதி புச்சா²மாதி. ப⁴ந்தே, நாக³தீ³பம் க³ந்த்வா மச்சே² கா²தி³ந்தி. ஆவுஸோ, தவ மச்ச²கா²த³னேன கம்மம் நத்தி², ஆபத்திம் கிரஸி ஆபன்னோதி. ஸோ ‘‘நாதிஸுபக்கோ மச்சோ² மய்ஹம் அபா²ஸுகமகாஸி, ப⁴ந்தே’’தி. ஆவுஸோ, துய்ஹம் பா²ஸுகேன வா அபா²ஸுகேன வா கம்மம் நத்தி², ஆபத்திம் ஆபன்னோஸீதி. ப⁴ந்தே, யாவ தத்த² வஸிம், தாவ மே அபா²ஸுகமேவ ஜாதந்தி. ஏவம் ஆக³ந்துககதா²வஸேன ப³ஹித்³தா⁴ கத²ம் அபனாமேதீதி வேதி³தப்³ப³ம்.

அபி⁴ஹரதீதி இதோ சிதோ ச ஸுத்தம் ஆஹரித்வா அவத்த²ரதி. தேபிடகதிஸ்ஸத்தே²ரோ விய. புப்³பே³ கிர பி⁴க்கூ² மஹாசேதியங்க³ணே ஸன்னிபதித்வா ஸங்க⁴கிச்சம் கத்வா பி⁴க்கூ²னம் ஓவாத³ம் த³த்வா அஞ்ஞமஞ்ஞம் பஞ்ஹஸாகச்ச²ம் கரோந்தி. தத்தா²யம் தே²ரோ தீஹி பிடகேஹி ததோ ததோ ஸுத்தம் ஆஹரித்வா தி³வஸபா⁴கே³ ஏகம்பி பஞ்ஹம் நிட்டா²பேதும் ந தே³தி. அபி⁴மத்³த³தீதி காரணம் ஆஹரித்வா மத்³த³தி. அனுபஜக்³க⁴தீதி பரேன பஞ்ஹே புச்சி²தேபி கதி²தேபி பாணிம் பஹரித்வா மஹாஹஸிதம் ஹஸதி, யேன பரஸ்ஸ ‘‘அபுச்சி²தப்³ப³ம் நு கோ² புச்சி²ம், அகதே²தப்³ப³ம் நு கோ² கதே²ஸி’’ந்தி விமதி உப்பஜ்ஜதி. க²லிதம் க³ண்ஹாதீதி அப்பமத்தகம் முக²தோ³ஸமத்தம் க³ண்ஹாதி, அக்க²ரே வா பதே³ வா ப்³யஞ்ஜனே வா து³ருத்தே ‘‘ஏவம் நாமேதம் வத்தப்³ப³’’ந்தி உஜ்ஜா²யமானோ விசரதி. ஸஉபனிஸோதி ஸஉபனிஸ்ஸயோ ஸபச்சயோ.

ஓஹிதஸோதோதி ட²பிதஸோதோ. அபி⁴ஜானாதி ஏகம் த⁴ம்மந்தி ஏகம் குஸலத⁴ம்மம் அபி⁴ஜானாதி அரியமக்³க³ம். பரிஜானாதி ஏகம் த⁴ம்மந்தி ஏகம் து³க்க²ஸச்சத⁴ம்மம் தீரணபரிஞ்ஞாய பரிஜானாதி. பஜஹதி ஏகம் த⁴ம்மந்தி ஏகம் ஸப்³பா³குஸலத⁴ம்மம் பஜஹதி வினோதே³தி ப்³யந்தீகரோதி. ஸச்சி²கரோதி ஏகம் த⁴ம்மந்தி ஏகம் அரஹத்தப²லத⁴ம்மம் நிரோத⁴மேவ வா பச்சக்க²ம் கரோதி. ஸம்மாவிமுத்திம் பு²ஸதீதி ஸம்மா ஹேதுனா நயேன காரணேன அரஹத்தப²லவிமோக்க²ம் ஞாணப²ஸ்ஸேன பு²ஸதி.

ஏதத³த்தா², பி⁴க்க²வே, கதா²தி, பி⁴க்க²வே, யா ஏஸா கதா²ஸம்பயோகே³னாதி கதா² த³ஸ்ஸிதா, ஸா ஏதத³த்தா², அயம் தஸ்ஸா கதா²ய பூ⁴மி பதிட்டா². இத³ம் வத்து² யதி³த³ம் அனுபாதா³ சித்தஸ்ஸ விமோக்கோ²தி ஏவம் ஸப்³ப³பதே³ஸு யோஜனா வேதி³தப்³பா³. ஏதத³த்தா² மந்தனாதி யா அயம் கச்சா²கச்சே²ஸு புக்³க³லேஸு கச்சே²ன ஸத்³தி⁴ம் மந்தனா, ஸாபி ஏதத³த்தா²யேவ. ஏதத³த்தா² உபனிஸாதி ஓஹிதஸோதோ ஸஉபனிஸோதி ஏவம் வுத்தா உபனிஸாபி ஏதத³த்தா²யேவ. ஏதத³த்த²ம் ஸோதாவதா⁴னந்தி தஸ்ஸா உபனிஸாய ஸோதாவதா⁴னம், தம்பி ஏதத³த்த²மேவ. அனுபாதா³தி சதூஹி உபாதா³னேஹி அக்³க³ஹேத்வா. சித்தஸ்ஸ விமோக்கோ²தி அரஹத்தப²லவிமோக்கோ². அரஹத்தப²லத்தா²ய ஹி ஸப்³ப³மேதந்தி ஸுத்தந்தம் வினிவத்தேத்வா உபரி கா³தா²ஹி கூடம் க³ண்ஹந்தோ யே விருத்³தா⁴திஆதி³மாஹ.

தத்த² விருத்³தா⁴தி விரோத⁴ஸங்கா²தேன கோபேன விருத்³தா⁴. ஸல்லபந்தீதி ஸல்லாபம் கரோந்தி. வினிவிட்டா²தி அபி⁴னிவிட்டா² ஹுத்வா. ஸமுஸ்ஸிதாதி மானுஸ்ஸயேன ஸுட்டு² உஸ்ஸிதா. அனரியகு³ணமாஸஜ்ஜாதி அனரியகு³ணகத²ம் கு³ணமாஸஜ்ஜ கதே²ந்தி. கு³ணம் க⁴ட்டேத்வா கதா² ஹி அனரியகதா² நாம, ந அரியகதா², தம் கதே²ந்தீதி அத்தோ². அஞ்ஞோஞ்ஞவிவரேஸினோதி அஞ்ஞமஞ்ஞஸ்ஸ சி²த்³த³ம் அபராத⁴ம் க³வேஸமானா. து³ப்³பா⁴ஸிதந்தி து³க்கதி²தம். விக்க²லிதந்தி அப்பமத்தகம் முக²தோ³ஸக²லிதம். ஸம்பமோஹம் பராஜயந்தி அஞ்ஞமஞ்ஞஸ்ஸ அப்பமத்தேன முக²தோ³ஸேன ஸம்பமோஹஞ்ச பராஜயஞ்ச. அபி⁴னந்த³ந்தீதி துஸ்ஸந்தி. நாசரேதி ந சரதி ந கதே²தி. த⁴ம்மட்ட²படிஸம்யுத்தாதி யா ச த⁴ம்மே டி²தேன கதி²தகதா², ஸா த⁴ம்மட்டா² சேவ ஹோதி தேன ச த⁴ம்மேன படிஸம்யுத்தாதி த⁴ம்மட்ட²படிஸம்யுத்தா. அனுன்னதேன மனஸாதி அனுத்³த⁴தேன சேதஸா. அபளாஸோதி யுக³க்³கா³ஹபளாஸவஸேன அபளாஸோ ஹுத்வா. அஸாஹஸோதி ராக³தோ³ஸமோஹஸாஹஸானம் வஸேன அஸாஹஸோ ஹுத்வா.

அனுஸூயாயமானோதி ந உஸூயமானோ. து³ப்³ப⁴ட்டே² நாபஸாத³யேதி து³க்கதி²தஸ்மிம் ந அபஸாதே³ய்ய. உபாரம்ப⁴ம் ந ஸிக்கே²ய்யாதி காரணுத்தரியலக்க²ணம் உபாரம்ப⁴ம் ந ஸிக்கே²ய்ய. க²லிதஞ்ச ந கா³ஹயேதி அப்பமத்தகம் முக²க²லிதம் ‘‘அயம் தே தோ³ஸோ’’தி ந கா³ஹயேய்ய. நாபி⁴ஹரேதி நாவத்த²ரேய்ய. நாபி⁴மத்³தே³தி ஏகம் காரணம் ஆஹரித்வா ந மத்³தே³ய்ய. ந வாசம் பயுதம் ப⁴ணேதி ஸச்சாலிகபடிஸம்யுத்தம் வாசம் ந ப⁴ணேய்ய. அஞ்ஞாதத்த²ந்தி ஜானனத்த²ம். பஸாத³த்த²ந்தி பஸாத³ஜனனத்த²ம். ந ஸமுஸ்ஸேய்ய மந்தயேதி ந மானுஸ்ஸயேன ஸமுஸ்ஸிதோ ப⁴வேய்ய. ந ஹி மானுஸ்ஸிதா ஹுத்வா பண்டி³தா கத²யந்தி, மானேன பன அனுஸ்ஸிதோவ ஹுத்வா மந்தயே கதே²ய்ய பா⁴ஸேய்யாதி.

8. அஞ்ஞதித்தி²யஸுத்தவண்ணனா

69. அட்ட²மே ப⁴க³வம்மூலகாதி ப⁴க³வா மூலம் ஏதேஸந்தி ப⁴க³வம்மூலகா. இத³ம் வுத்தம் ஹோதி – இமே, ப⁴ந்தே, அம்ஹாகம் த⁴ம்மா புப்³பே³ கஸ்ஸபஸம்மாஸம்பு³த்³தே⁴ன உப்பாதி³தா, தஸ்மிம் பரினிப்³பு³தே ஏகம் பு³த்³த⁴ந்தரம் அஞ்ஞோ ஸமணோ வா ப்³ராஹ்மணோ வா இமே த⁴ம்மே உப்பாதே³தும் ஸமத்தோ² நாம நாஹோஸி, ப⁴க³வதோ பன நோ இமே த⁴ம்மா உப்பாதி³தா. ப⁴க³வந்தஞ்ஹி நிஸ்ஸாய மயம் இமே த⁴ம்மே ஆஜானாம படிவிஜ்ஜா²மாதி ஏவம் ப⁴க³வம்மூலகா நோ, ப⁴ந்தே, த⁴ம்மாதி. ப⁴க³வம்னேத்திகாதி ப⁴க³வா த⁴ம்மானம் நேதா வினேதா அனுனேதா யதா²ஸபா⁴வதோ பாடியேக்கம் பாடியேக்கம் நாமம் க³ஹேத்வாவ த³ஸ்ஸேதாதி த⁴ம்மா ப⁴க³வம்னேத்திகா நாம ஹோந்தி. ப⁴க³வம்படிஸரணாதி சதுபூ⁴மகத⁴ம்மா ஸப்³ப³ஞ்ஞுதஞ்ஞாணஸ்ஸ ஆபாத²ம் ஆக³ச்ச²மானா ப⁴க³வதி படிஸரந்தி நாமாதி ப⁴க³வம்படிஸரணா. படிஸரந்தீதி ஓஸரந்தி ஸமோஸரந்தி. அபிச மஹாபோ³தி⁴மண்டே³ நிஸின்னஸ்ஸ ப⁴க³வதோ படிவேத⁴வஸேன ப²ஸ்ஸோ ஆக³ச்ச²தி – ‘‘அஹம் ப⁴க³வா கின்னாமோ’’தி. த்வம் பு²ஸனட்டே²ன ப²ஸ்ஸோ நாம. வேத³னா, ஸஞ்ஞா, ஸங்கா²ரா, விஞ்ஞாணம் ஆக³ச்ச²தி – ‘‘அஹம் ப⁴க³வா கின்னாம’’ந்தி. த்வம் விஜானனட்டே²ன விஞ்ஞாணம் நாமாதி. ஏவம் சதுபூ⁴மகத⁴ம்மானம் யதா²ஸபா⁴வதோ பாடியேக்கம் பாடியேக்கம் நாமம் க³ண்ஹந்தோ ப⁴க³வா த⁴ம்மே படிஸரதீதி ப⁴க³வம்படிஸரணா. ப⁴க³வந்தம்யேவ படிபா⁴தூதி ப⁴க³வதோவ ஏதஸ்ஸ பா⁴ஸிதஸ்ஸ அத்தோ² உபட்டா²து, தும்ஹேயேவ நோ கதே²த்வா தே³தா²தி அத்தோ².

ராகோ³ கோ²தி ரஜ்ஜனவஸேன பவத்தராகோ³. அப்பஸாவஜ்ஜோதி லோகவஜ்ஜவஸேனபி விபாகவஜ்ஜவஸேனபீதி த்³வீஹிபி வஜ்ஜேஹி அப்பஸாவஜ்ஜோ, அப்பதோ³ஸோதி அத்தோ². கத²ம்? மாதாபிதரோ ஹி பா⁴திப⁴கி³னிஆத³யோ ச புத்தபா⁴திகானம் ஆவாஹவிவாஹமங்க³லம் நாம காரேந்தி. ஏவம் தாவேஸோ லோகவஜ்ஜவஸேன அப்பஸாவஜ்ஜோ. ஸதா³ரஸந்தோஸமூலிகா பன அபாயே படிஸந்தி⁴ நாம ந ஹோதீதி ஏவம் விபாகவஜ்ஜவஸேன அப்பஸாவஜ்ஜோ. த³ந்த⁴விராகீ³தி விரஜ்ஜமானோ பனேஸ ஸணிகம் விரஜ்ஜதி, ந ஸீக⁴ம் முச்சதி. தேலமஸிராகோ³ விய சிரம் அனுப³ந்த⁴தி, த்³வே தீணி ப⁴வந்தரானி க³ந்த்வாபி நாபக³ச்ச²தீதி த³ந்த⁴விராகீ³.

தத்ரித³ம் வத்து² – ஏகோ கிர புரிஸோ பா⁴து ஜாயாய மிச்சா²சாரம் சரதி. தஸ்ஸாபி இத்தி²யா அத்தனோ ஸாமிகதோ ஸோயேவ பியதரோ அஹோஸி. ஸா தமாஹ – ‘‘இமஸ்மிம் காரணே பாகடே ஜாதே மஹதீ க³ரஹா ப⁴விஸ்ஸதி, தவ பா⁴திகம் கா⁴தேஹீ’’தி. ஸோ ‘‘நஸ்ஸ, வஸலி, மா ஏவம் புன அவசா’’தி அபஸாதே³ஸி. ஸா துண்ஹீ ஹுத்வா கதிபாஹச்சயேன புன கதே²ஸி, தஸ்ஸ சித்தம் த்³வஜ்ஜ²பா⁴வம் அக³மாஸி. ததோ ததியவாரம் கதி²தோ ‘‘கிந்தி கத்வா ஓகாஸம் லபி⁴ஸ்ஸாமீ’’தி ஆஹ. அத²ஸ்ஸ ஸா உபாயம் கதே²ந்தீ ‘‘த்வம் மயா வுத்தமேவ கரோஹி, அஸுகட்டா²னே மஹாககுத⁴ஸமீபே தித்த²ம் அத்தி², தத்த² திகி²ணம் த³ண்ட³கவாஸிம் க³ஹேத்வா திட்டா²ஹீ’’தி. ஸோ ததா² அகாஸி. ஜேட்ட²பா⁴தாபிஸ்ஸ அரஞ்ஞே கம்மம் கத்வா க⁴ரம் ஆக³தோ. ஸா தஸ்மிம் முது³சித்தா விய ஹுத்வா ‘‘ஏஹி ஸாமி, ஸீஸே தே ஓலிகி²ஸ்ஸாமீ’’தி ஓலிக²ந்தீ ‘‘உபக்கிலிட்ட²ம் தே ஸீஸ’’ந்தி ஆமலகபிண்ட³ம் த³த்வா ‘‘க³ச்ச² அஸுகட்டா²னே ஸீஸம் தோ⁴வித்வா ஆக³ச்சா²ஹீ’’தி பேஸேஸி. ஸோ தாய வுத்ததித்த²மேவ க³ந்த்வா ஆமலககக்கேன ஸீஸம் மக்கே²த்வா உத³கம் ஓருய்ஹ ஓனமித்வா ஸீஸம் தோ⁴வி. அத² நம் இதரோ ருக்க²ந்தரதோ நிக்க²மித்வா க²ந்த⁴ட்டி²கே பஹரித்வா ஜீவிதா வோரோபேத்வா கே³ஹம் அக³மாஸி.

இதரோ ப⁴ரியாய ஸினேஹம் பரிச்சஜிதுமஸக்கோந்தோ தஸ்மிம்யேவ கே³ஹே மஹாத⁴ம்மனி ஹுத்வா நிப்³ப³த்தி. ஸோ தஸ்ஸா டி²தாயபி நிஸின்னாயபி க³ந்த்வா ஸரீரே பததி. அத² நம் ஸா ‘‘ஸோயேவ அயம் ப⁴விஸ்ஸதீ’’தி கா⁴தாபேஸி. ஸோ புன தஸ்ஸா ஸினேஹேன தஸ்மிம்யேவ கே³ஹே குக்குரோ ஹுத்வா நிப்³ப³த்தி. ஸோ பத³ஸா க³மனகாலதோ பட்டா²ய தஸ்ஸா பச்ச²தோ பச்ச²தோ சரதி. அரஞ்ஞம் க³ச்ச²ந்தியாபி ஸத்³தி⁴ம்யேவ க³ச்ச²தி. தம் தி³ஸ்வா மனுஸ்ஸா ‘‘நிக்க²ந்தோ ஸுனக²லுத்³த³கோ, கதரட்டா²னம் க³மிஸ்ஸதீ’’தி உப்பண்டே³ந்தி. ஸா புன தம் கா⁴தாபேஸி.

ஸோபி புன தஸ்மிம்யேவ கே³ஹே வச்ச²கோ ஹுத்வா நிப்³ப³த்தி. ததே²வ தஸ்ஸா பச்ச²தோ பச்ச²தோ சரதி. ததா³பி நம் மனுஸ்ஸா தி³ஸ்வா ‘‘நிக்க²ந்தோ கோ³பாலகோ, கத்த² கா³வியோ சரிஸ்ஸந்தீ’’தி உப்பண்டே³ந்தி. ஸா தஸ்மிம்பி டா²னே தம் கா⁴தாபேஸி. ஸோ ததா³பி தஸ்ஸா உபரி ஸினேஹம் சி²ந்தி³தும் அஸக்கோந்தோ சதுத்தே² வாரே தஸ்ஸாயேவ குச்சி²யம் ஜாதிஸ்ஸரோ ஹுத்வா நிப்³ப³த்தி. ஸோ படிபாடியா சதூஸு அத்தபா⁴வேஸு தாய கா⁴திதபா⁴வம் தி³ஸ்வா ‘‘ஏவரூபாய நாம பச்சத்தி²காய குச்சி²ஸ்மிம் நிப்³ப³த்தோஸ்மீ’’தி ததோ பட்டா²ய தஸ்ஸா ஹத்தே²ன அத்தானம் பு²ஸிதும் ந தே³தி. ஸசே நம் ஸா பு²ஸதி, கந்த³தி ரோத³தி. அத² நம் அய்யகோவ படிஜக்³க³தி. தம் அபரபா⁴கே³ வுத்³தி⁴ப்பத்தம் அய்யகோ ஆஹ – ‘‘தாத, கஸ்மா த்வம் மாது ஹத்தே²ன அத்தானம் பு²ஸிதும் ந தே³ஸி. ஸசேபி தம் பு²ஸதி, மஹாஸத்³தே³ன ரோத³ஸி கந்த³ஸீ’’தி. அய்யகேன புட்டோ² ‘‘ந ஏஸா மய்ஹம் மாதா, பச்சாமித்தா ஏஸா’’தி தம் பவத்திம் ஸப்³ப³ம் ஆரோசேஸி. ஸோ தம் ஆலிங்கி³த்வா ரோதி³த்வா ‘‘ஏஹி, தாத, கிம் அம்ஹாகம் ஈதி³ஸே டா²னே நிவாஸகிச்ச’’ந்தி தம் ஆதா³ய நிக்க²மித்வா ஏகம் விஹாரம் க³ந்த்வா பப்³ப³ஜித்வா உபோ⁴பி தத்த² வஸந்தா அரஹத்தம் பாபுணிம்ஸு.

மஹாஸாவஜ்ஜோதி லோகவஜ்ஜவஸேனபி விபாகவஜ்ஜவஸேனபீதி த்³வீஹிபி காரணேஹி மஹாஸாவஜ்ஜோ. கத²ம்? தோ³ஸேன ஹி து³ட்டோ² ஹுத்வா மாதரிபி அபரஜ்ஜ²தி, பிதரிபி பா⁴திப⁴கி³னிஆதீ³ஸுபி பப்³ப³ஜிதேஸுபி. ஸோ க³தக³தட்டா²னேஸு ‘‘அயம் புக்³க³லோ மாதாபிதூஸுபி அபரஜ்ஜ²தி, பா⁴திப⁴கி³னிஆதீ³ஸுபி, பப்³ப³ஜிதேஸுபீ’’தி மஹதிம் க³ரஹம் லப⁴தி. ஏவம் தாவ லோகவஜ்ஜவஸேன மஹாஸாவஜ்ஜோ. தோ³ஸவஸேன பன கதேன ஆனந்தரியகம்மேன கப்பம் நிரயே பச்சதி. ஏவம் விபாகவஜ்ஜவஸேன மஹாஸாவஜ்ஜோ. கி²ப்பவிராகீ³தி கி²ப்பம் விரஜ்ஜதி. தோ³ஸேன ஹி து³ட்டோ² மாதாபிதூஸுபி சேதியேபி போ³தி⁴ம்ஹிபி பப்³ப³ஜிதேஸுபி அபரஜ்ஜி²த்வா ‘‘மய்ஹம் க²மதா²’’தி. அச்சயம் தே³ஸேதி. தஸ்ஸ ஸஹ க²மாபனேன தம் கம்மம் பாகதிகமேவ ஹோதி.

மோஹோபி த்³வீஹேவ காரணேஹி மஹாஸாவஜ்ஜோ. மோஹேன ஹி மூள்ஹோ ஹுத்வா மாதாபிதூஸுபி சேதியேபி போ³தி⁴ம்ஹிபி பப்³ப³ஜிதேஸுபி அபரஜ்ஜி²த்வா க³தக³தட்டா²னே க³ரஹம் லப⁴தி. ஏவம் தாவ லோகவஜ்ஜவஸேன மஹாஸாவஜ்ஜோ. மோஹவஸேன பன கதேன ஆனந்தரியகம்மேன கப்பம் நிரயே பச்சதி. ஏவம் விபாகவஜ்ஜவஸேனபி மஹாஸாவஜ்ஜோ. த³ந்த⁴விராகீ³தி ஸணிகம் விரஜ்ஜதி. மோஹேன மூள்ஹேன ஹி கதகம்மம் ஸணிகம் முச்சதி. யதா² ஹி அச்ச²சம்மம் ஸதக்க²த்தும்பி தோ⁴வியமானம் ந பண்ட³ரம் ஹோதி, ஏவமேவ மோஹேன மூள்ஹேன கதகம்மம் ஸீக⁴ம் ந முச்சதி, ஸணிகமேவ முச்சதீதி. ஸேஸமேத்த² உத்தானமேவாதி.

9. அகுஸலமூலஸுத்தவண்ணனா

70. நவமே அகுஸலமூலானீதி அகுஸலானம் மூலானி, அகுஸலானி ச தானி மூலானி சாதி வா அகுஸலமூலானி. யத³பி, பி⁴க்க²வே, லோபோ⁴தி யோபி, பி⁴க்க²வே, லோபோ⁴. தத³பி அகுஸலமூலந்தி ஸோபி அகுஸலமூலம். அகுஸலமூலம் வா ஸந்தா⁴ய இத⁴ தம்பீதி அத்தோ² வட்டதியேவ. ஏதேனுபாயேன ஸப்³ப³த்த² நயோ நேதப்³போ³. அபி⁴ஸங்க²ரோதீதி ஆயூஹதி ஸம்பிண்டே³தி ராஸிம் கரோதி. அஸதா து³க்க²ம் உப்பாத³யதீதி அபூ⁴தேன அவிஜ்ஜமானேன யம்கிஞ்சி தஸ்ஸ அபூ⁴தம் தோ³ஸம் வத்வா து³க்க²ம் உப்பாதே³தி. வதே⁴ன வாதிஆதி³ யேனாகாரேன து³க்க²ம் உப்பாதே³தி, தம் த³ஸ்ஸேதும் வுத்தம். தத்த² ஜானியாதி த⁴னஜானியா. பப்³பா³ஜனாயாதி கா³மதோ வா ரட்ட²தோ வா பப்³பா³ஜனீயகம்மேன. ப³லவம்ஹீதி அஹமஸ்மி ப³லவா. ப³லத்தோ² இதிபீதி ப³லேன மே அத்தோ² இதிபி, ப³லே வா டி²தோம்ஹீதிபி வத³தி.

அகாலவாதீ³தி காலஸ்மிம் ந வத³தி, அகாலஸ்மிம் வத³தி நாம. அபூ⁴தவாதீ³தி பூ⁴தம் ந வத³தி, அபூ⁴தம் வத³தி நாம. அனத்த²வாதீ³தி அத்த²ம் ந வத³தி, அனத்த²ம் வத³தி நாம. அத⁴ம்மவாதீ³தி த⁴ம்மம் ந வத³தி, அத⁴ம்மம் வத³தி நாம. அவினயவாதீ³தி வினயம் ந வத³தி, அவினயம் வத³தி நாம.

ததா² ஹாயந்தி ததா² ஹி அயம். ந ஆதப்பம் கரோதி தஸ்ஸ நிப்³பே³ட²னாயாதி தஸ்ஸ அபூ⁴தஸ்ஸ நிப்³பே³ட²னத்தா²ய வீரியம் ந கரோதி. இதிபேதம் அதச்ச²ந்தி இமினாபி காரணேன ஏதம் அதச்ச²ம். இதரம் தஸ்ஸேவ வேவசனம்.

து³க்³க³தி பாடிகங்கா²தி நிரயாதி³கா து³க்³க³தி இச்சி²தப்³பா³, ஸா அஸ்ஸ அவஸ்ஸபா⁴வினீ, தத்தா²னேன நிப்³ப³த்திதப்³ப³ந்தி அத்தோ². உத்³த⁴ஸ்தோதி உபரி த⁴ம்ஸிதோ. பரியோனத்³தோ⁴தி ஸமந்தா ஓனத்³தோ⁴. அனயம் ஆபஜ்ஜதீதி அவுட்³டி⁴ம் ஆபஜ்ஜதி. ப்³யஸனம் ஆபஜ்ஜதீதி வினாஸம் ஆபஜ்ஜதி. கி³ம்ஹகாலஸ்மிஞ்ஹி மாலுவாஸிபாடிகாய ப²லிதாய பீ³ஜானி உப்பதித்வா வடருக்கா²தீ³னம் மூலே பதந்தி. தத்த² யஸ்ஸ ருக்க²ஸ்ஸ மூலே தீஸு தி³ஸாஸு தீணி பீ³ஜானி பதிதானி ஹோந்தி, தஸ்மிம் ருக்கே² பாவுஸ்ஸகேன மேகே⁴ன அபி⁴வட்டே² தீஹி பீ³ஜேஹி தயோ அங்குரா உட்ட²ஹித்வா தம் ருக்க²ம் அல்லீயந்தி. ததோ பட்டா²ய ருக்க²தே³வதாயோ ஸகபா⁴வேன ஸண்டா²தும் ந ஸக்கோந்தி. தேபி அங்குரா வட்³ட⁴மானா லதாபா⁴வம் ஆபஜ்ஜித்வா தம் ருக்க²ம் அபி⁴ருஹித்வா ஸப்³ப³விடபஸாகா²பஸாகா² ஸம்ஸிப்³பி³த்வா தம் ருக்க²ம் உபரி பரியோனந்த⁴ந்தி. ஸோ மாலுவாலதாஹி ஸம்ஸிப்³பி³தோ க⁴னேஹி மஹந்தேஹி மாலுவாபத்தேஹி ஸஞ்ச²ன்னோ தே³வே வா வஸ்ஸந்தே வாதே வா வாயந்தே தத்த² தத்த² பலுஜ்ஜித்வா கா²ணுமத்தமேவ அவஸிஸ்ஸதி. தம் ஸந்தா⁴யேதம் வுத்தம்.

ஏவமேவ கோ²தி ஏத்த² பன இத³ம் ஓபம்மஸம்ஸந்த³னம் – ஸாலாதீ³ஸு அஞ்ஞதரருக்கோ² விய ஹி அயம் ஸத்தோ த³ட்ட²ப்³போ³, திஸ்ஸோ மாலுவாலதா விய தீணி அகுஸலமூலானி, யாவ ருக்க²ஸாகா² அஸம்பத்தா, தாவ தாஸம் லதானம் உஜுகம் ருக்கா²ரோஹனம் விய லோபா⁴தீ³னம் த்³வாரம் அஸம்பத்தகாலோ, ஸாகா²னுஸாரேன க³மனகாலோ விய த்³வாரவஸேன க³மனகாலோ, பரியோனத்³த⁴காலோ விய லோபா⁴தீ³ஹி பரியுட்டி²தகாலோ, கு²த்³த³கஸாகா²னம் பலுஜ்ஜனகாலோ விய த்³வாரப்பத்தானம் கிலேஸானம் வஸேன கு²த்³தா³னுகு²த்³த³கா ஆபத்தியோ ஆபன்னகாலோ, மஹாஸாகா²னம் பலுஜ்ஜனகாலோ விய க³ருகாபத்திம் ஆபன்னகாலோ, லதானுஸாரேன ஓதிண்ணேன உத³கேன மூலேஸு திந்தேஸு ருக்க²ஸ்ஸ பூ⁴மியம் பதனகாலோ விய கமேன சத்தாரி பாராஜிகானி ஆபஜ்ஜித்வா சதூஸு அபாயேஸு நிப்³ப³த்தனகாலோ த³ட்ட²ப்³போ³.

ஸுக்கபக்கோ² வுத்தவிபல்லாஸேன வேதி³தப்³போ³. ஏவமேவ கோ²தி ஏத்த² பன இத³ம் ஓபம்மஸம்ஸந்த³னம் – ஸாலாதீ³ஸு அஞ்ஞதரருக்கோ² விய அயம் ஸத்தோ த³ட்ட²ப்³போ³, திஸ்ஸோ மாலுவாலதா விய தீணி அகுஸலமூலானி, தாஸம் அப்பவத்திம் காதும் ஆக³தபுரிஸோ விய யோகா³வசரோ, குத்³தா³லோ விய பஞ்ஞா, குத்³தா³லபிடகம் விய ஸத்³தா⁴பிடகம், பலிக²னனக²ணித்தி விய விபஸ்ஸனாபஞ்ஞா, க²ணித்தியா மூலச்சே²த³னம் விய விபஸ்ஸனாஞாணேன அவிஜ்ஜாமூலஸ்ஸ சி²ந்த³னகாலோ, க²ண்டா³க²ண்டி³கம் சி²ந்த³னகாலோ விய க²ந்த⁴வஸேன தி³ட்ட²காலோ, பா²லனகாலோ விய மக்³க³ஞாணேன கிலேஸானம் ஸமுக்³கா⁴திதகாலோ, மஸிகரணகாலோ விய த⁴ரமானகபஞ்சக்க²ந்த⁴காலோ, மஹாவாதே ஓபுணித்வா அப்பவத்தனகாலோ விய உபாதி³ன்னகக்க²ந்தா⁴னம் அப்படிஸந்தி⁴கனிரோதே⁴ன நிருஜ்ஜி²த்வா புனப்³ப⁴வே படிஸந்தி⁴அக்³க³ஹணகாலோ த³ட்ட²ப்³போ³தி. இமஸ்மிம் ஸுத்தே வட்டவிவட்டம் கதி²தம்.

10. உபோஸத²ஸுத்தவண்ணனா

71. த³ஸமே தத³ஹுபோஸதே²தி தஸ்மிம் அஹு உபோஸதே² தம் தி³வஸம் உபோஸதே², பன்னரஸிகஉபோஸத²தி³வஸேதி வுத்தம் ஹோதி. உபஸங்கமீதி உபோஸத²ங்கா³னி அதி⁴ட்டா²ய க³ந்த⁴மாலாதி³ஹத்தா² உபஸங்கமி. ஹந்தா³தி வவஸ்ஸக்³க³த்தே² நிபாதோ. தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹோ, இமஸ்மிம் டி²தே மஜ்ஜ²ன்ஹிகே காலேதி அத்தோ². குதோ நு த்வம் ஆக³ச்ச²ஸீதி கிம் கரோந்தீ விசரஸீதி புச்ச²தி. கோ³பாலகுபோஸதோ²தி கோ³பாலகேஹி ஸத்³தி⁴ம் உபவஸனஉபோஸதோ². நிக³ண்டு²போஸதோ²தி நிக³ண்டா²னம் உபவஸனஉபோஸதோ². அரியுபோஸதோ²தி அரியானம் உபவஸனஉபோஸதோ². ஸேய்யதா²பி விஸாகே²தி யதா² நாம, விஸாகே². ஸாயன்ஹஸமயே ஸாமிகானம் கா³வோ நிய்யாதேத்வாதி கோ³பாலகா ஹி தே³வஸிகவேதனேன வா பஞ்சாஹத³ஸாஹஅத்³த⁴மாஸமாஸச²மாஸஸம்வச்ச²ரபரிச்சே²தே³ன வா கா³வோ க³ஹேத்வா ரக்க²ந்தி. இத⁴ பன தே³வஸிகவேதனேன ரக்க²ந்தம் ஸந்தா⁴யேதம் வுத்தம் – நிய்யாதேத்வாதி படிச்சா²பேத்வா ‘‘ஏதா வோ கா³வோ’’தி த³த்வா. இதி படிஸஞ்சிக்க²தீதி அத்தனோ கே³ஹம் க³ந்த்வா பு⁴ஞ்ஜித்வா மஞ்சே நிபன்னோ ஏவம் பச்சவேக்க²தி. அபி⁴ஜ்ஜா²ஸஹக³தேனாதி தண்ஹாய ஸம்பயுத்தேன. ஏவம் கோ², விஸாகே², கோ³பாலகுபோஸதோ² ஹோதீதி அரியுபோஸதோ²வ அயம், அபரிஸுத்³த⁴விதக்கதாய பன கோ³பாலகஉபோஸத²ட்டா²னே டி²தோ. ந மஹப்ப²லோதி விபாகப²லேன ந மஹப்ப²லோ. ந மஹானிஸம்ஸோதி விபாகானிஸம்ஸேன ந மஹானிஸம்ஸோ. ந மஹாஜுதிகோதி விபாகோபா⁴ஸேன ந மஹாஓபா⁴ஸோ. ந மஹாவிப்பா²ரோதி விபாகவிப்பா²ரஸ்ஸ அமஹந்ததாய ந மஹாவிப்பா²ரோ.

ஸமணஜாதிகாதி ஸமணாயேவ. பரம் யோஜனஸதந்தி யோஜனஸதம் அதிக்கமித்வா ததோ பரம். தேஸு த³ண்ட³ம் நிக்கி²பாஹீதி தேஸு யோஜனஸததோ பரபா⁴கே³ஸு டி²தேஸு ஸத்தேஸு த³ண்ட³ம் நிக்கி²ப, நிக்கி²த்தத³ண்டோ³ ஹோஹி. நாஹம் க்வசனி கஸ்ஸசி கிஞ்சனதஸ்மிந்தி அஹம் கத்த²சி கஸ்ஸசி பரஸ்ஸ கிஞ்சனதஸ்மிம் ந ஹோமி. கிஞ்சனம் வுச்சதி பலிபோ³தோ⁴, பலிபோ³தோ⁴ ந ஹோமீதி வுத்தம் ஹோதி. ந ச மம க்வசனி கத்த²சி கிஞ்சனதத்தீ²தி மமாபி க்வசனி அந்தோ வா ப³ஹித்³தா⁴ வா கத்த²சி ஏகபரிக்கா²ரேபி கிஞ்சனதா நத்தி², பலிபோ³தோ⁴ நத்தி², சி²ன்னபலிபோ³தோ⁴ஹமஸ்மீதி வுத்தம் ஹோதி. போ⁴கே³தி மஞ்சபீட²யாகு³ப⁴த்தாத³யோ. அதி³ன்னம்யேவ பரிபு⁴ஞ்ஜதீதி புனதி³வஸே மஞ்சே நிபஜ்ஜந்தோபி பீடே² நிஸீத³ந்தோபி யாகு³ம் பிவந்தோபி ப⁴த்தம் பு⁴ஞ்ஜந்தோபி தே போ⁴கே³ அதி³ன்னேயேவ பரிபு⁴ஞ்ஜதி. ந மஹப்ப²லோதி நிப்ப²லோ. ப்³யஞ்ஜனமேவ ஹி ஏத்த² ஸாவஸேஸம், அத்தோ² பன நிரவஸேஸோ. ஏவம் உபவுத்த²ஸ்ஸ ஹி உபோஸத²ஸ்ஸ அப்பமத்தகம்பி விபாகப²லம் இட்ட²ம் கந்தம் மனாபம் நாம நத்தி². தஸ்மா நிப்ப²லோத்வேவ வேதி³தப்³போ³. ஸேஸபதே³ஸுபி ஏஸேவ நயோ.

உபக்கிலிட்ட²ஸ்ஸ சித்தஸ்ஸாதி இத³ம் கஸ்மா ஆஹ? ஸம்கிலிட்டே²ன ஹி சித்தேன உபவுத்தோ² உபோஸதோ² ந மஹப்ப²லோ ஹோதீதி த³ஸ்ஸிதத்தா விஸுத்³தே⁴ன சித்தேன உபவுத்த²ஸ்ஸ மஹப்ப²லதா அனுஞ்ஞாதா ஹோதி. தஸ்மா யேன கம்மட்டா²னேன சித்தம் விஸுஜ்ஜ²தி, தம் சித்தவிஸோத⁴னகம்மட்டா²னம் த³ஸ்ஸேதும் இத³மாஹ. தத்த² உபக்கமேனாதி பச்சத்தபுரிஸகாரேன, உபாயேன வா. ததா²க³தம் அனுஸ்ஸரதீதி அட்ட²ஹி காரணேஹி ததா²க³தகு³ணே அனுஸ்ஸரதி. ஏத்த² ஹி இதிபி ஸோ ப⁴க³வாதி ஸோ ப⁴க³வா இதிபி ஸீலேன, இதிபி ஸமாதி⁴னாதி ஸப்³பே³ லோகியலோகுத்தரா பு³த்³த⁴கு³ணா ஸங்க³ஹிதா. அரஹந்திஆதீ³ஹி பாடியேக்ககு³ணாவ நித்³தி³ட்டா². ததா²க³தம் அனுஸ்ஸரதோ சித்தம் பஸீத³தீதி லோகியலோகுத்தரே ததா²க³தகு³ணே அனுஸ்ஸரந்தஸ்ஸ சித்துப்பாதோ³ பஸன்னோ ஹோதி.

சித்தஸ்ஸ உபக்கிலேஸாதி பஞ்ச நீவரணா. கக்கந்தி ஆமலககக்கம். தஜ்ஜம் வாயாமந்தி தஜ்ஜாதிகம் தத³னுச்ச²விகம் கக்கேன மக்க²னக⁴ம்ஸனதோ⁴வனவாயாமம். பரியோத³பனா ஹோதீதி ஸுத்³த⁴பா⁴வகரணம் ஹோதி. கிலிட்ட²ஸ்மிம் ஹி ஸீஸே பஸாத⁴னம் பஸாதே⁴த்வா நக்க²த்தம் கீளமானோ ந ஸோப⁴தி, பரிஸுத்³தே⁴ பன தஸ்மிம் பஸாத⁴னம் பஸாதே⁴த்வா நக்க²த்தம் கீளமானோ ஸோப⁴தி, ஏவமேவ கிலிட்ட²சித்தேன உபோஸத²ங்கா³னி அதி⁴ட்டா²ய உபோஸதோ² உபவுத்தோ² ந மஹப்ப²லோ ஹோதி, பரிஸுத்³தே⁴ன பன சித்தேன உபோஸத²ங்கா³னி அதி⁴ட்டா²ய உபவுத்தோ² உபோஸதோ² மஹப்ப²லோ ஹோதீதி அதி⁴ப்பாயேன ஏவமாஹ. ப்³ரஹ்முபோஸத²ம் உபவஸதீதி ப்³ரஹ்மா வுச்சதி ஸம்மாஸம்பு³த்³தோ⁴, தஸ்ஸ கு³ணானுஸ்ஸரணவஸேன அயம் உபோஸதோ² ப்³ரஹ்முபோஸதோ² நாம, தம் உபவஸதி. ப்³ரஹ்முனா ஸத்³தி⁴ம் ஸம்வஸதீதி ஸம்மாஸம்பு³த்³தே⁴ன ஸத்³தி⁴ம் ஸம்வஸதி. ப்³ரஹ்மஞ்சஸ்ஸ ஆரப்³பா⁴தி ஸம்மாஸம்பு³த்³த⁴ம் ஆரப்³ப⁴.

த⁴ம்மம் அனுஸ்ஸரதீதி ஸஹதந்திகம் லோகுத்தரத⁴ம்மம் அனுஸ்ஸரதி. ஸோத்திந்தி குருவிந்த³கஸோத்திம். குருவிந்த³கபாஸாணசுண்ணேன ஹி ஸத்³தி⁴ம் லாக²ம் யோஜேத்வா மணிகே கத்வா விஜ்ஜி²த்வா ஸுத்தேன ஆவுணித்வா தம் மணி கலாபபந்திம் உப⁴தோ க³ஹேத்வா பிட்டி²ம் க⁴ம்ஸேந்தி, தம் ஸந்தா⁴ய வுத்தம் – ‘‘ஸோத்திஞ்ச படிச்சா’’தி. சுண்ணந்தி ந்ஹானீயசுண்ணம். தஜ்ஜம் வாயாமந்தி உப்³ப³ட்டனக⁴ம்ஸனதோ⁴வனாதி³கம் தத³னுரூபவாயாமம். த⁴ம்முபோஸத²ந்தி ஸஹதந்திகம் நவலோகுத்தரத⁴ம்மம் ஆரப்³ப⁴ உபவுத்த²த்தா அயம் உபோஸதோ² ‘‘த⁴ம்முபோஸதோ²’’தி வுத்தோ. இதா⁴பி பரியோத³பனாதி பதே³ ட²த்வா புரிமனயேனேவ யோஜனா காதப்³பா³.

ஸங்க⁴ம் அனுஸ்ஸரதீதி அட்ட²ன்னம் அரியபுக்³க³லானம் கு³ணே அனுஸ்ஸரதி. உஸ்மஞ்ச படிச்சாதி த்³வே தயோ வாரே கா³ஹாபிதம் உஸுமம் படிச்ச. உஸஞ்சாதிபி பாடோ², அயமேவத்தோ². கா²ரந்தி சா²ரிகம். கோ³மயந்தி கோ³முத்தம் வா அஜலண்டி³கா வா. பரியோத³பனாதி இதா⁴பி புரிமனயேனேவ யோஜனா காதப்³பா³. ஸங்கு⁴போஸத²ந்தி அட்ட²ன்னம் அரியபுக்³க³லானம் கு³ணே ஆரப்³ப⁴ உபவுத்த²த்தா அயம் உபோஸதோ² ‘‘ஸங்கு⁴போஸதோ²’’தி வுத்தோ.

ஸீலானீதி க³ஹட்டோ² க³ஹட்ட²ஸீலானி, பப்³ப³ஜிதோ பப்³ப³ஜிதஸீலானி. அக²ண்டா³னீதிஆதீ³னம் அத்தோ² விஸுத்³தி⁴மக்³கே³ (விஸுத்³தி⁴. 1.21) வித்தா²ரிதோவ. வாலண்டு³பகந்தி அஸ்ஸவாலேஹி வா மகசிவாலாதீ³ஹி வா கதம் அண்டு³பகம். தஜ்ஜம் வாயாமந்தி தேலேன தேமேத்வா மலஸ்ஸ திந்தபா⁴வம் ஞத்வா சா²ரிகம் பக்கி²பித்வா வாலண்டு³பகேன க⁴ம்ஸனவாயாமோ. இத⁴ பரியோத³பனாதி பதே³ ட²த்வா ஏவம் யோஜனா காதப்³பா³ கிலிட்ட²ஸ்மிஞ்ஹி ஆதா³ஸே மண்டி³தபஸாதி⁴தோபி அத்தபா⁴வோ ஓலோகியமானோ ந ஸோப⁴தி, பரிஸுத்³தே⁴ ஸோப⁴தி. ஏவமேவ கிலிட்டே²ன சித்தேன உபவுத்தோ² உபோஸதோ² ந மஹப்ப²லோ ஹோதி, பரிஸுத்³தே⁴ன பன மஹப்ப²லோ ஹோதீதி. ஸீலுபோஸத²ந்தி அத்தனோ ஸீலானுஸ்ஸரணவஸேன உபவுத்தோ² உபோஸதோ² ஸீலுபோஸதோ² நாம. ஸீலேன ஸத்³தி⁴ந்தி அத்தனோ பஞ்சஸீலத³ஸஸீலேன ஸத்³தி⁴ம். ஸீலஞ்சஸ்ஸ ஆரப்³பா⁴தி பஞ்சஸீலம் த³ஸஸீலஞ்ச ஆரப்³ப⁴.

தே³வதா அனுஸ்ஸரதீதி தே³வதா ஸக்கி²ட்டா²னே ட²பேத்வா அத்தனோ ஸத்³தா⁴தி³கு³ணே அனுஸ்ஸரதி. உக்கந்தி உத்³த⁴னம். லோணந்தி லோணமத்திகா. கே³ருகந்தி கே³ருகசுண்ணம். நாளிகஸண்டா³ஸந்தி த⁴மனனாளிகஞ்சேவ பரிவத்தனஸண்டா³ஸஞ்ச. தஜ்ஜம் வாயாமந்தி உத்³த⁴னே பக்கி²பனத⁴மனபரிவத்தனாதி³கம் அனுரூபம் வாயாமம். இத⁴ பரியோத³பனாதி பதே³ ட²த்வா ஏவம் யோஜனா வேதி³தப்³பா³ – ஸம்கிலிட்ட²ஸுவண்ணமயேன ஹி பஸாத⁴னப⁴ண்டே³ன பஸாதி⁴தா நக்க²த்தம் கீளமானா ந ஸோப⁴ந்தி, பரிஸுத்³த⁴ஸுவண்ணமயேன ஸோப⁴ந்தி. ஏவமேவ ஸம்கிலிட்ட²சித்தஸ்ஸ உபோஸதோ² ந மஹப்ப²லோ ஹோதி, பரிஸுத்³த⁴சித்தஸ்ஸ மஹப்ப²லோ. தே³வதுபோஸத²ந்தி தே³வதா ஸக்கி²ட்டா²னே ட²பேத்வா அத்தனோ கு³ணே அனுஸ்ஸரந்தேன உபவுத்த²உபோஸதோ² தே³வதுபோஸதோ² நாம. ஸேஸம் இமேஸு பு³த்³தா⁴னுஸ்ஸதிஆதீ³ஸு கம்மட்டா²னேஸு யம் வத்தப்³ப³ம் ஸியா, தம் ஸப்³ப³ம் விஸுத்³தி⁴மக்³கே³ (விஸுத்³தி⁴. 1.123 ஆத³யோ) வுத்தமேவ.

பாணாதிபாதந்தி பாணவத⁴ம். பஹாயாதி தம் பாணாதிபாதசேதனாஸங்கா²தம் து³ஸ்ஸீல்யம் பஜஹித்வா. படிவிரதாதி பஹீனகாலதோ பட்டா²ய ததோ து³ஸ்ஸீல்யதோ ஓரதா விரதாவ. நிஹிதத³ண்டா³ நிஹிதஸத்தா²தி பரூபகா⁴தத்தா²ய த³ண்ட³ம் வா ஸத்த²ம் வா ஆதா³ய அவத்தனதோ நிக்கி²த்தத³ண்டா³ சேவ நிக்கி²த்தஸத்தா² சாதி அத்தோ². ஏத்த² ச ட²பேத்வா த³ண்ட³ம் ஸப்³ப³ம்பி அவஸேஸம் உபகரணம் ஸத்தானம் விஹிம்ஸனபா⁴வதோ ஸத்த²ந்தி வேதி³தப்³ப³ம். யம் பன பி⁴க்கூ² கத்தரத³ண்ட³ம் வா த³ந்தகட்ட²வாஸிம் வா பிப்ப²லகம் வா க³ஹேத்வா விசரந்தி, ந தம் பரூபகா⁴தத்தா²ய. தஸ்மா நிஹிதத³ண்டா³ நிஹிதஸத்தா²த்வேவ ஸங்க²ம் க³ச்ச²ந்தி. லஜ்ஜீதி பாபஜிகு³ச்ச²னலக்க²ணாய லஜ்ஜாய ஸமன்னாக³தா. த³யாபன்னாதி த³யம் மேத்தசித்ததம் ஆபன்னா. ஸப்³ப³பாணபூ⁴தஹிதானுகம்பீதி ஸப்³பே³ பாணபூ⁴தே ஹிதேன அனுகம்பகா, தாய ஏவ த³யாபன்னதாய ஸப்³பே³ஸம் பாணபூ⁴தானம் ஹிதசித்தகாதி அத்தோ². அஹம்பஜ்ஜாதி அஹம்பி அஜ்ஜ. இமினாபி அங்கே³னாதி இமினாபி கு³ணங்கே³ன. அரஹதம் அனுகரோமீதி யதா² புரதோ க³ச்ச²ந்தம் பச்ச²தோ க³ச்ச²ந்தோ அனுக³ச்ச²தி நாம, ஏவம் அஹம்பி அரஹந்தேஹி பட²மம் கதம் இமம் கு³ணம் பச்சா² கரோந்தோ தேஸம் அரஹந்தானம் அனுகரோமி. உபோஸதோ² ச மே உபவுத்தோ² ப⁴விஸ்ஸதீதி ஏவம் கரோந்தேன மயா அரஹதஞ்ச அனுகதம் ப⁴விஸ்ஸதி, உபோஸதோ² ச உபவுத்தோ² ப⁴விஸ்ஸதி.

அதி³ன்னாதா³னந்தி அதி³ன்னஸ்ஸ பரபரிக்³க³ஹிதஸ்ஸ ஆதா³னம், தே²ய்யம் சோரிகந்தி அத்தோ². தி³ன்னமேவ ஆதி³யந்தீதி தி³ன்னாதா³யீ. சித்தேனபி தி³ன்னமேவ படிகங்க²ந்தீதி தி³ன்னபாடிகங்கீ². தே²னேதீதி தே²னோ, ந தே²னேன அதே²னேன. அதே²னத்தாயேவ ஸுசிபூ⁴தேன. அத்தனாதி அத்தபா⁴வேன, அதே²னம் ஸுசிபூ⁴தம் அத்தபா⁴வம் கத்வா விஹரந்தீதி வுத்தம் ஹோதி.

அப்³ரஹ்மசரியந்தி அஸேட்ட²சரியம். ப்³ரஹ்மம் ஸேட்ட²ம் ஆசாரம் சரந்தீதி ப்³ரஹ்மசாரீ. ஆராசாரீதி அப்³ரஹ்மசரியதோ தூ³ராசாரீ. மேது²னாதி ராக³பரியுட்டா²னவஸேன ஸதி³ஸத்தா மேது²னகாதி லத்³த⁴வோஹாரேஹி படிஸேவிதப்³ப³தோ மேது²னோதி ஸங்க²ம் க³தா அஸத்³த⁴ம்மா. கா³மத⁴ம்மாதி கா³மவாஸீனம் த⁴ம்மா.

முஸாவாதா³தி அலிகவசனா துச்ச²வசனா. ஸச்சம் வத³ந்தீதி ஸச்சவாதீ³. ஸச்சேன ஸச்சம் ஸம்த³ஹந்தி க⁴ட்டேந்தீதி ஸச்சஸந்தா⁴, ந அந்தரந்தரா முஸா வத³ந்தீதி அத்தோ². யோ ஹி புரிஸோ கதா³சி முஸாவாத³ம் வத³தி, கதா³சி ஸச்சம். தஸ்ஸ முஸாவாதே³ன அந்தரிதத்தா ஸச்சம் ஸச்சேன ந க⁴டீயதி. தஸ்மா ந ஸோ ஸச்சஸந்தோ⁴. இமே பன ந தாதி³ஸா, ஜீவிதஹேதுபி முஸா அவத்வா ஸச்சேன ஸச்சம் ஸம்த³ஹந்தியேவாதி ஸச்சஸந்தா⁴. தே²தாதி தி²ரா, டி²தகதா²தி அத்தோ². ஏகோ புக்³க³லோ ஹலித்³தி³ராகோ³ விய து²ஸராஸிம்ஹி நிகா²தகா²ணு விய அஸ்ஸபிட்டே² ட²பிதகும்ப⁴ண்ட³மிவ ச ந டி²தகதோ² ஹோதி. ஏகோ பாஸாணலேகா² விய இந்த³கீ²லோ விய ச டி²தகதோ² ஹோதி, அஸினா ஸீஸம் சி²ந்த³ந்தேபி த்³வே கதா² ந கதே²தி. அயம் வுச்சதி தே²தோ. பச்சயிகாதி பத்தியாயிதப்³ப³கா, ஸத்³தா⁴யிகாதி அத்தோ². ஏகச்சோ ஹி புக்³க³லோ ந பச்சயிகோ ஹோதி, ‘‘இத³ம் கேன வுத்தம், அஸுகேன நாமா’’தி வுத்தே ‘‘மா தஸ்ஸ வசனம் ஸத்³த³ஹதா²’’தி வத்தப்³ப³தம் ஆபஜ்ஜதி. ஏகோ பச்சயிகோ ஹோதி, ‘‘இத³ம் கேன வுத்தம், அஸுகேனா’’தி வுத்தே ‘‘யதி³ தேன வுத்தம், இத³மேவ பமாணம், இதா³னி படிக்கி²பிதப்³ப³ம் நத்தி², ஏவமேவம் இத³’’ந்தி வத்தப்³ப³தம் ஆபஜ்ஜதி. அயம் வுச்சதி பச்சயிகோ. அவிஸம்வாத³கா லோகஸ்ஸாதி தாய ஸச்சவாதி³தாய லோகம் ந விஸம்வாதே³ந்தீதி அத்தோ².

ஸுராமேரயமஜ்ஜபமாத³ட்டா²னந்தி ஸுராமேரயமஜ்ஜானம் பானசேதனாஸங்கா²தம் பமாத³காரணம். ஏகப⁴த்திகாதி பாதராஸப⁴த்தம் ஸாயமாஸப⁴த்தந்தி த்³வே ப⁴த்தானி. தேஸு பாதராஸப⁴த்தம் அந்தோமஜ்ஜ²ன்ஹிகேன பரிச்சி²ன்னம், இதரம் மஜ்ஜ²ன்ஹிகதோ உத்³த⁴ம் அந்தோஅருணேன. தஸ்மா அந்தோமஜ்ஜ²ன்ஹிகே த³ஸக்க²த்தும் பு⁴ஞ்ஜமானாபி ஏகப⁴த்திகாவ ஹோந்தி. தம் ஸந்தா⁴ய வுத்தம் – ‘‘ஏகப⁴த்திகா’’தி. ரத்திபோ⁴ஜனம் ரத்தி, ததோ உபரதாதி ரத்தூபரதா. அதிக்கந்தே மஜ்ஜ²ன்ஹிகே யாவ ஸூரியத்த²ங்க³மனா போ⁴ஜனம் விகாலபோ⁴ஜனம் நாம, ததோ விரதத்தா விரதா விகாலபோ⁴ஜனா.

ஸாஸனஸ்ஸ அனனுலோமத்தா விஸூகம் படாணிபூ⁴தம் த³ஸ்ஸனந்தி விஸூகத³ஸ்ஸனம், அத்தனா நச்சனனச்சாபனாதி³வஸேன நச்சஞ்ச கீ³தஞ்ச வாதி³தஞ்ச, அந்தமஸோ மயூரனச்சனாதி³வஸேனாபி பவத்தானம் நச்சாதீ³னம் விஸூகபூ⁴தம் த³ஸ்ஸனஞ்சாதி நச்சகீ³தவாதி³தவிஸூகத³ஸ்ஸனம். நச்சாதீ³னி ஹி அத்தனா பயோஜேதும் வா பரேஹி பயோஜாபேதும் வா பயுத்தானி பஸ்ஸிதும் வா நேவ பி⁴க்கூ²னம், ந பி⁴க்கு²னீனம் வட்டந்தி.

மாலாதீ³ஸு மாலாதி யம்கிஞ்சி புப்ப²ம். க³ந்த⁴ந்தி யம்கிஞ்சி க³ந்த⁴ஜாதம். விலேபனந்தி ச²விராக³கரணம். தத்த² பிளந்த⁴ந்தோ தா⁴ரேதி நாம, ஊனட்டா²னம் பூரேந்தோ மண்டே³தி நாம, க³ந்த⁴வஸேன ச²விராக³வஸேன ச ஸாதி³யந்தோ விபூ⁴ஸேதி நாம. டா²னம் வுச்சதி காரணம், தஸ்மா யாய து³ஸ்ஸீல்யசேதனாய தானி மாலாதா⁴ரணாதீ³னி மஹாஜனோ கரோதி, ததோ படிவிரதாதி அத்தோ². உச்சாஸயனம் வுச்சதி பமாணாதிக்கந்தம், மஹாஸயனம் அகப்பியத்த²ரணம், ததோ படிவிரதாதி அத்தோ².

கீவமஹப்ப²லோதி கித்தகம் மஹப்ப²லோ. ஸேஸபதே³ஸுபி ஏஸேவ நயோ. பஹூதரத்தரதனானந்தி பஹூதேன ரத்தஸங்கா²தேன ரதனேன ஸமன்னாக³தானம், ஸகலஜம்பு³தீ³பதலம் பே⁴ரிதலஸதி³ஸம் கத்வா கடிப்பமாணேஹி ஸத்தஹி ரதனேஹி பூரிதானந்தி அத்தோ². இஸ்ஸரியாதி⁴பச்சந்தி இஸ்ஸரபா⁴வேன வா இஸ்ஸரியமேவ வா ஆதி⁴பச்சம், ந ஏத்த² ஸாஹஸிககம்மந்திபி இஸ்ஸரியாதி⁴பச்சம். ரஜ்ஜம் காரேய்யாதி ஏவரூபம் சக்கவத்திரஜ்ஜம் காரேய்ய. அங்கா³னந்திஆதீ³னி தேஸம் ஜனபதா³னம் நாமானி. கலம் நாக்³க⁴தி ஸோளஸிந்தி ஏகம் அஹோரத்தம் உபவுத்த²உபோஸதே² புஞ்ஞம் ஸோளஸபா⁴கே³ கத்வா ததோ ஏகம் பா⁴க³ஞ்ச ந அக்³க⁴தி. ஏகரத்துபோஸத²ஸ்ஸ ஸோளஸியா கலாய யம் விபாகப²லம், தம்யேவ ததோ ப³ஹுதரம் ஹோதீதி அத்தோ². கபணந்தி பரித்தகம்.

அப்³ரஹ்மசரியாதி அஸேட்ட²சரியதோ. ரத்திம் ந பு⁴ஞ்ஜேய்ய விகாலபோ⁴ஜனந்தி உபோஸத²ம் உபவஸந்தோ ரத்திபோ⁴ஜனஞ்ச தி³வாவிகாலபோ⁴ஜனஞ்ச ந பு⁴ஞ்ஜேய்ய. மஞ்சே ச²மாயம்வ ஸயேத² ஸந்த²தேதி முட்டி²ஹத்த²பாத³கே கப்பியமஞ்சே வா ஸுதா⁴தி³பரிகம்மகதாய பூ⁴மியம் வா திணபண்ணபலாலாதீ³னி ஸந்த²ரித்வா கதே ஸந்த²தே வா ஸயேதா²தி அத்தோ². ஏதம் ஹி அட்ட²ங்கி³கமாஹுபோஸத²ந்தி ஏவம் பாணாதிபாதாதீ³னி அஸமாசரந்தேன உபவுத்த²ம் உபோஸத²ம் அட்ட²ஹி அங்கே³ஹி ஸமன்னாக³தத்தா அட்ட²ங்கி³கந்தி வத³ந்தி. தம் பன உபவஸந்தேன ‘‘ஸ்வே உபோஸதி²கோ ப⁴விஸ்ஸாமீ’’தி அஜ்ஜேவ ‘‘இத³ஞ்ச இத³ஞ்ச கரேய்யாதா²’’தி ஆஹாராதி³விதா⁴னம் விசாரேதப்³ப³ம். உபோஸத²தி³வஸே பாதோவ பி⁴க்கு²ஸ்ஸ வா பி⁴க்கு²னியா வா த³ஸஸீலலக்க²ணஞ்ஞுனோ உபாஸகஸ்ஸ வா உபாஸிகாய வா ஸந்திகே வாசம் பி⁴ந்தி³த்வா உபோஸத²ங்கா³னி ஸமாதா³தப்³பா³னி. பாளிம் அஜானந்தேன பன ‘‘பு³த்³த⁴பஞ்ஞத்தம் உபோஸத²ம் அதி⁴ட்டா²மீ’’தி அதி⁴ட்டா²தப்³ப³ம். அஞ்ஞம் அலப⁴ந்தேன அத்தனாபி அதி⁴ட்டா²தப்³ப³ம், வசீபே⁴தோ³ பன காதப்³போ³யேவ. உபோஸத²ம் உபவஸந்தேன பரூபரோத⁴படிஸம்யுத்தா கம்மந்தா ந விசாரேதப்³பா³, ஆயவயக³ணனம் கரோந்தேன ந வீதினாமேதப்³ப³ம், கே³ஹே பன ஆஹாரம் லபி⁴த்வா நிச்சப⁴த்திகபி⁴க்கு²னா விய பரிபு⁴ஞ்ஜித்வா விஹாரம் க³ந்த்வா த⁴ம்மோ வா ஸோதப்³போ³, அட்ட²திம்ஸாய ஆரம்மணேஸு அஞ்ஞதரம் வா மனஸிகாதப்³ப³ம்.

ஸுத³ஸ்ஸனாதி ஸுந்த³ரத³ஸ்ஸனா. ஓபா⁴ஸயந்தி ஓபா⁴ஸயமானா. அனுபரியந்தீதி விசரந்தி. யாவதாதி யத்தகம் டா²னம். அந்தலிக்க²கா³தி ஆகாஸங்க³மா. பபா⁴ஸந்தீதி ஜோதந்தி பபா⁴ முஞ்சந்தி. தி³ஸாவிரோசனாதி ஸப்³ப³தி³ஸாஸு விரோசமானா. அத² வா பபா⁴ஸந்தீதி தி³ஸாஹி தி³ஸா ஓபா⁴ஸந்தி. விரோசனாதி விரோசமானா. வேளுரியந்தி மணீதி வத்வாபி இமினா ஜாதிமணிபா⁴வம் த³ஸ்ஸேதி. ஏகவஸ்ஸிகவேளுவண்ணஞ்ஹி வேளுரியம் ஜாதிமணி நாம. தம் ஸந்தா⁴யேவமாஹ. ப⁴த்³த³கந்தி லத்³த⁴கம். ஸிங்கீ³ஸுவண்ணந்தி கோ³ஸிங்க³ஸதி³ஸம் ஹுத்வா உப்பன்னத்தா ஏவம் நாமகம் ஸுவண்ணம். கஞ்சனந்தி பப்³ப³தேய்யம் பப்³ப³தே ஜாதஸுவண்ணம். ஜாதரூபந்தி ஸத்து²வண்ணஸுவண்ணம். ஹடகந்தி கிபில்லிகாஹி நீஹடஸுவண்ணம். நானுப⁴வந்தீதி ந பாபுணந்தி. சந்த³ப்பபா⁴தி ஸாமிஅத்தே² பச்சத்தம், சந்த³ப்பபா⁴யாதி அத்தோ². உபவஸ்ஸுபோஸத²ந்தி உபவஸித்வா உபோஸத²ம். ஸுகு²த்³ரயானீதி ஸுக²ப²லானி ஸுக²வேத³னீயானி. ஸக்³க³முபேந்தி டா²னந்தி ஸக்³க³ஸங்கா²தம் டா²னம் உபக³ச்ச²ந்தி, கேனசி அனிந்தி³தா ஹுத்வா தே³வலோகே உப்பஜ்ஜந்தீதி அத்தோ². ஸேஸமேத்த² யம் அந்தரந்தரா ந வுத்தம், தம் வுத்தானுஸாரேனேவ வேதி³தப்³ப³ந்தி.

மஹாவக்³கோ³ து³தியோ.