5. மேத்தஸுத்தவண்ணனா

15. பஞ்சமே ஸுக²ம் ஸுபதீதி யதா² ஸேஸஜனா ஸம்பரிவத்தமானா காகச்ச²மானா து³க்க²ம் ஸுபந்தி, ஏவம் அஸுபித்வா ஸுக²ம் ஸுபதி. நித்³த³ம் ஓக்கமந்தோபி ஸமாபத்திம் ஸமாபன்னோ விய ஹோதி. ஸுக²ம் படிபு³ஜ்ஜ²தீதி யதா² அஞ்ஞே நித்து²னந்தா விஜம்ப⁴மானா ஸம்பரிவத்தந்தா து³க்க²ம் படிபு³ஜ்ஜ²ந்தி, ஏவம் அப்படிபு³ஜ்ஜி²த்வா விகஸமானம் விய பது³மம் ஸுக²ம் நிப்³பி³காரோ படிபு³ஜ்ஜ²தி. ந பாபகம் ஸுபினம் பஸ்ஸதீதி ஸுபினம் பஸ்ஸந்தோபி ப⁴த்³த³கமேவ ஸுபினம் பஸ்ஸதி, சேதியம் வந்த³ந்தோ விய பூஜம் கரோந்தோ விய ச த⁴ம்மம் ஸுணந்தோ விய ச ஹோதி. யதா² பனஞ்ஞே அத்தானம் சோரேஹி ஸம்பரிவாரிதம் விய வாளேஹி உபத்³து³தம் விய பபாதே பதந்தம் விய ச பஸ்ஸந்தி, ந ஏவம் பாபகம் ஸுபினம் பஸ்ஸதி.

மனுஸ்ஸானம் பியோ ஹோதீதி உரே ஆமுக்கமுத்தாஹாரோ விய ஸீஸே பிளந்தி⁴தமாலா விய ச மனுஸ்ஸானம் பியோ ஹோதி மனாபோ. அமனுஸ்ஸானம் பியோ ஹோதீதி யதே²வ மனுஸ்ஸானம், அமனுஸ்ஸானம்பி பியோ ஹோதி விஸாக²த்தே²ரோ விய. வத்து² விஸுத்³தி⁴மக்³கே³ (விஸுத்³தி⁴. 1.258) மேத்தாகம்மட்டா²னனித்³தே³ஸே வித்தா²ரிதமேவ. தே³வதா ரக்க²ந்தீதி புத்தமிவ மாதாபிதரோ தே³வதா ரக்க²ந்தி. நாஸ்ஸ அக்³கி³ வா விஸம் வா ஸத்த²ம் வா கமதீதி மேத்தாவிஹாரிஸ்ஸ காயே உத்தராய உபாஸிகாய விய அக்³கி³ வா, ஸம்யுத்தபா⁴ணகசூளஸீவத்தே²ரஸ்ஸேவ விஸம் வா, ஸம்கிச்சஸாமணேரஸ்ஸேவ ஸத்த²ம் வா ந கமதி நப்பவிஸதி, நாஸ்ஸ காயம் விகோபேதீதி வுத்தம் ஹோதி. தே⁴னுவத்து²ம்பி சேத்த² கத²யந்தி. ஏகா கிர தே⁴னு வச்ச²கஸ்ஸ கீ²ரதா⁴ரம் முஞ்சமானா அட்டா²ஸி. ஏகோ லுத்³த³கோ ‘‘தம் விஜ்ஜி²ஸ்ஸாமீ’’தி ஹத்தே²ன ஸம்பரிவத்தேத்வா தீ³க⁴த³ண்ட³ம் ஸத்திம் முஞ்சி. ஸா தஸ்ஸா ஸரீரம் ஆஹச்ச தாலபண்ணம் விய வட்டமானா க³தா, நேவ உபசாரப³லேன ந அப்பனாப³லேன, கேவலம் வச்ச²கே ப³லவஹிதசித்ததாய. ஏவம் மஹானுபா⁴வா மேத்தா.

துவடம் சித்தம் ஸமாதி⁴யதீதி மேத்தாவிஹாரினோ கி²ப்பமேவ சித்தம் ஸமாதி⁴யதி, நத்தி² தஸ்ஸ த³ந்தா⁴யிதத்தம். முக²வண்ணோ விப்பஸீத³தீதி ப³ந்த⁴னா பவுத்ததாலபக்கம் விய சஸ்ஸ விப்பஸன்னவண்ணம் முக²ம் ஹோதி. அஸம்மூள்ஹோ காலம் கரோதீதி மேத்தாவிஹாரினோ ஸம்மோஹமரணம் நாம நத்தி², அஸம்மூள்ஹோ பன நித்³த³ம் ஓக்கமந்தோ விய காலம் கரோதி. உத்தரி அப்படிவிஜ்ஜ²ந்தோதி மேத்தாஸமாபத்திதோ உத்தரி அரஹத்தம் அதி⁴க³ந்தும் அஸக்கோந்தோ இதோ சவித்வா ஸுத்தப்பபு³த்³தோ⁴ விய ப்³ரஹ்மலோகம் உபபஜ்ஜதீதி.