8. கல்யாணமித்ததாதி³வக்³க³வண்ணனா

71. அட்ட²மஸ்ஸ பட²மே கல்யாணமித்ததாதி கல்யாணா மித்தா அஸ்ஸாதி கல்யாணமித்தோ, தஸ்ஸ பா⁴வோ கல்யாணமித்ததா. ஸேஸம் வுத்தபடிபக்க²னயேன வேதி³தப்³ப³ம்.

72-73. து³தியே அனுயோகோ³தி யோகோ³ பயோகோ³. அனனுயோகோ³தி அயோகோ³ அப்பயோகோ³. அனுயோகா³தி அனுயோகே³ன. அனனுயோகா³தி அனனுயோகே³ன. குஸலானம் த⁴ம்மானந்தி சதுபூ⁴மககுஸலத⁴ம்மானம். ததியம் உத்தானத்த²மேவ.

74. சதுத்தே² போ³ஜ்ஜ²ங்கா³தி பு³ஜ்ஜ²னகஸத்தஸ்ஸ அங்க³பூ⁴தா ஸத்த த⁴ம்மா. யாய வா த⁴ம்மஸாமக்³கி³யா ஸோ பு³ஜ்ஜ²தி, ஸம்மோஹனித்³தா³தோ வா வுட்டா²தி, சதுஸச்சத⁴ம்மம் வா ஸச்சி²கரோதி. தஸ்ஸா போ³தி⁴யா அங்க³பூ⁴தாதிபி போ³ஜ்ஜ²ங்கா³. ‘‘போ³ஜ்ஜ²ங்கா³தி கேனட்டே²ன போ³ஜ்ஜ²ங்கா³? பு³ஜ்ஜ²ந்தீதி போ³ஜ்ஜ²ங்கா³, அனுபு³ஜ்ஜ²ந்தீதி போ³ஜ்ஜ²ங்கா³, படிபு³ஜ்ஜ²ந்தீதி போ³ஜ்ஜ²ங்கா³, ஸம்பு³ஜ்ஜ²ந்தீதி போ³ஜ்ஜ²ங்கா³, போ³தா⁴ய ஸம்வத்தந்தீதி போ³ஜ்ஜ²ங்கா³’’தி (படி. ம. 2.17). ஏவம் பனேதம் பத³ம் விப⁴த்தமேவ.

75. பஞ்சமே பா⁴வனாபாரிபூரிம் க³ச்ச²ந்தீதி இமினா பதே³ன போ³ஜ்ஜ²ங்கா³னம் யாதா²வஸரஸபூ⁴மி நாம கதி²தா. ஸா பனேஸா சதுப்³பி³தா⁴ ஹோதி – விபஸ்ஸனா, விபஸ்ஸனாபாத³கஜ்ஜா²னம், மக்³கோ³, ப²லந்தி. தத்த² விபஸ்ஸனாய உப்பஜ்ஜனகாலே போ³ஜ்ஜ²ங்கா³ காமாவசரா ஹோந்தி, விபஸ்ஸனாபாத³கஜ்ஜா²னம்ஹி உப்பஜ்ஜனகாலே ரூபாவசரஅரூபாவசரா, மக்³க³ப²லேஸு உப்பஜ்ஜனகாலே லோகுத்தரா. இதி இமஸ்மிம் ஸுத்தே போ³ஜ்ஜ²ங்கா³ சதுபூ⁴மகா கதி²தா.

76. ச²ட்ட²ஸ்ஸ அட்டு²ப்பத்திகோ நிக்கே²போ. அட்டு²ப்பத்தியம் ஹேதம் நிக்கி²த்தம், ஸம்ப³ஹுலா கிர பி⁴க்கூ² த⁴ம்மஸபா⁴யம் ஸன்னிஸின்னா. தேஸம் அந்தரே ப³ந்து⁴லமல்லஸேனாபதிம் ஆரப்³ப⁴ அயம் கதா² உத³பாதி³, ‘‘ஆவுஸோ, அஸுகம் நாம குலம் புப்³பே³ ப³ஹுஞாதிகம் அஹோஸி ப³ஹுபக்க²ம், இதா³னி அப்பஞாதிகம் அப்பபக்க²ம் ஜாத’’ந்தி. அத² ப⁴க³வா தேஸம் சித்தாசாரம் ஞத்வா ‘‘மயி க³தே மஹதீ தே³ஸனா ப⁴விஸ்ஸதீ’’தி ஞத்வா க³ந்த⁴குடிதோ நிக்க²ம்ம த⁴ம்மஸபா⁴யம் பஞ்ஞத்தவரபு³த்³தா⁴ஸனே நிஸீதி³த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி ஆஹ. ப⁴க³வா அஞ்ஞா கா³மனிக³மாதி³கதா² நத்தி², அஸுகம் நாம குலம் புப்³பே³ ப³ஹுஞாதிகம் அஹோஸி ப³ஹுபக்க²ம், இதா³னி அப்பஞாதிகம் அப்பபக்க²ம் ஜாதந்தி வத³ந்தா நிஸின்னம்ஹாதி. ஸத்தா² இமிஸ்ஸா அட்டு²ப்பத்தியா அப்பமத்திகா ஏஸா, பி⁴க்க²வே, பரிஹானீதி இத³ம் ஸுத்தம் ஆரபி⁴.

தத்த² அப்பமத்திகாதி பரித்தா பரித்தப்பமாணா. ஏதாய ஹி பரிஹானியா ஸக்³க³தோ வா மக்³க³தோ வா பரிஹானி நாம நத்தி², தி³ட்ட²த⁴ம்மிகபரிஹானிமத்தமேவ ஏதந்தி ஆஹ. ஏதம் பதிகிட்ட²ந்தி ஏதம் பச்சி²மம் ஏதம் லாமகம். யதி³த³ம் பஞ்ஞாபரிஹானீதி யா ஏஸா மம ஸாஸனே கம்மஸ்ஸகதபஞ்ஞாய ஜா²னபஞ்ஞாய விபஸ்ஸனாபஞ்ஞாய மக்³க³பஞ்ஞாய ப²லபஞ்ஞாய ச பரிஹானி, ஏஸா பச்சி²மா, ஏஸா லாமகா, ஏஸா ச²ட்³ட³னீயாதி அத்தோ².

77. ஸத்தமம்பி அட்டு²ப்பத்தியமேவ கதி²தம். த⁴ம்மஸபா⁴யம் கிர நிஸின்னேஸு பி⁴க்கூ²ஸு ஏகச்சே ஏவம் ஆஹம்ஸு – ‘‘அஸுகம் நாம குலம் புப்³பே³ அப்பஞாதிகம் அப்பபக்க²ம் அஹோஸி, இதா³னி தம் ப³ஹுஞாதிகம் ப³ஹுபக்க²ம் ஜாத’’ந்தி. கம் ஸந்தா⁴ய ஏவமாஹம்ஸூதி? விஸாக²ம் உபாஸிகம் வேஸாலிகே ச லிச்ச²வீ. ஸத்தா² தேஸம் சித்தாசாரம் ஞத்வா புரிமனயேனேவ ஆக³ந்த்வா த⁴ம்மாஸனே நிஸின்னோ ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி². தே யதா²பூ⁴தம் கத²யிம்ஸு. ஸத்தா² இமிஸ்ஸா அட்டு²ப்பத்தியா இமம் ஸுத்தம் ஆரபி⁴. தத்த² அப்பமத்திகாதி தம் ஸம்பத்திம் நிஸ்ஸாய ஸக்³க³ம் வா மக்³க³ம் வா ஸம்பத்தானம் அபா⁴வதோ பரித்தா. யதி³த³ம் பஞ்ஞாவுத்³தீ⁴தி கம்மஸ்ஸகதபஞ்ஞாதீ³னம் வுத்³தி⁴. தஸ்மாதி யஸ்மா ஞாதீனம் வுத்³தி⁴ நாம தி³ட்ட²த⁴ம்மிகமத்தா அப்பா பரித்தா, ஸா ஸக்³க³ம் வா மக்³க³ம் வா பாபேதும் அஸமத்தா², தஸ்மா. பஞ்ஞாவுத்³தி⁴யாதி கம்மஸ்ஸகதாதி³பஞ்ஞாய வுத்³தி⁴யா.

78. அட்ட²மம்பி அட்டு²ப்பத்தியமேவ கதி²தம். ஸம்ப³ஹுலா கிர பி⁴க்கூ² த⁴ம்மஸபா⁴யம் ஸன்னிஸின்னா மஹாத⁴னஸேட்டி²புத்தம் ஆரப்³ப⁴ ‘‘அஸுகம் நாம குலம் புப்³பே³ மஹாபோ⁴க³ம் மஹாஹிரஞ்ஞஸுவண்ணம் அஹோஸி, தம் இதா³னி அப்பபோ⁴க³ம் ஜாத’’ந்தி கத²யிம்ஸு. ஸத்தா² புரிமனயேனேவ ஆக³ந்த்வா தேஸம் வசனம் ஸுத்வா இமம் ஸுத்தம் ஆரபி⁴.

79. நவமம்பி அட்டு²ப்பத்தியமேவ வுத்தம். த⁴ம்மஸபா⁴யம் கிர ஸன்னிஸின்னா பி⁴க்கூ² காகவலியஸேட்டி²ஞ்ச புண்ணஸேட்டி²ஞ்ச ஆரப்³ப⁴ ‘‘அஸுகம் நாம குலம் புப்³பே³ அப்பபோ⁴க³ம் அஹோஸி, தம் இதா³னி மஹாபோ⁴க³ம் ஜாத’’ந்தி கத²யிம்ஸு. ஸத்தா² புரிமனயேனேவ ஆக³ந்த்வா தேஸம் வசனம் ஸுத்வா இமம் ஸுத்தம் ஆரபி⁴. ஸேஸம் இமேஸு த்³வீஸுபி ஹேட்டா² வுத்தனயேனேவ வேதி³தப்³ப³ம்.

80. த³ஸமம்பி அட்டு²ப்பத்தியம் வுத்தம். த⁴ம்மஸபா⁴யம் கிர பி⁴க்கூ² கோஸலமஹாராஜானம் ஆரப்³ப⁴ ‘‘அஸுகம் நாம குலம் புப்³பே³ மஹாயஸம் மஹாபரிவாரம் அஹோஸி, இதா³னி அப்பயஸம் அப்பபரிவாரம் ஜாத’’ந்தி கத²யிம்ஸு. ப⁴க³வா புரிமனயேனேவ ஆக³ந்த்வா தேஸம் வசனம் ஸுத்வா இமம் த⁴ம்மதே³ஸனம் ஆரபி⁴. ஸேஸம் வுத்தனயேனேவ வேதி³தப்³ப³ந்தி.

கல்யாணமித்ததாதி³வக்³க³வண்ணனா.