5. பணிஹிதஅச்ச²வக்³க³வண்ணனா

41. பஞ்சமஸ்ஸ பட²மே ஸேய்யதா²பீதி ஓபம்மத்தே² நிபாதோ. தத்ர ப⁴க³வா கத்த²சி அத்தே²ன உபமம் பரிவாரேத்வா த³ஸ்ஸேதி வத்த²ஸுத்தே (ம. நி. 1.70 ஆத³யோ) விய, பாரிச்ச²த்தகோபம- (அ. நி. 7.69) அக்³கி³க்க²ந்தோ⁴பமாதி³ஸுத்தேஸு (அ. நி. 7.72) விய ச, கத்த²சி உபமாய அத்த²ம் பரிவாரேத்வா த³ஸ்ஸேதி லோணம்பி³லஸுத்தே (அ. நி. 3.101) விய, ஸுவண்ணகாரஸுத்தஸூரியோபமாதி³ஸுத்தேஸு (அ. நி. 7.66) விய ச. இமஸ்மிம் பன ஸாலிஸூகோபமே உபமாய அத்த²ம் பரிவாரேத்வா த³ஸ்ஸேந்தோ ஸேய்யதா²பி, பி⁴க்க²வேதிஆதி³மாஹ. தத்த² ஸாலிஸூகந்தி ஸாலிப²லஸ்ஸ ஸூகம். யவஸூகேபி ஏஸேவ நயோ. வா-ஸத்³தோ³ விகப்பத்தோ². மிச்சா²பணிஹிதந்தி மிச்சா²ட²பிதம். யதா² விஜ்ஜி²தும் ஸக்கோதி, ந ஏவம் உத்³த⁴க்³க³ம் கத்வா ட²பிதந்தி அத்தோ². பே⁴ச்ச²தீதி பி⁴ந்தி³ஸ்ஸதி, ச²விம் சி²ந்தி³ஸ்ஸதீதி அத்தோ². மிச்சா²பணிஹிதேன சித்தேனாதி மிச்சா²ட²பிதேன சித்தேன. வட்டவஸேன உப்பன்னசித்தம் ஸந்தா⁴யேதம் வுத்தம். அவிஜ்ஜந்தி அட்ட²ஸு டா²னேஸு அஞ்ஞாணபூ⁴தம் க⁴னப³ஹலம் மஹாஅவிஜ்ஜம். விஜ்ஜம் உப்பாதே³ஸ்ஸதீதி ஏத்த² விஜ்ஜந்தி அரஹத்தமக்³க³ஞாணம். நிப்³பா³னந்தி தண்ஹாவானதோ நிக்க²ந்தபா⁴வேன ஏவம் வுத்தம் அமதம். ஸச்சி²கரிஸ்ஸதீதி பச்சக்க²ம் கரிஸ்ஸதி.

42. து³தியே ஸம்மாபணிஹிதந்தி யதா² பி⁴ந்தி³தும் ஸக்கோதி, ஏவம் உத்³த⁴க்³க³ம் கத்வா ஸுட்டு² ட²பிதம். அக்கந்தந்தி ஏத்த² பாதே³னேவ அக்கந்தம் நாம ஹோதி, ஹத்தே²ன உப்பீளிதம். ருள்ஹிஸத்³த³வஸேன பன அக்கந்தந்தேவ வுத்தம். அயஞ்ஹேத்த² அரியவோஹாரோ. கஸ்மா பன அஞ்ஞே ஸேபண்ணிகண்டகமத³னகண்டகாத³யோ மஹந்தே அக்³க³ஹேத்வா ஸுகு²மம் து³ப்³ப³லம் ஸாலிஸூகயவஸூகமேவ க³ஹிதந்தி? அப்பமத்தகஸ்ஸாபி குஸலகம்மஸ்ஸ விவட்டாய ஸமத்த²பா⁴வத³ஸ்ஸனத்த²ம். யதா² ஹி ஸுகு²மம் து³ப்³ப³லம் ஸாலிஸூகம் வா யவஸூகம் வா ஹோது, மஹந்தமஹந்தா ஸேபண்ணிகண்டகமத³னகண்டகாத³யோ வா, ஏதேஸு யம்கிஞ்சி மிச்சா² ட²பிதம் ஹத்த²ம் வா பாத³ம் வா பி⁴ந்தி³தும் லோஹிதம் வா உப்பாதே³தும் ந ஸக்கோதி, ஸம்மா ட²பிதம் பன ஸக்கோதி, ஏவமேவ அப்பமத்தகம் திணமுட்டி² மத்ததா³னகுஸலம் வா ஹோது, மஹந்தம் வேலாமதா³னாதி³குஸலம் வா, ஸசே வட்டஸம்பத்திம் பத்தே²த்வா வட்டஸன்னிஸ்ஸிதவஸேன மிச்சா² ட²பிதம் ஹோதி, வட்டமேவ ஆஹரிதும் ஸக்கோதி, நோ விவட்டம். ‘‘இத³ம் மே தா³னம் ஆஸவக்க²யாவஹம் ஹோதூ’’தி ஏவம் பன விவட்டம் பத்தே²ந்தேன விவட்டவஸேன ஸம்மா ட²பிதம் அரஹத்தம்பி பச்சேகபோ³தி⁴ஞாணம்பி ஸப்³ப³ஞ்ஞுதஞாணம்பி தா³தும் ஸக்கோதியேவ. வுத்தஞ்ஹேதம் –

‘‘படிஸம்பி⁴தா³ விமோக்கா² ச, யா ச ஸாவகபாரமீ;

பச்சேகபோ³தி⁴ பு³த்³த⁴பூ⁴மி, ஸப்³ப³மேதேன லப்³ப⁴தீ’’தி. (கு². பா. 8.15);

இமஸ்மிம் ஸுத்தத்³வயே ச வட்டவிவட்டம் கதி²தம்.

43. ததியே பது³ட்ட²சித்தந்தி தோ³ஸேன பது³ட்ட²சித்தம். சேதஸா சேதோபரிச்சாதி அத்தனோ சித்தேன தஸ்ஸ சித்தம் பரிச்சி²ந்தி³த்வா. யதா²ப⁴தம் நிக்கி²த்தோதி யதா² ஆஹரித்வா ட²பிதோ. ஏவம் நிரயேதி ஏவம் நிரயே டி²தோயேவாதி வத்தப்³போ³. அபாயந்திஆதி³ ஸப்³ப³ம் நிரயவேவசனமேவ. நிரயோ ஹி அயஸங்கா²தா ஸுகா² அபேதோதி அபாயோ, து³க்க²ஸ்ஸ க³தி படிஸரணந்தி து³க்³க³தி, து³க்கடகாரினோ ஏத்த² விவஸா நிபதந்தீதி வினிபாதோ, நிரஸ்ஸாத³த்தே²ன நிரயோ.

44. சதுத்தே² பஸன்னந்தி ஸத்³தா⁴பஸாதே³ன பஸன்னம். ஸுக³திந்தி ஸுக²ஸ்ஸ க³திம். ஸக்³க³ம் லோகந்தி ரூபாதி³ஸம்பத்தீஹி ஸுட்டு² அக்³க³ம் லோகம்.

45. பஞ்சமே உத³கரஹதோ³தி உத³கத³ஹோ. ஆவிலோதி அவிப்பஸன்னோ. லுளிதோதி அபரிஸண்டி²தோ. கலலீபூ⁴தோதி கத்³த³மீபூ⁴தோ. ஸிப்பிஸம்பு³கந்திஆதீ³ஸு ஸிப்பியோ ச ஸம்பு³கா ச ஸிப்பிஸம்பு³கம். ஸக்க²ரா ச கட²லானி ச ஸக்க²ரகட²லம். மச்சா²னம் கு³ம்ப³ம் க⁴டாதி மச்ச²கு³ம்ப³ம். சரந்தம்பி திட்ட²ந்தம்பீதி ஏத்த² ஸக்க²ரகட²லம் திட்ட²தியேவ, இதரானி சரந்திபி திட்ட²ந்திபி. யதா² பன அந்தரந்தரா டி²தாஸுபி நிஸின்னாஸுபி நிபஜ்ஜமானாஸுபி ‘‘ஏதா கா³வியோ சரந்தீ’’தி சரந்தியோ உபாதா³ய இதராபி ‘‘சரந்தீ’’தி வுச்சந்தி, ஏவம் திட்ட²ந்தமேவ ஸக்க²ரகட²லம் உபாதா³ய இதரம்பி த்³வயம் ‘‘திட்ட²ந்த’’ந்தி வுத்தம், இதரம் த்³வயம் சரந்தம் உபாதா³ய ஸக்க²ரகட²லம்பி ‘‘சரந்த’’ந்தி வுத்தம்.

ஆவிலேனாதி பஞ்சஹி நீவரணேஹி பரியோனத்³தே⁴ன. அத்தத்த²ம் வாதிஆதீ³ஸு அத்தனோ தி³ட்ட²த⁴ம்மிகோ லோகியலோகுத்தரமிஸ்ஸகோ அத்தோ² அத்தத்தோ² நாம. அத்தனோவ ஸம்பராயே லோகியலோகுத்தரமிஸ்ஸகோ அத்தோ² பரத்தோ² நாம ஹோதி. ஸோ ஹி பரத்த² அத்தோ²தி பரத்தோ². தது³ப⁴யம் உப⁴யத்தோ² நாம. அபிச அத்தனோ தி³ட்ட²த⁴ம்மிகஸம்பராயிகோபி லோகியலோகுத்தரோ அத்தோ² அத்தத்தோ² நாம, பரஸ்ஸ தாதி³ஸோவ அத்தோ² பரத்தோ² நாம, தது³ப⁴யம்பி உப⁴யத்தோ² நாம. உத்தரிம் வா மனுஸ்ஸத⁴ம்மாதி த³ஸகுஸலகம்மபத²ஸங்கா²தா மனுஸ்ஸத⁴ம்மா உத்தரிம். அயஞ்ஹி த³ஸவிதோ⁴ த⁴ம்மோ வினாபி அஞ்ஞம் ஸமாதா³பகம் ஸத்த²ந்தரகப்பாவஸானே ஜாதஸம்வேகே³ஹி மனுஸ்ஸேஹி ஸயமேவ ஸமாதி³ன்னத்தா மனுஸ்ஸத⁴ம்மோதி வுச்சதி, ததோ உத்தரிம் பன ஜா²னவிபஸ்ஸனாமக்³க³ப²லானி வேதி³தப்³பா³னி. அலமரியஞாணத³ஸ்ஸனவிஸேஸந்தி அரியானம் யுத்தம், அரியபா⁴வம் வா காதும் ஸமத்த²ம் ஞாணத³ஸ்ஸனஸங்கா²தம் விஸேஸம். ஞாணமேவ ஹி ஜானனட்டே²ன ஞாணம், த³ஸ்ஸனட்டே²ன த³ஸ்ஸனந்தி வேதி³தப்³ப³ம், தி³ப்³ப³சக்கு²ஞாணவிபஸ்ஸனாஞாணமக்³க³ஞாணப²லஞாணபச்சவேக்க²ணஞாணானமேதம் அதி⁴வசனம்.

46. ச²ட்டே² அச்சோ²தி அப³ஹலோ, பஸன்னோதிபி வட்டதி. விப்பஸன்னோதி ஸுட்டு² பஸன்னோ. அனாவிலோதி ந ஆவிலோ, பரிஸுத்³தோ⁴தி அத்தோ², பே²ணபுப்³பு³ளஸங்க²ஸேவாலபணகவிரஹிதோதி வுத்தம் ஹோதி. அனாவிலேனாதி பஞ்சனீவரணவிமுத்தேன. ஸேஸம் சதுத்தே² வுத்தனயமேவ. இமஸ்மிம்பி ஸுத்தத்³வயே வட்டவிவட்டமேவ கதி²தம்.

47. ஸத்தமே ருக்க²ஜாதானந்தி பச்சத்தே ஸாமிவசனம், ருக்க²ஜாதானீதி அத்தோ². ருக்கா²னமேதம் அதி⁴வசனம். யதி³த³ந்தி நிபாதமத்தம். முது³தாயாதி முது³பா⁴வேன. கோசி ஹி ருக்கோ² வண்ணேன அக்³கோ³ ஹோதி, கோசி க³ந்தே⁴ன, கோசி ரஸேன, கோசி த²த்³த⁴தாய. ப²ந்த³னோ பன முது³தாய சேவ கம்மஞ்ஞதாய ச அக்³கோ³ ஸேட்டோ²தி த³ஸ்ஸேதி. சித்தம், பி⁴க்க²வே, பா⁴விதம் ப³ஹுலீகதந்தி ஏத்த² ஸமத²விபஸ்ஸனாவஸேன பா⁴விதஞ்சேவ புனப்புனகதஞ்ச சித்தம் அதி⁴ப்பேதம். குருந்த³கவாஸி பு²ஸ்ஸமித்தத்தே²ரோ பனாஹ – ‘‘ஏகந்தம் முது³ சேவ கம்மனியஞ்ச சித்தம் நாம அபி⁴ஞ்ஞாபாத³கசதுத்த²ஜ்ஜா²னசித்தமேவ, ஆவுஸோ’’தி.

48. அட்ட²மே ஏவம் லஹுபரிவத்தந்தி ஏவம் லஹும் உப்பஜ்ஜித்வா லஹும் நிருஜ்ஜ²னகம். யாவஞ்சாதி அதி⁴மத்தபமாணத்தே² நிபாதோ, அதிவிய ந ஸுகராதி அத்தோ². இத³ந்தி நிபாதமத்தம். சித்தந்தி ஏகச்சே தாவ ஆசரியா ‘‘ப⁴வங்க³சித்த’’ந்தி வத³ந்தி, தம் பன படிக்கி²பித்வா ‘‘இத⁴ சித்தந்தி யம்கிஞ்சி அந்தமஸோ சக்கு²விஞ்ஞாணம்பி அதி⁴ப்பேதமேவா’’தி வுத்தம். இமஸ்மிம் பனத்தே² மிலிந்த³ராஜா த⁴ம்மகதி²கம் நாக³ஸேனத்தே²ரம் புச்சி², ‘‘ப⁴ந்தே நாக³ஸேன, ஏகஸ்மிம் அச்ச²ராக்க²ணே பவத்திதசித்தஸங்கா²ரா ஸசே ரூபினோ அஸ்ஸு, கீவ மஹாராஸி ப⁴வேய்யா’’தி? ‘‘வாஹஸதானம் கோ², மஹாராஜ, வீஹீனம் அட்³ட⁴சூளஞ்ச வாஹா வீஹிஸத்தம்ப³ணானி த்³வே ச தும்பா³ ஏகச்ச²ராக்க²ணே பவத்திதஸ்ஸ சித்தஸ்ஸ ஸங்க²ம்பி ந உபேந்தி, கலம்பி ந உபேந்தி, கலபா⁴க³ம்பி ந உபேந்தீ’’தி (மி. ப. 4.1.2). அத² கஸ்மா ஸம்மாஸம்பு³த்³தே⁴ன ‘‘உபமாபி ந ஸுகரா’’தி வுத்தம்? யதே²வ ஹி உபமம் படிக்கி²பித்வாபி கப்பதீ³க⁴பா⁴வஸ்ஸ யோஜனிகபப்³ப³தேன யோஜனிகஸாஸபபுண்ணனக³ரேன, நிரயது³க்க²ஸ்ஸ ஸத்திஸதாஹதோபமேன, ஸக்³க³ஸுக²ஸ்ஸ ச சக்கவத்திஸம்பத்தியா உபமா கதா, ஏவமிதா⁴பி காதப்³பா³தி? தத்த² ‘‘ஸக்கா பன, ப⁴ந்தே, உபமா காது’’ந்தி ஏவம் புச்சா²வஸேன உபமா கதா, இமஸ்மிம் ஸுத்தே புச்சா²ய அபா⁴வேன ந கதா. இத³ஞ்ஹி ஸுத்தம் த⁴ம்மதே³ஸனாபரியோஸானே வுத்தம். இதி இமஸ்மிம் ஸுத்தே சித்தராஸி நாம கதி²தோதி.

49. நவமே பப⁴ஸ்ஸரந்தி பண்ட³ரம் பரிஸுத்³த⁴ம். சித்தந்தி ப⁴வங்க³சித்தம். கிம் பன சித்தஸ்ஸ வண்ணோ நாம அத்தீ²தி? நத்தி². நீலாதீ³னஞ்ஹி அஞ்ஞதரவண்ணம் வா ஹோது அவண்ணம் வா யம்கிஞ்சி பரிஸுத்³த⁴தாய ‘‘பப⁴ஸ்ஸர’’ந்தி வுச்சதி. இத³ம்பி நிருபக்கிலேஸதாய பரிஸுத்³த⁴ந்தி பப⁴ஸ்ஸரம். தஞ்ச கோ²தி தம் ப⁴வங்க³சித்தம். ஆக³ந்துகேஹீதி அஸஹஜாதேஹி பச்சா² ஜவனக்க²ணே உப்பஜ்ஜனகேஹி. உபக்கிலேஸேஹீதி ராகா³தீ³ஹி உபக்கிலிட்ட²த்தா உபக்கிலிட்ட²ம் நாமாதி வுச்சதி. கத²ம்? யதா² ஹி ஸீலவந்தா ஆசாரஸம்பன்னா மாதாபிதரோ வா ஆசரியுபஜ்ஜா²யா வா து³ஸ்ஸீலானம் து³ராசாரானம் அவத்தஸம்பன்னானம் புத்தானஞ்சேவ அந்தேவாஸிகஸத்³தி⁴விஹாரிகானஞ்ச வஸேன ‘‘அத்தனோ புத்தே வா அந்தேவாஸிகஸத்³தி⁴விஹாரிகே வா ந தஜ்ஜேந்தி ந ஸிக்கா²பேந்தி ந ஓவத³ந்தி நானுஸாஸந்தீ’’தி அவண்ணம் அகித்திம் லப⁴ந்தி, ஏவம்ஸம்பத³மித³ம் வேதி³தப்³ப³ம். ஆசாரஸம்பன்னா மாதாபிதரோ விய ச ஆசரியுபஜ்ஜா²யா விய ச ப⁴வங்க³சித்தம் த³ட்ட²ப்³ப³ம், புத்தாதீ³னம் வஸேன தேஸம் அகித்திலாபோ⁴ விய ஜவனக்க²ணே ரஜ்ஜனது³ஸ்ஸனமுய்ஹனஸபா⁴வானம் லோப⁴ஸஹக³தாதீ³னம் சித்தானம் வஸேன உப்பன்னேஹி ஆக³ந்துகேஹி உபக்கிலேஸேஹி பகதிபரிஸுத்³த⁴ம்பி ப⁴வங்க³சித்தம் உபக்கிலிட்ட²ம் நாம ஹோதீதி.

50. த³ஸமேபி ப⁴வங்க³சித்தமேவ சித்தம். விப்பமுத்தந்தி ஜவனக்க²ணே அரஜ்ஜமானம் அது³ஸ்ஸமானம் அமுய்ஹமானம் திஹேதுகஞாணஸம்பயுத்தாதி³குஸலவஸேன உப்பஜ்ஜமானம் ஆக³ந்துகேஹி உபக்கிலேஸேஹி விப்பமுத்தம் நாம ஹோதி. இதா⁴பி யதா² ஸீலவந்தானம் ஆசாரஸம்பன்னானம் புத்தாதீ³னம் வஸேன மாதாத³யோ ‘‘ஸோப⁴னா ஏதேயேவ அத்தனோ புத்தகாத³யோ ஸிக்கா²பேந்தி ஓவத³ந்தி அனுஸாஸந்தீ’’தி வண்ணகித்திலாபி⁴னோ ஹோந்தி, ஏவம் ஜவனக்க²ணே உப்பன்னகுஸலசித்தவஸேன இத³ம் ப⁴வங்க³சித்தம் ஆக³ந்துகேஹி உபக்கிலேஸேஹி விப்பமுத்தந்தி வுச்சதீதி.

பணிஹிதஅச்ச²வக்³க³வண்ணனா.