3. அகம்மனியவக்³க³வண்ணனா

21-22. ததியஸ்ஸ பட²மே அபா⁴விதந்தி அவட்³டி⁴தம் பா⁴வனாவஸேன அப்பவத்திதம். அகம்மனியம் ஹோதீதி கம்மக்க²மம் கம்மயோக்³க³ம் ந ஹோதி. து³தியே வுத்தவிபரியாயேன அத்தோ² வேதி³தப்³போ³. ஏத்த² ச பட²மே சித்தந்தி வட்டவஸேன உப்பன்னசித்தம், து³தியே விவட்டவஸேன உப்பன்னசித்தம். தத்த² ச வட்டம் வட்டபாத³ம், விவட்டம் விவட்டபாத³ந்தி அயம் பபே⁴தோ³ வேதி³தப்³போ³. வட்டம் நாம தேபூ⁴மகவட்டம், வட்டபாத³ம் நாம வட்டபடிலாபா⁴ய கம்மம், விவட்டம் நாம நவ லோகுத்தரத⁴ம்மா, விவட்டபாத³ம் நாம விவட்டபடிலாபா⁴ய கம்மம். இதி இமேஸு ஸுத்தேஸு வட்டவிவட்டமேவ கதி²தந்தி.

23-24. ததியே வட்டவஸேனேவ உப்பன்னசித்தம் வேதி³தப்³ப³ம். மஹதோ அனத்தா²ய ஸம்வத்ததீதி தே³வமனுஸ்ஸஸம்பத்தியோ மாரப்³ரஹ்மஇஸ்ஸரியானி ச த³த³மானம்பி புனப்புனம் ஜாதிஜராப்³யாதி⁴மரணஸோகபரிதே³வது³க்க²தோ³மனஸ்ஸுபாயாஸே க²ந்த⁴தா⁴துஆயதனபடிச்சஸமுப்பாத³வட்டானி ச த³த³மானம் கேவலம் து³க்க²க்க²ந்த⁴மேவ தே³தீதி மஹதோ அனத்தா²ய ஸம்வத்ததி நாமாதி. சதுத்தே² சித்தந்தி விவட்டவஸேனேவ உப்பன்னசித்தம்.

25-26. பஞ்சமச²ட்டே²ஸு அபா⁴விதம் அபாதுபூ⁴தந்தி அயம் விஸேஸோ. தத்ராமயதி⁴ப்பாயோ – வட்டவஸேன உப்பன்னசித்தம் நாம உப்பன்னம்பி அபா⁴விதம் அபாதுபூ⁴தமேவ ஹோதி. கஸ்மா? லோகுத்தரபாத³கஜ்ஜா²னவிபஸ்ஸனாமக்³க³ப²லனிப்³பா³னேஸு பக்க²ந்தி³தும் அஸமத்த²த்தா. விவட்டவஸேன உப்பன்னம் பன பா⁴விதம் பாதுபூ⁴தம் நாம ஹோதி. கஸ்மா? தேஸு த⁴ம்மேஸு பக்க²ந்தி³தும் ஸமத்த²த்தா. குருந்த³கவாஸீ பு²ஸ்ஸமித்தத்தே²ரோ பனாஹ – ‘‘மக்³க³சித்தமேவ, ஆவுஸோ, பா⁴விதம் பாதுபூ⁴தம் நாம ஹோதீ’’தி.

27-28. ஸத்தமட்ட²மேஸு அப³ஹுலீகதந்தி புனப்புனம் அகதம். இமானிபி த்³வே வட்டவிவட்டவஸேன உப்பன்னசித்தானேவ வேதி³தப்³பா³னீதி.

29. நவமே ‘‘ஜாதிபி து³க்கா²’’திஆதி³னா நயேன வுத்தம் து³க்க²ம் அதி⁴வஹதி ஆஹரதீதி து³க்கா²தி⁴வஹம். து³க்கா²தி⁴வாஹந்திபி பாடோ². தஸ்ஸத்தோ² – லோகுத்தரபாத³கஜ்ஜா²னாதி³ அரியத⁴ம்மாபி⁴முக²ம் து³க்கே²ன அதி⁴வாஹீயதி பேஸீயதீதி து³க்கா²தி⁴வாஹம். இத³ம்பி வட்டவஸேன உப்பன்னசித்தமேவ. தஞ்ஹி வுத்தப்பகாரா தே³வமனுஸ்ஸாதி³ஸம்பத்தியோ த³த³மானம்பி ஜாதிஆதீ³னம் அதி⁴வஹனதோ து³க்கா²தி⁴வஹம், அரியத⁴ம்மாதி⁴க³மாய து³ப்பேஸனதோ து³க்கா²தி⁴வாஹஞ்ச நாம ஹோதீதி.

30. த³ஸமே விவட்டவஸேன உப்பன்னசித்தமேவ சித்தம். தஞ்ஹி மானுஸகஸுக²தோ தி³ப்³ப³ஸுக²ம், தி³ப்³ப³ஸுக²தோ ஜா²னஸுக²ம், ஜா²னஸுக²தோ விபஸ்ஸனாஸுக²ம், விபஸ்ஸனாஸுக²தோ மக்³க³ஸுக²ம், மக்³க³ஸுக²தோ ப²லஸுக²ம், ப²லஸுக²தோ நிப்³பா³னஸுக²ம் அதி⁴வஹதி ஆஹரதீதி ஸுகா²தி⁴வஹம் நாம ஹோதி, ஸுகா²தி⁴வாஹம் வா. தஞ்ஹி லோகுத்தரபாத³கஜ்ஜா²னாதி³அரியத⁴ம்மாபி⁴முக²ம் ஸுபேஸயம் விஸ்ஸட்ட²இந்த³வஜிரஸதி³ஸம் ஹோதீதி ஸுகா²தி⁴வாஹந்திபி வுச்சதி. இமஸ்மிம்பி வக்³கே³ வட்டவிவட்டமேவ கதி²தந்தி.

அகம்மனியவக்³க³வண்ணனா.