1-7. படிச்சவாராதி³

பச்சயசதுக்கம்

ஹேது-ஆரம்மணபச்சயா

257. அகுஸலம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி ஹேதுபச்சயா. (1)

அப்³யாகதம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி ஹேதுபச்சயா. (1)

அகுஸலம் ஹேதுவிப்பயுத்தஞ்ச அப்³யாகதம் ஹேதுவிப்பயுத்தஞ்ச த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி ஹேதுபச்சயா. (1)

அப்³யாகதம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி ஆரம்மணபச்சயா. (1) (ஸம்கி²த்தம்.)

258. ஹேதுயா தீணி, ஆரம்மணே ஏகம், அதி⁴பதியா ஏகம்…பே… அவிக³தே தீணி (ஸம்கி²த்தம்).

நஹேது-நஆரம்மணபச்சயா

259. அப்³யாகதம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி நஹேதுபச்சயா. (1)

அகுஸலம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி நஆரம்மணபச்சயா. (1)

அப்³யாகதம் ஹேதுவிப்பயுத்தம் த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி நஆரம்மணபச்சயா. (1)

அகுஸலம் ஹேதுவிப்பயுத்தஞ்ச அப்³யாகதம் ஹேதுவிப்பயுத்தஞ்ச த⁴ம்மம் படிச்ச அப்³யாகதோ ஹேதுவிப்பயுத்தோ த⁴ம்மோ உப்பஜ்ஜதி நஆரம்மணபச்சயா (ஸம்கி²த்தம்).

260. நஹேதுயா ஏகம், நஆரம்மணே தீணி, நஅதி⁴பதியா தீணி…பே… நோவிக³தே தீணி. (ஸம்கி²த்தம்).

(ஸஹஜாதவாரம்பி…பே… ஸம்பயுத்தவாரம்பி படிச்சவாரஸதி³ஸம்.)

ஹேது-ஆரம்மண-அனந்தரபச்சயா

261. அகுஸலோ ஹேதுவிப்பயுத்தோ த⁴ம்மோ அப்³யாகதஸ்ஸ ஹேதுவிப்பயுத்தஸ்ஸ த⁴ம்மஸ்ஸ ஹேதுபச்சயேன பச்சயோ. (1)

அகுஸலோ ஹேதுவிப்பயுத்தோ த⁴ம்மோ அகுஸலஸ்ஸ ஹேதுவிப்பயுத்தஸ்ஸ த⁴ம்மஸ்ஸ ஆரம்மணபச்சயேன பச்சயோ. அகுஸலோ ஹேதுவிப்பயுத்தோ த⁴ம்மோ அப்³யாகதஸ்ஸ ஹேதுவிப்பயுத்தஸ்ஸ த⁴ம்மஸ்ஸ ஆரம்மணபச்சயேன பச்சயோ. (2)

அப்³யாகதோ ஹேதுவிப்பயுத்தோ த⁴ம்மோ அப்³யாகதஸ்ஸ ஹேதுவிப்பயுத்தஸ்ஸ த⁴ம்மஸ்ஸ ஆரம்மணபச்சயேன பச்சயோ. அப்³யாகதோ ஹேதுவிப்பயுத்தோ த⁴ம்மோ அகுஸலஸ்ஸ ஹேதுவிப்பயுத்தஸ்ஸ த⁴ம்மஸ்ஸ ஆரம்மணபச்சயேன பச்சயோ. (2)

அகுஸலோ ஹேதுவிப்பயுத்தோ த⁴ம்மோ அகுஸலஸ்ஸ ஹேதுவிப்பயுத்தஸ்ஸ த⁴ம்மஸ்ஸ அனந்தரபச்சயேன பச்சயோ. அகுஸலோ ஹேதுவிப்பயுத்தோ த⁴ம்மோ அப்³யாகதஸ்ஸ ஹேதுவிப்பயுத்தஸ்ஸ த⁴ம்மஸ்ஸ அனந்தரபச்சயேன பச்சயோ. (2)

அப்³யாகதோ ஹேதுவிப்பயுத்தோ த⁴ம்மோ அப்³யாகதஸ்ஸ ஹேதுவிப்பயுத்தஸ்ஸ த⁴ம்மஸ்ஸ அனந்தரபச்சயேன பச்சயோ. அப்³யாகதோ ஹேதுவிப்பயுத்தோ த⁴ம்மோ அகுஸலஸ்ஸ ஹேதுவிப்பயுத்தஸ்ஸ த⁴ம்மஸ்ஸ அனந்தரபச்சயேன பச்சயோ. (2) (ஸம்கி²த்தம்.)

262. ஹேதுயா ஏகம், ஆரம்மணே சத்தாரி, அனந்தரே சத்தாரி, ஸமனந்தரே சத்தாரி, ஸஹஜாதே தீணி, அஞ்ஞமஞ்ஞே ஏகம், நிஸ்ஸயே சத்தாரி, உபனிஸ்ஸயே சத்தாரி…பே… அவிக³தே சத்தாரி (ஸம்கி²த்தம்).

நஹேதுயா பஞ்ச, நஆரம்மணே பஞ்ச (ஸம்கி²த்தம்).

ஹேதுபச்சயா நஆரம்மணே ஏகம் (ஸம்கி²த்தம்).

நஹேதுபச்சயா ஆரம்மணே சத்தாரி (ஸம்கி²த்தம்).

(யதா² குஸலத்திகே பஞ்ஹாவாரம், ஏவம் வித்தா²ரேதப்³ப³ம்.)