1. விப⁴ங்க³வாரோ

ஹேதுபச்சயோ

15. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ ஹேதுபச்சயேன பச்சயோ – ஸஞ்ஞோஜனா ஹேதூ ஸம்பயுத்தகானம் ஸஞ்ஞோஜனானம் ஹேதுபச்சயேன பச்சயோ. (1)

ஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ ஹேதுபச்சயேன பச்சயோ – ஸஞ்ஞோஜனா ஹேதூ ஸம்பயுத்தகானம் க²ந்தா⁴னம் சித்தஸமுட்டா²னானஞ்ச ரூபானம் ஹேதுபச்சயேன பச்சயோ. (2)

ஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ ஹேதுபச்சயேன பச்சயோ – ஸஞ்ஞோஜனா ஹேதூ ஸம்பயுத்தகானம் க²ந்தா⁴னம் ஸஞ்ஞோஜனானம் சித்தஸமுட்டா²னானஞ்ச ரூபானம் ஹேதுபச்சயேன பச்சயோ. (3)

16. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ ஹேதுபச்சயேன பச்சயோ – நோஸஞ்ஞோஜனா ஹேதூ ஸம்பயுத்தகானம் க²ந்தா⁴னம் சித்தஸமுட்டா²னானஞ்ச ரூபானம் ஹேதுபச்சயேன பச்சயோ; படிஸந்தி⁴க்க²ணே…பே…. (1)

ஆரம்மணபச்சயோ

17. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ ஆரம்மணபச்சயேன பச்சயோ – ஸஞ்ஞோஜனே ஆரப்³ப⁴ ஸஞ்ஞோஜனா உப்பஜ்ஜந்தி. (மூலம் காதப்³ப³ம்) ஸஞ்ஞோஜனே ஆரப்³ப⁴ நோஸஞ்ஞோஜனா க²ந்தா⁴ உப்பஜ்ஜந்தி. (மூலம் காதப்³ப³ம்) ஸஞ்ஞோஜனே ஆரப்³ப⁴ ஸஞ்ஞோஜனா ச ஸம்பயுத்தகா ச க²ந்தா⁴ உப்பஜ்ஜந்தி. (3)

18. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ ஆரம்மணபச்சயேன பச்சயோ – தா³னம் த³த்வா ஸீலம்…பே… உபோஸத²கம்மம் கத்வா தம் பச்சவேக்க²தி, புப்³பே³ ஸுசிண்ணானி…பே… ஜா²னா…பே… அரியா மக்³கா³ வுட்ட²ஹித்வா மக்³க³ம் பச்சவேக்க²ந்தி, ப²லம்…பே… நிப்³பா³னம் பச்சவேக்க²ந்தி, நிப்³பா³னம் கோ³த்ரபு⁴ஸ்ஸ, வோதா³னஸ்ஸ, மக்³க³ஸ்ஸ, ப²லஸ்ஸ, ஆவஜ்ஜனாய ஆரம்மணபச்சயேன பச்சயோ; அரியா நோஸஞ்ஞோஜனே பஹீனே கிலேஸே…பே… விக்க²ம்பி⁴தே கிலேஸே…பே… புப்³பே³…பே… சக்கு²ம் …பே… வத்து²ம் நோஸஞ்ஞோஜனே க²ந்தே⁴ அனிச்சதோ…பே… தோ³மனஸ்ஸம் உப்பஜ்ஜதி; தி³ப்³பே³ன சக்கு²னா ரூபம் பஸ்ஸதி, தி³ப்³பா³ய ஸோததா⁴துயா ஸத்³த³ம் ஸுணாதி, சேதோபரியஞாணேன நோஸஞ்ஞோஜனசித்தஸமங்கி³ஸ்ஸ சித்தம் ஜானாதி, ஆகாஸானஞ்சாயதனம் விஞ்ஞாணஞ்சாயதனஸ்ஸ…பே… ஆகிஞ்சஞ்ஞாயதனம் நேவஸஞ்ஞானாஸஞ்ஞாயதனஸ்ஸ…பே… ரூபாயதனம் சக்கு²விஞ்ஞாணஸ்ஸ…பே… போ²ட்ட²ப்³பா³யதனம் காயவிஞ்ஞாணஸ்ஸ…பே… நோஸஞ்ஞோஜனா க²ந்தா⁴ இத்³தி⁴வித⁴ஞாணஸ்ஸ, சேதோபரியஞாணஸ்ஸ, புப்³பே³னிவாஸானுஸ்ஸதிஞாணஸ்ஸ, யதா²கம்மூபக³ஞாணஸ்ஸ, அனாக³தம்ஸஞாணஸ்ஸ, ஆவஜ்ஜனாய ஆரம்மணபச்சயேன பச்சயோ. (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ ஆரம்மணபச்சயேன பச்சயோ – தா³னம்…பே… ஸீலம்…பே… உபோஸத²கம்மம்…பே… புப்³பே³…பே… ஜா²னா…பே… சக்கு²ம்…பே… வத்து²ம் நோஸஞ்ஞோஜனே க²ந்தே⁴ அஸ்ஸாதே³தி அபி⁴னந்த³தி, தம் ஆரப்³ப⁴ ராகோ³ உப்பஜ்ஜதி…பே… தோ³மனஸ்ஸம் உப்பஜ்ஜதி. (2)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ ஆரம்மணபச்சயேன பச்சயோ – தா³னம் த³த்வா ஸீலம்…பே… உபோஸத²கம்மம்…பே… புப்³பே³…பே… ஜா²னா…பே… சக்கு²ம்…பே… வத்து²ம் நோஸஞ்ஞோஜனே க²ந்தே⁴ அஸ்ஸாதே³தி அபி⁴னந்த³தி, தம் ஆரப்³ப⁴ ஸஞ்ஞோஜனா ச ஸஞ்ஞோஜனஸம்பயுத்தகா ச க²ந்தா⁴ உப்பஜ்ஜந்தி. (3)

ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ த⁴ம்மஸ்ஸ ஆரம்மணபச்சயேன பச்சயோ… தீணி (ஆரப்³ப⁴யேவ காதப்³பா³).

அதி⁴பதிபச்சயோ

19. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ அதி⁴பதிபச்சயேன பச்சயோ. ஆரம்மணாதி⁴பதி – ஸஞ்ஞோஜனம் க³ரும் கத்வா…பே… தீணி (க³ருகாரம்மணா).

நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ அதி⁴பதிபச்சயேன பச்சயோ – ஆரம்மணாதி⁴பதி, ஸஹஜாதாதி⁴பதி. ஆரம்மணாதி⁴பதி – தா³னம் த³த்வா ஸீலம்…பே… தீணி (திண்ணம்பி ஆரம்மணாதி⁴பதி, ஸஹஜாதாதி⁴பதிபி காதப்³பா³, விப⁴ஜிதப்³பா³ தீணிபி).

ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ த⁴ம்மஸ்ஸ அதி⁴பதிபச்சயேன பச்சயோ. ஆரம்மணாதி⁴பதி – ஸஞ்ஞோஜனே ச ஸம்பயுத்தகே ச க²ந்தே⁴ க³ரும் கத்வா…பே… தீணி.

அனந்தரபச்சயோ

20. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ அனந்தரபச்சயேன பச்சயோ – புரிமா புரிமா ஸஞ்ஞோஜனா பச்சி²மானம் பச்சி²மானம் ஸஞ்ஞோஜனானம் அனந்தரபச்சயேன பச்சயோ… தீணி.

நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ அனந்தரபச்சயேன பச்சயோ – புரிமா புரிமா நோஸஞ்ஞோஜனா க²ந்தா⁴ பச்சி²மானம்…பே… ப²லஸமாபத்தியா அனந்தரபச்சயேன பச்சயோ. (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ அனந்தரபச்சயேன பச்சயோ – புரிமா புரிமா நோஸஞ்ஞோஜனா க²ந்தா⁴ பச்சி²மானம் பச்சி²மானம் ஸஞ்ஞோஜனானம் அனந்தரபச்சயேன பச்சயோ; ஆவஜ்ஜனா ஸஞ்ஞோஜனானம் அனந்தரபச்சயேன பச்சயோ (ஏவம் த்³வேபி காதப்³பா³). (3)

ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ த⁴ம்மஸ்ஸ அனந்தரபச்சயேன பச்சயோ… தீணி.

ஸமனந்தரபச்சயாதி³

21. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ ஸமனந்தரபச்சயேன பச்சயோ… நவ… ஸஹஜாதபச்சயேன பச்சயோ… நவ… அஞ்ஞமஞ்ஞபச்சயேன பச்சயோ… நவ… நிஸ்ஸயபச்சயேன பச்சயோ… நவ.

உபனிஸ்ஸயபச்சயோ

22. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ – ஆரம்மணூபனிஸ்ஸயோ, அனந்தரூபனிஸ்ஸயோ, பகதூபனிஸ்ஸயோ…பே…. பகதூபனிஸ்ஸயோ – ஸஞ்ஞோஜனா ஸஞ்ஞோஜனானம் உபனிஸ்ஸயபச்சயேன பச்சயோ (ஏவம் தீணிபி).

23. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ – ஆரம்மணூபனிஸ்ஸயோ, அனந்தரூபனிஸ்ஸயோ, பகதூபனிஸ்ஸயோ…பே…. பகதூபனிஸ்ஸயோ – ஸத்³த⁴ம் உபனிஸ்ஸாய தா³னம் தே³தி…பே… ஸமாபத்திம் உப்பாதே³தி, மானம் ஜப்பேதி, தி³ட்டி²ம் க³ண்ஹாதி; ஸீலம்…பே… பஞ்ஞம், ராக³ம்…பே… பத்த²னம்…பே… ஸேனாஸனம் உபனிஸ்ஸாய தா³னம் தே³தி…பே… ஸங்க⁴ம் பி⁴ந்த³தி; ஸத்³தா⁴…பே… ஸேனாஸனம் ஸத்³தா⁴ய…பே… ப²லஸமாபத்தியா உபனிஸ்ஸயபச்சயேன பச்சயோ. (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ – ஆரம்மணூபனிஸ்ஸயோ, அனந்தரூபனிஸ்ஸயோ, பகதூபனிஸ்ஸயோ…பே…. பகதூபனிஸ்ஸயோ – ஸத்³த⁴ம் உபனிஸ்ஸாய மானம் ஜப்பேதி, தி³ட்டி²ம் க³ண்ஹாதி; ஸீலம்…பே… ஸேனாஸனம் உபனிஸ்ஸாய பாணம் ஹனதி…பே… ஸங்க⁴ம் பி⁴ந்த³தி; ஸத்³தா⁴…பே… ஸேனாஸனம் ராக³ஸ்ஸ…பே… பத்த²னாய உபனிஸ்ஸயபச்சயேன பச்சயோ. (2)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ உபனிஸ்ஸயபச்சயேன பச்சயோ – ஆரம்மணூபனிஸ்ஸயோ, அனந்தரூபனிஸ்ஸயோ, பகதூபனிஸ்ஸயோ…பே…. பகதூபனிஸ்ஸயோ – ஸத்³த⁴ம் உபனிஸ்ஸாய மானம் ஜப்பேதி, தி³ட்டி²ம் க³ண்ஹாதி; ஸீலம்…பே… ஸேனாஸனம் உபனிஸ்ஸாய பாணம் ஹனதி…பே… ஸங்க⁴ம் பி⁴ந்த³தி; ஸத்³தா⁴…பே… ஸேனாஸனம் ஸஞ்ஞோஜனானம் ஸம்பயுத்தகானஞ்ச க²ந்தா⁴னம் உபனிஸ்ஸயபச்சயேன பச்சயோ. (3)

ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ… தீணி.

புரேஜாதபச்சயோ

24. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ புரேஜாதபச்சயேன பச்சயோ – ஆரம்மணபுரேஜாதம், வத்து²புரேஜாதம். ஆரம்மணபுரேஜாதம் – சக்கு²ம்…பே… வத்து²ம் அனிச்சதோ…பே… தோ³மனஸ்ஸம் உப்பஜ்ஜதி; தி³ப்³பே³ன சக்கு²னா ரூபம் பஸ்ஸதி, தி³ப்³பா³ய ஸோததா⁴துயா ஸத்³த³ம் ஸுணாதி, ரூபாயதனம் சக்கு²விஞ்ஞாணஸ்ஸ…பே… போ²ட்ட²ப்³பா³யதனம் காயவிஞ்ஞாணஸ்ஸ…பே…. வத்து²புரேஜாதம் – சக்கா²யதனம் சக்கு²விஞ்ஞாணஸ்ஸ…பே… காயாயதனம் காயவிஞ்ஞாணஸ்ஸ…பே… வத்து² நோஸஞ்ஞோஜனானம் க²ந்தா⁴னம் புரேஜாதபச்சயேன பச்சயோ. (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ புரேஜாதபச்சயேன பச்சயோ – ஆரம்மணபுரேஜாதம், வத்து²புரேஜாதம். ஆரம்மணபுரேஜாதம் – சக்கு²ம்…பே… வத்து²ம் அஸ்ஸாதே³தி அபி⁴னந்த³தி, தம் ஆரப்³ப⁴ ராகோ³ உப்பஜ்ஜதி…பே… தோ³மனஸ்ஸம் உப்பஜ்ஜதி. வத்து²புரேஜாதம் – வத்து² ஸஞ்ஞோஜனானம் புரேஜாதபச்சயேன பச்சயோ. (2)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ புரேஜாதபச்சயேன பச்சயோ – ஆரம்மணபுரேஜாதம், வத்து²புரேஜாதம். ஆரம்மணபுரேஜாதம் – சக்கு²ம்…பே… வத்து²ம் அஸ்ஸாதே³தி, அபி⁴னந்த³தி, தம் ஆரப்³ப⁴ ஸஞ்ஞோஜனா ச ஸம்பயுத்தகா ச க²ந்தா⁴ உப்பஜ்ஜந்தி. வத்து²புரேஜாதம் – வத்து² ஸஞ்ஞோஜனானம் ஸம்பயுத்தகானஞ்ச க²ந்தா⁴னம் புரேஜாதபச்சயேன பச்சயோ. (3)

பச்சா²ஜாதபச்சயோ

25. ஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ பச்சா²ஜாதபச்சயேன பச்சயோ… ஏகம்.

நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ பச்சா²ஜாதபச்சயேன பச்சயோ…பே…. (1)

ஸஞ்ஞோஜனோ ச நோஸஞ்ஞோஜனோ ச த⁴ம்மா நோஸஞ்ஞோஜனஸ்ஸ த⁴ம்மஸ்ஸ பச்சா²ஜாதபச்சயேன பச்சயோ…பே…. (1)

ஆஸேவனபச்சயோ

26. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ ஆஸேவனபச்சயேன பச்சயோ… நவ.

கம்மபச்சயாதி³

27. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ கம்மபச்சயேன பச்சயோ… தீணி… விபாகபச்சயேன பச்சயோ… ஏகம்… ஆஹாரபச்சயேன பச்சயோ… தீணி… இந்த்³ரியபச்சயேன பச்சயோ… தீணி… ஜா²னபச்சயேன பச்சயோ… தீணி… மக்³க³பச்சயேன பச்சயோ… நவ… ஸம்பயுத்தபச்சயேன பச்சயோ… நவ.

விப்பயுத்தபச்சயோ

28. ஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ விப்பயுத்தபச்சயேன பச்சயோ – ஸஹஜாதம், பச்சா²ஜாதம் (விப⁴ஜிதப்³ப³ம்). (1)

நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ விப்பயுத்தபச்சயேன பச்சயோ – ஸஹஜாதம், புரேஜாதம், பச்சா²ஜாதம் (விப⁴ஜிதப்³ப³ம்). (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ விப்பயுத்தபச்சயேன பச்சயோ. புரேஜாதம் – வத்து² ஸஞ்ஞோஜனானம் விப்பயுத்தபச்சயேன பச்சயோ. (2)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ விப்பயுத்தபச்சயேன பச்சயோ. புரேஜாதம் – வத்து² ஸஞ்ஞோஜனானம் ஸம்பயுத்தகானஞ்ச க²ந்தா⁴னம் விப்பயுத்தபச்சயேன பச்சயோ. (3)

ஸஞ்ஞோஜனோ ச நோஸஞ்ஞோஜனோ ச த⁴ம்மா நோஸஞ்ஞோஜனஸ்ஸ த⁴ம்மஸ்ஸ விப்பயுத்தபச்சயேன பச்சயோ – ஸஹஜாதம், பச்சா²ஜாதம் (விப⁴ஜிதப்³ப³ம்). (1)

அத்தி²பச்சயோ

29. ஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ… ஏகம் (படிச்சஸதி³ஸம்). (1)

ஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ – ஸஹஜாதம், பச்சா²ஜாதம் (ஸம்கி²த்தம்). (2)

ஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ அத்தி²பச்சயேன பச்சயோ (படிச்சஸதி³ஸம்). (3)

30. நோஸஞ்ஞோஜனோ த⁴ம்மோ நோஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம், பச்சா²ஜாதம், ஆஹாரம், இந்த்³ரியம் (ஸம்கி²த்தம்). (1)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம். ஸஹஜாதா – நோஸஞ்ஞோஜனா க²ந்தா⁴ ஸம்பயுத்தகானம் ஸஞ்ஞோஜனானம் அத்தி²பச்சயேன பச்சயோ. புரேஜாதம் – சக்கு²ம்…பே… வத்து²ம் அஸ்ஸாதே³தி அபி⁴னந்த³தி, தம் ஆரப்³ப⁴ ராகோ³ உப்பஜ்ஜதி…பே… தோ³மனஸ்ஸம் உப்பஜ்ஜதி, வத்து² ஸஞ்ஞோஜனானம் அத்தி²பச்சயேன பச்சயோ. (2)

நோஸஞ்ஞோஜனோ த⁴ம்மோ ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம். ஸஹஜாதோ – நோஸஞ்ஞோஜனோ…பே… (ஸம்கி²த்தம், ஆஸவஸதி³ஸம்). (3)

31. ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம் (ஆஸவஸதி³ஸம்). (1)

ஸஞ்ஞோஜனோ ச நோஸஞ்ஞோஜனோ ச த⁴ம்மா நோஸஞ்ஞோஜனஸ்ஸ த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம், பச்சா²ஜாதம், ஆஹாரம், இந்த்³ரியம் (விப⁴ஜிதப்³ப³ம் ஆஸவஸதி³ஸம்). (2)

ஸஞ்ஞோஜனோ ச நோஸஞ்ஞோஜனோ ச த⁴ம்மா ஸஞ்ஞோஜனஸ்ஸ ச நோஸஞ்ஞோஜனஸ்ஸ ச த⁴ம்மஸ்ஸ அத்தி²பச்சயேன பச்சயோ – ஸஹஜாதம், புரேஜாதம் (விப⁴ஜிதப்³ப³ம் ஆஸவஸதி³ஸம்). (3)