2. ஸுத்தஸாத⁴னம்

298. ந வத்தப்³ப³ம் – ‘‘அதீதானாக³தா க²ந்தா⁴ தா⁴து ஆயதனம் நத்தி² சேதே’’தி? ஆமந்தா. நனு வுத்தம் ப⁴க³வதா – ‘‘தயோமே, பி⁴க்க²வே, நிருத்திபதா² அதி⁴வசனபதா² பஞ்ஞத்தி…பே… விஞ்ஞூஹீதி…பே…’’. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அதீதானாக³தா க²ந்தா⁴ தா⁴து ஆயதனம் நத்தி² சேதே’’தி.

அதீதானாக³தா க²ந்தா⁴ தா⁴து ஆயதனம் நத்தி² சேதேதி? ஆமந்தா. நனு வுத்தம் ப⁴க³வதா – ‘‘யம் கிஞ்சி, பி⁴க்க²வே, ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, அயம் வுச்சதி ரூபக்க²ந்தோ⁴. யா காசி வேத³னா… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம்…பே… அயம் வுச்சதி விஞ்ஞாணக்க²ந்தோ⁴’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அதீதானாக³தா க²ந்தா⁴ தா⁴து ஆயதனம் நத்தி² சேதே’’தி.

அதீதக்க²ந்தா⁴தி³கதா² நிட்டி²தா.