12. த்³வாத³ஸமவக்³கோ³

(120) 5. ஸத்தக்க²த்துபரமகதா²

641. ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. மாதா ஜீவிதா வோரோபிதா… பிதா ஜீவிதா வோரோபிதோ… அரஹா ஜீவிதா வோரோபிதோ… து³ட்டே²ன சித்தேன ததா²க³தஸ்ஸ லோஹிதம் உப்பாதி³தம்… ஸங்கோ⁴ பி⁴ன்னோதி? ந ஹேவம் வத்தப்³பே³…பே….

ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. அப⁴ப்³போ³ அந்தரா த⁴ம்மம் அபி⁴ஸமேதுந்தி? ந ஹேவம் வத்தப்³பே³…பே…. அப⁴ப்³போ³ அந்தரா த⁴ம்மம் அபி⁴ஸமேதுந்தி? ஆமந்தா. மாதா ஜீவிதா வோரோபிதா… பிதா ஜீவிதா வோரோபிதோ… அரஹா ஜீவிதா வோரோபிதோ… து³ட்டே²ன சித்தேன ததா²க³தஸ்ஸ லோஹிதம் உப்பாதி³தம்… ஸங்கோ⁴ பி⁴ன்னோதி? ந ஹேவம் வத்தப்³பே³…பே….

642. ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. அத்தி² ஸோ நியமோ யேன நியமேன ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ந ஹேவம் வத்தப்³பே³…பே… அத்தி² தே ஸதிபட்டா²னா…பே… ஸம்மப்பதா⁴னா… இத்³தி⁴பாதா³… இந்த்³ரியா… ப³லா… போ³ஜ்ஜ²ங்கா³ யேஹி போ³ஜ்ஜ²ங்கே³ஹி ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ந ஹேவம் வத்தப்³பே³…பே….

643. நத்தி² ஸோ நியமோ யேன நியமேன ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. ஹஞ்சி நத்தி² ஸோ நியமோ யேன நியமேன ஸத்தக்க²த்துபரமோ புக்³க³லோ ஸத்தக்க²த்துபரமதானியதோ, நோ ச வத ரே வத்தப்³பே³ – ‘‘ஸத்தக்க²த்துபரமோ புக்³க³லோ ஸத்தக்க²த்துபரமதானியதோ’’தி.

நத்தி² தே ஸதிபட்டா²னா… போ³ஜ்ஜ²ங்கா³ யேஹி போ³ஜ்ஜ²ங்கே³ஹி ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. ஹஞ்சி நத்தி² தே போ³ஜ்ஜ²ங்கா³ யேஹி போ³ஜ்ஜ²ங்கே³ஹி ஸத்தக்க²த்துபரமோ புக்³க³லோ ஸத்தக்க²த்துபரமதானியதோ, நோ ச வத ரே வத்தப்³பே³ – ‘‘ஸத்தக்க²த்துபரமோ புக்³க³லோ ஸத்தக்க²த்துபரமதானியதோ’’தி.

644. ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. ஸகதா³கா³மினியமேனாதி? ந ஹேவம் வத்தப்³பே³…பே… அனாகா³மினியமேனாதி? ந ஹேவம் வத்தப்³பே³…பே… அரஹத்தனியமேனாதி? ந ஹேவம் வத்தப்³பே³…பே….

கதமேன நியமேனாதி? ஸோதாபத்தினியமேனாதி. ஸத்தக்க²த்துபரமோ புக்³க³லோ ஸத்தக்க²த்துபரமதானியதோதி? ஆமந்தா. யே கேசி ஸோதாபத்தினியாமம் ஓக்கமந்தி, ஸப்³பே³ தே ஸத்தக்க²த்துபரமதானியதாதி? ந ஹேவம் வத்தப்³பே³…பே….

645. ந வத்தப்³ப³ம் – ‘‘ஸத்தக்க²த்துபரமோ புக்³க³லோ ஸத்தக்க²த்துபரமதானியதோ’’தி? ஆமந்தா. நனு ஸோ ஸத்தக்க²த்துபரமோதி? ஆமந்தா. ஹஞ்சி ஸோ ஸத்தக்க²த்துபரமோ, தேன வத ரே வத்தப்³பே³ – ‘‘ஸத்தக்க²த்துபரமோ புக்³க³லோ ஸத்தக்க²த்துபரமதானியதோ’’தி.

ஸத்தக்க²த்துபரமகதா² நிட்டி²தா.