1. க²ந்தா⁴தி³

456. ரூபக்க²ந்தே⁴ன யே த⁴ம்மா விப்பயுத்தா, தே த⁴ம்மா கதிஹி க²ந்தே⁴ஹி கதிஹாயதனேஹி கதிஹி தா⁴தூஹி ஸங்க³ஹிதா? தே த⁴ம்மா சதூஹி க²ந்தே⁴ஹி த்³வீஹாயதனேஹி அட்ட²ஹி தா⁴தூஹி ஸங்க³ஹிதா. கதிஹி அஸங்க³ஹிதா? ஏகேன க²ந்தே⁴ன த³ஸஹாயதனேஹி த³ஸஹி தா⁴தூஹி அஸங்க³ஹிதா.

457. வேத³னாக்க²ந்தே⁴ன யே த⁴ம்மா… ஸஞ்ஞாக்க²ந்தே⁴ன யே த⁴ம்மா… ஸங்கா²ரக்க²ந்தே⁴ன யே த⁴ம்மா… விஞ்ஞாணக்க²ந்தே⁴ன யே த⁴ம்மா… மனாயதனேன யே த⁴ம்மா… மனிந்த்³ரியேன யே த⁴ம்மா விப்பயுத்தா, தே த⁴ம்மா கதிஹி க²ந்தே⁴ஹி கதிஹாயதனேஹி கதிஹி தா⁴தூஹி ஸங்க³ஹிதா? தே த⁴ம்மா அஸங்க²தம் க²ந்த⁴தோ ட²பேத்வா ஏகேன க²ந்தே⁴ன ஏகாத³ஸஹாயதனேஹி ஏகாத³ஸஹி தா⁴தூஹி ஸங்க³ஹிதா. கதிஹி அஸங்க³ஹிதா? சதூஹி க²ந்தே⁴ஹி ஏகேனாயதனேன ஸத்தஹி தா⁴தூஹி அஸங்க³ஹிதா.

458. சக்கா²யதனேன யே த⁴ம்மா…பே… போ²ட்ட²ப்³பா³யதனேன யே த⁴ம்மா… சக்கு²தா⁴துயா யே த⁴ம்மா…பே… போ²ட்ட²ப்³ப³தா⁴துயா யே த⁴ம்மா விப்பயுத்தா…பே… தே த⁴ம்மா சதூஹி க²ந்தே⁴ஹி த்³வீஹாயதனேஹி அட்ட²ஹி தா⁴தூஹி ஸங்க³ஹிதா. கதிஹி அஸங்க³ஹிதா? ஏகேன க²ந்தே⁴ன த³ஸஹாயதனேஹி த³ஸஹி தா⁴தூஹி அஸங்க³ஹிதா.

459. சக்கு²விஞ்ஞாணதா⁴துயா யே த⁴ம்மா… ஸோதவிஞ்ஞாணதா⁴துயா யே த⁴ம்மா… கா⁴னவிஞ்ஞாணதா⁴துயா யே த⁴ம்மா… ஜிவ்ஹாவிஞ்ஞாணதா⁴துயா யே த⁴ம்மா… காயவிஞ்ஞாணதா⁴துயா யே த⁴ம்மா… மனோதா⁴துயா யே த⁴ம்மா… மனோவிஞ்ஞாணதா⁴துயா யே த⁴ம்மா விப்பயுத்தா… தே த⁴ம்மா அஸங்க²தம் க²ந்த⁴தோ ட²பேத்வா பஞ்சஹி க²ந்தே⁴ஹி த்³வாத³ஸஹாயதனேஹி ஸத்தரஸஹி தா⁴தூஹி ஸங்க³ஹிதா. கதிஹி அஸங்க³ஹிதா? ந கேஹிசி க²ந்தே⁴ஹி ந கேஹிசி ஆயதனேஹி, ஏகாய தா⁴துயா அஸங்க³ஹிதா.