3. ஸங்கா⁴னுஸ்ஸதிகதா²வண்ணனா

154. அரியஸங்க⁴கு³ணாதி ஆரகத்தா கிலேஸேஹி, அனயே ந இரியனதோ, அயே ச இரியனதோ, ஸதே³வகேன ச லோகேன ‘‘ஸரண’’ந்தி அரணீயதோ அரியோ ச ஸோ ஸங்கோ⁴ ச, அரியானம் வா ஸங்கோ⁴ அரியஸங்கோ⁴, தஸ்ஸ கு³ணா.

155. யம் ஸம்மாபடிபத³ம் படிபன்னோ ‘‘ஸுட்டு² படிபன்னோ’’தி வுச்சதி. ஸா அரியமக்³க³படிபதா³ படிபக்க²த⁴ம்மே அனிவத்தித⁴ம்மே கத்வா பஜஹனதோ பயோஜனாபா⁴வா ஸயம்பி அனிவத்தித⁴ம்மா, அதி⁴க³ந்தப்³ப³ஸ்ஸ ச நிப்³பா³னஸ்ஸ ஏகம்ஸதோ அனுலோமீதி. ததோ ஏவ அபச்சனீகா, அனுத⁴ம்மபூ⁴தா ச, தஸ்ஸா ச படிபன்னத்தா அரியஸங்கோ⁴ ‘‘ஸுப்படிபன்னோ’’தி வுத்தோதி த³ஸ்ஸேதும் ‘‘ஸுட்டு² படிபன்னோ’’திஆதி³ வுத்தம். தத்த² ‘‘அனிவத்திபடிபத³’’ந்தி இமினா உஜுப்படிபத்திம் த³ஸ்ஸேதி. புனப்புனம் நிவத்தனே ஹி ஸதி உஜுப்படிபத்தி ந ஹோதி. ‘‘அனுலோமபடிபத³ம் அபச்சனீகபடிபத³’’ந்தி இமினா ஞாயப்படிபத்திம். படிபஜ்ஜிதப்³ப³ஸ்ஸ ஹி நிப்³பா³னஸ்ஸ அனுலோமனேன, அபச்சனீகதாய சஸ்ஸா ஞாயதோ. ‘‘த⁴ம்மானுத⁴ம்மபடிபத³’’ந்தி இமினா ஸாமீசிப்படிபத்திம் அனுச்ச²விகபா⁴வதீ³பனதோ. ஏதேன பட²மபத³ஸ்ஸ பபஞ்சனித்³தே³ஸோ, இதரானி தீணி பதா³னீதி த³ஸ்ஸேதி. தேனாஹ ‘‘யஸ்மா பனா’’திஆதி³.

யதா²னுஸிட்ட²ம் படிபஜ்ஜனேன கிச்சஸித்³தி⁴தோ அரியபா⁴வாவஹம் ஸவனம் ஸக்கச்சஸவனம் நாமாதி வுத்தம் ‘‘ஸக்கச்சம் ஸுணந்தீதி ஸாவகா’’தி, தேன அரியா ஏவ நிப்பரியாயதோ ஸத்து² ஸாவகா நாமாதி த³ஸ்ஸேதி. ஸீலதி³ட்டி²ஸாமஞ்ஞதாயாதி அரியேன ஸீலேன, அரியாய ச தி³ட்டி²யா ஸமானபா⁴வேன. அரியானஞ்ஹி ஸீலதி³ட்டி²யோ மஜ்ஜே² பி⁴ன்னஸுவண்ணம் விய நின்னானாகரணம் மக்³கே³னாக³தத்தா. தேன தே யத்த² கத்த²சி டி²தாபி ஸம்ஹதாவ. தேனாஹ ‘‘ஸங்கா⁴தபா⁴வமாபன்னோ’’தி. மாயாஸாடே²ய்யாதி³பாபத⁴ம்மஸமுச்சே²தே³ன உஜு. ததோ ஏவ கோ³முத்தவங்காபா⁴வேன அவங்கா. சந்த³லேகா²வங்காபா⁴வேன அகுடிலா. நங்க³லகோடிவங்காபா⁴வேன அஜிம்ஹா. அவங்காதி³பா⁴வேன வா உஜு. பரிஸுத்³த⁴ட்டே²ன அரியா. அபண்ணகபா⁴வேன ஞாயதி கமதி நிப்³பா³னம், தம் வா ஞாயதி படிவிஜ்ஜீ²யதி ஏதேனாதி ஞாயோ. வட்டது³க்க²னிய்யானாய அனுச்ச²விகத்தா. அனுரூபத்தா ஸாமீசி ஓபாயிகாதிபி ஸங்க²ம் ஸமஞ்ஞம் க³தா ஸம்மாபடிபத்தி, தாய ஸமங்கி³தாய ஸுப்படிபன்னா ‘‘ஸம்மா படிபஜ்ஜந்தீ’’தி கத்வா. வத்தமானத்தோ² ஹி அயம் படிபன்ன-ஸத்³தோ³ யதா² ‘‘ஸோதாபத்திப²லஸச்சி²கிரியாய படிபன்னோ’’தி (பு. ப. 206). அதீதம் படிபத³ந்தி யதா²வுத்தமக்³க³ஸம்மாபடிபத்திம் வத³தி. உப⁴யேன ச ஸாமஞ்ஞனித்³தே³ஸேன, ‘‘ஸுப்படிபன்னா ச ஸுப்படிபன்னா ச ஸுப்படிபன்னா’’தி ஏகஸேஸனயேன வா க³ஹிதானம் ஸமூஹோ ‘‘ஸுப்படிபன்னோ’’தி வுத்தோதி த³ஸ்ஸேதி.

ஏவம் ஆதி³பத³த்த²னித்³தே³ஸபா⁴வேன இதரபதா³னம் அத்த²ம் வத்வா இதா³னி சதுன்னம்பி பதா³னம் அவோமிஸ்ஸகம் அத்த²ம் த³ஸ்ஸேதும் ‘‘அபிசா’’திஆதி³ வுத்தம். தத்த² யதா²னுஸிட்ட²ந்தி ஸத்தா²ரா யதா² அனுஸிட்ட²ம், ததா² அனுஸாஸனீஅனுரூபந்தி அத்தோ². அபண்ணகபடிபத³ந்தி அவிரஜ்ஜ²னகபடிபத³ம், அனவஜ்ஜபடிபத்திந்தி அத்தோ². ஏத்த² ச ஸ்வாக்கா²தே த⁴ம்மவினயே அபண்ணகபடிபத³ம் படிபன்னத்தாதி ஏவம் ஸம்ப³ந்தி⁴தப்³ப³ம். புரிமபதே³ன ஸம்ப³ந்தே⁴ து³தியபத³ம் ந வத்தப்³ப³ம் ஸியா, நனு ச து³தியபதே³ன ஸம்ப³ந்தே⁴பி பட²மம் பத³ம் ந வத்தப்³ப³ம் ஸியாதி? ந தஸ்ஸ பட²மம் அபேக்கி²தத்தா. ஸா பன ஸாவகானம் அபண்ணகபடிபதா³ யதா²னுஸிட்ட²ம் படிபதா³தி த³ஸ்ஸனத்த²ம் ‘‘யதா²னுஸிட்ட²ம் படிபன்னத்தா’’தி வத்தப்³ப³ம். உப⁴யஸ்ஸாபி வா ஸுப்படிபன்னபா⁴வஸாத⁴னத்தா உப⁴யம் வுத்தம். ததா² ஹி பி-ஸத்³தே³ன உப⁴யம் ஸமுச்சினோதி.

கிலேஸஜிம்ஹவஸேன அந்தத்³வயகா³ஹோதி ஸப்³ப³ஸோ தம் பஹாய ஸம்மாபடிபதா³ காயாதி³வங்கப்பஹாயினீ உஜுப்படிபத்தி ஹோதீதி ஆஹ ‘‘மஜ்ஜி²மாய படிபதா³ய…பே… உஜுப்படிபன்னோ’’தி.

ஞாயோ நாம யுத்தப்பத்தபடிபத்தி, நிப்³பா³னஞ்ச, ஸப்³ப³ஸங்கா²ரஸமத²தாய ஆதி³த்தம் சேலம், ஸீஸம் வா அஜ்ஜு²பேக்கி²த்வாபி படிபஜ்ஜிதப்³ப³மேவாதி ஆஹ ‘‘ஞாயோ வுச்சதி நிப்³பா³ன’’ந்தி. நிப்³பா³யனகிரியாமுகே²ன சேத்த² நிப்³பா³னம் வுத்தந்தி த³ட்ட²ப்³ப³ம், மக்³க³ஞாணாதீ³ஹி வா ஞாயதி படிவிஜ்ஜீ²யதி ஸச்சி²கரீயதி சாதி ஞாயோ நிப்³பா³னந்தி ஏவமேத்த² அத்தோ² த³ட்ட²ப்³போ³.

கு³ணஸம்பா⁴வனாய பரேஹி கயிரமானம் பச்சுபட்டா²னாதி³ஸாமீசிகம்மம் அரஹந்தீதி ஸாமீசிகம்மாரஹா.

156. யதி³த³ந்தி அந்தோக³த⁴லிங்க³வசனபே⁴தோ³ நிபாதோதி தஸ்ஸ வசனபே⁴தே³ன அத்த²மாஹ ‘‘யா இமானீ’’தி. ஏவந்தி பகாரத்தே² நிபாதோ, இமினா பகாரேனாதி அத்தோ². தேன இதரானி தீணி யுக³ளானி த³ஸ்ஸிதானி ஹோந்தீதி ஆஹ ‘‘ஏவம் சத்தாரி புரிஸயுக³ளானி ஹோந்தீ’’தி. ஏதந்தி ஏதம் ‘‘புரிஸபுக்³க³லா’’தி ப³ஹுவசனவஸேன வுத்தம் பத³ம். புரிஸா ச தே புக்³க³லா ச புரிஸபுக்³க³லா. தத்த² ‘‘புரிஸா’’தி இமினா பட²மாய பகதியா க³ஹணம், ‘‘புக்³க³லா’’தி பன து³தியாயபி ஸத்தஸாமஞ்ஞேனாதி ஏவம் வா ஏத்த² அத்தோ² த³ட்ட²ப்³போ³. சதுன்னம் பச்சயானம் கீதி³ஸானம்? ஆனேத்வா ஹுனிதப்³பா³னந்தி அதி⁴காரதோ பாகடோயமத்தோ². தா³தப்³ப³ந்தி வா பச்சத்தவசனம் ‘‘சதுன்னம் பச்சயான’’ந்தி பத³ம் அபேக்கி²த்வா ஸாமிவஸேன பரிணாமேதப்³ப³ம், அஞ்ஞதா² யேஸம் கேஸஞ்சி சதுன்னம் பச்சயானம் ‘‘ஆஹுன’’ந்தி ஸமஞ்ஞா ஸியா. ஆஹுனம் அரஹதீதி வா ஆஹுனேய்யோ. ஸக்காதீ³னம்பி வா ஆஹவனந்தி ஸக்காதீ³ஹிபி தி³ய்யமானம் தா³னம். யத்த² ஹுதம் மஹப்ப²லந்தி யஸ்மிம் ஆவஹனீயக்³கி³ம்ஹி ஹுதம் த³தி⁴ஆதி³ ஆஹுனேய்யக்³கி³க³ஹபதக்³கி³த³க்கி²ணேய்யக்³கீ³ஸு ஹுததோ உளாரப²லந்தி தேஸம் ப்³ராஹ்மணானம் லத்³தி⁴. ஹுதந்தி தி³ன்னம். நிகாயந்தரேதி ஸப்³ப³த்தி²கவாதி³னிகாயே.

ட²பேத்வா 165 தேதி தே பியமனாபே ஞாதிமித்தே அபனேத்வா, தேஸம் அத³த்வாதி அதி⁴ப்பாயோ. ஏஸ ஏஸோ. ஏகபு³த்³த⁴ந்தரே ச தி³ஸ்ஸதீதி ஏகஸ்மிம் பு³த்³த⁴ந்தரே வீதிவத்தே தி³ஸ்ஸதி. ச-ஸத்³தே³ன கதா³சி அஸங்க்²யேய்யேபி கப்பே வீதிவத்தேதி த³ஸ்ஸேதி. அப்³போ³கிண்ணந்தி படிபக்கே²ஹி அவோமிஸ்ஸம், கிரியாவிஸேஸகஞ்சேதம். பியமனாபத்தகரத⁴ம்மா நாம ஸீலாத³யோ, தே அரியஸங்கே⁴ ஸுப்பதிட்டி²தா. அயம் ஹேத்த² அதி⁴ப்பாயோ – ஞாதிமித்தா விப்பயுத்தா ந சிரஸ்ஸேவ ஸமாக³ச்ச²ந்தி, அனவட்டி²தா ச தேஸு பியமனாபதா, ந ஏவமரியஸங்கோ⁴. தஸ்மா ஸங்கோ⁴வ பாஹுனேய்யோதி. புப்³ப³காரந்தி அக்³க³கிரியம். ஸப்³ப³ப்பகாரேனாதி ஆத³ரகா³ரவப³ஹுமானாதி³னா, தே³ய்யத⁴ம்மஸ்ஸ ஸக்கச்சகரணாதி³னா ச ஸப்³பே³ன பகாரேன. ஸ்வாயம் பாஹவனீய-ஸத்³தோ³ ‘‘பாஹுனேய்யோ’’தி வுச்சதி பரியாயபா⁴வேன.

த³க்க²ந்தி ஏதாய ஸத்தா யதா²தி⁴ப்பேதாஹி ஸம்பத்தீஹி வட்³ட⁴ந்தீதி த³க்கி²ணா. ததா²பா⁴வகரணேன த³க்கி²ணம் அரஹதி. யதா² உளாராதிவிபுலுத்³ரயலாபே⁴ன விஸோதி⁴தம் நாம ஹோதி, ஏவம் த³க்கி²ணா விபுலப²லதாயாதி வுத்தம் ‘‘மஹப்ப²லகரணதாய விஸோதே⁴தீ’’தி.

புஞ்ஞத்தி²கேஹி அஞ்ஜலி கரணீயா ஏத்தா²தி அஞ்ஜலிகரணீயோ.

யதி³பி பாளியம் ‘‘அனுத்தர’’ந்தி வுத்தம். நத்தி² இதோ உத்தரம் விஸிட்ட²ந்தி ஹி அனுத்தரம். ஸமம்பிஸ்ஸ பன நத்தீ²தி த³ஸ்ஸேந்தோ ‘‘அஸதி³ஸ’’ந்தி ஆஹ. கி²த்தம் வுத்தம் பீ³ஜம் மஹப்ப²லபா⁴வகரணேன தாயதி ரக்க²தி, கி²பந்தி வபந்தி ஏத்த² பீ³ஜானீதி வா கே²த்தம், கேதா³ராதி³, கே²த்தம் விய கே²த்தம், புஞ்ஞானம் கே²த்தம் புஞ்ஞக்கே²த்தம். ஸேஸம் பு³த்³தா⁴னுஸ்ஸதியம் வுத்தனயானுஸாரேன வேதி³தப்³ப³ம்.