8. அனுஸ்ஸதிகம்மட்டா²னனித்³தே³ஸோ

மரணஸ்ஸதிகதா²

167. இதா³னி இதோ அனந்தராய மரணஸ்ஸதியா பா⁴வனானித்³தே³ஸோ அனுப்பத்தோ. தத்த² மரணந்தி ஏகப⁴வபரியாபன்னஸ்ஸ ஜீவிதிந்த்³ரியஸ்ஸ உபச்சே²தோ³. யம் பனேதம் அரஹந்தானம் வட்டது³க்க²ஸமுச்சே²த³ஸங்கா²தம் ஸமுச்சே²த³மரணம், ஸங்கா²ரானம் க²ணப⁴ங்க³ஸங்கா²தம் க²ணிகமரணம், ருக்கோ² மதோ லோஹம் மதந்திஆதீ³ஸு ஸம்முதிமரணஞ்ச, ந தம் இத⁴ அதி⁴ப்பேதம்.

யம்பி சேதம் அதி⁴ப்பேதம், தம் காலமரணம் அகாலமரணந்தி து³வித⁴ம் ஹோதி. தத்த² காலமரணம் புஞ்ஞக்க²யேன வா ஆயுக்க²யேன வா உப⁴யக்க²யேன வா ஹோதி. அகாலமரணம் கம்முபச்சே²த³ககம்மவஸேன.

தத்த² யம் விஜ்ஜமானாயபி ஆயுஸந்தானஜனகபச்சயஸம்பத்தியா கேவலம் படிஸந்தி⁴ஜனகஸ்ஸ கம்மஸ்ஸ விபக்கவிபாகத்தா மரணம் ஹோதி, இத³ம் புஞ்ஞக்க²யேன மரணம் நாம. யம் க³திகாலாஹாராதி³ஸம்பத்தியா அபா⁴வேன அஜ்ஜதனகாலபுரிஸானம் விய வஸ்ஸஸதமத்தபரிமாணஸ்ஸ ஆயுனோ க²யவஸேன மரணம் ஹோதி, இத³ம் ஆயுக்க²யேன மரணம் நாம. யம் பன தூ³ஸீமாரகலாபு³ராஜாதீ³னம் விய தங்க²ணஞ்ஞேவ டா²னாசாவனஸமத்தே²ன கம்முனா உபச்சி²ன்னஸந்தானானம், புரிமகம்மவஸேன வா ஸத்த²ஹரணாதீ³ஹி உபக்கமேஹி உபச்சி²ஜ்ஜமானஸந்தானானம் மரணம் ஹோதி, இத³ம் அகாலமரணம் நாம. தம் ஸப்³ப³ம்பி வுத்தப்பகாரேன ஜீவிதிந்த்³ரியுபச்சே²தே³ன ஸங்க³ஹிதம். இதி ஜீவிதிந்த்³ரியுபச்சே²த³ஸங்கா²தஸ்ஸ மரணஸ்ஸ ஸரணம் மரணஸ்ஸதி.

168. தம் பா⁴வேதுகாமேன ரஹோக³தேன படிஸல்லீனேன ‘‘மரணம் ப⁴விஸ்ஸதி, ஜீவிதிந்த்³ரியம் உபச்சி²ஜ்ஜிஸ்ஸதீ’’தி வா, ‘‘மரணம் மரண’’ந்தி வா யோனிஸோ மனஸிகாரோ பவத்தேதப்³போ³. அயோனிஸோ பவத்தயதோ ஹி இட்ட²ஜனமரணானுஸ்ஸரணே ஸோகோ உப்பஜ்ஜதி விஜாதமாதுயா பியபுத்தமரணானுஸ்ஸரணே விய. அனிட்ட²ஜனமரணானுஸ்ஸரணே பாமோஜ்ஜம் உப்பஜ்ஜதி வேரீனம் வேரிமரணானுஸ்ஸரணே விய. மஜ்ஜ²த்தஜனமரணானுஸ்ஸரணே ஸம்வேகோ³ ந உப்பஜ்ஜதி மதகளேவரத³ஸ்ஸனே ச²வடா³ஹகஸ்ஸ விய. அத்தனோ மரணானுஸ்ஸரணே ஸந்தாஸோ உப்பஜ்ஜதி உக்கி²த்தாஸிகம் வத⁴கம் தி³ஸ்வா பீ⁴ருகஜாதிகஸ்ஸ விய. ததே³தம் ஸப்³ப³ம்பி ஸதிஸம்வேக³ஞாணவிரஹதோ ஹோதி. தஸ்மா தத்த² தத்த² ஹதமதஸத்தே ஓலோகேத்வா தி³ட்ட²புப்³ப³ஸம்பத்தீனம் ஸத்தானம் மதானம் மரணம் ஆவஜ்ஜேத்வா ஸதிஞ்ச ஸம்வேக³ஞ்ச ஞாணஞ்ச யோஜேத்வா ‘‘மரணம் ப⁴விஸ்ஸதீ’’திஆதி³னா நயேன மனஸிகாரோ பவத்தேதப்³போ³. ஏவம் பவத்தேந்தோ ஹி யோனிஸோ பவத்தேதி, உபாயேன பவத்தேதீதி அத்தோ². ஏவம் பவத்தயதோயேவ ஹி ஏகச்சஸ்ஸ நீவரணானி விக்க²ம்ப⁴ந்தி, மரணாரம்மணா ஸதி ஸண்டா²தி, உபசாரப்பத்தமேவ கம்மட்டா²னம் ஹோதி.

169. யஸ்ஸ பன ஏத்தாவதா ந ஹோதி, தேன வத⁴கபச்சுபட்டா²னதோ, ஸம்பத்திவிபத்திதோ, உபஸம்ஹரணதோ, காயப³ஹுஸாதா⁴ரணதோ, ஆயுது³ப்³ப³லதோ, அனிமித்ததோ, அத்³தா⁴னபரிச்சே²த³தோ, க²ணபரித்ததோதி இமேஹி அட்ட²ஹாகாரேஹி மரணம் அனுஸ்ஸரிதப்³ப³ம்.

தத்த² வத⁴கபச்சுபட்டா²னதோதி வத⁴கஸ்ஸ விய பச்சுபட்டா²னதோ. யதா² ஹி இமஸ்ஸ ஸீஸம் சி²ந்தி³ஸ்ஸாமீதி அஸிம் க³ஹேத்வா கீ³வாய சாரயமானோ வத⁴கோ பச்சுபட்டி²தோவ ஹோதி, ஏவம் மரணம்பி பச்சுபட்டி²தமேவாதி அனுஸ்ஸரிதப்³ப³ம். கஸ்மா? ஸஹ ஜாதியா ஆக³ததோ, ஜீவிதஹரணதோ ச. யதா² ஹி அஹிச்ச²த்தகமகுளம் மத்த²கேன பம்ஸும் க³ஹேத்வாவ உக்³க³ச்ச²தி, ஏவம் ஸத்தா ஜராமரணம் க³ஹேத்வாவ நிப்³ப³த்தந்தி. ததா² ஹி நேஸம் படிஸந்தி⁴சித்தம் உப்பாதா³னந்தரமேவ ஜரம் பத்வா பப்³ப³தஸிக²ரதோ பதிதஸிலா விய பி⁴ஜ்ஜதி ஸத்³தி⁴ம் ஸம்பயுத்தக²ந்தே⁴ஹி. ஏவம் க²ணிகமரணம் தாவ ஸஹ ஜாதியா ஆக³தம். ஜாதஸ்ஸ பன அவஸ்ஸம் மரணதோ இதா⁴தி⁴ப்பேதமரணம்பி ஸஹ ஜாதியா ஆக³தம். தஸ்மா ஏஸ ஸத்தோ ஜாதகாலதோ பட்டா²ய யதா² நாம உட்டி²தோ ஸூரியோ அத்தா²பி⁴முகோ² க³ச்ச²தேவ, க³தக³தட்டா²னதோ ஈஸகம்பி ந நிவத்ததி. யதா² வா நதீ³ பப்³ப³தேய்யா ஸீக⁴ஸோதா ஹாரஹாரினீ ஸந்த³தேவ வத்ததேவ ஈஸகம்பி ந நிவத்ததி, ஏவம் ஈஸகம்பி அனிவத்தமானோ மரணாபி⁴முகோ²வ யாதி. தேன வுத்தம் –

‘‘யமேகரத்திம் பட²மம், க³ப்³பே⁴ வஸதி மாணவோ;

அப்³பு⁴ட்டி²தோவ ஸோ யாதி, ஸ க³ச்ச²ம் ந நிவத்ததீ’’தி. (ஜா. 1.15.363);

ஏவம் க³ச்ச²தோ சஸ்ஸ கி³ம்ஹாபி⁴தத்தானம் குன்னதீ³னம் க²யோ விய, பாதோ ஆபோரஸானுக³தப³ந்த⁴னானம் து³மப்ப²லானம் பதனம் விய, முக்³க³ராபி⁴தாளிதானம் மத்திகபா⁴ஜனானம் பே⁴தோ³ விய, ஸூரியரஸ்மிஸம்பு²ட்டா²னம் உஸ்ஸாவபி³ந்தூ³னம் வித்³த⁴ம்ஸனம் விய ச மரணமேவ ஆஸன்னம் ஹோதி. தேனாஹ –

‘‘அச்சயந்தி அஹோரத்தா, ஜீவிதமுபருஜ்ஜ²தி;

ஆயு கீ²யதி மச்சானம், குன்னதீ³னம்வ ஓத³கம். (ஸம். நி. 1.146);

‘‘ப²லானமிவ பக்கானம், பாதோ பபததோ ப⁴யம்;

ஏவம் ஜாதான மச்சானம், நிச்சம் மரணதோ ப⁴யம்.

‘‘யதா²பி கும்ப⁴காரஸ்ஸ, கதம் மத்திகபா⁴ஜனம்;

கு²த்³த³கஞ்ச மஹந்தஞ்ச, யம் பக்கம் யஞ்ச ஆமகம்;

ஸப்³ப³ம் பே⁴த³னபரியந்தம், ஏவம் மச்சான ஜீவிதம்’. (ஸு. நி. 581-582);

‘‘உஸ்ஸாவோவ திணக்³க³ம்ஹி, ஸூரியுக்³க³மனம் பதி;

ஏவமாயு மனுஸ்ஸானம், மா மம் அம்ம நிவாரயா’’தி. (ஜா. 1.11.79);

ஏவம் உக்கி²த்தாஸிகோ வத⁴கோ விய ஸஹ ஜாதியா ஆக³தம் பனேதம் மரணம் கீ³வாய அஸிம் சாரயமானோ ஸோ வத⁴கோ விய ஜீவிதம் ஹரதியேவ, ந அஹரித்வா நிவத்ததி. தஸ்மா ஸஹ ஜாதியா ஆக³ததோ, ஜீவிதஹரணதோ ச உக்கி²த்தாஸிகோ வத⁴கோ விய மரணம்பி பச்சுபட்டி²தமேவாதி ஏவம் வத⁴கபச்சுபட்டா²னதோ மரணம் அனுஸ்ஸரிதப்³ப³ம்.

170. ஸம்பத்திவிபத்திதோதி இத⁴ ஸம்பத்தி நாம தாவதே³வ ஸோப⁴தி, யாவ நம் விபத்தி நாபி⁴ப⁴வதி, ந ச ஸா ஸம்பத்தி நாம அத்தி², யா விபத்திம் அதிக்கம்ம திட்டே²ய்ய. ததா² ஹி –

‘‘ஸகலம் மேதி³னிம் பு⁴த்வா, த³த்வா கோடிஸதம் ஸுகீ²;

அட்³டா⁴மலகமத்தஸ்ஸ, அந்தே இஸ்ஸரதம் க³தோ.

‘‘தேனேவ தே³ஹப³ந்தே⁴ன, புஞ்ஞம்ஹி க²யமாக³தே;

மரணாபி⁴முகோ² ஸோபி, அஸோகோ ஸோகமாக³தோ’’தி.

அபிச ஸப்³ப³ம் ஆரோக்³யம் ப்³யாதி⁴பரியோஸானம், ஸப்³ப³ம் யோப்³ப³னம் ஜராபரியோஸானம், ஸப்³ப³ம் ஜீவிதம் மரணபரியோஸானம், ஸப்³போ³யேவ லோகஸன்னிவாஸோ ஜாதியா அனுக³தோ, ஜராய அனுஸடோ, ப்³யாதி⁴னா அபி⁴பூ⁴தோ, மரணேன அப்³பா⁴ஹதோ. தேனாஹ –

‘‘யதா²பி ஸேலா விபுலா, நப⁴ம் ஆஹச்ச பப்³ப³தா;

ஸமந்தா அனுபரியேய்யும், நிப்போதே²ந்தா சதுத்³தி³ஸா.

‘‘ஏவம் ஜரா ச மச்சு ச, அதி⁴வத்தந்தி பாணினே;

க²த்தியே ப்³ராஹ்மணே வேஸ்ஸே, ஸுத்³தே³ சண்டா³லபுக்குஸே;

ந கிஞ்சி பரிவஜ்ஜேதி, ஸப்³ப³மேவாபி⁴மத்³த³தி.

‘‘ந தத்த² ஹத்தீ²னம் பூ⁴மி, ந ரதா²னம் ந பத்தியா;

ந சாபி மந்தயுத்³தே⁴ன, ஸக்கா ஜேதும் த⁴னேன வா’’தி. (ஸம். நி. 1.136);

ஏவம் ஜீவிதஸம்பத்தியா மரணவிபத்திபரியோஸானதம் வவத்த²பேந்தேன ஸம்பத்திவிபத்திதோ மரணம் அனுஸ்ஸரிதப்³ப³ம்.

171. உபஸம்ஹரணதோதி பரேஹி ஸத்³தி⁴ம் அத்தனோ உபஸம்ஹரணதோ. தத்த² ஸத்தஹாகாரேஹி உபஸம்ஹரணதோ மரணம் அனுஸ்ஸரிதப்³ப³ம், யஸமஹத்ததோ, புஞ்ஞமஹத்ததோ, தா²மமஹத்ததோ, இத்³தி⁴மஹத்ததோ, பஞ்ஞாமஹத்ததோ, பச்சேகபு³த்³த⁴தோ, ஸம்மாஸம்பு³த்³த⁴தோதி. கத²ம்? இத³ம் மரணம் நாம மஹாயஸானம் மஹாபரிவாரானம் ஸம்பன்னத⁴னவாஹனானம் மஹாஸம்மதமந்தா⁴துமஹாஸுத³ஸ்ஸன த³ள்ஹனேமி நிமிப்பபு⁴தீனம்பி உபரி நிராஸங்கமேவ பதிதம், கிமங்க³ம் பன மய்ஹம் உபரி ந பதிஸ்ஸதி?

மஹாயஸா ராஜவரா, மஹாஸம்மதஆத³யோ;

தேபி மச்சுவஸம் பத்தா, மாதி³ஸேஸு கதா²வ காதி.

ஏவம் தாவ யஸமஹத்ததோ அனுஸ்ஸரிதப்³ப³ம்.

கத²ம் புஞ்ஞமஹத்ததோ?

ஜோதிகோ ஜடிலோ உக்³கோ³, மேண்ட³கோ அத² புண்ணகோ;

ஏதே சஞ்ஞே ச யே லோகே, மஹாபுஞ்ஞாதி விஸ்ஸுதா;

ஸப்³பே³ மரணமாபன்னா, மாதி³ஸேஸு கதா²வ காதி.

ஏவம் புஞ்ஞமஹத்ததோ அனுஸ்ஸரிதப்³ப³ம்.

கத²ம் தா²மமஹத்ததோ?

வாஸுதே³வோ ப³லதே³வோ, பீ⁴மஸேனோ யுதி⁴ட்டி²லோ;

சானுரோ யோ மஹாமல்லோ, அந்தகஸ்ஸ வஸம் க³தா.

ஏவம் தா²மப³லூபேதா, இதி லோகம்ஹி விஸ்ஸுதா;

ஏதேபி மரணம் யாதா, மாதி³ஸேஸு கதா²வ காதி.

ஏவம் தா²மமஹத்ததோ அனுஸ்ஸரிதப்³ப³ம்.

கத²ம் இத்³தி⁴மஹத்ததோ?

பாத³ங்கு³ட்ட²கமத்தேன, வேஜயந்தமகம்பயி;

யோ நாமித்³தி⁴மதம் ஸேட்டோ², து³தியோ அக்³க³ஸாவகோ.

ஸோபி மச்சுமுக²ம் கோ⁴ரம், மிகோ³ ஸீஹமுக²ம் விய;

பவிட்டோ² ஸஹ இத்³தீ⁴ஹி, மாதி³ஸேஸு கதா²வ காதி.

ஏவம் இத்³தி⁴மஹத்ததோ அனுஸ்ஸரிதப்³ப³ம்.

கத²ம் பஞ்ஞாமஹத்ததோ?

லோகனாத²ம் ட²பேத்வான, யே சஞ்ஞே அத்தி² பாணினோ;

பஞ்ஞாய ஸாரிபுத்தஸ்ஸ, கலம் நாக்³க⁴ந்தி ஸோளஸிம்.

ஏவம் நாம மஹாபஞ்ஞோ, பட²மோ அக்³க³ஸாவகோ;

மரணஸ்ஸ வஸம் பத்தோ, மாதி³ஸேஸு கதா²வ காதி.

ஏவம் பஞ்ஞாமஹத்ததோ அனுஸ்ஸரிதப்³ப³ம்.

கத²ம் பச்சேகபு³த்³த⁴தோ? யேபி தே அத்தனோ ஞாணவீரியப³லேன ஸப்³ப³கிலேஸஸத்துனிம்மத²னம் கத்வா பச்சேகபோ³தி⁴ம் பத்தா க²க்³க³விஸாணகப்பா ஸயம்பு⁴னோ, தேபி மரணதோ ந முத்தா, குதோ பனாஹம் முச்சிஸ்ஸாமீதி.

தம் தம் நிமித்தமாக³ம்ம, வீமம்ஸந்தா மஹேஸயோ;

ஸயம்பு⁴ஞ்ஞாணதேஜேன, யே பத்தா ஆஸவக்க²யம்.

ஏகசரியனிவாஸேன, க²க்³க³ஸிங்க³ஸமூபமா;

தேபி நாதிக³தா மச்சும், மாதி³ஸேஸு கதா²வ காதி.

ஏவம் பச்சேகபு³த்³த⁴தோ அனுஸ்ஸரிதப்³ப³ம்.

கத²ம் ஸம்மாஸம்பு³த்³த⁴தோ? யோபி ஸோ ப⁴க³வா அஸீதிஅனுப்³யஞ்ஜனபடிமண்டி³தத்³வத்திம்ஸமஹாபுரிஸலக்க²ணவிசித்ரரூபகாயோ ஸப்³பா³காரபரிஸுத்³த⁴ஸீலக்க²ந்தா⁴தி³கு³ணரதனஸமித்³த⁴த⁴ம்மகாயோ யஸமஹத்தபுஞ்ஞமஹத்ததா²மமஹத்தஇத்³தி⁴மஹத்தபஞ்ஞாமஹத்தானம் பாரம் க³தோ அஸமோ அஸமஸமோ அப்படிபுக்³க³லோ அரஹம் ஸம்மாஸம்பு³த்³தோ⁴, ஸோபி ஸலிலவுட்டி²னிபாதேன மஹாஅக்³கி³க்க²ந்தோ⁴ விய மரணவுட்டி²னிபாதேன டா²னஸோ வூபஸந்தோ.

ஏவம் மஹானுபா⁴வஸ்ஸ, யம் நாமேதம் மஹேஸினோ;

ந ப⁴யேன ந லஜ்ஜாய, மரணம் வஸமாக³தம்.

நில்லஜ்ஜம் வீதஸாரஜ்ஜம், ஸப்³ப³ஸத்தாபி⁴மத்³த³னம்;

தயித³ம் மாதி³ஸம் ஸத்தம், கத²ம் நாபி⁴ப⁴விஸ்ஸதீதி.

ஏவம் ஸம்மாஸம்பு³த்³த⁴தோ அனுஸ்ஸரிதப்³ப³ம்.

தஸ்ஸேவம் யஸமஹத்ததாதி³ஸம்பன்னேஹி பரேஹி ஸத்³தி⁴ம் மரணஸாமஞ்ஞதாய அத்தானம் உபஸம்ஹரித்வா தேஸம் விய ஸத்தவிஸேஸானம் மய்ஹம்பி மரணம் ப⁴விஸ்ஸதீதி அனுஸ்ஸரதோ உபசாரப்பத்தம் கம்மட்டா²னம் ஹோதீதி. ஏவம் உபஸம்ஹரணதோ மரணம் அனுஸ்ஸரிதப்³ப³ம்.

172. காயப³ஹுஸாதா⁴ரணதோதி அயம் காயோ ப³ஹுஸாதா⁴ரணோ. அஸீதியா தாவ கிமிகுலானம் ஸாதா⁴ரணோ, தத்த² ச²வினிஸ்ஸிதா பாணா ச²விம் கா²த³ந்தி, சம்மனிஸ்ஸிதா சம்மம் கா²த³ந்தி, மம்ஸனிஸ்ஸிதா மம்ஸம் கா²த³ந்தி, ந்ஹாருனிஸ்ஸிதா ந்ஹாரும் கா²த³ந்தி, அட்டி²னிஸ்ஸிதா அட்டி²ம் கா²த³ந்தி, மிஞ்ஜனிஸ்ஸிதா மிஞ்ஜம் கா²த³ந்தி. தத்தே²வ ஜாயந்தி ஜீயந்தி மீயந்தி, உச்சாரபஸ்ஸாவம் கரோந்தி. காயோவ நேஸம் ஸூதிக⁴ரஞ்சேவ கி³லானஸாலா ச ஸுஸானஞ்ச வச்சகுடி ச பஸ்ஸாவதோ³ணிகா ச. ஸ்வாயம் தேஸம்பி கிமிகுலானம் பகோபேன மரணம் நிக³ச்ச²தியேவ. யதா² ச அஸீதியா கிமிகுலானம், ஏவம் அஜ்ஜ²த்திகானம்யேவ அனேகஸதானம் ரோகா³னம் பா³ஹிரானஞ்ச அஹிவிச்சி²காதீ³னம் மரணஸ்ஸ பச்சயானம் ஸாதா⁴ரணோ.

யதா² ஹி சதுமஹாபதே² ட²பிதே லக்க²ம்ஹி ஸப்³ப³தி³ஸாஹி ஆக³தா ஸரஸத்திதோமரபாஸாணாத³யோ நிபதந்தி, ஏவம் காயேபி ஸப்³பு³பத்³த³வா நிபதந்தி. ஸ்வாயம் தேஸம்பி உபத்³த³வானம் நிபாதேன மரணம் நிக³ச்ச²தியேவ. தேனாஹ ப⁴க³வா – ‘‘இத⁴, பி⁴க்க²வே, பி⁴க்கு² தி³வஸே நிக்க²ந்தே ரத்தியா படிஹிதாய இதி படிஸஞ்சிக்க²தி, ப³ஹுகா கோ² மே பச்சயா மரணஸ்ஸ, அஹி வா மம் ட³ம்ஸேய்ய, விச்சி²கோ வா மம் ட³ம்ஸேய்ய, ஸதபதீ³ வா மம் ட³ம்ஸேய்ய, தேன மே அஸ்ஸ காலங்கிரியா, ஸோ மமஸ்ஸ அந்தராயோ, உபக்க²லித்வா வா பபதேய்யம், ப⁴த்தம் வா மே பு⁴த்தம் ப்³யாபஜ்ஜேய்ய, பித்தம் வா மே குப்பேய்ய, ஸேம்ஹம் வா மே குப்பேய்ய, ஸத்த²கா வா மே வாதா குப்பேய்யும், தேன மே அஸ்ஸ காலங்கிரியா, ஸோ மமஸ்ஸ அந்தராயோ’’தி. ஏவம் (அ. நி. 6.20) காயப³ஹுஸாதா⁴ரணதோ மரணம் அனுஸ்ஸரிதப்³ப³ம்.

173. ஆயுது³ப்³ப³லதோதி ஆயு நாமேதம் அப³லம் து³ப்³ப³லம். ததா² ஹி ஸத்தானம் ஜீவிதம் அஸ்ஸாஸபஸ்ஸாஸூபனிப³த்³த⁴ஞ்சேவ இரியாபதூ²பனிப³த்³த⁴ஞ்ச ஸீதுண்ஹூபனிப³த்³த⁴ஞ்ச மஹாபூ⁴தூபனிப³த்³த⁴ஞ்ச ஆஹாரூபனிப³த்³த⁴ஞ்ச. ததே³தம் அஸ்ஸாஸபஸ்ஸாஸானம் ஸமவுத்திதம் லப⁴மானமேவ பவத்ததி. ப³ஹி நிக்க²ந்தனாஸிகவாதே பன அந்தோ அபவிஸந்தே, பவிட்டே² வா அனிக்க²மந்தே மதோ நாம ஹோதி. சதுன்னம் இரியாபதா²னம்பி ஸமவுத்திதம் லப⁴மானமேவ பவத்ததி. அஞ்ஞதரஞ்ஞதரஸ்ஸ பன அதி⁴மத்ததாய ஆயுஸங்கா²ரா உபச்சி²ஜ்ஜந்தி. ஸீதுண்ஹானம்பி ஸமவுத்திதம் லப⁴மானமேவ பவத்ததி. அதிஸீதேன பன அதிஉண்ஹேன வா அபி⁴பூ⁴தஸ்ஸ விபஜ்ஜதி. மஹாபூ⁴தானம்பி ஸமவுத்திதம் லப⁴மானமேவ பவத்ததி. பத²வீதா⁴துயா பன ஆபோதா⁴துஆதீ³னம் வா அஞ்ஞதரஞ்ஞதரஸ்ஸ பகோபேன ப³லஸம்பன்னோபி புக்³க³லோ பத்த²த்³த⁴காயோ வா அதிஸாராதி³வஸேன கிலின்னபூதிகாயோ வா மஹாடா³ஹபரேதோ வா ஸம்பி⁴ஜ்ஜமானஸந்தி⁴ப³ந்த⁴னோ வா ஹுத்வா ஜீவிதக்க²யம் பாபுணாதி. கப³ளீகாராஹாரம்பி யுத்தகாலே லப⁴ந்தஸ்ஸேவ ஜீவிதம் பவத்ததி, ஆஹாரம் அலப⁴மானஸ்ஸ பன பரிக்க²யம் க³ச்ச²தீதி. ஏவம் ஆயுது³ப்³ப³லதோ மரணம் அனுஸ்ஸரிதப்³ப³ம்.

174. அனிமித்ததோதி அவவத்தா²னதோ, பரிச்சே²தா³பா⁴வதோதி அத்தோ². ஸத்தானம் ஹி –

ஜீவிதம் ப்³யாதி⁴ காலோ ச, தே³ஹனிக்கே²பனம் க³தி;

பஞ்சேதே ஜீவலோகஸ்மிம், அனிமித்தா ந நாயரே.

தத்த² ஜீவிதம் தாவ ‘‘ஏத்தகமேவ ஜீவிதப்³ப³ம், ந இதோ பர’’ந்தி வவத்தா²னாபா⁴வதோ அனிமித்தம். கலலகாலேபி ஹி ஸத்தா மரந்தி, அப்³பு³த³பேஸிக⁴னமாஸிகத்³வேமாஸதேமாஸசதுமாஸபஞ்சமாஸத³ஸமாஸகாலேபி. குச்சி²தோ நிக்க²ந்தஸமயேபி. ததோ பரம் வஸ்ஸஸதஸ்ஸ அந்தோபி ப³ஹிபி மரந்தியேவ. ப்³யாதி⁴பி ‘‘இமினாவ ப்³யாதி⁴னா ஸத்தா மரந்தி, நாஞ்ஞேனா’’தி வவத்தா²னாபா⁴வதோ அனிமித்தோ. சக்கு²ரோகே³னாபி ஹி ஸத்தா மரந்தி, ஸோதரோகா³தீ³னம் அஞ்ஞதரேனாபி. காலோபி ‘‘இமஸ்மிம்யேவ காலே மரிதப்³ப³ம், நாஞ்ஞஸ்மி’’ந்தி ஏவம் வவத்தா²னாபா⁴வதோ அனிமித்தோ. புப்³ப³ண்ஹேபி ஹி ஸத்தா மரந்தி, மஜ்ஜ²ன்ஹிகாதீ³னம் அஞ்ஞதரஸ்மிம்பி. தே³ஹனிக்கே²பனம்பி ‘‘இதே⁴வ மீயமானானம் தே³ஹேன பதிதப்³ப³ம், நாஞ்ஞத்ரா’’தி ஏவம் வவத்தா²னாபா⁴வதோ அனிமித்தம். அந்தோகா³மே ஜாதானம் ஹி ப³ஹிகா³மேபி அத்தபா⁴வோ பததி. ப³ஹிகா³மே ஜாதானம்பி அந்தோகா³மே. ததா² த²லஜானம் வா ஜலே, ஜலஜானம் வா த²லேதி அனேகப்பகாரதோ வித்தா²ரேதப்³ப³ம். க³திபி ‘‘இதோ சுதேன இத⁴ நிப்³ப³த்திதப்³ப³’’ந்தி ஏவம் வவத்தா²னாபா⁴வதோ அனிமித்தா. தே³வலோகதோ ஹி சுதா மனுஸ்ஸேஸுபி நிப்³ப³த்தந்தி, மனுஸ்ஸலோகதோ சுதா தே³வலோகாதீ³னம்பி யத்த² கத்த²சி நிப்³ப³த்தந்தீதி ஏவம் யந்தயுத்தகோ³ணோ விய க³திபஞ்சகே லோகோ ஸம்பரிவத்ததீதி ஏவம் அனிமித்ததோ மரணம் அனுஸ்ஸரிதப்³ப³ம்.

175. அத்³தா⁴னபரிச்சே²த³தோதி மனுஸ்ஸானம் ஜீவிதஸ்ஸ நாம ஏதரஹி பரித்தோ அத்³தா⁴. யோ சிரம் ஜீவதி, ஸோ வஸ்ஸஸதம், அப்பம் வா பி⁴ய்யோ. தேனாஹ ப⁴க³வா – ‘‘அப்பமித³ம், பி⁴க்க²வே, மனுஸ்ஸானம் ஆயு, க³மனீயோ ஸம்பராயோ, கத்தப்³ப³ம் குஸலம், சரிதப்³ப³ம் ப்³ரஹ்மசரியம், நத்தி² ஜாதஸ்ஸ அமரணம். யோ, பி⁴க்க²வே, சிரம் ஜீவதி, ஸோ வஸ்ஸஸதம், அப்பம் வா பி⁴ய்யோதி.

அப்பமாயுமனுஸ்ஸானம், ஹீளேய்ய நம் ஸுபோரிஸோ;

சரேய்யாதி³த்தஸீஸோவ, நத்தி² மச்சுஸ்ஸ நாக³மோதி. (ஸம். நி. 1.145);

அபரம்பி ஆஹ – ‘‘பூ⁴தபுப்³ப³ம், பி⁴க்க²வே, அரகோ நாம ஸத்தா² அஹோஸீ’’தி ஸப்³ப³ம்பி ஸத்தஹி உபமாஹி அலங்கதம் ஸுத்தம் வித்தா²ரேதப்³ப³ம்.

அபரம்பி ஆஹ – ‘‘யோசாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் ரத்திந்தி³வம் ஜீவேய்யம், ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. யோசாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் தி³வஸம் ஜீவேய்யம், ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. யோ சாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் தத³ந்தரம் ஜீவேய்யம், யத³ந்தரம் ஏகம் பிண்ட³பாதம் பு⁴ஞ்ஜாமி, ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. யோ சாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் தத³ந்தரம் ஜீவேய்யம், யத³ந்தரம் சத்தாரோ பஞ்ச ஆலோபே ஸங்கா²தி³த்வா அஜ்ஜோ²ஹராமி, ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. இமே வுச்சந்தி, பி⁴க்க²வே, பி⁴க்கூ² பமத்தா விஹரந்தி, த³ந்த⁴ம் மரணஸ்ஸதிம் பா⁴வேந்தி ஆஸவானம் க²யாய. யோ ச க்²வாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் தத³ந்தரம் ஜீவேய்யம், யத³ந்தரம் ஏகம் ஆலோபம் ஸங்கா²தி³த்வா அஜ்ஜோ²ஹராமி, ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. யோ சாயம், பி⁴க்க²வே, பி⁴க்கு² ஏவம் மரணஸ்ஸதிம் பா⁴வேதி, அஹோ வதாஹம் தத³ந்தரம் ஜீவேய்யம், யத³ந்தரம் அஸ்ஸஸித்வா வா பஸ்ஸஸாமி, பஸ்ஸஸித்வா வா அஸ்ஸஸாமி, ப⁴க³வதோ ஸாஸனம் மனஸிகரேய்யம், ப³ஹும் வத மே கதம் அஸ்ஸாதி. இமே வுச்சந்தி, பி⁴க்க²வே, பி⁴க்கூ² அப்பமத்தா விஹரந்தி, திக்க²ம் மரணஸ்ஸதிம் பா⁴வேந்தி ஆஸவானம் க²யாயா’’தி (அ. நி. 6.19). ஏவம் சதுபஞ்சாலோபஸங்கா²த³னமத்தம் அவிஸ்ஸாஸியோ பரித்தோ ஜீவிதஸ்ஸ அத்³தா⁴தி ஏவம் அத்³தா⁴னபரிச்சே²த³தோ மரணம் அனுஸ்ஸரிதப்³ப³ம்.

176. க²ணபரித்ததோதி பரமத்த²தோ ஹி அதிபரித்தோ ஸத்தானம் ஜீவிதக்க²ணோ ஏகசித்தப்பவத்திமத்தோயேவ. யதா² நாம ரத²சக்கம் பவத்தமானம்பி ஏகேனேவ நேமிப்பதே³ஸேன பவத்ததி, திட்ட²மானம்பி ஏகேனேவ திட்ட²தி, ஏவமேவ ஏகசித்தக்க²ணிகம் ஸத்தானம் ஜீவிதம். தஸ்மிம் சித்தே நிருத்³த⁴மத்தே ஸத்தோ நிருத்³தோ⁴தி வுச்சதி. யதா²ஹ – ‘‘அதீதே சித்தக்க²ணே ஜீவித்த², ந ஜீவதி, ந ஜீவிஸ்ஸதி. அனாக³தே சித்தக்க²ணே ந ஜீவித்த², ந ஜீவதி, ஜீவிஸ்ஸதி. பச்சுப்பன்னே சித்தக்க²ணே ந ஜீவித்த², ஜீவதி, ந ஜீவிஸ்ஸதி.

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹு ஸோ வத்ததே க²ணோ.

‘‘யே நிருத்³தா⁴ மரந்தஸ்ஸ, திட்ட²மானஸ்ஸ வா இத⁴;

ஸப்³பே³பி ஸதி³ஸா க²ந்தா⁴, க³தா அப்படிஸந்தி⁴கா.

‘‘அனிப்³ப³த்தேன ந ஜாதோ, பச்சுப்பன்னேன ஜீவதி;

சித்தப⁴ங்கா³ மதோ லோகோ, பஞ்ஞத்தி பரமத்தி²யா’’தி. (மஹானி. 39);

ஏவம் க²ணபரித்ததோ மரணம் அனுஸ்ஸரிதப்³ப³ம்.

177. இதி இமேஸம் அட்ட²ன்னம் ஆகாரானம் அஞ்ஞதரஞ்ஞதரேன அனுஸ்ஸரதோபி புனப்புனம் மனஸிகாரவஸேன சித்தம் ஆஸேவனம் லப⁴தி, மரணாரம்மணா ஸதி ஸந்திட்ட²தி, நீவரணானி விக்க²ம்ப⁴ந்தி, ஜா²னங்கா³னி பாதுப⁴வந்தி. ஸபா⁴வத⁴ம்மத்தா பன ஸம்வேஜனீயத்தா ச ஆரம்மணஸ்ஸ அப்பனம் அப்பத்வா உபசாரப்பத்தமேவ ஜா²னம் ஹோதி. லோகுத்தரஜ்ஜா²னம் பன து³தியசதுத்தா²னி ச ஆருப்பஜ்ஜா²னானி ஸபா⁴வத⁴ம்மேபி பா⁴வனாவிஸேஸேன அப்பனம் பாபுணந்தி. விஸுத்³தி⁴பா⁴வனானுக்கமவஸேன ஹி லோகுத்தரம் அப்பனம் பாபுணாதி. ஆரம்மணாதிக்கமபா⁴வனாவஸேன ஆருப்பம். அப்பனாபத்தஸ்ஸேவ ஹி ஜா²னஸ்ஸ ஆரம்மணஸமதிக்கமனமத்தம் தத்த² ஹோதி. இத⁴ பன தது³ப⁴யம்பி நத்தி². தஸ்மா உபசாரப்பத்தமேவ ஜா²னம் ஹோதி. ததே³தம் மரணஸ்ஸதிப³லேன உப்பன்னத்தா மரணஸ்ஸதிச்சேவ ஸங்க²ம் க³ச்ச²தி.

இமஞ்ச பன மரணஸ்ஸதிம் அனுயுத்தோ பி⁴க்கு² ஸததம் அப்பமத்தோ ஹோதி, ஸப்³ப³ப⁴வேஸு அனபி⁴ரதிஸஞ்ஞம் படிலப⁴தி, ஜீவிதனிகந்திம் ஜஹாதி, பாபக³ரஹீ ஹோதி, அஸன்னிதி⁴ப³ஹுலோ பரிக்கா²ரேஸு விக³தமலமச்சே²ரோ, அனிச்சஸஞ்ஞா சஸ்ஸ பரிசயம் க³ச்ச²தி, தத³னுஸாரேனேவ து³க்க²ஸஞ்ஞா அனத்தஸஞ்ஞா ச உபட்டா²தி. யதா² அபா⁴விதமரணா ஸத்தா ஸஹஸா வாளமிக³யக்க²ஸப்பசோரவத⁴காபி⁴பூ⁴தா விய மரணஸமயே ப⁴யம் ஸந்தாஸம் ஸம்மோஹம் ஆபஜ்ஜந்தி, ஏவம் அனாபஜ்ஜித்வா அப⁴யோ அஸம்மூள்ஹோ காலம் கரோதி. ஸசே தி³ட்டே²வ த⁴ம்மே அமதம் நாராதே⁴தி, காயஸ்ஸ பே⁴தா³ ஸுக³திபராயனோ ஹோதி.

தஸ்மா ஹவே அப்பமாத³ம், கயிராத² ஸுமேத⁴ஸோ;

ஏவம் மஹானுபா⁴வாய, மரணஸ்ஸதியா ஸதா³தி.

இத³ம் மரணஸ்ஸதியம் வித்தா²ரகதா²முக²ம்.

காயக³தாஸதிகதா²

178. இதா³னி யம் தம் அஞ்ஞத்ர பு³த்³து⁴ப்பாதா³ அப்பவத்தபுப்³ப³ம் ஸப்³ப³தித்தி²யானம் அவிஸயபூ⁴தம் தேஸு தேஸு ஸுத்தந்தேஸு ‘‘ஏகத⁴ம்மோ, பி⁴க்க²வே, பா⁴விதோ ப³ஹுலீகதோ மஹதோ ஸம்வேகா³ய ஸம்வத்ததி. மஹதோ அத்தா²ய ஸம்வத்ததி. மஹதோ யோக³க்கே²மாய ஸம்வத்ததி. மஹதோ ஸதிஸம்பஜஞ்ஞாய ஸம்வத்ததி. ஞாணத³ஸ்ஸனபடிலாபா⁴ய ஸம்வத்ததி. தி³ட்ட²த⁴ம்மஸுக²விஹாராய ஸம்வத்ததி. விஜ்ஜாவிமுத்திப²லஸச்சி²கிரியாய ஸம்வத்ததி. கதமோ ஏகத⁴ம்மோ? காயக³தா ஸதி… (அ. நி. 1.563 ஆத³யோ). அமதம் தே, பி⁴க்க²வே, பரிபு⁴ஞ்ஜந்தி, யே காயக³தாஸதிம் பரிபு⁴ஞ்ஜந்தி. அமதம் தே, பி⁴க்க²வே, ந பரிபு⁴ஞ்ஜந்தி, யே காயக³தாஸதிம் ந பரிபு⁴ஞ்ஜந்தி. அமதம் தேஸம், பி⁴க்க²வே, பரிபு⁴த்தம்… அபரிபு⁴த்தம்… பரிஹீனம்… அபரிஹீனம்… விரத்³த⁴ம்… அவிரத்³த⁴ம், யேஸம் காயக³தாஸதி ஆரத்³தா⁴தி (அ. நி. 1.603) ஏவம் ப⁴க³வதா அனேகேஹி ஆகாரேஹி பஸம்ஸித்வா ‘‘கத²ம் பா⁴விதா, பி⁴க்க²வே, காயக³தாஸதி கத²ம் ப³ஹுலீகதா மஹப்ப²லா ஹோதி மஹானிஸம்ஸா? இத⁴, பி⁴க்க²வே, பி⁴க்கு² அரஞ்ஞக³தோ வா’’திஆதி³னா (ம. நி. 3.154) நயேன ஆனாபானபப்³ப³ம், இரியாபத²பப்³ப³ம், சதுஸம்பஜஞ்ஞபப்³ப³ம், படிக்கூலமனஸிகாரபப்³ப³ம், தா⁴துமனஸிகாரபப்³ப³ம், நவஸிவதி²கபப்³பா³னீதி இமேஸம் சுத்³த³ஸன்னம் பப்³பா³னம் வஸேன காயக³தாஸதிகம்மட்டா²னம் நித்³தி³ட்ட²ம், தஸ்ஸ பா⁴வனானித்³தே³ஸோ அனுப்பத்தோ.

தத்த² யஸ்மா இரியாபத²பப்³ப³ம் சதுஸம்பஜஞ்ஞபப்³ப³ம் தா⁴துமனஸிகாரபப்³ப³ந்தி இமானி தீணி விபஸ்ஸனாவஸேன வுத்தானி. நவ ஸிவதி²கபப்³பா³னி விபஸ்ஸனாஞாணேஸுயேவ ஆதீ³னவானுபஸ்ஸனாவஸேன வுத்தானி. யாபி சேத்த² உத்³து⁴மாதகாதீ³ஸு ஸமாதி⁴பா⁴வனா இஜ்ஜே²ய்ய, ஸா அஸுப⁴னித்³தே³ஸே பகாஸிதாயேவ. ஆனாபானபப்³ப³ம் பன படிக்கூலமனஸிகாரபப்³ப³ஞ்ச இமானேவேத்த² த்³வே ஸமாதி⁴வஸேன வுத்தானி. தேஸு ஆனாபானபப்³ப³ம் ஆனாபானஸ்ஸதிவஸேன விஸும் கம்மட்டா²னம்யேவ. யம் பனேதம் ‘‘புன சபரம், பி⁴க்க²வே, பி⁴க்கு² இமமேவ காயம் உத்³த⁴ம் பாத³தலா அதோ⁴ கேஸமத்த²கா தசபரியந்தம் பூரம் நானப்பகாரஸ்ஸ அஸுசினோ பச்சவேக்க²தி. அத்தி² இமஸ்மிம் காயே கேஸா லோமா…பே… முத்த’’ந்தி (ம. நி. 3.154) ஏவம் மத்த²லுங்க³ம் அட்டி²மிஞ்ஜேன ஸங்க³ஹேத்வா படிக்கூலமனஸிகாரவஸேன தே³ஸிதம் த்³வத்திம்ஸாகாரகம்மட்டா²னம், இத³மித⁴ காயக³தாஸதீதி அதி⁴ப்பேதம்.

179. தத்தா²யம் பாளிவண்ணனாபுப்³ப³ங்க³மோ பா⁴வனானித்³தே³ஸோ. இமமேவ காயந்தி இமம் சதுமஹாபூ⁴திகம் பூதிகாயம். உத்³த⁴ம் பாத³தலாதி பாத³தலதோ உபரி. அதோ⁴ கேஸமத்த²காதி கேஸக்³க³தோ ஹேட்டா². தசபரியந்தந்தி திரியம் தசபரிச்சி²ன்னம். பூரம் நானப்பகாரஸ்ஸ அஸுசினோ பச்சவேக்க²தீதி நானப்பகாரகேஸாதி³அஸுசிப⁴ரிதோ அயம் காயோதி பஸ்ஸதி. கத²ம்? அத்தி² இமஸ்மிம் காயே கேஸா…பே… முத்தந்தி.

தத்த² அத்தீ²தி ஸம்விஜ்ஜந்தி. இமஸ்மிந்தி ய்வாயம் உத்³த⁴ம் பாத³தலா அதோ⁴ கேஸமத்த²கா தசபரியந்தோ பூரோ நானப்பகாரஸ்ஸ அஸுசினோதி வுச்சதி, தஸ்மிம். காயேதி ஸரீரே. ஸரீரம் ஹி அஸுசிஸஞ்சயதோ குச்சி²தானம் கேஸாதீ³னஞ்சேவ சக்கு²ரோகா³தீ³னஞ்ச ரோக³ஸதானம் ஆயபூ⁴ததோ காயோதி வுச்சதி. கேஸா லோமாதி ஏதே கேஸாத³யோ த்³வத்திம்ஸாகாரா. தத்த² அத்தி² இமஸ்மிம் காயே கேஸா, அத்தி² இமஸ்மிம் காயே லோமாதி ஏவம் ஸம்ப³ந்தோ⁴ வேதி³தப்³போ³.

இமஸ்மிம் ஹி பாத³தலா பட்டா²ய உபரி, கேஸமத்த²கா பட்டா²ய ஹேட்டா², தசதோ பட்டா²ய பரிதோதி ஏத்தகே ப்³யாமமத்தே களேவரே ஸப்³பா³காரேனபி விசினந்தோ ந கோசி கிஞ்சி முத்தம் வா மணிம் வா வேளுரியம் வா அக³ரும் வா குங்குமம் வா கப்பூரம் வா வாஸசுண்ணாதி³ம் வா அணுமத்தம்பி ஸுசிபா⁴வம் பஸ்ஸதி, அத² கோ² பரமது³க்³க³ந்த⁴ஜேகு³ச்ச²ம் அஸிரிகத³ஸ்ஸனம் நானப்பகாரம் கேஸலோமாதி³பே⁴த³ம் அஸுசிம்யேவ பஸ்ஸதி. தேன வுத்தம் ‘‘அத்தி² இமஸ்மிம் காயே கேஸா லோமா…பே… முத்த’’ந்தி. அயமேத்த² பத³ஸம்ப³ந்த⁴தோ வண்ணனா.

180. இமம் பன கம்மட்டா²னம் பா⁴வேதுகாமேன ஆதி³கம்மிகேன குலபுத்தேன வுத்தப்பகாரம் கல்யாணமித்தம் உபஸங்கமித்வா இத³ம் கம்மட்டா²னம் க³ஹேதப்³ப³ம். தேனாபிஸ்ஸ கம்மட்டா²னம் கதே²ந்தேன ஸத்ததா⁴ உக்³க³ஹகோஸல்லம் த³ஸதா⁴ ச மனஸிகாரகோஸல்லம் ஆசிக்கி²தப்³ப³ம். தத்த² வசஸா மனஸா வண்ணதோ ஸண்டா²னதோ தி³ஸதோ ஓகாஸதோ பரிச்சே²த³தோதி ஏவம் ஸத்ததா⁴ உக்³க³ஹகோஸல்லம் ஆசிக்கி²தப்³ப³ம்.

இமஸ்மிம் ஹி படிக்கூலமனஸிகாரகம்மட்டா²னே யோபி திபிடகோ ஹோதி, தேனாபி மனஸிகாரகாலே பட²மம் வாசாய ஸஜ்ஜா²யோ காதப்³போ³. ஏகச்சஸ்ஸ ஹி ஸஜ்ஜா²யம் கரோந்தஸ்ஸேவ கம்மட்டா²னம் பாகடம் ஹோதி மலயவாஸீ மஹாதே³வத்தே²ரஸ்ஸ ஸந்திகே உக்³க³ஹிதகம்மட்டா²னானம் த்³வின்னம் தே²ரானம் விய. தே²ரோ கிர தேஹி கம்மட்டா²னம் யாசிதோ சத்தாரோ மாஸே இமம்யேவ ஸஜ்ஜா²யம் கரோதா²தி த்³வத்திம்ஸாகாரபாளிம் அதா³ஸி. தே கிஞ்சாபி நேஸம் த்³வே தயோ நிகாயா பகு³ணா, பத³க்கி²ணக்³கா³ஹிதாய பன சத்தாரோ மாஸே த்³வத்திம்ஸாகாரம் ஸஜ்ஜா²யந்தாவ ஸோதாபன்னா அஹேஸும். தஸ்மா கம்மட்டா²னம் கதே²ந்தேன ஆசரியேன அந்தேவாஸிகோ வத்தப்³போ³ ‘‘பட²மம் தாவ வாசாய ஸஜ்ஜா²யம் கரோஹீ’’தி.

கரோந்தேன ச தசபஞ்சகாதீ³நி பரிச்சி²ந்தி³த்வா அனுலோமபடிலோமவஸேன ஸஜ்ஜா²யோ காதப்³போ³. கேஸா லோமா நகா² த³ந்தா தசோதி ஹி வத்வா புன படிலோமதோ தசோ த³ந்தா நகா² லோமா கேஸாதி வத்தப்³ப³ம்.

தத³னந்தரம் வக்கபஞ்சகே மம்ஸம் ந்ஹாரு அட்டி² அட்டி²மிஞ்ஜம் வக்கந்தி வத்வா புன படிலோமதோ வக்கம் அட்டி²மிஞ்ஜம் அட்டி² ந்ஹாரு மம்ஸம், தசோ த³ந்தா நகா² லோமா கேஸாதி வத்தப்³ப³ம்.

ததோ பப்பா²ஸபஞ்சகே ஹத³யம் யகனம் கிலோமகம் பிஹகம் பப்பா²ஸந்தி வத்வா புன படிலோமதோ பப்பா²ஸம் பிஹகம் கிலோமகம் யகனம் ஹத³யம், வக்கம் அட்டி²மிஞ்ஜம் அட்டி² ந்ஹாரு மம்ஸம், தசோ த³ந்தா நகா² லோமா கேஸாதி வத்தப்³ப³ம்.

ததோ மத்த²லுங்க³பஞ்சகே அந்தம் அந்தகு³ணம் உத³ரியம் கரீஸம் மத்த²லுங்க³ந்தி வத்வா புன படிலோமதோ மத்த²லுங்க³ம் கரீஸம் உத³ரியம் அந்தகு³ணம் அந்தம், பப்பா²ஸம் பிஹகம் கிலோமகம் யகனம் ஹத³யம், வக்கம் அட்டி²மிஞ்ஜம் அட்டி² ந்ஹாரு மம்ஸம், தசோ த³ந்தா நகா² லோமா கேஸாதி வத்தப்³ப³ம்.

ததோ மேத³ச²க்கே பித்தம் ஸேம்ஹம் புப்³போ³ லோஹிதம் ஸேதோ³ மேதோ³தி வத்வா புன படிலோமதோ மேதோ³ ஸேதோ³ லோஹிதம் புப்³போ³ ஸேம்ஹம் பித்தம், மத்த²லுங்க³ம் கரீஸம் உத³ரியம் அந்தகு³ணம் அந்தம், பப்பா²ஸம் பிஹகம் கிலோமகம் யகனம் ஹத³யம், வக்கம் அட்டி²மிஞ்ஜம் அட்டி² ந்ஹாரு மம்ஸம், தசோ த³ந்தா நகா² லோமா கேஸாதி வத்தப்³ப³ம்.

ததோ முத்தச²க்கே அஸ்ஸு வஸா கே²ளோ ஸிங்கா⁴ணிகா லஸிகா முத்தந்தி வத்வா புன படிலோமதோ முத்தம் லஸிகா ஸிங்கா⁴ணிகா கே²ளோ வஸா அஸ்ஸு, மேதோ³ ஸேதோ³ லோஹிதம் புப்³போ³ ஸேம்ஹம் பித்தம், மத்த²லுங்க³ம் கரீஸம் உத³ரியம் அந்தகு³ணம் அந்தம், பப்பா²ஸம் பிஹகம் கிலோமகம் யகனம் ஹத³யம், வக்கம் அட்டி²மிஞ்ஜம் அட்டி² ந்ஹாரு மம்ஸம், தசோ த³ந்தா நகா² லோமா கேஸாதி வத்தப்³ப³ம்.

ஏவம் காலஸதம் காலஸஹஸ்ஸம் காலஸதஸஹஸ்ஸம்பி வாசாய ஸஜ்ஜா²யோ காதப்³போ³. வசஸா ஸஜ்ஜா²யேன ஹி கம்மட்டா²னதந்தி பகு³ணா ஹோதி, ந இதோ சிதோ ச சித்தம் விதா⁴வதி. கோட்டா²ஸா பாகடா ஹோந்தி, ஹத்த²ஸங்க²லிகா விய வதிபாத³பந்தி விய ச கா²யந்தி.

யதா² பன வசஸா, ததே²வ மனஸாபி ஸஜ்ஜா²யோ காதப்³போ³. வசஸா ஸஜ்ஜா²யோ ஹி மனஸா ஸஜ்ஜா²யஸ்ஸ பச்சயோ ஹோதி. மனஸா ஸஜ்ஜா²யோ லக்க²ணபடிவேத⁴ஸ்ஸ பச்சயோ ஹோதி.

வண்ணதோதி கேஸாதீ³னம் வண்ணோ வவத்த²பேதப்³போ³.

ஸண்டா²னதோதி தேஸஞ்ஞேவ ஸண்டா²னம் வவத்த²பேதப்³ப³ம்.

தி³ஸதோதி இமஸ்மிம் ஹி ஸரீரே நாபி⁴தோ உத்³த⁴ம் உபரிமதி³ஸா, அதோ⁴ ஹேட்டி²மதி³ஸா, தஸ்மா அயம் கோட்டா²ஸோ இமிஸ்ஸா நாம தி³ஸாயாதி தி³ஸா வவத்த²பேதப்³பா³.

ஓகாஸதோதி அயம் கோட்டா²ஸோ இமஸ்மிம் நாம ஓகாஸே பதிட்டி²தோதி ஏவம் தஸ்ஸ தஸ்ஸ ஓகாஸோ வவத்த²பேதப்³போ³.

பரிச்சே²த³தோதி ஸபா⁴க³பரிச்சே²தோ³ விஸபா⁴க³பரிச்சே²தோ³தி த்³வே பரிச்சே²தா³. தத்த² அயம் கோட்டா²ஸோ ஹேட்டா² ச உபரி ச திரியஞ்ச இமினா நாம பரிச்சி²ன்னோதி ஏவம் ஸபா⁴க³பரிச்சே²தோ³ வேதி³தப்³போ³. கேஸா ந லோமா, லோமாபி ந கேஸாதி ஏவம் அமிஸ்ஸகதாவஸேன விஸபா⁴க³பரிச்சே²தோ³ வேதி³தப்³போ³.

ஏவம் ஸத்ததா⁴ உக்³க³ஹகோஸல்லம் ஆசிக்க²ந்தேன பன இத³ம் கம்மட்டா²னம் அஸுகஸ்மிம் ஸுத்தே படிக்கூலவஸேன கதி²தம், அஸுகஸ்மிம் தா⁴துவஸேனாதி ஞத்வா ஆசிக்கி²தப்³ப³ம். இத³ஞ்ஹி மஹாஸதிபட்டா²னே (தீ³. நி. 2.377) படிக்கூலவஸேனேவ கதி²தம். மஹாஹத்தி²பதோ³பம(ம. நி. 1.300 ஆத³யோ) மஹாராஹுலோவாத³(ம. நி. 2.113 ஆத³யோ) தா⁴துவிப⁴ங்கே³ஸு(ம. நி. 3.342 ஆத³யோ) தா⁴துவஸேன கதி²தம். காயக³தாஸதிஸுத்தே (ம. நி. 3.153) பன யஸ்ஸ வண்ணதோ உபட்டா²தி, தம் ஸந்தா⁴ய சத்தாரி ஜா²னானி விப⁴த்தானி. தத்த² தா⁴துவஸேன கதி²தம் விபஸ்ஸனாகம்மட்டா²னம் ஹோதி. படிக்கூலவஸேன கதி²தம் ஸமத²கம்மட்டா²னம். ததே³தம் இத⁴ ஸமத²கம்மட்டா²னமேவாதி.

181. ஏவம் ஸத்ததா⁴ உக்³க³ஹகோஸல்லம் ஆசிக்கி²த்வா அனுபுப்³ப³தோ, நாதிஸீக⁴தோ, நாதிஸணிகதோ, விக்கே²பபடிபா³ஹனதோ, பண்ணத்திஸமதிக்கமனதோ, அனுபுப்³ப³முஞ்சனதோ, அப்பனாதோ, தயோ ச ஸுத்தந்தாதி ஏவம் த³ஸதா⁴ மனஸிகாரகோஸல்லம் ஆசிக்கி²தப்³ப³ம். தத்த² அனுபுப்³ப³தோதி இத³ஞ்ஹி ஸஜ்ஜா²யகரணதோ பட்டா²ய அனுபடிபாடியா மனஸிகாதப்³ப³ம், ந ஏகந்தரிகாய. ஏகந்தரிகாய ஹி மனஸிகரோந்தோ யதா² நாம அகுஸலோ புரிஸோ த்³வத்திம்ஸபத³ம் நிஸ்ஸேணிம் ஏகந்தரிகாய ஆரோஹந்தோ கிலந்தகாயோ பததி, ந ஆரோஹனம் ஸம்பாதே³தி, ஏவமேவ பா⁴வனாஸம்பத்திவஸேன அதி⁴க³ந்தப்³ப³ஸ்ஸ அஸ்ஸாத³ஸ்ஸ அனதி⁴க³மா கிலந்தசித்தோ பததி, ந பா⁴வனம் ஸம்பாதே³தி.

அனுபுப்³ப³தோ மனஸிகரோந்தேனாபி ச நாதிஸீக⁴தோ மனஸிகாதப்³ப³ம். அதிஸீக⁴தோ மனஸிகரோதோ ஹி யதா² நாம தியோஜனமக்³க³ம் படிபஜ்ஜித்வா ஓக்கமனவிஸ்ஸஜ்ஜனம் அஸல்லக்கே²த்வா ஸீகே⁴ன ஜவேன ஸதக்க²த்தும்பி க³மனாக³மனம் கரோதோ புரிஸஸ்ஸ கிஞ்சாபி அத்³தா⁴னம் பரிக்க²யம் க³ச்ச²தி, அத² கோ² புச்சி²த்வாவ க³ந்தப்³ப³ம் ஹோதி, ஏவமேவ கேவலம் கம்மட்டா²னம் பரியோஸானம் பாபுணாதி, அவிபூ⁴தம் பன ஹோதி, ந விஸேஸம் ஆவஹதி, தஸ்மா நாதிஸீக⁴தோ மனஸிகாதப்³ப³ம்.

யதா² ச நாதிஸீக⁴தோ, ஏவம் நாதிஸணிகதோபி. அதிஸணிகதோ மனஸிகரோதோ ஹி யதா² நாம தத³ஹேவ தியோஜனமக்³க³ம் க³ந்துகாமஸ்ஸ புரிஸஸ்ஸ அந்தராமக்³கே³ ருக்க²பப்³ப³ததளாகாதீ³ஸு விலம்ப³மானஸ்ஸ மக்³கோ³ பரிக்க²யம் ந க³ச்ச²தி, த்³வீஹதீஹேன பரியோஸாபேதப்³போ³ ஹோதி, ஏவமேவ கம்மட்டா²னம் பரியோஸானம் ந க³ச்ச²தி, விஸேஸாதி⁴க³மஸ்ஸ பச்சயோ ந ஹோதி.

விக்கே²பபடிபா³ஹனதோதி கம்மட்டா²னம் விஸ்ஸஜ்ஜேத்வா ப³ஹித்³தா⁴ புது²த்தாரம்மணே சேதஸோ விக்கே²போ படிபா³ஹிதப்³போ³. அப்படிபா³ஹதோ ஹி யதா² நாம ஏகபதி³கம் பபாதமக்³க³ம் படிபன்னஸ்ஸ புரிஸஸ்ஸ அக்கமனபத³ம் அஸல்லக்கே²த்வா இதோ சிதோ ச விலோகயதோ பத³வாரோ விரஜ்ஜ²தி, ததோ ஸதபோரிஸே பபாதே பதிதப்³ப³ம் ஹோதி, ஏவமேவ ப³ஹித்³தா⁴ விக்கே²பே ஸதி கம்மட்டா²னம் பரிஹாயதி பரித⁴ம்ஸதி. தஸ்மா விக்கே²பபடிபா³ஹனதோ மனஸிகாதப்³ப³ம்.

பண்ணத்திஸமதிக்கமனதோதி யாயம் கேஸா லோமாதிஆதி³கா பண்ணத்தி, தம் அதிக்கமித்வா படிக்கூலந்தி சித்தம் ட²பேதப்³ப³ம். யதா² ஹி உத³கது³ல்லப⁴காலே மனுஸ்ஸா அரஞ்ஞே உத³பானம் தி³ஸ்வா தத்த² தாலபண்ணாதி³கம் கிஞ்சிதே³வ ஸஞ்ஞாணம் ப³ந்தி⁴த்வா தேன ஸஞ்ஞாணேன ஆக³ந்த்வா ந்ஹாயந்தி சேவ பிவந்தி ச. யதா³ பன நேஸம் அபி⁴ண்ஹஸஞ்சாரேன ஆக³தாக³தபத³ம் பாகடம் ஹோதி, ததா³ ஸஞ்ஞாணேன கிச்சம் ந ஹோதி, இச்சி²திச்சி²தக்க²ணே க³ந்த்வா ந்ஹாயந்தி சேவ பிவந்தி ச, ஏவமேவ புப்³ப³பா⁴கே³ கேஸா லோமாதிபண்ணத்திவஸேன மனஸிகரோதோ படிக்கூலபா⁴வோ பாகடோ ஹோதி. அத² கேஸா லோமாதிபண்ணத்திம் ஸமதிக்கமித்வா படிக்கூலபா⁴வேயேவ சித்தம் ட²பேதப்³ப³ம்.

அனுபுப்³ப³முஞ்சனதோதி யோ யோ கோட்டா²ஸோ ந உபட்டா²தி, தம் தம் முஞ்சந்தேன அனுபுப்³ப³முஞ்சனதோ மனஸிகாதப்³ப³ம். ஆதி³கம்மிகஸ்ஸ ஹி கேஸாதி மனஸிகரோதோ மனஸிகாரோ க³ந்த்வா முத்தந்தி இமம் பரியோஸானகோட்டா²ஸமேவ ஆஹச்ச திட்ட²தி. முத்தந்தி ச மனஸிகரோதோ மனஸிகாரோ க³ந்த்வா கேஸாதி இமம் ஆதி³கோட்டா²ஸமேவ ஆஹச்ச திட்ட²தி. அத²ஸ்ஸ மனஸிகரோதோ மனஸிகரோதோ கேசி கோட்டா²ஸா உபட்ட²ஹந்தி, கேசி ந உபட்ட²ஹந்தி. தேன யே யே உபட்ட²ஹந்தி, தேஸு தேஸு தாவ கம்மம் காதப்³ப³ம். யாவ த்³வீஸு உபட்டி²தேஸு தேஸம்பி ஏகோ ஸுட்டு²தரம் உபட்ட²ஹதி, ஏவம் உபட்டி²தம் பன தமேவ புனப்புனம் மனஸிகரோந்தேன அப்பனா உப்பாதே³தப்³பா³.

தத்ராயம் உபமா – யதா² ஹி த்³வத்திம்ஸதாலகே தாலவனே வஸந்தம் மக்கடம் க³ஹேதுகாமோ லுத்³தோ³ ஆதி³ம்ஹி டி²ததாலஸ்ஸ பண்ணம் ஸரேன விஜ்ஜி²த்வா உக்குட்டி²ம் கரேய்ய, அத² கோ² ஸோ மக்கடோ படிபாடியா தஸ்மிம் தஸ்மிம் தாலே பதித்வா பரியந்ததாலமேவ க³ச்சே²ய்ய, தத்த²பி க³ந்த்வா லுத்³தே³ன ததே²வ கதே புன தேனேவ நயேன ஆதி³தாலம் ஆக³ச்சே²ய்ய, ஸோ ஏவம் புனப்புனம் பரிபாதியமானோ உக்குட்டு²க்குட்டி²ட்டா²னேயேவ உட்ட²ஹித்வா அனுக்கமேன ஏகஸ்மிம் தாலே நிபதித்வா தஸ்ஸ வேமஜ்ஜே² மகுளதாலபண்ணஸூசிம் த³ள்ஹம் க³ஹேத்வா விஜ்ஜி²யமானோபி ந உட்ட²ஹேய்ய, ஏவம்ஸம்பத³மித³ம் த³ட்ட²ப்³ப³ம்.

தத்ரித³ம் ஓபம்மஸம்ஸந்த³னம் – யதா² ஹி தாலவனே த்³வத்திம்ஸதாலா, ஏவம் இமஸ்மிம் காயே த்³வத்திம்ஸகோட்டா²ஸா. மக்கடோ விய சித்தம். லுத்³தோ³ விய யோகா³வசரோ. மக்கடஸ்ஸ த்³வத்திம்ஸதாலகே தாலவனே நிவாஸோ விய யோகி³னோ சித்தஸ்ஸ த்³வத்திம்ஸகோட்டா²ஸகே காயே ஆரம்மணவஸேன அனுஸஞ்சரணம். லுத்³தே³ன ஆதி³ம்ஹி டி²ததாலஸ்ஸ பண்ணம் ஸரேன விஜ்ஜி²த்வா உக்குட்டி²யா கதாய மக்கடஸ்ஸ தஸ்மிம் தஸ்மிம் தாலே பதித்வா பரியந்ததாலக³மனம் விய யோகி³னோ கேஸாதி மனஸிகாரே ஆரத்³தே⁴ படிபாடியா க³ந்த்வா பரியோஸானகோட்டா²ஸேயேவ சித்தஸ்ஸ ஸண்டா²னம். புன பச்சாக³மனேபி ஏஸேவ நயோ. புனப்புனம் பரிபாதியமானஸ்ஸ மக்கடஸ்ஸ உக்குட்டு²க்குட்டி²ட்டா²னே உட்டா²னம் விய புனப்புனம் மனஸிகரோதோ கேஸுசி கேஸுசி உபட்டி²தேஸு அனுபட்ட²ஹந்தே விஸ்ஸஜ்ஜேத்வா உபட்டி²தேஸு பரிகம்மகரணம். அனுக்கமேன ஏகஸ்மிம் தாலே நிபதித்வா தஸ்ஸ மஜ்ஜே² மகுளதாலபண்ணஸூசிம் த³ள்ஹம் க³ஹேத்வா விஜ்ஜி²யமானஸ்ஸபி அனுட்டா²னம் விய அவஸானே த்³வீஸு உபட்டி²தேஸு யோ ஸுட்டு²தரம் உபட்டா²தி, தமேவ புனப்புனம் மனஸிகரித்வா அப்பனாய உப்பாத³னம்.

அபராபி உபமா – யதா² நாம பிண்ட³பாதிகோ பி⁴க்கு² த்³வத்திம்ஸகுலம் கா³மம் உபனிஸ்ஸாய வஸந்தோ பட²மகே³ஹேயேவ த்³வே பி⁴க்கா² லபி⁴த்வா பரதோ ஏகம் விஸ்ஸஜ்ஜேய்ய. புனதி³வஸே திஸ்ஸோ லபி⁴த்வா பரதோ த்³வே விஸ்ஸஜ்ஜேய்ய. ததியதி³வஸே ஆதி³ம்ஹியேவ பத்தபூரம் லபி⁴த்வா ஆஸனஸாலம் க³ந்த்வா பரிபு⁴ஞ்ஜேய்ய. ஏவம்ஸம்பத³மித³ம் த³ட்ட²ப்³ப³ம். த்³வத்திம்ஸகுலகா³மோ விய ஹி த்³வத்திம்ஸாகாரோ. பிண்ட³பாதிகோ விய யோகா³வசரோ. தஸ்ஸ தம் கா³மம் உபனிஸ்ஸாய வாஸோ விய யோகி³னோ த்³வத்திம்ஸாகாரே பரிகம்மகரணம். பட²மகே³ஹே த்³வே பி⁴க்கா² லபி⁴த்வா பரதோ ஏகிஸ்ஸா விஸ்ஸஜ்ஜனம் விய து³தியதி³வஸே திஸ்ஸோ லபி⁴த்வா பரதோ த்³வின்னம் விஸ்ஸஜ்ஜனம் விய ச மனஸிகரோதோ மனஸிகரோதோ அனுபட்ட²ஹந்தே விஸ்ஸஜ்ஜேத்வா உபட்டி²தேஸு யாவ கோட்டா²ஸத்³வயே பரிகம்மகரணம். ததியதி³வஸே ஆதி³ம்ஹியேவ பத்தபூரம் லபி⁴த்வா ஆஸனஸாலாயம் நிஸீதி³த்வா பரிபோ⁴கோ³ விய த்³வீஸு யோ ஸுட்டு²தரம் உபட்டா²தி, தமேவ புனப்புனம் மனஸிகரித்வா அப்பனாய உப்பாத³னம்.

அப்பனாதோதி அப்பனாகோட்டா²ஸதோ கேஸாதீ³ஸு ஏகேகஸ்மிம் கோட்டா²ஸே அப்பனா ஹோதீதி வேதி³தப்³பா³தி அயமேவேத்த² அதி⁴ப்பாயோ.

தயோ ச ஸுத்தந்தாதி அதி⁴சித்தம், ஸீதிபா⁴வோ, போ³ஜ்ஜ²ங்க³கோஸல்லந்தி இமே தயோ ஸுத்தந்தா வீரியஸமாதி⁴யோஜனத்த²ம் வேதி³தப்³பா³தி அயமேத்த² அதி⁴ப்பாயோ. தத்த² –

‘‘அதி⁴சித்தமனுயுத்தேன, பி⁴க்க²வே, பி⁴க்கு²னா தீணி நிமித்தானி காலேனகாலம் மனஸிகாதப்³பா³னி. காலேனகாலம் ஸமாதி⁴னிமித்தம் மனஸிகாதப்³ப³ம். காலேனகாலம் பக்³க³ஹனிமித்தம் மனஸிகாதப்³ப³ம். காலேனகாலம் உபேக்கா²னிமித்தம் மனஸிகாதப்³ப³ம். ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் ஸமாதி⁴னிமித்தஞ்ஞேவ மனஸிகரேய்ய, டா²னம் தம் சித்தம் கோஸஜ்ஜாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் பக்³க³ஹனிமித்தஞ்ஞேவ மனஸிகரேய்ய, டா²னம் தம் சித்தம் உத்³த⁴ச்சாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் உபேக்கா²னிமித்தஞ்ஞேவ மனஸிகரேய்ய, டா²னம் தம் சித்தம் ந ஸம்மா ஸமாதி⁴யேய்ய ஆஸவானம் க²யாய. யதோ ச கோ², பி⁴க்க²வே, அதி⁴சித்தமனுயுத்தோ பி⁴க்கு² காலேனகாலம் ஸமாதி⁴னிமித்தம் பக்³க³ஹனிமித்தம் உபேக்கா²னிமித்தம் மனஸிகரோதி, தம் ஹோதி சித்தம் முது³ஞ்ச கம்மஞ்ஞஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா ஸமாதி⁴யதி ஆஸவானம் க²யாய.

‘‘ஸேய்யதா²பி, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா உக்கம் ப³ந்த⁴தி, உக்கம் ப³ந்தி⁴த்வா உக்காமுக²ம் ஆலிம்பேதி, உக்காமுக²ம் ஆலிம்பேத்வா ஸண்டா³ஸேன ஜாதரூபம் க³ஹேத்வா உக்காமுகே² பக்கி²பித்வா காலேனகாலம் அபி⁴த⁴மதி, காலேனகாலம் உத³கேன பரிப்போ²ஸேதி, காலேனகாலம் அஜ்ஜு²பேக்க²தி. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அபி⁴த⁴மேய்ய, டா²னம் தம் ஜாதரூபம் ட³ஹேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் உத³கேன பரிப்போ²ஸேய்ய, டா²னம் தம் ஜாதரூபம் நிப்³பா³யேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அஜ்ஜு²பேக்கே²ய்ய, டா²னம் தம் ஜாதரூபம் ந ஸம்மா பரிபாகம் க³ச்சே²ய்ய. யதோ ச கோ², பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் காலேனகாலம் அபி⁴த⁴மதி, காலேனகாலம் உத³கேன பரிப்போ²ஸேதி, காலேனகாலம் அஜ்ஜு²பேக்க²தி, தம் ஹோதி ஜாதரூபம் முது³ஞ்ச கம்மஞ்ஞஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா உபேதி கம்மாய. யஸ்ஸா யஸ்ஸா ச பிளந்த⁴னவிகதியா ஆகங்க²தி யதி³ படிகாய யதி³ குண்ட³லாய யதி³ கீ³வேய்யாய யதி³ ஸுவண்ணமாலாய, தஞ்சஸ்ஸ அத்த²ம் அனுபோ⁴தி.

‘‘ஏவமேவ கோ², பி⁴க்க²வே, அதி⁴சித்தமனுயுத்தேன…பே… ஸமாதி⁴யதி ஆஸவானம் க²யாய. யஸ்ஸ யஸ்ஸ ச அபி⁴ஞ்ஞா ஸச்சி² கரணீயஸ்ஸ த⁴ம்மஸ்ஸ சித்தம் அபி⁴னின்னாமேதி அபி⁴ஞ்ஞா ஸச்சி² கிரியாய, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே’’தி (அ. நி. 3.103).

இத³ம் ஸுத்தம் அதி⁴சித்தந்தி வேதி³தப்³ப³ம்.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனுத்தரம் ஸீதிபா⁴வம் ஸச்சி²காதும். கதமேஹி ச²ஹி? இத⁴, பி⁴க்க²வே, பி⁴க்கு² யஸ்மிம் ஸமயே சித்தம் நிக்³க³ஹேதப்³ப³ம், தஸ்மிம் ஸமயே சித்தம் நிக்³க³ண்ஹாதி. யஸ்மிம் ஸமயே சித்தம் பக்³க³ஹேதப்³ப³ம், தஸ்மிம் ஸமயே சித்தம் பக்³க³ண்ஹாதி. யஸ்மிம் ஸமயே சித்தம் ஸம்பஹம்ஸிதப்³ப³ம், தஸ்மிம் ஸமயே சித்தம் ஸம்பஹம்ஸேதி. யஸ்மிம் ஸமயே சித்தம் அஜ்ஜு²பேக்கி²தப்³ப³ம், தஸ்மிம் ஸமயே சித்தம் அஜ்ஜு²பேக்க²தி. பணீதாதி⁴முத்திகோ ச ஹோதி நிப்³பா³னாபி⁴ரதோ. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனுத்தரம் ஸீதிபா⁴வம் ஸச்சி²காது’’ந்தி (அ. நி. 6.85).

இத³ம் ஸுத்தம் அனுத்தரம் ஸீதிபா⁴வோதி வேதி³தப்³ப³ம்.

போ³ஜ்ஜ²ங்க³கோஸல்லம் ‘‘பன ஏவமேவ கோ², பி⁴க்க²வே, யஸ்மிம் ஸமயே லீனம் சித்தம் ஹோதி, அகாலோ தஸ்மிம் ஸமயே பஸ்ஸத்³தி⁴ஸம்போ³ஜ்ஜ²ங்க³ஸ்ஸ பா⁴வனாயா’’தி (ஸம். நி. 5.234) அப்பனாகோஸல்லகதா²யம் த³ஸ்ஸிதமேவ.

இதி இத³ம் ஸத்தவித⁴ம் உக்³க³ஹகோஸல்லம் ஸுக்³க³ஹிதம் கத்வா இத³ஞ்ச த³ஸவித⁴ம் மனஸிகாரகோஸல்லம் ஸுட்டு² வவத்த²பேத்வா தேன யோகி³னா உப⁴யகோஸல்லவஸேன கம்மட்டா²னம் ஸாது⁴கம் உக்³க³ஹேதப்³ப³ம். ஸசே பனஸ்ஸ ஆசரியேன ஸத்³தி⁴ம் ஏகவிஹாரேயேவ பா²ஸு ஹோதி, ஏவம் வித்தா²ரேன அகதா²பேத்வா கம்மட்டா²னம் ஸுட்டு² வவத்த²பேத்வா கம்மட்டா²னம் அனுயுஜ்ஜந்தேன விஸேஸம் லபி⁴த்வா உபரூபரி கதா²பேதப்³ப³ம். அஞ்ஞத்த² வஸிதுகாமேன யதா²வுத்தேன விதி⁴னா வித்தா²ரதோ கதா²பேத்வா புனப்புனம் பரிவத்தேத்வா ஸப்³ப³ம் க³ண்டி²ட்டா²னம் சி²ந்தி³த்வா பத²வீகஸிணனித்³தே³ஸே வுத்தனயேனேவ அனனுரூபம் ஸேனாஸனம் பஹாய அனுரூபே விஹாரே வஸந்தேன கு²த்³த³கபலிபோ³து⁴பச்சே²த³ம் கத்வா படிக்கூலமனஸிகாரே பரிகம்மம் காதப்³ப³ம்.

கரோந்தேன பன கேஸேஸு தாவ நிமித்தம் க³ஹேதப்³ப³ம். கத²ம்? ஏகம் வா த்³வே வா கேஸே லுஞ்சித்வா ஹத்த²தலே ட²பேத்வா வண்ணோ தாவ வவத்த²பேதப்³போ³. சி²ன்னட்டா²னேபி கேஸே ஓலோகேதும் வட்டதி. உத³கபத்தே வா யாகு³பத்தே வா ஓலோகேதும்பி வட்டதியேவ. காளககாலே தி³ஸ்வா காளகாதி மனஸிகாதப்³பா³. ஸேதகாலே ஸேதாதி. மிஸ்ஸககாலே பன உஸ்ஸத³வஸேன மனஸிகாதப்³பா³ ஹோந்தி. யதா² ச கேஸேஸு, ஏவம் ஸகலேபி தசபஞ்சகே தி³ஸ்வாவ நிமித்தம் க³ஹேதப்³ப³ம்.

கோட்டா²ஸவவத்தா²பனகதா²

182. ஏவம் நிமித்தம் க³ஹேத்வா ஸப்³ப³கோட்டா²ஸே வண்ணஸண்டா²னதி³ஸோகாஸபரிச்சே²த³வஸேன வவத்த²பேத்வா வண்ணஸண்டா²னக³ந்த⁴ஆஸயோகாஸவஸேன பஞ்சதா⁴ படிக்கூலதோ வவத்த²பேதப்³பா³.

தத்ராயம் ஸப்³ப³கோட்டா²ஸேஸு அனுபுப்³ப³கதா². கேஸா தாவ பகதிவண்ணேன காளகா அத்³தா³ரிட்ட²கவண்ணா. ஸண்டா²னதோ தீ³க⁴வட்டலிகா துலாத³ண்ட³ஸண்டா²னா. தி³ஸதோ உபரிமதி³ஸாய ஜாதா. ஓகாஸதோ உபோ⁴ஸு பஸ்ஸேஸு கண்ணசூளிகாஹி, புரதோ நலாடந்தேன, பச்ச²தோ க³லவாடகேன பரிச்சி²ன்னா. ஸீஸகடாஹவேட²னம் அல்லசம்மம் கேஸானம் ஓகாஸோ. பரிச்சே²த³தோ கேஸா ஸீஸவேட²னசம்மே வீஹக்³க³மத்தம் பவிஸித்வா பதிட்டி²தேன ஹேட்டா² அத்தனோ மூலதலேன, உபரி ஆகாஸேன, திரியம் அஞ்ஞமஞ்ஞேன பரிச்சி²ன்னா, த்³வே கேஸா ஏகதோ நத்தீ²தி அயம் ஸபா⁴க³பரிச்சே²தோ³. கேஸா ந லோமா, லோமா ந கேஸாதி ஏவம் அவஸேஸஏகதிம்ஸகோட்டா²ஸேஹி அமிஸ்ஸீகதா கேஸா நாம பாடியேக்கோ ஏககோட்டா²ஸோதி அயம் விஸபா⁴க³பரிச்சே²தோ³. இத³ம் கேஸானம் வண்ணாதி³தோ வவத்தா²பனம்.

183. இத³ம் பன நேஸம் வண்ணாதி³வஸேன பஞ்சதா⁴ படிக்கூலதோ வவத்தா²பனம். கேஸா நாமேதே வண்ணதோபி படிக்கூலா. ஸண்டா²னதோபி க³ந்த⁴தோபி ஆஸயதோபி ஓகாஸதோபி படிக்கூலா.

மனுஞ்ஞேபி ஹி யாகு³பத்தே வா ப⁴த்தபத்தே வா கேஸவண்ணம் கிஞ்சி தி³ஸ்வா கேஸமிஸ்ஸகமித³ம் ஹரத² நந்தி ஜிகு³ச்ச²ந்தி. ஏவம் கேஸா வண்ணதோ படிக்கூலா. ரத்திம் பு⁴ஞ்ஜந்தாபி கேஸஸண்டா²னம் அக்கவாகம் வா மகசிவாகம் வா சு²பித்வாபி ததே²வ ஜிகு³ச்ச²ந்தி. ஏவம் ஸண்டா²னதோ படிக்கூலா.

தேலமக்க²னபுப்ப²தூ⁴பாதி³ ஸங்கா²ரவிரஹிதானஞ்ச கேஸானம் க³ந்தோ⁴ பரமஜேகு³ச்சோ² ஹோதி. ததோ ஜேகு³ச்ச²தரோ அக்³கி³ம்ஹி பக்கி²த்தானம். கேஸா ஹி வண்ணஸண்டா²னதோ அப்படிக்கூலாபி ஸியும், க³ந்தே⁴ன பன படிக்கூலாயேவ. யதா² ஹி த³ஹரஸ்ஸ குமாரஸ்ஸ வச்சம் வண்ணதோ ஹலித்³தி³வண்ணம், ஸண்டா²னதோபி ஹலித்³தி³பிண்ட³ஸண்டா²னம். ஸங்காரட்டா²னே ச²ட்³டி³தஞ்ச உத்³து⁴மாதககாளஸுனக²ஸரீரம் வண்ணதோ தாலபக்கவண்ணம். ஸண்டா²னதோ வட்டேத்வா விஸ்ஸட்ட²முதி³ங்க³ஸண்டா²னம். தா³டா²பிஸ்ஸ ஸுமனமகுளஸதி³ஸாதி உப⁴யம்பி வண்ணஸண்டா²னதோ ஸியா அப்படிக்கூலம் க³ந்தே⁴ன பன படிக்கூலமேவ. ஏவம் கேஸாபி ஸியும் வண்ணஸண்டா²னதோ அப்படிக்கூலா க³ந்தே⁴ன பன படிக்கூலாயேவாதி.

யதா² பன அஸுசிட்டா²னே கா³மனிஸ்ஸந்தே³ன ஜாதானி ஸூபேய்யபண்ணானி நாக³ரிகமனுஸ்ஸானம் ஜேகு³ச்சா²னி ஹோந்தி அபரிபோ⁴கா³னி, ஏவம் கேஸாபி புப்³ப³லோஹிதமுத்தகரீஸபித்தஸேம்ஹாதி³னிஸ்ஸந்தே³ன ஜாதத்தா ஜேகு³ச்சா²தி இத³ம் நேஸம் ஆஸயதோ பாடிக்குல்யம்.

இமே ச கேஸா நாம கூ³த²ராஸிம்ஹி உட்டி²தகண்ணிகம் விய ஏகதிம்ஸகோட்டா²ஸராஸிம்ஹி ஜாதா. தே ஸுஸானஸங்காரட்டா²னாதீ³ஸு ஜாதஸாகம் விய பரிக்கா²தீ³ஸு ஜாதகமலகுவலயாதி³புப்ப²ம் விய ச அஸுசிட்டா²னே ஜாதத்தா பரமஜேகு³ச்சா²தி இத³ம் நேஸம் ஓகாஸதோ பாடிக்குல்யம்.