4. யோனகரட்ட²ஸாஸனவம்ஸகதா²மக்³கோ³

4. இதா³னி பன யோனகரட்டே² ஸாஸனஸ்ஸுப்பத்திம் கதே²ஸ்ஸாமி. ப⁴க³வா ஹி வேனேய்யஹிதாவஹோ யோனகரட்டே² மமஸாஸனம் சிரகாலம் பபி⁴ட்ட²ஹிஸ்ஸதீதி ஆபேக்கி²த்வா ஸத்³தி⁴ம் பி⁴க்கு² ஸங்கே⁴ன தே³ஸசாரிகம் ஆஹிண்ட³ந்தோ லபு⁴ஞ்ஜம் நாம நக³ரம் அக³மாஸி. ததா³ ஏகோ நேஸாதோ³ ஹரிப²லம் த³த்வா தம் பரிபு⁴ஞ்ஜித்வா ஹரிபீ³ஜே கி²பிதே பத²வியம் அபதித்வா ஆகாஸேயேவ பதிட்டா²ஸி. தம் தி³ஸ்வா ஸிதம் பத்வாகாஸி. தமத்த²ம் தி³ஸ்வா ஆனந்த³த்தே²ரோ புச்சி². அனாக³தே கோ² ஆனந்த³ இமஸ்மிம் டா²னே மம தா⁴துசேதியம் பதிட்ட²ஹிஸ்ஸதி, ஸாஸனம் விரூளமாபஜ்ஜிஸ்ஸதீதி ப்³யாகாஸி. ப⁴க³வதா பன ஹரிப²லஸ்ஸ பு⁴ஞ்ஜிதட்டா²னத்தாஹரிபு⁴ஞ்ஜோதி தஸ்ஸ ரட்ட²ஸ்ஸ நாமம் அஹோஸி. த்³வின்னம் தாபஸானம் ட²பிதம் ஜலஸுத்திகம் படிச்ச யோனகானம் பா⁴ஸாய லபு⁴ஞ்ஜோதி நாமம் அஹோஸி.

ததா³ தத்த² மபின்னாய நாம ஏகிஸ்ஸா மாதிகாய ஸமீபே நிஸின்னோ ஏகோ லவகுலிகஜேட்ட²கோ அத்தனோ புத்தம் ஸத்தவஸ்ஸிகம் ப⁴க³வதோ நிய்யாதே³த்வா பப்³பா³ஜேஸி. கம்மட்டா²னானுயோக³வஸேன அசிரேனேவ அரஹத்தம் பாபுணி. ஸத்தவஸ்ஸி கஸ்ஸச ஸாமணேரஸ்ஸ அரஹத்தம் ஸச்சி²கதட்டா²னதம் படிச்ச யோனகபா⁴ஸாய ஏதம் டா²னம் சங்க³மங்க⁴ இதி வுச்சதி. சிரகால வஸேன ஜங்க³மங்க⁴ இதி வுச்சதி. ததோ பட்டா²யயேவ யோனகரட்டே² ஸாஸனம் பதிட்டா²தீதி.

இத³ம் யோனகரட்டே² பட²மம் ஸாஸனஸ்ஸ பதிட்டா²னம்.

ஸாஸனே பன பஞ்சதிம்ஸாதி⁴கே த்³விவஸ்ஸஸதே ஸம்பத்தே மஹாரக்கி²தத்தே²ரோ யோனகரட்ட²ம் க³ந்த்வா கம்போ³ஜகே²மாவர ஹரிபு⁴ஞ்ஜாயுத்³த⁴யாதீ³ஸு அனேகேஸு ரட்டே²ஸு ஸாஸனம் பதிட்டா²பேதி. தானி ஹி ஸப்³பா³னி ரட்டா²னி ஸங்க³ஹேத்வா த³ஸ்ஸேந்தேஹி அட்ட²கதா²சரியேஹி யோனகலோகந்தி ஓகாஸகாலோகவாசகேன ஸாமஞ்ஞஸத்³தே³ன வுத்தம். பகதி ஹேஸா க³ந்த²காரானம் யேன கேனசாகாரேன அத்த²ந்தரஸ்ஸ விஞ்ஞாபனாதி.

மஹாரக்கி²தத்தே²ரோ ச ஸத்³தி⁴ம் பஞ்சஹி பி⁴க்கூ²ஹி பாடலிபுத்ததோ அனிலபத²மக்³கே³ன யோனகலோகம் ஆக³ந்த்வா காளகாராமஸுத்தேன யோனகே பஸாதே³ஸி. ஸத்ததிஸஹஸ்ஸாதி⁴கபாணஸதஸஹஸ்ஸம் மக்³க³ப²லாலங்காரம் அதா³ஸி. ஸந்திகே சஸ்ஸ த³ஸஸஹஸ்ஸானி பப்³ப³ஜிம்ஸு. ஏவம் ஸோ தத்த²ஸாஸனம் பதிட்டா²பேஸி. ததா² ச வுத்தம் அட்ட²கதா²யம்,–

யோனகரட்ட²ம் ததா³ க³ந்த்வா, ஸோ மஹாரக்கி²தோ இஸி;

காளகாராமஸுத்தேன, தே பஸாதே³ஸி யோனகேதி.

ததோ பட்டா²ய தேஸம் ஸிஸ்ஸபரம்பரா ப³ஹூ ஹோந்தி, க³ணனபத²ம் வீதிவத்தா.

இத³ம் யோனகரட்டே² மஹாரக்கி²தத்தே²ராத³யோ படிச்ச

து³தியம் ஸாஸனஸ்ஸ பதிட்டா²னம்.

யோனகரட்டே² லகுன்னனக³ரே ஜினசக்கே பஞ்சவஸ்ஸஸதே மணிமயம் பு³த்³த⁴ப்படிமம் மாபேத்வா விஸுகம்மதே³வபுத்தோ நாக³ஸேனத்தே²ரஸ்ஸ அதா³ஸி. நாகே³ஸேனத்தே²ரோ ச தஸ்மிம் படிமம்ஹி தா⁴து ஆக³ந்த்வா பதிட்டா²தூதி அதி⁴ட்டா²ஸி. அதி⁴ட்டா²னவஸேனேவ ஸத்ததா⁴துயோ ஆக³ந்த்வா தத்த² பதிட்ட²ஹித்வா பாடிஹாரியம் த³ஸ்ஸேஸுந்தி ராஜவம்ஸே வுத்தம்.

தஞ்ச வசனம் மம பரினிப்³பா³னதோ பஞ்சவஸ்ஸஸதே அதிக்கந்தே ஏதே உப்பஜ்ஜிஸ்ஸந்தீதி மிலிந்த³பஞ்ஹாயம் வுத்தவசனேன காலபரிமாணவஸேன ச ஸமேதி. யோனகரட்டே² மிலிந்த³ரஞ்ஞோ காலே ஜினசக்கே பஞ்சவஸ்ஸஸதேயேவ நாக³ஸேனத்தே²ரம் படிஸ்ஸ ஜினசக்கம் விரூளம் ஹுத்வா பதிட்டா²ஸி.

இத³ம் யோனகரட்டே² நாக³ஸேனத்தே²ரம் படிச்ச ததியம்

ஸாஸனஸ்ஸ பதிட்டா²னம்.

கலியுகே³ பஞ்சஸட்டி²வஸ்ஸேலபு⁴ஞ்ஜனக³ரதோ ஸங்கமித்வா க்யுங்க³ரனக³ரே மாபிகஸ்ஸ ப³ஞ்ஞாசோமங்க³ர நாமகஸ்ஸ ரஞ்ஞோ காலே மஜ்ஜி²மதே³ஸதோ கஸ்ஸபத்தே²ரோ பஞ்சஹி தே²ரேஹி ஸத்³தி⁴ம் ஆக³ச்சி².

ததா³ ஸோ ராஜா விஹாரம் கத்வா தேஸம் அதா³ஸி. ஸீஹளதீ³பதோ ச தா⁴துயோ ஆனேத்வா ஏகோ தே²ரோ ஆக³ச்சி². தா⁴துதோ பாடிஹாரியம் தி³ஸ்வா பஸீதி³த்வா லபு⁴ஞ்ஜசேதிய நிதா⁴னம் அகாஸி. தே ச தே²ரே படிச்ச யோனகரட்டே² ஸாஸன வம்ஸோ ஆக³தோ.

இத³ம் யோனகரட்டே² சதுத்த²ம் ஸாஸனஸ்ஸ பதிட்டா²னம்.

கலியுகே³ த்³வாஸட்டா²தி⁴கே ஸத்தஸதே ஸம்பத்தே² சினரட்டி²ந்தோ³ ராஜா அபி⁴ப⁴வித்வா ஸகலம்பி யோனகரட்ட²ம் ஸங்கு²ப்³பி⁴தம் ஹோதி. ததா³ மஹாத⁴ம்மக³ம்பீ⁴ரத்தே²ரோ மஹாமேத⁴ங்கரத்தே² ரோசாதி த்³வே தே²ரோ யோனகரட்ட²தோ ஸத்³தி⁴ம் ப³ஹூஹி பி⁴க்கூ²ஹி ஸீஹளதீ³பம் அக³மம்ஸு. ததா³ ச ஸீஹளதீ³பே து³ப்³பி⁴க்க²ப⁴யேன அபி⁴பூ⁴தோ ஹுத்வா ததோ ஸ்யாமரட்டே² ஸோக்கதயனக³ரம் புன அக³மம்ஸு.

ததோ பச்சா² லகுன்னனக³ரம் க³ந்த்வா ஸாஸனம் பக்³க³ண்ஹந்தானம் லஜ்ஜிபேஸலானம் பி⁴க்கூ²னம் ஸந்திகே புன ஸிக்க²ம் க³ண்ஹிம்ஸு. தே ச தே²ரோ ஸ்யாமரட்டே² யோனகரட்டே² ச ஸப்³ப³த்த² ஸாஸனம் பதிட்டா²பேஸுந்தி.

இத³ம் யோனகரட்டே² பத்தலங்கே த்³வே தே²ரே படிச்ச பஞ்சமம்

ஸாஸனஸ்ஸ பதிட்டா²னம்.

கலியுகே³ பஞ்சவீஸாதி⁴கே அட்ட²வஸ்ஸஸதே ஸம்பத்தே ஸிரிஸத்³த⁴ம்மலோகபதிசக்கவத்திராஜா லபு⁴ஞ்ஜசேதியம் புன மஹந்தம் கத்வா தஸ்ஸ சேதியஸ்ஸ ஸமீபே சத்தாரோ விஹாரே காராபேத்வா மஹாமேத⁴ங்கரத்தே²ரஸ்ஸ ஸாரிபுத்தத்தே²ரஸ்ஸ ச அதா³ஸி. ததா³பி தே த்³வே தே²ரா ஸாஸனம் பரிஸுத்³த⁴ம் கத்வா பதிட்டா²பேஸுந்தி.

இத³ம் யோனகரட்டே² மஹாமேத⁴ங்கரஸாரிபுத்தத்தே²ரே

படிச்ச ச²ட்ட²ம் ஸாஸனஸ்ஸ பதிட்டா²னம்.

கலியுகே³ தேசத்தாலீஸாதி⁴கே நவவஸ்ஸஸதே ஸம்பத்தே ஹம்ஸாவதீனக³ரே அனேகஸேதிபி⁴ந்தோ³ நாம ராஜா யோனகரட்ட²ம் அபி⁴ப⁴வித்வா அத்தனோ ஹத்த²க³தம் கத்வா ப³லி பு⁴ஞ்ஜனத்தா²ய ஜேட்ட²புத்தஸ்ஸ அனுருத்³த⁴ஸ்ஸ நாம ராஜகுமாரஸ்ஸ த³த்வா ப³ஹூஹி அமச்சேஹி ஸத்³தி⁴ம் தத்த² க³ந்த்வா அனுராஜதாவேன ரஜ்ஜம் காராபேஸி. ஸாஸனஞ்ச விஸோதா⁴பேதும் ஸத்³த⁴ம்மசக்கஸாமித்தே²ரம் தேன ஸத்³தி⁴ம் பஹிணி.

அனேகஸேதிபி⁴ன்னோ கிர ராஜா யோனகரட்ட²ம் விஜயகாலே பட²மம் ஸாஸனஸ்ஸ பதிட்டா²னபூ⁴தமித³ந்தி கத்வா தம்ரட்ட²வாஸினோ கரமரானீதபா⁴வேன ந அக்³க³ஹேஸீதி.

யதா²வுத்தத்தே²ரவம்ஸேஸு ச ஏகோ லகுன்னனக³ரே அரஞ்ஞவாஸீ தே²ரோ தத்த² நக³ரே அஜ்ஜ அஸுகஸ்மிம் டா²னே ஏகோ மதோதி கி³ஹீனம் கதே²த்வா யதா²கதி²தம் பூ⁴தம் ஹுத்வா அயம் அபி⁴ஞ்ஞாலாபீ⁴தி பாகடோ அஹோஸி.

தஸ்மிம்யேவ ச நக³ரே மஹாமங்க³லோ நாம தே²ரோ அனேகஸேதிபி⁴ந்த³ஸ்ஸ ரஞ்ஞோ யுஜ்ஜி²தும் ஆக³தகாலே அனேகஸேதிபி⁴ந்தோ³ ராஜா மம் பக்கோஸிஸ்ஸதி, ஸமானஜாதிகம் தூ³தம் பேஸ்ஸேஸ்ஸதீதி பக்கோஸிதகாலதோ பட²மமேவவதி³. யதா²வுத்தனியாமேனேவ பக்கோஸனதோ அயம் அபி⁴ஞ்ஞா லாபீ⁴தி கித்தி கோ⁴ஸோ அஹோஸி.

தத்த² நக³ரே ஞாணவிலாஸத்தே²ரோ ஸங்க்²யாபகாஸகம் நாம பகரணம் அகாஸி. தம்ளீகம் பன பத்தலங்கத்தே²ரஸ்ஸ விஹாரே வஸந்தோ ஸிரிமங்க³லோனாம தே²ரோ அகாஸி.

விஸுத்³தி⁴மக்³க³தீ³பனிம் பன ஸம்ஞ்ஞ்வத்தஅரஞ்ஞவாஸீ உத்தராராமோ நாம ஏகோ தே²ரோ. மங்க³லதீ³பனிம் ஸிரிமங்க³லத்தே²ரோ. உப்பாதஸந்திம் அஞ்ஞதரோ தே²ரோ. தம் கிர உப்பாதஸந்திம் ஸஜ்ஜா²யித்வா சீனரஞ்ஞோ ஸேனம் அஜினீதி. இச்சேவம் யோனகரட்டே² அபி⁴ஞ்ஞாலாபீ⁴னம் க³ந்த²காரானஞ்ச தே²ரானம் ஆனுபா⁴வேன ஜினஸாஸனம் பரிஸுத்³த⁴ம் ஹுத்வா பதிட்டா²தி. ஏவம் ஹேதுப²லஸம்ப³ந்த⁴வஸேன ஆதி³ அந்த ஸம்ப³ந்த⁴வஸேன ச யதா²வுத்தேஹி தீஹி நயேஹி தே²ரபரம்பரா க⁴ட்டேத்வா க³ஹேதப்³பா³.

இதி ஸாஸனவம்ஸே யோனகரட்ட²ஸாஸனவம்ஸகதா²

மக்³கோ³ நாம சதுத்தோ² பரிச்சே²தோ³.