4. பூ⁴தா⁴துமயனாமிகரூபவிபா⁴க³

‘‘பூ⁴ ஸத்தாய’’ந்தி தா⁴துஸ்ஸ, ரூபமாக்²யாதஸஞ்ஞிதம்;

த்யாத்³யந்தம் லபிதம் நான-ப்பகாரேஹி அனாகுலம்.

ஸ்யாத்³யந்தம், தா³னி தஸ்ஸேவ, ரூபம் நாமிகஸவ்ஹயம்;

பா⁴ஸிஸ்ஸம் பா⁴ஸிதத்தே²ஸு, படுபா⁴வாய ஸோதுனம்.

யத³த்தே²’த்தனி நாமேதி, பர’மத்தே²ஸு வா ஸயம்;

நமதீதி ததா³ஹம்ஸு, நாமம் இதி விபா⁴வினோ.

நாமம் நாமிகமிச்சத்ர, ஏகமேவேத்த²தோ ப⁴வே;

ததே³வம் நாமிகம் ஞே ய்யம், ஸலிங்க³ம் ஸவிப⁴த்திகம்.

ஸத்வாபி⁴தா⁴னம் லிங்க³ந்தி, இத்தி²புமனபும்ஸகம்;

விப⁴த்தீதித⁴ ஸத்தேவ, தத்த² சட்ட² பவுச்சரே.

பட²மா து³தியா ததியா, சதுத்தீ² பஞ்சமீ ததா²;

ச²ட்டீ² ச ஸத்தமீ சாதி, ஹோந்தி ஸத்த விப⁴த்தியோ.

லிங்க³த்தே² பட²மா ஸாயம், பி⁴ன்னா த்³வேதா⁴ ஸியோ இதி;

கம்மத்தே² து³தியா ஸாபி, பி⁴ன்னா அம் யோ இதி த்³விதா⁴.

கரணே ததியா ஸாபி, பி⁴ன்னா நா ஹி இதி த்³விதா⁴;

ஸம்பதா³னே சதுத்தீ² ஸா, பி⁴ன்னா த்³வேதா⁴ ஸ நம் இதி.

அபாதா³னே பஞ்சமீ ஸா, பி⁴ன்னா த்³வேதா⁴ ஸ்மா ஹி இதி;

ச²ட்டீ² ஸாமிம்ஹி ஸா சாபி, பி⁴ன்னா த்³வேதா⁴ ஸ நம் இதி.

ஓகாஸே ஸத்தமீ ஸாபி, பி⁴ன்னா த்³வேதா⁴ ஸ்மிம்ஸு இதி;

ஆமந்தனட்ட²மீ ஸாயம், ஸியோயேவாதி சுத்³த³ஸ.

வசனத்³வயஸம்யுத்தா, ஏகேகா தா விப⁴த்தியோ;

ஸத்வமிதிஹ விஞ்ஞேய்யோ, அத்தோ² ஸோ த³ப்³ப³ஸஞ்ஞிதோ.

யோ கரோதிஸ கத்தாது, தம் கம்மம் யம் கரோதி வா;

குப்³ப³தே யேன வா தந்து, கரணம் இதி ஸஞ்ஞிதம்.

தே³தி ரோசதி வா யஸ்ஸ, ஸம்பதா³னந்தி தம் மதம்;

யதோபேதி ப⁴யம் வா தம், அபாதா³னந்தி கித்திதம்.

யஸ்ஸாயத்தோ ஸமூஹோவா, தம் வே ஸாமீதி தே³ஸிதம்;

யஸ்மிம் கரோதி கிரியம், ததோ³காஸந்தி ஸத்³தி³தம்.

யதா³லபதி தம் வத்து², ஆமந்தனமுதீ³ரிதம்;

ஸத்³தே³னாபி⁴முகீ²காரோ, விஜ்ஜமானஸ்ஸ வா பன.

வினா ஆலபனத்த²ம் லிங்க³த்தா²தீ³ஸு பட²மாதி³விப⁴த்துப்பத்தி உபலக்க²ணவஸேன வுத்தாதி த³ட்ட²ப்³ப³ம்.

இத³மேத்த² நிருத்திலக்க²ணம் த³ட்ட²ப்³ப³ம் – பச்சத்தவசனே பட²மா விப⁴த்தி ப⁴வதி, உபயோக³வசனே து³தியா விப⁴த்தி ப⁴வதி, கரணவசனே ததியா விப⁴த்தி ப⁴வதி, ஸம்பதா³னவசனே சதுத்தீ² விப⁴த்தி ப⁴வதி, நிஸ்ஸக்கவசனே பஞ்சமீ விப⁴த்தி ப⁴வதி, ஸாமிவசனே ச²ட்டீ² விப⁴த்தி ப⁴வதி, பு⁴ம்மவசனே ஸத்தமீ விப⁴த்தி ப⁴வதி, ஆமந்தனவசனே அட்ட²மீ விப⁴த்தி ப⁴வதி. தத்ருத்³தா³னம் –

பச்சத்தமுபயோக³ஞ்ச, கரணம் ஸம்பதா³னியம்;

நிஸ்ஸக்கம் ஸாமிவசனம், பு⁴ம்மமாலபனட்ட²மம்.

தத்ர பச்சத்தவசனம் நாம திவித⁴லிங்க³வவத்தா²னக³தானம் இத்தி²புமனபும்ஸகானம் பச்சத்தஸபா⁴வனித்³தே³ஸத்தோ². உபயோக³வசனம் நாம யோ யம் கரோதி, தேன தது³பயுத்தபரிதீ³பனத்தோ². கரணவசனம் நாம தஜ்ஜாபகதனிப்³ப³த்தகபரிதீ³பனத்தோ². ஸம்பதா³னவசனம் நாம தப்பதா³னபரிதீ³பனத்தோ². நிஸ்ஸக்கவசனம் நாம தன்னிஸ்ஸடதத³பக³மபரிதீ³பனத்தோ². ஸாமிவசனம் நாம ததி³ஸ்ஸரபரிதீ³பனத்தோ². பு⁴ம்மவசனம் நாம தப்பதிட்டா²பரிதீ³பனத்தோ². ஆமந்தனவசனம் நாம ததா³மந்தனபரிதீ³பனத்தோ². ஏவம் ஞத்வா பயோகா³னி அஸம்முய்ஹந்தேன யோஜேதப்³பா³னி.

பூ⁴தோ, பா⁴வகோ, ப⁴வோ, அப⁴வோ, பா⁴வோ, அபா⁴வோ, ஸபா⁴வோ, ஸப்³பா⁴வோ, ஸம்ப⁴வோ, பப⁴வோ, பபா⁴வோ, அனுப⁴வோ, ஆனுபா⁴வோ, பராப⁴வோ, விப⁴வோ, பாதுபா⁴வோ, ஆவிபா⁴வோ, திரோபா⁴வோ, வினாபா⁴வோ, ஸோத்தி²பா⁴வோ, அத்தி²பா⁴வோ, நத்தி²பா⁴வோதி ஓகாரந்தபுல்லிங்க³ம்.

அபி⁴ப⁴விதா, பரிப⁴விதா, அனுப⁴விதா, ஸமனுப⁴விதா, பா⁴விதா, பச்சனுப⁴விதாதி ஆகாரந்தபுல்லிங்க³ம்.

ப⁴வம், பராப⁴வம், பரிப⁴வம், அபி⁴ப⁴வம், அனுப⁴வம், ஸமனுப⁴வம், பச்சனுப⁴வம், பப⁴வம், அப்பப⁴வந்தி நிக்³க³ஹீதந்தபுல்லிங்க³ம்.

த⁴னபூ⁴தி, ஸிரிபூ⁴தி, ஸோத்தி²பூ⁴தி, ஸுவத்தி²பூ⁴தீதி இகாரந்தபுல்லிங்க³ம்.

பா⁴வீ, விபா⁴வீ, ஸம்பா⁴வீ, பரிபா⁴வீதி ஈகாரந்தபுல்லிங்க³ம்.

ஸயம்பூ⁴, பபூ⁴, அபி⁴பூ⁴, விபூ⁴, அதி⁴பூ⁴, பதிபூ⁴, கோ³த்ரபூ⁴, வத்ரபூ⁴, பராபி⁴பூ⁴, ரூபாபி⁴பூ⁴, ஸத்³தா³பி⁴பூ⁴, க³ந்தா⁴பி⁴பூ⁴, ரஸாபி⁴பூ⁴, போ²ட்ட²ப்³பா³பி⁴பூ⁴, த⁴ம்மாபி⁴பூ⁴, ஸப்³பா³பி⁴பூ⁴தி ஊகாரந்தபுல்லிங்க³ம்.

இமானேத்த² ச²ப்³பி³தா⁴னி புல்லிங்கா³னி பூ⁴தா⁴துமயானி உத்³தி³ட்டா²னி.

உகாரந்தம் புல்லிங்க³ம்து பூ⁴தா⁴துமயமப்பஸித்³த⁴ம், அஞ்ஞதா⁴துமயம் பனுகாரந்தபுல்லிங்க³ம் பஸித்³த⁴ம் ‘‘பி⁴க்கு², ஹேது’’இதி. தேன ஸத்³தி⁴ம் ஸத்தவிதா⁴னி புல்லிங்கா³னி ஹோந்தி, ஸப்³பா³னேதானி ஸபா⁴வதோயேவ புல்லிங்கா³னீதி த³ட்ட²ப்³பா³னி. ஏத்த² ஸத்தோதி அத்த²வாசகோ பூ⁴தஸத்³தோ³யேவ நியோகா³ புல்லிங்க³ந்திபி த³ட்ட²ப்³போ³.

யே பன ‘‘யோ த⁴ம்மோ பூ⁴தோ, யா த⁴ம்மஜாதி பூ⁴தா, யம் த⁴ம்மஜாதம் பூ⁴த’’ந்தி ஏவம் லிங்க³த்தயே யோஜனாரஹத்தா அனியதலிங்கா³ அஞ்ஞேபி பூ⁴தபராபூ⁴தஸம்பூ⁴தஸத்³தா³த³யோ ஸந்தி³ஸ்ஸந்தி பாவசனவரே, தேபி நானோபஸக்³க³னிபாதபதே³ஹி யோஜனவஸேன ஸத்³த³ரசனாயம் ஸுகு²மத்த²க்³க³ஹணே ச விஞ்ஞூனம் கோஸல்லஜனனத்த²ம் நியதபுல்லிங்கே³ஸு பக்கி²பித்வா த³ஸ்ஸேஸ்ஸாம.

ஸேய்யதி²த³ம்? பூ⁴தோ, பராபூ⁴தோ, ஸம்பூ⁴தோ, விபூ⁴தோ, பாதுபூ⁴தோ, ஆவிபூ⁴தோ, திரோபூ⁴தோ, வினாபூ⁴தோ, ப⁴ப்³போ³, பரிபூ⁴தோ, அபி⁴பூ⁴தோ, அதி⁴பூ⁴தோ, அத்³த⁴பூ⁴தோ, அனுபூ⁴தோ, ஸமனுபூ⁴தோ, பச்சனுபூ⁴தோ, பா⁴விதோ, ஸம்பா⁴விதோ, விபா⁴விதோ, பரிபா⁴விதோ, அனுபரிபூ⁴தோ, பரிப⁴விதப்³போ³, பரிபோ⁴தப்³போ³, பரிப⁴வனீயோ, அபி⁴ப⁴விதப்³போ³, அபி⁴போ⁴தப்³போ³, அபி⁴ப⁴வனீயோ, அதி⁴ப⁴விதப்³போ³, அதி⁴போ⁴தப்³போ³, அதி⁴ப⁴வனீயோ, அனுப⁴விதப்³போ³, அனுபோ⁴தப்³போ³, அனுப⁴வனீயோ, ஸமனுப⁴விதப்³போ³, ஸமனுபோ⁴தப்³போ³, ஸமனுப⁴வனீயோ, பச்சனுப⁴விதப்³போ³, பச்சனுபோ⁴தப்³போ³, பச்சனுப⁴வனீயோ, பா⁴வேதப்³போ³, பா⁴வனீயோ, ஸம்பா⁴வேதப்³போ³, ஸம்பா⁴வனீயோ, விபா⁴வேதப்³போ³, விபா⁴வனீயோ, பரிபா⁴வேதப்³போ³, பரிபா⁴வனீயோ, ப⁴வமானோ, விப⁴வமானோ, பரிப⁴வமானோ, அபி⁴ப⁴வமானோ, அனுப⁴வமானோ, ஸமனுப⁴வமானோ, பச்சனுப⁴வமானோ, அனுபோ⁴ந்தோ, ஸமனுபோ⁴ந்தோ, பச்சனுபோ⁴ந்தோ, ஸம்போ⁴ந்தோ, அபி⁴ஸம்போ⁴ந்தோ, பா⁴வேந்தோ, ஸம்பா⁴வேந்தோ, விபா⁴வேந்தோ, பரிபா⁴வேந்தோ, பரிப⁴வியமானோ, பரிபு⁴ய்யமானோ, அபி⁴ப⁴வியமானோ, அபி⁴பூ⁴யமானோ, அனுப⁴வியமானோ, அனுபு⁴ய்யமானோ, ஸமனுப⁴வியமானோ, ஸமனுபு⁴ய்யமானோ, பச்சனுப⁴வியமானோ, பச்சனுபு⁴ய்யமானோதி இமானி நியதபுல்லிங்கே³ஸு பக்கி²த்தலிங்கா³னி. ஏவமோகாரந்தாதி³வஸேன ச²ப்³பி³தா⁴னி புல்லிங்கா³னி பூ⁴தா⁴துமயானி பகாஸிதானி. அயம் தாவ புல்லிங்க³வஸேன உதா³ஹரணுத்³தே³ஸோ.

பா⁴விகா, பா⁴வனா, விபா⁴வனா, ஸம்பா⁴வனா, பரிபா⁴வனாதி ஆகாரந்தஇத்தி²லிங்க³ம்.

பூ⁴மி, பூ⁴தி, விபூ⁴தி. இகாரந்தஇத்தி²லிங்க³ம்.

பூ⁴ரீ, பூ⁴தீ, போ⁴தீ, விபா⁴வினீ, பரிவிபா⁴வினீ, ஸம்பா⁴வினீ, பாதுப⁴வந்தீ, பாதுபோ⁴ந்தீ, பரிப⁴வந்தீ, பரிபோ⁴ந்தீ, அபி⁴ப⁴வந்தீ, அபி⁴போ⁴ந்தீ, அதி⁴ப⁴வந்தீ, அதி⁴போ⁴ந்தீ, அனுப⁴வந்தீ, அனுபோ⁴ந்தீ, ஸமனுப⁴வந்தீ, ஸமனுபோ⁴ந்தீ, பச்சனுப⁴வந்தீ, பச்சனுபோ⁴ந்தீ, அபி⁴ஸம்ப⁴வந்தீ, அபி⁴ஸம்போ⁴ந்தீதி ஈகாரந்தஇத்தி²லிங்க³ம்.

பூ⁴, அபூ⁴. ஊகாரந்தஇத்தி²லிங்க³ம்.

இமானேத்த² சதுப்³பி³தா⁴னி இத்தி²லிங்கா³னி பூ⁴தா⁴துமயானி உத்³தி³ட்டா²னி.

உகாரந்தித்தி²லிங்க³ம் பூ⁴தா⁴துமயமப்பஸித்³த⁴ம், அஞ்ஞதா⁴துமயம் பன உகாரந்தித்தி²லிங்க³ம் பஸித்³த⁴ம் ‘‘தா⁴து, தே⁴னு’’இதி. தேன ஸத்³தி⁴ம் பஞ்சவிதா⁴னி இத்தி²லிங்கா³னி ஹோந்தி, ஓகாரந்தஸ்ஸ வா கோ³ஸத்³த³ஸ்ஸ இத்தி²லிங்க³பா⁴வே தேன ஸத்³தி⁴ம் ச²ப்³பி³தா⁴னிபி ஹோந்தி, ஸப்³பா³னேதானி ஸபா⁴வதோயேவித்தி²லிங்கா³னீதி த³ட்ட²ப்³பா³னி. ஏத்தா²பி அனியதலிங்கா³ பூ⁴தபராபூ⁴தஸம்பூ⁴தஸத்³தா³த³யோ இத்தி²லிங்க³வஸேன யுஜ்ஜந்தே.

கத²ம்? பூ⁴தா, பராபூ⁴தா, ஸம்பூ⁴தாதி ஸப்³ப³ம் வித்தா²ரதோ க³ஹேதப்³ப³ம் ‘‘அனுபோ⁴ந்தோ ஸமனுபோ⁴ந்தோ’’திஆதீ³னி நவ பதா³னி வஜ்ஜேத்வா. தானி ஹி ஈகாரந்தவஸேன யோஜிதானி. இமானி நியதலிங்கே³ஸு பக்கி²த்தலிங்கா³னி. ஏவம் ஆகாரந்தாதி³வஸேன சதுப்³பி³தா⁴னி இத்தி²லிங்கா³னி பூ⁴தா⁴துமயானி பகாஸிதானி. அயம் இத்தி²லிங்க³வஸேன உதா³ஹரணுத்³தே³ஸோ.

பூ⁴தம், மஹாபூ⁴தம், ப⁴வித்தம், பூ⁴னம், ப⁴வனம், பராப⁴வனம், ஸம்ப⁴வனம், விப⁴வனம், பாதுப⁴வனம், ஆவிப⁴வனம், திரோப⁴வனம், வினாப⁴வனம், ஸோத்தி²ப⁴வனம், பரிப⁴வனம், அபி⁴ப⁴வனம், அதி⁴ப⁴வனம், அனுப⁴வனம், ஸமனுப⁴வனம், பச்சனுப⁴வனந்தி நிக்³க³ஹீதந்தனபும்ஸகலிங்க³ம்.

அத்த²விபா⁴வி, த⁴ம்மவிபா⁴வி. இகாரந்தனபும்ஸகலிங்க³ம்.

கோ³த்ரபு⁴, சித்தஸஹபு⁴, நசித்தஸஹபு⁴. உகாரந்தனபும்ஸகலிங்க³ம்.

ஸப்³பா³னேதானி ஸபா⁴வதோயேவ நபும்ஸகலிங்கா³னீதி த³ட்ட²ப்³பா³னி. ஏத்த² ஸத்தபூ⁴தரூபவாசகோ பூ⁴தஸத்³தோ³யேவ நியோகா³ நபும்ஸகலிங்கோ³திபி த³ட்ட²ப்³ப³ம். ஏத்தா²பி அனியதலிங்கா³ பூ⁴த பராபூ⁴த ஸம்பூ⁴தஸத்³தா³த³யோ நபும்ஸகலிங்க³வஸேன யுஜ்ஜந்தே.

கத²ம்? பூ⁴தம், பராபூ⁴தம், ஸம்பூ⁴தம், விபூ⁴தம். பேய்யாலோ. ஸமனுப⁴வமானம், பச்சனுப⁴வமானம், அனுபோ⁴ந்தம், அனுப⁴வந்தம், ஸமனுபோ⁴ந்தம், ஸமனுப⁴வந்தம், பச்சனுபோ⁴ந்தம், பச்சனுப⁴வந்தம், ஸம்போ⁴ந்தம், ஸம்ப⁴வந்தம், அபி⁴ஸம்போ⁴ந்தம், அபி⁴ஸம்ப⁴வந்தம், பாதுபோ⁴ந்தம், பாதுப⁴வந்தம், பரிபோ⁴ந்தம், பரிப⁴வந்தம், அபி⁴போ⁴ந்தம், அபி⁴ப⁴வந்தம், அதி⁴போ⁴ந்தம், அதி⁴ப⁴வந்தம், பா⁴வேந்தம், ஸம்பா⁴வேந்தம், விபா⁴வேந்தம், பரிபா⁴வேந்தம், பரிபா⁴வியமானம், பரிபு⁴ய்யமானம், பேய்யாலோ. பச்சனுப⁴வியமானம், பச்சனுபு⁴ய்யமானந்தி இமானி நியதனபும்ஸகலிங்கே³ஸு பக்கி²த்தலிங்கா³னி. ஏவம் நிக்³க³ஹீதந்தாதி³வஸேன திவிதா⁴னி நபும்ஸகலிங்கா³னி பூ⁴தா⁴துமயானி பகாஸிதானி. அயம் நபும்ஸகலிங்க³வஸேன உதா³ஹரணுத்³தே³ஸோ, ஏவம் புல்லிங்கா³தி³வஸேன லிங்க³த்தயம் பூ⁴தா⁴துமயமுத்³தி³ட்ட²ம்.

ஏத்த² மே அப்பஸித்³தா⁴தி, யே யே ஸத்³தா³ பகாஸிதா;

தே தே பாளிப்பதே³ஸேஸு, மக்³கி³தப்³பா³ விபா⁴வினா.

ஓ, ஆ, பி³ந்து³, இ, ஈ, உ, ஊ-அந்திமே ஸத்ததா⁴ டி²தா;

ஞே ய்யா புல்லிங்க³பே⁴தா³தி, நிருத்தஞ்ஞூஹி பா⁴ஸிதா.

ஆ இவண்ணோ சுவண்ணோ ச, பஞ்ச அந்தா ஸரூபதோ;

இத்தி²பே⁴தா³தி விஞ்ஞேய்யா, ஓகாரந்தேன சா²பி வா.

பி³ந்து³, இ, உ-இமே அந்தா, தயோ ஞேய்யா விபா⁴வினா;

நபும்ஸகப்பபே⁴தா³தி, நிருத்தஞ்ஞூஹி பா⁴ஸிதா.

அந்தா ஸத்தேவ புல்லிங்கே³, இத்தி²யம் பஞ்ச வா ச² வா;

நபும்ஸகே தயோ ஏவம், த³ஸ பஞ்சஹி ச²ப்³பி³தா⁴.

யஸ்மா பனேத்த² ‘‘பூ⁴தோ’’திஆத³யோ ஸத்³தா³ நிப்³ப³சனாபி⁴தே⁴ய்யகத²னத்த²ஸாத⁴கவசனபரியாயவசனத்து²த்³தா⁴ரவஸேன வுச்சமானா பாகடா ஹோந்தி ஸுவிஞ்ஞேய்யா ச, தஸ்மா இமேஸம் நிப்³ப³சனாதீ³னி யதா²ஸம்ப⁴வம் வக்கா²ம விஞ்ஞூனம் துட்டி²ஜனனத்த²ஞ்சேவ ஸோதாரானமத்தே²ஸு படுதரபு³த்³தி⁴படிலாபா⁴ய ச. தத்ர பூ⁴தோதி க²ந்த⁴பாதுபா⁴வேன ப⁴வதீதி பூ⁴தோ, இத³ம் தாவ நிப்³ப³சனம். ‘‘பூ⁴தோ’’தி ஸப்³ப³ஸங்கா³ஹகவஸேன ஸத்தோ வுச்சதி, இத³மபி⁴தே⁴ய்யகத²னம். ‘‘யோ ச காலக⁴ஸோ பூ⁴தோ. ஸப்³பே³வ நிக்கி²பிஸ்ஸந்தி, பூ⁴தா லோகே ஸமுஸ்ஸய’’ந்தி ச இத³மேதஸ்ஸ அத்த²ஸ்ஸ ஸாத⁴கவசனம். அத² வா பூ⁴தோதி ஏவம்னாமகோ அமனுஸ்ஸஜாதியோ ஸத்தவிஸேஸோ, இத³மபி⁴தே⁴ய்யகத²னம். ‘‘பூ⁴தவிஜ்ஜா, பூ⁴தவேஜ்ஜோ, பூ⁴தவிக்³க³ஹிதோ’’தி ச இத³மேதஸ்ஸ அத்த²ஸ்ஸ ஸாத⁴கவசனம். யஞ்ச பன ‘‘ஸத்தோ மச்சோ பஜா’’திஆதி³கம் தத்த² தத்த² ஆக³தம் வசனம், இத³ம் ஸத்தோதி அத்த²வாசகஸ்ஸ பூ⁴தஸத்³த³ஸ்ஸ பரியாயவசனம். யஞ்ச நித்³தே³ஸபாளியம் ‘‘மச்சோதி ஸத்தோ நரோ மானவோ போஸோ புக்³க³லோ ஜீவோ ஜகு³ ஜந்து ஹிந்த³கு³ மனுஜோ’’தி ஆக³தம், இத³ம்பி பரியாயவசனமேவ. தானி ஸப்³பா³னி பிண்டே³த்வா வுச்சந்தே –

ஸத்தோ மச்சோ ஜனோ பூ⁴தோ, பாணோ ஹிந்த³கு³ புக்³க³லோ;

ஜந்து ஜீவோ ஜகு³ யக்கோ², பாணீ தே³ஹீ ததா²க³தோ.

ஸத்தவோ மாதியோ லோகோ, மனுஜோ மானவோ நரோ;

போஸோ ஸரீரீதி புமே, பூ⁴தமிதி நபும்ஸகே.

பஜாதி இத்தி²யம் வுத்தோ, லிங்க³தோ, ந ச அத்த²தோ;

ஏவம் திலிங்கி³கா ஹோந்தி, ஸத்³தா³ ஸத்தாபி⁴தா⁴னகா.

யோ ஸோ ஜங்கா⁴ய உலதி, ஸோ ஸத்தோ ஜங்க⁴லோ இத⁴;

பாணதே³ஹாபி⁴தா⁴னேஹி, ஸத்தனாமம் பபஞ்சிதம்.

இமஸ்மிம் பகரணே ‘‘பரியாயவசன’’ந்தி ச ‘‘அபி⁴தா⁴ன’’ந்தி ச ‘‘ஸங்கா²’’திஆதீ³னி ச ஏகத்தா²னி அதி⁴ப்பேதானி, அத்து²த்³தா⁴ரவஸேன பன பூ⁴தஸத்³தோ³ பஞ்சக்க²ந்தா⁴மனுஸ்ஸதா⁴துஸஸ்ஸதவிஜ்ஜமானகீ²ணாஸவஸத்தருக்கா²தீ³ஸு தி³ஸ்ஸதி, தப்பயோகோ³ உபரி அத்த²த்திகவிபா⁴கே³ ஆவிப⁴விஸ்ஸதி. பா⁴வகோதி பா⁴வேதீதி பா⁴வகோ, இத³ம் நிப்³ப³சனம். யோ பா⁴வனம் கரோதி, ஸோ பா⁴வகோ. இத³மபி⁴தே⁴ய்யகத²னம். ‘‘பா⁴வகோ நிபகோ தீ⁴ரோ’’தி இத³மேதஸ்ஸ அத்த²ஸ்ஸ ஸாத⁴கவசனம். ‘‘பா⁴வகோ பா⁴வனாபஸுதோ பா⁴வனாபயுத்தோ பா⁴வனாஸம்பன்னோ’’தி இத³ம் பரியாயவசனம். இமானி ‘‘பூ⁴தோ பா⁴வகோ’’தி த்³வே பதா³னி ஸுத்³த⁴கத்துஹேதுகத்துவஸேன வுத்தானீதி. இதோ பரம் நயானுஸாரேன ஸுவிஞ்ஞேய்யத்தா ‘‘இத³ம் நிப்³ப³சன’’ந்தி ச ஆதீ³னி அவத்வா கத்த²சி அத்த²ஸாத⁴கவசனம் பரியாயவசனம் அத்து²த்³தா⁴ரஞ்ச யதா²ரஹம் த³ஸ்ஸேஸ்ஸாம. தேஸு ஹி ஸப்³ப³த்த² த³ஸ்ஸிதேஸு க³ந்த²வித்தா²ரோ ஸியா, தஸ்மா யேஸமத்தோ² உத்தானோ, தேஸம்பி பதா³னமபி⁴தே⁴ய்யம் ந கதே²ஸ்ஸாம, நிப்³ப³சனமத்தமேவ நேஸம் கதே²ஸ்ஸாம. யேஸம் பன க³ம்பீ⁴ரோ அத்தோ², தேஸமபி⁴தே⁴ய்யம் கதே²ஸ்ஸாம.

ப⁴வனம் ப⁴வோ, ப⁴வோ வுச்சதி வுத்³தி⁴. பூ⁴ஸத்³த³ஸ்ஸ அத்தா²திஸயயோக³தோ வட்³ட⁴னேபி தி³ஸ்ஸமானத்தா ப⁴வனம் வட்³ட⁴னந்தி கத்வா. ‘‘ப⁴வோ ச ரஞ்ஞோ அப⁴வோ ச ரஞ்ஞோ’’தி இத³ம் வுத்³தி⁴அத்த²ஸ்ஸ ஸாத⁴கம் வசனம். அத² வா ப⁴வோதி வுச்சதி ஸஸ்ஸதம். ‘‘ஸஸ்ஸதோ அத்தா ச லோகோ சா’’தி ஹி ஸஸ்ஸதவஸேன பவத்தா தி³ட்டி² ஸஸ்ஸததி³ட்டி², தஸ்மா ப⁴வதி³ட்டீ²’’தி இத³மேதஸ்ஸத்த²ஸ்ஸ ஸாத⁴கம் வசனம். ததா² ப⁴வோதி ப⁴வதி³ட்டி², ப⁴வதி ஸஸ்ஸதம் திட்ட²தீதி பவத்தனதோ ஸஸ்ஸததி³ட்டி² ப⁴வதி³ட்டி² நாம. ப⁴வதி³ட்டி² ஹி உத்தரபத³லோபேன ப⁴வோதி வுச்சதி. ‘‘ப⁴வேன ப⁴வஸ்ஸ விப்பமோக்க²மாஹம்ஸூ’’தி இத³மேதஸ்ஸத்த²ஸ்ஸ ஸாத⁴கம் வசனம். ஏத்தா²யம் பாளிவசனத்தோ² – ஏகச்சே ஸமணா வா ப்³ராஹ்மணா வா ப⁴வதி³ட்டி²யா வா காமப⁴வாதி³னா வா ஸப்³ப³ப⁴வதோ விமுத்திம் ஸம்ஸாரவிஸுத்³தி⁴ம் கத²யிம்ஸூதி. அத² வா ப⁴வந்தி வட்³ட⁴ந்தி ஸத்தா ஏதேனாதி ப⁴வோதி அத்தே²ன ஸம்பத்திபுஞ்ஞானி ப⁴வோதி ச வுச்சந்தி. ‘‘இதிப⁴வாப⁴வதஞ்ச வீதிவத்தோ’’தி இத³மேதஸ்ஸத்த²ஸ்ஸ ஸாத⁴கம் வசனம். ஏத்த² பனாயம் பாளிவசனத்தோ² – ப⁴வோதி ஸம்பத்தி, அப⁴வோதி விபத்தி. ததா² ப⁴வோதி வுத்³தி⁴, அப⁴வோதி ஹானி. ப⁴வோதி ஸஸ்ஸதம், அப⁴வோதி உச்சே²தோ³. ப⁴வோதி புஞ்ஞம், அப⁴வோதி பாபம், தம் ஸப்³ப³ம் வீதிவத்தோதி.

ஸஹோகாஸா க²ந்தா⁴பி ப⁴வோ. ‘‘காமப⁴வோ ரூபப⁴வோ’’ இச்சேவமாதி³ ஏதஸ்ஸத்த²ஸ்ஸ ஸாத⁴கம் வசனம். ஏத்த² பன க²ந்தா⁴ ‘‘யோ பஞ்ஞாயதி, ஸோ ஸரூபம் லப⁴தீ’’தி கத்வா ‘‘ப⁴வதி அவிஜ்ஜாதண்ஹாதி³ஸமுத³யா நிரந்தரம் ஸமுதே³தீ’’தி அத்தே²ன வா ‘‘ப⁴வா’’தி வுச்சந்தி. ஓகாஸோ பன ‘‘ப⁴வந்தி ஜாயந்தி ஏத்த² ஸத்தா நாமரூபத⁴ம்மா சா’’தி அத்தே²ன ‘‘ப⁴வோ’’தி. அபிச கம்மப⁴வோபி ப⁴வோ, உபபத்திப⁴வோபி ப⁴வோ. ‘‘உபாதா³னபச்சயா ப⁴வோ து³விதே⁴ன அத்தி² கம்மப⁴வோ, அத்தி² உபபத்திப⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். தத்த² கம்மமேவ ப⁴வோ கம்மப⁴வோ. ததா² உபபத்தி ஏவ ப⁴வோ உபபத்திப⁴வோ. ஏத்தூ²பபத்தி ப⁴வதீதி ப⁴வோ, கம்மம் பன யதா² ஸுக²காரணத்தா ‘‘ஸுகோ² பு³த்³தா⁴னமுப்பாதோ³’’தி வுத்தோ. ஏவம் ப⁴வகாரணத்தா ப²லவோஹாரேன ப⁴வோதி த³ட்ட²ப்³ப³ம். அத² வா பா⁴வனலக்க²ணத்தா பா⁴வேதீதி ப⁴வோ. கிம் பா⁴வேதி? உபபத்திம். இதி உபபத்திம் பா⁴வேதீதி ப⁴வோதி வுச்சதி. பா⁴வேதீதிமஸ்ஸ ச நிப்³ப³த்தேதீதி ஹேதுகத்துவஸேனத்தோ². அத² வா ‘‘ப⁴வபச்சயா ஜாதீ’’தி வசனதோ ப⁴வதி ஏதேனாதி ப⁴வோதி கம்மப⁴வோ வுச்சதி.

‘‘க²ந்தா⁴னஞ்ச படிபாடி, தா⁴துஆயதனான ச;

அப்³போ³ச்சி²ன்னம் வத்தமானா, ஸம்ஸாரோதி பவுச்சதீ’’தி

வுத்தலக்க²ணோ ஸம்ஸாரோபி ப⁴வோ. ‘‘ப⁴வே து³க்க²ம் ப⁴வது³க்க²ம், ப⁴வே ஸம்ஸரந்தோ’’தி இமானேதஸ்ஸத்த²ஸ்ஸ ஸாத⁴கானி வசனானி. தத்ர கேனட்டே²ன ஸம்ஸாரோ ப⁴வோதி கதீ²யதி? ப⁴வதி ஏத்த² ஸத்தஸம்முதி க²ந்தா⁴தி³படிபாடிஸங்கா²தே த⁴ம்மபுஞ்ஜஸ்மிந்தி அத்தே²ன. இத³ம் ப⁴வஸத்³த³ஸ்ஸ பா⁴வகத்துகரணாதி⁴கரணஸாத⁴னவஸேனத்த²கத²னம்.

ஏத்த² ப⁴வஸத்³த³ஸ்ஸ அத்து²த்³தா⁴ரம் வதா³ம –

வுத்³தி⁴ஸம்பத்திபுஞ்ஞானி, க²ந்தா⁴ ஸோகாஸஸஞ்ஞிதா;

ஸம்ஸாரோ ஸஸ்ஸதஞ்சேதம், ப⁴வஸத்³தே³ன ஸத்³தி³தம்.

ப⁴வதண்ஹா ப⁴வதி³ட்டி², உபபத்திப⁴வோ ததா²;

கம்மப⁴வோ ச ஸப்³ப³ந்தம், ப⁴வஸத்³தே³ன ஸத்³தி³தம்.

ப⁴வதண்ஹாப⁴வதி³ட்டி²-த்³வயம் கத்த²சி பாளியம்;

உத்தரபத³லோபேன, ப⁴வஸத்³தே³ன ஸத்³தி³தம்.

அப⁴வோதி ந ப⁴வோ அப⁴வோ.

விபத்தி ஹானி உச்சே²தோ³, பாபஞ்சேவ சதுப்³பி³தா⁴;

இமே அப⁴வஸத்³தே³ன, அத்தா² வுச்சந்தி ஸாஸனே.

பா⁴வோதி அஜ்ஜா²ஸயோ, யோ ‘‘அதி⁴ப்பாயோ’’திபி வுச்சதி. ‘‘தீ²னம்பா⁴வோ து³ராஜானோ. நாமச்சோ ராஜப⁴ரியாஸு, பா⁴வம் குப்³பே³த² பண்டி³தோ. ஹத³யங்க³தபா⁴வம் பகாஸேதீ’’தி ஏவமாதி³ ஏதஸ்ஸத்த²ஸ்ஸ ஸாத⁴கம் வசனம். அபிச வத்து²த⁴ம்மோபி பா⁴வோ. ‘‘பா⁴வஸங்கேதஸித்³தீ⁴ன’’ந்தி இத³மேதஸ்ஸத்த²ஸ்ஸ ஸாத⁴கம் வசனம், சித்தம்பி பா⁴வோ. ‘‘அச்சாஹிதம் கம்மம் கரோஸி லுத்³த³ம், பா⁴வே ச தே குஸலம் நத்தி² கிஞ்சீ’’தி இத³மேதஸ்ஸத்த²ஸ்ஸ ஸாத⁴கம் வசனம். க்ரியாபிபா⁴வோ. ‘‘பா⁴வலக்க²ணம் பா⁴வஸத்தமீ’’தி ச இத³மேதஸ்ஸத்த²ஸ்ஸ ஸாத⁴கம் வசனம். அபிச பா⁴வோதி ஸத்தவேவசனந்தி ப⁴ணந்தி, தா⁴து வா ஏதம் அதி⁴வசனம். தத்த² அஜ்ஜா²ஸயோ ச வத்து²த⁴ம்மோ ச சித்தஞ்ச ஸத்தோ சாதி இமே ப⁴வதீதி பா⁴வோ. ததா² பன பா⁴வேதீதி பா⁴வோ, க்ரியா து ப⁴வனந்தி பா⁴வோ. ஸா ச ப⁴வனக³மனபசனாதி³வஸேனானேகவிதா⁴. அபிச பா⁴வரூபம்பி பா⁴வோ, யம் இத்தி²பா⁴வோ பும்பா⁴வோ இத்தி²ந்த்³ரியந்தி ச வுச்சதி. தத்ராயம் வசனத்தோ² – ‘‘இத்தீ²’’தி வா ‘‘புரிஸோ’’தி வா ப⁴வதி ஏதேன சித்தம் அபி⁴தா⁴னஞ்சாதி பா⁴வோ.

நத்தனோமதியா ஏதம், நிப்³ப³சனமுதா³ஹடம்;

புப்³பா³சரியஸீஹானம், மதம் நிஸ்ஸாய மாஹடம்.

வுத்தஞ்ஹேதம் போராணேஹி ‘‘இத்தி²யா பா⁴வோ இத்தி²பா⁴வோ, இத்தீ²தி வா ப⁴வதி ஏதேன சித்தம் அபி⁴தா⁴னஞ்சாதி இத்தி²பா⁴வோ’’தி, தஸ்மா பும்பா⁴வோதி ஏத்தா²பி புமஸ்ஸ பா⁴வோ பும்பா⁴வோ, புமாதி வா ப⁴வதி ஏதேன சித்தம் அபி⁴தா⁴னஞ்சாதி பும்பா⁴வோதி நிப்³ப³சனம் ஸமதி⁴க³ந்தப்³ப³ம். இத³ம் பா⁴வஸத்³த³ஸ்ஸ கத்துபா⁴வகரணஸாத⁴னவஸேனத்த²கத²னம்.

அபா⁴வோதி ந பா⁴வோதி அபா⁴வோ, கோ ஸோ? ஸுஞ்ஞதா நத்தி²தா. ஸபா⁴வோதி அத்தனோ பா⁴வோ ஸபா⁴வோ, அத்தனோ பகதி இச்சேவத்தோ². அத² வா ஸபா⁴வோதி த⁴ம்மானம் ஸதி அத்த²ஸம்ப⁴வே யோ கோசி ஸரூபம் லப⁴தி, தஸ்ஸ பா⁴வோ லக்க²ணமிதி ஸஞ்ஞிதோ நமனருப்பனகக்க²ளபு²ஸனாதி³ஆகாரோ இச்சேவத்தோ². ‘‘ஸாமஞ்ஞம் வா ஸபா⁴வோ வா, த⁴ம்மானம் லக்க²ணம் மத’’ந்தி இத³மேதஸ்ஸத்த²ஸ்ஸ ஸாத⁴கம் வசனம். அபிச ஸபா⁴வோதி ஸலக்க²ணோ பரமத்த²த⁴ம்மோ. கேனட்டே²ன? ஸஹ பா⁴வேனாதி அத்தே²ன. ஸப்³பா⁴வோதி ஸதம் பா⁴வோ ஸப்³பா⁴வோ, ஸப்புரிஸத⁴ம்மோ இச்சேவத்தோ². அத² வா அத்தனோ பா⁴வோ ஸப்³பா⁴வோ. ‘‘கா³ஹாபயந்தி ஸப்³பா⁴வ’’ந்தி இத³மேதஸ்ஸத்த²ஸ்ஸ ஸாத⁴கம் வசனம். ஸம்விஜ்ஜமானோ வா பா⁴வோ ஸப்³பா⁴வோ. ‘‘ஏவம் க³ஹணஸப்³பா⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். இத³ம் ஸபா⁴வ ஸப்³பா⁴வஸத்³தா³னம் பா⁴வஸாத⁴னவஸேனத்த²கத²னம்.

ஸம்ப⁴வோதி ஸம்ப⁴வனம் ஸம்ப⁴வோ, ஸம்ப⁴வனக்ரியா, யுத்தி வா. யுத்தி ஹி ஸம்ப⁴வோதி வுச்சதி ‘‘ஸம்ப⁴வோ க³ஹணஸ்ஸ காரண’’ந்திஆதீ³ஸு. அத² வா ஸம்ப⁴வதி ஏதஸ்மாதி ஸம்ப⁴வோ. யதோ ஹி யம் கிஞ்சி ஸம்ப⁴வதி, ஸோ ஸம்ப⁴வோ. பப⁴வோதி பப⁴வனம் பப⁴வோ, அச்சி²ன்னதா, பப⁴வதி ஏதஸ்மாதி வா பப⁴வோ. யதோ ஹி யம் கிஞ்சி பப⁴வதி, ஸோ பப⁴வோ. இமே பன ஸம்ப⁴வபப⁴வஸத்³தா³ கத்த²சி ஸமானத்தா² கத்த²சி பி⁴ன்னத்தா²தி வேதி³தப்³பா³. கத²ம்? ஸம்ப⁴வஸத்³தோ³ ஹி ப⁴வனக்ரியம்பி வத³தி யுத்திம்பி பஞ்ஞத்திம்பி ஸம்ப⁴வரூபம்பி பச்சயத்த²ம்பி, பப⁴வஸத்³தோ³ பன ப⁴வனக்ரியம்பி வத³தி நதி³ப்பப⁴வம்பி பச்சயத்த²ம்பி, தஸ்மா பச்சயத்த²ம் வஜ்ஜேத்வா பி⁴ன்னத்தா²தி க³ஹேதப்³பா³, பச்சயத்தே²ன பன ஸமானத்தா²தி க³ஹேதப்³பா³. வுத்தஞ்ஹேதம் ‘‘பச்சயோ ஹேது நிதா³னம் காரணம் ஸம்ப⁴வோ பப⁴வோதிஆதி³ அத்த²தோ ஏகம், ப்³யஞ்ஜனதோ நான’’ந்தி.

‘‘மூலம் ஹேது நிதா³னஞ்ச, ஸம்ப⁴வோ பப⁴வோ ததா²;

ஸமுட்டா²னாஹாராரம்மணம், பச்சயோ ஸமுத³யேன சா’’தி

அயம்பி கா³தா² ஏதஸ்ஸத்த²ஸ்ஸ ஸாதி⁴கா. இத³ம் ஸம்ப⁴வபப⁴வஸத்³தா³னம் பா⁴வாபாதா³னஸாத⁴னவஸேனத்த²கத²னம்.

ஏவமேத்த² பா⁴வகத்துகம்மகரணாபாதா³னாதி⁴கரணவஸேன ச² ஸாத⁴னானி பகாஸிதானி. தானி ஸம்பதா³னஸாத⁴னேன ஸத்தவிதா⁴னி ப⁴வந்தி, தம் பன உத்தரி ஆவிப⁴விஸ்ஸதி ‘‘த⁴னமஸ்ஸ ப⁴வதூதி த⁴னபூ⁴தீ’’திஆதி³னா. இச்சேவம் கிதகவஸேன ஸப்³ப³தா²பி ஸத்தவிதா⁴னி ஸாத⁴னானி ஹோந்தி, யானி ‘‘காரகானீ’’திபி வுச்சதி, இதோ அஞ்ஞம் ஸாத⁴னம் நத்தி². இத⁴ பயோகே³ஸ்வத்தே²ஸு ச விஞ்ஞூனம் பாடவத்த²ம் ஸாத⁴னனாமம் பகாஸிதம். ததா² ஹி து³ன்னிக்கி²த்தஸாத⁴னேஹி பதே³ஹி யோஜிதா ஸத்³த³ப்பயோகா³ து³ப்³போ³த⁴த்தா² ஹோந்தி, ஸுனிக்கி²த்தஸாத⁴னேஹி பன பதே³ஹி யோஜிதா ஸுபோ³த⁴த்தா² ஹோந்தி, தஸ்மா பயோகா³ஸாத⁴னமூலகா, அத்தோ² ச பயோக³மூலகோ. பயோகா³னுரூபஞ்ஹி அவிபரீதம் கத்வா அத்த²ம் கத²னஸீலா ‘‘யாசிதோவ ப³ஹுலம் சீவரம் பரிபு⁴ஞ்ஜதி, அப்பம் அயாசிதோ’’தி ஏவமாதீ³ஸு ஸாத⁴னவஸேன க³ஹேதப்³பே³ஸு அத்தே²ஸு, அஞ்ஞேஸு சத்தே²ஸு படுதரபு³த்³தி⁴னோ பண்டி³தாயேவ ஏகந்தேன ப⁴க³வதோ பரியத்திஸாஸனத⁴ரா நாம ஹோந்தீதி வேதி³தப்³ப³ம். இதோ பரம் நயானுஸாரேன ஸுவிஞ்ஞேய்யத்தா ‘‘இத³ம் நாம ஸாத⁴ன’’ந்தி ந வக்கா²ம, கேவலமித⁴ த³ஸ்ஸிதேஸு பயோகே³ஸு விஞ்ஞூனம் ப³ஹுமானுப்பாத³னத்த²ஞ்சேவ விவித⁴விசித்தபாளிக³திகே விவித⁴த்த²ஸாரே ஜினவரவசனே ஸோதூனம் பு³த்³தி⁴விஜம்ப⁴னத்த²ஞ்ச அத்த²ஸாத⁴கவசனானியேவ யதா²ரஹம் ஸுத்தகே³ய்யவேய்யாகரணகா³தா²தீ³ஸு ததோ ததோ ஆஹரித்வா த³ஸ்ஸேஸ்ஸாம.

பபா⁴வோதி பகாரதோ ப⁴வதீதி பபா⁴வோ, ஸோயமானுபா⁴வோயேவ. ‘‘பபா⁴வம் தே ந பஸ்ஸாமி, யேன த்வம் மிதி²லம் வஜே’’தி இத³மேதஸ்ஸத்த²ஸ்ஸ ஸாத⁴கம் வசனம். அனுப⁴வோதி அனுப⁴வனம் அனுப⁴வோ, கிம் தம்? பரிபு⁴ஞ்ஜனம். ஆனுபா⁴வோதி தேஜுஸ்ஸாஹமந்தபபூ⁴ஸத்தியோ. ‘‘தேஜஸங்க²தோ உஸ்ஸாஹமந்தபபூ⁴ஸத்திஸங்கா²தோ வா மஹந்தோ ஆனுபா⁴வோ ஏதஸ்ஸாதி மஹானுபா⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம்.

தேஜோ உஸ்ஸாஹமந்தா ச, பபூ⁴ஸத்தீதி பஞ்சிமே;

ஆனுபா⁴வாதி வுச்சந்தி, பபா⁴வாதி ச தே வதே³.

தேஜாதி³வாசகத்தம்ஹி, ஆனுபா⁴வபத³ஸ்ஸ து;

அத்த²னிப்³ப³சனம் தீ⁴ரோ, யதா²ஸம்ப⁴வமுத்³தி³ஸே.

அத² வா ஆனுபா⁴வோதி அனுப⁴விதப்³ப³ப²லம். ‘‘அனுப⁴விதப்³ப³ஸ்ஸ ப²லஸ்ஸ மஹந்ததாய மஹானுபா⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். பராப⁴வோதி பராப⁴வனம் பராப⁴வோ, அத² வா பராப⁴வதீதி பராப⁴வோ. ‘‘ஸுவிஜானோ பராப⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். அபிச ‘‘த⁴ம்மதே³ஸ்ஸீ பராப⁴வோ’’தி பாடா²னுரூபதோ பராப⁴விஸ்ஸதீதி பராப⁴வோதி அனாக³தகாலவஸேனபி நிப்³ப³சனம் த³ட்ட²ப்³ப³ம். அத² வா பராப⁴வந்தி ஏதேனாதி பராப⁴வோ. கிம் தம்? த⁴ம்மதே³ஸ்ஸிதாதி³. ‘‘பட²மோ ஸோ பராப⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். விப⁴வோதி நிப்³பா³னம். தஞ்ஹி ப⁴வதோ விக³தத்தா ப⁴வதோ விக³தோதி விப⁴வோ, ப⁴வஸ்ஸ ச தம்ஹேது விக³தத்தா விக³தோ ப⁴வோ ஏதஸ்மாதி விப⁴வோ. விப⁴வந்தி உச்சி²ஜ்ஜந்தி வினஸ்ஸந்தி இதோ அரியத⁴னவிலோமகா கிலேஸமஹாசோராதிபி விப⁴வோ. விப⁴வஸத்³த³ஸ்ஸ நிப்³பா³னாபி⁴தா⁴னத்தே ‘‘ஏவம் ப⁴வே விஜ்ஜமானே, விப⁴வோ இச்சி²தப்³ப³கோ’’தி இத³மேத்த² ஸாத⁴கம் வசனம். இமானி பன நிப்³பா³னஸ்ஸ பரியாயவசனானி –

நிப்³பா³னம் விப⁴வோ மோக்கோ², நிரோதோ⁴ அமதம் ஸமம்;

ஸங்கா²ரூபஸமோ து³க்க²-நிரோதோ⁴ அச்சுத’க்க²யோ.

விவட்ட’மகதம் அத்த²ம், ஸந்திபத³’மஸங்க²தம்;

பாரம் தண்ஹாக்க²யோ து³க்க²-க்க²யோ ஸஞ்ஞோஜனக்க²யோ.

யோக³க்கே²மோ விராகோ³ ச,

லோகந்தோ ச ப⁴வக்க²யோ;

அபவக்³கோ³ விஸங்கா²ரோ,

ஸப்³பி⁴ ஸுத்³தி⁴ விஸுத்³தி⁴ ச.

விமுத்யா’பசயோ முத்தி, நிப்³பு³தி உபதி⁴க்க²யோ;

ஸந்தி அஸங்க²தா தா⁴து, தி³ஸா ச ஸப்³ப³தோபப⁴ம்.

வினாபேதானி நாமானி, விஸேஸகபத³ம் இத⁴;

நிப்³பா³னவாசகானீதி, ஸல்லக்கே²ய்ய ஸுமேத⁴ஸோ.

‘‘தாணம் லேண’’ந்திஆதீ³னி-பேக்கி²கானி ப⁴வந்தி ஹி;

விஸேஸகபதா³னந்தி, ஏத்தே²தானி பகாஸயே.

தாணம் லேண’மரூபஞ்ச, ஸந்தம் ஸச்ச’மனாலயம்;

ஸுது³த்³த³ஸம் ஸரணஞ்ச, பராயண’மனீதிகம்.

அனாஸவம் து⁴வம் நிச்சம், விஞ்ஞாண’மனித³ஸ்ஸனம்;

அப்³யாபஜ்ஜம் ஸிவம் கே²மம், நிபுணம் அபலோகிகம்.

அனந்த’மக்க²ரம் தீ³போ, அச்சந்தம் கேவலம் பத³ம்;

பணீதம் அச்சுதஞ்சாதி, ப³ஹுதா⁴பி விபா⁴வயே.

கோ³த்ரபூ⁴தி பத³ஸ்ஸத்த²ம், வத³ந்தேஹி க³ரூஹி து;

கோ³த்தம் வுச்சதி நிப்³பா³ன-மிதி கோ³த்தந்தி பா⁴ஸிதம்.

விப⁴வோதி வா வினாஸஸம்பத்தித⁴னுச்சே²த³தி³ட்டி²யோபி வுச்சந்தி. தத்த² வினாஸோ விப⁴வனம் உச்சி²ஜ்ஜனம் நஸ்ஸனந்தி அத்தே²ன விப⁴வோ. ‘‘விப⁴வோ ஸப்³ப³த⁴ம்மானம், இத்தே²கே ஸதோ ஸத்தஸ்ஸ உச்சே²த³ம் வினாஸம் விப⁴வம் பஞ்ஞபேந்தீ’’தி ச இத³மேதஸ்ஸத்த²ஸ்ஸ ஸாத⁴கம் வசனம். ஸம்பத்தி பன விஸேஸதோ ப⁴வதீதி விப⁴வோ. ‘‘ரஞ்ஞோ ஸிரிவிப⁴வம் த³ட்டு²காமா’’தி இத³மேதஸ்ஸத்த²ஸ்ஸ ஸாத⁴கம் வசனம். த⁴னம் பன ப⁴வந்தி வட்³ட⁴ந்தி வுத்³தி⁴ம் விரூள்ஹிம் வேபுல்லம் ஆபஜ்ஜந்தி ஸத்தா ஏதேனாதி விப⁴வோ. ‘‘அஸீதிகோடிவிப⁴வஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தீ’’தி இத³மேதஸ்ஸத்த²ஸ்ஸ ஸாத⁴கம் வசனம். இத³ம் பன பரியாயவசனம் –

த⁴னம் ஸம் விப⁴வோ த³ப்³ப³ம், ஸாபதேய்யம் பரிக்³க³ஹோ;

ஓட்³ட³ம் ப⁴ண்ட³ம் ஸகம் அத்தோ², இச்சேதே த⁴னவாசகா.

உச்சே²த³தி³ட்டி² பன விப⁴வதி உச்சி²ஜ்ஜதி ‘‘அத்தா ச லோகோ ச புன சுதிதோ உத்³த⁴ம் ந ஜாயதீ’’தி க³ஹணதோ விப⁴வோதி. ‘‘விப⁴வதண்ஹா’’தி இத³மேதஸ்ஸத்த²ஸ்ஸ ஸாத⁴கம் வசனம். விப⁴வதண்ஹாதி ஹி உச்சே²த³தி³ட்டி²ஸஹக³தாய தண்ஹாய நாமம். ஏத்த² அத்து²த்³தா⁴ரோ வுச்சதி –

த⁴னனிப்³பா³னஸம்பத்தி-வினாஸுச்சே²த³தி³ட்டி²யோ;

வுத்தா விப⁴வஸத்³தே³ன, இதி விஞ்ஞூ விபா⁴வயே.

பாதுபா⁴வோதி பாதுப⁴வனம் பாதுபா⁴வோ. ஆவிபா⁴வோதி ஆவிப⁴வனம் ஆவிபா⁴வோ, உபி⁴ன்னமேதேஸம் பாகடதா இச்சேவத்தோ². திரோபா⁴வோதி திரோப⁴வனம் திரோபா⁴வோ, படிச்ச²ன்னபா⁴வோ. வினாபா⁴வோதி வினாப⁴வனம் வினாபா⁴வோ, வியோகோ³. ஸோத்தி²பா⁴வோதி ஸோத்தி²ப⁴வனம் ஸோத்தி²பா⁴வோ, ஸுவத்தி²பா⁴வோ ஸுக²ஸ்ஸ அத்தி²தா, அத்த²தோ பன நிப்³ப⁴யதா நிருபத்³த³வதா ஏவ. அத்தி²பா⁴வோதி அத்தி²தா விஜ்ஜமானதா அவிவித்ததா. நத்தி²பா⁴வோதி நத்தி²தா அவிஜ்ஜமானதா விவித்ததா ரித்ததா துச்ச²தா ஸுஞ்ஞதா. ஓகாரந்தபுல்லிங்க³னித்³தே³ஸோ.

அபி⁴ப⁴வதீதி அபி⁴ப⁴விதா, பரம் அபி⁴ப⁴வந்தோ யோ கோசி. ஏவம் பரிப⁴விதா, அனுப⁴வதீதி அனுப⁴விதா, ஸுக²ம் வா து³க்க²ம் வா அது³க்க²மஸுக²ம் வா அனுப⁴வந்தோ யோ கோசி. ஏவம் ஸமனுப⁴விதா. பச்சனுப⁴விதா, ஏத்த² பன யதா² ‘‘அமதஸ்ஸ தா³தா. அனுப்பன்னஸ்ஸ மக்³க³ஸ்ஸ உப்பாதே³தா’’திஆதீ³ஸு ‘‘தா³தா’’தி பதா³னம் கத்துவாசகானம் ‘‘அமதஸ்ஸா’’திஆதீ³ஹி பதே³ஹி கம்மவாசகேஹி ச²ட்டி²யந்தேஹி ஸத்³தி⁴ம் யோஜனா தி³ஸ்ஸதி, ததா² இமேஸம்பி பதா³னம் ‘‘பச்சாமித்தஸ்ஸ அபி⁴ப⁴விதா’’திஆதி³னா யோஜனா காதப்³பா³. ஏவம் அஞ்ஞேஸம்பி ஏவரூபானம் பதா³னம். ஆகாரந்தபுல்லிங்க³னித்³தே³ஸோ.

ப⁴வதீதி ப⁴வம். ப⁴விஸ்ஸதீதி வா ப⁴வம், வட்³ட⁴மானோ புக்³க³லோ. ‘‘ஸுவிஜானோ ப⁴வம் ஹோதி, ஸுவிஜானோ பராப⁴வோ. த⁴ம்மகாமோ ப⁴வம் ஹோதி, த⁴ம்மதே³ஸ்ஸீ பராப⁴வோ’’தி இத³மேதஸ்ஸத்த²ஸ்ஸ ஸாத⁴கம் வசனம். அத² வா யேன ஸத்³தி⁴ம் கதே²தி, ஸோ ‘‘ப⁴வ’’ந்தி வத்தப்³போ³, ‘‘ப⁴வம் கச்சாயனோ. ப⁴வம் ஆனந்தோ³. மஞ்ஞே ப⁴வம் பத்த²யதி, ரஞ்ஞோ ப⁴ரியம் பதிப்³ப³த’’ந்திஆதீ³ஸு. ஏத்த² பன தா⁴துஅத்தே² ஆத³ரோ ந காதப்³போ³, ஸம்முதிஅத்தே²யேவாத³ரோ காதப்³போ³ ‘‘ஸங்கேதவசனம் ஸச்சம், லோகஸம்முதிகாரண’’ந்தி வசனதோ. வோஹாரவிஸயஸ்மிஞ்ஹி லோகஸம்முதி ஏவ பதா⁴னா அவிலங்க⁴னீயா. பராப⁴வதீதி பராப⁴வம். ஏவம் பரிப⁴வம். அபி⁴ப⁴வம். அனுப⁴வம். பப⁴வதி பஹோதி ஸக்கோதீதி பப⁴வம், பஹோந்தோ யோ கோசி. ந பப⁴வம் அப்பப⁴வம், ‘‘அப்பப⁴வ’’ந்தி ச இத³ம் ஜாதகே தி³ட்ட²ம் –

‘‘சி²ன்னப்³ப⁴மிவ வாதேன, ருண்ணோ ருக்க²முபாக³மிம்;

ஸோஹம் அப்பப⁴வம் தத்த², ஸாக²ம் ஹத்தே²ஹி அக்³க³ஹி’’ந்தி

தத்த² ஸாத⁴கவசனமித³ம். நிக்³க³ஹீதந்தபுல்லிங்க³னித்³தே³ஸோ.

த⁴னபூ⁴தீதி த⁴னமஸ்ஸ ப⁴வதூதி த⁴னபூ⁴தி. ஸிரிபூ⁴தீதி ஸோபா⁴ய சேவ பஞ்ஞாபுஞ்ஞானஞ்ச அதி⁴வசனம். ஸா அஸ்ஸ ப⁴வதூதி ஸிரிபூ⁴தி. ஏவம் ஸோத்தி²பூ⁴தி, ஸுவத்தி²பூ⁴தி. இகாரந்தபுல்லிங்க³னித்³தே³ஸோ.

பா⁴வீதி ப⁴வனஸீலோ பா⁴வீ, ப⁴வனத⁴ம்மோ பா⁴வீ, ப⁴வனே ஸாது⁴காரீ பா⁴வீ. ஏவம் விபா⁴வீ. ஸம்பா⁴வீ. பரிபா⁴வீதி. தத்ர விபா⁴வீதி அத்த²விபா⁴வனே ஸமத்தோ² பண்டி³தோ வுச்சதி. ஏத்த² வித்³வா, விஜ்ஜாக³தோ, ஞாணீதிஆதி³ பரியாயவசனம் த³ட்ட²ப்³ப³ம். ப⁴வந்தி சத்ர –

வித்³வா விஜ்ஜாக³தோ ஞாணீ, விபா⁴வீ பண்டி³தோ ஸுதீ⁴;

பு³தோ⁴ விஸாரதோ³ விஞ்ஞூ, தோ³ஸஞ்ஞூ வித்³த³ஸு விதூ³.

விபஸ்ஸீ படிபா⁴ணீ ச, மேதா⁴வீ நிபகோ கவி;

குஸலோ விது³ரோ தீ⁴மா, க³திமா முதிமா சயம்.

சக்கு²மா கண்ணவா த³ப்³போ³, தீ⁴ரோ பூ⁴ரி விசக்க²ணோ;