13. ஸவினிச்ச²யஸங்க்²யானாமனாமிகபத³மாலா

இதோ பரம் பவக்கா²மி, ஸங்க்²யானாமிகபந்தியோ;

பூ⁴தா⁴துஜேஹி ரூபேஹி, அஞ்ஞேஹி சுபயோஜிதும்.

யா ஹி ஸா ஹேட்டா² அம்ஹேஹி ஏக த்³விதி சதுஇச்சேதேஸம் ஸங்க்²யாஸப்³ப³னாமானம் நாமிகபத³மாலா கதி²தா, தம் ட²பேத்வா இத⁴ அஸப்³ப³னாமானம் பஞ்ச ச² ஸத்தாதீ³னம் ஸங்க்²யானாமானம் நாமிகபத³மாலா பூ⁴தா⁴துமயேஹி அஞ்ஞேஹி ச ரூபேஹி யோஜனத்த²ம் வுச்சதே –

பஞ்ச, பஞ்சஹி, பஞ்சபி⁴, பஞ்சன்னம், பஞ்சஸு. ஸத்தன்னம் விப⁴த்தீனம் வஸேன ஞேய்யம். ‘‘பஞ்ச பூ⁴தா, பஞ்ச அபி⁴ப⁴விதாரோ, பஞ்ச புரிஸா, பஞ்ச பூ⁴மியோ, பஞ்ச கஞ்ஞாயோ, பஞ்ச பூ⁴தானி, பஞ்ச சித்தானீ’’திஆதி³னா ஸப்³ப³த்த² யோஜேதப்³ப³ம். ச², ச²ஹி, ச²பி⁴, ச²ன்னம், ச²ஸு, ச²ஸ்ஸு இதிபி. ‘‘ச²ஸ்ஸு லோகோ ஸமுப்பன்னோ, ச²ஸ்ஸு க்ருப்³ப³தி ஸந்த²வ’’ந்தி ஹி பாளி. ஸத்த, ஸத்தஹி, ஸத்தபி⁴, ஸத்தன்னம், ஸத்தஸு. அட்ட², அட்ட²ஹி, அட்ட²பி⁴, அட்ட²ன்னம், அட்ட²ஸு. நவ, நவஹி, நவபி⁴, நவன்னம், நவஸு. த³ஸ, த³ஸஹி, த³ஸபி⁴, த³ஸன்னம், த³ஸஸு. ஏவம் ஏகாத³ஸ. த்³வாத³ஸ, பா³ரஸ. தேரஸ, தேத³ஸ, தேளஸ. சதுத்³த³ஸ, சுத்³த³ஸ. பஞ்சத³ஸ, பன்னரஸ. ஸோளஸ. ஸத்தரஸ. அட்டா²ரஸ, அட்டா²ரஸஹி, அட்டா²ரஸபி⁴, அட்டா²ரஸன்னம், அட்டா²ரஸஸு. ஸப்³ப³மேதம் ப³ஹுவசனவஸேன க³ஹேதப்³ப³ம்.

ஏகூனவீஸதி, ஏகூனவீஸம் இச்சாதி³பி. ஏகூனவீஸாய, ஏகூனவீஸாயம், ஏகூனவீஸ பி⁴க்கூ² திட்ட²ந்தி, ஏகூனவீஸம் பி⁴க்கூ² பஸ்ஸதி, ஏவம் ‘‘கஞ்ஞாயோ சித்தானீ’’தி ச ஆதி³னா யோஜேதப்³ப³ம். ஏகூனவீஸாய பி⁴க்கூ²ஹி த⁴ம்மோ தே³ஸிதோ, ஏகூனவீஸாய கஞ்ஞாஹி கதம், ஏகூனவீஸாய சித்தேஹி கதம், ஏகூனவீஸாய பி⁴க்கூ²னம் சீவரம் தே³தி, ஏகூனவீஸாய கஞ்ஞானம் த⁴னம் தே³தி, ஏகூனவீஸாய சித்தானம் ருச்சதி, ஏகூனவீஸாய பி⁴க்கூ²ஹி அபேதி. ஏவம் கஞ்ஞாஹி சித்தேஹி. ஏகூனவீஸாய பி⁴க்கூ²னம் ஸந்தகம், ஏவம் கஞ்ஞானம் சித்தானம். ஏகூனவீஸாயம் பி⁴க்கூ²ஸு பதிட்டி²தம். ஏவம் ‘‘கஞ்ஞாஸு சித்தேஸூ’’தி யோஜேதப்³ப³ம். ஏகூனவீஸதி, ஏகூனவீஸதிம், ஏகூனவீஸதியா, ஏகூனவீஸதியம்.

வீஸதி, வீஸதிம், வீஸதியா, வீஸதியம். வீஸ, வீஸம், வீஸாய, வீஸாயம். ததா² ஏகவீஸ த்³வாவீஸ பா³வீஸ தேவீஸ சதுவீஸ இச்சாதீ³ஸுபி. திம்ஸ, திம்ஸம், திம்ஸாய, திம்ஸாயம். சத்தாலீஸ, சத்தாலீஸம், சத்தாலீஸாய, சத்தாலீஸாயம். சத்தாரீஸ இச்சாதி³பி. பஞ்ஞாஸ, பஞ்ஞாஸம், பஞ்ஞாஸாய, பஞ்ஞாஸாயம். பண்ணாஸ, பண்ணாஸம், பண்ணாஸாய, பண்ணாஸாயம். ஸட்டி², ஸட்டி²ம், ஸட்டி²யா, ஸட்டி²யம். ஸத்ததி, ஸத்ததிம், ஸத்ததியா, ஸத்ததியம். ஸத்தரி இச்சாதி³பி. அஸீதி, அஸீதிம், அஸீதியா, அஸீதியம். நவுதி. நவுதிம், நவுதியா, நவுதியம்.

இத்த²ஞ்ச அஞ்ஞதா²பி ஸங்க்²யாரூபானி க³ஹேதப்³பா³னி. ஏகூனவீஸேஹி, ஏகூனவீஸானம், ஏகூனவீஸேஸு. ‘‘ச²ன்னவுதீன’’ந்தி ச ஆதி³னாபி ஸங்க்²யாரூபானம் கத்த²சி த³ஸ்ஸனதோ கேசி ஸத்³த³ஸத்த²விதூ³ ஊனவீஸதிஸத்³த³ம் ஸப்³ப³தா³பி ஏகவசனந்தமித்தி²லிங்க³மேவ பயுஞ்ஜந்தி. கேசி ‘‘வீஸதிஆத³யோ ஆநவுதி ஏகவசனந்தா இத்தி²லிங்கா³’’தி வத³ந்தி. கேசி பனாஹு –

‘‘ஸத்³தா³ ஸங்க்²யேய்யஸங்கா²ஸு, ஏகத்தே வீஸதாத³யோ;

ஸங்க²த்தே² த்³விப³ஹுத்தம்ஹி, தா து சாநவுதித்தி²யோ’’தி.

ஏத்த² த்³விவசனம் ச²ட்³டே³தப்³ப³ம் பு³த்³த⁴வசனே தத³பா⁴வதோ. ஸப்³பே³ஸம்பி ச தேஸம் யதா²வுத்தவசனம் கிஞ்சி பாளிப்பதே³ஸம் பத்வா யுஜ்ஜதி, கிஞ்சி பன பத்வா ந யுஜ்ஜதி வீஸதிவீஸம்திம்ஸம்இச்சாதீ³னஞ்ஹி ஸங்க²த்தா²னம் ஸத்³தா³னம் ப³ஹுவசனப்பயோக³வஸேனபி பாளியம் த³ஸ்ஸனதோ, கச்சாயனே ச யோவசனஸம்பூ⁴தரூபவந்ததாத³ஸ்ஸனதோ. தஸ்மா யதா²ஸம்ப⁴வம் யதா²பாவசனஞ்ச இத்தி²லிங்க³பா⁴வே தேஸமேகவசனந்ததா வேதி³தப்³பா³ அத்தி² நத்தி²ஸத்³தா³னம் விய.

அத்தி²னத்தி²ஸத்³தா³ ஹி நிபாதத்தா ஏகத்தேபி ப³ஹுத்தேபி பவத்தந்தி ‘‘புத்தா மத்தி² த⁴னம்மத்தி². நத்தி² அத்தஸமம் பேமம். நத்தி² ஸமணப்³ராஹ்மணா’’திஆதீ³ஸு. அலிங்க³த்தேபி பனேதேஸம் கத்த²சி இத்தி²லிங்க³பா⁴வோ தி³ட்டோ². அபி⁴த⁴ம்மே ஹி த⁴ம்மஸேனாபதினா அனுத⁴ம்மசக்கவத்தினா வோஹாரகுஸலேன வோஹாரகுஸலஸாத⁴கேன ‘‘அத்தி²யா நவ. நத்தி²யா நவா’’தி ஏகவசனந்தம் இத்தி²லிங்க³ரூபம் த³ஸ்ஸிதம், தஸ்மா வீஸதிவீஸதிமிச்சாதீ³னம்பி யதா²ஸம்ப⁴வம் யதா²பாவசனஞ்ச இத்தி²லிங்க³பா⁴வே ஏகவசனந்ததா வேதி³தப்³பா³.

தத்தே²கே ‘‘ஹேதுயா அதி⁴பதியா’’தி ச இத³ம் லிங்க³விபல்லாஸவஸேன க³ஹேதப்³ப³ம் மஞ்ஞந்தி. தம்மதிவஸேன ‘‘ஹேதும்ஹி அதி⁴பதிம்ஹீ’’தி புல்லிங்க³பா⁴வோ படிபாதே³தப்³போ³, ‘‘ஹேதுபச்சயே அதி⁴பதிபச்சயே’’ இச்சேவத்தோ². அத² வா ‘‘ஹேதுயா அதி⁴பதியா’’தி த்³வயமித³ம் இத்தி²லிங்க³ரூபபடிபா⁴க³ம் புல்லிங்க³ரூபந்தி க³ஹேதப்³ப³ம் ‘‘ஹேதுயோ ஜந்துயோ’’திஆதீ³னம் இத்தி²லிங்க³ரூபபடிபா⁴கா³னம் புல்லிங்க³ரூபானம்பி விஜ்ஜமானத்தா, ‘‘அத்தி²யா நத்தி²யா’’தி இத³ம் பன லிங்க³விபல்லாஸவஸேன வுத்தந்தி ந க³ஹேதப்³ப³ம் அத்தி² நத்தி²ஸத்³தா³னம் அலிங்க³பே⁴த³த்தா. ந ஹி அத்தி² நத்தி²ஸத்³தா³ தீஸு லிங்கே³ஸு ஏகஸ்மிம்பி அந்தோக³தா⁴. ஏதேஸு ஹி அத்தி²ஸத்³தோ³ ஆக்²யாதனிபாதவஸேன பி⁴ஜ்ஜதி ‘‘அத்தி² ஸந்தி ஸம்விஜ்ஜதி. அத்தி²கீ²ரா ப்³ராஹ்மணீ’’திஆதீ³ஸு, நத்தி²ஸத்³தோ³ பன நிபாதோயேவ. இச்சேவம் அத்தி² நத்தி²ஸத்³தா³னம் நிபாதானஞ்ச லிங்க³வசனவஸேன கத²னம் யுஜ்ஜதி இத்தி²லிங்கா³தி³வஸேன ஏகத்தாதி³வஸேன ச அப்பவத்தனதோ. வுத்தஞ்ச –

‘‘ஸதி³ஸம் தீஸு லிங்கே³ஸு, ஸப்³பா³ஸு ச விப⁴த்திஸு;

வசனேஸு ச ஸப்³பே³ஸு, யம் ந ப்³யேதி தத³ப்³யய’’ந்தி.

ஏத்த² ஸியா – நனு ச போ⁴ ‘‘அத்தி² ஸக்கா லப்³பா⁴ இச்சேதே பட²மாயா’’தி வசனதோ அத்தி²ஸத்³தோ³ பட²மாய விப⁴த்தியா யுத்தோ, ஏவம் ஸந்தே கஸ்மா ‘‘ஸதி³ஸம் தீஸு லிங்கே³ஸூ’’திஆதி³ வுத்தந்தி? ஸச்சம் அத்தி²ஸத்³தோ³ பட²மாய விப⁴த்தியா யுத்தோ, ததா² நத்தி²ஸத்³தோ³ அத்தி²ஸத்³த³ஸ்ஸ வசனலேஸேன க³ஹேதப்³ப³த்தா யுக³ளபத³த்தா ச. இத³ம் பன ‘‘ஸதி³ஸம் தீஸு லிங்கே³ஸூ’’திஆதி³வசனம் உபஸக்³க³னிபாதஸங்கா²தே அஸங்க்²யாஸத்³தே³ ஸந்தா⁴ய வுத்தம், ந ஏகேகமஸங்க்²யாஸத்³த³ம் ஸந்தா⁴ய. ததா² ஹி ‘‘அஸங்க்²யா’’தி ச ‘‘அப்³யயா’’தி ச லத்³த⁴வோஹாரேஸு உபஸக்³க³னிபாதேஸு உபஸக்³கா³ ஸப்³பே³பி ஸப்³ப³விப⁴த்திவசனகா. நிபாதானம் பன ஏகச்சே பட²மாதீ³ஸு யதா²ரஹம் விப⁴த்தியுத்தா, ஏகச்சே அவிப⁴த்தியுத்தா. தத்த² யே யத³க்³கே³ன விப⁴த்தியுத்தா, தே தத³க்³கே³ன தப்³ப³சனகா. உபஸக்³க³னிபாதேஸு ஹி பச்சேகம் ‘‘இத³ம் நாம வசன’’ந்தி லத்³து⁴ம் ந ஸக்கா, ஸப்³ப³ஸங்கா³ஹகவஸேன பன ‘‘ஸதி³ஸம் தீஸு லிங்கே³ஸூ’’திஆதி³ புப்³பா³சரியேஹி வுத்தம். கச்சாயனாசரியேனபி இமமேவத்த²ம் ஸந்தா⁴ய ‘‘ஸப்³பா³ஸமாவுஸோபஸக்³க³னிபாதாதீ³ஹி சா’’தி வுத்தம். ந ஹி ஆவுஸோஸத்³த³தோ ஸப்³பா³பி விப⁴த்தியோ லப்³ப⁴ந்தி, அத² கோ² ஆலபனத்த²வாசகத்தா ஏகவசனிகஅனேகவசனிகா பட²மாவிப⁴த்தியோயேவ லப்³ப⁴ந்தி. அயமஸ்மாகம் க²ந்தி.

கேசி பன ஸப்³பே³ஹிபி நிபாதேஹி ஸப்³ப³விப⁴த்திலோபம் வத³ந்தி, தம் ந க³ஹேதப்³ப³ம். ‘‘அத்தி² ஸக்கா லப்³பா⁴ இச்சேதே பட²மாய. தி³வா பி⁴ய்யோ நமோ இச்சேதே பட²மாய ச து³தியாய சா’’திஆதி³வசனதோ, பத³பூரணமத்தானஞ்ச அவிப⁴த்தியுத்தானம் அத² க²லு வத வத² இச்சாதீ³னம் நிபாதானம் வசனதோ. ஏத்தா²பி ஸியா ‘‘நனு ச போ⁴ அவிப⁴த்தியுத்தானம்பி நிபாதானம் ஸம்ப⁴வதோ அத்தி² நத்தி²ஸத்³தா³னம் அவிப⁴த்திகோ நித்³தே³ஸோ காதப்³போ³, அத² கிமத்த²ம் ‘அத்தி²யா நவ, நத்தி²யா நவா’தி ஸவிப⁴த்திகோ நித்³தே³ஸோ கதோ’’தி? ஸப்³ப³தா² விப⁴த்தீஹி வினா அத்த²ஸ்ஸ நித்³தி³ஸிதுமஸக்குணேய்யத்தாதி.

யதி³ ஏவம் ‘‘அத்தி² ஸக்கா லப்³பா⁴ இச்சேதே பட²மாயா’’தி வசனதோ அத்தி² நத்தி²ஸத்³தா³ லுத்தாய பட²மாய விப⁴த்தியா வஸேன பட²மாவிப⁴த்திகாயேவ நித்³தி³ஸிதப்³பா³, ஏவமகத்வா கஸ்மா ஸத்தம்யந்தவஸேன ‘‘அத்தி²யா நத்தி²யா’’தி நித்³தி³ட்டா²தி? ஸச்சம், அத்தி² நத்தி²ஸத்³தா³ பட²மாவிப⁴த்தியுத்தாயேவ நித்³தி³ஸிதப்³பா³, ததா²பி ‘‘அத்தி²பச்சயே நவ, நத்தி²பச்சயே நவா’’தி ஏதஸ்ஸத்த²ஸ்ஸ பரிதீ³பனே பட²மாய ஓகாஸோ நத்தி², ஸத்தமியாயேவ பன அத்தி², தஸ்மா ‘‘அத்தி²யா நவ, நத்தி²யா நவா’’தி வுத்தம். இதி அத்தி²யானத்தி²யாஸத்³தா³னம் ஸத்தம்யந்தபா⁴வே ஸித்³தே⁴யேவ ததியாசதுத்தீ²பஞ்சமீச²ட்டி²யந்தபா⁴வோபி ஸித்³தோ⁴யேவ ஹோதி. தஸ்மா ‘‘அத்தி²பா⁴வோ அத்தி²தா’’திஆதீ³ஸுபி அத்தி²யா பா⁴வோ அத்தி²பா⁴வோ, நத்தி²யா பா⁴வோ நத்தி²பா⁴வோ, அத்தி²யா பா⁴வோ அத்தி²தாபி⁴ஆதி³னா ஸமாஸதத்³தி⁴தவிக்³க³ஹோ அவஸ்ஸமிச்சி²தப்³போ³. யதி³த³மம்ஹேஹி வுத்தம், தம் ‘‘பாளியா விருஜ்ஜ²தீ’’தி ந வத்தப்³ப³ம் பாளினயானுஸாரேன வுத்தத்தாதி.

ஏவம் ஹோது, கஸ்மா போ⁴ ‘‘அத்தி²யா, நத்தி²யா’’தி இத்தி²லிங்க³னித்³தே³ஸோ கதோ, நனு நிபாதோபஸக்³கா³ அலிங்க³பே⁴தா³தி? ஸச்சம், இத³ம் பன டா²னம் அதீவ ஸுகு²மம், ததா²பி புப்³பா³சரியானுபா⁴வஞ்ஞேவ நிஸ்ஸாய வினிச்ச²யம் ப்³ரூம. யதா² ஹி வீஸதிஇச்சாதீ³னம் ஸங்க்²யாஸத்³தா³னம் ஸரூபதோ அத³ப்³ப³வாசகத்தேபி த³ப்³ப³வாசகானம் லதாமதிரத்திஇத்தீ² யாகு³வதூ⁴ஸத்³தா³னம் விய இத்தி²லிங்க³பா⁴வோ ஸத்³த³ஸத்த²விதூ³ஹி அனுமதோ, ஏவம் அத³ப்³ப³வாசகத்தேபி அத்தி² நத்தி²ஸத்³தா³னம் கத்த²சி இத்தி²லிங்க³பா⁴வோ ஸத்³த⁴ம்மவிதூ³ஹி அனுமதோ. தேனாஹ ஆயஸ்மா த⁴ம்மஸேனாபதி ‘‘அத்தி²யா நவ, நத்தி²யா நவா’’தி. அத² வா ‘‘அத்தி²யா, நத்தி²யா’’தி இமானி லிங்க³பா⁴வவினிமுத்தானி ஸத்தமியந்தானி நிபாதபதா³னீதிபி க³ஹேதப்³பா³னி, ந ஏத்த² சோதே³தப்³ப³ம், ஏவரூபானி நிபாதபதா³னி புப்³பா³சரியேஹி வுத்தானி ந ஸந்தி, தஸ்மா ச²ட்³டே³தப்³ப³மித³ம் வசனந்தி.

பாவசனஸ்மிஞ்ஹி க³ரூஹி அனித்³தி³ட்டா²னிபி அனேகவிஹிதானி நிபாதபதா³னி ஸந்தி³ஸ்ஸந்தி, நாபி ‘‘ஹேதுயா, அதி⁴பதியா, அத்தி²யா, நத்தி²யா’’தி ஏவமாதீ³ஸு ‘‘அபஸத்³தா³ இமே’’தி விரோதோ⁴ உப்பாதே³தப்³போ³. ந ஹி அசிந்தேய்யானுபா⁴வேன பாரமிதாபுஞ்ஞேன நிப்ப²ன்னேன அனாவரணஞாணேன ஸப்³ப³ம் ஞேய்யமண்ட³லம் ஹத்த²தலே ஆமலகம் விய பச்சக்க²ம் கத்வா பஸ்ஸதோ பு³த்³த⁴ஸ்ஸ வசனே அஞ்ஞேஸம் வாசாவிப்பலாபோ அவஸ்ஸம் லப்³ப⁴தீதி. நனு ச போ⁴ ‘‘ஹேதுயா, அதி⁴பதியா, அத்தி²யா, நத்தி²யா’’தி ச இத³ம் ஸாரிபுத்தத்தே²ரவசனம் தேன நிக்கி²த்தத்தா. ததா²க³தேன ஹி தாவதிம்ஸப⁴பனே தே³ஸிதகாலே இமானி பதா³னி ந ஸந்தி, ஏவம் ஸந்தே கஸ்மா ‘‘பு³த்³த⁴வசன’’ந்தி வத³தா²தி? பு³த்³த⁴வசனம்யேவ நாம. ஆயஸ்மதோ ஹி ஸாரிபுத்தஸ்ஸ ததா²க³தேன நயோ தி³ன்னோ, தேனபி பபி⁴ன்னபடிஸம்பி⁴தே³ன ஸத்து²கப்பேன அக்³க³ஸாவகேன ஸத்து² ஸந்திகா நயம் லபி⁴த்வா ப்³யஞ்ஜனம் ஸுரோபிதம் கதம். ஸப்³பே³பி ஹி படிஸம்பி⁴த³ப்பத்தா அரியா து³ன்னிருத்திம் ந வத³ந்தி நிருத்திபபே⁴த³ஸ்மிம் ஸுகுஸலத்தா, தஸ்மா அஞ்ஞேஸமவிஸயோ ஏஸ அரியானம் வோஹாரோதி த³ட்ட²ப்³ப³ம்.

இதா³னி ஸதாதீ³னம் நாமிகபத³மாலா வுச்சதே –

ஸதம், ஸதானி, ஸதா. ஸதம், ஸதானி, ஸதே. ஸதேன, ஸதேஹி, ஸதேபி⁴. ஸதஸ்ஸ, ஸதானம். ஸதா, ஸதஸ்மா, ஸதம்ஹா, ஸதேஹி, ஸதேபி⁴. ஸதஸ்ஸ, ஸதானம். ஸதே, ஸதஸ்மிம், ஸதம்ஹி, ஸதேஸு. ஏவம் ஸஹஸ்ஸம், ஸஹஸ்ஸானீதி யோஜேதப்³ப³ம். த³ஸஸஹஸ்ஸம் ஸதஸஹஸ்ஸம் த³ஸஸதஸஹஸ்ஸந்தி ஏத்தா²பி ஏஸேவ நயோ. அயம் பனேத்த² பயோகோ³ ‘‘ஸதம் பி⁴க்கூ², ஸதம் இத்தி²யோ, ஸதம் சித்தானி. பி⁴க்கூ²னம் ஸதம், இத்தீ²னம் ஸதம், சித்தானம் ஸதம். ஸஹஸ்ஸாதீ³ஸுபி ஏஸேவ நயோ. இத்த²ஞ்ச அஞ்ஞதா²பி ஸத்³த³ரூபானி ப⁴வந்தி. கோடி, கோடீ, கோடியோ. ரத்திநயேன ஞேய்யம்.

ஏகப்பபு⁴திதோ யாவ, த³ஸகா யா பவத்ததி;

ஸங்க்²யா தாவ ஸா ஸங்க்²யேய்ய-ப்பதா⁴னாதி க³ரூ வது³ம்.

வீஸதிதோ யாவ ஸதா, யா ஸங்க்²யா தாவ ஸா பன;

ஸங்க்²யாப்பதா⁴னா ஸங்க்²யேய்ய-ப்பதா⁴னாதி ச வண்ணயும்.

அபிச –

வீஸதோ யாவ கோடியா, ஸங்க்²யா தாவ ஹி ஸா க²லு;

ஸங்க்²யாப்பதா⁴னா ஸங்க்²யேய்ய-ப்பதா⁴னா சாதி நித்³தி³ஸே.

ததா² ஹி ‘‘அஸீதி கோடியோ ஹித்வா, ஹிரஞ்ஞஸ்ஸாபி பப்³ப³ஜி’’ந்தி, ‘‘கீ²ணாஸவா வீதமலா, ஸமிம்ஸு ஸதகோடியோ’’தி ச பாளி தி³ஸ்ஸதி.

இமஸ்மிம் பன டா²னே ஸப்³பே³ஸம் ஸங்க்²யாஸத்³த³ரூபானம் பாகடீகரணேன விஞ்ஞூனம் ஸுகு²மஞாணபடிலாப⁴த்த²ம் ஸாட்ட²கத²ம் உதா³னபாளிப்பதே³ஸம் அஞ்ஞஞ்ச பாளிப்பதே³ஸமட்ட²கதா²வசனஞ்ச ஆஹரித்வா த³ஸ்ஸயிஸ்ஸாமி –

‘‘யேஸம் கோ² விஸாகே² ஸதம் பியானி, ஸதம் தேஸம் து³க்கா²னி, யேஸம் நவுதி பியானி, நவுதி தேஸம் து³க்கா²னி. யேஸம் அஸீதி…பே… யேஸம் ஸத்ததி. யேஸம் ஸட்டி². யேஸம் பஞ்ஞாஸம், யேஸம் சத்தாரீஸம், யேஸம் திம்ஸம். யேஸம் கோ² விஸாகே² வீஸம் பியானி, வீஸதி தேஸம் து³க்கா²னி. யேஸம் த³ஸ. யேஸம் நவ. யேஸம் அட்ட². யேஸம் ஸத்த. யேஸம் ச². யேஸம் பஞ்ச. யேஸம் சத்தாரி. யேஸம் தீணி. யேஸம் த்³வே. யேஸம் ஏகம் பியம், தேஸம் ஏகம் து³க்க²’’ந்தி.

தத்த² ஸதம் பியானீதி ஸதம் பியாயிதப்³ப³வத்தூ²னி. ‘‘ஸதம் பிய’’ந்திபி கேசி பட²ந்தி. ஏத்த² ச யஸ்மா ஏகதோ பட்டா²ய யாவ த³ஸ, தாவ ஸங்க்²யாஸங்க்²யேய்யப்பதா⁴னா, தஸ்மா ‘‘யேஸம் த³ஸ பியானி, த³ஸ தேஸம் து³க்கா²னீ’’திஆதி³னா பாளி ஆக³தா. கேசி பன ‘‘யேஸம் த³ஸ பியானம், த³ஸ தேஸம் து³க்கா²ன’’ந்திஆதி³னா பட²ந்தி, தம் ந ஸுந்த³ரம். யஸ்மா பன வீஸதிதோ பட்டா²ய யாவ ஸதம், தாவ ஸங்க்²யேய்யப்பதா⁴னா ஸங்க்²யாப்பதா⁴னா ச, தஸ்மா தத்தா²பி ஸங்க்²யேய்யப்பதா⁴னம்யேவ க³ஹேத்வா ‘‘யேஸம் கோ² விஸாகே² ஸதம் பியானி, ஸதம் தேஸம் து³க்கா²னீ’’திஆதி³னா பாளி ஆக³தா. ஸப்³பே³ஸம்பி ச யேஸம் ஏகம் பியம், ஏகம் தேஸம் து³க்க²ந்தி பாடோ², ந பன து³க்க²ஸ்ஸாதி. ஏகஸ்மிஞ்ஹி பத³க்கமே ஏகரஸாவ ப⁴க³வதோ தே³ஸனா ஹோதீதி. தஸ்மா யதா²வுத்தனயாவ பாளி வேதி³தப்³பா³. அயம் தாவ ஸாட்ட²கதோ² உதா³னபாளிப்பதே³ஸோ.

இதா³னி அஞ்ஞோ பாளிப்பதே³ஸோ அட்ட²கதா²பாட²ப்பதே³ஸோ ச நீயதே –

‘‘ஸதம் ஹத்தீ² ஸதம் அஸ்ஸா, ஸதம் அஸ்ஸதரீரதா²;

ஸதம் கஞ்ஞா ஸஹஸ்ஸானி, ஆமுக்கமணிகுண்ட³லா;

ஏகஸ்ஸ பத³வீதிஹாரஸ்ஸ, கலம் நாக்³க⁴ந்தி ஸோளஸி’’ந்தி

பாளி. ஏத்த² ‘‘ஸதம் ஹத்தீ²’’திஆதீ³னி விஸேஸிதானி, ‘‘ஸஹஸ்ஸானீ’’தி விஸேஸனம், தஸ்மா ஸதம்ஸத்³த³ம் ஸஹஸ்ஸஸத்³தே³ன யோஜேத்வா ‘‘ஹத்தீ²’’திஆதீ³னி பன உபபத³ம் கத்வா அத்தோ² க³ஹேதப்³போ³. ஹத்தீ² ஸதம் ஸஹஸ்ஸானி. அஸ்ஸா ஸதம் ஸஹஸ்ஸானி. அஸ்ஸதரீரதா² ஸதம் ஸஹஸ்ஸானி. ஆமுக்கமணிகுண்ட³லா கஞ்ஞா ஸதம் ஸஹஸ்ஸானி. இத³ம் ஸங்க்²யேய்யப்பதா⁴னவஸேனத்த²க³ஹணம். ஸங்க்²யாப்பதா⁴னவஸேன பன அயம்பி அத்தோ² க³ஹேதப்³போ³ ‘‘ஹத்தீ²னம் ஸதஸஹஸ்ஸம், அஸ்ஸானம் ஸதஸஹஸ்ஸம், அஸ்ஸதரீரதா²னம் ஸதஸஹஸ்ஸம், ஆமுக்கமணிகுண்ட³லானம் கஞ்ஞானம் ஸதஸஹஸ்ஸ’’ந்தி. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³. ‘‘யோஜனானம் ஸதானுச்சோ, ஹிமவா பஞ்ச பப்³ப³தோ’’தி அயமட்ட²கதா²பாடோ². ஏத்த² ‘‘பஞ்சா’’தி ஸத்³த³ம் ஸதஸத்³தே³ன ஸத்³தி⁴ம் யோஜேத்வா ‘‘ஸிப்பிகானம் ஸதம் நத்தீ²’’தி ஏத்த² விய ஹிமவா பப்³ப³தோ யோஜனானம் பஞ்ச ஸதானி உச்சோதி ஸங்க்²யாப்பதா⁴னவஸேன அத்தோ² க³ஹேதப்³போ³. ‘‘பஞ்ச ஸதானீ’’தி ச அத்³து⁴னோ அச்சந்தஸம்யோக³வஸேன உபயோக³வசனம். அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³. ஸதமிதி ஸத்³தோ³ ‘‘ஸதம் ஹோமி, ஸஹஸ்ஸம் ஹோமீ’’திஆதீ³ஸு ஏகவசனோ. ‘‘அதே²த்தே²கஸதம் க²த்யா, அனுயந்தா யஸஸ்ஸினோ’’திஆதீ³ஸு ப³ஹுவசனோ. ஏவம் ஸஹஸ்ஸாதீ³னம்பி ஏகவசனப³ஹுவசனதா லப்³ப⁴தி. ததா² ஹி ‘‘பி⁴ய்யோ நம் ஸதஸஹஸ்ஸம், யக்கா²னம் பயிருபாஸதீ’’தி ஏத்த² ‘‘ஸதஸஹஸ்ஸ’’ந்தி ஏகவசனம். ‘‘பரோஸஹஸ்ஸம் கோ² பனஸ்ஸ புத்தா ப⁴விஸ்ஸந்தீ’’தி ஏத்த² ஸஹஸ்ஸந்தி ப³ஹுவசனந்தி த³ட்ட²ப்³ப³ம்.

‘‘கப்பே ச ஸதஸஹஸ்ஸே, சதுரோ ச அஸங்கி²யே;

அமரம் நாம நக³ரம், த³ஸ்ஸனேய்யம் மனோரம’’ந்தி

பாளி. ஏத்த² ‘‘கப்பே ச ஸதஸஹஸ்ஸே சதுரோ ச அஸங்கி²யேதி ஸாமிஅத்தே² உபயோக³ப³ஹுவசனம், தஸ்மா ‘‘மஹாகப்பானம் ஸதஸஹஸ்ஸானம் சதுன்னம் அஸங்கி²யானம் மத்த²கே’’தி அத்தோ² க³ஹேதப்³போ³, ‘‘மத்த²கே’’தி சேத்த² வசனஸேஸோ. ‘‘கப்பஸதஸஹஸ்ஸாதி⁴கானம் சதுன்னம் அஸங்கி²யானம் மத்த²கே’’இச்சேவத்தோ². அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘கப்பே ச ஸதஸஹஸ்ஸே, சதுரோ ச அஸங்கி²யே;

ஏத்த²ந்தரே யம் சரிதம், ஸப்³ப³ம் தம் போ³தி⁴பாசன’’ந்தி

பாளி. ஏத்த² ‘‘கப்பே’’தி அச்சந்தஸம்யோக³வஸேன உபயோக³ப³ஹுவசனம். ‘‘ஸதஸஹஸ்ஸே கப்பே’’தி கப்பஸத்³த³ஸம்ப³ந்தே⁴ன சாயம் புல்லிங்க³னித்³தே³ஸோ உபயோக³னித்³தே³ஸோ ச. ஸமானாதி⁴கரணஞ்ஹி இத³ம் கப்பஸத்³தே³ன. ‘‘சதுரோ ச அஸங்கி²யே’’தி அச்ச²ந்தஸம்யோக³வஸேன உபயோக³ப³ஹுவசனானி. கஸ்ஸ பன அஸங்கி²யேதி? அஞ்ஞஸ்ஸ அவுத்தத்தா கப்பஸ்ஸ ச வுத்தத்தா பகரணதோ ‘‘கப்பான’’ந்தி அயமத்தோ² விஞ்ஞாயதேவ. ந ஹி வுத்தம் வஜ்ஜேத்வா அவுத்தஸ்ஸ கஸ்ஸசி க³ஹணம் யுத்தந்தி. சஸத்³தோ³ ஸம்பிண்ட³னத்தோ² ‘‘மஹாகப்பானம் சதுரோ அஸங்க்²யேய்யே ஸதஸஹஸ்ஸே ச மஹாகப்பே’’தி. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘க⁴டானேகஸஹஸ்ஸானி, கும்பீ⁴னஞ்ச ஸதா ப³ஹூ’’தி பாளி. ஏத்த² க⁴டாதி க⁴டானம். ஸாமிஅத்தே² ஹி இத³ம் பச்சத்தவசனம். ‘‘க⁴டானம் அனேகஸஹஸ்ஸானி’’ இச்சேவத்தோ². கும்பீ⁴னஞ்ச ஸதா ப³ஹூதி அனேகானி ச கும்பீ⁴னம் ஸதானி. ஏத்த² நிகாரலோபோ த³ட்ட²ப்³போ³. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘த³ஸவீஸஸஹஸ்ஸானம், த⁴ம்மாபி⁴ஸமயோ அஹு;

ஏகத்³வின்னம் அபி⁴ஸமயோ, க³ணனாதோ அஸங்கி²யோ’’தி

பாளி. ஏத்த² த³ஸவீஸஸஹஸ்ஸானந்தி த³ஸஸஹஸ்ஸானம் வீஸஸஹஸ்ஸானஞ்ச. த⁴ம்மாபி⁴ஸமயோதி சதுஸச்சப்படிவேதோ⁴. ஏகத்³வின்னந்தி ஸீஸமத்தகத²னம், தேன ‘‘ஏகஸ்ஸ சேவ த்³வின்னஞ்ச திண்ணம் சதுன்னம்…பே… த³ஸன்ன’’ந்திஆதி³னா நயேன அஸங்க்²யேய்யோதி அத்தோ². அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘சத்தாரி ஸதஸஹஸ்ஸானி, ச²ளபி⁴ஞ்ஞா மஹித்³தி⁴கா;

தீ³பங்கரம் லோகவிது³ம், பரிவாரேந்தி ஸப்³ப³தா³’’தி

பாளி. ஏத்த² சத்தாரி ஸதஸஹஸ்ஸானீதி இத³ம் லிங்க³பே⁴த³வஸேன ‘‘ச²ளபி⁴ஞ்ஞா மஹித்³தி⁴கா’’தி இமேஹி த்³வீஹி பதே³ஹி ஸமானாதி⁴கரணம். ஈதி³ஸேஸு ஹி டா²னேஸு அஸங்க்²யேய்ய வாசகோபி ஸத்³தோ³ நபும்ஸகோவ ஹோதி, தஸ்மா ‘‘சத்தாரி ஸதஸஹஸ்ஸானீ’’தி ச ‘‘ச²ளபி⁴ஞ்ஞா’’தி ச ‘‘மஹித்³தி⁴கா’’தி ச ஏதம் பத³த்தயம் ஸமானாதி⁴கரணம். அத² வா ச²ளபி⁴ஞ்ஞா மஹித்³தி⁴காதி ச²ளபி⁴ஞ்ஞானம் மஹத்³தி⁴கானந்தி ஸாமிஅத்தே² பச்சத்தவசனம் த³ட்ட²ப்³ப³ம். இமஸ்மிம் பனத்தே² ‘‘சத்தாரி ஸதஸஹஸ்ஸானீ’’தி அயம் ஸங்க்²யாவசனோ ப⁴வதி. ‘‘தீணி ஸதஸஹஸ்ஸானி, நாரியோ ஸமலங்கதா’’திஆதீ³ஸுபி அயம் நயோ நேதப்³போ³. ‘‘தா ச ஸத்த ஸதா ப⁴ரியா, தா³ஸ்யோ ஸத்த ஸதானி சா’’தி பாளி. ஏத்த² ஸதாதி ‘‘ஸதானீ’’தி நபும்ஸகவஸேன க³ஹேதப்³ப³ம், ந இத்தி²லிங்க³வஸேன. ‘‘ஸதா’’தி ஹி ‘‘பஞ்ச சித்தா விபாகா’’திஆதீ³னி விய நபும்ஸகரூபம். இத்தி²லிங்க³பூ⁴தா ஹி ஸதஸத்³தோ³ நத்தி², ததா² புல்லிங்க³பூ⁴தோ. யதி³ ச த்³விலிங்கோ³ ஸதஸத்³தோ³ ஸியா, ஏவஞ்ச ஸதி ‘‘புரிஸோ, கஞ்ஞா’’தி ச ஓகாரந்தபுல்லிங்க³ஆகாரந்தித்தி²ரூபேஹிபிப⁴விதப்³ப³ம். ரூபத்³வயம்பி ஸதஸத்³த³ஸ்ஸ நத்தி², தேன ஞாயதி ‘‘ஸதஸத்³தோ³ ஏகந்தனபும்ஸகோ’’தி.

நனு ச போ⁴ ‘‘தா தே³வதா ஸத்தஸதா உளாரா’’தி ஏத்த² ஸதஸத்³தோ³ இத்தி²லிங்கோ³ ஹுத்வா தி³ஸ்ஸதீதி? ந, நபும்ஸகோயேவாதி. நனு ச போ⁴ தே³வதாஸத்³தே³ன ஸமானாதி⁴கரணோதி? ஸச்சம் ஸமானாதி⁴கரணோ, ததா²பி நபும்ஸகோயேவ. ஈதி³ஸேஸு ஹி ஸங்க்²யாவிஸயேஸு ஸமானாதி⁴கரணபா⁴வோ அப்பமாணோ. ததா² ஹி ‘‘பஞ்ச பச்சேகபு³த்³த⁴ஸதானி இமஸ்மிம் இஸிகி³லிஸ்மிம் பப்³ப³தே சிரவாஸினோ அஹேஸு’’ந்தி நபும்ஸகலிங்கே³ன புல்லிங்க³ஸ்ஸ ஸமானாதி⁴கரணதா தி³ஸ்ஸதி, தஸ்மா ‘‘தா தே³வதா ஸத்தஸதா உளாரா’’தி ஏத்தா²பி ‘‘ஸத்தஸதானீ’’தி நபும்ஸகபா⁴வோயேவாதி அவக³ந்தப்³போ³. ‘‘ஸத்த ஹத்தி²ஸதே த³த்வா’’திஆதீ³ஸுபி ஸதஸத்³தோ³ நபும்ஸகோயேவ. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘நவுதிகோடிஸஹஸ்ஸேஹி, பரிவாரேஸி மஹாமுனீ’’தி பாளி. ஏத்த² ‘‘நவுதிகோடிஸஹஸ்ஸேஹி பி⁴க்கூ²ஹீ’’தி வா ‘‘பி⁴க்கூ²னம் நவுதிகோடிஸஹஸ்ஸேஹீ’’தி வா ஸங்க்²யேய்யஸங்க்²யாபதா⁴னவஸேன அத்தோ² க³ஹேதப்³போ³. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘ஸதஸஹஸ்ஸவஸ்ஸானி, ஆயு தஸ்ஸ மஹேஸினோ’’தி பாளி. ஏத்த² ‘‘ஸதஸஹஸ்ஸவஸ்ஸானீ’’தி காலஸ்ஸ அச்சந்தஸம்யோக³வஸேன உபயோக³வசனம். ததா² ‘‘த³ஸவஸ்ஸஸஹஸ்ஸானி, அகா³ர’மஜ்ஜ² ஸோ வஸீ’’தி பாளியம்பி. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘இதோ ஸதஸஹஸ்ஸம்ஹி, கப்பே உப்பஜ்ஜி நாயகோ’’தி பாளி, ‘‘ஏகனவுதே இதோ கப்பே’’தி பாளி ச. ஏத்த² ஸதஸஹஸ்ஸம்ஹி கப்பேதி ஸதஸஹஸ்ஸானம் கப்பானம் மத்த²கே. ஏகனவுதே கப்பேதி ஏகனவுதியா கப்பானம் மத்த²கேதி பு⁴ம்மவசனஸ்ஸ ஸாமிபு⁴ம்மவசனவஸேன அத்தோ² க³ஹேதப்³போ³. ததா² ஹி ‘‘ப⁴க³வதி ப்³ரஹ்மசரியம் வுஸ்ஸதீ’’தி ஏத்த² பு⁴ம்மவசனஸ்ஸ ‘‘ப⁴க³வதோ ஸந்திகே’’தி ஸாமிபு⁴ம்மவசனவஸேன அத்தோ² க³ஹிதோ. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘யதி³ தத்த² ஸஹஸ்ஸானி, ஸதானி நஹுதானி ச;

நேவம்ஹாகம் ப⁴யம் கோசி, வனே வாளேஸு விஜ்ஜதீ’’தி

பாளி. அயமேதஸ்ஸா அத்தோ² – தத்த² வனே வாளானம் ஸஹஸ்ஸானி ச ஸதானி ச நஹுதானி ச யதி³ விஜ்ஜந்தி. அத² வா ஸஹஸ்ஸானி ஸதானீதி ஸதஸஹஸ்ஸானி, வாளானம் ஸதஸஹஸ்ஸானி ச நஹுதானி ச யதி³ விஜ்ஜந்தி, ஏவம் விஜ்ஜந்தேஸுபி வாளேஸு கோசீதி க்வசி. கோசிஸத்³தோ³ ஹி ‘‘கோ தே ப³லம் மஹாராஜா’’தி ஏத்த² கோஸத்³தோ³ விய க்வஸத்³த³த்தே² வத்ததி, நிமித்தத்தே² சாயம் நித்³தே³ஸோ. தேன ‘‘கோசி க்வசி கிஸ்மிஞ்சி வாளே ஏகஸ்ஸபி வாளமிக³ஸ்ஸ காரணா நேவம்ஹாகம் ப⁴யம் விஜ்ஜதீ’’தி அத்தோ² க³ஹேதப்³போ³. அத² வா கோசீதி கிஞ்சி அப்பமத்தகம்பி. ஏத்த² பன ‘‘வாளேஸூ’’தி நிமித்தத்தே² பு⁴ம்மம். வாளானம் காரணா அப்பமத்தகம்பி அம்ஹாகம் ப⁴யம் ந விஜ்ஜதீதி. அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘ஸப்³ப³ம் ஸதஸஹஸ்ஸானி, ச²த்திம்ஸபரிமண்ட³லம்;

த³ஸஞ்சேவ ஸஹஸ்ஸானி, அட்³டு⁴ட்³டா⁴னி ஸதானி சா’’தி

அட்ட²கதா²பாடோ². ஏத்த² யஸ்மா ஸத்³த³தோ ஸமானவிப⁴த்திலிங்க³வசனானம் பதா³னம் அஸமானவிப⁴த்திலிங்க³வசனானம் வா அத்த²தோ பன ஸமானானம் தூ³ரே டி²தானம்பி ஏகஸம்ப³ந்தோ⁴ ஹோதி, இதரேஸம் ஸமீபே டி²தானம்பி ந ஹோதி, தஸ்மா ‘‘ஸப்³ப³’’ந்தித³ம் ‘‘பரிமண்ட³ல’’ந்திமினா ஸம்ப³ந்தி⁴தப்³ப³ம். ‘‘ச²த்திம்ஸா’’தி இத³ம் பன ‘‘ஸதஸஹஸ்ஸானீ’’திமினா ஸம்ப³ந்தி⁴தப்³ப³ம். அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘து³வே ஸதஸஹஸ்ஸானி, சத்தாரி நஹுதானி ச;

ஏத்தகம் ப³ஹலத்தேன, ஸங்கா²தாயம் வஸுந்த⁴ரா’’தி

அட்ட²கதா²பாடோ². ஏத்த² ‘‘து³வே’’தி விஸேஸனம், ‘‘ஸதஸஹஸ்ஸானீ’’தி விஸேஸிதப்³ப³ம். ததா² ‘‘சத்தாரீ’’தி விஸேஸனம், ‘‘நஹுதானீ’’தி விஸேஸிதப்³ப³ம். ததா² ஹி ‘‘ஸதஸஹஸ்ஸானி நஹுதானி சா’’தி இமானி ‘‘து³வே சத்தாரீ’’தி இமேஹி விஸேஸிதப்³ப³த்தா ‘‘த்³விஸதஸஹஸ்ஸம் சதுனஹுத’’ந்தி அத்த²ப்பகாஸனானி ப⁴வந்தி. ஏவம் ஸந்தேபி ‘‘து³வே’’இச்சாதீ³னம் ஸங்க்²யாஸத்³தா³னம் ‘‘ஸதஸஹஸ்ஸானீ’’திஆதீ³ஹி ஸங்க்²யாஸத்³தே³ஹி ஸமானாதி⁴கரணதா புப்³பா³சரியேஹி ந வுத்தா. யஸ்மா பன யதா² ‘‘து³வே புது²ஜ்ஜனா வுத்தா. ஸதஸஹஸ்ஸம் பி⁴க்கூ²’’திஆதீ³ஸு ஸமானாதி⁴கரணதா லப்³ப⁴தி த³ப்³ப³வாசகத்தா விஸேஸிதப்³ப³பதா³னம், ந ததா² ‘‘து³வே ஸதஸஹஸ்ஸானீ’’திஆதீ³ஸு அத³ப்³ப³வாசகத்தா விஸேஸிதப்³ப³பதா³னம், தஸ்மா ஈதி³ஸேஸு டா²னேஸு ஸமானாதி⁴கரணதா ந இச்சி²தப்³பா³ யுத்தியா அபா⁴வதோ. யதி³ ஏவம் ‘‘குஸலா, ரூபம், சக்கு²மா’’திஆதீ³னம் விய இமேஸமஞ்ஞமஞ்ஞஸம்ப³ந்த⁴ரஹிதா ஸியாதி? ந, விஸேஸனவிஸேஸிதப்³ப³பா⁴வேன க³ஹிதத்தா. யஜ்ஜேவம் ஸமானாதி⁴கரணபா⁴வோ லத்³த⁴ப்³போ³தி? ந, நியமாபா⁴வதோ. ஏகந்தேன ஹி கு³ணகு³ணீனம்யேவ விஸேஸனவிஸேஸிதப்³பா³னம் ஸமானாதி⁴கரணபா⁴வோ, ந இதரேஸம் விஸேஸனவிஸேஸிதப்³ப³த்தேபி.

தத்த² ‘‘ஏத்தக’’ந்தி பமாணவசனம். ‘‘ப³ஹலத்தேனா’’தி விஸேஸனே ததியா. உப⁴யேன இமமத்த²ம் த³ஸ்ஸேதி ‘‘அயம் வஸுந்த⁴ரா ப³ஹலத்தேன யோஜனானம் து³வே ஸதஸஹஸ்ஸானி சத்தாரி நஹுதானி ச ஏத்தகம் ஸங்கா²தா’’தி. ‘‘ஏத்தக’’ந்தி பத³ஸ்ஸ ச ‘‘து³வே ஸதஸஹஸ்ஸானி சத்தாரி நஹுதானி சா’’தி இமேஹி வா ‘‘வஸுந்த⁴ரா’’தி இமினா வா ஸமானாதி⁴கரணதா ந இச்சி²தப்³பா³. ஏத்தகந்தி ஹி பா⁴வனபும்ஸகம், யம் ஸத்³த³ஸத்தே² க்ரியாவிஸேஸனந்தி வத³ந்தி. தஸ்ஸ ‘‘ஏத்தகேன பமாணேன’’இச்சேவத்தோ². அபிச ‘‘து³வே ஸதஸஹஸ்ஸானி சத்தாரி ந ஹுதானி சா’’தி இமேஸம்பி ‘‘வஸுந்த⁴ரா’’தி இமினா ஸமானாதி⁴கரணதா ந இச்சி²தப்³பா³ ‘‘பி⁴க்கூ²னம் ஸத’’ந்தி ஏத்த² ஸதஸத்³த³ஸ்ஸ விய ஸங்க்²யாவசனமத்தத்தா. ததா² ஹி ‘‘ஏத்தக’’ந்தி வுத்தம். ‘‘ஸங்கா²தா’’தி பன ‘‘அய’’ந்தி ச இமேஸம் ‘‘வஸுந்த⁴ரா’’தி இமினா ஸமானாதி⁴கரணதா லப்³ப⁴தி. ஸப்³போ³பாயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘த³ஸேத்த² ராஜியோ ஸேதா, த³ஸ்ஸனீயா மனோரமா;

ச² பிங்க³லா பன்னரஸ, ஹலித்³தா³ தா சதுத்³த³ஸா’’தி

பாளி. ஏத்த² ச² பிங்க³லா பன்னரஸாதி ச² ச பன்னரஸ சாதி ஏகவீஸதி பிங்க³லா ராஜியோதி அத்தோ² க³ஹேதப்³போ³.

ததா² –

‘‘புத்தாபி தஸ்ஸ ப³ஹவோ, ‘ஏகனாமா’தி மே ஸுதம்;

அஸீதி த³ஸ ஏகோ ச, இந்த³னாமா மஹப்³ப³லா’’தி

பாளி. ஏத்த² பன ‘‘ஏகனவுதீ’’தி வத்தப்³பே³ ‘‘அஸீதி த³ஸ ஏகோ சா’’தி வுத்தம். விசித்ரஸத்³த³ரசனஞ்ஹி பாவசனம். அயம் நயோ அஞ்ஞேஸுபி ஈதி³ஸேஸு டா²னேஸு நேதப்³போ³.

‘‘திம்ஸபுரிஸனாவுத்யோ, ஸப்³பே³வேகேகனிச்சிதா;

யேஸம் ஸமம் ந பஸ்ஸாமி, கேவலம் மஹி’மம் சர’’ந்தி

பாளி. ஏத்த² ‘‘புரிஸானம் திம்ஸஸஹஸ்ஸானி நவுதி ச ஸதானி திம்ஸ நாவுத்யோ’’தி வுச்சந்தி. இமஸ்மிம் பன டா²னே திம்ஸஸத்³த³தோ ஸஹஸ்ஸஸத்³த³ஸ்ஸ நவுதிஸத்³த³தோ ச ஸதஸத்³த³ஸ்ஸ லோபம் கத்வா ‘‘திம்ஸ நாவுத்யோ’’தி வுத்தந்தி ந க³ஹேதப்³ப³ம். ஏவஞ்ஹி க³ஹணே ஸதி யத்த² கத்த²சிபி ஏதி³ஸீ ஸத்³த³ரசனா காதப்³பா³ ஸியா, கதாய ச ஏதி³ஸாய ஸத்³த³ரசனாய அத்தா²வக³மோ வினா உபதே³ஸேன ஸுணந்தானம் ந ஸியா, தஸ்மா நேவம் க³ஹேதப்³ப³ம். ஏவம் பன க³ஹேதப்³ப³ம் – ‘‘திம்ஸ நாவுத்யோ’’தி இத³ம் லோகஸங்கேதரூள்ஹம் வசனம், ஸங்கேதரூள்ஹஸ்ஸ பன வசனஸ்ஸத்தோ² யஸ்மா க³ஹிதபுப்³ப³ஸங்கேதேஹி ஸுத்வா ஞாயதே, ந உபதே³ஸதோ, தஸ்மா ப்³ரஹ்மத³த்தேன ரஞ்ஞா வுத்தகாலேபி ஸத்தா²ரா தம் கத²ம் ஆஹரித்வா வுத்தகாலேபி ஸப்³பே³ மனுஸ்ஸா வினாபி உபதே³ஸேன வசனத்த²ம் ஜானந்தீதி க³ஹேதப்³ப³ம்.

திம்ஸஞ்சேவ ஸஹஸ்ஸானி, நவுதி ச ஸதானி து;

திம்ஸ நாவுதியோ நாம, வுத்தா உமங்க³ஜாதகே.

யஸ்மா பாவசனே ஸந்தி, நயா சேவ அசிந்தியா;

வோஹாரா ச ஸுகு³ள்ஹத்தா², த³யாபன்னேன தே³ஸிதா.

தஸ்மா ஸாட்ட²கதே² தீ⁴ரோ, க³ம்பீ⁴ரே ஜினபா⁴ஸிதே;

உபதே³ஸம் ஸதா³ க³ண்ஹே, க³ரும் ஸம்மா உபட்ட²ஹம்.

க³ரூபதே³ஸஹீனோ ஹி, அத்த²ஸாரம் ந விந்த³தி;

அத்த²ஸாரவிஹீனோ ஸோ, ஸத்³த⁴ம்மா பரிஹாயதி.

க³ரூபதே³ஸலாபீ⁴ ச, அத்த²ஸாரஸமாயுதோ;

ஸத்³த⁴ம்மம் பரிபாலேந்தோ, ஸத்³த⁴ம்மஸ்மா ந ஹாயதி.

ஸத்³த⁴ம்மத்தா²ய மே தஸ்மா, ஸங்க்²யாமாலாபி பா⁴ஸிதா;

ஸப்பயோகா³ யதா²யோக³ம், ஸஹேவத்த²வினிச்ச²யா.

இதி நவங்கே³ ஸாட்ட²கதே² பிடகத்தயே ப்³யப்பத²க³தீஸு விஞ்ஞூனம்

கோஸல்லத்தா²ய கதே ஸத்³த³னீதிப்பகரணே

ஸவினிச்ச²யோ ஸங்க்²யானாமானம் நாமிகபத³மாலாவிபா⁴கோ³

நாம

தேரஸமோ பரிச்சே²தோ³.